Mark3
1မိူဝ်းတၢင်သငိသိၼ်းသိူဝ်သငိ မိူဝ်းၸဝ်ယေသုၵုတ်ႇထရူးဢႄးတႃးၸရွပ်ႇၼေး ႁေးၼႆမၢင်တင်ဢီႉႁွၵ်ႉဢၼ်တီႉသိူဝ်ပလၢၵ်ႉတႆၢၽၢၵ်ႇ။2ၽႃရိသႄးဢၼ်ၼႄႇရၢၼ်သူၸဝ်ယေသုၵိူဝ်ႇၵေႃ ၼႆၼႄႇမိူဝ်ႇႁေး။ ၼႆငွမ်သိူင်းထႅတ်းမိူဝ်ႇၸဝ် ႁႆၸဝ်ငႃးၸီႇဢႄးဢီႉဢၼ်ဢေးမိုလ်းၼမ်မိုလ်း မိူဝ်းသငိသိၼ်း တႃလေႇတၢင်းၽိတ်းၸဝ်ၼေး။3ၸဝ်ၵေႃၼႆတႃး ဢီႉဢၼ်တီႉယႅမ်သိူဝ်ႇပလၢၵ်ႉၼေးၼႆၢ “ၸဵင်သိူၼ်ꧣၢလ်းဢီႉတၢင်ႁိူင်းဢႄး” တႃးသိူၼ်းၼီ။4ၸဝ်ၼႆတႃးဢီႉတႃးၵိူၼ်တိၸရွပ်ႇၵိူဝ်ႇၼႆၢ “သငိသိၼ်းတေႃးတြႃးဢၼ်ၼီ ငႃးမၼ်းၸီႇလွင်ႇရၵ်ႇႁႃး လွင်ႇၼမ်ႇရၵ်ႇႁႃး။ ငႃးပၼ်းထႅမ်းဢသၢၵ်ႇႁႃး ၼမ်ၸိူဝ်ၵေႃ ပယႅမ်းဢႃသၢၵ်ႇႁႃး” မႆၢယ်းတႃးသိူၼ်းၼီ။ မိူဝ်းတီး ဢီႉတၢင်ႁိူင်းၵေႃ ၼႆၽရၢသ်မိူဝ်ႇ။5မိူဝ်းတီး ၸဝ်ၵေႃၼႆတေႃးသမိူဝ်ႇ ၼႆသိူင်းၶႃႉ တင်ၵလႄးၽွမ်းမိူဝ်ႇၵွပ်ႇလွင်ၵိင်းၵလၵ်းၵိူဝ်ႇ။ ဝႆၢးတီး ၸဝ်ၼႆတႃးဢီႉတိယႅမ်သိူဝ်ပလၢၵ်းၼေးၼႆၢ “ယွင်ႇတီႉမီႇဢႄး” ဝႆၢးꧣႃးသိူၼ်းတီး မိူဝ်းဢိူၼ်းၼႆယွင်တိတႄႉၼေး တီႉဢိူၼ်းၵေႃၼႆရၵ်ႇၼႅလ်မိူဝ်ႇ။6မိူဝ်းတီး ၽႃရိသႄးၵိူဝ်ႇၵေႃ ၼႆလႄလၼ်ၵမ်းလဵဝ် လၼ်တိူင်ပၢင်တင်ဢီႉၶုၼ်းႁေႃးၶမ်းႁေရူတ်း ၶႃႉလွၵ်းလႆၢးတႃပယမ်းၸဝ်ယေသု။7ဝႆၢးတီး မိူဝ်းၸဝ်ယေသုတင်တပႄးၸဝ်ၵိူဝ်ႇ ၼႆၸွလၼ်ဢႄးတႃးပၢင်းဢူမ်းၵႃလိလႄးၼေး ဢီႉတၢင်ႁိူင်းထင်းၼႄၵႃလိလႄးၵိူဝ်ႇၵေႃ ၼႆပႃထရူးသွပ်း။8ဢီႉဢၼ်ၸဝ်ၸီႇသိူၼ်းၼေႉၵေႃဢၼ်ငရ်းမသ် ဢီႉဝႅယ်ၸေရုသလၢမ်၊ မိူင်းဢေတုမႄး၊ ဢီႉဢၼ်ထရူးထင်းပၢင်းဢူမ်းၸေႃတၢၼ်သိူဝ်ပလၢပ်ႉ တင်ဢီႉဝႅယ်တုရု၊ တင် ဢီႉဢၼ်ၼႄႇသွပ်းဢိူင်ရိမ်ဝႅယ်သိတုမ်တင်ဢီႉဝႅယ်သိတုမ်ၵိူဝ်ႇၵေႃ ၼႆလွတ်ဝ်းထရူးတႃးၸဝ်။9ၵွပ်ႇဢီႉႁိူင်းယႆ တႃၼမ်တူရ်တုမ်းၺႃးၼေး ၸဝ်ၼႆၸ်ႂဢႄးတပႄးၸဝ်ၶႃႉဢႄးၵွၼ်းႁိူဝ်းသိူဝ်ႇလမ်းဢႄးတၼ်ဝႃတႃၸဝ်။10ၵွပ်ႇၸဝ်သိူၵ်ႇၼိူမ်ၿိလ်းဢႄးရေႃးၵႃဢီႉတင်ႁိူင်း ဢီႉမၢင်ရေႃးၵႃတင်ႁိူင်းၵေႃၼႆတိူမ်ၽရွမ်တိူရ်ၽဝရ်ႇထရူးဢႄးတႃးၸဝ် တႃထရူးၵမ်းထုၺ်ၸဝ်။11မိူဝ်းၽရႄႇၼမ်ရၵ်ႇဢၼ်ၵုတ်ႇဢီႉၵိူဝ်ႇၼေး ဢွလ်းၸဝ် ၵိူဝ်ႇၼႆၵꧣေးထွၵ်ၵိင်းသင်းသိူၼ်ꧣလ်းၸဝ် ၼႆရၢၵ်ႇရေႃႉတႃး “ၸဝ်ၼႄႇ ၵွၼ်ဝ်းၽြႃးၸဝ်” ရၢၵ်ႇတႃးသိူၼ်းတီး။12ၵေးတႃး ၸဝ်ၼႆဢႄးသတိၽရႄႇၼမ်ရၵ်ႇၵိူဝ်ႇ တႃၼမ်လဝ်လွင်ၸဝ်ၼႄႈယႅလ်းၼေး။13ဝႆၢးတီး ၸဝ်ယေသုၼႆၸွရေႃလၼ်ႁရ်ၵိူလ်ရင် မိူဝ်းၼႆရၢၵ်ႇတင်ဢီႉဢၼ်ၸဝ်သုၼ်းဢႄးပဵၼ်းတပႄးတႄႉၼေး တပႄးၸဝ်ၵိူဝ်ႇၵေႃ ၼႆတိူမ်ၽရွမ်ထရူးဢႄးတႃးၸဝ်။14ဝႆၢးတီး ၸဝ်ၼႆလိူၵ်ႇဢီႉသိူဝ်ႇၵွလ်းဢၢရ်း ဢႄးပဵၼ်းတပႄးၸဝ် ၼႆသင်လဝ်ၵိူဝ်ႇ ဢႄးၼႄႇတင်ၸဝ် တင် လွင်ဢၼ်ငႃးပလွႆးလၼ်ၵိူဝ်ႈတႃၶႃးႁေႃးလဝ် ၶၢဝ်မင်ၵလႃရၵ်ႉၼေး။15ၸဝ်ၼႆဢၢပ်းဢႄးတင်ၵိူဝ်ႇၼႆၢဢၶႂၢင်းဢႃၼႃ တႃလွမ်ပလႄးၽရႄႇၼမ်ရၵ်ႇၵိူဝ်ႇၼေး။16မုသ်တပႄးၸဝ်သိူဝ်ၵွလ်းဢရ်းၼေးၼႆတႃး သိမူင်ဢၼ်ၸဝ်သိူၵ်ႇမုသ်တႃး ပေတရု၊17တင်ၵွၼ်ဝ်းသေပေတႄး ယႃၵူပ်ႈဢၼ်ၸဝ်ရၢၵ်ႇမုသ်ꧣႃး ပေႃးရၵၢတ်ႇ တီပွင်းꧣႃးၵွၼ်ဝ်းတိူဝ်ၵိူရ်းတင် တေႃႇဢိူၼ်းယေႃးႁၢၼ်၊18ဢႅၼ်တရေ၊ ၽိလိပု၊ ပႃတေႃးလမႄး၊ မတႄး၊ တေႃးမ၊ ၵွၼ်ဝ်းဢႃလၽႄး ယႃၵူပ်ႈ၊ တတႄး၊ ဢီႉႁၵ်ႉၸိူဝ်ႉၸၢတ်ႈ သိမူင်19တင်ယုတသၵႃရူတ်ႉ ဢၼ်ငႃးႁၵ်ႉလင်ၼႅလ်ၸဝ်ယေသု။20ဝႆၢးတီး မိူဝ်းၸဝ်ယေသုတင်တပႄးၸဝ်ၼႆၵုတ်ႇတႃးၵၢင်သိူဝ်ၵၢင်ၼေး ၵွပ်ႇဢီႉပရိၵ်ႇသၢတ်ႇတၢင်ႁိူင်းၵေႃၼႆႁိူင်းထရူး ၵိူဝ်ႇၼီ ရိူမ်သွမ်းၵေႃပေႃၼမ်မၢင်ဢၶိင်သွၢမ်း။21မိူဝ်းပီၼွင်ၸဝ်ငရ်းလွင်ရိူၼ်ၸီႇဢၼ်ၸဝ်ၸီႇၼေး ၵိူဝ်ႇၼႆꧣႃး “ဢိူၼ်းဝႃရဝႅတ်ႉ” ꧣႃးသိူၼ်းၼီ ၵိူဝ်ႇၵေႃၼႆလႄထရူး တႃရၢၵ်ႇဝဵင်ၼႅလ်ၸဝ်။22မိူဝ်းတီး သြႃႇမေႃးၵျၢမ်းတၢင်ႁိူင်းထင်းဝႅယ်ၸေရုသလၢမ်ၵိူဝ်ႇၼေးၵေႃ တႃးၼႄႇ “ၶုၼ်းႁေႃးၶမ်းၽရႄႇၼမ်ရၵ်ႇၵိူဝ်ႇ ပေလႃႉသေပူႉလႃႉ ၵုတ်ႇၸဝ်ယေသု” တင် “ၸဝ်လေႇဢႃၼႃပေလႃႉၸေပုလႃႉ လွမ်ဝ်ပလႄးၽရႄႈၼမ်ရၵ်ႇၵိူဝ်ႇ” ꧣႃးသိူၼ်းၼီ။23ၵွပ်ႇသိူၼ်းတီး ၸဝ်ၵေႃၼႆရၢၵ်ႇလေႇၵိူဝ်ႇသေ လဝ်ၵိူဝ်ႇတင်ဢုပမႃတႃး “မႃၼၢတ်ႇၼီ ငႃးၸီႇသိူၼ်းၼႄႉလွမ်ဝ်ပလႄး မႃၼၢတ်ႇ။24ပွၵ်ႇဢီႉၼႄႇၵွမ်းသိူဝ်ၵလိူင်းၵိူဝ်ႇၼီ ၼမ်တိူမ်ၽရွမ် ၼႆတိူရ်လၢၼ်ၼႅလ်တႄႉ ၵလိူင်းဢေးၼမ်ငႃးပဵၼ်းၵလိူင်း။25ၼႄႇသိူၼ်းတီးႁႃး ၼႃၵၢင်သိူဝ်ႇၵၢင်ၼီ ပွၵ်ႇဢီႉႁွၵ်ႉတင်ႁွၵ်ႉတိူရ်လၢၼ်တိၵ်ႉတိၵ်ႉၵေႃ ၼႃၵၢင်ဢၼ်တီးငႃသျႄး။26မႃၼၢတ်ႇၵေႃၼႄႇသိူၼ်းတီးႁႃး ပွၵ်ႇတိူရ်လၢၼ်ၼႅလ်တႄႉတိူရ်သၢၼ်ၶတ်းၼႅလ်တႄႉၼီ ဢိူၼ်းငႃးပၼ်းꧣုတ်းလၼ်။27ၵၢင်ဢီႉႁွၵ်ႉဢၼ်ၶရင်ပိူလ်ၼီ ယႅလ်းၼမ်ၸင်ၵုတ်လေႇၵုတ်ယၢတ်ႇရီးရႃႉဢိူၼ်းၵၿဵင်းၵၿဵင်း။ ငႃးပၼ်းတုၵ်ႉမူၵ်ႇဢိူၼ်းၼႆၵွႆၸၢင်လေႇ ရီးရႃႉဢိူၼ်း။28ဢူဝ်ႉငႃးလဝ်ပေႉလွင်တႄ၊ ၽြႃးၸဝ်ငႃးပလွႆးၶႂၢင်းဢႄးႁႆၢႉမိူဝ်ႇ ဢပႅတ်ႇဢၼ်ဢီႉၵိူဝ်ႇၸီႇတင် ဢပႅတ်ႇဢၼ်ၸီႇတေႃးၽြႃးၸဝ်တၢင်ႁႆၢႉ။29ၵေးတႃး ဢီႉဢၼ် ၸီႇဢပႅတ်ႇတေႃးတၢင်းဝူၼ်ႉပွင်ႇလႅင်းၼီ ၼမ်ငႃးပွၼ်းလွင်ႇၽြႃးၸဝ်ပလွႆးၶႂၢင်း ၵိူဝ်ႇငႃးပၼ်းၶၢမ်ဢပႅတ်းထႃဝရဢိူဝ်ႈ” တႃးသိူၼ်းၼီ။30ၵွပ်ႇၼႄႇၵိူဝ်ႇတႃးၼႄႇ “ၽရႄႇၼမ်ရၵ်ႇၵုတ်ႇၸဝ်” ၸဝ်ၵေႃၼႆႁေႃးလဝ်သိူၼ်းတီး။31ဝႆၢးတီး မႃႇၸဝ်တင်တေႃႇၸဝ်ၵေႃထရူးလွတ်ဝ်းတႃးၸဝ် ငွမ်မိူဝ်ႈတႃးပိူဝ်ႇၼွၵ်ႇ ၼႆၸ်ႂလၼ်ဢီႉႁွၵ်ႉဢႄးလၼ်ရၢၵ်ႇၸဝ်။32ဢီႉဢၼ်ၵတေးရိမ်ၸဝ်ၼေး တႃးၸဝ်ၼႆၢ “မႃႇၸဝ်တင်ၵိူဝ်ႈတေႃႇၸဝ်ၶႃႉၸဝ် ၼႄႇငွမ်မိူဝ်ႈပိူဝ်ၼွၵ်ႇ” ꧣႃးသိူၼ်းၼီ။33ၸဝ်ၵေႃၼႆတႃး “မႃႇဢူဝ်ႉတင်တေႃႇဢူဝ်ႉဢၼ်တႃးၼေးၼႄႇယႅလ်း” မႆၢၺ်းတႃးသိူၼ်းၼီ။34ၸဝ်ၵေႃၼႆသိူင်း ဢီႉဢၼ်ၵꧣေးသိူရ်ဝိတ်ႇဢိူၼ်းၵိူဝ်ႇၼေး ၼႆတႃး “ဢီႉၵိူၼ်ၼီဢိူဝ် ၼႄႇမႃႇ တင်ၵိူဝ်တေႃႇၵိူဝ်မႆဢူဝ်ႉ။35ဢီႉဢၼ်ၸီႇသွပ်ႉဢလူဝ်ၽြႃးၸဝ်ဢၼ်ၼီဢိူဝ် ၼႄႇ မႃႇတင် ၵိူဝ်ႇတေႃႇ ၵိူဝ်မႆဢူဝ်ႉ” တႃးသိူၼ်ၼီ။
Empower Asia Bible Translation Movement