Mark7
1သိူဝ်သငိ ၽႃရိသႄးတင် သြႃမေႃးၵျၢမ်းတၢင်းႁိူင်းဢၼ်ထရူးထင်းၸေရုသလၢမ် ၼႆတိူရ်ၸူႉထရူးမိူဝ်ႇတႃးၸဝ်။2မိူဝ်းတီးၵိူဝ်ႇၼႆဢွလ်းတပႄးၸဝ်တၢင်ႁိူင်းၵိူဝ်ႇၼမ်ၸီႇသွပ်းထုင်းၸၢမ်ဢီႉၸူးၵိူဝ်ႇ ၼႆသွၢမ်းရူမ်သွမ်း တိၵေႃၼမ်ၶေးလေႇတိဢၼ်ဝေႇႁၢင်ႇၼေးသွမ်း။3ၵွပ်ထုင်းၸၢမ်ပူမွၼ်ဢၼ်မၢင်မူၵ်ႇ ၽႃရိသႄးတင်ဢီႉၸူးဢၼ်ၼီ ပွၵ်ႇၼမ်ၶေးတိတႄႉ ၵိူဝ်ႇၼမ်သွမ်းရူမ်သွၢမ်း။4မိူဝ်းဝဵင်ထရူးထင်းၵၢတ်းၵေႃ ပွၵ်ႇၼမ်ၶေးတႄႉၼီ ၼမ်သွမ်းရိူမ်သွမ်း။ ၼႆၸီႇသွပ်းတင် ထုင်းၸၢမ်တၢင်ႁိူင်းသိူၼ်းဢၼ်ၶေး ထဝႆး၊ ၶလွၵ်း၊ ၵလူဝ်ႉ၊ ၵူ။5မိူဝ်းတီး ၽႃရိသႄးတင်သြႃမေႃးၵျၢမ်းတၢင်ႁိူင်း ၼႆတႃးၸဝ်ၼႆၢ “တပႄးၸဝ်ၵိူဝ်ႇၼီ ၵွပ်ႇသိူၼ်းၼႄႉၼမ်ၸီႇသွပ်းထုင်းၸၢမ်ပူမွၼ်။ ၵွပ်ႇသိူၼ်းၼႄႉလေႇတိဢၼ်ဝေႇႁၢင်ႇသွမ်းရိူမ်သွမ်း” တႃးၸဝ်ၼႆၢသိူၼ်းတီး။6ၸဝ်ၼႆတႃးၼႅလ်ၵိူဝ်ႇၼႆၢ “လွင်ဢၼ်တႅမ်းလဝ်ငွမ်လွင်ပေႉဢီႉဢၼ်ၽၢၼ်းပုင်တူတေႃၵွင်း တႃးၵျၢမ်းၸဝ်ဢရိယႃႁေသႃယႃႉၼေး တေႃးတႄ။ ဢိူၼ်းတႅမ်းမူၵ်ႇလွင်ပေႉꧣႃး ‘ဢီႉၵိူၼ်တီးၵူဝ်ၵိူဝ်ႇၼပ်ႇသွမ်းမိူဝ်ႇဢူဝ်ႉၵေႃ ၽွမ်းၵိူဝ်ႇၼင်သိူဝ်ငႆၢမိူဝ်ႇတင်ဢူဝ်ႉ’ တႅမ်းမူၵ်ႇသိူၼ်းၼီ။7သိူၼ်းဢၼ်တႅမ်းမူၵ်ႇꧣႃး ‘ပေႉလေႇထုင်းၸၢမ်ဢၼ်ဢီႉၵိူဝ်ႇတႅပ်းတတ်းမူၵ်ႇၸီႇတြႃးဢူဝ်ႉ ၼႆသွၢၼ်းဢီႉတၢင်ႁိူင်း ဢၼ်ပေႉၵူဝ်းၵွႆၢဢူဝ်ႉၼေးၼမ်ၸိူဝ်တႄ’8ပေႉၵေႃ ၼမ်ၸိူဝ်ပေႉၸီႇသွပ်းတြႃးၽြႃးၸဝ် ၼႄႇပေႉၸီႇသွပ်းထုင်းၸၢမ်ဢီႉႁႃး” တႃးသိူၼ်းၼီ။9ၸဝ်ၼႆတႃးထႅင်း “ပေႉၼႆလေႇၸွၵ်ႇတြႃးပၺၢတ်ႇၽြႃးၸဝ် တႃထိင်းမူၵ်ႇထုင်းၸၢမ်ပေႉ။10ၵွပ်ႇၼ်ႂးၵျၢမ်းမေႃးသေၼေး တႅမ်းမူၵ်ႇတႃး ‘ဢႄးတိူမ်ၽရွမ်ၼပ်သွမ်းမႃႇပႃးတႄႉ။ ယႅလ်းသေၼမ်ꧣႃး ဢီႉဢၼ်ၼမ်ၼပ်ႇသွမ်းမႃႇပႃးတႄႉ ၼႆꧣလ်းၼႅလ်ၼီ ဢႄးၺႃးတၢမ်ယႅမ်’ တႅမ်းမူၵ်ႇသိူၼ်းတီး။11ၵေးꧣႃးသိူဝ်ပလၢၵ်းပေႉသွၼ်းတႃး ‘ဢီႉႁွၵ်းၼီ တႃးမႃႇပႃးတႄႉၼႆၢ “ၶရိူင်လူဢၼ်ဢူဝ်ႉငႃးလူဢႄးပေႉၼႆၢၼီ ဝႃပဵၼ်းၶရိူင်လူ ဢၼ်ရၢၵ်ႇꧣႃး ၵေႃပၼ် ဢၼ်ငႃးလူဢႄးၽြႃးၸဝ်” တႃးသိူၼ်းတီၵေႃဝႃၿွၼ်း’ ပေႉသွၼ်းမူၵ်ႇသိူၼ်းတီး။12ၵွပ်ႇသိူၼ်းတီး တႄထင်းမိူဝ်းတီး ၼမ်ဢႄးလႆးဢီႉဢၼ်ဢေး ထွၵ်ႇၼႅလ် မႃႇၼမ်ၸိူဝ်ၵေႃပႃးတႄႉ။13ၼႄႇသိူၼ်းတီး ပေႉၼႆပလွႆးမူၵ်ႇၸွၵ်ႇပၺၢတ်ႇၽြႃးၸဝ် တႃၸီႇသွပ်းထုင်းၸၢမ်ဢၼ်ပေႉသိုပ်းထရူးထင်းပူမွၼ်ပေႉၼေး။ တင်လွင်ၼမ်ရၵ်ႇတၢင်ႁိူင်းသိူၼ်းတီးၵေႃ ပေႉဝႃၸီႇထရူး” ꧣႃးသိူၼ်းၼီ။14ဝႆၢးတီးၸဝ်ၼႆရၢၵ်လေႇထႅင်းဢီႉတၢင်ႁိူင်းၵိူဝ်ႇ ၼႆတႃးၵိူဝ်ႇၼႆၢ “ပေႉတိူမ်ၽရွမ် တိူၵ်ႇငရ်မွႆယ်ရမႃဢူဝ်ႉ ၼႆတိူမ်ၽရွမ်ပွင်းၽွမ်းဢႄး။15လွင်ဢၼ်ၵုတ်ထရူးတႃးတိူဝ်းဢီႉထင်းပၼွၵ်ႇၼီ ၼမ်မၢင်ႁလ်းဢၼ်ၸီႇဢႄးဢီႉၵိူဝ်ႇဝေႇႁၢင်ႈ။ ဢၼ်လႄလၼ်ထင်းတူဝ်းဢီႉႁႃး ဢၼ်ၸီႇဢႄးဝေႇႁၢင်ႈ။16ဢီႉဢၼ်တိူၵ်ႇငရ်းၵိူဝ်ႇ တိူမ်ၽရွမ်ၸၵူးသိူင်းဢၼ်ပေႉငရ်းၵိူဝ်ႇၼေးဢႄး” တႃးသိူၼ်းၼီ။ 17ၸဝ်ၼႆလႄလၼ်ထင်းဢီႉပရိၵ်ႇသၢတ်ႇၵိူဝ်ႇ မိူဝ်းၸဝ်ၼႆၵုတ်လၼ်တႃးၵၢင်သိူဝ်ၵၢင် တပႄးၸဝ်တၢင်ႁိူင်းၵေႃ ၼႆမႆၢၺ်းတီပွင်းလွင်ဢုပမႃဢၼ်ဢေး။18ၸဝ်ၼႆတႃးၵိူဝ်ႇၼႆၢ “ပေႉၼမ်မၢင်တၢင်ၸၵူးပေႃတိူရ်တီး။ ရိူမ်သွမ်းဢၼ်ပေႉသွမ်းသပ်ႉတႃးတူဝ်းဢၼ်ၼီ ၼမ်ၸၢင်ၸီႇဢႄးဝေႇႁၢင်ႈ။19ၵွပ်ႇဢၼ်ပေႉသွမ်းၼေး ၼမ်ၸိူဝ်ၵုတ်ဢႄးတႃးၽွမ်း ဢိူၼ်းၵုတ်ဢႄးတႃးၵလုင်း ၼႆလႄလၼ်ဢႄးၼႅလ်ပၼွၵ်ႇတူဝ်းၼမ်ၸိူဝ်” တႃးသိူၼ်းတီး။ ၸဝ်ယေသုသုၼ်းလဝ်တႃး ရိူမ်သွမ်းတၢင်ႁႆၢႉၸႅတ်ႇၸၢင် ၸၢင်သွမ်းႁႆၢႉ။20ၸဝ်ၼႆသိုပ်းတႃး “ဢၼ်လႄထရူးထင်းၽွမ်းပေႉႁႃး ဢၼ်ၸီႇဢႄးဢီႉဝေႇႁၢင်ႈ။21ၵွပ်ႇၼႄႇ တၢင်ၸၵူးၼမ်ရၵ်ႇထင်းၽွမ်း၊ တၢင်ၸၵူးတႃၵူတ်ႇၵွၼ်ဝ်းၵိူဝ်ႇပိူၼ်းဢီႉ၊ ရႃႇရီးရႃႉဢီႉ၊ ပယႅမ်းဢီႉ22ၵူတ်ႇၼႃၵၢင်၊ မၢင်လေႃးၽ၊ ရိူင်၊ ၽွမ်းဝူတ်ႇ၊ လႅၼ်းသွၢမ်း၊ ၸီႇလွင်ၼမ်ရၵ်ႇ၊ ၼမ်ၼႃလူဝ်၊ ꧣႃးသေႃၵႃးဢီႉ၊ မၢင်မႃၼတင် မၢင်ၽွမ်းၼမ်ရၵ်ႇၵိူၼ်ၼီလႄထရူးထင်းၽွမ်းဢီႉ။23လွင်ၼမ်ရၵ်ႇၵိူၼ်တီး လႄထရူးထင်းၵိူၼ်တိ ၼႆၸီႇဢႄးဢီႉဝေႇႁၢင်ႈ” တႃးသိူၼ်းတီး။24ဝႆၢးတီး ၸဝ်တင်တပႄးၵိူဝ်ႇၼႆလႄလၼ်ထင်းႁေႃး ၼႆလွတ်ဝ်းထရူးတႃး ရိမ်ဝႅယ်တုရု တင်ဝႅယ်သိတုမ်။ ၸဝ်ၵေႃၼႆထရူးယႅတ်းထင်းတႃးၵၢင်သိူဝ်ႇၵၢင် တႃးဢႄးဢီႉၼမ်မသ်ႇၵေႃၼမ်ၸၢင် ဢီႉတၢင်ႁိူင်းၵေႃၼႆတိူမ်ၽရွမ်မသ်။25မိူဝ်းတီးၵမ်းလဵဝ် ၵိူၼ်ၺႃႇႁွၵ်ႉဢၼ်ၵွၼ်ဝ်းဢိူၼ်း ၺႃးၽရႄႇၼမ်ရၵ်ႇၵုတ်ႇၼေး မိူဝ်းဢိူၼ်းငရ်းလွင်ဢၼ်တီး ဢိူၼ်းၼႆလွတ်ဝ်းထရူးတႃးၸဝ် ၼႆၵတေးထွၵ်ႇၵိင်းသင်းတွင်းပၢၼ်သိူၼ်ꧣလ်းၸဝ်။26ၵိူၼ်ၺႃႇၸၢဝ်းၶိူဝ်းၵရိဢၼ်ဢေးၼႄႇဢီႉတၢင်ၸၢဝ်းၶိူဝ်းႁွၵ်း ဢၼ်ၵိူတ်းတႃးၵလိူင်းသီးရီးယႃး ဢိူင်ၽူဝ်ၼီးသျႃး။ ၵိူၼ်ၺႃႇဢၼ်ဢေး ၼႆထရူးတွင်းပၢၼ်ၸဝ် ဢႄးလွမ်ပလႄးဢႄးၽရႄႇၼမ်ရၵ်ႇထင်းၵွၼ်ဝ်းဢိူၼ်း။27ၸဝ်ၼႆတႃးဢိူၼ်းၼႆၢ “ဢႄးဢူဝ်ႉဢႄးဢႆၢႉဢီႉၸၢဝ်ၶိူဝ်းၸူးဢၼ်ၼႄႇၸိူဝ်ၶိူဝ်းဢူဝ်ႉၵိူဝ်ႇၼေးၼႆၢ ဢၼ်ၵိူဝ်ႇလူဝ်။ ပွၵ်ႇၼမ်ၸိူဝ်သိူၼ်းတီး ငႃးꧣူၺ်းဢူဝ်ႉလေႇၶဝ်မုၼ်ထင်းၵွၼ်းဢီႉ ဝႆရ်းဢႄးသူဝ်ႉၵိူဝ်ႇၼႆၢ” ꧣႃးသိူၼ်းၼီ။28ၵိူၼ်ၺႃႇၼေးၼႆတႃးၸဝ်ၼႆၢ “တေႃးဢေႃၸဝ်။ ၵေးတႃးသူဝ်ႉႁႃးၵေႃ ၼင်ၿၼ်းသွမ်းမိူဝ်ႇ ရိူမ်သွမ်းၵွၼ်ဝ်းဢီႉ ဢၼ်လိူဝ်းႁရ်ဢွၵ်ႉၶူင်ၵိူဝ်ႇၼေး” တႃးသိူၼ်းၼီ။29မိူဝ်းတီး ၸဝ်ၼႆတႃးဢိူၼ်းၼႆၢ “ၵွပ်ႇၶေႃတွပ်ႇမီႇ ဝႃပလႄးလဝ်လွင်မီႇယုမ်ယမ်ဢၼ်ဢူဝ်ႉၸၢင်ၸီႇဢႄးတႃမီႇသိူၼ်းၼႄႉၼေး ဝဵင်ဝိူတ်းၵၢင်မီႇဢႄး။ ၽရႄႇၼမ်ရၵ်ႇၼေးဝႃလႄလၼ်မိူဝ်ႇထင်းၵွၼ်ဝ်းမီႇ” ꧣႃးသိူၼ်းၼီ။30မိူဝ်းၵိူၼ်ၺႃႇၼေးဝဵင်လွတ်ဝ်းၵၢင်ၵေႃ ၼႆဢွလ်းမိူဝ်ႇၵွၼ်ဝ်းၵိူၼ်ၺႃႇတႄႉ ၼႆမူဝ်ႇရၵ်ႇယႅတ်းမိူဝ်ႇႁရ်ၵူလ်တီယႅတ်း ၽရႄႇၼမ်ရၵ်ႇၵေႃဝႃလႄလၼ်ထင်းၵွၼ်ဝ်းဢိူၼ်းၼေး။31ဝႆၢးတီး ၸဝ်တင်တပႄးၸဝ်ၵိူဝ်ႇၵေႃၼႆလႄလၼ်ထင်းရိမ်ဝႅယ်တုရုၼေး ꧣတ်းပူၼ်လၼ်ဝႅယ်သိတုမ် ၼႆၸွလၼ်ဢႄးတႃးဢူမ်းၵႃလိလႄး ပူၼ်လၼ်ထင်းတိူၼ်ၶိၼ်းၼႄတေၵႃပေႃးလိ။32မိူဝ်းတီးဢီႉရၵႃၼႆလေႇထရူးဢီႉဢႃႉဢၼ်ဢၵတႅယ်ႉၼမ်ငရ်းႁွၵ်း ၼႆတွင်းပၢၼ်ၸဝ်ဢႄးသိူၵ်ႇၼိူမ်ဢႄးလေႇတိတၢင်းဢႄးႁရ်ၵူလ်တူဝ်းဢိူၼ်း။33ၵွပ်ႇသိူၼ်းတီး ၸဝ်ၵေႃ ၼႆရၢၵ်ႇလၼ်ဢီႉဢၼ်ဢေးထင်းတီသငႆၢဢီႉတၢင်ႁိူင်း ၼႆလေႇတိၸုၵ်းသပ်းတႃးၵတႅယ်ႉဢိူၼ်းတင်ဢၢရ်းပလၢၵ်း။ တင်ထႅင်း ၼႆတိူၵ်ႇသျူးသပ်းဢူမ်းၺၢင်းတႃးတိ ၼႆထုၺ်သပ်းတၢၵ်းဢီႉဢၼ်ဢေးၼႆၢ။34မိူဝ်းတီးၸဝ်ၼႆသိူင်းရေႃတႃးပလဵင်း ၼႆရိူၵ်ႇထူဝ်းလူဝ်း ၼႆတႃး “ဢေၽႃႉသႃႉ” တႃးသိူၼ်းၼီ။ တီးပွင်း “ဢေၽႃႉသႃႉ” ဢိူၼ်းၼႄႇတႃး “ဢႄးသိူၵ်ႇဝွသ်” တႃးသိူၼ်းၼီ။35ဢီႉဢၼ်ဢေးၵေႃ ၸၢင်ငရ်းၼႅလ် တၢၵ်းၵေႃၼႆၵၸိူမ် ၸၢင်ရမႃရၵ်ႇရၵ်ႇၵမ်းလဵဝ်။36ဝႆၢးတီးၸဝ်ၼႆတႃးဢီႉၵိူဝ်ႇၼႆ ဢႄးယႃလဝ်ၼႅလ်ယႅလ်းလွင်ဢၼ်ၸဝ်ၸီႇၼေးၼႆး။ ၵေးတႃးၸဝ်ယဵင်လဝ်တႃးသိူၼ်းတီး ၵိူဝ်ႇၼႆယဵင်ၶႃးလဝ်ဢီႉ။37ဢီႉတၢင်ႁိူင်းဢၼ်ၿၼ်းငရ်းလွင်ၵိူၼ်တီးၵိူဝ်ႇၵေႃ တိူမ်ၽရွမ်ဢၢမ်းမိူဝ်ႇ ၼႆꧣႃး “လွင်ဢၼ်ၸဝ်ၸီႇၵိူဝ်ႇၼေး ရၵ်ႇဢၢမ်းယႆ။ ၸီႇဢႄးဢီႉၵတႅယ်ႉၼမ်ငရ်း ဢႄးငရ်းၼႅလ် ၼႆၸီႇဢႄးတင်ဢီႉဢၼ်ဢႃႉၸၢင်ရမႃၼႅလ်” ꧣႃးသိူၼ်းၼီ။
Empower Asia Bible Translation Movement