ရှာန်မာကု3
1နောက်မာန်းရာတ်ရအာဘေ ကိုယ်တော်ယေရှုကား ဓမ္မာရုံပါဒီမှါခ့်ခါ အန်ဘင်းဘေ သဟူးပယ်အာ လေဖြတ်သနင်းဘင်းဆိတ်ဟော်ဝါငှါမှာ။2အန်ဘင်းဘေငှါဘင်း သမီဆာစယ်ယာကား ကိုယ်တော်ယေရှုတေ အပြစ်တာန်သဘန်း စွပ်စွဲသဒင်အကြောင်းဒေ သန်ဘန်းနင်းကြီးဘင်းအတွာတ် ဥပုသ်မာန်းရာတ်ပေ အန်ဘင်းဆိတ်တေ မဲဟာန်းစိန်းကူသမားညယ် ဒဲဘန်းနာ ယူဘန်းနင်းကြီးမှာ။3ကိုယ်တော်ယေရှုကား သဟူးပယ်အာ လေဖြတ်သနင်းဘင်းဆိတ်တေ “သမီဆာတာတ်မန်းဘေ ရဲဘန်း စပ်နာန်” ညယ် မိန့်သမှာ။4စီးမှါခ့်ခါ ကိုယ်တော်ယေရှုကား သမီဆတာတ်တေ “ဥပုသ်မာန်းရာတ်ပေ ဟာဘင်းနာဒေ အွန်ဘင်းကား ပညတ်တော်ယောက် ညီသောတေ။ အမဲဘင်းနာဒေအွန်ဒင်လဲ အန်နိမ်အချီ မဲဘင်းနာဒေ အွန်ဒင်လဲ။ သမီဆာအဆာတ်တေ ကယ်သထှာကလဲ အန်နိမ်အချီ သာန်းရှီးထှာကလဲ” ညယ် စိန်းယူဝါမ်မှာ။ အန်နိမ်စါန်းငှေါဒီ အန်တာတ်ကား ယူရှီရှီနင်းကြီးမှာ။5အမှာတွာတ် ကိုယ်တော်ယေရှုကား အန်တာတ်တေ ဒေါသယောက်ယူဝါမ်ဘန်း တစ်ပြိုင်တည်းဘေ ကိုယ်တော်ကား အန်တာတ်ဟလာန်းစါတ်ပင်းအတွာတ် အကြီးကျယ်အဆေင်အမဲငှါရာန်ဘန်း သဟူးပယ်အာ လေဖြတ်သနင်းဘင်းဆိတ်တေ “နာန်သဟူးဒေဆန့်တာန်” ညယ် မိန့်တာန်မှာ။ အန်ဘင်းဆိတ်ရီးဒါး ဟိန်သဟူးဒေ ဆန့်တာန်မှါခ့်ခါ မလဲအတိုင်း ထှာရာန်မှာ။6အန်၌မှါခ့်ခါ ဖာရိရှဲတာတ်ရီးဒါး ပူလာန်ဘဲကြီးဘန်း ကိုယ်တော်ယေရှုတေ အန်တာတ်ဟာနိမ် သာန်းရှီးထှာကူငှေါဘင်းနာဒေ အုပ်ချုပ်သဘင်းဆိတ် ဟေရုဒ်ပင်း နောက်လိုက်တာတ်ယောက် ချတ်ချန်းငှေါနိမ် စသဘန်းတိုင်ပါန်သနင်းကြီးမှာ။7စီးမှါခ့်ခါ ကိုယ်တော်ယေရှုကား ဟိန်တပယ့်တော်တာတ်ယောက်အတူတူ ဂါလိလဲအာမ်း ကမ်းပိုက်ပါ ကြွသမှါခ့်ခါ ဂါလိလဲပြေဟက် သမီဆာကလောင်းတုံန်းကား ဟလိန်းဟက် ဒီရာတ်ကြီးမှာ။8ကိုယ်တော်အွန်နီဘင်း အကြောင်းတေဒေ သက်ပူကြီးဘင်း ယုဒပြေ၊ ဂျေရုဆလင်မြို့၊ ဣဒုမဲပြေ၊ ဂျော်ဒန်မြစ်ကမ်းပယ်အာဘင်း ပြေတေဟက်စသဘန်း တုရုမြို့ယောက် ဇိဒုန်မြို့ပိုက်ပင်း သမီဆာတာတ်ရီဒါး ကိုယ်တော်ပါ ဒီကြီးမှာ။9သမီဆတေအကြီးကျယ်ကန်ဘင်းအတွာတ် ကိုယ်တော်ယေရှုကား ဟိန်ဒေ အတိုက်သပါတ်စိန်းဒင်အတွာတ် လှေတစ်စါန်းဒေ ဟိန်နင်း ပြာန်ဆာန်သပဲဒင် တပယ့်တော်တာတ်တေ မိန့်သမှာ။10ဟမာန်တွာတ်ငှေါဘန်းတာတ်ငှေါ ကိုယ်တော်ယေရှုကား သမီဆာကလောင်းတုံန်းဒေ နင်းမဲဟာန်းစိန်းရီဘင်းအတွာတ် ကမာရောဂါ ထှာဘန်းနင်းကြီးဘင်းဆိတ်တာတ်ကား ကိုယ်တော်ယေရှုတေ ထိသရန်ကွန်း မန်းပါ တိုးသကြီးရီဘင်းအတွာတ်ထှာမှာ။11အမဲဘင်းနနူ ကပ်လားခံသထှာဘင်းသမီဆတာတ်ကား ကိုယ်တော်ယေရှုတေ ကတုံန်မှါခ့်ခါ ကိုယ်တော်မန်းဘေ သထူထောက်သဘန်း “ကိုယ်တော်ကား ဘုရားရှာန်ဆာထှာမှာ” ညယ် ဟာတ်ကြီးမှာ။12အန်နိမ်စါန်းငှေါဒီ ကိုယ်တော်ယေရှုကား ဟိန်ကားဟာဟမဲထှာမှာ ငှေါဘင်းနာတေ ဟာဟမဲဒေစဲအငှေါကွန်း အမဲဘင်းနနူတေဒေ ပြင်းပြင်းထန်ထန်အမိန့်အီရာန်မှာ။13စီးမှါခ့်ခါ ကိုယ်တော်ယေရှုကား ကယာစောက်ပါ ဟယ်လာန်ပဲဘန်း ဟိန်အလိုငှါဘင်း သမီဆတာတ်တေ ကော်မှါခ့်ခါ အန်တာတ်ရီးဒါး ဒီကြီးမှာ။14စီးမှါခ့်ခါ ကိုယ်တော်ယေရှုကား အန်တာတ်နောင်းဟက် ရှစ်နူဘန်းကလိန်ဟူးဒေမယ်ဘန်း သာဝက ညယ် နာမယ်အီရာန်မှာ။ အန်နိမ်ကိုယ်တော်ယေရှု မယ်ထှာဘင်းနာကား အန်တာတ်တေ ကိုယ်တော်ယောက်အတူ ငှါနင်းစိန်းဒင်၊ သမီဆတာတ်တေ ဟောသကာ ဆွောန်သကာဒင် တာတ်တင်ယောက်15သမီဆတာတ်ပေ ကပ်ပန်းနင်းဘင်း အမဲဘင်းနနူတာတ်တေ ငါတ်ပူရန်ဘင်း အခွာမ်းအာဏာတေဒေရီးဒါး လူစိန်းဒင်ထှာမှာ။16မယ်ဘန်းပဲဘင်း သာဝကရှစ်နူဘန်း ကလိန်းဟူးတာတ်နာမယ်တေကား ပေတရုညယ်ကိုယ်တော် နာမယ်အီပဲဘင်း ရှိမုန်၊17မိုးကြိုးဘင်းဆာတေညယ် အဓိပ္ပာယ်လူဘင်း ဗောနေရဂက်ညယ် ကိုယ်တော်နာမယ်အီပဲဘင်း ဇေဗေဒဲဘင်းဆာ ယာကုပ်ယောက် ဟိန်နရှီယောဟန်၊18အန္ဒြေ၊ ဖိလိပ္ပု၊ ဗာသောလမဲ၊ မဿဲ၊ သောမ၊ အာလဖဲဘင်းဆာ ယာကုပ်၊ သဒ္ဒဲ၊ အမျိုးဒေမစ်ခါဘင်းဆိတ်ညယ် ကော်ကြီးဘင်း ရှိမုန်ယောက် 19ကိုယ်တော်ယေရှုတေ သစ္စာဖောက်သဘင်း ယုဒရှာကာရုတ်တာတ် ထှာကြီးမှာ။20စီးမှါခ့်ခါ ကိုယ်တော်ယေရှုကား ကျေမ်းကျေမ်းနာပါ ကြွတော်မူသမှါခ့်ခါ သမီဆာကလောင်းတုံန်းရီးဒါး ပန်းနူပြန်သဘန်း စုသဟာန်းကြီးရီဘင်းအတွာတ် ကိုယ်တော်ယောက် ဟိန်တပယ့်တော်တာတ်ကား ယုတ်တင်အူဒင်အတွာတ်စဲ အချိန်အလူကြီးရား။21ကိုယ်တော်ယေရှုဘင်း မိသားစုတာတ်ကား အန်ဘင်းအကြောင်းဒေ သက်ပူမှါခ့်ခါ အန်တာတ်ကား “ဟိန်ကား ဆယ်ဖုတ်ပန်းနင်းဘန်း” ညယ်ငှေါဘန်း ကိုယ်တော်တေ အန်တာတ်ယောက်အတူတူ ကျေမ်းပါ ကော်လာန်ဟာန်းဘဲဒင် ပူကြီးရီမှာ။22အန်ကားအပြာန် ဂျေရုဆလင်ဟက် ဒီဟာန်းကြီးဘင်း ကျမ်းကျိန်းပေါ့ပင်း အိုးဆကြီးတာတ်ရီးဒါး “ဟိန်ဘေ ဗေလဇေဗုလဆာန်ဘန်းနင်းမှာ ။ ဟိန်ကား အမဲဘင်းနနူတာတ် ဟလာန်းစါတ်တန်ခိုးယောက် အမဲဘင်းနနူတာတ်တေ ငါတ်ပူဘန်းနင်းမှာ” ညယ်ငှေါမှာ။23အမှာတွာတ် ကိုယ်တော်ကား အန်တာတ်တေ ကော်ဘန်း ဥပမာတေယောက် စသဘန်း မိန့်တော်မူသမှာ။ ကိုယ်တော်ကား အန်တာတ်တေ “မာရ်နတ်ကား မာရ်နတ်တေ ဟာနိမ်ငါတ်ပူရာန်ကူတေ။24နိုင်ငံတစ်နိုင်ငံဘေငှါဘင်း သမီဆာတာတ်ကား အချန်းချန်း ဆန့်ကျင်တိုက်ခိုက်သနင်းဘန်းကား အန်ဘင်းနိုင်ငံကား တည်မြဲသရန်ကလားအချီရား။25မိသားစုတစ်စုဘေငှါဘင်း ကျေမ်းဆိတ်တာတ်အချန်းချန်း ဆန့်ကျင်တိုက်ခိုက်သနင်းဘန်းကား အန်ဘင်းမိသားစုရီးဒါး ပြိုကွဲသလာန်ဘဲကူထှာမှာ။26အန်နိမ်အတိုင်း မာရ်နတ်ရီဒါး ကိုယ်ကာတ်ကိုယ် ဆန့်ကျင်တိုက်ခိုက်သနင်းဘန်းကား ဟိန်ရီးဒါး အတည်မြဲသရန်ဘန်း ပြာတ်စီးတာန်ကူထှာမှာ။27အားတုံန်းဘင်းဆိတ်တေ အရာန် ဆိုင်းယောက်အဟွတ်ပန်းကား ဟာဟမဲစဲ ဟိန်ကျေမ်းနောင်းဘေဆာန်ဘန်း ဟိန်ဘင်း ပစ္စည်းဥစ္စာတေဒေ ဆနန်ဘန်း အလာရန်နား။ ဟိန်ဒေ ဆိုင်းယောက် ဟွတ်စီးပဲမားဆာ ဟိန်ကျေမ်းနောင်းဘင်း ပစ္စည်းဥစ္စာတေဒေ ဆာန်ဘန်းလာရန်ကူထှာမှာ။28ဟနိမ်တေ ငါချီလားဒေငှေါထှာဘန်းကား သမီဆတာတ်အွန်ဘင်း အမဲဘင်းအပြစ်ငှါနယ်ယောက် ဘုရားရှာန်ဒေစော်ကားသဘန်း ငှေါဘင်းနာတေကား ခွာမ်းလွှတ်သလားခံသထှာကူငှေါဒီဒါး29ဉာဏ်အလင်းတော်ဒေ စော်ကားသဘန်းငှေါဘင်း ဟာဟမဲစါန်းငှေါဒီ ဟာ၌မှါခ့်ခါစဲ ခွာမ်းလွှတ်သလား ခံသထှာကလားအချီရား။ ဟမာန်တွာတ်ငှေါဘန်းတာတ်ငှေါ အန်ဘင်းဆိတ်ကား သွောပ်ကူညယ်အဘိုဘင်းအပြစ်တေ ကျူးလွန်တာန်ဘင်းအထွာတ်ထှာမှာ” ညယ်မိန့်သမှာ။30ကိုယ်တော်အန်နိမ် ငှေါထှာဘင်းနာကား ကျမ်းကျိန်းပေါ့ပင်းဆိတ်တာတ်ကား ကိုယ်တော်ဒေ “ဟိန်ဘေကား အမဲဘင်းနနူကပ်ပန်းနင်းမှာ” ညယ် ငှေါနင်းကြီးဘင်းအတွာတ်ထှာမှာ။31စီးမှါခ့်ခါ ကိုယ်တော်ယေရှုအမယ်ယောက် အမူးတာတ်ထုတ်ကြီးရီဘန်း ပြာန်ဘေစပ်ပန်းနာ ကိုယ်တော်ယေရှုတေကော်ရီဒင် သမီဆာဟော်ဝါဒေ တာတ်နာန်မှာ။32သမီဆာကလောင်းတုံန်းရီးဒါး ကိုယ်တော်ပတ်ပတ်လည်ဘေ ထုံးဘန်းနင်းကြီးဘန်းနာ ကိုယ်တော်ဒေ “ကိုယ်တော်ဘင်း အမယ်ယောက် အမူးတာတ်ကား ကိုယ်တော်ဒေ ကတုံန်ဒင် ပြာန်ဘေထုတ်ပန်းနင်းကြီးမှာ” ညယ် လျှောက်သကြီးမှာ။33ကိုယ်တော်ယေရှုရီးဒါး “ဟာဟမဲတာတ်ကား ငါဘင်းအမယ်ယောက်အမူးတေ ထှာကြီးဒေ” ညယ် စိန်ယူဝါမ်မှာ။34စီးမှါခ့်ခါ ကိုယ်တော်ကား ဟိန်ပတ်ပတ်လည်ဘေ ထုံးဘန်းနင်းကြီးဘင်း သမီဆာတာတ်တေ ယူဝါမ်ဘန်း “ယူကြီးရာန်။ အဘင်းသမီဆာတေကား ငါအမယ်ယောက် အမူးနရှီတေထှာကြီးမှာ။35ဘုရားရှာန်ဘင်းအလိုတော်အတိုင်း လိုက်နာသဘင်း ဟာဟမဲစါန်းငှေါဒီ ငါဘင်းအမယ်၊ အမူးနရှီတေယောက် အသေးနရှီတေထှာကြီးမှာ” ညယ် မိန့်သမှာ။
Empower Asia Bible Translation Movement