২ থেসলোনি3
1নোইস্যাতাহা ডুওয়া এবাই আসা হুম্রিবাই, কাবিকো সোতারে পাচাইপি, নাবিকো প্যাকোতা জিংপুমি ত্যাবাপা প্রভুকো এনতাওয়া দেরেং তাংসাতা সেন্নেপা বেইপুমসা আকো টেবো আদর জিংরোওয়া।2দাংপুওয়া আসা মেংতাওয়া দিংঙাবিকোসো ওয়েংপামসা এপিকো, হাংপাতানাহা তাংসা দিংঙাবিহা সেংজাহিং মাদেংমগা।3আদো প্রভুকো তোইতাহা দেংকো চুরোওয়া, আকুহা য়াংবিহিংয়া সাডুংপা জোরোওয়া আসা মেংতাওয়াসো য়োইমসা এরোওয়া।4কাবিকো আজ্ঞা জোমেপারাং নাবিহা জোদিংয়ো আকুহা নাবিহা জোদিংমি নিয়ো আসা জোরোওয়া তাওয়া কাবিহা নাবিকো বিষয়তা প্রভুকো তোইতা ভরসা জোমি নিও।5প্রভুহা নাবিকো তুংসিংহিংয়া সেংজাকো জেজেংওয়া আসা খ্রীষ্টকো সহায়কো ছুওয়া সেতা তোইংপিকো।6ডুওয়া এবাই আসা হুম্রিবাই, প্রভু ইশু খ্রীষ্টকো মিংতা কাবিহা নাবিহিং আজ্ঞা জোরোওয়া, কাবিকো ঝিপাওয়া মাহিংবি আসা ডুমক্যইওয়া দেংওয়াবিকোসো তানাং য়ুং,7কাবিহা নাবিহিংপা য়ুংনুওয়া ডুমক্যইপা জোমসা মায়ুংতো। কাবিকো জোমি ত্যাবাপারাং নাবিরে জোনেকোগা তামসাহা নাবিরাং গেমি নিও।8কাবিহা ন্যাস্যা মাতাপাহা হাংসুকোরে হাইরে মাচাতো। নাবিকো তোইতা ব্যা মাজিংকো তামসা কাবিহা জেইসুং, লিশুং সিওপারাং কাম জোয়ো।9কাবিহা সহায়তা মুংচাকো হক মাতামসা মোকো, আদো কাবিকো কাম জোওয়াহা নাবিকো সোতা ইচো উদারণ জিংকো তামসা কাবিহা এপা জোমগা।10নাবিহিংপা চিত্তা নিনুহা কাবিহা নাবিহিংয়া এপা আজ্ঞা জোতেমি নিমগা, “হাংসু কাম মোজো আকুহা আমারে চামঘ্যইকো।”11হাংপাতানাহা কাবিহা হিংমি নিও, নাবিকো প্যাকোতাহা লেরাবিহা ডুমক্যইওয়াবিরে নিনত্যাহ্যা। আবিহা হাইরে কাম মোজোমত্যাহ্যা। আদো দোসরাকো কাম জোওয়াতা য়োইচাংমত্যাহ্যা।12এপা জিংওয়া দিংঙাবিহিংয়া কাবিহা প্রভু ইশু খ্রীষ্টকো মিংতা আজ্ঞা জোরোওয়া আসা সুজাচারোওয়া, আবিহা চেকেপা কাম জোকো আসা আপনি চাকোহা আপনিরাং ন্যাস্যা দাংচোইকো।13আদো ডুওয়া এবাই আসা হুম্রিবাই, নাবিহা এনতাওয়া কাম জোকোহা হাত্রংরে মাল্যা।14কাবিকো ই চিঠি লাওয়া নুওয়াংবি পালন মোজোমবিহিংয়া এনতাপা নাইরেপামসা আবিহিংপা মেতেইপা তানাং য়ুং। এপামি জোনাহা আবি আপনিবিরাং লেফেপুরোওয়া।15আদো আবিহিংয়া আপনিকো দুসমন ত্যাবাপা মোনোপা, আপনিকো এ বেপা নোমসা য়েং।16য়াংবিহিং তিমেপা পিচাওয়া প্রভু আপনিরাং হাত্রংদো হানি সময়তা জিংদো তিমেওয়া পিচাকো। প্রভুহা নাবি তাংসাহিংপা নিকো।17কা পাউলহা, আপনিকো খুইসো ই অভিবাদন তাওয়া লামসা কাইপুদাংমি নিও। কুং চিঠিকো চিহ্নহা ইরাংগা। এপারাং কা কুং তাংসা চিঠিতা লাচাংমগা।18য়োংকো প্রভু ইশু খ্রীষ্টকো অনুগ্রহ নাবি তাংসাহিংপা য়ুংকো।
The Seed Company