阅读Koreeg nà moog‑e 37

Koreeg nà moog‑e37

¹Yagob e aa é alda ná faa ənə̌nǐ wəəndi, aldan é Kanaan.²Koren rimdə̂n jaalgeen é Yagobo. Yusif, belǎn duugu əsəgdi èg nà idig dhaag, nəəmdə̂n miəg èg awleege, jaalgeeg é Bila èg jaalgeen é Silfan, ozoog é faa iinin nà ɲalgeeg. Yusif e fel faan é jisig nà əng awleeg jissǐigi.

³Isrəil ɲamǎn Yusif əndəg é jaalgeen inəgin iilgə é kora Yusif kossána een é gara məissǐ. E ruudí ĩnə goog nà wiəg əndəg.⁴É gara awleege tursǐig faan ɲəmi əndəg diilg‑i, eg bag Yusif é muguri war kurə̌nǐig ĩnə kor man ná weed‑e wa.⁵Yusif e naamê é caalge. É gara birsǐ caalga awleegee‑ne awleegen e bəgíigî é muguri.⁶E bii'ĩgən: “Fiŋə cal nà naamsaan‑e.⁷Ag taǎn gafa‑eelg ag tifə̌n jerg é kuriig. É yaag ane kuriig uyug eg tab kuri əən é ceeg eg gurum tad kuri əənən.”⁸Awleege e bii'ǐigi ĩnə: “Û kurə̂n û əə seen əyə‑i é see a? Û guu aga anaanda?” E bəgíigî é muguri əndəg é caalg nà birsǐ ĩgən‑i.

⁹Aneenda taan e naamá é caalge, e kor awleegen. E bee: “Fiŋa. Caalg biig naamsan taan. A tursu tel èg turini, èg pajogo əsəgdi è ná taman e gùrum tad ə̃nə.”¹⁰É gara 'birsiigə faan ar ná 'birsiigǐ awleege‑ne, faan e məldí e bii'ĩnə: “Caalg nee ɲiin naamsa oon taa anaan‑e? U den aan èg dö yaazne è dö awleege ag gurum ũnu tad a?”¹¹Awleege e bəgíigî é muguri, gəl faan e bag kor deelg.

¹²Awleege wajjě ẽ nəmdǐ miəg é faan teerma é Səkiim,¹³Isrəil e bee Yusifən: “U ɲilí ö awleeg nəəmdǐigə miəg é Səkiim‑i. Lee ã cusu diiŋg.” Yusif e bii'ĩnə: “Weedân.”¹⁴Aneenda e bii'ĩnə: “Way û turûn ö awleeg e segarg‑e èg miəgi, û mərə̂n u lii kurə̃n.” Aneenda e cugi é Abrono. É gara Yusif cəggsǐ wag é Səkiim‑i,¹⁵jen man e gəmsə̌ni e caam faaz‑ool e tisi, “U lurûn ɲii?”¹⁶E pəd kor: “A loorân ä awleeg. U rimdə wag ná nəəmdə̂nǐigi miəg‑in a?”¹⁷E bii'ĩnə: “Məŋəsə tui te. A fiŋəssə e kùrəs, ‘Lizzu ã wayda dumuun é Dosan.’ ” Een ná Yusif wəjjǐ gəmsǐ awleege teerma é Dosan‑e.¹⁸Gəl e turíigi e lee duguud. Wara e caggdě wag diiŋg‑i e war ko ẽ tirdíigi.¹⁹Eg kurəs ege, eg bee: “Turdu jen é caalga leên.²⁰Lizzu ã tirdi ã gadde é fuulg nee man. Âg bee əəl nəəmsi. Âg turdu e been caalg inəgin eg na ad é see.”

²¹É gara Rawbin fiŋəssǐ koren‑e, e cəw ẽ fiddin dë əsəgə. E bee: “Ar ag ã 'tirdǎ'e wa.²²Ar ogo ũ ruiddu usug é afad wa. Gəddin é fuulg na wəl‑uul nee man, gəl ar ugu kəyú usug diiŋ wa.” Rawbin korsa koren ẽ fiddin dë əsəgə gar ẽ pəddin faan.

²³Aneenda é gara Yusif lii é awleege iiŋg‑i, eg bəgíigi eg gudíigə goog inəgin nà wiəg gunə̌nǐ diiŋ‑i tad.²⁴E gə̀gíigin é fol. Fol taǎn feg wa.

²⁵É gara əwsíigǐ tad ẽ naamda nams‑e, e tùr mald é Isməiliigə nà təjirg leen é Jilaad. Eg gon kəmdəlig‑uulgə səəmg é bun èg nà jissə ná nameseeg‑e, kəmuliigə èg laad é fui e liiníigi dega teed‑eelg dumuun é Məsir.²⁶Yəusə e bee awleegen: “Aga gəmsə̂n ɲii ag tirsə ä awl‑e o a dərsə kora a tirsa een‑e?²⁷Lizzu ã mərdin Isməiliigən. Ar aga kaya əsəg diiŋ wa de äg awlo, leen dəəŋg afad əyən.” Awleege eg guɲ.

²⁸É gara təjirg nà Isməiliig‑i cəzíigǐ wag‑e, awleeg é Yusif e gòdogo Yusif tuu é folo, e mərdíigi é lolomg é kursug jaa dui əəŋ Isməiliigən e wəjíigə deena é Məsir.²⁹É gara Rawbin təssǐ fol muu‑i e gəmsəgə Yusif e cee. Ë bon e ən əndəg e poro goog inəgin iilgə.³⁰E taa é awleege iiŋg e bii'ĩgən: “Jaan cee ti! Â jisə ɲii bare?”

³¹Aneenda eg war goog é Yusifə, eg wir miə tad e jìs goog iiŋgə é afad.³²E wàr goog e rìmdiigə faan, e bèe: “Tur goog nee e taa na é jaa uundi.”³³E turiigə e bee: “Goog é jaa əənə! Əəl man nəəmsi pursi eelg fifit.”

³⁴Aneenda Yagobo ë bon e ən əndəg e poro goog inəgin iilgə, e bəəd goog nà samarg‑en diiŋ e on naag e talg jaa iinin.³⁵Jaalgeen inəgin kay èg ɲalge e àdaga ẽ bəgdíigi ë bon taw, een e mag e oné jo. E bee: “Wa, â on a waja é fol èg jaa əən‑i.” Enna Yagob uunsǐ jaa iinin‑i.

³⁶Isməiliigə e mə̀rd Yusifə é Məsir Fotifaran jen ná faan gon moraag nà paa Firuun‑i.

Pioneer Bible Translators

https://app.library.bible/content/a230cccfbf4362be