ন্যায়কর্তা10
1অবীমেলেক সিপুনুকো নোইতাহা পুওয়াকো চেংওয়া আসা দোদোকো চুওয়া তোলাহা ইস্রাইলিবিকো উদ্ধার জোপাকো লেয়ে। আকুহা ইস্সাখার জিরিকো নিমগা আসা এফ্রাইম য়্যাগ্যইকো দেশকো শামীর তাওয়া জায়গাতা য়ুংচাংমি।2আকুহা ইকাইসো লো সুংনিং চোইপা ইস্রাইলিবিকো মাটা জিংপুয়ে আসা আকুহা সিপুয়ে আসা শামীরতারাং লিপুয়ে।3তোলাকো নোইতাহা গিলাদসোহা য়াইর লেয়ে। আকুহা ইকাইশো লো নিহনিং চোইপা ইস্রাইলিবিহিং অগুয়াই জোয়ে।4আকোহা ইকাইসো ত্যাচো চেংওয়াবি নিমি আসা আবিহা ইকাইসো ত্যাপু গধাতা বাইচাংমি। গিলাদ দেশতাহা আবিকোহা ইকাইসো ত্যাচো শহরবি নিমি। আকু শহরবিহিংয়া হিনি চোইপা হব্বাত-য়াইর তামগা। ইকো অর্থহা য়াইরকো লোইবি তামসা জাংমগা।5য়াইরহা সিপুয়ে আসা কামোনতা লিপুয়ে।6ন্যাসারাং ইকোই ইস্রাইলিবিহা প্রভুসেংজাকো বিরুদ্ধতা পাপ জোয়ে। বাল-চোইসুংবি, অস্তোরেত চোইসুংবি আসা অরাম, সীদোন, মোআব, অম্মোন আসা পলিশ্তীবিকো চোইসুং-মাইসুবিহিং আবিহা আরাধনা জোয়ে। আবিহা প্রভুসেংজাহিংয়া পেইপুয়ে আসা আকুহিং আরাধনা জোকো ল্যাপুয়ে।7আকো সোতা প্রভুসেংজাহা ইস্রাইলিবিহিংপা সেদ্রাংপায়ে আসা পলিশ্তী আসা অম্মোনীবিহিংয়া আবিকো তোইতা জিয়োকো পিচায়ে।8আবিহা আঠারো বর্ষা চোইপা গিলাদতা য়র্দন জোরাকো নুব্যা কাটু এমোরিবিকো দেশতা য়ুংওয়া তাংসা ইস্রাইলিবিহিং সতায়য়ে আসা ক্যইচ্যাপায়ে।9অম্মোনিবিহা য়র্দন জোরা পেংপুমসা য়হুদা, বেন্জামিন আসা এফ্রাইম জিরিকো দিংঙাবিহিংপা লুইসুয়ে। ইস্রাইলহা টেবো কোইচ্যাওয়াতা পরেহে।10আত্রংহা ইস্রাইলিবিহা প্রভুসেংজাহিং মোউয়ে আসা জাংয়ে, “কাবিহা নাকো বিরোদ্ধতা পাপ জোমি নিও, হাংপাতানাহা কাবিহা আপনিকো সেংজাহিং ল্যাপুয়ে আসা বাল চোইসুংবিহিং হুইয়ে।”11প্রভুসেংজাহা আবিহিংয়া এপা জাংয়ে, “নাগাইকো দিনবিতাহা নাবিহিংয়া মিশ্রি, অম্মিনী, পলিশ্তী,12সীদোনী, অমালেকী আসা মিদ্দানীবিহা সতায়য়ে আসা নাবিহা কাহিং মোউয়ে। কাহা নাবিহিংয়া আবিকোসো মাবাচাইংগাসা?13আদোরে নাবিহা কাহিংয়া ল্যাপুয়ে আসা দোসরা চোইসুংবিহিং নোংয়ে। আকো সোতা কা ন্যাসা নাবিহিংয়া মাবাচাইরোওয়া।14হ্যামসা নাবিকো নোংওয়া চোইসুংবিকো নাগাইতা ঙামসা কাই। আবিরাং কোইচ্যাওয়াতা পরেনুওয়া নাবিহিং বাচাইকো।”15আদো ইস্রাইলকো দিংঙাবিহা প্রভুসেংজাহিংয়া জাংয়ে, “কাবিহা পাপ জোমি নিও। নাতিহিং হাই জোদাংবেপা জিং ওইপারাং জো, আদো হিনিহা হেপা জোমসা জিংদো কাবিহিং বাচাইপি।”16আত্রংহা আবিহা দোসরা চোইসুংবিহিংয়া ওয়েংপায়ে আসা প্রভুসেংজাহিং আরাধনা জোয়ে। আত্রংহা সেংজাকো তুংসিংতা ইস্রাইলিবিকো দুঃখকো তোইতাহা ন্যইমক্যইপা জিংপুয়ে।17আত্রংহা অম্মিনী সিপাইবিহা লুইসুকো তৈয়ার জিংয়ে আসা গিলাদতা তাম্বু বানাইসুয়ে। ইস্রাইলিবিহা ইচো জিংমসা লেয়ে আসা গিলাদকো মিস্পাতা তাম্বু বানাইসুয়ে।18আউতা ইস্রাইলি জিরিকো দিংঙাবি আসা আকু জায়গাকো অগুওয়াবিহা তাইবিলারাই উইসু-জাংসুয়ে, “অম্মিনীবিকো বিরুদ্ধতা হাংসু লুইসুওয়াতা য়াংবিহিং অগুওয়াই জোকোগা? এপাজিংওয়া অগুওয়াহা গিলাদকো তাংসা দিংঙাবিকো অগুওয়া জিংরোওয়া।”
The Seed Company