২ য়হুন্না1
1মন্ডলিকো মাটা ওয়ারাংপাকোসো জেংওয়া মেমে আসা আকো চেংওয়া-চেমেবিহিং, হাংসুহিং কা আজিপ্পা জেজেংপা জোমমে। কা মেংচে মোকো, আদো আজিপ্পাহিং নাইওয়া তাংসা নাবিহিংয়া জেজেংপা জোমগা।2হাংপাতানাহা আজিপ্পা কাবিকোতা নিও, আসা আকুহা হাত্রংদো য়ুংরোওয়া,3সেংজা আপা আসা আকো চেংওয়া ইশু খ্রীষ্টহা অনুগ্রহ, লামতুওয়া আসা তিমেওয়া পিচাকো। তাংসা আজিপ্পা আসা জেজেংওয়াহা য়োংকোরাং জিংকো।4নাকো চেংওয়া চেমেবিতাহা লেরা লেরাহিংয়া আপাকোসো আজ্ঞা মুংওয়া সেই আজিপ্পাতা তেইওয়া দোসুমসা কা সিওপারাং গাগ্রুপা জিংপুয়ে।5ও জেজেংওয়া মেমে, কা নাতিহিংয়া চুবে নুওয়াং লাওয়া মোকো, আদো আকুরাং লাদিংয়ো, হানি শুরুসোরাং কাবিহিংপা নিমমে, য়াংবিহা তাংসা ইচোহা ইচোহিং জেজেংপা জোসুরো তামসা কা নাতিহিংয়া জাংচাদিংয়ো।6আকো আজ্ঞা সেই তেইওয়ারাং জেজেংওয়াগা। নাকো শুরুসোরাং হিংওয়া আজ্ঞাহা ইরাংগা, নাবিহা তাংসা জেজেংওয়াতা য়ুংনেরোওয়া।7ইশু খ্রীষ্ট দিংঙাকো জুপাতা লেওয়া মোকো তামসা উইসে ভ্রম জোওয়াবিহা বাসিমতিতা তাংসা জায়গাতা হোমি নিও। এপা জিংওয়া দিংঙাহা ভ্রম জোওয়া আসা খ্রীষ্ট বিরোধীবিগা।8হোশিয়ার য়ুং, হানি নুওয়াংকো সোতা নাবিহা কাম জোদিং, আকুহা য়াংপাওয়া মোকো, আদো আকুহা পুরা ইনাম মুংচাওয়া জিংনেরোওয়া।9খ্রীষ্টকো ঝিপাওয়াসো বাইরেকো দোসরা নুওয়াংবিতা তেইওয়া দিংঙাবিহিংপাহা সেংজাহা মায়ুংমগা, আদো আকো ঝিপাওয়াতা য়ুংওয়াবিহিংপাহা আপা আসা চেংওয়া নিহসোসারাং য়ুংমগা।10আকো সোতা লেরা নাকোতা ওয়াংমসা ই ঝিপাওয়া মিচাপা ভ্রমাইওয়াবি নাবিকোতা ওয়াংনুওয়া সাতারে হোকো মিচাগে। আসা অভিবাদন তামসারে মাজাংঘ্যই।11হাংপাতানাহা আকুহিং অভিবাদন জোকোহা আকো মেংতাওয়া কাং-লাতা য়ুজ্রুওয়াগা।12কাহা নাবিহিং নুওয়াং লাকোহা উইসে নিও, আদো সোকু আসা মুসিসোহা লাকো কুং ইচ্ছা মোতো, আদো য়াংবিকো গাগ্রুওয়া তাংসা পুরা জিংকো তামসা কা নাবিকোতারাং ওয়াংরোওয়া আসা দোংনাংতারাং য়ুংসুমসারাং নুওয়াং য়্যইসুকো আশা জোরোওয়া।13সেংজাসো জেংওয়া নাকো হুম্রিকো চেংওয়া-চেমেবিহা নাতিহিংয়া অভিবাদন কাইপুমি নিও।
The Seed Company