১ য়হুন্না5
1ইশুহিংনাং মুক্তি পিচাওয়া জাইপু খ্রীষ্ট তামসা দেংওয়া তাংসা দিংঙাবিহা সেংজাকো চেংবিগা। আপাহিং জেজেংপা জোওয়াহা চেংওয়াহিংনে জেজেংপা জোমগা।2য়াংবি সেংজাহিং জেজেংপা জোমসা আসা আকো আজ্ঞা মানেমসারাং আকো চেংবিহিং য়াংবিহা জেজেংপা জোমগা তাওয়া সিদা চ্যইমগা,3হাংপাতানাহা সেংজাকো আজ্ঞা মানেওয়ারাং আকুহিং জেজেংপা জোওয়াগা। আকো আজ্ঞাবিহা হ্যামরাপা মোতো।4হাংপাতানাহা সেংজাকো তাংসা চেংবিহা বাসিমতিহিংনাং জিয়োকো ছুরোওয়া। য়োংকো দেংওয়াসোরাং য়াংবিহা বাসিমতিহিংয়া জিয়োমগা।5হাংসু বাসিমতিহিং জিয়োকো ছুকোগা? ইশুহিং সেংজাকো চেংওয়াগা তামসা দেংওয়াবিরাং বাসিমতিহিং জিয়োমগা।6ইশু খ্রীষ্টহা তি আসা য়ুতিসো লেমগা, তিসোদাং মোকো, য়ুতিসোরেগা। ইহা আজিপ্পারাংগা তামসা পবিত্র লাংবেরাং সাক্ছি নিও, হাংপাতানাহা পবিত্র লাংবেরাং আজিপ্পাগা।7ই সুংচোসারাং সাক্ছি নিও:8লাংবে, তি, আসা য়ুতি। ই সুংচোসারাং ইচো সাক্ছি পিচামগা।9দিংঙাকো পিচাওয়া সাক্ছিতা য়াংবিহা দেংমগা। আদো সেংজাকো পিচাওয়া সাক্ছিহা ঝান টেবো নিও। সেংজারাং আপনিকো চেংওয়াকো বিষয়তা সাক্ছি পিচামি নিও।10এপা জিংনুওয়া সেংজাকো চেংওয়াকো বিষয়তা দেংওয়াকো আপনিকো তুংসিং নাপোতা ই সাক্ছি নিমগা, আদো সেংজাতা মাদেংওয়াবিহা সেংজাকো সাক্ছিহিংনাং প্যায়োং তামসা নোমগা, হাংপাতানাহা চেংওয়াকো তোইতাহা সেংজাকো পিচাওয়া সাক্ছিহিংনাং মাদেংমগা।11সাক্ছিহা ইরাংগা: সেংজাহা য়াংবিহিংয়া হাত্রংরে মাসিওয়া সাদি পিচামি নিও, আসা ই সাদিকো পাটিংহা আকো চেংওয়াকোতা নিও।12সেংজাকো চেংওয়া নিমবিহিংপাহা সাদি নিও, সেংজাকো চেংওয়া মাতামবিহিংপাহা সাদি মোতোমগা।13হাত্রংরে মাসিওয়া সাদি মুংচামি নিও তামসা নাবি সিদা চ্যইকো তামসারাং সেংজাকো চেংওয়াকোতা দেংওয়া নাবিহিংয়া ই লাদাংয়ো।14সেংজাকো ইচ্ছা সেই হাইক্রি নুওয়াং য়াংবি য়ানুওয়া আকুহা হিংমগা তামসারাং আকো নাগাইতা হোকো সাহস জোমগা।15য়াংবি হাত্রং হাই নুওয়াং য়াদো আকুহা য়োংকো নুওয়াং হিংমগা। ইহা আজিপ্পাগা তাওয়া গেমকো সোতা য়াংবিহা ইরে গেদিংয়ো, হাংপাতানাহা আকুহিংপা য়াওয়া নুওয়াংহা য়াংবিহা মুংচামগা।16হাংসু আপনিকো ডুওয়া হুম্রিবিহিং সিদিংতা মোচোইয়াওয়া পাপ জোদিংওয়া তিং, আকুহা সেংজাকোতা পাচাইপিকো আসা সেংজাহা আকুহিংয়া সাদি পিচারোওয়া। আদো ইহা সিদিংতা মোচোইপাওয়া পাপকো সোতা মেংচেগা। সিদিংতা চোইপাওয়া পাপরে নিও। আদো কা নাবিহিংয়া ইকো সোতা পাচাইকো তামসা মাজাংরোওয়া।17তাংসা মেংতাওয়া কামবিহা পাপগা। আদো তাংসা পাপবিহা সিদিংতা মোচোইপামগা।18সেংজাকো চেংওয়াবিহা পাপ জোওয়া জোওয়া মোজোমগা, হাংপাতানাহা সেংজাকো চেংওয়াহা আবিহিংয়া বাচাইমসা এমগা, আসা শয়তানহা আকুহিংয়া খতি জোমক্যইমগা। ইহা য়াংবিহা গেমি নিও।19বাসিমতিতা নিওয়া তাংসা শয়তানকো অধীনতা নিদো, য়াংবিহা সেংজাকো চেংবিগা তাওয়া নুওয়াং গেমি নিও।20সেংজাকো চেংওয়াহা লেয়ো, আসা আকুহা য়াংবিহিংয়া আজিপ্পা সেংজাহিং নাইওয়া দুংজিরে পিচামি নিও। ইহা য়াংবি গেমি নিও। য়াংবিহা আকু চেংওয়া ইশু খ্রীষ্টকোতা নিওয়াকো সোতা আজিপ্পাকো সেংজাকোতা নিও। আকুরাং আজিপ্পাকো সেংজাগা আসা ইরাং হাত্রংরে মাসিওয়া সাদিগা।21কুং চেংওয়া চেমেবাই, নাবিহা মুর্তিহিং হুইওয়াসো তানাং য়ুং।
The Seed Company