Mark1
1တိူင်း ၶၢဝ်မင်ၵလႃၵွၼ်ဝ်းၽြႃးၸဝ် ၸဝ်ၶရဵတ်ႇယေသုၼေး ၼႄႈသိူၼ်တီး။2သိူၼ်းၼ်ႂးၵျၢမ်း ၸဝ်ႈပရေႃးၽႅတ်ႈ ႁေသႃယႃႉ ဢၼ်တႅမ်းမူၵ်ႇꧣႃး “သိူင်းဢႄး ဢူဝ်ႉငႃးပလွႆးထရူးသေတမၢၼ်ဢူဝ်ႉ ဢႆၢႉမီႇ။ ဢိူၼ်းငႃးမရႄဢႄးငွမ်ရိူင်ꧣဵင်းဢၼ်မီႇ ငႃးၿၼ်းလၼ်ၼေး။ 3ဢီႉႁွၵ်ႉၼႆရၢၵ်ႇမိူဝ်ႇၼႂ်းၽရီႇတီသငႆၢဢီႉၼေး။ ဢိူၼ်းၼႆရၢၵ်ႇꧣႃး ‘တိူမ်ၽရွမ်မရႄငွမ် ရိူၼ်ꧣဵင်းဢၼ်ၸဝ်ငႃးၸွထရူးၼေးဢႄး။ ၸီႇဢႄးရိူင်ꧣဵင်းၸဝ်ငႃးၸွထရူးၵသင်းဢႄး’” သိူၼ်းဢၼ်တႅမ်းမူၵ်ႇသိူၼ်းၼီၼေး4သြႃမင်ႇၵလႃႇငိူပ်ႈဢူမ်း ယေႃးႁၢၼ်ၵေႃၼႆပေႃထရူးတႃးၽရီႇတီသငႆၢဢီႉ ဢႄးဢီႉၼႆၢမင်ၵလႃငူပ်ႈဢူမ်း ၼႆၶႃႁေႃးလဝ် တႃဢႄးၿွၼ်းပလွႆးၶႂၢင်းဢႄးဢပႅတ်ႇၼီ ဢႄးတိူမ်ၽရွမ်ၼွင်တႃႉ။5မိူဝ်းတီး ဢီႉတင်ႁိူင်းၼ်ႂးဝႅယ်ၸေရုသလၢမ် တင်ဢီႉၵလိူင်းယုတတၢင်ႁႆၢႉၵိူဝ်ႇၵေႃႇ ၼႆထရူးရၢပ်ႈၶၢမ်ႇဢပႅတ်ႇတႄႉတႃးယေႃးႁၢၼ် ၼႆၶၢမ်လေႇမင်ၵလႃငိူပ်ႈဢူမ်းၼ်ႂး ရွင်ၸေႃတၢၼ်။6ယေႃးႁၢၼ်ၼီ ၼႆလေႇ ရိူပ်ႉၽႅၼ်ႇဢၼ်လေႇႁုၵ်ႉၵလႃဢုၵ်းၸီႇၼေး ၼႆတုၵ်ႉ တုၵ်ႉပေႃးဢၼ်လေႇႁုရ်းၸီႇ ၼႆသွမ်းႁႃး ဢူမ်းငၢမ်ၸိူရ်ငုရ်တင် ၵိူၼ်သၢရ်း။7ယေႃးႁၢၼ်ၼႆꧣႃး “ဢီႉဢၼ်မျၢတ်ႈလိူဝ်းတွၵ်းဢူဝ်ႉၼေး ငႃးလွတ်ဝ်းထရူးမိူဝ်ႇတပွတ်းဢူဝ်ႉ။ တႃဢႄးဢူဝ်ႉတိူၵ်ႇသီးၶေႃးဢႄးၼဝရ်းၸွင်ၶလႅပ်းဢိူၼ်းႁႃးၵေႃ ဢူဝ်ႉၼမ်တၢၼ်။8ဢူဝ်ႉလေႇဢူမ်းဢႄးပေႉၼႆၢ မင်ႇၵလႃငိူပ်ႈဢူမ်းသေတႃႉ ၸဝ်ဢၼ်ဢေးငႃးလေႇ တၢင်းဝူၼ်ႉပွင်ႇလႅင်း လႄႈဢႄးပေႉၼႆၢ မင်ၵလႃႇငူပ်ႇဢူမ်း” တႃးသိူၼ်းတီး။9မိူဝ်းသငိမိူဝ်းတီးၵိူဝ်ႇၼေး ၸဝ်ႈယေသုၼႆလွတ်ဝ်းထရူးထင်းဝႅယ် ၼႃၸရတ်ႉ၊ ၵလိူင်းၵႃလိလႄးၼေး ၼႆထရူးရၢပ်ႇၶၢမ်ႇ မင်ၵလႃငိူပ်ႈဢူမ်းတီႈ ယေႃးႁၢၼ်ဢၼ်ၼႄႇတႃးရွင်ၸေႃတၢၼ်ၼေး။10မိူင်းၸဝ်ယေသုလႄထင်းဢူမ်းၼေး ၸဝ်ၼႆဢွလ်း ပလဵင်းၵေႃၼႆ ဝွၢသ်လႄထရူးသေ တၢင်ၸၵူးပွင်းၸဝ်ၵေႃၼႆၸုရ်ထရူးတၵ်းတႃးတူဝ်းတႄႉ တင်ပုင်သိမ်းပလူၺ်း။11ၼႆငရ်းတင် ရိူသ်ထရူးထင်းပလဵင်း တႃး “မီႇၼႄႈ ၵွၼ်ဝ်းဢူဝ်ႉ ဢၼ်ဢူဝ်ႉယေႃ။ ဢူဝ်ႉၵေႃပဵင်းပေႃးၸ်ႂၼိူဝ်းတူဝ်းမီႈ တႄတႄဝႃဝႃ” တႃးလႄၼင်ၼႆ။12ဝႆၢးတီး တၢင်ၸၵူးပွင်းလႅင်း ၼႆပိူၼ်လၼ်ဢႄးၸဝ်ယေသုတႃးတီသငႆၢဢီႉ။13ၸဝ်ယေသုၵေႃၼႆ မူဝ်ႇမိူဝ်ႈႁေးတီသငႆၢဢီႉၼေးတႃ ပူၼ်းၵွလ်းသငိ ၼႆၶၢမ်ႇလေႇလွင်မႃၼၢတ်ႇၵဝ်း။ ႁေးမၢင်မိူဝ်ႇတူဝ်းၽရီႈရိူင်ၵေႃ ၶုၼ်းၽရႄႇ ၽြႃးၸဝ်ၵိူဝ်ႇၼႆ တူမ်ၽရွမ် ၵႅတ်ႇၶႄဢႄးၸဝ်ႈယေသု။14ဝႆၢး သြႃႇငူပ်ႇဢူမ်းယေႃးႁၢၼ်ၺႃးၺွပ်းတိူၵ်ႇၵလႄးထွင်ၼေး ၸဝ်ယေသုၵေႃၼႆလၼ်ဢႄးတႃးၵလိူင်းၵႃလိလႄးသေ ၼႆႁေႃးလဝ်လွင်ႈ ၶၢဝ်မင်ၵလႃရၵ်ႇၽြႃးၸဝ်ႈ။15ၸဝ်ၼႆႁေႃးတႃး “ဢၶိဝႃလွတ်ဝ်းထရူး။ ၵွပ်ႇသႃသၼႃၽြႃးၸဝ်ၵေႃ ဝႃငႃးပွၵ်ႇပေႃထရူး တူမ်ၽရွမ် ၼွင်တႃႉသေ ၼႆယုမ်ယမ်ၶၢဝ်မင်ၵလႃရၵ်ႇဢႄး” ႁေႃးတႃးသိူၼ်းတီး။16သိူဝ်သငိၼေး မိူဝ်းၸဝ်ယေသုၼဝွရ်မိူဝ်ႇတႃးပၢင်းဢူမ်းၼွင်ၵႃလိလႄး ၸဝ်ၼႆဢွလ်း တၢမ်ႇငႃ သိမူင်တင် တေႃႇဢိူၼ်းဢၼ်မုသ်တႃး ဢႅၼ်တရေၼေး တိူမ်ၽရွမ်တိူၵ်ႇၵလႄးမိူဝ်ႇၼႅင်သပ်းတႃးၼွင်းတႃလေႇၵႃႉ။17ၸဝ်ၵေႃၼႆꧣႃး ၵရ်ၼႆၢ “ထရူးဢႄး၊ တိူမ်ၽရွမ်ထရူးသွပ်းတပွတ်ဝ်းဢူဝ်ႉ။ တႃႉပရ်းလေႇၵႃႉၼီ ပရ်းထရူးသွပ်းတပွတ်ဝ်းဢူဝ်ႉဢႄး တိူရ်ၸူႉဢီႉ ၼႆၸီႇဢႄးဢီႉတႃဢႄးပဵၼ်းတပႄးဢူဝ်ႉ” တႃးသိူၼ်းၼီ။18ၵရ်ၵေႃ မူၵ်ႈၸွၵ်ႈၼႅင်သေ လၼ်သွပ်းတႃပွတ်ဝ်းၸဝ်ၵမ်းလဵဝ်။19မိူဝ်းၸဝ်ၼႆၼဝရ်လၼ်ထႅင်းၸူဝ်ၵႅပ်ႉသေ ၼႆဢွလ်း ဢၼ်ၼႄႈၵွၼ်ဝ်းသေပေတႄး ယႃၵူပ်ႈတင် တေႃႈဢိူၼ်း ယေႃးႁၢၼ်ၼေး တိူၵ်ႇၿၢင်းမိူဝ်ႇၼႅင်တႃးႁရ်ၵူလ်ႁိူဝ်း။20မိူဝ်းၸဝ် ၼႆရၢၵ်ႈၵရ်ထရူးၵမ်းလဵဝ်ၼေး ၵရ်ၵေႃပလွႆးမူၵ်ႈပႃးꧣႄႉသေပေတႄးၵွမ်းတင်ဢီႉၸီႇၵၢၼ်းၵိူဝ်ႇၼေးတႃးႁိူဝ်းသေ လၼ်သွပ်းၸဝ်။21ဝႆၢးတီး ၸဝ်တင်တပႄးဢူၼ်း ၼႆၸွလၼ်တီႈ ဝဵင်းၵပေရၼွင်။ မိူဝ်းသငိသိၼ်း ၼေး ၸဝ်ၼႆႁေႃးသွၼ်းဢႄးဢီႉတၢင်ႁိူင်း တႃးၸရွပ်ႇ ။22ၼမ်ၸိူဝ်ၸဝ်ႁေႃးသိူၼ်းသြႃမေႃးၵျၢမ်းၼေး ၵွပ်ႈၸဝ်ၼႆႁေႃးသွၼ်းသိူၼ်းဢီႉဢၼ်မင်ဢၶႂၢင်းဢႃၼႃႁွၵ်း ဢီႉတင်ႁိူင်းၵေႃၼႆတူမ်ၽရွမ် ယွင်ႇယေႃးဢၢမ်းမိူဝ်ႇလွင်ႁေႃးသွၼ်းၸဝ်ၵိူဝ်ႇၼေး။23မိူဝ်းတီး တႃးၸရွပ်ႇၼေး ၼႆမၢင်ဢီႉႁွၵ်ႉဢၼ်ၽရႄႇၼမ်ရၵ်ႇၵုတ်ႈ။24ဢီႉဢၼ်ဢေးၼႆꧣႃး “ၸဝ်ယေသု ဢီႉဝႅယ်ၼႃၸရၢတ်ႈ၊ ၸဝ်ႈလိူဝ်ႁလ်းတႃးဢေႉ။ ၸဝ်ထရူးတႃ ယႃဢေႉႁႃႉ။ ဢေႉမသ်မိူဝ်ႈ ၸဝ်ႈၼႄႈယႅလ်း။ ၸဝ်ၼႄႈဢီႉ ဢၼ်ထရူးထင်းၽြႃးၸဝ် ဢၼ်မျၢတ်ႈပိူလ်ၼေး” ရၢၵ်ႈတႃးသိူၼ်းၼီ။25ၸဝ်ယေသုၵေႃၼႆတႃး ၽရႄႈၼမ်ရၵ်ႈၼေးၼႆၢ “မူဝ်ႇၽရသ်ၽရသ်သေ လႄထင်းတူဝ်းဢီႉဢၼ်တီးဢႄး” သင်တႃးသိူၼ်းၼီ။26မိူဝ်းတီး ၽရႄႇၼမ်ရၵ်ႇၼေးၵေႃ ၸီႇဢႄးဢီႉၼေးတိူရ်ၸိူသ်ႉ ရၢၵ်ႇတင်ရိူင်ဢုသ်း ၼႆလႄလၼ်ထင်းဢီႉဢၼ်ဢေး။27ဢီႉတင်ႁိူင်းၵေႃတူမ်ၽရွမ် ဢၢမ်းယႆမိူဝ်ႇ ၼႆတိူရ်တႃးတႄႉၼႆၢ “လွင်တီး ၼႄႇလွင်သိူၼ်းၼႄႉ။ လႆၢးသွၼ်းဢၼ်ပႃတင်ဢႃၼႃဢၼ်တိူၼ်းမေႇꧣူဝ်ႉ။ ၽရႄႇၼမ်ရၵ်ႇၵေႃ ၿၼ်းတိူၵ်ႈငရ်းၶေႃသင်ဢူၼ်း” တႃးသိူၼ်ၼီ။28ၼႄႇသိူၼ်းတီး ရဢူၺ်းၸဝ်ယေသုၵေႃ လိုဝ်းလင်လၼ်တင်ဢိူင်ၵႃလိလႄးလႅတ်းယႆ။29ၵိူဝ်ႇၵေႃ ၼႆလႄလၼ်ထင်းၸရွပ်ႇၼေး လၼ်ဢႄးတႃးၵၢင် သိမူင်တင်ဢႅၼ်တရေ ၵမ်းလဵဝ် တင်ယႃၵူပ်ႈ၊ ယေႃးႁၢၼ်။30မိူဝ်းၵိူဝ်ႈလၼ်လွတ်ဝ်တႃးၵၢင်ၼေး ၵွပ်ႇမွမ်သိမူင် ၼမ်မူဝ်ႇရၵ်ႇယႅတ်းမိူဝ်ႇတႃးတီႈယႅတ်း ၵိူဝ်ႇၵေႃၼႆတၢင်လဝ်ၸဝ်လွင်ဢၼ်ဢေး။31ၵွပ်ႇသိူၼ်းတီး ၸဝ်ၵေႃၼႆလၼ်ဢႄးရိမ်ဢိူၼ်းၼႆၵမ်းတိဢိူၼ်း ၼႆလေႇရွႆဢႄးဢိူၼ်း ဢိူၼ်းၵေႃ မူဝ်ႇရၵ်ႇထရူးၵမ်းလဵဝ် ၼႆၵွၼ်းရပ်ႇမိူဝ်ႇၵိူဝ်ႇၼႆၢတင်ရိူမ်သွမ်း။32မိူဝ်းလွတ်ဝ်းထရူးတိူၵ်ႇၿူရ်းသငိဢၼ်တီး ဢီႉတင်ႁိူင်းၵေႃၼႆရၢၵ်ႈထရူးဢီႉၼမ်မူဝ်ႇရၵ်ႇတင်ဢီႉဢၼ်ၺႃးၽရႄႇၼမ်ရၵ်ႇၵုတ်ႇၼေးဢႄးတႃးၸဝ်ယေသု။33ဢီႉတၢင်ႁိူင်း ထင်းဝႅယ်ဢေးၵိူဝ်ႇၵေႃ တိူမ်ၽရွမ်ထရူးတိူရ်ၸူႉမိူဝ်ႇတႃးသိူၼ်ꧣလ်းပိူရ်လွၵ်ႇၵၢင်သိမူင်ၼေး။34ၸဝ်ၵေႃၼႆသိူၵ်ႇၼိူမ်ၿိုလ်းဢႄးရေႃးၵႃဢီႉၼမ်မူဝ်ရၵ်ႇၵိူဝ်ႇသေ ၼႆလွမ်ဝ်ပလႄးဢႄးတင်ၽရႄႇၼမ်ရၵ်ႇ။ ၵွပ်ႇၽရႄႈၼမ်ရၵ်ႈၵိူဝ်ႇၼေးမသ်ၸဝ်ၼႄႈယႅလ်း ၸဝ်ၵေႃၼမ်ဢႄးၽရႄႈၼမ်ရၵ်ႈၵိူဝ်ႈၼေးရမႃ။35မိူဝ်းတိူၵ်ႇၶလိူပ်းၸဝ်ၽရီႉမတ်ႇဢၢသ်းၼေး ၸဝ်ၼႆရွႆလႄထင်းၵၢင် လၼ်ဢႄးတႃးတီသငႆၢဢီႉသေ ၼႆသူႉတွင်းမိူဝ်ႇ။36ၵွပ်ႇသိမူင်တင်တဝေႃဢိူၼ်းၵိူဝ်ႇၼေးၼမ်ဢွလ်းၸဝ် ၵိူဝ်ႇၼႆ လႄၶႃးၶႃႉမိူဝ်ႇၸဝ်။37မိူဝ်းၵိူဝ်ႇဢွလ်းၸဝ်ၼႆလဝ်တႃး “ဢီႉတၢင်ႁိူင်းၶႃႉၸဝ်ဢေႃႈ” တႃးသိူၼ်ၼီ။38ၵေးꧣႃး ၸဝ်ၼႆလဝ်ၵိူဝ်ႈတႃး “ဢေႉငႃးၿၼ်းလၼ်ဢႄးတင်တႃးဝႅယ်ၽရူႉထႅတ်းထႅတ်းၵိူၼ်ၼီ။ ၵွပ်ႇဢူဝ်ႉထရူးၼီ ၼႄႇတင်တႃႁေႃးလဝ်တင်ဢီႉၵိူၼ်ဢေး” တႃးသိူၼ်းၼီ။39ဝႆၢးတီး ၸဝ်တင်တပႄးဢိူၼ်း ၼႆလၼ်တႃးၵလိူင်းၵႃလိလႄးပေႃၸိရ်း ၼႆၶႃးႁေႃးသွၼ်းလဝ်တႃးၸရွပ်ႇလွမ်ဝ်ပလႄးဢႄးတင်ၽရႄႇၼမ်ရၵ်ႈ။40ဝႆၢးတီး ဢီႉပဵၼ်းရေႃးၵႃတုတ်ႇႁွၵ်ႉၼႆထရူးဢႄးတႃးၸဝ်သေ ၵတေးထွၵ်ႇၵိင်းသင်း ၼႆတႃး “ပွၵ်ႇၸဝ်မၢင်ဢလူဝ် ၸဝ်ၸၢင်ၸီႇဢႄးမိူဝ်ႇဢႄးဢူဝ်ႉၸႅတ်ႇၸၢင်” ႁႅယ်းတႃးသိူၼ်းၼီ။41မိူဝ်းတီး ၵွပ်ႇၸဝ်ၼႆတိူရ်ယွင်ဢိူၼ်းလႄႈ ၸဝ်ၼႆလေႇပလႄးတိꧣႄႉ တၢင်းသပ်းႁရ်ၵူလ်ဢိူၼ်း ၼႆတႃး “ဢူဝ်ႉမၢင်ဢလူဝ်ဢိူဝ်ႈ၊ ဢႄးၸႅတ်ႇၸၢင်” တႃးသိူၼ်တီး။42မိူဝ်းတီးရေႃးၵႃဢိူၼ်းၵေႃၿိလ်းလၼ်ၵမ်းလဵဝ် ပဵၼ်းၼႅလ်ဢီႉရၵ်ႈ။43ဝႆၢးတီး ၸဝ်ၼႆလဝ်ဢိူၼ်းတႃး “ယႃလဝ်ယႅလ်းလွင်ႈဢၼ်ၼီၼႆးၼႃး။ ၽိူဝ်းဢၼ်တီး လၼ်ပလႄးလဝ်ပရေႃးႁဵတ်း ဢႄးၵိူဝ်ႇၸႅတ်ႇမီႇ။ တႃဢႄးပရေႃးႁဵတ်းၵိူဝ်ႇမသ်လွင်မီႇၼမ်မၢင်ရေႃးၵႃၼေး လၼ်ပူၸေႃၶရိူင်လူတႃးၽြႃးၸဝ် သိူၼ်းဢၼ်ၵျၢမ်းမေႃးသေ တႅမ်းလဝ်မိူၵ်ႈတႃဢီႉရေႃးၵႃတုတ်ႇၿိလ်းၼေး။ ပွၵ်ႇၼႄႇသိူၼ်းတီး ငႃးပဵၼ်းမီႇပလႄးလဝ်ဢီႉတၢင်ႁိူင်းၼႆၢသၵ်ႇသေ လွင်ရေႃးၵႃမီႇၿိလ်းၼေး” ၼႆသင်ရၵ်ႇရၵ်ႇဢိူၼ်းတႃးသိူၼ်းတီးသေၸ်ႂဢူၼ်းဝဵင်။45ၵေးတႃး ဢီႉဢၼ်ဢေးၵေႃၼႆလႄလၼ် ၵွပ်ႇဢိူၼ်းၼႆၶႃးလဝ်ဢီႉလွင်ဢၼ်ၸဝ်ယေသုသိူၵ်ႇၼိူမ်ဢႄးၼေးပေႃၸိရ်း ၸဝ်ၵေႃၼႆၼမ်ၸၢင်ၵုတ်ႇဢႄးတႃးဝႅယ်သိူၼ်ꧣၢလ်းဢီႉ ၼႆမူဝ်ႇမိူဝ်ႇပၼွၵ်ႇဝႅယ်တီသငႆၢဢီႉၼေး။ ၵေးတႃး ဢီႉထင်းၵဵယ်းတီၵိူဝ်ႇၵေႃ ၼႆလွတ်ဝ်းထရူးတႃးတီၸဝ်ၼႄႇၼေး။
Empower Asia Bible Translation Movement