এস্টার1
1ফারস দেশকো রাজধানী শুশন শহরকো রাজকীয় গাদিংসো অহাসুরস জাইপুহা ভারত দেশসোহা ইথিয়োপিয়া দেশ চোইপা জমা একশো ২৭সোরা রাজ্যবিকো তোইতা রাজ জোচাংমি।3আকো রাজ জোদিংওয়াকো লো সুংনিংতাহা আকুহা আপনিকো তাংসা কাম জোমবিহিং আসা অধিকারিবিহিং ইচো টেবো চাওয়া আংওয়াকো ভোজ পিচায়ে। আউতাহা ফারস আসা মাদি দেশকো সিপাইবিরে নিমি। রাজ্য রাজ্যকো টেবো হাকিমবি আসা টেরবো টেরবো সাকো দিংঙাবিরে ওয়াংওয়া নিমি।4পুরা ১৮০ দিন চোইপা আকুহা আপনিকো রাজ্যকো পুংজি আসা আউতা নিওয়া তাংসা তিংপায়ে।5আকো নোইতা জাইপুহা আপনিকো রাজধানী শহরকো পুপুউ, জোরোংবি তাংসা দিংঙাবিহিং চাওয়া আংওয়াকো ভোজ পিচায়ে। রাজমহলকো দুংরাইতা আকু ভোজহা সানীয়ু চোইপা জিংয়ে।6আকো লাঙাংহা য়ৌনিংওয়া আসা হাংপাওয়া সুতিকো আংদুংকো পর্দাসো সজায়ওয়া নিমগা। আকু পর্দাবিহা সিংঙ্গমরমরকো হুইটিংতা লাগাইওয়া জাতাংকো কৈইবিহিংপা বেইগুনি রংকো মিমিইওয়া সুতিকো সিংদিসো জিংমসা তেপাওয়া নিমগা। লাঙাংতাহা হাংপাওয়া সিঙ্গমরমর কিসিম-কিসিমকো আলুউওয়াসো য়ৌনিংওয়া লুংটুইবি আসা মতিবিসো ন্যাওয়া নিমগা। আউতা সুন আসা জাতাংকো সাওয়া গাদিংবি এওয়া নিমগা।7জাইপুহা লারাংসা লারাংসা সুনকো কচৌরাতা রাজমহলতা উইসে পাংক্যইওয়া য়ু চোয়ে। ই য়ুহা জাইপুকোতাহা সিওপারাং নিমগা। ইসোহা জাইপুকো পিচাকো কেংওয়া তুংসিংহিংনে তিপামগা।8জাইপুকো আজ্ঞা জোওয়া সেইহা হাসে আংপুদো আংপুকো তাওয়া লিংপাং নিমগা। তাংসাহিং ঘ্যইওয়া সেই জাইপুহা দিংঙাবিহিং পেয়োংকো তামসা আজ্ঞা পিচায়ে।9আত্রংরাং বস্তি জাইমুহা রাজমহলতা মেমেবিহিং ইচো চাওয়া আংওয়াকো ভোজ পিচাদিংমি।10চাওয়া আংওয়াকো সানীয়ুতাহা জাইপুহা পুটকুই আংমসা য়াংতা-কেতাদিংমি। আকুহা আপনিকো নীচো নোপুংসোক ডেইয়াবিহিং অর্থাৎ মহুমান, বিজ্থা, হর্বনা, বিগ্তা, অবগথা, জেথের আসা কর্কসহিং মোউয়ে।11রাজকীয় মুকুট লুউমসা বশ্তী জাইমুহিং পারাকো তামসা জাইপুহা আবিহিং আজ্ঞা জোয়ে। জাইমুহা সিওপারাং জেজেংক্যইমি, আসা জাইপুহা আকো জেজেংক্যইওয়া য়োওয়াইহিংয়া আপনিকো আরসিং আফিসারবিহিং তিংপাকো কেংদিংমি।12আদো হাত্রং ডেইয়াবি বশ্তি জাইমুহিং জাইপুকো আজ্ঞাহিংপা, আত্রংহা আকুহা ওয়োংকো মেকেংতো। এপা জিংনুওয়া জাইপুহা সেদ্রাংপুমসা মেহবেপা জিংপুয়ে।13নিয়ম- কানুন আসা লোংস্তাইওয়াকো বিষয়তা দিংঙাবিকোতা সল্লাহ লাংওয়া জাইপুকো চলন নিমি আসা আকুহা আপনিহিং সল্লাহ পিচাওয়াবিহিংয়া মোউয়ে। নেহা হেপা জোনেকোমে তামসা আবিহা গেদিংমি নিমি।14জাইপুহা আকু পরিস্থিতি কোইওয়া ফারস আসা মাদিকো নীচো ভার লাংওয়া, কর্শনা, শেথার, অদ্মাথা, তর্শীশ, মেরেস, মর্সনা আসা মমুকানকো সল্লাহ লাংচাংমি। আকু নীচোহা রাজ্যতাহা হাংসুরোমা টেরবো টেরবো পদতা নিমবিহা ফারস আসা মাদীকো শাসন জোওয়া দিংঙাবি নিমি।15আকুহা আবিহিং জাংয়ে, “লিংপাং সেইহা জাইমু বশ্তীহিংয়া হাং জোকোগা? হাংপাতানাহা জাইপু অহাসুরসহা নোপুংসোকবিহিং হাই হাই আদেশ পিচা, আকু আদেশহা জাইমুহা পালন মোজোতো।”16আত্রংহা মোমুকানহা জাইপু আসা অধিকারিবিহিংয়া জাংয়ে, “বশ্তী জাইমুহা জাইপুহিং মেংচে মোকো, আকুহা রাজ্যকো তাংসা অধিকারিবিহিংনে অপরাধ জোয়ে।17জাইমু হাই জো, আকু হিংতানি রাজ্যকো তাংসা মেমেবিহা আপনি আপনিকো ওয়াবিহিংয়া আপনিরোমা চিয়োওয়া নোচেংসো ন্যইরোওয়া। আবিহা এপা জাংরোওয়া, ‘অহাসুরস জাইপুহা জাইমু বস্তীহিংয়া আপনিকোতা ওয়োংকো তামসা জাংয়ে, আদো আকুহা মায়োংতো।’18জাইমুকো লোংস্তাইওয়াকো তোইতাহা নেহা ফারস আসা মাদীকো অধিকারিবিকো মেবিহা হিংরোওয়া, আসা হিনি হিমিসিংতারাং আবিহা আপনিকো ওয়াহিং আকু নুওয়াং হিংপারোওয়া। আসা আপনিকো ওয়াবিহিংয়া ইজ্জত জোকো ল্যাপুরোওয়া আসা ওয়াবিহা আপনিকো মেবিকো তোইতা সেদ্রাংপারোওয়া।19নাকো ইচ্ছামি জিংদানাহা, নেহা বস্তি জাইমুহা হাত্রংরে জাইপুকো নাগাই দোসপা মোমুংকো তামসা ইচো আদেশকো চিঠি লাকো। ফারস আসা মাদীকো লিংপাংতাহা ই আদেশ লাকো তাওয়া আজ্ঞা জিংকো আসা ই আজ্ঞাহা হাত্রংরে বদলি মাজিংকো আসা ইচো ন্যাসারাং য়োগ্য়্য মেমেহিং জাইমুকো জায়গা পিচাকো।20জাইপুকো জাংওয়াহা ই তাংসা রাজ্য ভরিতা হিংপাপুনতেনুওয়া, আত্রংহা তাংসা মেমেবিহা আপনিকো ওয়াবিহিং আদর জোরোওয়া।”21জাইপু আসা অধিকারিবিহা ই সল্লাহ জোওয়াহা এনতাচপুয়ে। আসা জাইপুহা মোমুকানকো সল্লাহ অনুসার কাম জোয়ে।22তাংসা ওয়াবিহা আপনিকো সাকো গিরি জিংরোওয়া আসা আকো আজ্ঞা সাকো তাংসা দিংঙাবিহা হিংনেরোওয়া তামসা জাইপুহা তাংসা রাজ্যতা আকু রাজ্যকো তাংসা জ্যাকো ক্যাতা আসা তাংসা রাজ্যকো লিপিতা লামসা কাইপুয়ে।
The Seed Company