১ য়হুন্না4
1কুং জেজেংওয়া ব্যারোবাই, আপনিহিংপা পবিত্র লাংবে নিও তাওয়া তাংসাহিং মেদেং, আদো আবিহিংপা নিওয়াহা সেংজাকো লাংবে কোমে না মোকোমে জাঁচ জোমসা কাং, হাংপাতানাহা উইসে প্যায়োং অগমবক্তাবিরে ই বাসিমতিতা নোমি নিও।2ইশু খ্রীষ্টহা দিংঙা জিংমসা লেয়ে তাওয়া লাংবেরাং সেংজাকো লাংবেগা। ইসোরাং নাবিহা সেংজাকো লাংবেহিংয়া নাইরোওয়া।3ইশুহিংয়া এপা দিংঙা জিংমসা লেয়ে তামসা মামানেওয়া লাংবেহা সেংজাকো লাংবে মোকো। ই লাংবেহা খ্রীষ্টহিং বিরোধ জোওয়াসো ওয়াংমগা। আকুহা ওয়াংরোওয়া তামসা নাবিহা হিংমি নিও, আসা আকুহা নাগাইসোরাং বাসিমতিতা ওয়াংপুনতেয়ো।4ও আপেচাওয়া কুং চেংবাই, নাবিহা সেংজাকোগা আসা নাবিহা প্যায়োং অগমবক্তাবিহিংয়া জিয়োমি নিও, হাংপাতানাহা নাবিকোতা নিওয়া পবিত্র লাংবেহা বাসিমতিকো দিংঙাবিকোতা নিওয়া লাংবেরোমা টেবো নিও।5আবিহা বাসিমতিকো জিংমসা বাসিমতিকো নুওয়াংরাং য়্যইমগা আসা আবিকো জাংওয়া নুওয়াংহা বাসিমতিকো দিংঙাবিরাং হিংমগা।6আদো য়াংবিহা সেংজাকোগা আসা হাংসু সেংজাহিং নাইমিনি, আবিহা য়োংকো নুওয়াং হিংমগা। হাংসু সেংজাকো দিংঙা মোকো, আবিহা য়োংকো নুওয়াং মাহিংরোওয়া। এপা য়াংবিহা আজিপ্পাকো লাংবে আসা প্যায়োংকো লাংবেহিংয়া নাইকো ছুরোওয়া।7ও জেজেংওয়া কুং ব্যারোবাই, য়াংবিহা ইচোহা ইচোহিং জেজেংপা জোসুরো, হাংপাতানাহা জেজেংওয়াহা সেংজাসো লেমগা। জেজেংপা জোওয়াহা সেংজাকোসো কেমগা আসা আকুহা সেংজাহিং নাইমগা।8জেজেংপা মোজোওয়াহা সেংজাহিং মানাইমগা, হাংপাতানাহা সেংজাহা জেজেংওয়াগা।9সেংজাহা য়াংবিহিংয়া এপা জেজেংওয়া তিংপামি নিও, আকুহা আপনিকো ইচোচিংওয়া চেংওয়া য়াংবি সাদি মুংচাকো তামসা ই বাসিমতিতা নিংপুয়ে।10য়াংবিহা সেংজাহিং জেজেংপা জোমসা মোকো, আদো আকুহা য়াংবিহিংয়া জেজেংপা জোমসা আসা য়োংকো পাপকো সোতা বলিদান জিংকো আপনিকো চেংওয়াহিং নিংপুয়ে। জেজেংওয়া তাওয়াহা ইরাংগা।11ও জেজেংওয়া ব্যারোবাই, সেংজাহা এপা য়াংবিহিং জেজেংপা জোনাহা, য়াংবিরে ইচোহা ইচোহিং জেজেংপা জোসুরো।12হাংসুরে হাত্রংরে সেংজাহিংয়া মাতিংয়াতো। আদো য়াংবিমি ইচোহা ইচোহিং জেজেংপা জোনাহা, সেংজাহা য়োংকো নাপোতা য়ুংমগা আসা আকো জেজেংওয়া য়োংকোতা মেইপুওয়া নিমগা।13এপারাং য়াংবিহা সেংজাকোতা য়ুংমগা আসা আকুরে য়োংকোতা য়ুংমগা তাওয়া সিদা চ্যইমগা, হাংপাতানাহা আকুহা য়াংবিহিংয়া আপনিকো পবিত্র লাংবে পিচামি নিও।14সেংজা আপাহা আপনিকো চেংওয়াহিংয়া বাসিমতিতা মুক্তি পিচাকো নিংপুওয়াহা কাবি তিংয়ো আসা ইকোরাং সাক্ছি পিচারোওয়া।15ইশুরাং সেংজাকো চেংওয়াগা তাওয়া দিংঙাকো নাপোতাহা সেংজা য়ুংমগা আসা আকু দিংঙাহা সেংজাকোতা য়ুংমগা।16য়াংবি আপনিবিরে সেংজাহা য়াংবিহিং জেজেংপা জোওয়াহা য়াংবি কোইমি নিও আসা ইতারাং ভরসা এমগা। সেংজাহা জেজেংওয়াগা। জেজেংওয়াতা য়ুংওয়া দিংঙাহা সেংজাকোতা য়ুংমগা, আসা সেংজাহা আকোতা য়ুংমগা।17এপারাং য়োংকোতাহা জেজেংওয়াসো মেইওয়া নিমগা, আসা ন্যায়কো দিনতাহা য়াংবিহা চুসুংমঘ্যইরোওয়া, হাংপাতানাহা খ্রীষ্টহেপা নিমমে, য়াংবিরে ই বাসিমতিতাহা এপারাং নিও।18জেজেংওয়াতাহা চুসুংওয়া মাতামগা। পুরা জেজেংওয়াসোহা চুসুংওয়াহিংয়া ওয়েংপাপুমগা। চুসুংওয়াসোরাং দন্ড জিংমগা তামসা তিংপামগা আসা চুসুংওয়া দিংঙাকোতা পুরা জেজেংওয়ারে মাতামগা।19সেংজারাং নাগাইহা য়াংবিহিং জেজেংপা জোওয়াকো সোতা য়াংবিরে জেজেংপা জোমগা।20লেরাহা সেংজাহিং জেজেংপা জোমি তামসা জাংমগা, আদো আপনিকো ডুওয়া হুম্ব্রিবিহিংয়া মিছিপা জোনাহা আকুহা প্যায়োংগা। আপনিকো তিংওয়া ডুওয়া হুম্রিবিহিং জেজেংপা মোজোওয়াহা মাতিংওয়া সেংজাহিংয়া হেপা জেজেংপা জোকো ছুকোগা?21হাংসু সেংজাহিং জেজেংপা জো, আকুহা আপনিকো ডুওয়া হুম্রিবিহিং জেজেংপা জোনেরোওয়া। আকুরাং খ্রীষ্টকো য়াংবিহিং পিচাওয়া আজ্ঞাগা।
The Seed Company