১ কোরোন্থি4
1এপারাং কাবিহিংয়া নাবিহা খ্রীষ্টকো কাম জোওয়া আসা সেংজাকো নাপোকো নুওয়াং জাংকো ছুওয়া ডেইয়া নোনেরোওয়া।2কাম জোওয়া ডেইয়াহা গিরিওয়াকো দেংকো ছুওয়া জিংনেরোওয়া।3নাবিকোসো কিতা দোসরা আদালতসো কুং কামতা দেংকো ছুওয়া নিমমে না মাতামমে আকুহা ইন্সাব জিংকো, ইহা কুং সোতাহা আপেচওয়া নুওয়াংগা। কা আপনিরে আপনিকো ইন্সাফ মোজো।4কুং আপনিকো তোইতা হাইক্রি দোষ নিও তামসা কাহিংয়া প্যারা মাতাংতো, আদো ইসোহা কাহিংয়া আজিপ্পারাং দোষি মাতাতো তামসা মাতিংপামগা। কাহিং ন্যায় জোওয়াহা প্রভুরাংগা।5আকো সোতা নাবিহা সময়রোমা নাগাই হাংসুহিংনে দোষ মাতিংপা। নোইস্যাকো ন্যায়হা প্রভু লেনুকো দিনতারাং জিংরোওয়া। প্রভুরাং নাঘিওয়াতা গুংমসা য়ুংওয়া তাংসা নুওয়াংহা হাহাইওয়াতা পারারোওয়া আসা দিংঙাকো তুংসিংকো নুওয়াংবি তিংপাপুরোওয়া। আত্রংহা তাংসা দিংঙাবিকো মুংচানেওয়া প্রশংসাহা সেংজাকোসোরাং মুংচারোওয়া।6ও ডুওয়াবাই আসা হুম্রিবাই, কাহা আপনিকো আসা অপোলোসকো উদারণ পিচামসা, নাবিহিং ভলাই জিংকো তামসা ই তাংসা নুওয়াং লামি নিও, তাকি কাবিকোসোহা পবিত্র তাংজিকো হিগা সেই নাবিহা য়ুংকো ছুকো, আসা নাবিকো প্যাকোতা হাংসুরে ইচোহা ইচোকো বিরোধতা পুংটাসো মামেইকো।7হাংসু নাবিহিংয়া দোসরারোমা টেবো বানাইংগা? নাবিহিংপা নিওয়া নুওয়াংহা সেংজারাং পিচামকোতা? এপা বেনাহা নাবিহা হাংসুরে মিচামি ত্যাবাপা জোমসা হাংপা পুংটা জোমগা?8নাবিহিং ঘ্যইওয়াহা তাংসা মুংচানতেনা তাংগা? নাবিহা তাংসা পুপুউ জিংপুনতেনা তাংগা? কাবি মাতাদো নাবিহা জাইপু জিংপুংগা? আজিপ্পারাং নাবিহা জাইপু জিংনাহা এনতাকোগা আসা নাবিমি জাইপু জিংনাহা কাবিরে জাইপু জিংকো ছুকোগা,9হাংপাতানাহা কাহিংয়া এপা জিংচাংমি, সেংজাকো কাবি তাংসা জেংওয়া পোইংবিহিংয়া আকুহা হাংসুরোমা লিকো জায়গাতা এমি নিও। সেংজারাং কাবিহিংয়া বাসিমতি, লোডিংবাকো পোইং আসা দিংঙাবিকো নাগাইতা সিনেওয়া দিংঙাবি ত্যাবাপা তামাসা বানাইমি নিও।10কাবিহা খ্রীষ্টকো সোতা তোউজি জিংচপুমি নিও, আদো নাবিহা খ্রীষ্টতা য়ুংওয়া দুংজি নিওয়া দিংঙা জিংমি নিও। কাবিহা কোত্তোপা জিংপুমি নিও, আদো নাবিহা বুচুইপা জিংমি নিও। নাবিহিংয়া আদর মুংমি নিও, আদো কাবিহা আচকাপা জিংপুমি নিও।11ই সময় চোইপা কাবিহা হাপাংপা আসা সেকেংপা নিও, পাইক্রি নিও, দোসরাসো ব্যইদি য়্যহদিংয়ো আসা সা-কিংবিরে মোতোপা নিও।12আপনিকো খুইসো কাম জোমসারে কাবিহা কোইচ্যাদিংয়ো। দোসরাবি শ্রাপেদো কাবিহা আশিষ পিচামগা। কোইচ্যাপানুওয়া কাবিহা সহায়মগা।13কাবি লেফেপুদো মেসেদ্রাংপা নম্র জিংমসা য়্যইমগা। কাবিহা বাসিমতিকো আচকাওয়ারাং জিংপুমি নিও আসা নেরে বাসিমতিকো জিতি বাসিমতিকো সিংচাবি ত্যাবাপা জিংপুমি নিও।14নাবিহিং লেফেপাকো কা ই নুওয়াং লাওয়া মোকো, আদো কুং জেজেংওয়া আপেবিহিং ত্যাবাপা সল্লাহ পিচাকো লামগা।15হাংপাতানাহা খ্রীষ্টকোতা নাবিকো দশ হাজার ঝিপাওয়াবি নিদো নাবিকোহা উইসে আপাবিহা মাতাতো, হাংপাতানাহা এনতাওয়া দেরেং হিংপামসা খ্রীষ্ট ইশুকোতা কা নাবিকো আপা জিংপুয়ে।16আকো সোতা কা হাই জো, নাবিরে আকুরাং জো তামসা কা নাবিহিংয়া জাংচারোওয়া।17আকো সোতা কা নাবিকোতা তিমোথীহিং নিংপুদাংয়ো। আকুহা প্রভুতাহা কুং জেজেংওয়া আসা দেংকো ছুওয়া চেংওয়াগা। কাহা তাংসা জায়গাতা, তাংসা মন্ডলিবিতা ঝিপামি ত্যাবাপা খ্রীষ্টকোতাহা কুং সাদিহা হেপা নিমমে, আকুহা তিমোথীরাং নাবিহিংয়া ল্যারোওয়া।18কা আউতা মাওয়াংরোওয়া তাওয়া নোমসা লেরাবিহা নাবিকো প্যাকোতা পুংটা জিংপুমি নিও।19আদো প্রভুকোমি ইচ্ছা জিংনাহা কা নাবিকোতা সেন্নেপারাং ওয়াংরোওয়া, আসা আকু পুংটাহা দিংঙাবিকো নুওয়াংকো মোকো, আদো আবিকো সেহা সেংজাকোসো লেওয়া কোমমে না মোকোমমে আকুহা কা লেমসা মোরেরোওয়া,20হাংপাতানাহা সেংজাকো রাজ্যহা দিংঙাবিকো য়্যইওয়ারোমাহা আবিকো কামসো তিংমগা।21নাবিহা হাং ইচ্ছা জোমগা? কা সাটা পামসা ওয়াংকোগা না নম্রতাকো লাংবেতা জেজেংওয়া পামসা ওয়াংকোগা?
The Seed Company