১ তিমোথী1
1কাবিহিং মুক্তি পিচাওয়া সেংজা আসা আশা পিচাওয়া ইশু খ্রীষ্টকো আজ্ঞা জোওয়া সেই ইশু খ্রীষ্টকো জেংওয়া পোইং জিংপুওয়া কা পাউল ই চিঠিহা2দেংওয়াতা কুং আজিপ্পাকো চেংওয়া তিমোথীহিং লাদাংয়ো। সেংজা আপা আসা কাবিকো খ্রীষ্ট ইশুহা নাতিহিংয়া অনুগ্রহ, লামতুওয়া আসা তিমেওয়া পিচাকো।3কা মাকেডোনিয়াতা হোদাংনুওয়া নাতিহিংয়া এপিসিসতারাং য়ুংতে তামসা জাংমি নিমগা, আসা আউতা প্যায়োং ঝিপামবিহিং এপা জিংওয়া নুওয়াংবিহা মাঝিপাকো তামসা আজ্ঞা জো।4আসা নোমসা ল্যাওয়া মিংচিবি, হাত্রংরে মাত্যইওয়া আটা আজাবিকো এপা জিংওয়া মিংচিবিহা মাহিংপাকো, হাংপাতানাহা আকুহা দিংঙাকো নোমসা লাওয়া মিংচি মেংচেগা। আসা সেংজাকো তোইতা দেংমসা য়ুংওয়া ত্যইংদা আউসোহা মামুংমগা।5কাবিকো ঝিপানেওয়া উদ্দেশ্যহা নাবিকো চোসোওয়া তুংসিং, এনতাওয়া নোচেং, আসা আজিপ্পা দেংওয়াসো নোওয়া জেজেংওয়াহিং ডেপাকো সোতাগা।6লেরা দিংঙাবিহা ই নুওয়াংহিং লারিংমসা হাইরে ত্যইংদা মাতাওয়া য়্যইওয়া-জাংওয়াবিতা ওইরোইদিংয়ো।7আবিহা লিংপাংকো উটকেওয়া জিংকো কেংমগা, আদো আপনিকো য়্যইওয়া নুওয়াং আসা আপনিহা হাংকো তোইতা য়্যইদিংমে আবি আপনিবিরাং মোকোইমগা।8কাবিহা গেমি নিও, লিংপাংহা এনতাপামি চালাইনাহা লিংপাংহা সিওপারাং এনতাওয়া নুওয়াংরাংগা।9ইহা য়াংবিহা গেনেরোওয়া, লিংপাংহা আসল দিংঙাকো সোতা বানাইওয়া মোকো, আদো লিংপাংহিং মামানেওয়া, মেংদাংবি, সেংজাহিং মামানেওয়াবি আসা পাপিবি, আপনিকো আয়ু-আপাহিং স্যাওয়াবি, দিংঙাহিং স্যাওয়াবি,10নুংনাংসুওয়াবি, পোজাহা পোজাহিংপা নুংনাংওয়া, দিংঙাহিং চোইওয়া-পিচাওয়া, প্যায়োং য়্যইওয়া আসা প্যায়োং গাওয়াই পিচাওয়া, আসা আজিপ্পা ঝিপাওয়াকো বিরোধ কাম জোমবিকো সোতা বানাইমগা।11ইহা কাহিং ত্যইওয়া আশিষিত সেংজাকো মহিমিত এনতাওয়া দেরেংতা জাংওয়া সেই নিও।12কুং কামতা কাহিং সে পিচাওয়া কাবিকো প্রভু ইশু খ্রীষ্টহিং কা গারানি তারোওয়া, আকুহা কাহিংয়া দেংমসারাং আপনিকো কামতা লাগাইয়ে,13নাগাইহা কাহা আকুহিংয়া নিন্দা জোয়ে, কোইচ্যাপায়ে আসা লোস্যইপায়ে, আদো কাহা ইহা মেগেপা আসা মাদেংয়াংনু জোসুওয়াকো সোতারাং আকুহা কাহিং লামতুওয়া তিংপায়ে।14আসা কুং তোইতা য়াংবিকো প্রভুকো অনুগ্রহহা সিওপারাং হোপুয়ে। খ্রীষ্ট ইশুকোতা মুংচাওয়া দেংওয়া আসা জেজেংওয়া আকুরাং কাহিংয়া পিচামগা।15ই জাংদিহা আজিপ্পারাংগা। পাপিবিহিং উদ্ধার জোকো ইশু খ্রীষ্টহা বাসিমতিতা লেমগা, আবিকো প্যাকোতা কাহা হাংসুরোমা সিওপা পাপি নিমগা।16ইকো সোতারাং কাহা লামতুওয়া মুংচায়ে। কা বেওয়া তাংসারোমা সিওপা পাপিহিং আপনিকো সহায়কো চুওয়া তিংপাকো সোতা ইশু খ্রীষ্টহা কাহিংয়া নমুনা বানাইয়ে। ই নমুনাহা আকুহিং দেংমসা হাত্রংরে মিসিওয়া সাদি মুংচাওয়াবিকো সোতারেগা।17নেহা হাত্রংদো য়ুংওয়া জাইপু, হাত্রংদো বাচেওয়া আসা তিংকো মাছুওয়া ইচো চিংওয়া সেংজাহিং হাত্রংদো আদর আসা মহিমা জিংকো। আমেন।18ও কুং চেংওয়া তিমোথী, উইসে নাগাইসো নাকো বিষয়তা অগমবাণী য়্যইওয়া সেই নাতিহিংয়া কা ই জিম্মা পিচাদাংয়ো। এনতাপা লুইসুকো সোতা আকো জাংওয়া আকু নুওয়াংবিহিংয়া হাতিয়ার বেপা চালাইকো জো।19আত্রংহা নাতিহা আপনিকো দেংওয়া আসা এনতাওয়া নোচেংহিংয়া মাল্যা। নোচেংকো জাংওয়া মাহিংপা লেরা দিংঙাবিহা আপনিকো দেংওয়াকো জাহাজহিংয়া দাংপাপুমি নিও।20আবিকো প্যাকোতাহা হুমেনিয়স আসা আলেকজান্ডারেগা, সেংজাহিং নিন্দা জোওয়া ল্যাকো তামসা কাহা আবিহিংয়া শয়তানকো খুইতা স্যইপুমি নিমগা।
The Seed Company