ရှာန်မာကု1
1အဘင်းကား ဘုရားရှာန်ဆာ မေရှိယထှာဘင်း ကိုယ်တော်ယေရှုအကြောင်း မာန်းဂလာဆတာန်းမလဲ အစထှာမှာ။2ပရောဖက်ဟေရှာယ ကျမ်းကျိန်းနောင်းဘေ ရေးသပဲဘင်းနာကား“ယူကြီး။ ငါကား နာန်ဘင်းလမ်းဒေ ပြာန်ဆာန်သအီကူဘင်းငါစေတမန်တေဒေ နာန်ထာတ်အရာန် ငါတာတ်ကူ။3ဟော်ဝါဟော်ဝါကား သမီဆာထုတ်လားစစ်ပင်းအရပ်ပေ လှည့်သဘန်း ဟာတ်နင်းဘင်းနာကား‘အရှာန် ကြွဒီကူဘင်းလမ်းဒေ အဆာန်တာန့် ပြာန်ဆာန်သကြီး၊ ဟိန်လမ်းတေ ရာန်းစိန်း’” ညယ် ရေးသပဲမှာ။4အမှာတွာတ် သမီဆာထုတ်လားစစ်ပင်းအရပ်ပေ ဝဲငွတ်ပင်းမာန်းဂလာ အွန်အီဘင်း အိုးဆကြီးယောဟန်ကား ပေါ်ဒီဘန်း အမဲဘင်းအပြစ်တေဒေ ခွာမ်းလွှတ်သလားခံသထှာဒင် နောင်တတေလူကြီးဘန်း ဝဲငွတ်ပင်းမာန်းဂလာအွန်ကြီးဒင်အတွာတ် ဟောသကာမှာ။5ဂျေရုဆလင်မြို့ယောက် ယုဒပြေဘင်း သမီဆာကလောင်းတုံန်းကား ဝဲငွတ်ပင်းမာန်းဂလာအွန်အီဘင်း အိုးဆကြီးယောဟန် ဟောသကာဘင်းတေဒေ သက်တင်ယောက် ဟိန်ဒေကတုံန်ဒင် ဒီကြီးမှာ။ အန်တာတ်ကား အန်တာတ်ပင်း အပြစ်တေဒေ ဝန်ခံသဘန်း ယောဟန်ရီးဒါး အန်တာတ်တေ ဂျော်ဒန်မြစ်ပေ ဝဲငွတ်ပင်းမာန်းဂလာတေ အွန်အီမှာ။6ယောဟန်ကား ကုလားအုတ်မှုံကူယောက်အွန်ပဲဘင်း ဆာန်ဆုန်ဒေတော်ဘန်းနာ ဟာအိုင်ဘေ ဆလေဟိုင်းစွပ်တေပတ်သဘန်း ဟိန်ကား ကုတ်ကဲနနူယောက် သုံန်းငွန်းဝလဲဒေ ယုတ်ပန်းနင်းမှာ။7ယောဟန်ကား သမီဆတာတ်တေ “ငါထာတ်ပိုသော ကြီးမြတ်သဘင်းဆိတ်ကား ငါဟလိန်းဟက်ထုတ်အီကူ။ ငါကား ဟိန်ဟက်တင်းဆိုင်းဒေ ငွတ်ပန်း ဟပ်အီကူဘင်းနာဆဲ အထိုက်တန်သဝါး။8ငါကား ဟနိမ်တေ ဝဲယောက်၌ဆာ ဝဲငွတ်ပင်းမာန်းဂလာတေအီဘန်း ဟိန်ကား ဟနိမ်တေ ဉာဏ်အလင်းတော်ယောက် ဝဲငွတ်ပင်းမာန်းဂလာတေ အီကူ” ညယ်ငှေါမှာ။9အန်ဘင်းမာန်းရာတ်တေမှါခ့်ခါ ကိုယ်တော်ယေရှုကား ဂါလိလဲနယ် နာဇရက်မြို့ဟက် ထုတ်အီဘန်း ယောဟန်ရီးဒါး ကိုယ်တော်ဒေ ဂျော်ဒန်မြစ်ပေ ဝဲငွတ်ပင်းမာန်းဂလာဒေ အွန်အီမှာ။10ကိုယ်တော်ယေရှု ဝဲနောင်းဟက် ပေါ်ဒီမယောက် ချတ်ချန်းဟမုခ်ကား ပွါမ်းတာန်ဘန်း ဉာဏ်အလင်းတော်ကား အဟူးတူအသွာန် ဟိန်ပါ ဆပ်နီဘင်းနာဒေ ကတုံန်ငါန်မှာ။11စီးမှါခ့်ခါ ဟမုခ်ဟက်ရီးဒါး “နာန်ကား ငါမစ်ထှာဘင်း ငါဆာထှာမှာ။ ငါကား နာန်ဒေ ငါအကြီးကျယ်မစ်မှာ” ညယ် ဆကလားပူရီမှာ။12ချတ်ချန်းငှေါနိမ် ဉာဏ်အလင်းတော်ကား ကိုယ်တော်ယေရှုတေ သမီဆာထုတ်လားစစ်ပင်းအရပ်ပါ လာန်စိန်းမှာ။13စီးမှါခ့်ခါ ကိုယ်တော်ကား သမီဆာထုတ်လားစစ်ပင်းအရပ်ပေ မာန်းရာတ်ဆီနူမှါတ်ကွန်း မာရ်နတ် ဖြားယောင်းသလားတေ ခံသထှာမှာ။ ကိုယ်တော်ကား အန်ဘင်းဘေ ပုတ်ခါးနနူတေယောက်အတူတူ ငှါနင်းဒီဒါး မဲဘင်းဟမန်းတေကား ကိုယ်တော်တေ စောင့်ရှောက်သအီပဲမှာ။14ဝဲငွတ်ပင်းမာန်းဂလာအွန်အီဘင်း အိုးဆကြီးယောဟန် ရင်ခံသထှာစီးမှါခ့်ခါ ကိုယ်တော်ယေရှုကား ဂါလိလဲပြေပါလာန်ဘန်း ဘုရားရှာန်ဘင်း မာန်းဂလာဆတာန်းတေ ဟောသကာမှာ။15ကိုယ်တော်ကား “ဘုရားရှာန်ဘင်းသာသနာတော် ထုတ်အီကူဘင်းအချိန် ထန်နီဘန်း။ အမှာတွာတ် နောင်တလူဘန်း မာန်းဂလာဆတာန်းမလဲဒေ ယုံကြည်သကြီး” ညယ်ဟောသမှာ။16မာန်းရာတ်ရအာမှါခ့်ခါ ကိုယ်တော်ကား ဂါလိလဲအာမ်းပိုက်ပါ ကြွတော်မူသမှါခ့်ခါ တာန်းငှါရင်ဘင်းဆိတ်တာတ်ထှာကြီးဘင်း ရှိမုန်ယောက် ဟိန်နရှီအန္ဒြေတာတ်ကား တာန်းငှါရင်ဘင်း ပိုက်တေဒေ ဝဲအာမ်းနောင်းပါ ချသဘန်းနင်းဘင်းနာတေ ကတုံန်မှာ။17ကိုယ်တော်ယေရှုကား အန်တာတ်တေ “ဒီကြီး၊ ငါဟလိန်းဘေဒီရာတ်ကြီး၊ သမီဆတာတ်တေ ငါတပယ့်တေ ထှာစိန်းရီကွန်း ဟာနိမ်စုစည်း သထှာကူဘင်းဒေ ဟနိမ်ဒေ ငါဆွောန်သကာအီကူ” ညယ် မိန့်တော်မူသမှာ။18အန်တာတ်ရီးဒါး အန်တာတ်ပင်းပိုက်တေဒေ ချတ်ချန်းတက်ပဘဲဘန်း ကိုယ်တော်ဟလိန်းပါ လာန်ငါတ်ပဲကြီးမှာ။19ပန်းနူ ကိုယ်တော်ကား ဆာတ်သဘန်း လာန်ကြီးဘန်းနာ လမ်းအတော်တန်ထုတ်မှါခ့်ခါ ဇေဗေဒဲဘင်း ဆာတာတ်ထှာကြီးဘင်း ယာကုပ်ယောက် ဟိန်နရှီယောဟန်တာတ်ကား လှေစောက်ပေ တာန်းငှါရင်ဒင် အန်တာတ်ပိုက်တေယောက် ကစါတ်တေဒေ ပြာန်ဆာန်သနင်းဘင်းနာဒေ ကတုံန်ငါန်မှာ။20ချတ်ချန်းငှေါနိမ် ကိုယ်တော်ရီးဒါး အန်တာတ်တေ ဟိန်ဟလိန်းဘေဒီရာတ်ကွန်း ကော်မှါခ့်ခါ အန်တာတ်ကား အဝါဇေဗေဒဲယောက် အငှါးသမီဆတေဒေ လှေယောက် တက်ပဘဲဘန်း ကိုယ်တော်ဟလိန်းပါ လာန်ငါတ်ပဲကြီးမှာ။21စီးမှါခ့်ခါ ကိုယ်တော်ယေရှုကား ဟိန်ဘင်းတပယ့်တော်တာတ်ယောက်အတူ ကပေရနောင်မြို့ပါ ထုတ်ကြီးရီဘန်း ဥပုသ် မာန်းရာတ်ထုတ်မှါခ့်ခါ ကိုယ်တော်ကား ဓမ္မာရုံ ပါလာန်ဘန်း ဟောသကာ ဆွောန်သကာမှာ။22သမီဆာတာတ်ကား ကိုယ်တော် ဟောသကာ ဆွောန်သကာဘင်းနာတေဒေ အံ့ဩသနင်းကြီးမှာ။ ဟမာန်တွာတ်ငှေါဘန်းတာတ်ငှေါ ကိုယ်တော်ကား ကျမ်းကျိန်းပေါ့ပင်း အိုးဆကြီးတာတ်နိမ် အချီညယ် အခွာမ်းအာဏာငှါဘင်းဆိတ်ဟော်ဝါနိမ် အန်တာတ်တေ ဟောသကာ ဆွောန်သကာဘင်းအတွာတ်ထှာမှာ။23အန်ကားအချိန်ဘေ အမဲဘင်းနနူ ကပ်ခံသထှာနင်းဘင်းဆိတ်ဟော်ဝါကား ဓမ္မာရုံနောင်းဘေ ဗြုန်းစားတုံန်းဆာန်ရီဘန်း24“နာဇရက်မြို့ဆား ယေရှု။ အရှာန်အလေတေ ဟမာန်အွန်ကာတ်တေ။ အလေတေဖြတ်ဆီးသဒင် အရှာန်ဒီလားရဲ။ အရှာန်ဟာဟမဲထှာဘင်းနာတေ အလေမိန်းရှာတ်ခါမှာ။ အရှာန်ကား ဘုရားရှာန်တာတ်နီဘင်း မြင့်မြတ်သဘင်းဆိတ်ထှာမှာ” ညယ် ဟာတ်ပန်းငှေါရာန်မှာ။25အန်နိမ်စါန်းငှေါဒီ ကိုယ်တော်ကား အမဲဘင်းနနူဒေ “ယူရှီရှီနင်းဘန်း ဟိန်ဟက်ပူလာန်ဘဲ” ညယ်အမိန့်အီရာန်မှာ။26အန်၌မှါခ့်ခါ အမဲဘင်းနနူကား အန်ဘင်းဆိတ်တေ အကြီးကျယ်ဆန်သစိန်းဘန်းနာ ဆကလားဝါတ်ဆလာတ်တုံန်းယောက် ဟာတ်ပန်း အန်ဘင်းဆိတ်ဟက် ပူလာန်ဘဲမှာ။27ဓမ္မာရုံနောင်းဘင်း သမီဆာတာတ်ဆွန်ကွန်းရီးဒါး အကြီးကျယ်အံ့ဩသကြီးဘန်း အန်တာတ်ကား ဟော်ဝါယောက်ဟော်ဝါ “အန်ဘင်းနာကား ဟာနိမ် ဆွောန်သကာဘင်းအမျိုးသမှာ။ အန်ဘင်းနာကား ဆွောန်သကာဘင်းနယား စားနူရဲ။ အဘင်းဆိတ်ကား အမဲဘင်းနနူတေဒေ အမိန့်အီရန်ဘင်း အခွာမ်းအာဏာငှါဘန်း အမဲဘင်းနနူတာတ်ရီးဒါး ဟိန်တေနာခံသကြီးထှာမှာ” ညယ် ငှေါနင်းကြီးမှာ။28စီးမှါခ့်ခါ ကိုယ်တော်ယေရှုဘင်း ဆတာန်းကား ဂါလိလဲပြေတစ်ခွာမ်လုံးပါ ချတ်ချန်း နှံ့သောလာန်ဘဲမှာ။29စီးမှါခ့်ခါ ကိုယ်တော်ယေရှုကား ယာကုပ်၊ ယောဟန်တာတ်ယောက်အတူတူ ဓမ္မာရုံနောင်းဟက်ပူရီဘန်း ရှိမုန်ယောက် အန္ဒြေတာတ်ကျေမ်းပါ ချတ်ချန်းလာန်ကြီးမှာ။30ရှိမုန်အထောင်ကား အကြီးကျယ်ကနာဟာပန်း အေ့ပ်ဆေစ်နောင်းဘေ ပေါ်ဘန်းနင်းဘင်းအတွာတ် အန်တာတ်ကား ကိုယ်တော်နင်း ဟိန်အကြောင်းဒေ ချတ်ချန်းလျှောက်တာန်သကြီးမှာ။31အမှာတွာတ် ကိုယ်တော်ကား ဟိန်ပိုက်ပါလာန်ဘန်းနာ သဟူးဒေငါတ်ပန်း တွန်းရဲရာန်မှါခ့်ခါ ဟိန်ကနာဟာနင်းဘင်းနာကား ကယာရာန်ဘင်းအတွာတ် ဟိန်ကား အန်တာတ်တေ ယုတ်တင်အူဒင်တေယောက် စသဘန်း ဧည့်ခံသမှာ။32အန်ဘင်းမာန်းရာတ် စမိတ်ဆာန်မှါခ့်ခါ သမီဆတာတ်ကား အနင်းမဲဘင်းဆိတ်တာတ်ယောက် အမဲဘင်းနနူကပ်ပန်းနင်းဘင်း ဆိတ်တာတ်တေဒေ ကိုယ်တော်ယေရှုပါ ကော်ကြီးရီမှာ။33အန်ဘင်းမြို့ဘင်း သမီဆာကလောင်းတုံန်းတာတ်ရီဒါး ရှိမုန်ကျေမ်းပေါက်ဝဘေ စုရုံးစုရုံးထုတ်ကြီးရီမှာ။34စီးမှါခ့်ခါ ကိုယ်တော်ယေရှုကား ရောဂါအမျိုးမျိုးထှာဘန်း အနင်းမဲငှါဘန်းနင်းဘင်း သမီဆတာတ်တေ ကုသအီဘန်းနာ သမီဆတာတ်ပေ ကပ်ပန်းနင်းဘင်း အမဲဘင်းနနူကလောင်းတုံန်းတေရီးဒါး ငါတ်ပူအီမှာ။ အန်နိမ်စါန်းငှေါဒီ ကိုယ်တော်ကား အမဲဘင်းနနူတာတ်တေ တူးအသပေါက်စိန်းယုတ်အား။ ဟမာန်တွာတ်ငှေါဘန်းတာတ်ငှေါ အန်တာတ်ကား ကိုယ်တော်ဟာဟမဲထှာမှာငှေါဘင်းနာတေ မိန်းရှာတ်ခါဘင်းအတွာတ်ထှာမှာ။35နောက်မာန်းရာတ် အတိုင်စောင်းရှီ ဟလာန်းအယားကြီမှါခ့်ခါ ကိုယ်တော်ယေရှုကား ရဲဘန်းနာ ကျေမ်းဟက်ပူရီဘန်း သမီဆာထုတ်လားစစ်ပင်းအရပ်ပါ လာန်ဘန်း အန်ဘင်းဘေ ဆုစိန်နင်းမှာ။36အန်၌မှါခ့်ခါ ရှိမုန်ယောက် ဟိန်ပဟာန်းတာတ်ကား ကိုယ်တော်ယေရှုတေ သာန်ကြီးဒင်အတွာတ် ပူကြီးရီမှာ။37အန်တာတ်ကား ကိုယ်တော်ယေရှုတေ သာန်ဘန်းကတုံန်မှါခ့်ခါ “သမီဆာ၌တိုင်းကား ကိုယ်တော်ဒေ သာန်ဘန်းနင်းကြီးမှာ” ညယ်လျှောက်တာန်သမှာ။38အန်နိမ်စါန်းငှေါဒီ ကိုယ်တော်ယေရှုကား အန်တာတ်တေ “အလေ အဘင်းပိုက်ပင်း ထိန်တေ မြို့တေပါရီးဒါး လာန်ကြီးထှာကူ။ အန်ဘင်းဘေငှါဘင်း သမီဆတာတ်တေဒေရီးဒါး ငါဟောသကာ ဆွောန်သကာအီထှာယုတ်ကူ။ ဟမာန်တွာတ်ငှေါဘန်းတာတ်ငှေါ အန်ဘင်းအတွာတ် ငါဒီထှာလားထှာမှာ” ညယ် မိန့်တော်မူသမှာ။39စီးမှါခ့်ခါ ကိုယ်တော်ယေရှုယောက် တပယ့်တော်တာတ်ကား ဂါလိလဲပြေတစ်ခွာမ်ပါ လာန်ဘန်း ဓမ္မာရုံတေဘေ ဟောသကာ ဆွောန်သကာဘန်း သမီဆတာတ်ပေ ကပ်ပန်းနင်းဘင်း အမဲဘင်းနနူကလောင်းတုံန်းတေရီးဒါး ငါတ်ပူမှာ။40စီးမှါခ့်ခါ ကမာတုံန်းရောဂါဆယ်ဟော်ဝါကား ကိုယ်တော်ယေရှုပါ ထုတ်အီဘန်းနာ သထူထောက်သဘန်း “ကိုယ်တော်အလိုငှါဘန်းကား ငါရောဂါတေ စလယ်ကွန်း ကုသအီရန်နာ” ညယ် ကိုယ်တော်တေ တောင်းပါန်သမှာ။41ကိုယ်တော်ယေရှုရီးဒါး အန်ဘင်းဆိတ်တေ အစန်ဘန်းသာငှေါ ဟိန်သဟူးဒေဆန့်တာန်ဘန်း အန်ဘင်းဆိတ်လာန်စောက်ပေ တာန်သဘန်း “ငါအလိုငှါမှာ။ စလယ်စိန်းငါန်” ညယ်မိန့်သမှာ။42စီးမှါခ့်ခါ ချတ်ချန်းငှေါနိမ် အန်ဘင်းဆိတ်ပင်း ကမာတုံန်းရောဂါကား ကယာရာန်ဘန်း ဟိန်ရီးဒါး စလယ်လာန်ဘဲမှာ။43စီးမှါခ့်ခါ ကိုယ်တော်ကား အန်ဘင်းဆိတ်တေ လမ်းစာလားပါ တာတ်နာန်မှာ။ အန်နိမ်စါန်းငှေါဒီ ကိုယ်တော်ယေရှုကား အန်ဘင်းဆိတ်တေ အတာတ်ကြီ44“သက်ကြီး။ အဘင်းအကြောင်းဒေ ဟာဟမဲတေစဲ အငှေါဆာ။ အန်နိမ်စါန်းငှေါဒီ ပုရောဟိတ်ပါလာန်ဘန်း နာန်ဒေ ဟိန်စစ်ဆေးသစိန်းငါန်။ စီးမှါခ့်ခါ နာန်ကား ရောဂါစလယ်ဘန်းငှေါဘင်းနာဒေ သမီဆ၌တိုင်းဒေ သက်သေကာဒင် မောရှေပညတ်ကျမ်းဘေ ရေးသပဲဘင်းအတိုင်း ပူဇော်သဘင်းဒေအွန်” ညယ် တင်းတင်းကြပ်ကြပ် ဆတီးအီမှာ။45အန်နိမ်စါန်းငှေါဒီ အန်ဘင်းဆိတ်ကား အန်ဘင်းဟက် ပူဒီဘဲဘန်း အန်ဘင်းဆတာန်းဒေ သမီဆာ၌တိုင်းဒေ အားရပါးရငှေါဘန်းဖြန့်တာန်မှာ။ အမှာတွာတ် ကိုယ်တော်ယေရှုကား အချိန်အတော်တန်မှါခ့်ကွန်း မြို့နောင်းပါ ထာန်ထာန်ရှားရှား အဆာန်ရန်ဘန်း မြို့ပြာန်ဘင်း သမီဆာထုတ်လားစစ်ပင်းအရပ်ပေ နင်းနင်းမှာ။ အန်နိမ်စါန်းငှေါဒီ အနယ်နယ်အရပ်ရပ်ပင်း သမီဆတာတ်ကား ကိုယ်တော်ယေရှုပါ ဆာတ်သဘန်း ထုတ်ကြီးရီမှာ။
Empower Asia Bible Translation Movement