Mark2
1ဝႆၢးပူၼ်လၼ်သိငိတိူရ်ယႄႉၼေး ၸဝ်ယေသုၵေႃၼႆထရူးဢႄးၼႅလ် တႃးဝဵယ်ၵပေရၼွင်။ ဢီႉတင်ႁိူင်းတႃးဝႅယ်ဢေးၵေႃ ၼႆငရ်းလွင်ၸဝ်လွတ်ဝ်းထရူးၼႅလ်ၼေး။2ၵွပ်ႇသိူၼ်းတီး ဢီႉတၢင်ႁိူင်းၵေႃၼႆတိူမ်ၽရွမ်ထရူးတိူရ်ၸူႉ ထရူးတႃးၸဝ် ပေႃၼိူၵ်ႇလွတ်ဝ်းမိူဝ်ႇပၼွၵ်ႇပိူရ်လွၵ်ႇၵၢင်။ ၸဝ်ၵေႃၼႆႁေႃးသွၼ်းဢႄးမိူဝ်ႇဢီႉၵိူၼ်ဢေးၼႆၢ ၶၢဝ်မင်ၵလႃၽြႃးၸဝ်။3မိူဝ်းတီး ဢီႉၵပူၼ်းၼႆတၢင်းထရူးဢီႉႁွၵ်ႉဢၼ်တႆၢၽၢၵ်ႈၼေးႁရ်ၵူလ်တၼ်းသိူဝ်းတႃးၸဝ်။4ၵိူဝ်ႇရၢၵ်ႇထရူးမိူဝ်ႇဢီႉတႆၢၽၢၵ်ႇၼေးတႃးၸဝ်ၵေႃ ၵေးꧣႃး ၵွပ်ႇဢီႉႁိူင်းယႆၢ ၼမ်ၸၢင်လေႇၵုတ်ဢႄးတႃးၸဝ်။ ၵိူဝ်ႈၼႆလေႇရေႃဢႄးႁရ်ၵူလ်ၵၢင်ႁရ်ၵူလ်တီၸဝ်ၼႄႇၼေး ၼႆတိူၵ်ႇတုၵ်းတိူၼ်ဢိူပ်း ၼႆပလွႆးၸုရ်ဢႄးဢီႉတႆၢၽၢၵ်ႇၼေးတင်တၼ်းသိူဝ်း။5မိူဝ်းၸဝ်ဢွလ်းလွင် ယုမ်ယမ်ၵိူဝ်ႈၼေး ၸဝ်ၼႆလဝ်ဢီႉဢၼ်တႆၢၽၢၵ်ႈၼေးတႃး “မိၵ်သူၺ်၊ ဢပႅတ်ႇမီႇဝႃၺႃးပလွႆးၶႂၢင်းဢႄး” တႃးသိူၼ်တီး။6ၵေးတႃး သြႃမေႃးၵျၢမ်းရၵႃ ဢၼ်ၼႄႇႁေႃးၵိူဝ်ႇၼေးၼႆၸၵူးတႃးၽွမ်းၵိူဝ်ႇ7“ၵွပ်ႇသိူၼ်းၼႄႉဢိူၼ်းၸိင်းၼႆꧣႃးသေႃၵႃးသိူၼ်းတီး။ ဢိူၼ်းထၢင်တႄႉၼႄႇၽြႃးၸဝ်ႁႃး၊ ၽြႃးၸဝ်ႁႃးဢၼ်ၸၢင်ပလွႆးၶႂၢင်းဢႄးဢပႅတ်ႇ” တူမ်ၽရွမ်တႃးတၽွမ်းသိူၼ်းတီး။8မိူဝ်းတီး ၵွပ်ႇၸဝ်မသ်ၽွမ်းၵိူဝ်ႇၸၵူးꧣႃးသိူၼ်းၼႄႉ ၼႆလဝ်ၵိူဝ်ႇတႃး “ၵွပ်ႇသိူၼ်းၼႄႉပေႉၸၵူးတႃးသိူၼ်းတီး။9လဝ်ဢႄးဢီႉဢၼ်တႆၢၽၢၵ်ႈၼေး ‘ဝႃပလွႆးၶႂၢင်းဢႄးဢပႅတ်ႇမီႈ’ တင် ‘ရွႆလေႇတၼ်းသိူဝ်းမိ ၼဝရ်ဢႄး’ ပွၵ်ႇတႃးၼေး ဢၼ်ၼႄႉၵၿဵင်းယႄႉ။10ၵေးတႃး ဢူဝ်ႉငႃဢႄးပေႉမသ် လွင်ဢႃၼႃဢၼ်ပလွႆးၶႂၢင်းဢပႅတ်ႇ တႃးၵမ်ၽႃၼီ မၢင်တႃး ၵွၼ်ဝ်းဢီႉ ၼေး” တႃးသိူၼ်းၼီ ၼႆတႃးဢီႉဢၼ်တႆၢၽၢၵ်ႇၼေးၼႆၢ11“ဢူဝ်ႉငႃးလဝ်မီႈ ရွႆဢႄး။ လေႇတၼ်းသိူဝ်းမီႇၼေး ဝဵင်တၵၢင်ဢႄး” တႃးထႅင်းသိူၼ်းၼီ။12ဢီႉဢၼ်တႆၢၽၢၵ်ႇၼေးၵေႃ ရွႆလေႇတၼ်းသိူဝ်းဢိူၼ်းၼေး ရွႆဝဵင်လၢၼ် သိူၼ်ꧣလ်းဢီႉတၢင်ႁိူင်းၵမ်းလဵဝ်။ ဢီႉတၢင်ႁိူင်းဢၼ်ၿၼ်းဢွလ်းၵိူဝ်ႇၵေႃ တူမ်ၽရွမ်ဢၢမ်းမိူဝ်ႇ ၼႆꧣႃး “ဢေႉၼမ်ၿၼ်းဢွလ်းလွင်သိူၼ်းၼီတိူရ်ပွၵ်ႇ” တူမ်ၽရွမ်တႃးသိူၼ်တီး ၼႆယုၵ်ႉယွင်ႇမိူဝ်ႇတၼ်းၶူဝ်းၽြႃးၸဝ်ꧣႃး။13ဝႆၢးတီး မိူဝ်းၸဝ်ယေသုၼႆၸွလၼ်ၼႅယ် တႃးရိမ်ဢူမ်းၵႃလိလႄးၼေး ဢီႉတၢင်ႁိူင်းၼႆတိူမ်ၽရွမ်ထရူးဢႄးတႃးၸဝ် ၸဝ်ၵေႃၼႆႁေႃးသွၼ်းဢႄးၵိူဝ်ႇ။14တင်ထႅင်းမိူဝ်းၸဝ်ၵေႃၼႆၼဝရ်မိူဝ်ႇၼေး ၸဝ်ၼႆဢွလ်းလေဝိ ၵွၼ်ဝ်းဢႃလၽႄး ဢၼ်ၵꧣေးမိူဝ်ႇတႃးသုမ်းသိူတ်းၶွၼ်ၼေး ၸဝ်ၼႆတႃးဢိူၼ်းၼႆၢ “ထရူးသွပ်းတပွတ်ဝ်းဢူဝ်ႉဢႄး” တႃးသိူၼ်းၼီ ဢိူၼ်းၵေႃ ရွႆထင်းတီးၵတေး လၼ်သွပ်းၸဝ်။15ဝႆၢးတီး ၸဝ်ယေသုတင် တပႄးၸဝ်တင်ႁိူင်း ၼႆတိူမ်ၽရွမ်ၵတေးသွမ်းၵွမ်းမိူဝ်ႇၵႆၢးၿူရ်း တႃးၵၢင်လေဝိ။ ၵွပ်ႇဢီႉသိူတ်းၶွၼ်ၵိူဝ်ႇတင်ဢီႉဢၼ်ၺႃးဢီႉတႅပ်းတတ်းꧣႃးၵိူဝ်ႇၼႄႇ ဢီႉမၢင်ဢပႅတ်ႇၵိူဝ်ႇၼေး ပႃထရူးသွပ်းတႃးပွတ်ဝ်းၸဝ် ၼႆတိူမ်ၽရွမ်ၵꧣေးသွမ်းၵွမ်းမိူဝ်ႇၵိူဝ်ႇႁေး။16မိူဝ်းသြႃမေႃးၵျၢမ်းၼႂ်းၽႃရိသႄးၵိူဝ်ႇ ဢွလ်း ၸဝ်ၵတေးသွၢမ်းၵွမ်းမိူဝ်ႇတင်ဢီႉသိူတ်းၶွၼ်၊ တင်ဢီႉမၢင်ဢပႅတ်ႇၼေး ၵိူဝ်ႇၼႆတႃးတပႄးၸဝ်ၵိူဝ်ႇၼေးၼႆၢ ၼႆꧣႃး “ၵွပ်ႇသိူၼ်းၼႄႉ ဢိူၼ်းၼႆၵတေးသွမ်းၵွမ်း ဢီႉဢၼ်သိူတ်းၶွၼ်တင် ဢီႉဢၼ်မၢင်ဢပႅတ်းၵိူဝ်ႇၼေး” တႃးသိူၼ်းၼီ။17မိူဝ်းၸဝ်ငရ်းသိူၼ်းတီး ၸဝ်ၼႆတႃး “ဢီႉဢၼ်မူဝ်ႇရၵ်ႇၼေးၼမ်လူဝ် သြႃသိူၵ်ႇၼိူမ်။ ၼႄႈဢီႉဢၼ်ၼမ်မူဝ်ႇရၵ်ႇၼေးႁႃးဢၼ်လူဝ်။ ဢူဝ်ႉထရူးၼေးၵေႃ ၼမ်ၸိူဝ်တႃရၢၵ်ႇ ဢီႉဢၼ်ထၢင်တူဝ်းတႄႉၼႄႇဢီႉသိုဝ်ႇယူဝ်း၊ ၼႄႈတႃရၢၵ်ႇ ဢီႉမၢင်ဢပႅတ်ႇၵိူဝ်ႇၼေး” တႃးသိူၼ်းၼီ။18သိူဝ်ႈသငိၼေး တပႄးသြႃႇငိူပ်ႇဢူမ်းယေႃးႁၢၼ် တင်ထႅင်းၽႃရီႉသႄး ၼႆတူမ်ၽရွမ် ၵမ်းသိင်းၼမ်သွၢမ်းရူမ်သွၢမ်း။ မိူဝ်းတီး ဢီႉရၵႃၼႆထရူးတႃးၸဝ်ၼႆၢ “တပႄးသြႃငိူပ်ႇဢူမ်းယေႃးႁၢၼ်တင်တပႄးၽႃရိသႄးၵိူဝ်ႇတူမ်ၽရွမ်သူႉတွင် ၵမ်းသိၼ်းၼမ်သွမ်းရူမ်သွၢမ်းသေတႃႉ ၵွပ်ႇသိူၼ်းၼႄႉတပႄးၸဝ်ၵိူဝ်ႇ ၼမ်ၵမ်းသိၼ်းၵႅရ်းရိူမ်သွမ်း” မႆၢယ်းတႃးသိူၼ်းၼီး19ၸဝ်ၼႆလဝ်တႃး “မိၵ်ႇသူၺ်ၸဝ်မၢဝ်ႇၵိူဝ်ႇ မိူဝ်းၵိူဝ်ႇၼႄႇၵွမ်းၸဝ်မၢဝ်ႇၼေးငႃးၵႅရ်းမိူဝ်ႇရိူမ်သွမ်းႁႃး။20ၵေးတႃး ငႃးလွတ်ဝ်းထရူးသငိ ဢၼ်ရၢၼ်သူၸဝ်မၢဝ်ၵိူဝ်ႇ ရၢၵ်ႇလၼ်ၸဝ်မၢဝ်ၼေးထင်းမိၵ်ႇသူၺ်ဢိူၼ်းၵိူဝ်ႇ။ ၽတ်းသငိဢၼ်တီး ၵိူဝ်ႇငႃးတိူမ်ၽရွမ်ၵႅရ်းရိူမ်သွမ်း။21ယႅလ်းၼမ်လေႇၿၼ်းတိူၼ်မေႇ တိူၵ်ႇၿၢင်း ၿၼ်းဢၼ်ထရိမ်း။ ပွၵ်ႇတိူၵ်ႇၿင်းၵေႃ ၵွပ်ႇၿၼ်းဢၼ်တိူၼ်မေႇၼေးတိူရ်တိုတ်ႇ ၿၼ်းဢၼ်ထရိမ်းၼေးၵေႃငႃးယဵင်ၸျႄး။22ၼႄႇသိူၼ်းတီးႁႃး ယႅလ်းၼမ်လေႇဢူမ်းသပိတ်ဢၼ်တိူၼ်မေႇ သၢပ်ႉတႃးတိူရ်တွင်းဢၼ်ထရိမ်း။ ပွၵ်ႇသပ်းၵေႃ ၵွပ်ႇဢူမ်းသပိတ်ဢၼ်တိူၼ်မေႇၼေးငႃးတိူၵ်ႇပွင်းတိူရ်တွင်းထရိမ်းၼေး ဢူမ်းသပိတ်ၵေႃငႃးတူၵ်ၶူး တိူရ်တွင်းၵေႃငႃးလႆၢၵ်ႇလၢၼ်။ ၵွပ်ႇသိူၼ်းတီး ဢီႉၼႆသပ်း ဢူမ်းသပိတ်ႇဢၼ်တိူၼ်မေႇတႃးတိူရ်တွင်းဢၼ်တိူၼ်မေႇႁႃး” တႃႈသိူၼ်းၼီ။23မိူဝ်းသငိသိၼ်းသိူဝ်ႇသငိ ၸဝ်ယေသုတင်တပႄးၵိူဝ်ႇၼႆꧣတ်းပူလ်လၼ်မၢရ်ငူဝ်ႉ။ မိူဝ်းတီး တပႄးၸဝ်ၵိူဝ်ႇၼႆတွၵ်းပလႄႉငူဝ်ႉ။24မိူဝ်းတီး ၽႃရိသႄးၵိူဝ်ႇ ၼႆတႃးၸဝ်ယေသုၼႆၢ “တိူမ်ၽရွမ်သိူင်းဢႄ၊ ၵွပ်ႇသိူၼ်းၼႄႉ ၵိူဝ်ႇၼႆၸီႇဢၼ်ၼမ်ရၵ်ႇၸီႇမိူဝ်းသငိသိၼ်းၼေး” မႆၢယ်းတႃးသိူၼ်းၼီ။25ၸဝ်ၵေႃၼႆတႃး “ပေႉၼမ်ၿၼ်းႁေႃးႁူဝ်ႉၼ်ႂးလိၵ်ႇၵျၢမ်း မိူဝ်းၶုၼ်းႁေႃးၶမ်းတႃဝိတ်းတင် တပႄးဢိူၼ်းၵိူဝ်ႇၼေးၸူဝ်ႇၵႆၢးၼေး ၸီႇသိူၼ်းၼႄႉ။26မိူဝ်းပၢၼ်ပရေႃးႁဵတ်းဢပျႃတႃဢၼ်ပိူလ်တူၵ်ႇႁႆၢႉၼေး ၵွပ်ႇၶုၼ်းႁေႃးၶမ်းတႃဝိတ်ႉၸူဝ်ႇ ၼႆၵုတ်ဢႄးတႃးၵၢင်ၽြႃးၸဝ် ၼႆၵုတ်ႇလေႇသွၢမ်းရူမ်သွၢမ်း ဢၼ်ပုရေႃႁဵတ်းၵိူဝ်ႇႁႃးဢၼ်မၢင်ဢၶႂၢင်းသွၢမ်း ဢၼ်ၵၢပ်ႇၽြႃးၸဝ်ၼေးသေၼမ်ၵႃး ၼႆꧣမ်းတင်ဢီႉလၼ်သွပ်းတႃးပွတ်ဝ်းဢိူၼ်းၵိူဝ်ႇၼေး။27ၼႄႇၽြႃးၸဝ်ၼီ တႅပ်းတတ်းမူၵ်ႇသငိၵမ်းသိၼ်းတႃဢီႉၵိူဝ်ႇ။ ၼမ်ၸိူဝ်ၽၢၼ်ၸီႇဢီႉ တႃသငိသိၼ်း။28ၵွပ်ႇသိူၼ်းတီး ၵွၼ်ဝ်းဢီႉၸဝ်ၼီ ၼႄႇတင်ၵိူရ်မႃႇသငိသိၼ်း” တႃးသိူၼ်းၼီ။
Empower Asia Bible Translation Movement