ন্যায়কর্তা5
1আত্রংকো দিন দবোরা আসা অবীনোঅমকো চেংওয়া বারাকহা ই লেহদী লেহয়ে:2প্রভুসেংজাকো প্রশংসা জো! ইস্রাইলি মাটাবিহা লুইসুকো তামসা নির্ণয় জোমি নিমগা, আপনিকো য়াংতাওয়াসোরাং ইস্রাইলিবিহা আপনিহিং সমর্পন জোপুওয়া নিমগা।3ও টেরবো জাইপুবাই! ও মাটাবাই! হিং আসা ধ্যান জো, কা প্রভুসেংজাকো সোতা লেহরোওয়া, কা ইস্রাইলকো প্রভুসেংজাকো সোতা লেহদীকো আওয়াজসো লেহরোওয়া।4প্রভুসেংজা! নাতিহা সেইর-য়্যাগ্যই ল্যাতেনুওয়া, হাত্রং এদোমকো লুংনিংসো বাইরে নোপাদাং, ই বাসিমতিহা ঢিঢিপুয়ে, ডিংবাসো ওয়্যাতি ওয়্যায়ে, আসা মুওয়াসো গিরি-গিরিপা ওয়্যাতি হোয়ে।5প্রভুসেংজাকো নাগাইতা, সিনৈকো প্রভুসেংজাকো নাগাইতা, প্রভুসেংজাকো নাগাইতা, ইস্রাইলকো সেংজাকো নাগাইতা লাগাবিহা চুসুংপুমসা ফিপুয়ে।6অনাতকো চেংওয়া শমগরকো দিনতাহা, য়ায়েলকো সময়তা, দেশকো মাটা ন্যাতা জিংমসা ব্যাপার জোওয়াবিকো পারাহা মাহ্যামগা, তাংসা তেইওয়াবিহা হুরানেওয়া ন্যাতা জিংমসা তেইচাংমগা।7ইস্রাইলকো শহরবিসো দিংঙাবিহা ক্যাপুওয়া নিমগা, ও দবোরা, নাতি মেদেয়োংনু চোইপা আকু শহরবিহা হাইরে মাতামগা। নাতিহা ইস্রাইলকো আয়ু জিংমসা লেয়ে।8হাত্রং ইস্রাইলিবি চুবে চোইসুংবিহিং জেং, আত্রংহা দেশতাহা লুইসুনেয়ো, ইস্রাইলকো চালিশ হাজার দিংঙাবিকো প্যাকোতাহা হাংসুহিংপা ঢাল আসা হাংসুহিংপা লেংজা নিমগা?9ইস্রাইলকো সেনাপতিবিকো তোইতা, য়াংতামসা সেওয়া জোমসা আপনিহিং অর্পন জোওয়া প্রজাকো তোইতা কুং তুংসিংতা গর্ব নিও। কুং প্রভুসেংজাহিং প্রশংসা জো!10নাবি হাংপাওয়া গাধাবিকো তোইতা বাইমসা দেপাওয়াবি আসা হাংতা জিংদো তেইমবাই, নাবিরে ইকো বিষয়তা জাং।11দিংঙাবিহা আউতা লেহসুদিংমি হাংতা মেমেবি তি ওয়্যাকো ওয়াংচাংমে। আউতা আবিহা প্রভুসেংজাকো জিয়োওয়া বিষয়কো লেহদি লেহসুদিংমি। ইস্রাইলিবিকো জিয়োওয়াকো বিষয়তা। আকো নোইতাহা প্রভুসেংজাকো দিংঙাবিহা শহরকো মাটা লাপুংতা হোয়ে।12দবোরা লো! লো, নাতি আপনিরাং লো, নামুসো লেদি লেহ। নাতি আপনিরাং লো, লেহদী লেহমসা তেই, অবীনোঅমকো চেংওয়া বারাক! লো, আপনিকো কৈদীবিহিং পুরামসা নাতিহা নাগাই গ্যই!13তাংসা দেংওয়াবিহা আপনি আপনিকো মাটাকোতা ওয়াংয়ে; প্রভুসেংজাকো প্রজাহা লুইসুকো সোতা তৈয়ারি জোমসা আকোতা ওয়াংয়ে।14আবিহা এফ্রাইমসোহা ওয়াংবোইতা চোইপা লেয়ে, বেন্জামিন জিরিকো নুনুই নুনুই লেয়ে। সেনাপতিবিহা মাকীরসো লেতা লেয়ে, জবুলুনসোহা টেরবো মাটাবি লেয়ে।15দবোরাহিংপাহা ইস্সাখারকো মাটাবি লেয়ে; আসা ইস্সাখার আসা বারাকরে লেয়ে, আসা আবিহা নুনুই নুনুই ওয়াংবোই চোইপা হোয়ে। আদো রুবেনকো জিরিহা ওয়েংচপুয়ে; আবিহা হাংতা চোইপা হোকোমে নির্ণয় জোকো মোচুতো।16আবিহা হাংপাসা লুকাবিকো নুনুই হুইকো সাতা য়ুংগা? গোইত্রবিকো লুকাকো পারাহিং মোউওয়া আওয়াজ হিংকো সোতাগা? ওই, রুবেন জিরিকো দিংঙাবিহা ওয়েংচপুয়ে, আবিহা হানিচেতা হোকোমে নির্ণয় জোকো মাচুতো।17গাদকো জিরিবিহা য়র্দন জোরাকো নুব্যা কাটুতা য়ুংয়ে আসা দানকো জিরিহা জাহাজবিকো আরিতা য়ুংয়ে, আশেরকো জিরিহা ঝাহাদিকো আরিতা য়ুংয়ে; আবিহা বানদারগাতা য়ুংসুয়ে।18জবুলুনকো আসা নপ্তালীকো দিংঙাবিহা লুইসুওয়াতা সাদি পিচাকোরে তৈয়ার নিও।19জাইপুবিহা লুইসুকো লেয়ে, কানান দেশকো জাইপুবিহা তানাককো মগিদ্দো জোরাকো তি নুইওয়া জায়গাতা লেমসা লুইসুয়ে। আদো লুটেওয়া জাতাংকো হাইরে সোংসাবিহা মাপুচাতো।20ডিংবাসো পুইমাবিহা ইতা উতা লুইসুয়ে, আবিহা সীসরাকো বিরুদ্ধতা লুইসুয়ে।21কিশোন জোরাকো চুরাসো আবিহিংয়া জপাপুয়ে, চুরা লোদিংওয়া কিশোন জোরাতা কা নাগাই গ্যইরোওয়া, সে নিওয়া সেইরাং নাগাই গ্যইরোওয়া!22আত্রংহা ও্যইংঙাবিহা টুক্রু-টুক্রুপা বাংপামসা লেয়ে, ন্যাতাতা টুক্রুং-টুক্রুংপা চুসুং-মাইসুংক্যইপা বাংপুমসা হোপুয়ে।23“মেরোজহিং শ্রাপে, প্রভুসেংজাকো পোইংহা জাংয়ে, আউতা য়ুংওয়া দিংঙাবিহিং শ্রাপে, হাংপাতানাহা আবিহা পরমপ্রভুহিংয়া এতেরে মায়ুজ্রুতো, প্রভুসেংজাহিংয়া সাডুংওয়াবিকো বিরুদ্ধতা সহায়তা মিচাতো।”24কেনী হেবেরকো মে য়ায়েলহা মেমেবিতাহা হাংসুরোমা আশিষিত জিংকো। তাম্বুতা য়ুংওয়া তাংসা মেমেবিতাহা হাংসুরোমা আশিষিত নিও।25সীসরাহা তি য়ায়ে, আদো আকুহা য়ুতি পিয়াংয়ে, আকুহা আকুহিংয়া জেজেংক্যইওয়া চোপোইতা য়ুতিকো তোর পিচায়ে।26আকুহা ইচো খুইতাহা পেইতেওয়া গুনা চুংয়ে, দোসরা খুইতা ইচো টাওয়া য়োয়ে; আকুহা সিসরাহিং টাওয়াসো টোপুয়ে আসা আকো পোরোহিংয়া চোচোনোনোপা ছুইপাপুয়ে; আকুহা গুনাহা আকো পোরোতা টামসা ইদ্যাসো টাওয়াহা উদ্যাসো নোপাপুয়ে।27আকো কোকোইতা আকুহা বাদাংচাপুয়ে, আকুহা আউতা ইপুয়ে, আকো কোকোইতা আকুহা বাদাংচাপুয়ে আসা আউতারাং বাদাংমসা য়ুংয়ে। হাংতা আকু বাদাংচাপু আউতারাং আকুহা ইপুয়ে আসা সিপুয়ে।28সীসরাকো আয়ুহা চোব্যইসো ন্যইদিংমি, আকুহা চোব্যইসো ন্যইদিংমি। “হাংপা সীসরাকো ও্যইংঙা গাড়ি লেকোহা গোইপুংগা?” আকুহা উইয়ে, “আকো ও্যইংঙাবিহা লেকোহা হাংপাসা এসেপাকোহা গোইপামগাসা?”29আকো হাংসুরোমা দুংজি নিওয়া মেমেবিকো প্যাকোসোহা ইচোহা জাংয়ে, আসা আকুহা আপনিহিং ই নুওয়াং ন্যাসা ন্যাসারাং জাংদিংমি নিমি।30“আবিহা কুইওয়াকো সোংসাবি মোদিংমদোওয়া আসা পোসুদিংমদোওয়া, তাংসা সিপাইবিকো সোতা ইচো কিতা নিহসো মেমে, সীসরাকো সোতা এনতাওয়া আংদুং, কুং নেটোংতা লাগাইকো সোতা বুটা বুটা নিকোইওয়া চুন্নি।”31ও পরমপ্রভু, এপা জোমসারাং নাকো তাংসা দুসমানবি নাশ জিংকো, আদো নাতিহিং জেজেংপা জোমবিহা সানি ত্যাবাপা চারাং-চারাংপা জিংকো!”
এপা জোমসা দেশতা লো নিহকাইনিং চোইপা তিমেপা জিংপুয়ে।
এপা জোমসা দেশতা লো নিহকাইনিং চোইপা তিমেপা জিংপুয়ে।
The Seed Company