Read Koreeg nà moog‑e 38

Koreeg nà moog‑e38

¹É mun naadinə, Yəusə e waj e bij awleegen e ab èg jen Adlame man ná bel Eraa‑e.²Yəusə e tur ɲen é Coo ná Kanaani e jəldi.³Eelga e puuj e koo jaa ná fuui, Yəusən e nəgi Er.⁴E puuj taan e koo jaa ná fuui e nəgi Onan.⁵E koo jaa man taan é Kaseb e nəgi Cela.

⁶É gara wag kuyjǐ é yaag‑e, Yəusən e war od Eran jaa iinin ná é moogo, ɲen ná bel Tamaar‑e.⁷Gəl Er, jaa é Yəusə ná faan‑e, jisə̌n jisig əng é Məi Tel muu. Məi Tel e tirdi.⁸Aneenda Yəusən e bee Onanan: “Baa od dö awl û kuûn jaalgeeg ö awlan.”⁹Onan e tur asam ná jaa na əddí iini wa‑e. Aneenda e lejja e nagsa èg ode e bell juugu tuu ná ẽ kuddí jaa awlanee‑ne.¹⁰Jisə ná jissǐ nii ənə̌n é Məi Tel muu. Məi Tel e tirdi di.¹¹Yəusən e bee od é jaane: “Way ənəsə maa dö baaw maare ləŋ jaa əən Cela e faŋa.” Feyǎn ar jaa iinin Celan ê tir di ar awleegee‑ne. Aneenda Tamaar e waj maa dë baaw.

¹²É gara wag gəldǐ‑i od é Yəusən, ɲen é Coo'a, e tir. É gara Yəusə ë bon wəldǐ é kora uniyə̌ní od iinin‑i, e waj é Temna é jag nà sawa əəriig inəgin iiŋg‑i, kasane Eraa ná Adlam‑e e wəjjǐ èg deene.¹³Tamaar korsó na ĩnə: “Ö amar leeŋ dumuun é Temna ẽ sawdé əəriig inəgin iiŋg tui.”¹⁴E doos e god goog é maareeg tad e kumur ë muun tad é jaz, e ab faazg muug é Ainaayim, é teed ná den wag dum é Temna‑e é kora tursǐ Celan fəŋsǐ o jaam jəldǐ een Celan wa‑e.

¹⁵É gara Yəusə tursinǐ‑i biləzi ozoog nà jisə aza‑en é kora kumursǐ ë muun tad é jaz‑e.¹⁶Bara ẽ turdí od é jaa iinin‑i, e biiŋí diiŋ teed ɲiid e bii'ĩnə: “Lee ã nagsa èg doone.” Od e tisi: “Û gəfə ɲii ã nagsa èg doone?”¹⁷Yəusən e bii'ĩnə: “Â cugũn laam moraa‑eelg.” E bee: “U gəfə̃n jeem moog a gunəsə iiŋ taw ləŋ û ədə cugə̂n ə̃nə laam a?”¹⁸Yəusən e tisi: “Jee ɲiin â gəfũn bare?” E bee: “Gəfə̃n kitim uunu èg meed iinini èg magald ná u gun dö aas‑e.” Yəusən e gəfiigə ĩnə. E nəgǐ èg deene, eelga puuj.¹⁹É gara Tamaar wəjjǐ dumuun teyag‑e, e god jazn tad dë muu e bəəd goog é maareega taan.

²⁰É yaag ane, Yəusə e gafag laam kasane ná Adlam‑e ẽ gəwdi odon ẽ bagdé jeg inəgin nà gəwsǐ odon‑e. War gəmsǐ odo wa.²¹E tisə jag nà an é gaam naan‑e: “Od man jisə aza'e ana teed‑ɲiid é Ainaayim te een da?” Eg pəd kor: “Od man te ná jis aza'e wa.”²²Aneenda e taa é Yəusə iiŋ, e bii'ĩnə: “A gəmsǐ odo wa, jag nà ti beên bel od man ná jisə aza'e wa.”²³Aneenda Yəusə e bii'ĩnə: “Bii jeg nà a gawsě taa fag, de jag na gaɲaaga ag tassâ tu‑i. A cugsǐ oon ũ gəfí miə u gəmsi wa.”²⁴É gara turiigə kuyjíigǐ ozo‑e, Yəusən e kurin: “De od dö jaa Tamaar jis aza'e, eelg puuj.” Yəusən e bee: “Bəgduin tuu ũ tuidin é moo.”²⁵É gara bəə̌nǎ odo tuu‑i, e cug ë amre iiŋ. E bee: “A puujjə é jen ná bel jeg nee nee. Tur o ɲel jen ná bel jeg nee nee kitim èg meed iinini èg magalde.”²⁶É gara Yəusə tursǐ jeg‑e e bee: “Odo naan taa jerad bəida, é kora a bagsen jaa əən Celan wa‑e.” Gəl nəgsǐ èg deene taan wa.

²⁷É gara mun é konga lii, jaalgeen e tàa deelg wayg.²⁸É gara ada kunǐ, jaa man e bədəgə ë aas tuu. Yoo ná kundugǐ e tifí ë aas é ree ná bera e bee: “Jaa nii ləzí moog.”²⁹Gəl é gara pəssǐ ë aas é ceeg‑e, awlane e lədə̌nǐ ĩnə tuu moog. Yoon e bee: “U kərí ö golone u ləzzí tuu dö koren.” E nəgin Faares.³⁰Awlane e ladaga ná ë aas taa é tifə é ree ná bera, e nəgi Saara.

Pioneer Bible Translators

https://app.library.bible/content/a230cccfbf4362be