Mark9
1ဝႆၢးတီးၸဝ်ၼႆတႃးဢီႉတၢင်ႁိူင်းတင်တပႄးဢိူၼ်းၼႆၢ “ဢူဝ်ႉငႃးလဝ်ပေႉၼႆၢလွင်တႄ၊ ဢီႉရၵႃၼႂ်းပေႉဢၼ်ၼႄႇႁၼီးၵိူဝ်ႇၼီ ၼမ်ငႃးၿၼ်းယႅမ် ၽတ်းတိူဝ်မၢတ်ႇၿၼ်းဢွလ်း ၽြႃးၸဝ်ဢုပ်းပိူင်တင်တၼ်းၶူဝ်းဢၼ်မျၢတ်ႇပိူလ်တႃသႃသၼႃဢိူၼ်းၼေး” တႃးသိူၼ်ၼီ။2ဝႆၢးပူၼ်လၼ် တွလ်းသငိ ၸဝ်ယေသု ၼႆရၢၵ်ႇလၼ်ၶေႃး ပေတရု၊ ယႃၵူပ်ႈ တင်ယေႃးႁၢၼ် ရေႃလၼ်ဢႄးတႃးႁရ်ၵူလ်ရင်ဢၼ်ၸရွင်ယႆၼေး။ မိူဝ်းတီး တူဝ်းၸဝ်ၵေႃၼႆလႅၵ်ႇလႆၢမိူဝ်ႇပုင်ရၢင်သိူၼ်တလ်းၵိူဝ်ႇ။3ၶရွၸဝ်ယေသုၼီ ၼႆၵိူၼ်ရႃဢၢမ်းပေႃးတၢၼ်ဢၼ်ယႅလ်းၼမ်သိူၵ်ႇတုဢၢမ်းပွၼ်းႁရ်ၵူလ်ၵမ်ၽႃၼီၼေး။4ပရေႃးၽႅတ်းဢေလိယ တင် မေႃးသေၼႆလႄထရူးသိူၼ်တလ်းၵိူဝ်ႇ ၼႆရမႃတူရ်ဢုပ်ႉမိူဝ်ႇတင်ၸဝ်။5မိူဝ်းတီး ပေတရုၼႆတႃးၸဝ်ၼႆၢ “ၸဝ်၊ ႁၼီးရၵ်ႇမူဝ်ႇယႆတႃဢေႉၼေႃ။ ၶႅၼ်းတေႃဢႄးဢူဝ်ႉၸီႇဢႄးသုမ်းဝႆးသုမ်း တႃၸဝ်သိူဝ်သုမ်း၊ တင်တႃမေႃးသေသိူဝ်သုမ်း တင်တႃဢေလိယသိူဝ်သုမ်း” တႃးသိူၼ်းၼီ။ 6ၵွပ်ပေတရုတင်ဢီႉဢၼ်ၵိုတ်းတူမ်ၽရွမ်တႄႉꧣူဝ်း ပေတရုၼမ်မသ်တႄႉတႃးသိူၼ်းၼႄႉၼႆတႃးလေ။7မိူဝ်းတီး ၽရီႇၵေႃပဢိူမ်းထရူး ပဢိူမ်းၼႆꧣပ်းသပ်ႉတႃးႁရ်ၵူလ်ၵိူဝ်ႇ ၼႆမင်ရိူသ်လႄထရူးတႃးထင်းပဢိူမ်း “ဢိူၼ်းၼႄႇၵွၼ်ဝ်းဢူဝ်ႉဢၼ်ဢူဝ်ႉၿၼ်းယေႃ။ တိူမ်ၽရွမ်တိူၵ်ႇငရ်းမွႆယ်ရမႃဢိူၼ်းဢႄး” တႃးလႄသိူၼ်းတီး။8မိူဝ်းၵိူဝ်ႇငရ်းရိူသ်ဢၼ်ဢေး ၵိူဝ်ႇၼႆဝႆၢးသိူင်းၶႃႉၵမ်းလဵဝ်ၼေး ၼမ်ဢွလ်လႆးယႅလ်း ၼႆဢွလ်းႁႃးၸဝ်ယေသုသိူဝ်ပႃးတႃးတႄႉႁႃးဢၼ်ၼႄႇတင်ၵိူဝ်ႇ။9မိူဝ်းၸဝ်ယေသုတင်တပႄးၵိူဝ်ႇ ၸုရ်ထရူးၼႅလ်ထင်းရင်ၼေး ၸဝ်ၼႆတႃးၵိူဝ်ႇၼႆၢ ဢႄးၵိူဝ်ႇယႃလဝ်ꧣႅလ်ယႅလ်းလွင်ဢၼ်ၵိူဝ်ႇဢွလ်းၼေး ၽတ်းတိူဝ်ၵွၼ်ဝ်းဢီႉၸဝ်ဢိမ်းရွႆထရူးၼႅလ်ထင်းယမ်။10ၵွပ်ႇသိူၼ်းတီး ၵိူဝ်ႇၵေႃၼႆၼမ်ၶရႆလဝ်လႆးယႅလ်းၼႆၢလွင်ၵိူၼ်ဢေး။ ၵေးꧣႃး ၵိူဝ်ႇၼမ်ပွင်းၽွမ်း လွင်ဢၼ်ꧣႃး “ဢိမ်းရွႆၼႅလ်ထင်းယႅမ်” ဢၼ်တႃးၼေး ၵိူဝ်ႇၵေႃၼႆ တိူရ်မႆၢယ်းမိူဝ်ႇတႄႉတီပွင်းၼႄႇသိူၼ်းၼႄႉ။11မိူဝ်းတီး ၵိူဝ်ႇၼႆꧣႃး ၸဝ်ၼႆၢ “ၼႄႇၵွပ်သိူၼ်းၼႄႉ သြႃမေႃးၵျၢမ်းတင်ႁိူင်းၼႆတႃး ဢေလိယငႃးထရူးဢႆၢႉ မိူဝ်းၸဝ်ၶရဵတ်ႇမၢတ်ႇၸွထရူးၼေး” ꧣႃးသိူၼ်းၼီ။12ၸဝ်ၼႆတႃး “ဢၼ်တႃးဢေလိယငႃးထရူးမရႄဢႄးဢႆၢႉလွၢင်တၢင်ႁႆၢႉၼေး တေႃးတႄဢိူဝ်ႈ။ ၼႆတႅမ်းမူၵ်ႇထႅင်းꧣႃးတႃးလိၵ်ႇၵျၢမ်း ၵွၼ်ဝ်းဢီႉၸဝ်ၼေး ငႃးၿၼ်းၶၢမ်တုၵ်ႉၶႃႉၼႆငႃးၺႃးပႄၸွၵ်ႇ တႅမ်းꧣႃးၼမ်ၸိူဝ်။13ၵေးꧣႃး ဢူဝ်ႉငႃးလဝ်ပေႉ။ ဢေလိယၼီ ဝႃလွတ်ဝ်းထရူး။ ဢီႉၵိူဝ်ႇၼီသုၼ်းၸီႇသိူၼ်းၼႄႉၵေႃၸီႇ သိူၼ်းဢၼ်တႅမ်းမူၵ်ႇလွင်ဢိူၼ်းတႃးလိၵ်ႇၵျၢမ်း” တႃးသိူၼ်းၼီ။14ဝႆၢးတီး မိူဝ်းၵိူဝ်ႇလွတ်ဝ်းထရူးၼႅလ်တႃးတီတပႄးတၢင်ႁိူင်းဢၼ်ၵိုတ်းၼႄႇၼေး ၼႆဢွလ်း မိူဝ်ႇတပႄးၵိူဝ်ႇတင်သြႃဢၼ်မေႃးၵျၢမ်းတူရ်ထဵင်း ဢီႉတၢင်ႁိူင်းၵေႃၼႆၽရွမ်သိူရ်ဝိတ်ႇမိူဝ်ႇ။15မိူဝ်းဢီႉတင်ႁိူင်းၼႆဢွလ်းၸဝ်ၼေးၵေႃ ၵိူဝ်ႇၼႆဢၢမ်းယႆၼႆရိူၵ်ႇထရူးမိူဝ်ႇတႃးၸဝ်ၵမ်းလဵဝ်။16ၸဝ်ၼႆတႃးသြႃမေႃးၵျၢမ်းၵိူဝ်ႇၼႆၢ “ပေႉတိူရ်ထဵင်းမိူဝ်ႇတင်ၵိူဝ်ႇၵွပ်ႇလွင်ႁလ်း” မႆၺ်းꧣႃးသိူၼ်းၼီ။17မိူဝ်းတီး ဢီႉႁွၵ်းထင်း ၼႂ်းဢီႉတၢင်ႁိူင်းၼေး ၼႆတႃးလႄထရူး “ၸဝ်၊ ၵွပ်ႇၽရႄႇၼမ်ရၵ်ႇၵုတ်ႇၵွၼ်ဝ်းၵိူရ်မေႇဢူဝ်ႉ ၸီႇဢႄးဢိူၼ်းဢႃႉ ဢူဝ်ႉၼႆၿၼ်းရၢၵ်ႇထရူးဢိူၼ်းတႃးၸဝ်။18ပွၵ်မိူဝ်းၽရႄႇၼမ်ရၵ်ႇၵုတ်ဢိူၼ်းၼေး ၼႆၸီႇဢႄးဢိူၼ်းၿုၵ်ႇတႃး ၺၢင်းၵေႃလႄထရူးထင်းၵူဝ် ၼႆတိူရ်တႅၺ်ႉတင်ရၢင်းတႄႉ တိူဝ်းၵေႃပေႃတူရ်ၵွင်ဝ်းလင်ႁႆၢႉ။ ၵွပ်ႇသိူၼ်းတီး ဢူဝ်ႉၵေႃၼႆတွင်ပၢၼ်တပႄးၸဝ်ၵိူဝ်ႇ ဢႄးလွမ်ပလႄးဢႄးၽရႄႇၼမ်ရၵ်ႇၵေႃ ၵိူဝ်ႇၼမ်ၸၢင်လွမ်ပလႄး” ꧣႃးသိူၼ်းၼီ။19ၸဝ်ၼႆတႃးၵိူဝ်ႇၼႆၢ “ဢီႉဢၼ်ၼမ်မၢင်လွင်ယုမ်ယမ်တေႃၽြႃးၸဝ်ၵိူၼ်ၼီ ဢူဝ်ႉငႃးပၼ်းမူဝ်ႇတင်ပေႉၽတ်းတိူဝ်ပွၵ်ႇၼႄႉ။ ငႃးၿၼ်း ၽွမ်းႁၼ်းတေႃးပေႉၽတ်တိူဝ်ပွၵ်ႇၼႄႉ။ ရၢၵ်ႇထရူးၵွၼ်ဝ်းဢီႉၼေးတႃးဢူဝ်ႉဢႄး” တႃးသိူၼ်းၼီ။20မိူဝ်းတီးၵိူဝ်ႇၵေႃၼႆလေႇထရူးဢႄးၵွၼ်းဢီႉၼေးတႃးၸဝ် မိူဝ်းၵွၼ်းဢီႉဢၼ်ၽရႄႇၼမ်ရၵ်ႇၵုတ်ႇၼေး ဢွလ်းၸဝ် ၼႆၸီႇဢႄးၵွၼ်းဢီႉၼေးတိူၵ်ႇၵႅလ်ၵမ်းလဵဝ် ၼႆတႃးလၼ်ႁရ်ၵူလ်ၵတေႉ ၵူဝ်ဢိူၼ်းၵေႃၼႆမၢင်ၺၢင်းၿုသ်းလႄ ပိူလ်မႅလ်မိူဝ်ႇ။21ၸဝ်ၼႆတႃးပႃးၵွၼ်ဝ်းဢီႉၼေးၼႆၢ “ဢၼ်ဢိူၼ်းပဵၼ်းၼႄႇသိူၼ်းၼီဝႃပွၼ်းသိူဝ်ႇၼႄႉသငိ” ပႃးၵွၼ်ဝ်းဢီႉၼႆတႃး “တင်မိူဝ်းဢိူၼ်းၼင်ၼႄႇၵွၼ်းဢီႉဢေႃ။22ၽရႄႇၼမ်ရၵ်ၼီ ၵႆလေႇဢိူၼ်းၵလႄးငလ်၊ ၵလႄးဢူမ်းတိၵ်ႉတိၵ်ႉဢႄးဢိူၼ်းယႅမ်။ ၵေးꧣႃး ပွၵ်ႇၸဝ်ပဵၼ်းပွၼ်း ၶႅၼ်းတေႃမူၵ်ႇၵရုၼႃတေႃးဢေႉၶႃႇ ထႅမ်းဢႄး” တႃးသိူၼ်းတီး။23ၸဝ်ၼႆတႃး “ၵွပ်ႇသိူၼ်းၼႄႇၼႆꧣႃး ပွၵ်ႇပဵၼ်းၿွၼ်း။ တႃဢီႉဢၼ်ယုမ်ယမ်ၼီ ႁလ်းသေၼမ်တႃးပဵၼ်းၿွၼ်းႁႆၢႉ” တႃးသိူၼ်းၼီ။24ပႃးၵွၼ်းဢီႉၼေးၵေႃ ၼႆယၢမ်တင်ၼႆရၢၵ်ႇတႃး “ဢူဝ်ႉၶႃယုမ်ဢေႃ။ ဢႄးၶႃႇၼႆပၼ်းယုမ်လိူဝ်းထရူးထႅင်းၼေး ၶႅၼ်းတေႃ ထႅမ်းဢႄးၵွၼ်ဝ်းဢိူဝ်ႉ” တႃးသိူၼ်းၼီၵမ်းလဵဝ်။25မိူဝ်းၸဝ်ယေသုဢွလ်းဢီႉပရိၵ်ႇသၢတ်ႇတင်ႁိူင်းရိူၵ်ႇထရူးႁေးၼေး ၸဝ်ၼႆတႃးၽရႄႇၼမ်ရၵ်ႇၼႆၢ “ၽရႄႇၼမ်ရၵ်ႇ ၵတႅယ်ႉၼမ်ငရ်းဢၼ်ဢႃႉတီး၊ ဢူဝ်ႉတႃးမီႇၼႆၢ။ လႄလၼ်ထင်းၵွၼ်းဢီႉဢၼ်တီးဢႄး။ ယႃထရူးၵုတ်ႇထႅင်းဢိူၼ်းၼႆး” သွၼ်းꧣလ်ꧣႃးသိူၼ်းၼီ။26မိူဝ်းတီးၽရႄႇၼမ်ရၵ်ႇၵေႃၼႆရၢၵ်ႇရေႃႉ ၸီႇဢႄးၵွၼ်းဢီႉၼေးတိူၵ်ႇၵႅလ် ၼႆလႄလၼ်ထင်းတႃးတူဝ်းၵွၼ်းဢီႉၼေး။ မိူဝ်းတီး ၵွပ်ႇၵွၼ်းဢီႉၼေး ၼမ်ယိူတ်ႇလႆးꧣူၺ်းမိူဝ်ႇသိူၼ်းဢီႉယႅမ် ဢီႉတၢင်ႁိူင်းၵေႃၼႆတႃး “ဢိူၼ်းဝႃယႅမ်” တႃးသိူၼ်းၼီ။27ၵေးꧣႃး မိူဝ်းၸဝ်ၵမ်းတိၵွၼ်းဢီႉၼေး ၼႆတိုတ်ႇရွႆဢိူၼ်းၼေး ဢိူၼ်းၵေႃၼႆရွႆထရူးမိူဝ်ႇ။28မိူဝ်းၸဝ်တင်တပႄးၸဝ်ဝဵင်ၼႄႇတႃးၵၢင် ၸဝ်ၼႆၼႄႇၶေႃးမိူဝ်တႄႉၼေး တပႄးၵိူဝ်ႇၼႆတႃးၸဝ်ယေသုၼႆၢ “ၵွပ်ႇသိူၼ်းၼႄႉဢေႉၼမ်ၸၢင်လွမ်ပလႄးၽရႄႇၼမ်ရၵ်ႇဢၼ်ဢေး” ꧣႃးသိူၼ်းၼီ။29ၸဝ်ၵေႃၼႆတႃး ၵိူဝ်ႇၼႆၢ “လိူဝ်းတွၵ်ႉလွင်သူႉတွင်းၼီ ယႅလ်းၼမ်ၸၢင်လွမ်ပလႄးၽရႄႇၼမ်ရၵ်ႇမဵဝ်းတီး” တႃးသိူၼ်းၼီ။30ဝႆၢးတီး ၸဝ်တင်တပႄးၵိူဝ်ႇၵေႃၼႆလႄလၼ်ထင်းႁေး ၼႆꧣတ်းပူၼ်လၼ် ၼႄၵႃလိလႄး။ မိူဝ်းတီး ၸဝ်ၼမ်ဢႄးယႅလ်းမသ်ႇတီၵိူဝ်ႇၼႄႇၼေး။31ၼႄႇၵွပ်ႇၸဝ်လူဝ်ႁေႃးသွၼ်းလဝ်တပႄးဢိူၼ်း ဢႄးယႃမၢင်ဢီႉသုၵ်ႇသၵ်ႇၼႆး။ ၸဝ်ၼႆꧣႃးတပႄးဢိူၼ်းၵိူဝ်ႇၼႆၢ “ဢူဝ်ႉၵွၼ်ဝ်းဢီႉၸဝ်ၼေး ငႃးၺႃးဢီႉႁွၵ်းဢၢပ်းဢႄးတႃးရၢရ်သူဢူဝ်ႉ ဢၼ်ၶရင်ပိူလ်ၼေး။ ဢီႉၵိူၼ်ဢေး ၼႆငႃးပယႅမ်းဢူဝ်ႉ။ ၵေးတႃး ဝႆၢးဢူဝ်ႉၺႃးပယႅမ်းၿွၼ်းဝႆးသငိၼေး ၼႆငႃးရွႆဢိမ်းထရူးၼႅလ်မိူဝ်ႇ” တႃးသိူၼ်းၼီ။32တပႄးၸဝ်တင်ႁိူင်းၼမ်မသ်တီပွင်းဢၼ်ၸဝ်ꧣႃးၼေးၵေႃ ၵိူဝ်ႇၼမ်သရႆၢးမႆၢယ်းၸဝ်ၼႆၢတီပွင်းဢိူၼ်း။33ဝႆၢးတီး ၸဝ်တင်တပႄးၵိူဝ်ႇၵေႃၼႆထရူးဢႄးတႃး ဝႅယ်ၵပေရၼွင်။ မိူဝ်းၼႄႇမိူဝ်ႇတႃးၵၢင်သိူဝ်ႇၵၢင်ၼေး ၸဝ်ၼႆတႃးတပႄးၵိူဝ်ႇၼႆၢ “ပေႉၼႆတူရ်ထဵင်းထရူးတႄႉၵွပ်ႇႁလ်းသွပ်းရူင်တဵင်း” ꧣႃးသိူၼ်းၼီ။34ၵေးꧣႃးတပႄးၸဝ်ၵိူဝ်ႇၵေႃၼမ်တွပ်ႇၼႅလ်ႁလ်း။ ၵွပ်ႇၼႄႇၵိူဝ်ႇတိူရ်ထဵင်းတႄႉလွင်တႃး ၼႄႇယႅလ်းမျၢတ်ႇပိူလ်တွၵ်းဢီႉ။35မိူဝ်းတီးၸဝ်ၼႆၵတေး ၼႆရၢၵ်ႇတင်တပႄးၸဝ်သိူဝ်ႇၵွလ်းဢရ်းၼေး ၼႆတႃး “ယႅလ်းသေၼမ်ꧣႃး ဢီႉဢၼ်သုၼ်းပဵၼ်းဢီႉဢၼ်မျတ်ႇပိူလ်တွၵ်ႉဢီႉၼေး ငႃးၿၼ်းတိူၵ်ႇၵလႄးꧣႅလ်းၼႄႉတွၵ်ႉဢီႉ ၼႆၼႄႇၶႃႇဢီႉတၢင်ႁိူင်း” တႃးသိူၼ်းၼီ။36ဝႆၢးတီး ၸဝ်ၼႆရၢၵ်ႇလေႇၵွၼ်းဢီႉႁွၵ်ႉ ၸ်ႂဢိူၼ်းၸဵင်မိူဝ်ႇတိူၼ်ၶိၼ်းၵိူဝ်ႇ ၼႆပုမ်းဢိူၼ်း ၼႆတႃးတပႄးဢိူၼ်းၵိူဝ်ႇၼႆၢ37“ယႅလ်းသေၼမ်ꧣႃး ဢီႉဢၼ်ရပ်ႇၶၢမ်ၵွၼ်းဢီႉဢၼ်ၼီ ၵွပ်ႇမုသ်ၼၢမ်ဢူဝ်ႉ ဢိူၼ်းရပ်ႇၶၢမ်ဢူဝ်ႉ။ ယႅလ်းသေၼမ်ꧣႃး ပွၵ်ႇရပ်ႇၶၢမ်ႇဢူဝ်ႉၼေး ၼမ်ၸိူဝ်ဢိူၼ်းရပ်ႇၶၢမ်ဢူဝ်ႉ ၼႄႇဢိူၼ်းရပ်ႇၶၢမ်ၸဝ်ဢၼ်ပလွႆးထရူးဢူဝ်ႉၼေး” တႃးသိူၼ်းၼီ။38ယေႃးႁၢၼ်တႃးၸဝ်ၼႆၢ “ၸဝ်၊ ဢူဝ်ႉဢွလ်းထရူး ဢီႉႁွၵ်ႉဢၼ်လေႇၸ်ႂမုသ်ၼၢမ်ၸ ဝ်ၼႆလွမ်ပလႄးၽရႄႇၼမ်ရၵ်ႇၼေး။ ၵေးတႃး ၵွပ်ႇဢိူၼ်းၼမ်ၸိူဝ်ဢီႉတႃးၸုမ်းဢေႉ ဢေႉၼႆတႃးဢိူၼ်ၼႆၢ ဢႄးယႃၸီႇလွင်သိူၼ်းတီးၼႆး” တႃးသိူၼ်းၼီ။39ၸဝ်ယေသုၼႆတႃး “ယႃတႃးသိူၼ်းတီးၼႆးဢႄး။ ၵွပ်ႇပွၵ်ႇဢီႉႁွၵ်း ပိူင်ဢိမ်မုသ်ၼၢမ်ဢူဝ်ႉ ၼႆၸီႇဢမူႉလွင်ဢၢမ်းၼီ ဢိူၼ်းၼမ်ငႃးလႅၵ်လႆၢၵမ်းလဵဝ် ၼႆꧣႃးမွႆယ်ရမႃၼမ်ရၵ်ႇလွင်ဢူဝ်ႉ။40ဢီႉဢၼ်ၼမ်သၢၼ်ၶတ်းဢေႉဢၼ်ၼီ ၼႄႇဢီႉၸုမ်းၽႆၢဢေႉ။41ဢူဝ်ႉငႃးလဝ်ပေႉၼႆၢလွင်တႄ ပွၵ်ႇဢီႉႁွၵ်ႉ ထွၵ်ႇမုသ်ႇဢၼ်တႃးၼႄႇတပႄးၸဝ်ၶရဵတ်ႇ ၼႆဢႄးပေႉၼႆၢဢူမ်းသိူဝ်ႇၶလွၵ်ႉၼေး ဢိူၼ်းၼမ်ငႃးပွၼ်းသုမ်းသူးဢၵျူဝ်းဢၼ်ဢိူၼ်းငႃးၿွၼ်းၼေး” ꧣႃးသိူၼ်းၼီ။42ၸဝ်ၼႆသိုပ်းꧣႃးထႅင်း “ယႅလ်းသေၼမ်ꧣႃး ပွၵ်ႇၸီႇဢီႉႁွၵ်ႉ ဢၼ်ယုမ်ယမ်ဢူဝ်ႉသိူၼ်းၵွၼ်းဢီႉတီးၼေး ဢႄးၼမ်ယုမ်ယမ်လႆးဢူဝ်ႉၼီ ပွၵ်ႇဢိူၼ်းၺႃးလေႇသမူဝ်ႇႁွႆးတႃးၵူၵ်းဢိူၼ်းၼႆၺႃးပလွႆးသပ်းတႃးပၢင်လႆၢၼီ ငႃးၵဝႅၼ်ယႄႉတႃဢိူၼ်း။43ပွၵ်ႇတိပေႉသိူဝ်ႇပလၢၵ်ႉၸီႇဢႄးပေႉၸီႇတေႃးဢပႅတ် တတ်ႉၸွၵ်ႇတိပေႉ။ ပွၵ်ႇပေႉၼမ်မၢင်တိသိူဝ်ႇပလၢၵ်းလၼ်ၵုတ်ႇသႃသၼႃၽြႃးၸဝ်ၼေး ၵဝႅၼ်လိူဝ်းတွၵ်ႉပေႉမၢင်တိဢၢရ်းပလၢၵ်ႉပၼ်းလၼ်ၶၢမ်ငလ်ငရႆၢးဢၼ်ၼမ်ယႅတ်ႇတိူရ်ပွၵ်ႇၼေး။44တႃးငရႆၢ ရႆၢႉဢၼ်သွၢမ်းတူဝ်းၵေႃၼမ်မေႃးယႅမ်၊ ငလ်ဢၼ်ရူၵ်ႇၼေးၵေႃၼမ်ငႃးမေႃးယႅတ်ႇ။45ပွၵ်ႇၸွၢင်ပေႉသိူဝ်ႇပလၢၵ်းၸီႇဢႄးပေႉၸီႇတေႃးဢပႅတ်ႇၵေႃ တတ်းၸွၵ်ႇၸွင်ပေႉသိူဝ်ႇပလၢၵ်း။ ပွၵ်ႇပေႉမၢင်ၸွင်သိူဝ်ႇပလၢၵ်ႉၼႆလၼ်ၵုတ်သႃသၼႃၽြႃးၸဝ်ၼေး ၵဝႅၼ်လိူဝ်းတွၵ်းပေႉမၢင်ၸွင်ဢၢရ်းပလၢၵ်ႉလၼ်ၵလႄးငရႆၢးဢၼ်ငလ်ၼမ်မေႃးယႅတ်ႇၼေး။46တႃးငရႆၢ ရႆၢႉဢၼ်သွၢမ်းတူဝ်းၵေႃၼမ်မေႃးယႅမ်၊ ငလ်ဢၼ်ရူၵ်ႇၼေးၵေႃၼမ်ငႃးမေႃးယႅတ်ႇ။47ပွၵ်ႇငႆၢပေႉသိူဝ်ႇပလၢၵ်ႉၸီႇဢႄးပေႉၸီႇတေႃးဢပႅတ်ႇၵေႃ ၶလွၵ်းၸွၵ်ႇ ငႆၢပေႉသိူဝ်ႇပလၢၵ်ႉ။ ပေႉမၢင်ငႆၢသိူဝ်ႇပလၢၵ်းလၼ်ၵုတ်သႃသၼႃၽြႃးၸဝ်ၼေး ၵဝႅၼ်တွၵ်ႉပေႉမၢင်ငႆၢဢရ်းပလၢၵ်ႉၵလႄးငရႆၢးဢၼ်ငလ်ၼမ်မေႃးယႅတ်ႇၼေး။48တႃးငရႆၢ ရႆၢႉဢၼ်သွၢမ်းတူဝ်းၵေႃၼမ်မေႃးယႅမ်၊ ငလ်ဢၼ်ရူၵ်ႇၼေးၵေႃၼမ်ငႃးမေႃးယႅတ်ႇ။49ဢီႉၵိူဝ်ႇငႃးၺႃးၸႅတ်ႇၸၢင်တင်ငလ် ꧣူၺ်း ဢီႉၸႅတ်ႇၸၢင် တူဝ်းရီႉဢၼ်ငႃးပူၸေႃၼေး ၼႆၢသဝွၵ်ႉ။50သဝွၵ်ႉဢၼ်ၼီ ၼႄႇလွင်ရၵ်ႇ။ ၵေးတႃး ပွၵ်ႇဢိူၼ်းၼမ်မၢင်လႆးဢရသႃတၢပ်ႇ ၼမ်ၸၢင်ၸီႇသိူၼ်းၼႄႉဢႄးဢိူၼ်းတၢပ်ႇထရူးၼႅလ်။ တူဝ်းပေႉၵေႃ ဢႄးမၢင်ဢရသႃꧣူၺ်းသဝွၵ်ႉ ၼႆမူဝ်ႇတိူရ်တိူမ်ၽရွမ်တႄႉ” တႃးသိူၼ်းၼီ။
Empower Asia Bible Translation Movement