ရှာန်မာကု2
1မာန်းရာတ်စစ်ဆာမှါတ်မှါခ့်ခါ ကိုယ်တော်ယေရှုကား ကပေရနောင်မြို့ပါ လာန်ဟာန်းဘဲမှာ။ သမီဆတာတ်ရီးဒါး ကိုယ်တော်ယေရှု ကျေမ်းဘေထုတ်ခါန်းဘန်းငှေါဘင်း ဆတာန်းဒေ သက်ပူကြီးမှာ။2စီးမှါခ့်ခါ သမီဆာကလောင်းတုံန်းတာတ်ကား စုရုံးသဘန်း ထုတ်ကြီးရီဘင်းအတွာတ် ကျေမ်းဝါမ်းပတူးပြာန်ပါဆာအချီညယ် ကျေမ်းနောင်းဘေရီးဒါး လွောပ်သဘင်းနေရာ တစ်နေရာစဲအဘိုဘန်း။ ကိုယ်တော်ယေရှုရီးဒါး ဘုရားရှာန်ဘင်း နှုတ်ကပါတ်တော်တေဒေ အန်တာတ်နင်း ဟောသကာ ဆွောန်သကာအီမှာ။3အန်ကားအချိန်ဘေ သမီဆာပီးဟူးကား လေဖြတ်သနင်းဘင်းဆိတ်ဟော်ဝါတေ ဆလုံးစောက်ပေ တာန်သဘန်းနာဖဲဘန်း ကိုယ်တော်ယေရှုပါ ထုတ်ကြီးရီမှာ။4အန်တာတ်ကား သမီဆာကလောင်းတုံန်းအတွာတ်ဟွန် လေဖြတ်သနင်းဘင်းဆိတ်တေ ကိုယ်တော်ယေရှုပါ အကော်ရန်ဘင်းအတွာတ် ကိုယ်တော်ယေရှုငှါနင်းဘင်း စောက်ဟက် ကျေမ်းခေါင်မိုးတေ အပေါက်ဖောက်သဘန်း လေဖြတ်သနင်းဘင်းဆိတ်တေ ဟိန်အေစ့်နင်းဘင်း ဆလုံးယောက်အတူတူ ကိုယ်တော်မန်းဘေ စလော့ပ်အက်ကြီးမှာ။5ကိုယ်တော်ယေရှုကား အန်ဘင်းဆိတ်တာတ် ယုံကြည်သဘင်းနာတေ ကတုံန်မှါခ့်ခါ ဟိန်ကား လေဖြတ်သနင်းဘင်းဆိတ်တေ “အဆွေ နာန်ဘင်းအပြစ်တေကား ခွာမ်းလွှတ်ခံသထှာဘန်း” ညယ် မိန့်တော်မူသမှာ။6အန်ဘင်းနေရာဘေ ထုံးဘန်းနင်းကြီးဘင်း ကျမ်းကျိန်းပေါ့ပင်း အိုးဆကြီးစယ်ယာကား အန်ဘင်းတူးဒေ သက်ပူမှါခ့်ခါ အန်တာတ်ကားအန်တာတ်7“အဘင်းဆိတ်ကား ဟမာန်အတွာတ် အန်နိမ်ငှေါထှာတေ။ ဟိန်ကား ဘုရားရှာန်ဒေ စော်ကားသဘန်းနင်းမှာ။ ဘုရားရှာန်ဟက်လွှဲသဘန်း ဟာဟမဲစဲ အပြစ်တေဒေ အခွာမ်းလွှတ်သရန်နား” ညယ် တွေးသဘန်းနင်းကြီးမှာ။8ကိုယ်တော်ယေရှုကား အန်တာတ် ဟာနိမ်တွေးသနင်းမှာငှေါဘင်းနာဒေ ဟိန်အဆေင်နောင်းဘေ ချတ်ချန်းမိန်းရှာတ်ခါဘင်းအတွာတ် အန်တာတ်တေ “ဟနိမ် ဟမာန်ငှါး အန်ဘင်းနာတေဒေ တွေးသဘန်းနင်းကြီးတေ။9အန်ဘင်းလေဖြတ်သနင်းဘင်းဆိတ်တေ ‘နာန်ဘင်းအပြစ်တေကား ခွာမ်းလွှတ်သလားခံသထှာဘန်း’ ညယ်ငှေါလားယောက် ‘ရဲဘန်း နာန်ဆလုံးဒေကွန်ဘန်း လမ်းဟာရာန်’ ညယ်ငှေါဘင်းဘေ ဟာဘင်းနာကား ပိုသောစယ်ကူတေ။10အန်နိမ်စါန်းငှေါဒီ ကမ္ဘာစောက်ပေငှါဘင်း အပြစ်တေဒေ ခွာမ်းလွှတ်သရန်ဘင်း အခွာမ်းအာဏာကား သမီဆာ ဆာ ဘေ ငှါဘင်းနာတေ ဟနိမ်နင်း ငါသက်သေကာကူ” ညယ်မိန့်သမှာ။ စီးမှါခ့်ခါ ကိုယ်တော်ယေရှုကား လေဖြတ်သနင်းဘင်းဆိတ်တေ11“နာန်တေ ငါငှေါကူ။ ရဲရာန်။ နာန်ဘင်းဆလုံးဒေကွန်ဘန်း ကျေမ်းပါလာန်ဟာန်း” ညယ် မိန့်တော်မူသမှာ။12လေဖြတ်သနင်းဘင်းဆိတ်ကား ရဲဘန်း ချတ်ချန်းဟိန်ဘင်းဆလုံးတေ ကွန်ဘန်း သမီဆာကလောင်းတုံန်းတာတ်မန်းဟက် ပူလာန်ဘဲမှာ။ အမှာတွာတ် သမီဆတာတ်ရီးဒါး အံ့ဩသလာန်ဘဲကြီးဘန်း “အလေကား အဘင်းအဖြစ်ပျက်အမျိုးဒေ ပန်းနူစဲ အကတုံန်ပတ်နား” ညယ်ငှေါဘန်း ဘုရားရှာန်ဒေ ချီးမွမ်းသကြီးမှာ။13ပန်းနူ ကိုယ်တော်ယေရှုကား ဂါလိလဲအာမ်းနံဘေးပါ ပြန်သဘန်း ကြွဒီဟာန်းမှါခ့်ခါ သမီဆာကလောင်းတုံန်းတာတ်ရီးဒါး ကိုယ်တော်ယေရှုပါ ထုတ်ကြီးရီဘင်းအတွာတ် ကိုယ်တော်ကား အန်တာတ်တေ ဘုရားရှာန်ဘင်း နှုတ်ကပါတ်တော်တေဒေ စသဘန်းဟောသကာ ဆွောန်သကာအီမှာ။14စီးမှါခ့်ခါ ကိုယ်တော်ကား လမ်းတယ်နင်းမှါခ့်ခါ အခွန်ကွန်ဘင်းရုံးဘေ ထုံဘန်းနင်းဘင်း အာလဖဘင်းဆာ လေဝိတေ ကတုံန်ငါန်မှာ။ အမှာအတွာတ် ကိုယ်တော်ကား ဟိန်ဒေ “ငါဟလိန်းဘေ ဒီရာတ်” ညယ် မိန့်သမှါခ့်ခါ လေဝိရီးဒါး ရဲဘန်း ကိုယ်တော်ဟလိန်းဘေ ဒီရာတ်ပဲမှာ။15စီးမှါခ့်ခါ ကိုယ်တော်ယေရှုကား လေဝိကျေမ်းဘေ နာတ်ကြယ်အသားယုတ်ပန်းနင်းမှာ။ ကိုယ်တော်ယေရှုယောက် တပယ့်တော်တာတ်ဟလိန်းဘေ ဒီရာတ်ကြီးဘင်း အခွန်ကွန်ဘင်းဆိတ်တာတ်ယောက် အပြစ်ဆားတေကလောင်းတုံန်းကား ကိုယ်တော်တာတ်ယောက်အတူတူ ယုတ်ပန်းနင်းကြီးမှာ။16ကိုယ်တော်ယေရှုကား အခွန်ကွန်ဘင်းဆိတ်တာတ်၊ အပြစ်ဆားတာတ်ယောက်အတူတူ ယုတ်ပန်းနင်းဘင်းနာတေ ဖာရိရှဲတာတ်ထှာဘင်း ကျမ်းကျိန်းပေါ့ပင်း အိုးဆကြီးတာတ် ကတုံန်ကြီးမှါခ့်ခါ ကိုယ်တော်ဘင်းတပယ့်တာတ်တေ “ဟိန်ကား ဟမာန်ငှါး အခွန်ကွန်ဘင်းဆိတ်တာတ်၊ အပြစ်ဆားတေယောက်အတူတူ ယုတ်မောက်အူမောက်နင်းကြီးတေ” ညယ် စိန်ယူကြီးမှာ။17ကိုယ်တော်ယေရှုရီးဒါး အန်ဘင်းတူးတေ သက်ပူဘင်းအတွာတ် အန်တာတ်တေ “နင်းမဲဘင်းဆိတ်တာတ်အတွာတ် အုတ်ဆရာကြီးအလိုသဝါး၊ အန်နိမ်စါန်းငှေါဒီ အနင်းမဲဘင်း သမီဆာတာတ်အတွာတ်ကား အုတ်ဆရာကြီးလိုသမှာ။ ကိုယ်ကာတ်ကိုယ် ဖြောင့်မတ်မှန်ကန်သမှာညယ် ထာန်သဘင်းဆိတ်တာတ်အတွာတ် ငါဒီလားအချီညယ် အပြစ်ဆားတာတ်အတွာတ် ငါဒီလားထှာမှာ” ညယ် မိန့်တော်မူသမှာ။18အန်ကားအချိန်ဘေ ဝဲငွတ်ပင်းမာန်းဂလာအွန်အီဘင်း အိုးဆကြီးယောဟန်ဘင်း တပယ့်တော်တေယောက် ဖာရိရှဲတာတ်ပင်း တပယ့်တာတ်ကား ဟမာန်ကစဲအယုတ်ညယ် ဥပုသ်စောင့်သဘန်းနင်းကြီးမှာ။ အန်၌မှါခ့်ခါ သမီဆာစယ်ယာကား ကိုယ်တော်ယေရှုပါဒီဘန်း “ဝဲငွတ်ပင်းမာန်းဂလာအွန်အီဘင်း အိုးဆကြီးယောဟန်ဘင်း တပယ့်တာတ်ယောက် ဖာရိရှဲတပယ့်တာတ်ကား ဟမာန်ကစဲအယုတ်ညယ် ဥပုသ်စောင့်သနင်းကြီးဘန်း ကိုယ်တော်ဘင်း တပယ့်တော်တာတ်ကား ဟမာန်ငှါး ဟမာန်ကစဲအယုတ်ညယ် ဥပုသ်အစောင့်သကြီးတေ” ညယ်စိန်ယူမှာ။19အမှာတွာတ် ကိုယ်တော်ယေရှုကား “မာန်းဂလာပွဲ ဒီကြီးဘင်းနမ်တာတ်ကား သတို့သားယောက် အတူတူငှါနင်းမှါခ့်ခါ ဟမာန်ကစဲအယုတ်ညယ် နင်းကြီးကလားအချီရား။ သတို့သားယောက်အန်တာတ် အတူတူငှါနင်းစါတ် အန်တာတ်ကား ဟမန်ကစဲအယုတ်ညယ် နင်းရန်ကလားအချီရား။20အန်နိမ်စါန်းငှေါဒီ သတို့သားတေ အန်တာတ်ဟက် ကော်လာန်ဘဲကူဘင်းမာန်းရာတ် ထုတ်အီကူထှာဘန်း အန်ဘင်းမာန်းရာတ်ထုတ်မှါခ့်ခါ အန်တာတ်ကား ဟမာန်ကစဲအယုတ်ညယ် နင်းကြီးကူ။21ဟာဟမဲဆဲ အဝတ်ကာန်သလားအပေါက်တေ ပိတ်စနယားယောက် အဖာသကြီရား။ ဟမာန်တွာတ်ငှေါဘန်းတာတ်ငှေါ ဖာသပဲဘင်းပိတ်စနယားကား ရုန်းသဘင်းအတွာတ် ပိတ်စကာန်သလားကား ပိုသောဆိုက်အာန်ကူ။22စပျစ်ဝိုင်နယားတေ ဟာဟမဲဆဲ ဆလေဘူးကန်းဘေ အစါန်းကြီးရား။ ဟမာန်တွာတ်ငှေါဘန်းတာတ်ငှေါ စပျစ်ဝိုင်နယားကား ဆလေဘူးကန်းဒေ ဆိုက်စိန်းဘင်းအတွာတ် စပျစ်ဝိုင်ရီးဒါး ဘာဘန်း ဆလေဘူးရီးဒါး ပျတ်စီးတာန်ကူထှာမှာ။ အန်ဘင်းအစား စပျစ်ဝိုင်နယားတေ ဆလေဘူးနယားဘေ၌ဆာ စါန်းထှာကူ” ညယ် မိန့်တော်မူသမှာ။23ဥပုသ်မာန်းရာတ်ရအာမှါခ့်ခါ ကိုယ်တော်ယေရှုယောက် ဟိန်ဘင်းတပယ့်တော်တာတ်ကား အန်ကလာန်တေဒေ ဖြတ်သဘန်းလာန်းနင်းမှါခ့်ခါ တပယ့်တော်တာတ်ကား အန်သတူစယ်ယာဒေ စသဘန်းကွန်ယုတ်ကြီးမှာ။24အမှာတွာတ် ဖာရိရှဲတာတ်ကား ကိုယ်တော်ယေရှုတေ “ဥပုသ်မာန်းရာတ်ပေ အအွန်စိန်းယုတ်ပင်းအရာတေ ဟမာန်တွာတ် နင်းအွန်ကြီးတေ” ညယ် စိန်ယူမှာ။25ကိုယ်တော်ယေရှုရီးဒါး “ဒါဝိဒ်ရှာန်းပလာန်ယောက် ဟိန်နောက်လိုက်တေ အကြီးကျယ်ယုတ်ခေါ့ပ်နင်းမှါခ့်ခါ ဟာနိမ်အွန်နီမှာငှေါဘင်းနာတေ ကျမ်းကျိန်းနောင်းဘေ ဟနိမ်အကျယ်ပတ်ကြီးရားရယ်။26အတုံန်းဟန်ဆုံးဂျူးပုရောဟိတ် အာဗျာသာ လာတ်ထာတ်မှါခ့်ခါ ဒါဝိဒ်ရှာန်းပလာန်ကား ယုတ်ခေါ့ပ်ပင်းအတွာတ် ဘုရားရှာန်ဘင်း တဲတော် နောင်းဘေ ဆာန်ငါန်ဘန်း ပုရောဟိတ်တာတ်၌ လွဲသဘန်း ဟာဟမဲစဲယုတ်လားအလူဘင်း ဘုရားရှာန်ဒေ ပူဇော်သပဲဘင်း ပေါင်မုန့်ဒေ လာယုတ်ပန်း ဟိန်နောက်လိုက် သမီဆတာတ်တေဒေရီးဒါး နွောပ်နာန်မှာ” ညယ် မိန့်တော်မူသမှာ။27စီးမှါခ့်ခါ ကိုယ်တော်ကား ဆာတ်သဘန်း အန်တာတ်တေ “ဘုရားရှာန်ကား သမီဆတာတ် ကောင်းကျိုးအတွာတ် ဥပုသ်မာန်းရာတ်တေ ဖန်ဆင်းဒီလားထှာမှာ။ ဘုရားရှာန်ကား ဥပုသ်မာန်းရာတ်အတွာတ် သမီဆတာတ်တေ ဖန်ဆင်းဒီလားအချီရား။28အမှာတွာတ် သမီဆာ ဆာ ကား ဥပုသ်မာန်းရာတ်ပင်း အရှာန်ထှာမှာ” ညယ် မိန့်တော်မူသမှာ။
Empower Asia Bible Translation Movement