阅读Mark 8

Mark8

¹မိူဝ်းသငိၵိူၼ်တီး ဢီႉတၢင်ႁိူင်းၵေႃၼႆတိူရ်ၸူႉထရူးဢႄးထႅင်းတႃးၸဝ်သိူဝ်လႄႉ။ တႃထရူးတိူၵ်ႇငရ်းလေႇလွင်သႃသၼႃၽြႃးၸဝ်။ ၵွပ်ႇၵိူဝ်ႇၼမ်မၢင်ရိူမ်သွမ်း ၸဝ်ယေသုၵိူဝ်ႇၼႆရၢၵ်ႇလေႇတပႄးၵိူဝ်ႇ²ၼႆတႃး “ဢူဝ်ႉတိူရ်ယွင်ဢီႉၵိူၼ်တီး။ ၵွပ်ႇၵိူဝ်ႇဝႃၼႄႇတင်ဢူဝ်ႉတႃဝႆးသငိ သိူဝ်တီးၵိူဝ်ႇၼမ်မၢင်လႆးရိူမ်သွမ်းႁလ်း။³ဢီႉရၵႃၵေႃထရူးထင်းသငႆၢ ပွၵ်ႇဢူဝ်ႉၼမ်ꧣမ်းၵိူဝ်ႇၼႆၢႁလ်း ၼႆၸ်ႂၵိူဝ်ႇဝဵင် ၵိူဝ်ႇၸၢင်မဝ်းလူမ်ႉသွပ်ႉရူင်တဵင်း” တႃးသိူၼ်းၼီ။⁴မိူဝ်းတီးတပႄးၸဝ်ၼႆတႃး “ႁၼီးၼႄႇတႃးၽရီႇတီသငႆၢဢီႉ ငႃးၸီႇသိူၼ်းၼႄႇၶႃႉဢႄးရူမ်သွမ်းတႃꧣမ်းဢီႉၵိူၼ်ၼီသပ်း” တႃးသိူၼ်းတီး။⁵ၸဝ်ၼႆတႃး “ပေႉမၢင်ၶဝ်မုၼ်သိူဝ်ႇၼႄႉ” တပႄးၸဝ်ၼႆတႃး “မၢင်ၶဝ်မုၼ်တိူဝ်ပုလ်းဢေႃ” တႃးသိူၼ်းၼီ။⁶မိူဝ်းတီး ၸဝ်ၼႆၸ်ႂဢီႉတၢင်ႁိူင်းၵတေးတႃးႁရ်ၵူလ်ၵတေႉ ၼႆလေႇၶဝ်မုၼ်တိူဝ်ပုလ်း ၼႆယုၵ်းယွင်ၵုင်ၵေးၸူးၽြႃးၸဝ်။ ဝႆၢးတီး ၼႆပွတ်းၶဝ်မုၼ်ဢႄးတႃးတပႄးဢိူၼ်းၵိူဝ်ႇၼေးၼႆၢ ဢႄးဝေဢႄးဢီႉတၢင်ႁိူင်း။ တပႄးၸဝ်ၵိူဝ်ႇၵေႃၼႆဝေဢႄးၵိူဝ်ႇၼႆၢ။⁷ၵိူဝ်ႇၼႆမၢင်တင်ၵႃႉတိူရ်ယႄႉ ၸဝ်ၵေႃၼႆလေႇၵႃႉၼေး ၼႆယုၵ်းယွင်ၵုင်ၵေးၸူးၽြႃးၸဝ် ၼႆၸႂ်ဢႄးဝေဢႄးဢီႉတၢင်ႁိူင်းၼႆၢ။⁸ဢီႉတၢင်းႁိူင်းၵိူဝ်ႇၵေႃ ၼႆတိူမ်ၽရွမ်ၿၼ်းသွမ်းသၢၵ်း။ မိူဝ်းတပႄးၸဝ်ၵိူဝ်ႇ ၼႆၶႃးသိမ်းလေႇဢၼ်လိူဝ်းၼေး ၼႆၿွၼ်းမိူဝ်ႇပုလ်းၵပုၵ်ႇလူင်း။⁹ဢီႉႁေးၼႆၼႄႇမိူဝ်ႇဢရၢပ်ႇပူၼ်းရဵင်း။ ဝႆၢးတီး မိူဝ်းၵိူဝ်ႇဝႃသွမ်းဝႃၼေး ၸဝ်ၼႆပလွႆးပိူၼ်ဝဵင်လၼ်ၵိူဝ်ႇ¹⁰ဝႆၢးတီး ၸဝ်ၵေႃၼႆရေႃဢႄးတႃးႁရ်ၵူလ်ႁိူဝ်းတင်တပႄးၵိူဝ်ႇၵမ်းလဵဝ် ၼႆၸွလၼ်ဢႄး ဢိူင်တလမၼုတ။

¹¹မိူဝ်းသငိၵိူၼ်တီး ၽႃရိသႄးၵိူဝ်ႇၼႆလွတ်တဝ်းထရူးတႃးၸဝ် ၸႃႇတိူရ်ထဵင်းမိူဝ်ႇၸဝ်။ ၵွပ်ႇၵိူဝ်ႇသုၼ်းၸၢမ်ၸဝ် ၽႃရိသႄးၵိူဝ်ႇၼႆႁႅယ်းဢႄးၸဝ်ၸီႇလွင်ၼိမိၵ်ႇလွင်ဢၢမ်း ဢႄးၸၢင်မသ်လွင်ဢၼ်ၽြႃးၸဝ်ဢႄးမူၵ်ႇၸဝ်ၼႆၢဢၶႂၢင်းဢႃၼႃၼေး။¹²မိူဝ်းတီးၸဝ်ၵေႃၼႆရိူၵ်ႇထူဝ်းလူင်းတင်ၽွမ်းၸျႄး ၼႆတႃး “ၵွပ်ႇသိူၼ်းၼႄႉ ဢီႉၵၢပ်ႇသတီး ၼႆႁႅယ်းတႃဢွလ်းၼိမိၵ်ႇဢၢမ်းလၵ်ႉၶၼႃၽြႃးၸဝ်။ ဢူဝ်ႉငႃးလဝ်ပေႉလွင်တႄ ဢူဝ်ႉၼမ်ငႃးၸီႇလဝ်ၼမိၵ်ႇလၵ်ႉၶၼႃႁလ်း” တႃးသိူၼ်းၼီ။¹³ဝႆၢးတီး ၸဝ်ၼႆလႄလၼ်ထင်းၽႃရိသႄးၵိူဝ်ႇ ၼႆရေႃဢႄးၼႅလ်တႃးႁိူဝ်း တင်တပႄးတၢင်ႁိူင်း ၼႆလူဝ်လၼ်ထႅင်းပၢင်းဢူမ်းၵႃလိလႆသိူဝ်ပလၢၵ်ႉ။

¹⁴ၵွပ်ႇတပႄးၸဝ်ၵိူဝ်ႇၼမ်တွင်လေႇထရူးၶဝ်မုၼ် မၢင်ႁႃးၶဝ်မုၼ်ႁွၵ်းတႃးႁရ်းၵူလ်ႁိူဝ်း။¹⁵မိူဝ်းတီး ၸဝ်ၼႆတႃးတပႄးၵိူဝ်ႇၼႆၢ “တိူမ်ၽရွမ်သတိ တသေး ႁေရူတ်းတင် ၽႃရိသႄးၵိူဝ်ႇ” ဢႄးသတိတႃးသိူၼ်းၼီ။¹⁶တပႄးၸဝ်ၼႆတူရ်တႃးတႄႉၼႆၢ “ၵွပ်ႇဢေႉၼမ်မၢင်ၶဝ်မုၼ်ၵုမ်း ၸဝ်ၼႆတႃးသိူၼ်းတီး” တိူရ်တႃးတႄႉၼႆၢသိူၼ်းတီး။¹⁷ၵွပ်ႇမသ်တပႄးၵိူဝ်ႇတိူရ်ꧣႃးမိူဝ်ႇလွင်ႁလ်း ၸဝ်ၼႆတႃးတပႄးၵိူဝ်ႇၼႆၢ “ပေႉၼမ်လူဝ်တိူရ်ထဵင်းမိူဝ်ႇၵွပ်ႇၶဝ်မုၼ်ၼေး။ ပေႉမၢတ်ႇပွင်းၽွမ်းႁူဝ်ႉလွင်ဢၼ်ဢူဝ်ႉသွၼ်းၵိူဝ်ႇၼေးၽတ်းတိူဝ်သတီး။ ပေႉၼမ်ၸၢင်သွၼ်းလေႇႁႃး” ꧣႃးသိူၼ်းၼီ။¹⁸ၸဝ်ၼႆသိုပ်းꧣႃးထႅင်း “ပေႉမၢင်မိူဝ်ႇငႆၢၵေႃ ၼမ်ၸၢင်ဢွလ်း၊ မၢင်မိူဝ်ႇၵိူဝ်တႄႉၵေႃၼမ်ငရ်း၊ ပေႉၼမ်တွင်ဢၼ်ၿၼ်းပဵၼ်းလၼ်ၵိူဝ်ႇၼေးႁႃး။¹⁹မိူဝ်းဢူဝ်ႉပွတ်းဢႄးဢီႉႁၼ်းရဵင်း ၼႆၢၶဝ်မုၼ်ၼေး ဢၼ်လိူဝ်းပွၼ်းသိူဝ်ႇၼႄႉၵပုၵ်ႇ” ၵိူဝ်ႇၵေႃၼႆတႃး “ပွၼ်းသိူဝ်ၵွလ်းဢရ်းၵိူဝ်ႇပုၵ်ႇဢေႃ” ꧣႃးသိူၼ်းၼီ။²⁰ၸဝ်ၼႆတႃး “မိူဝ်းဢိူဝ်ႉပွတ်းဢႄးဢီႉပူၼ်းရဵင်းၼႆၢၼေး ၶဝ်မုၼ်ၶၼ်းၼေးဢၼ်လိူဝ်းပွၼ်းသိူဝ်ႇၼႄႉၵပုၵ်ႇ” ၵိူဝ်ႇၼႆတႃး “ပွၼ်းပုလ်းၵပုၵ်ႇဢေႃ” တႃးသိူၼ်းၼီ။²¹ၵွပ်ႇသိူၼ်းတီးၸဝ်ၼႆတႃးၵိူဝ်ႇၼႆၢ “ၵွပ်ႇသိူၼ်းၼႄႉ ၽတ်ႉတိူဝ်သိူဝ်တီးပေႉမတ်ႇပွင်းၽွမ်း” တႃးသိူၼ်းၼီ။

²²မိူဝ်းၵိူဝ်ႇၼႆလွတ်ဝ်းလၼ်တႃးဝႅယ် ပၵ်ႉသႄတၼေး ဢီႉသိူဝ်ၸုမ်းၼႆရၢၵ်ႇထရူးဢီႉဢၼ်ငႆၢၼမ်ဢွလ်းႁွၵ်း ၼႆတွင်းပၢၼ် ဢႄးၸဝ်လေႇတိထုၺ်သိူၵ်ႇၼိူမ်ဢႄး။²³ၸဝ်ၼႆရၢၵ်ႇတိုတ်ႇလၼ်ဢီႉဢၼ်ငႆၢၼမ်ဢွလ်းၼေးလႄလၼ်တႃးပၼွၵ်ႇဝႅယ် ၼႆလေႇဢူမ်းၺၢင်းဝွတ်းဢႄးတႃး ငႆၢဢီႉဢၼ်ငႆၢၼမ်ဢွလ်းၼေး ၼႆလေႇတိတႄႉတၢင်းသပ်ႉတႃးတိူဝ်းဢိူၼ်း “ႁႆမိဢွလ်းသိူဝ်ႇမဵဝ်းမဵဝ်း” တႃးဢိူၼ်းၼႆၢသိူၼ်းတီး။²⁴ဢီႉဢၼ်ဢေးၵေႃၼႆသိူင်းသိူရ်ဝိတ်မိူဝ်ႇ ၼႆတႃး “ဢူဝ်ႉဢွလ်းဢီႉဢေႃ။ ၵူၺ်းၼမ်ဢွလ်းၸႅင်း ꧣူၺ်းမိူဝ်ႇတိူင်းၶႄႉၼဝရ်ဢေႃ” တႃးၸဝ်ၼႆၢသိူၼ်းၼီ။²⁵ဝႆၢးတီး ၸဝ်ၵေႃၼႆလေႇတီႉတႄႉ တၢင်းဢႄးတႃးငႆၢဢိူၼ်းတႃပွၵ်ႇၵမ်းၵဢၢရ်း။ မိူဝ်းတီး ငႆၢဢိူၼ်းၵေႃဢွလ်းၼႅလ်ၸႅင်းရၵ်ႇ။ ဢွလ်းၸႅင်းတင်လွင်တၢင်ႁႆၢႉ။²⁶ၸဝ်ၵေႃၼႆတႃးတင်ဢိူၼ်းၼႆၢ “ယႃၵုတ်လၼ်တႃးဝႅယ်ၼႆး” တႃးသိူၼ်းတီး ၼႆၸႂ်ပိူၼ်ဝဵင်ဢိူၼ်း။

²⁷ဝႆၢးတီးၸဝ်တင်တပႄးဢိူၼ်းၼႆလၼ်ဢႄးတႃးၽရူႇ ရိမ် ဝဵယ်သီသႃရီးတင် ရိမ်ဝႅယ်ၽိလိပု။ မိူဝ်းတီးၸဝ်ၼႆတႃးတပႄးဢိူၼ်းၼႆၢ “ဢီႉတၢင်ႁိူင်းၵိူဝ်ႇတႃးၼႄႇဢိူဝ်ႉၼႄႇယႅလ်း” မႆယ်းတႃးသိူၼ်းၼီ။²⁸တပႄးၸဝ်ၵိူဝ်ႇၵေႃၼႆတႃး “ရၵႃတႃးၸဝ်ၼႄႇသြႃငိူပ်ႇဢူမ်းယေႃးႁၢၼ်၊ ရၵႃတႃးၼႄႇ ၸဝ်ပရေႃးၽႅတ်ႈဢေလိယ ရၵႃၼႆတႃး ၸဝ်ၼႄႇ ၸဝ်ၽရေႃးၽႅတ်းသိူဝ်ႇပႃး ၼႂ်းပရေႃးၽႅတ်းၵဵယ်းပွၵ်ႇ” ꧣႃးသိူၼ်းၼီ။²⁹ဝႆၢးတီး ၸဝ်ၼႆတႃး “ပေႉလူး ပေႉတႃးဢူဝ်ႉၼႄႇယႅလ်း” ပေတရုၼႆတႃး “ၸဝ်ၼႄႇၸဝ်ၶရဵတ်ႇ” တႃးသိူၼ်းၼီ။³⁰မိူဝ်းတီးၸဝ်ၼႆတႃးတပႄးၵိူဝ်ႇၼႆၢ ဢႄးယႃလဝ်ယႅလ်းလွင်ၸဝ်ၼႄႇယႅလ်းၼေးၼႆး။

³¹ဝႆၢးတီး ၸဝ်ၼႆသွၼ်းတပႄးၵိူဝ်ႇၼႆၢ လွင်ၵွၼ်ဝ်းဢီႉၸဝ်ၼီ ငႃးၺႃး ဢီႉၸိူဝ်ႉၶိူဝ်းဢၼ်ပိူလ်တၢင်ႁိူင်း၊ ပရေႃးႁဵတ်းဢၼ်ပိူလ် တင် သြႃမေႃးၵျၢမ်းၵိူဝ်ႇ ငႃးပႄၸွၵ်ႇ ၼႆငႃးၺႃးပယႅမ်း မိူဝ်းပွၼ်းဝႆးသငိၼေး ၼႆငႃးဢိမ်းရွႆၼႅလ်ၼေး။³²ၸဝ်ၼႆၶရႆလဝ်ႁႆၢႉၵူဝ်ႇတႅတ်ႇတႅတ်ႇတေႃးတေႃး။ ၵွပ်ႇသိူၼ်းတီး ပေတရုၼႆတိုတ်ႇလေႇၸဝ် ၼႆတႃးဢႄးယႃၶရႆလဝ်ၵိူဝ်ႇသိူၼ်းတီးၼႆး။³³မိူဝ်းတီး ၸဝ်ၼႆဝႆၢးလၼ်ႁရ်တပႄးတၢင်ႁိူင်းၼႆတႃး ပေတရုၼႆၢ “မႃၼၢတ်ႇ၊ လၼ်ထင်းရိမ်ဢိူဝ်ႉဢႄး။ မီႇၼမ်သူၼ်လွင်ဢၼ်သႅင်တင်ၽြႃးၸဝ် မီႇသူၼ်လွင်ဢၼ်သႅင်တင်ဢီႉႁႃး” တႃးသိူၼ်းၼီ။

³⁴ဝႆၢးတီး ၸဝ်ၼႆရၢၵ်တပႄးၵိူဝ်ႇ တင် ဢီႉတၢင်ႁိူင်း ၼႆတႃး “ယႅလ်းသေၼမ်ꧣႃး ဢီႉဢၼ်သုၼ်းလၼ်သွပ်းတႃးပွတ်ဝ်းဢူဝ်ႉၼႆပဵၼ်းတပႄးဢူဝ်ႉၼီ ငႃးၿွၼ်းၸွၵ်ႇၽွမ်းဢလူဝ်တႄႉ ၼႆတၼ်ငွမ်မိူဝ်ႇ တႃၿႅၵ်ႇတင်လၵ်ႉတၵ်းတိတႄႉလၼ်သွပ်းတႃးပွတ်းဢိူဝ်ႉ။³⁵ၵွပ်ႇၼႄႇယႅလ်းသေၼမ်ꧣႃး ဢီႉဢၼ်သုၼ်းထႅမ်းဢသၢၵ်ႇတႄႉၵိူဝ်ႇၼီ ၵိူဝ်ႇၼမ်ငႃးၿွၼ်းဢသၢၵ်ႇဢိမ်းထႃဝရႃႉ။ ၵေးꧣႃး ယႅလ်းသေၼမ်ꧣႃး ဢၼ်ယႅမ်ၵွပ်ႇ ၼႄႇတပႄးဢူဝ်ႉ တင်ၵွပ်ႇႁေႃးလွင်ၶၢဝ်မင်ၵလႃရၵ်ႇၼီ ၵိူဝ်ႇငႃးၿွၼ်းဢသၢၵ်ႇဢိမ်းထႃဝရႃႉ ။³⁶ဢီႉဢၼ်ၼီ ပွၵ်ႇၿွၼ်းတၢင်ၵမ်ၽႃသေတႃႉ ပွၵ်ႇၼႆၿၼ်းသုမ်းဢသၢၵ်ႇတႄႉ ငႃးမၢင်ဢၵျူဝ်းသိူၼ်းၼႄႉ။³⁷ဢီႉၼေး ငႃးဢႄးႁလ်း တႃၸၢင်လိူၵ်ႇၼႅလ်ဢသၢၵ်ႇဝိၺၢၼ်ႇတႄႉ။³⁸ၵွပ်ႇ ဢီႉဢၼ်ၵသေႉၵွပ်ႇဢူဝ်ႉတင်တႃတြႃးဢူဝ်ႉၵိူဝ်ႇ မိူဝ်းၵၢပ်ႇဢၼ်ၼိူၵ်ႇတင်ဢပႅတ်ႇၼီ ၽတ်းၵွၼ်ဝ်းဢီႉၸဝ်ၼေး ၸွထရူးတင်ၶုၼ်းၽရႄႇဢၼ်မျၢတ်ႈၵိူဝ်ႇ တင်ၽုင်းတၼ်းၶူဝ်းၽြႃးၸဝ်ၼေး ဢိူၼ်းငႃးၵသေႉမိူဝ်ႇၵွပ်ႇၵိူဝ်ႇ” တႃးသိူၼ်းၼီ။

Empower Asia Bible Translation Movement

https://app.library.bible/content/b1ab701c663e47cc