ন্যায়কর্তা4
1এহুদকো সিপুওয়াকো নোইতা ইস্রাইলিবিহা প্রভুসেংজাকো নাগাইতা হানি মেংতাপা নিমমে ন্যাসারাং আকুরাং জোয়ে।2আকো সোতা প্রভুসেংজাহা আবিহিংয়া হাসোরতা শাসন জোকো কনানী জাইপু য়াবীনকো খুইতা পিইচাপুয়ে। আকু সেনাপতিহা সীসরা নিমগা, হাংসু হোরোশেত হগ্গিয়িমতা যুংমমে।3ইস্রাইলিবিহা সহায়তাকো সোতা প্রভুসেংজাহিং মোউয়ে, হাংপাতানাহা সীসরাকোহা চাকো নয়শো ও্যইংঙা গাড়ীবি নিমি, আসা আকুহা ইস্রাইলিবিহিংয়া লো ইকাইনিং চোইপা মেংতাপা জোমসা সতায়য়ে।4আত্রংহা লপ্পীদোদকো মে দবোরাহা ন্যায় জোওয়া দিংঙা নিমগা। আকুহা ইচো আগমবানী য়্যইওয়া মেমে নিমগা।5আকুহা এফ্রাইমকো য়্যাগ্যইকো দেশতা য়ুংওয়া রামা আসা বেথেলকো প্যাকোতা নিওয়া দবোরাকো খেজুরকো সিংতেংকো লিতা যুংচাংমগা, আসা ইস্রাইলিবিহা আকোতা ন্যায়কো সোতা ওয়াংচাংমগা।6আকুহা নাপতালিকো কাদেশসো অবীনোঅমকা চেংওয়া বারাকহিং মোউপায়ে, আসা আকুহিংয়া জাংয়ে, “পরমপ্রভু ইস্রাইলকো সেংজাকো আজ্ঞাহা ইরাংগা: ‘হোমসা নপ্তালি আসা জবুলুনকো দশ হাজার দিংঙাবিহিং জেংমসা আবিহিং নাতিহিংপারাং তবোর য়্যাগ্যইতা পারা।’7কা য়াবিনকো সেনাপতি সীসরাহিং কীশোন জোরাতা আকো ও্যইংঙা গাড়ীবি আসা আকো তাংসা সিপাইবিহিংপারাং পারামসা আবিহিংয়া নাকো খুইতা স্যইপুরোওয়া।”8বারাকহা জাংয়ে, “নাতিমি কাহিংপামি হ্যানাহা কা হ্যারোওয়া, আদো নাতিমি মাহ্যানাহা কারে মাহ্যারোওয়া।”9দবোরাহা জাংয়ে, “নিশ্চয়রাং কা নাতিহিংপা হ্যারোওয়া, আদো এপা জিংওয়া সাহসকো কামকো সোতাহা নাকোহা হাইরে মিং মোতোরোওয়া, হাংপাতানাহা প্রভুসেংজাহা সীসরাহিংয়া ইচো মেমেকো খুইতা স্যইপুরোওয়া।” আত্রংহা দবোরা লোয়ে, আসা আকুহিংপা কাদেশকো ন্যাতা জিংমসা হোপুয়ে।10বারাকহা নপ্তালিহিং আসা জবুলুনহিং কাদেশতা মোউয়ে, আসা দশ হাজার দিংঙাবিহিংপা চিত্তা আকুহা হোয়ে, দবোরারে আকুহিংপা হোপুয়ে।11আত্রংহা কাদেশকো কেনী সানন্নীমতা ইচো টেবো ফলাট আসা বজ্রাটকো সিংতেকো আবেইতা আপনিকো তাম্বু বানাইমসা কেনা-বংশকো হেবের য়ুংওয়া নিমগা। আকুহা দোসরা কেনীবিকোসো ওয়েংপুমি নিমগা। কেনিবিহা মোসাকো পামি হোবাবকো প্যাপ্যাম্যাম্যাবি নিমগা।12বারাক তবোর য়্যাগ্যইতা হোওয়া নুওয়াংহা সিসরাহা হিংয়ে।13আকুহা চাকো নয়শো ও্যইংঙা গাড়ীবি আসা তাংসা সেনাবিহিং মোউয়ে আসা আবিহিংয়া হোরোশেত হগ্গোয়িমসোহা কীশোন জোরাতা জমা জোয়ে।14আত্রংহা দবোরাহা বারাকহিংয়া জাংয়ে, “হ্যাতু, প্রভুসেংজাহা নাকো নাগাই নাগাই নিরোওয়া। হিনি আকুহা নাতিহিংয়া সীসরাকো তোইতা জিয়োপারোওয়া।” দশ হাজার দিংঙাবিহিং পুরামসা বারাকহা তবোর য়্যাগ্যইসো ওয়াংবোইতা ঊইয়ে।15আপনিকো সেনাহিংপা আকুহা আক্রমন জোয়ে। প্রভুসেংজাহা সীসরা আসা আকো সেনাহিং আসা ও্যইংগাড়ীবিহিংয়া হিংচ্যাইবিরিপা জোপুয়ে। সীসরাহা ও্যইংগা গাড়ীবিসো ঊইমসা ক্যাপুয়ে।16সীসরাকো সেনা আসা ও্যইংঙা গাড়ীহিংয়া দোসরা জ্যাকো য়ুংওয়া হোরোসত চোইপা বারাকহা ঘিইপুয়ে আসা তাংসা সেনাবিহিং স্যাপুয়ে। ইচোহিংনে ঙাজ্যইং মেয়েতো।17সীসরা ইচোদাং ক্যাপুমসা কেনী হেবেরকো মে য়ায়েলকো তাম্বুতা দেংকায়ে। হাসোরকো জাইপু য়াবীন আসা কেনীহা হাবেরকো প্যাপ্যাম্যাম্যাহিংপা নাগাইসোরাং ব্যারো নিমি।18য়ায়েলহা লেমসা সীসরহিংয়া দোসপায়ে আসা জাংয়ে, “প্রভু, কুং তাম্বুতা লেই। মাছুংগে।” আকুহা নাপোতা হোয়ে আসা য়ায়েলহা আকুহিংয়া ইচো ধুসা গুইপাপুয়ে।19আকুহা জাংয়ে, “কাহা তি স্কেংপুনতেনা কাহিং তি পেয়াং।” য়ুতিসো মেইপা নিওয়া ইচো বেকোংকো জিয়ো ওয়েমসা য়ায়েলহা আকুহিং পেয়াংয়ে আসা ন্যাসারাং আকুহিংয়া ধুসা গুইপায়ে।20সীসরহা য়ায়েলহিংয়া জাংয়ে, “তাম্বুকো লাপুংতা জা, ‘লেরাবি ইতা হাইক্রি নিংগা’ তামসা উইনাহা ‘ইতাহা হাইরে মাতো’ তামসা জাংপি।”21সীসরা সিওপারাং য়াপুমতেওয়া নিমি আসা ইংঙা পামসারাং জিংজুয়ে। আত্রংহা ইচো টাওয়া আসা তাম্বুকো গুনা পামসা য়ায়েলহা ওয়াংয়ে। আকুহা স্যাক্যাপা সীসরাকো আবেইতা হোয়ে আসা গুনাহা নাপ্রেংতা ইদ্যাসো বামসা উদ্যাসো মোংটোপারাং হোংপুক্যইপা টাপুয়ে। এপা জোমসারাং আকুহা সীসরাহিং স্যাপুয়ে।22সীসরাহিং মোপামসা বারাকহা আউতা দেয়োংয়ে। য়ায়েলহা আকুহিং দোসপায়ে আসা জাংয়ে, “ইতা লেই, নাকো মোওদিংওয়া দিংঙাহিংয়া কা তিংপাপিরোওয়া।” আকুহা য়ায়েলহিংপা তাম্বুতা হোয়ে আসা আউতা সীসরাহিংয়া গুনাসো হোংপামসা সিপুওয়া আসা লেপোইদিংওয়া তিংয়ে।23আকু দিন সেংজাহা কেনানী জাইপু য়াবীনকো তোইতা ইস্রাইলিবিহিং জিয়োপায়ে।24আকুহিং ম্যাস্যানু চোইপা কনানী জাইপু য়াবিনকো বিরোধতা ইস্রাইলিবিকো সেহা বেইপু বেইপুমসা হোপুয়ে।
The Seed Company