ন্যায়কর্তা11
1গিলাদি য়িপ্তাহা ইচো লুইসুকো ম্যারাইওয়া দিংঙা নিমি। ইচো নুংনাংরি কাটুকো গিলাতকো চেংওয়া নিমি।2আদো গিলাদি আপনিকো মেরে আকো কাটুকো উইসে চেংওয়াবি চেংপায়ে। আসা হাত্রং আবি টেবো জিংপু, আত্রংহা আবিহা য়িপ্তাহহিংয়া সাসো নোপাপুয়ে। আবিহা আকুহিং জাংয়ে, “কাবিকো আপাকো সাতাহা নাকোহা হাইরে অংশ মোতো। নাতিহা দোসরা মেকো চেংওয়াগা।”3য়িপ্তাহা আপনিকো ডুওয়া এবিসো ক্যাপুমসা হ্যাপুয়ে আসা তোব জায়গাতা হোমসা য়ুংয়ায়ে। আউতা আকুহা ইচো পারা সাডুং-কেডুংওয়া তৌজি দিংঙাবিহিং জমা জোয়ে আসা আবিহা আকুহিংপা কোইচাংমি।4আকো নোইতাহা অম্মোনীবিহা ইস্রাইলবিকো তোইতা আক্রমন জোয়ে।5এপা জিংনুওয়া গিলাদকো অগুওয়াবিহা য়িপ্তাহিংয়া তোব জায়গাসো লাপামসা পারাকো হোয়ে।6আবিহা আকুহিংয়া জাংয়ে, “লেমসা কাবিকো মাটা জিং আসা কাবিহা অম্মনীবিহিংপা লুইসুকো ছুকোদোওয়া।7আদো য়িপ্তাহা জাংয়ে, “নাবিহা কাহিংয়া এসেপাকো আচকাপা জোচাংমগা কি কাহিংয়া কুং আপাকো সা হুতেকো বাধ্য জিংপুয়ে। নে কোইচ্যানুওয়া হাংপা কুংতা ওয়াংনেংগা?”8আবিহা য়িপ্তাহিংয়া জাংয়ে, “কাবিহা নাকোতা ইকো সোতা ওয়াংনেমগা কি কাবিহা ইচ্ছা জোমগা, নাতিহা কাবিহিংপা ওয়োংকো আসা অম্মিনীবিহিংপা লুইসুকো সোতা তাংসা গিলাদীবিকো অগুওয়াই জোকো।”9য়িপ্তাহা জাংয়ে, “য়দি নাবিবেমি অম্মিনীবিহিংপা লুইসুকো কাহিং সাতা লাপুমসা পুরাদানাহা আসা প্রভুসেংজামি কাহিং জিয়োপাদানাহা কা নাবিকো মাটা জিংরোওয়া।”10আবিহা জাংয়ে, “কাবিহা রাজি নিও। প্রভুসেংজাহা কাবিকো সাক্ছি নিও।”11এপা জোমসা য়িপ্তাহা গিলাদী মাটাবিহিংপা লাকাপুয়ে আসা দিংঙাবিহা আকুহিংয়া আপনিকো মাটা আসা অগুওয়া বানাইয়ে। য়িপ্তাহা মিস্পাতা প্রভুসেংজাকো নাগাইতা নাগাইকো আপনিকো জাংওয়া নুওয়াংবিহা ন্যাসারাং টেংয়ে।12আত্রংহা য়িপ্তাহা অম্মোনকো জাইপুকোতা এপা জাংমসা পোইংবি নিংপুয়ে, “নাকোহা কাবিহিংপাহা হাং স্যাসুওয়া নিংগা?” হাংপা নাবিহা কুং জায়গাতা আক্রোমন জোমগা?”13অম্মোনকো জাইপুহা আকু পোইংবিহিংয়া জাংয়ে, “হাত্রং ইস্রাইলিবি মিশ্র দেশসো নোপামসা লে, আবিহা অর্নোন জোরাসোহা য়ব্বোক আসা য়র্দন জোরা চোইপাকো কাবিকো জায়গা কব্জা জোয়ে। ই লুংনিংহা নেহা কাবিহিংয়া তিমেপা কাবিহিং লাপিনেরোওয়া।”14য়িপ্তাহা এপা জাংমসা ন্যাসারাং আপনিকো পোইংবি অম্মোনকো জাইপুকোতা নিংপুয়ে,15“ইস্রাইলিবিহা মোআবী কিতা অম্মোনীবিকো জায়গা গিংচাপুয়ে তাওয়া নুওয়াংহা আজিপ্পা মোকো।16নুওয়াংহা এপা জিংপুমি নিমগা: হাত্রং ইস্রাইলিবি মিশ্র দেশ ল্যাপুই, আবিহা বার্পুইবিরি জিংমসা আলুইওয়া ঝাহাদীতা দেকায়ে আসা আউসোহা কাদেশতা লেয়ে।17আত্রংহা আবিহা এদোমকো জাইপুকোতা পোইংবি নিংপুমসা আকো জায়গাসো জিংমসা হ্যাকো তামসা ন্যাতা য়ায়ে। আদো এদোমকো জাইপুহা ন্যাতা মিচাতো। আবিহা মোআবকো জাইপুকোতারে ন্যাতা য়ায়ে, আদো আকুরে আপনিকো জায়গাসো জিংমসা হ্যাকো ন্যাতাহা মিচাতো। আকো সোতা ইস্রাইলিবিহা কাদেশতারাং য়ুংপুয়ে।18আত্রংহা আবিহা বার্পুইবিরিকো প্যাকোসো জিংমসা হ্যাপুয়ে আসা এদোম আসা মোআবকো জায়গাবি হুরাপামসা মোআবকো নুব্যা কাটু অর্নোন জোরা নুব্যা দেরেহে। আউতা আবিহা তাম্বু বানাইমসা য়ুংয়ে, আদো আবিহা অর্নোন জোরা পেংমসা মাহ্যাতো, হাংপাতানাহা আকুহা মোআব জায়গাকো লুংবি নিমি।19আকো নোইতা ইস্রাইলিবিহা হেশবোনতা এমোরী জাইপু সীহোনকোতা পোইংবি নিংপুমসা আকো দেশসো জিংমসা আপনিকো জায়গাতা হ্যাকো অনুমতি য়ায়ে।20আদো সীহোনহা ইস্রাইলিবিহিংয়া ন্যাতা মিচাতো। আকুহা আপনিকো তাংসা সিপাইবিহিং জমা জোয়ে, য়হসা জায়গাতা তাম্বু বানাইয়ে আসা ইস্রাইলিবিকো তোইতা আক্রমন জোয়ে।21আদো পরমপ্রভু ইস্রাইলকো সেংজাহা ইস্রাইলিবিহিং সীহোন আসা আকো সিপাইবিকো তোইতা জিয়োপায়ে। এপা জোমসারাং ইস্রাইলিবিহা আউতা য়ুংওয়া এমোরিবিকো তাংসা জায়গাতা অধিকার জোয়ে।22মাব্যাকো অর্নোন জোরাসোহা দাংব্যাকো য়ব্বোক জোরা চোইপা আসা নুব্যাকো বার্পুইবিরিসোহা দিব্যাকো য়র্দন জোরা চোইপা, এমোরীবিকো জায়গাহা আবিহা আপনিকো বানাইচাপুয়ে।23এপা জোমসা পরমপ্রভু ইস্রাইলকো সেংজাহা আপনিকো প্রজা ইস্রাইলিবিকো সোতা এমোরীবিহিংয়া ঘিপুমগা। নেহা ই লাচাকোহা নাকোতাহা হাং অধিকার নিংগা?24নাতিহা আকু জায়গাহা লাপিকো কোশিষ জোকোগা? নাকো চোইসুং কোমোশহা হাই হাসে পিচা, আকুহা নাতিহা এচাকো ছুরোওয়া। আদো পরমপ্রভু য়োংকো সেংজাহা য়াংবিকো সোতা হাই পিচামিনি, কাবিহা এচারোওয়া।25নাতিহা আপনিহিংয়া সিপ্পোরকো চেংওয়া আসা মোআবকো জাইপু বালাকরোমা টেবো নোমগা? বালাকহা ইস্রাইলিবিহিংপা লুইসুওয়া কাম জোংগা? আকুহা কাবিকো বিরোদ্ধতা হাত্রং লুইসুংগা?26লো সুংনিংসো হেসবোন আসা অরোয়েরা আসা আকো হুরাপা নিওয়া শহরবি আসা অর্নোন জোরাকো আরিকো তাংসা শহরবি ইস্রাইলিবিকো অধীনতা নিও। নেচোইপা নাবিহা হাংপাসা আকু শহরবি মালাচাংমগাসা?27অহঁ কাহা নাবিহিংয়া হাইরে মেংতাপা মোজোয়াংতো। নাতিগা কাবিকো তোইতা আক্রমন জোমসা অন্যায় জোনা। প্রভুসেংজাহা ন্যায়কর্তাগা। আকুহা হিনিহা ইস্রাইলি আসা অম্মোনীবিকো প্যাকোতা আপনিকো ফৈসলা জোরোওয়া।”28আদো অম্মোনকো জাইপুহা য়িপ্তাহকো ই নুওয়াংতা হাইরে ধ্যান মোজোতো।29আত্রংহা প্রভুসেংজাকো লাংবেহা য়িপ্তাহকো তোইতা উইয়ে। আকুহা গিলাদ আসা মনশ্শেসো জিংমসা মিশ্পাতা লায়োংয়ে আসা অম্মোন চোইপা হোয়ে।30য়িপ্তাহা প্রভুসেংজাহিংয়া এপা জাংমসা প্রতিজ্ঞা জোয়ে, “য়দি নাবিবেমি কাহিং অম্মোনিবিকো তোইতা জিয়োপানাহা31কা জিয়োমসা সাতা লাকাদাংনুওয়া কুং সাসো কাহিং দোসপাকো হাংসুরোমা নাগাই ওয়াংওয়া দিংঙাহিং কা হোমবলি চড়াইরোওয়া। কা আকু দিংঙাহিংয়া নাকো সোতা বলি চড়াইরোওয়া।”32আত্রংহা য়িপ্তাহা অম্মোনীবিহিংপা লুইসুকো জোরা পেংয়ে আসা পরমপ্রভুহা আকুহিংয়া জিয়োপায়ে।33অরোয়েরসো লাংমসা মিন্নীতকো হুরাপা নিওয়া ইকাইচো শহরবিতা আসা হাবিল-করমীম চোইপা য়িপ্তাহা আবিকো তোইতা আক্রমন জোয়ে। উইসে দিংঙাবিহা পোঙায়ে আসা অম্মোনীবিহা ইস্রাইলিবিহিংপা পোঙায়ে।34হাত্রং য়িপ্তা মিস্পাতা আপনিকো সাতা লে, আকো চেমেহা খেজড়ী বেমসা য়ৌপামসা আকুহিং দোসপাকো লেহে। আকুহা আকো ইচো চিংওয়া সন্তান নিমি।35য়িপ্তাহা হাত্রং আপনিকো চেংমেহিং তিং, অফসোস জোমসা আপনিকো আংদুং ছিমসা জাংয়ে, “ও, কুং চেমে! নাতিহা কুং তুংসিং খিন্ন জোপুয়ে। নাতিহা হাংপাসা কাহিংয়া কোইচ্যাপানেকোগা? কাহা প্রভুসেংজাহিংপা ইচো প্রতিজ্ঞা জোমি নিনা কা আকুহিংয়া ল্যামক্যই!”36আকুহা আকুহিংয়া জাংয়ে, “নাতিবেমি প্রভুসেংজাহিং প্রতিজ্ঞা জোমি নিনাহা নাকো জাংমি ত্যাবাপা কাহিংপা জোপুই, হাংপাতানাহা প্রভুসেংজাহা নাতিহিং আপনিকো দুসমন অম্মীবিহিংপা বদলা লাংকো পিচামি নিও।37আদো আপা, কুং তোইতা ইচো কৃপা জোপি। কাহিং তারি নিহরি চোইপা ল্যাপি আসা কা আপনিকো ব্যারোবিহিংপা য়্যাগ্যইতা হোচা মুংকো আসা কা নামেপারাং সিনেদাংওয়াকো সোতা শোক জোচা মুংকো।”38আকুহা আকুহিংয়া তারি নিহরিকো সোতা বিদা জোপুয়ে। আকুহা আপনিকো ব্যারোবিহিংপা য়্যাগ্যইতা হোমসা বেয়ৌ মাজিংপা সিনেদাংওয়াতা শোক জোয়ে।39তারি নিহরিকো নোইতা আকুহা আপাকোতা লায়োংমসা লেহে। য়িপ্তাহা পরমপ্রভুহিংপা জোওয়া প্রতিজ্ঞাহা পুরা জোয়ে আসা আকো চেমেহা নামেদাংনুরাং সিপুয়ে।40ইসোরাং ইস্রাইলকো নামেরি চেমেবিহা লোপো-লেরে সাদিয়ুং চোইপা গিলাদী য়িপ্তাকো চেমেকো সোতা প্যারাপামসা য়্যাগ্যইতা হোমসা শোক জোওয়া লিংপাং ইস্রাইলতা শুরু জিংপুয়ে।
The Seed Company