১ তিমোথী2
1নেহা তাংসারোমা নাগাইহা কা নম্র জিংমসা জাংরোওয়া, তাংসা দিংঙাবিকো সোতা জাংচা, পাচাই, আসা অন্তর বিনতি, আসা গারানি তামসা জাং,2জাইপুবি আসা তাংসা সরকারি দিংঙাবিকো সোতা পাচাইপি, এপামি জোনাহা য়াংবিহা গাগ্রুমসা তিমেওয়া সাদিতা তাংসা সময়বিহা তাংজিতা আসা আদর মুংচাওয়া য়োগ্য়্যকো সাদিতা য়ুংকো চুরোওয়া।3এপা জোকোহা এনতাওয়া নুওয়াংরাংগা আসা য়াংবিহিং মুক্তি পিচাওয়া সেংজারে এপা জিংওয়াহিংরাং জেজেংমগা।4তাংসা দিংঙাবিহা বাচেকো আসা আজিপ্পাহিং এনতাপা নাইকো তাওয়ারাং আকো ইচ্ছা নিও।5সেংজাহা ইচোরাংগা, আসা দিংঙাবিহিংয়া সেংজাতা চাংসপাকো পারাওয়ারে ইচোরাংগা, আকু চাংসপাওয়া দিংঙাহা খ্রীষ্ট ইশুগা।6তাংসা দিংঙাবিহিং ছুটকারা পিচাকো আকুহা বলি জিংমি নিও। তাংসা দিংঙা বাচেওয়া সেংজাহা ইচ্ছা জোমগা তাওয়া নুওয়াংকো ঠিক প্রমানহা ইরাংগা।7আকো সোতা কা দোসরা জ্যাকো দিংঙাবিহিং দেংওয়া আসা আজিপ্পা নুওয়াং ঝিপাওয়া জেংওয়া পোইং জিংপুয়ে, কাহা আজিপ্পারাং জাংমগা, কা প্যায়োং য়্যইওয়া মোকো।8তাংসা জায়গাতা পোজা দিংঙাবিহা মেসেদ্রাংপাপা আসা নুওয়াংসো মাস্যাসুপা পবিত্র খুই তোরোইমসা পাচাইকো তাওয়া কুং ইচ্ছা নিও।9এপারাং মেমেবিরে ন্যইনুওয়া এনতাপা তিংওয়া আসা আপনিহিং পোতাওয়া আংদুংবি লুওয়া কা ইচ্ছা জোরোওয়া। সিওপা পুরিং লেইপ্যা জোমসা, সুন আসা মোতিকো তিসেবি আসা সিওপা পাংক্যইওয়া আংদুংবি মালুকো,10আদো ভক্তি জোওয়া মেমেবিহা আপনিহিং সুহায়ওয়া আসল কামবি মেংচে জোকো।11মেমেবিহা নম্র জিংমসা চেকেপা য়ুংমসা ঝিপাওয়া নুওয়াংবি ঝিকো।12আদো মেমে দিংঙাহা পোজাহিং ঝিপাওয়া আসা অধিকার জোকো তামসা কা অধিকার মাপিচা। আবিহা চেকেপারাং য়ুংকো,13হাংপাতানাহা নাগাইহা আদমহিং দিংমগা, আকো নোইতা মেংচে হব্বাহিং।14ল্যইহচপুওয়াহা আদম মোকো, আদো ল্যইহচপুমসা পাপ জোওয়াহা হব্বারাংগা।15আদো মেমেবিহা নম্র জিংমসা দেংওয়াতা, জেজেংওয়াতা আসা পবিত্রতামি য়ুংকো চুনাহা আবিহিংয়া চেং কেনুওয়া আবিহা বাচেরোওয়া।
The Seed Company