১ কোরোন্থি3
1আদো ও ডুওয়া এবাই আসা হুম্রিবাই, লাংবে নিমবি ত্যাবাপা কা নাবিহিংপা য়্যইমক্যইরোওয়া, আদো বাসিমতিকো দিংঙা খ্রীষ্টকোতাহা য়ো আংদিংওয়া আপেহিংপা য়্যইমি ত্যাবাপা কা য়্যইকো ছুয়ে।2কাহা নাবিহিংয়া য়ুতি পেয়াংয়ো, সাডুংওয়া চাওয়া আংওয়াবি মোকো, হাংপাতানাহা নাবিহা এপা চাকোহা তৈয়ার মোতোমগা, আসা নেরে মোতো।3নাবিহা নেরে পাপি জুপাকো লোংস্ত্যাইওয়াতারাং নিও, হাংপাতানাহা নাবিকো লোংস্ত্যাইওয়াহা মিচাওয়া আসা স্যাসুওয়া নেচোইপা নিকোরে নিও, আকো সোতা নাবিকো লোংস্ত্যাইওয়াহা বাসিমতিকো দোসরা দিংঙাবিকো ত্যাবাপা মোতোংগা?4ইচোহা “কা পাউলকোগা” আসা ইচোহা “কাহা অপোলোসকোগা” তাদানাহা, নাবিহা বাসিমতিকো দিংঙাবি ত্যাবাপারাং নিও।5অপোলোসহা হাংসুগা? আসা পাউলহা হাংসুগা? কাবি নিহসোসারাং নাবিহিং দেংওয়াতা পারাওয়া সেংজাকো ডেইয়াবিগা। প্রভুকো খুইওয়া কামরাং কাবিহা জোমগা।6কাহা সিংতেং তিংয়ে, অপোলোসহা তি লুপিয়ে, আদো ডেপাওয়া কামহা সেংজারাং জোয়ো।7সিংতেং তিংওয়া আসা তি লুপিওয়াহা টেবো মোকো, আদো ডেপাওয়াহা টেবোগা, হাংসু সেংজামে।8তিংওয়াসো তি লুওয়াহা ইচোরাংগা। তাংসারাং আপনি আপনিকো কাম জোওয়া সেই ইনাম মুংচারোওয়া।9হাংপাতানাহা কাবিহা চিত্তা সেংজাকো কাম জোওয়াবিগা, নাবিহা সেংজাকো লুংনিংগা। নাবিহা সেংজাকো বানাইপিওয়া সা ত্যাবাপারেগা।10কাহিং সেংজাকো অনুগ্রহসো পিচাওয়া ঙেরোং সেই, সা বানাইকো ম্যারাওয়া মিস্ত্রি ত্যাবাপা কাহা হুটিং চুউয়ে। সেংজাকো চুউওয়া হুটিংহা ইশু খ্রীষ্টরাংগা। হাংসুরে আকু ল্যামসা দোসরা হুটিং চুউমক্যই। আসা লেরা দিংঙাহা আকো তোইতা সা বানাইমসা হোয়ে। আকো তোইতা সা বানাইপুমসা হোওয়া তাংসা দিংঙাহা হেপা বানাইদিংমমে, আকুহা এনতাপা হোশিয়ার জো।12য়দি হাংসু দিংঙা ই হুটিংকো তোইতা সুন, জাতাং, পাংক্যইওয়া লুংটুইসোমি বানাইনাহা আকুহা তিংরোওয়া। আদো হাংসু দিংঙা পাশিং, য়্যহ আসা পরালসোমি বানাইনাহা আকুরে তিংরোওয়া। হাংপাতানাহা ন্যায়কো দিনতাহা আকুহা তিংরোওয়া। আত্রংহা মেহসো তাংসা দিংঙাকো কামহা তিংপারোওয়া।14আকু হুটিংতা বানাইওয়া দিংঙাকো কামহা মেহতা চুংনুওয়া চেকামি মাজিংনাহা, আকুহা ইনাম মুংচারোওয়া।15আসা দোসরা দিংঙাকো কামমি অংপুনাহা, আকুহা ইনাম য়াংপারোওয়া, আদো মেহকো প্যাকোসো ক্যামি ত্যাবাপা আকু আপনিহা বাচেরোওয়া।16নাবিহা সেংজাকো দেমসাগা আসা সেংজাকো লাংবেরাং নাবিকো নাপোতা য়ুংমগা। ই নুওয়াংহা নাবিহা মেগেমগা?17হাংসু সেংজাকো দেমসাহিং দাংপা, সেংজারে আকুহিংয়া দাংপারোওয়া, হাংপাতানাহা সেংজাকো দেমসাহা পবিত্র নিও, আসা আকু দেমসাহা নাবিরাংগা।18হাংসুরে আপনিহিংয়া ধোকা মিচাকো। নাবিকো প্যাকোতা ই সময়তা আপনিহিং দুংজি নিও তামসামি নোনাহা আজিপ্পারাং দুংজি নিওয়া জিংকো সোতা আকুহা তোউজি জিংপুকো,19হাংপাতানাহা বাসিমতিকো দুংজিহা সেংজাকো নাগাইতাহা তোউজিগা। তাংজিকো হিগাতাহা এপা লামি নিও, “সেংজাহা দুংজি নিওয়া দিংঙাবিহিংয়া আবিকো চালাকসোরাং প্যইপুরোওয়া।”20আসা ন্যাসারাং, “দুংজি নিওয়া দিংঙাবিকো দুংজিহা হাইরে মোকো তামসা প্রভুসেংজাহা গেমগা।”21আকো সোতা হাংসুরে দিংঙাবিকো তোইতা পুংটা মোজোকো, হাংপাতানাহা আবিহিংয়া নাবিকো তোইংদ্যাকো সোতারাং পিচামগা।22নাবিহা পাউল, অপোলোস আসা পত্রসকো তোইতা পুংটা মোজোকো, হাংপাতানাহা কাবিহিংয়া সেংজাহা নাবিকো সোতা পিচামগা। বাসিমতিকো তাংসা সোংসাবিহা সিদিং জিংবা, সাদি জিংবা, নেকো সময় জিংবা আসা নোইকো দেপাওয়া সময় জিংবা তাংসা নাবিকো তোইংদ্যাকো সোতারাংগা।23নাবিহা খ্রীষ্টকো দিংঙাগা আসা খ্রীষ্টহা সেংজাকোগা।
The Seed Company