ন্যায়কর্তা9
1গিদোনকো চেংওয়া অবীমেলেকহা আপনিকো আজাংবিকো শহর শকেমতা হ্যায়ে, আসা আপনিকো আজাংবিকো তাংসা সাকো দিংঙাহিংয়া জাংয়ে,2“নাবিহা হাং য়াদিংগা? গিদোনকো সুংকাইসো ত্যাচো চেংওয়াবিহা নাবিকো তোইতা রাজ জোওয়া এনতাকোগা না ইচোদাং জোওয়া এনতাকোগা? নাবিহা ই গেকো, কাহা নাবিকোরাং লুইতো আসা বিয়াগা।”3আকো আজাংকো প্যাপ্যাম্যাম্যাবিহা শোকেমতা য়ুংওয়া দিংঙাবিহিংপা ইকো বিষয়তাহা য়্যইসু-জাংসুয়ে। আবিহা অবীমেলেককো কাটুতা হোসুকো কেংয়ে, হাংপাতানাহা আকুহা আপনিকো দিংঙা নিমি।4বাল-বরীতকো দেমসাসো সুংকাইসো ত্যাচো জাতাংকো টাংকা পামসা আবিহা আকুহিং পিচায়ে। আকু টাংকাসোহা অবিমেলেকহা ইচো পারা সাডুং-কেডুংওয়া তৌজি দিংঙাবিহিং জমা জোয়ে।5আকুহা অৌপ্রাতা আপনিকো আপাকো সাতা হোয়ে আসা আউতা আকুহা ইচো লুংটুইকো তোইতারাং আপনিকো সুংকাইসো ত্যাচো ডুওয়া এবি অর্থাৎ গিদোনকো চেংওয়াবিহিং স্যাপুয়ে। আদো ইচো এ গিদোনকো চিংসোইওয়া চেংওয়া য়োতামহা গুংমসা য়ুংয়ে আসা আকুহা মাশিতো।6শোকেম আসা বেথ-মিল্লোকো তাংসা দিংঙাবিহা জমা জিংমসা শোকেমতা পবিত্র ফলাটকো সিংতেংকো আবেইতা হোয়ে। আবিহা আউতা অবীমেলেকহিং আপনিকো জাইপু বানাইয়ে।7হাত্রং ই নুওয়াং য়োতামকো নানুংতা হিং, আকুহা গীরীজ্জীম য়্যাগ্যইকো দোইংদিতা জায়ে আসা ঙামসা জাংয়ে, “ও শোকেমকো দিংঙাবাই! কুং নুওয়াং হিং, কি সেংজারে নাবিকো জাংওয়া নুওয়াং হিংকো।”8ইকোই সিংতেংবিহা আপনিকো সোতা ইচো জাইপু জেংকো তামসা নোয়ে। আবিহা জেইতুনকো সিংতেংহিং জাংয়ে, ‘নাতিহা কাবিকো জাইপু জিংপি।’9জেইতুনকো সিংতেংহা জাংয়ে, “নাকো জাইপু জিংকো কাহা আপনিকো চুইতি নোপাকোহা বন্দ জোনেরোওয়া। কুং চুইতিহা দিংঙাবিহিং আসা চোইসুংবিহিং আদর জোকো চালাইমগা।’10আত্রং আবিহা মুইরাসেকো সিংতেংহিং জাংয়ে, ‘নাতিহা ওয়াং আসা কাবিকো জাইপু জিংপি।’11আদো মুইরাসেকো সিংতেংহা জাংয়ে, ‘নাকো জাইপু জিংকোহা কাহা আপনিকো তাতাওয়া ফল সেকোহা বন্দ জোনেরোওয়া।’12আত্রং সিংতেংবিহা আংগুরকো সিংতেংহিংয়া জাংয়ে, ‘নাতি লেমসা কাবিকো জাইপু জিংপি।’13আদো আংগুরকো সিংতেংহা জাংয়ে, ‘নাবিকো তোইতা রাজ জোনুওয়া কাহা আপনিকো আংগুর সেপাওয়া কামহা বন্দ জোনেরোওয়া। য়ুসোহা দিংঙা আসা চোইসুংবিহা য়াংতামগা।’14আকো সোতা তাংসা সিংতেংবিহা সোসাকো সিংতেংবিহিং জাংয়ে, ‘নাতি ওয়াংমসা কাবিকো জাইপু জিংপি।’15সোসাকো সিংটেংহা জাংয়ে, ‘নাবিবেমি কাহিং আজিপ্পারাং জাইপু বানাইকো কেংদানাহা কুং নাবুংকো লিতা য়ুং, মেনাহা কুং গেইবেবিসো মেহ নোমসা লেবানানকো চোইসুংবিহা ওংপুমসা দাংপুকো।”16আত্রংহা য়োতামহা জাংয়ে, ‘হাত্রং নাবি অবীমেলেকহিং জাইপু বানাই, নাবিহা আজিপ্পারাং আসা অসল কাম জোংগাসা? গিদোনহিং প্যারাপাকো আসা আকো প্যাপ্যাম্যাম্যাহিং হেপা ইজ্জত জোকো নিমমে, ওইপারাং জোংগাসা?17প্যারাপাকো জো, কুং আপাহা নাবিকো সোতা লুইসুমগা। আকুহা নাবিহিংয়া মিদ্দানীবিকোসো বাচাইকো আপনিকো সাদিহিংয়া চুসুং-মাইসুংক্যইওয়া ওয়্যাইওয়া নিমগা।18আদো হিনিহা নাবিহা কুং আপাকো প্যাপ্যাম্যাম্যাকো বিরুদ্ধতা জামি নিও। নাবিহা আকো সুংকাইসো ত্যাচো চেংওয়াবিহিংয়া ইচো লুইংটুইকো তোইতা স্যায়ে, হাংপাতানাহা আকো ডেইয়ামুকো কাটুকো চেংওয়া অবীমেলেকহা নাবিকো আপনি দিংঙা পরেওয়াকো সোতা, আকুহিংয়া নাবিহা শকেমতা জাইপু বানাইয়ে।19আত্রংহা নাবিহা গিদোন আসা আকো প্যাপ্যাম্যাম্যাবিহিংপা জোওয়া ব্যবহারহা আজিপ্পা আসা ইমানদার নিনাহা নাবিহা অবীমেলেকহিংপা য়াংতামসা য়ুং আসা আকুরে নাবিহিংপা য়াংতামসা য়ুংকো।20মোকোনাহা অবীমেলেকসোহা মেহ নোপুকো আসা শকেম আসা বেথ-মিল্লোকো দিংঙাবিহিং মেহ ওংপাপুকো, আসা শকেম বেথ-মিল্লোকো দিংঙাবিকোসোহা মেহ নোপুকো আসা অবীমেলেকহিংয়া ওংপাপুকো।”21আত্রংহা য়োতামহা ক্যাপুয়ে, হাংপাতানাহা আকুহা আপনিকো ডুওয়া অবীমেলেকহিংপা চুসুংচাংমি আসা আকুহা বেয়োর তাওয়া জায়গাতা হ্যামসা য়ুংয়াপুয়ে।22অবীমেলেকহা ইস্রাইলিবিকো তোইতা লো সুংনিং চোইপা রাজ জোয়ে।23আত্রংহা সেংজাহা অবীমেলেক আসা শকেমতা য়ুংওয়া দিংঙাবিকো প্যাকোতা মোসোংসুপা জোপুয়ে আসা আবিহা অবীমেলেককো বিরুদ্ধতা জায়ে।24এপা জিংওয়াকো সোতা অবীমেলেক আসা শকেমতা য়ুংওয়া দিংঙাবি, হাংসু আকুহিং গিদোনকো সুংকাইসো ত্যাচো চেংওয়াবিহিং স্যাকো তামসা দুদুইপামি নিমমে, আবিহা আপনিকো অপরাধ জোওয়াকো ফল মুংয়ে।25শকেমতা য়ুংওয়া দিংঙাবিহা অবীমেলেককো বিরুদ্ধতা য়্যাগ্যই-য়ুগ্যইবিতা দিংঙাবিহিং গুংপোইওয়া নিমগা। আউসো তেইওয়া তাংসাহিং আকু দিংঙাবিহা কুচপুচাংমগা। ই দেরেংহা অবীমেলেকহা হিংয়ে।26আত্রংহা এবেদকো চেংওয়া গালহা আপনিকো ডুওয়া এবিহিংপা শকেমতা লেয়ে। শকেমতা য়ুংওয়াবিহা গালকো তোইতা দেংয়ে আসা আকো তোইতা ভরসা জোয়ে।27আবিহা তাংসা আংগুরবিরিতা হোয়ে, আগুর পিয়ে আসা আগুরকো য়ু বানাইয়ে আসা উৎসব মানাইসুয়ে। আবিহা আপনিকো চোইসুংকো দেমসাতা হোয়ে, আউতা আবিহা চাসুয়ে, আংসুয়ে আসা অবীমেলেকহিং সরাপেয়ে।28গালহা জাংয়ে, “য়াংবি শকেমকো দিংঙাবিহা হেপা জিংওয়া দিংঙাবিমে? য়াংবিহা হাংপাসা অবীমেলেককো ডেইয়া জোদিংগাসা? আকুহা হাংসুগাসা? গিদোনকো চেংওয়াগা? শহরকো মাটা জুবুলহা আকো আজ্ঞা পালন জোমগা। আদো য়াংবিহা হাংপাসা আকো সেওয়া জোনেকোগা? য়োংকো বংশহিং জাপাওয়া য়োংকো আটা হমোরহিং নাবিহা আপনিকো রাজ ভক্তি তিংপা।29কাবেমি ই দেশকো অগুওয়া বেনাহা হেপা জিংকোমমে! কাহা অবীমেলেকহিংয়া ঘিইপুকোগা। কা আকুহিংয়া জাংকোগা, ‘আপনিকো সিপাইবিহিং জমা জোমসা ওয়াং আসা কাহিংপা লুইসু।”30এপাজিংওয়া নুওয়াং হিংমসা শহরকো মাটা জুবুলহা সিওপারাং সেদ্রাংপায়ে।31জুবুলহা দিংঙাবি নিংপুমসা অরুমাকো অবীমেলেকহিং দেরেং কাইপুয়ে, “এবেদকো চেংওয়া গাল আসা আকো আপু এবিহা সেকেমতা ওয়াংমসা শহরকো দিংঙাবিহিং নাকো বিরোদ্ধতা ধুদুইপাদিংয়ো।32নাতিহা আপনিকো দিংঙাবিহিংপা নোপামসা লিশুং লুংনিংবিতা গুংমসা য়ুং।33জুকু হাপকোং সানি ত্যইনুহা তাত্রিংপা শহরকো তোইতা আক্রমন জো, আসা গালহা আপনিকো দিংঙাবিহিংপা নাকো বিরোদ্ধতা লুইসুকো নোপামসা ওয়াংনুওয়া আপনিকোতা নিওয়া তাংসা সেসো নাতিহা আবিকো তোইতা আক্রমন জোপুই।!”34অবীমেলেক আসা আকো দিংঙাবিহা লিশুং লেমসা শকেমকো বাইরে দিচো পারা জিংমসা আউতা গুংসুমসা য়ুংসুয়ে।35হাত্রং অবিমেলেক আসা আকো দিংঙাবিহা গালহিংয়া ওয়াংমসা শহরকো মাটা লাপুংতা জাদিংওয়া তিংয়ে, আবিহা আপনিবিকো গুংসুদিংওয়া জায়গাসো নোয়ে।36গালহা আবিহিংয়া তিংয়ে, আসা জুবুলহিং জাংয়ে, “কাং, দিংঙাবিহা য়্যাগ্যইসো লিতা উইপামসা দেপায়ে!” জুবুলহা জাংয়ে, “নাকো তিংদিংওয়াহা আবিহা দিংঙাবি মোকো, য়্যাগ্যইকো লোদোংগা।”37গালহা ন্যাসা জাংয়ে, “কাং, য়্যাগ্যইবিকো তোইসো দিংঙাবিহা লেতা লেপায়ে আসা ইচো পারাহা টেবো সিংটেংকো ন্যাতা জিংমসা দেপাওয়া তিংয়ে।”38আত্রংহা জুবুলহা আকুহিংয়া জাংয়ে, “নাকো টেরবো টেরবো য়্যইওয়া নুওয়াংবিহা হানি? নাতিহা উইদিংমগা, হাংপাসা য়াংবিহা ই অবীমেলেককো ডেইয়া জোকোগা? নাতিহা ই দিংঙাবিহিংয়া ল্যইস্যইপাদিংমগা। নেহা হোমসা আবিহিংপা লুইসুতু।”39গালহা শকেমকো দিংঙাবিহিং পুরামসা হায়ে আসা অবীমেলেকহিংপা লুইসুয়ে।40অবীমেলেকহা গালহিংয়া ঘিপুয়ে আসা আকুহা ক্যাপুয়ে। শহরকো মাটা লাপুংতা চোইপা উইসে দিংঙাবিহা ঘাইতে জিংপুওয়া নিমি।41অবীমেলেকহা অরুমাহ তাওয়া জায়গাতা য়ুংয়ে, জবুলহা গাল আসা আকো আপু-এবিহিংয়া শকেমসো ঘিইপুয়ে। আবিহা আউতা য়ুংমক্যইতো।42আকো জুকুংহা শকেমতা য়ুংওয়া দিংঙাবিহা শহরসো নোমসা লুংনিংবিতা হ্যাপুনতেয়ো তাওয়া অবীমেলেকহা হিংয়ে।43আকুহা আপনিকো দিংঙাবিহিংয়া সুংদ্যা পারাতা পোয়ে আসা লুংনিংতা হোমসা গুংয়ায়ে। দিংঙাবি শহরসো নোপামসা দেপাওয়া তিংমসা আকুহা আপনিকো গুংদিংওয়া জায়গাসো নোমসা আবিহিং স্যাকো নাগাই গ্যইয়ে।44অবীমেলেক আসা আকো পারাহা শহরকো মাটা লাপুং কাটুতা নাগাই গ্যইয়ে আসা আউতা লুইসুকো তৈয়ার জোয়ে। আত্রংহা দোসরা নিহসো পারাহা লেমসা আকু লুংনিংতা গুংসুদিংওয়াবিকো তোইতা আক্রমন জোয়ে আসা আবিহিংয়া স্যাপুয়ে।45আবিহা হিমিসিং লুইসুয়ে। অবীমেলেকহা শহরহিংয়া কব্জা জোয়ে, শহরকো দিংঙাবিহিংয়া স্যামসা আকু শহরহিংয়া ওংপাপুয়ে আসা আকু মোংটোতাহা নী গাঁমসা মেইপাপুয়ে।46হাত্রং শকেম শহরকো কিল্লাতা গাওয়া মাটা দিংঙাবি ই নুওয়াং হিং, আত্রংহা আবিহা এলবরিতকো দেমসাকো নাপোকো গুংদু নিওয়া জায়গাতা গুংসুয়ে।47আবিহা এলবরিতকো নাপোতা গুংসুদিংয়ো তাওয়া দেরেংহা অবীমেলেকহা হিংয়ে।48আকো সোতা আপনিকো দিংঙাবিহিংপা আকুহা সল্মোন য়্যাগ্যইতা হোয়ে। আউতা আকুহা দুপেসো ইচো সিংতেংকো গেইবেহিং থেয়ে আসা আকু গেইবেহা বুচুংতা পায়ে। আপনিকো দিংঙাবিহিংনে সেনে-সেনেপা এপারাং পাপাকো জাংয়ে।49আকো সোতা তাংসা দিংঙাবিহা গেইবেবি ঠেয়ে আসা পুউমসা অবীমেলেককো নুনুই হোয়ে। আবিহা দেমসাকো নাপোতা হোয়ে আসা আকু ঠেওয়া গেইবেবিহা গুংসুওয়া জায়গাকো আবেইতারাং জমা জোয়ে আসা আউতা মেহ চুংপুয়ে। শকেমকো দিংঙাবিহা তাংসা ওংপুমসা সিপুয়ে। এপা জোমসারাং আউতাহা প্রায় এক হাজার পোজাবি আসা মেমেবি সিপুয়ে।50আকো নোইতাহা অবীমেলেক তেবেস হোয়ে, আসা আকুহিংনে য়োইসুমসা কব্জা জোপুয়ে।51আউতা ইচো সাডুংওয়া কিল্লা নিমি আসা তাংসা পোজা আসা মেমে অগুওয়াবিহা আউতা সাসুকো হোয়ে। কিল্লা মেইমসা আবিহা তোইতা কেংবুতা হোমসা গাসুয়ে।52হাত্রং আকু কিল্লাহিং আক্রোমন জোকো দেয়োং অবীমেলেকহা আকো লাপুংতা হোমসা কিল্লাতা মেহ চুংকো কেংয়ে,53আদো ইচো মেমেহা আকো পোরোতা ওয়াংতা টোমসা পোরো ওয়্যাপাপুয়ে।54আত্রংহা অবীমেলেকহা আপনিকো কাত্রিংবি পুউওয়া পোজাহিং সেন্নে-সেন্নেপা মোউমসা জাংয়ে, “নাকো তলওয়ার য়োমসা কাহিং স্যা। ইচো মেমেহা কাহিং স্যাপুয়ে তাওয়া নুওয়াংহা বেইপুকো তাওয়া কুং ইচ্ছা মোতো।” আকু পোজাহা তলওয়ার য়োমসা আকো জুপাতা বাপুয়ে আসা আকুহা আউতারাং সিপুয়ে।55অবীমেলেক এপা সিপুওয়া তিংমসা ইস্রাইলিবিহা আপনিকো সাতা লাকাপুয়ে।56আপনিকো সুংকাইসো ত্যাচো ডুওয়া এবিহিং স্যামসা আপাহিংপা জোওয়া অন্যায়কো বদলাতা সেংজাহা অবিমেলেকহিং এপা জিংওয়া ফল পিচায়ে।57গিদোনকো চেংওয়া য়োতামহা শ্রাপেদিংনুকো জাংওয়া সেই শকেমতা য়ুংওয়া দিংঙাবিহিংনে আবিকো মেংতাওয়া কামকো সোতা সেংজাহা এপা জিংওয়া কষ্ট পিচায়ে।
The Seed Company