১ কোরোন্থি2
1ও ডুওয়াবাই আসা হুম্রিবাই, কাহা টেরবো নুওয়াংবি আসা দুংজিতা সেংজাকো গাওয়াই হিংপামসা মাওয়াংতো,2হাংপাতানাহা নাবিহিংপা নিনুওয়া ইশু খ্রীষ্ট আসা আকুহিং ক্রুসতা থ্যইপুওয়াকো নুওয়াং ল্যামসা কাহা দোসরা হাইরে মেগেমগা তামসারাং নোপুনতেমগা।3কা নাবিকোতা ওয়াংনুওয়া কমজোর আসা চুসুংমসা পিপিং-দোদোউপা ওয়াংয়ে।4কা য়্যইনু আসা দেরেং হিংপানুওয়া দোসরাহিং নোইপাওয়া আসা দুংজিকো টেরবো টেরবো নুওয়াংবি মায়্যইতো, আদো পবিত্র লাংবেকো সেকো কামবি তিংপামসা হিংপায়ো।5তাকি নাবিকো দেংওয়াহা দিংঙাবিকো দুংজিসো মোকো, আদো সেংজাকো সেতা জিংকো।6আদো দেংওয়াতা পক্কা জিংতেওয়াবিহিংপা কাবিহা দুংজিকো নুওয়াং য়্যইমগা, আদো আকু দুংজিহা ই সময়কো দুংজি মোকোমগা, ই সময়তা অধিকার জোমবিকো দুংজিতারে মোকো, অধিকার জোমবিহা দাংপুমসা হ্যাদিংয়ো।7আদো কাবিহা সেংজাকো নাপোকো নুওয়াং আসা গুংমসা য়ুংওয়া দুংজিকো নুওয়াং হিংপামগা, হানি বাসিমতি দিংনুরোমা নাগাইসো সেংজাহা য়োংকো মহিমাকো সোতা জেংমসা এমি নিমমে।8ই সময়তা অধিকার জোমবিহা হাংসুরে ই নুওয়াং মোকোইতো। কোইনাহা সন্মান মুংনেওয়া প্রভুহিংয়া ক্রুসতারাং মাস্যাকোগা।9আদো তাংজিকো হিগাতাহা এপা লামি নিও, “দিংঙাকো হাত্রংরে মাতিংওয়া, মাহিংওয়া, আসা হাত্রংরে মোনোওয়া নুওয়াংরাং সেংজাহা আপনিহিং জেজেংপা জোওয়াবিকো সোতা তৈয়ার জোমি নিও।”10সেংজাহা য়োংকো সোতা পবিত্র লাংবেসো আকু তাংসা নুওয়াংবি তিংপামি নিও। এপারাং পবিত্র লাংবেহা তাংসা নুওয়াং মোমগা, সেংজাকো নাপোকো নুওয়াংবিপারাং মোমগা।11দিংঙাকো নাপোতা য়ুংওয়া আপনিকো লাংবে ল্যামসা, হাংসু দিংঙাকো নোওয়াহিংয়া কোইকো চুকোগা? এপারাং সেংজাকো নোওয়াহিংয়া সেংজাকো লাংবে ল্যামসা হাংসুরে মোকোইরোওয়া।12কাবিহা বাসিমতিকো লাংবে মুংচাওয়া মোতো, আদো সেংজাহা কাবিহিং পিচাওয়া ঙেরোংবিহা কোইকো ছুকো তামসা আকোসো পবিত্র লাংবে মুংচামি নিও।13আকো সোতা কাবিহা দিংঙাবিকো দুংজিসো ঝিপাওয়া নুওয়াংবি মোয়্যইমগা, আদো লাংবেকো ঝিপাওয়া নুওয়াংবি য়্যইমগা আসা লাংবে নিমবিহিংনাং কাবিহা লাংবেকো আজিপ্পা নুওয়াংবি কোইপামগা।14সেংজাকো লাংবে মাতাওয়া দিংঙাবিহা লাংবেকো নুওয়াংবিহা মোকোইমগা, ইহা আবিকো সোতাহা তোউজি নুওয়াংগা। ইহা লাংবেসোরাং কোইনেমকো সোতা আকুহা ই নুওয়াংহা মোকোইমগা।15সেংজাকো লাংবে নিওয়া দিংঙাবিহা তাংসা নুওয়াং এনতাপা কোইকো ছুমগা, আদো হাংসুকোতা সেংজাকো লাংবে মোতো, আবিহা আকুহিংয়া কোইকো মাছুমগা।16তাংজিকো হিগাহা জাংমগা,“প্রভুকো তুংসিংহিংয়া হাংসু গেকো ছুংকোগা?আসা হাংসু আকুহিংয়া ঝিপাকোগা?”আদো য়াংবিহা ই নুওয়াংবিহা কোইদিংয়ো, হাংপাতানাহা য়াংবিহা খ্রীষ্টকো তুংসিং মুংচামি নিও।
The Seed Company