JOSUE1

1Noq kamnaq chik i Moisés, re' i QaJaaw Dios xuq'oreej i Josué rak'uun i Nun re' wo' hoq ixtowik cho reh i Moisés je' wili i xuq'or reh:2Re' i Moisés waj kamanoom xkimik chik yu'naak re' chik i hat naa aaq'asaniik reje keh chu'nchel i aj Israel chi juntar i nim ha' Jordán. Eh naa taq aq'ahxiik reje chupaam i ye'aab' okik weh chi ruye'ariik taq aweh i hat, hat taq aj Israel.3Eh re' hin naa nuye'em taq aweh chu'nchel i ye'aab' naa taq aponiik wii', je' rukab' i xnuq'or reh i Moisés, noq xub'an.4Re' hin naa taq nuye'em aweh i ye'aab', naa rutohq'iik chaloq chupaam i ye'aab' chiq yuuq', naa ruponiik paraxchee' Líbano, naa ruponiik chi chii' i nim ha' Éufrates, eh chu'nchel kiye'aab' i aj heteo, eh naa ruponiik ko chi chii' i palaw Mediterráneo.5Re' hat Josué ma' awach ta naa ruq'atwiik awach nik' najtiil naa aak'achariik ruum re' hin naa nuwihiik awuuk' cha toob'jiik, ma' jaruuj naa kaat nukanaam cha wutkeel, je' rukab' noq xnutob'eej i Moisés.6Je' re' noq chakowej awiib' cha chop ak'ux, ruum re' hat naa aach'aqwiik i ye'aab' keh i aj Israel i naa kichopom naah. Re' i ye'aab' nuq'orom chee xti korik keh aamaam awati't chi naa nuye'em keh.7Xa re' i nupahqaaj aweh i hin chi chakowej awiib', eh cha chop ak'ux chi korik, eh cha a'n chu'nchel i ruq'or i nuk'uhb'aal xuq'or aweh i waj kamanoom Moisés. Maacanaa' rub'aan, maa t'ooj panasak'aaj, ni xata panatz'eet reh chi nee ti elik korik ruuk' chu'nchel i naa a'nam.8Eh ma' naa ta akanaam ruq'orariik i nuk'uhb'aal, chi q'iij chi aq'ab' naa atijem riij i nuk'uhb'aal tz'ihb'amaj chupaam i huuj, reh chi neena a'n chi korik taqe i ruq'or. Chi je' re' nee ti elik korik, eh chu'nchel nee nelik korik chawach.9Je' re' noq re' hin kinq'orik aweh chi chakowej awiib' cha chop ak'ux, mat yo'jik, eh marub'an kiib' ak'ux, ruum re' hin aaWaJaaw aaDios naa nuwihiik awuuk' chatoob'jiik xa aha' pa' nee tiooj, i nuchjik ruum i Dios.
10Eh re' Josué xumol kiwach taqe i k'amal kib'eeh i ju'jun ch'uq chi aj Israel, je' wili i xuq'or keh:11Re' taq i hat ik'een taq chupaam taqe i itz'ihy naah paat cha q'or taq keh i wilkeeb' ar, chi kiyejaa' kiwa' kihaa', ruum panixib' q'iij inqaq'at reje wach i nim ha' Jordán, reh chi naa rojiik qachopom naah i ye'aab' naa ruye'em qeh i QaJaaw Dios, inki.
12Eh re' i Josué xuq'oreej taqe i junch'uq chi riih rumaam Rubén, i junch'uq chi riih rumaam i Gad, je' wo' hoq i yejaal ch'uq chi riih rumaam i Manasés, je' wili i xuq'or keh:
13Mansahchik taq panak'ux i xuq'or taq aweh i Moisés chi naa taq a'nam re' raj kamanoom i QaJaaw, re' noq xuq'or chi je' wili: Re' taq aaWaJaaw aaDios naa ruye'em taq aweh i ye'aab' re' re', reh chi ar taq naa ahi'liik, inki.14Eh re' taq awehk'een, taqe aachikoop cha kanaa' taq ayu' chupaam i ye'aab' xuyeew taq kahnoq aweh i Moisés, chi juntar chee nim ha' Jordán. Eh re' taq i hat winaq i ko hat kow konee taq i nakuy i q'aq'inik cha chop taq atz'a'aamb'aal reh q'aq'inik hiy taq chi peet b'eeh chikiwach awuch aj Israel.15Eh korehtaal inye'arik i kiye'aab' ruum i QaJaaw Dios, je' rukab' noq xuyeew taq aye'aab' i hat. Eh korehtaal wo' inkehchaaj i ye'aab' naa ruye'ariik keh ruum i QaJaaw Dios. Eh chi riij i re' naa wo' chik asutiniik taq cho panaye'aab' chuwach chaloq i nim ha' Jordán, panelb'aal reje i q'iij. Eh kora'j taq i naa awehchaam chi korik re' i ye'aab' xuyeew taq kahnoq aweh i Moisés raj kamanoom i Dios, inki.
16Eh re' keh je' wili inchaq'wik xkian:
Re' hoj neen qa a'n chu'nchel i xaq'or qeh, nee wo' hoq ooj xa aha' pa' nee qoh ataq'aaj.17Xa naa wo' qa'nam chi juneliik aha' wilik naa aq'orom, je' wo' rukab' noq xqa a'n aha' wilik i xuq'or qeh i Moisés. Xa re' la' wi eliik xwihik awuuk' i QaJaaw Dios, je' rukab' noq wihik ruuk' i Moisés.18Eh awach i ma' nee ta tirunimaj, eh ma' nee ta rub'an aha' wilik taqe i neenaq'or re' reh inchol chi neenkanteesjik, xa re' inqaq'or aweh i hat chi chakowej awiib', eh cha chop ak'ux, inki taqe. Re' i Josué xutaq'aaj rutahariik nik' wach noq wilik i tinamit Jericó
1Noq wilkeeb' ar Sitim, re' Josué rak'uun i Nun kiib' i winaq xutaq'aaj chutahariik i ye'aab' chi ma' eht'alimaj, je' wili i xuq'or keh: Hiy taq chatah i ye'aab' Canaán je' wo' hoq i Jericó, inki.
Eh re' keh xiooj wo' hoq, eh noq xi ponik, ar xkian kipatal jinaj aq'ab' chupaam i rupaat i jinaj i k'oyoom laj ixoq Raab rub'ihnaal.
2Xa re' la' wilik i xponik q'oroq reh i kireey i aj Jericó, je' wili xuq'or reh:
Chanab'eej noq wilik taqe i winaq re' ruuk' taqe i aj Israel wilkeeb' ayu' xchalik kikoj rehtaal nik' wach noq wilik i qaye'aab', inki.
3Eh re' reey xutaq'aaj ruq'orariik reh i Raab chi je' wili:
Re' hat chawesaj taqe chaloq i winaq wilkeeb' awuuk' panapaat, ruum, re' taqe re' xakojol taqe rehtaal nik' wach noq wilik i qaye'aab', inki.
4Eh re' Raab rukeb'aam chik taqe i kiib' chi winaq je' wili i xuq'or:
Korik chi wilik taqe i winaq xi k'ulik wuuk' xa re' la' ma' weht'al taj aha' kichalik.5Noq xokik aq'ab' xiooj ruum chupaam i ora re' re' intz'ahpik i ru puertahiil i tinamit ma' weht'al taj aha' xiooj. Wila' re' taq i hat xat'ooj chikiij chi jumehq'iil reh i kisik'ariik noq i nuq'or i hin chi konee taqe nareq wach b'eeh, inki.
6Re' i Raab xujosaj taqe i kiib' chi winaq re' re' chinaah i rupaat, ar xukeb'aa' taqe chupaam i juntuhb' chi ruche'el lino k'ahchi' ruchiqsam ar.
7Eh re' taqe i winaq xutaq'aaj reje i reey xkitahqeej reje i kiib' chi winaq aj tahool chupaam i b'eeh inooj chi chii' i nim ha' Jordán xi ponik cho aha' ma' cham ta wii' i ha'. Eh noq xi elik taqe reje i aj sik'ool re' re' manlik tz'ahpik i ru puertahiil i tinamit.8Eh noq komajaa' inqajik i kiwiriik taqe i kiib' chi winaq kojol rehtaal i tinamit re' i Raab xjohtik johtoq chinaah i rupaat je' wili i xuq'or keh:
9Re' hin weht'al chi re' QaJaaw Dios xuyeew taq chik aweh i ye'aab' wili. Eh xat rutaq'aaj taq chaloq reh chi ma' k'isiin naa qayo'jiik taq awuum, eh chu'nchel taqe i patim ayu' xakimik chik keh ruum kiyo'jiik awuum taq i hat.10Ruum re' hoj xqib'iraj chi re' Dios xuchiqsaj i kaq palaw noq xat ik'ik taq cho chupaam, noq xat elik taq cho Egipto. Eh xqib'iram wo' rib'iral chi xasach taq kiwach chi jumpech i kiib' chi reey, re' i Sahón, eh re' Og re' i kiib' chi kireey taqe i aj amorreo wilkeeb' naq chi juntar i nim ha' Jordán.11Ruum taqe re', re' hoj yohb'aal wach i qayo'jiik xchalik ruum ma' jino'q qeehoj neerukuy i peleto taq awuuk', ruum re' aaWaJaaw aaDios taq i hat, re' wo' Dios wilik rajaawriik pan taxaaj, re' wo' Dios wilik rajaawriik wach ak'al.12Eh re' hin i nupahqaaj taq aweh chi cha q'or taq weh i xti korik parub'ihnaal taq i aaWaJaaw aaDios chi naa taq a'nam otob'il keh taqe i awach weh, je' rukab' noq xnub'an taq otob'il aweh i hat. Re' hin inwaaj chi nee taq inaq'or jino'q weh i q'orik rehtaliil chi naa taq a'nam i nuq'or taq aweh.13Inwaaj i hin chi ma' nee ta taq inakansaj taqe i nutuut wajaaw, taqe i was, i nuchaaq' winaq, taqe i was nuchaaq' ixoq, taqe i awach keh. Je' re' noq chako'leej taq riij i qak'achariik chi qunchelaal, inki Raab.
14Re' taqe i kiib' chi winaq je' wili i chaq'wik xkian:
I ruk'ul chi re' i Dios nee qoh rukansaj wila' ma' xqako'leej riij taq ak'achariik, xa re' la' ma' awach ta aj eh neenaq'or. Eh noq re' i QaJaaw Dios ruye'em chik qeh i ye'aab' wili, eh naa qaketelaam taq awach, inki taqe.
15Eh re' i rupaat i Raab chinaah i tz'aq kotimaj wii' riij i tinamit korjinaq, xa chupaam jinaj i ventana taqe xresaj chaloq, eh ruuk' jinaj i laso xuqasaj taqe qohoq pant'uylik chi juntar i tz'aq'.16Eh je' wili i xuq'or reje keh:
Chupaam i rax chee' taq chak'am reje reh chi ma' nee ta taq ti kireq i k'ahchi' kisik' wiik taq aweh. Chakeb'aa' pee taq awiib' ar ixib'-oq q'iij, korehtaal kisutinik chee keh pan tinamit, chi riij i re' nee taq tiooj chawach i hat ruuk' ab'eeh, inki.
17Re' taqe i kiib' chi winaq, je' wili xkiq'or:
Re' hoj naa qa'nam i xqaq'or xti korik chi riij re' xapahqaaj qeh.18Xa re' la' noq naaqokiik chupaam i tinamit wili re' hat naa arapaam cho pan ventana i kaq laso wili re' i xoj aqasaj wii'. Eh neenamol kiwach panapaat atuut awajaaw, taqe aawas achaaq' winaq, aawas achaaq' ixoq, chu'nchel i awach reh aawajaaw.19Eh wila' awach jino'q keh i re' nee kielik cho chi riij apaat, xa re' reh neerusik' rukimiik chi rib'il riib', ma' re' ta qamahk i hoj. Eh wila' awach kaansanik jino'q reh i naa kiwihiik panapaat wach qanaah i hoj neenkahnik i rukimiik.20Eh wila' re' hat xak'utjaaj chi xoj wihik awuuk' ma' ruman ta chik chi neenqa'an aha' wilik i xqaq'or i xti korik chi riij chi naa qa'nam, re' i xqaq'or aweh, inki taqe.
21Ma' xta reet je' re' i naaqa'nam, inki noq chaq'wik i Raab.
Eh xuch'aq taqe reje i kiib' chi winaq re' re', re' keh xiooj, chi riij i re', re' i Raab xurapaa' wo' hoq i kaq laso chuwach i ventana.
22Eh re' taqe i kiib' chi tahal ye'aab' xiooj pantaq rax chee', ar xkikeb'aa' kiib' chuwach ixib' q'iij. Eh re' taqe i aj sik'ool xa kitukik chik chi kisik'ariik, xama' xkireq ta wo' hoq xkilow chi je' re' xi sutinik wo' chik reje pan tinamit Jericó.23Eh re' taqe i xi ponik tahal i ye'aab' xiqajik cho paraxchee', xi q'ahxik wo' chik chaloq chi juntar i nim ha' Jordán xi k'ulik wo' chik iloq aha' wilik wii' i Josué, eh kik'utjaaj reh i Josué chu'nchel i xponik kik'ul.24Je' wili i xkiq'or reh i Josué: Re' i QaJaaw Dios xuq'asaj chik panqaq'ab' chu'nchel i ye'aab' xponik qilow, ruum chu'nchel i patim ar xchalik kikimiik ruum kiyo'jiik noq xkib'iraj chi wilkooj ar i hoj, inki taqe. Re' taqe i aj Israel xkiq'at reje wach i nim ha' Jordán
1Eh kowahq'eq chi junwaar xelik reje chupaam i ye'aab' Sitim i Josué ruch'ihil chu'nchel i aj Israel, xi ponik chi chii' i nim ha' Jordán. Ko xi okik chi hi'lik ar ma' xkiqat ta pee reje wach i nim ha'.2Eh noq xik'ik ixib' q'iij, re' taqe k'amal kib'eeh xponik kib'ehuj paam i wilkeeb' wii' chi hi'lik.3Eh je' wili i xkiq'or keh i aj Israel: Noq nee taq inawilow chi neenik'ik i loq'laj kaxa molooj wii' i ruk'uhb'aal i QaJaaw chi kik'amam taqe i k'amal kib'eeh aj tiij re' taqe i aj Levíta. Re' taq i hat jumehq'iil taq nee ti elik chaloq panaye'aab' nee taq i nataqeej reje.4Chi je' re' nee taq i nanaab'eej aha' taq nee nak'am reje, ruum re' taq i hat ma' jank'al ta taq ti ik'ik chupaam i b'eeh re' re'. Xa re' la' maajil taq i koq awiib' ruuk' i loq'laj kaxa, jinaj miil b'ara chi riij naa taq ab'ehiik reje, inki.
5Eh re' i Josué je' wili i xuq'or keh i tinamit cha santoheej taq awiib' ruum re' i QaJaaw Dios i iqal i rub'an chaloq taqe i nimaq kiwach ma' ilooj taj, inki.6Eh je' wili i xuq'or keh i k'amal b'eeh aj tiij: Re' taq i hat chak'am taq reje i loq'laj kaxa molik wii' i ruk'uhb'aal i QaJaaw Dios, inki.
Re' keh xkik'am wo' reje i loq'laj kaxa molik wii' i k'uhb'aal, xiooj chi peet b'eeh chikiwach i tinamit.7Re' QaJaaw Dios je' wili i xuq'or reh i Josué: Chupaam i q'iij wili naa rutohq'iik nuye'em awajaawriik chikiwach taqe i aj Israel. Chi je' re' naa kikojom rehtaal i keh chi re' hin wilkiin awuuk' cha toob'jiik, je' rukab' noq xinwihik ruuk' i Moisés.8Eh re' hat cha q'or keh i k'amal kib'eeh i aj tiij chi neenkik'am reje i loq'laj kaxa molik wii' i k'uhb'aal. Eh noq nee kiponik chi chii' i nim ha' Jordán neekiokik i koq k'isinoq panha', ar neekipahik, inki.
9Eh noq xrib'iraj chi je' re' Josué je' wili i xuq'or keh i aj Israel: Kim taq ayu' chab'iraj taq i ruq'or aaWaJaaw aaDios.10Re' i wili naa taq akojom wii' rehtaal chi re' k'achlik Dios wilik taq panaxilak, re' i naa rutehem taq ab'eeh, eh naa resam taq panab'eeh taqe i aj cananeo, i aj heteo, i aj heveo, i aj ferezeo, i aj gergeseo, i aj amorreo, i aj jebuseo.11Re' i loq'laj kaxa molik wii' i ruk'uhb'aal i QaJaaw Dios ehchan reh chu'nchel i wach ak'al naa rojiik chi peet b'eeh taq chawach noq naa taq aq'atam wach i nim ha' Jordán.12Ruum aj re' yu'naak cha sik' taq kiwach kab'laj-oq chi winaq ju'jun taq i naa asik'im kiwach chupaam i ju'jun ch'uq chi aj Israel.13Eh noq re' taqe i k'amal kib'eeh aj tiij kik'amwik reh i loq'laj kaxa molik wii' i ruk'uhb'aal i QaJaaw Dios, eh cha a'n reh chu'nchel i wach ak'al neentohq'ik kikojom i koq i kooq chupaam i nim ha' Jordán, re' i ha' kiib' nee nelik re' inchalik taxaaj naa rumolom riib' pantaq rucheel ma' naa ta chik rub'eeh rooq'.
14Eh chu'nchel i aj Israel xi elik chupaam i ki-itz'ihy naah paat wilkeeb' wii' xkiq'at reje wach i nim ha' Jordán. Eh re' taqe i k'amal b'eeh aj tiij xik'am wik reh i loq'laj kaxa xk'amwik reje kib'eeh.15Re' i nim ha' Jordán kow i b'ehik i rub'an i rooq' ruum paruq'ijil i rumolariik i wach taqe tik mu'uun i nelik taqe chi chii'. Ruum aj re' noq xi okik i koq chi chii' i nim ha' taqe i k'amal kib'eeh aj tiij kik'amwik reh i loq'laj kaxa xponik nah kich'ehk i xtz'aqik.16Eh re' rooq ha' inchalik taxaaj xpa'lojik xumol riib' xponik ma' najt ta ruuk' i tinamit Adam wilik chu'nchel i ye'aab' Saretán. Eh ma' xooj ta chik qohoq i rooq' i ha' re' re' chupaam i kamnaq palaw, je' re' noq xuch'aq riib' i ha' noq xpa'lojik. Eh re' taqe i aj Israel xi q'ahxik reje chi juntar i nim ha' chi korkiil i tinamit Jericó.17Eh chu'nchel i tinamit Israel panchiqiij ki-ik'ik noq xkiq'at wach i nim ha' Jordán. Eh re' taqe i k'amal kib'eeh aj tiij xi k'amwik reh i loq'laj kaxa wilik wii' i ruk'uhb'aal i QaJaaw Dios panchiqiij pa'alkeeb' panyejaal i nim ha Jordán. Re' q'orik chi riij i kab'laj chi ab'aj xsik'arik wach chupaam i nim ha' Jordán
1Eh noq ik'inaq chik taqe reje i aj Israel chi juntar i nim ha' Jordán, re' i QaJaaw Dios je' wili i xuq'or reh i Josué:2Re' hat cha sik' kiwach kab'laj-oq i winaq ju'jun i naa asik'im wach chi kixilak i ju'jun ch'uq chi aj Israel.3Eh cha q'or keh chi kesaj ju'jun kab'aaj panyejaal i nim ha' Jordán, re' pa'alkeeb' wii' i k'amal kib'eeh aj tiij reh chi neenkik'am reje neen kiyeew chupaam i ye'aab' naa taq akahniik wii' chupaam aq'ab' yu'naak, inki.
4Chi riij i re', re' i Josué xuyuq'eej ruuk' taqe i kab'laj chi winaq xusik' kiwach chi kixilak i ju'jun ch'uq chi aj Israel.5Eh je' wili xuq'or keh: Okeen taq i koq panyejaal i nim ha' Jordán chuwach i loq'laj kaxa molik wii' i ruk'uhb'aal taq aaWaJaaw aaDios cha ju'junaal taq chawesaj cho ju'jun-oq ab'aj nee taq i nayeew cho nah atileb'. Eh kab'laj chi ab'aj taq i neenawesaj chaloq ju'jun keh i ju'jun ch'uq chi aj Israel.6Re' taqe ab'aj re' re' naa rukahniik chi rehtalil chib'ih i xub'an i QaJaaw Dios. Eh noq naa taq kipahqaam aweh awak'uun awixq'uun chi je' wili: ¿Chib'ih reet noq wilkeeb' ayu' ab'aj wili? inko'q taqe.7Re' taq i hat je' wili kichaq'weesjiik taq naa a'nam: Re' taqe ab'aj wili rehtaliil chi xchiqik i nim ha' Jordán xuch'aq riib' noq xk'ik'saj juntar ha' i loq'laj kaxa molik wii' i ruk'uhb'aal i QaJaaw Dios. Re' wo' taqe ab'aj wili naa rukamaniik chi rehtalil reh chi naa ruk'uliik pankik'ux chi juneliik i aj Israel chib'ih i xub'an i Dios ayu', inki.
8Eh re' taqe i kab'laj chi winaq xkian wo' hoq i xq'orarik keh ruum i Josué, xkesaj wo' chaloq ju'jun kab'aaj panyejaal i nim ha' Jordán kab'laj chi ab'aj i xkesaj ju'jun keh i ju'jun ch'uq chi aj Israel. Eh xkik'am reje ko aha' xkiyejaa' wii' ki-itz'ihy naah paat, ar xkimol wach je' wo' rukab' i xuq'or i QaJaaw Dios reh i Josué.9Eh re' i Josué reh xumol wo' wach i kab'laj chi ab'aj panyejaal i nim ha' Jordán re' i xipahik wii' i k'amal kib'eeh aj tiij kik'amwik reh i loq'laj kaxa molik wii' i ruk'uhb'aal i QaJaaw Dios. Eh re' taqe i kab'laj chi ab'aj re' re' ar xkahnik chi jumpech.
10Eh re' taqe i k'amal kib'eeh aj tiij kik'amwik reh i loq'laj kaxa xi kahnik paa' panyejaal i nim ha' Jordán, noq re' taqe i aj Israel xkian chu'nchel i xuq'or i Dios re' i xq'orarik keh ruum i Josué. Eh nik' wach i ruq'orom chee i Moisés reh i Josué, je' wo' re' rub'aan xkian chu'nchel. Eh re' taqe i aj Israel ki-ik'ik chi jumehq'iil chi juntar i nim ha' Jordán.11Eh noq ki-ik'ik chi juntar i nim ha' chu'nchel i tinamit ki-ik'ik wo' reje chi juntar i nim ha', chi peet b'eeh taqe i k'amal kib'eeh aj tiij i kik'amwik reh i loq'laj kaxa molik wii' i ruk'uhb'aal i QaJaaw.12Eh re' taqe i junch'uq chi riih rumaam Rubén, re' i junch'uq chi riih rumaam i Gad, re' i yejaal i ch'uq chi riih rumaam Manasés kichopom kitz'a'amb'aal noq xik'ik chi peet b'eeh chikiwach i aj Israel, je' rukab' i q'orooj cho keh ruum i Moisés.13Eh je' naak'isiin ma' ka'winaq miil i kichopom kitz'a'amb'aal i kiyejaam kiib' chi q'aq'inik xiooj wach k'ixkaab' Jericó chuwach i QaJaaw Dios.14Chupaam i q'iij re' re' xye'arik runimaal wach i Josué ruum i QaJaaw Dios, reh chi re' taqe i aj Israel kiyohleej wach i Josué chupaam chu'nchel i ruk'achariik, je' wo' rukab' noq xkiyohleej wach i Moisés noq xub'an.
15Eh re' i QaJaaw Dios je' wili i xuq'or reh i Josué:16Re' hat cha q'or keh i k'amal kib'eeh i aj tiij kik'amwik reh i loq'laj kaxa molik wii' i ruk'uhb'aal i QaJaaw Dios chi kieloq cho chupaam i nim ha' Jordán, inki.
17Eh re' i Josué xuq'or wo' keh chi xi elik cho ar.18Eh noq xi elik cho chupaam i nim ha' Jordán, taqe i k'amal kib'eeh aj tiij re' noq xi elik cho chi chiq yuuq xuk'ul wo' chik lom riib' i nim ha' xutoq'aa' wo' chik elik chi taq chii' je' rukab' i pampeet.
19Re' taqe i aj Israel xi elik reje chi chii' i nim ha' Jordán chupaam i lajeeb' rub'eeh i peet poh reh i haab'. Eh ar xooj kiyejaa' i ki-itz'ihy naah paat Gilgal wilik reje chi korkiil i reelb'aal q'iij reh i Jericó.20Eh re' i Josué ar xumol kiwach taqe i kab'laj chi ab'aj xkesaj chaloq chupaam i nim ha' Jordán.21Eh je' wili i xuq'or keh i aj Israel noq naa kipahqaam taq aweh awak'uun awixq'uun na' chub'an chi je' wili: ¿Chib'ih reet noq wilkeeb' taqe ayu' ab'aj wili? inko'q taqe.22Eh re' taq i hat je' wili kichaq'weesjiik taq naa a'nam: Re' taqe ab'aj wili rehtalil chi panchiqiij xoj ik'ik noq xqaq'at wach i nim ha' Jordán, tiko'q taq.23Ruum re' i QaJaaw Dios korik wo' hoq chi xuchiqsaj i nim ha' Jordán noq xoj ik'ik ar je' rukab' noq xuchiqsaj i kaq palaw noq xoj ik'ik cho chupaam i hoj najtir.24Chi je' re' chu'nchel i tinamit wach ak'al naakinab'iniik reh chi re' QaJaaw qaDios i hoj xiik' nah i runimaal i rajaawriik. Eh reh wo' hoq chi nee taq inayohleej wach i hat chi juneliik, inki. Re' i ki-itz'ihy naah paat xkiyejaa' ar Gilgal
1Chu'nchel i kireey i aj amorreo wilkeeb' parookb'aal q'iij reh i nim ha' Jordán, je' wo' chu'nchel i reey wilkeeb' ma' naj ta chi chii' i palaw Mediterráneo, noq xkib'iraj chi re' i QaJaaw Dios xuchiqsaj i nim ha' Jordán noq ki-ik'ik chupaam i aj Israel, ma' k'isiin ta xchalik kiyo'jiik, eh ma' xkichop ta kik'ux chi kik'ulb'ejiik i aj Israel.
2Eh chupaam i q'iij re' re', re' i QaJaaw Dios je' wili i xuq'or reh i Josué: Re' hat cha yejaa' taqe i kuchilo ab'aj neenaq'asb'isaj, ruuk' i re' nee wo' chik inayok' i rutz'uhmal naah i kik'achab' awuch aj Israel, inki.
3Eh re' i Josué xuyejaa' wo' taqe i kuchilo ab'aj ruuk' i re' xuyok' i rutz'uhmal naah i kik'achab' chu'nchel i winaq aj Israel chinaah i yuuq' Aralot.4Xiyok' i rutz'uhmal naah i kik'achab' ruum re' taqe i winaq b'anooj keh i re' manlik i kihab'ul reh ojik pankuartel noq xi elik cho Egipto kamnaq chik taqe cho wach b'eeh chupaam i ye'aab' chiq yuuq'.5Eh chu'nchel i winaq aj Israel xi elik cho Egipto yok'ooj chaloq i rutz'uhmal i naah i kik'achab', eh re' taqe i winaq xi-aasjik cho wach b'eeh noq xib'ehik cho chupaam i ye'aab' chiq yuuq' ma' yok'ooj ta naq i rutz'uhmal naah i kik'achab'.6Re' taqe i aj Israel ka'winaq haab' xib'ehik chaloq chupaam i ye'aab' chiq yuuq', kamnaq chik taqe chu'nchel i winaq manlik i kihab'ul reh ojik pankuartel noq xi elik cho Egipto. Re' keh ma' xkinimaj taj i QaJaaw Dios, ruum aj re' xq'orarik keh i xti korik ruum i QaJaaw chi ma' naa ta kiponiik chupaam i ye'aab' xq'orarik cho keh i kimaam kati't chi naa ruye'ariik keh. Re' i ye'aab' i nelik wii' chu'nchel i suq atoob'.7Ruum aj re', re' Josué xuyok' i rutz'uhmal naah i kik'achab' i kak'uun taqe i winaq re' re', re' taqe i xikanab'jik ruum i QaJaaw Dios chi kijilow i keh. Re' taqe i re' ma' yok'ooj ta naq i rutz'uhmal i naah i kik'achab', ruum b'ehik naq inki a'n chaloq'.8Eh noq yok'ooj chik i rutz'uhmal naah i kik'achab' chi kunchelaal xi kahnik chi hi'lik chupaam i ki-itz'ihy naah paat korehtaal chik xik'achjik.9Eh re' QaJaaw Dios je' wili i xuq'or reh i Josué: Yu'naak ruum chi xb'aan keh i re' chu'nchel i winaq xwesaj taq ak'ixb'ilaal xkiyeew taq cha naah i aj Egipto, inki. Ruum aj re', re' i ye'aab' re' re' Gilgal i b'ih xokik, je' re' i rub'ihnaal xkahnik chi jumpech.
10Re' taqe i aj Israel xkiyejaa' i ki-itz'ihy naah paat ar Gilgal wahq'eq xi okik ar chupaam i kajlaj rub'eeh i poh, eh xkininq'ijeej i elik chaloq Egipto ar wach k'ixkaab' Jericó.11Eh chupaam i q'iij re' re' xkik'ux i kaxlanwi'k ma' kojooj ta ch'amb'esb'al reh, je' wo' hoq i k'ilimaj wach trigo. Eh chi junwaar chik re' chik xkik'ux i wach i tik i nelik ar Canaán.12Eh chupaam i q'iij re' re' xkikanaa' ruk'uxariik chi jumpech i maná taqe i aj Israel re' chik i tik i nelik ar Canaán i kik'uxlaaj wii' kiib' chuwach i haab' re' re'. Re' Josué, eh re' k'amal b'eeh ru soldado i Dios
13Eh noq re' Josué ma' najt ta wilik ruuk' i Jericó xrilow chi jinaj i winaq pa'lik ar ruchopom ruq'aslaj ch'ihch'. Eh re' Josué xujil i koq riib' ruuk' xupahqaaj reh chi je' wili:
¿Mi chi xilak i qa soldado i hoj wilkaat i hat, oon chi kixilak i ki soldado i ki-ixowanik qawach? inki.
14Re' winaq je' wili i chaq'wik xub'an: Ni xata hin taq aweh i hat, ni xata hin keh i ki-ixowanik taq awach, re' hin, hin k'amal kib'eeh i ru soldado i QaJaaw Dios, inki.
Eh re' i Josué xupach'aa' qohoq riib' korehtaal xureq wach ak'al ruuk' i yejal wach, xupahqaaj reh chi je' wili.
Re' hin, hin awaj kamanoom. ¿Chib'ih nawaaj chi nee nub'an? inki.
15Re' i k'amal kib'eeh i ru soldado i QaJaaw Dios je' wili xuq'or reh Josué:
Re' hat chawesaj axijab' cha wooq ruum re' i ye'aab' pa'alkaat wii' santo laj ye'aab', inki.
Eh re' Josué xub'an wo' hoq i xq'orarik reh. Re' i ruyejeb'jiik wach i ruchopariik naah i tinamit Jericó
1Eh xkitz'ap chi korik taqe i ookb'al reh i tinamiit Jericó, ruum i kiyo'jiik chikiwach i aj Israel, xama' awach ta naq chik i nelik inokik i koq ar.2Eh re' i QaJaaw Dios je' wili i xuq'or reh i Josué: Re' hin xnuq'asaj chik panaq'ab' i tinamit Jericó ruch'ihil i kireey je' wo' taqe i ki soldado.3Je' re' noq re' taq i hat ki soldado i aj Israel naa taq akotem riij i tinamit, ju'jun riim chuwach i q'iij, eh je' re' taq naa a'nam chuwach i waqiib' q'iij.4Eh wuquub' i k'amal kib'eeh aj tiij naa kik'amam ju'jun chi ruk'aa' imas tentzun, naa kojiik chi peet b'eeh chuwach i loq'laj kaxa molik wii' i k'uhb'aal. Eh paru wuuq' q'iij wuquub' pech taq naa akotem riij i Jericó, re' taqe i k'amal kib'eeh aj tiij naakixulem paam taqe i uk'aa' re' re'.5Eh noq naa taq ab'iram i hat chi kow naakixulem paam i ruk'aa' imas tentzun naa taq ak'erem aachii' chi q'orariik chi je' wili: Re' koraal tz'aq kotimaj wii' riij i tinamit naa ruch'a'lojiik wach ak'al, tiko'q taq. Eh re' taq i hat jumehq'iil taq nee ti okik i koq chi peleto kuuk' i tinamit re' re', inki.
6Eh re' i Josué xuyuq'eej taqe i k'amal kib'eeh aj tiij, je' wili i xuq'or keh: Chak'am taq reje i loq'laj kaxa molik wii' i ruk'uhb'aal i QaJaaw. Eh wuquub' taq aweh i nee kiooj chi peet chuwach i loq'laj kaxa, eh neenkik'am ju'jun kuiruk'aa' imas tentzun.7Eh je' wilik i xuq'or keh i tinamit: Hiy taq chakotej riij i tinamit Jericó. Eh re' taqe i soldado wilik kiq'aslaj ch'ihch' naa kojiik chi peet b'eeh chuwach i loq'laj kaxa molik wii' i ruk'uhb'aal i QaJaaw, inki.
8Chu'nchel i xq'orarik keh ruum i Josué xkian wo' hoq. Re' taqe i wuquub' chi k'amal kib'eeh aj tiij xiooj wo' chi peet b'eeh chuwach i loq'laj kaxa molik wii' i ruk'uhb'aal i QaJaaw, eh chi kiju'junaal k'ahchi' reje kixulem paam i ruk'aa' imas tentzun. Eh re' i loq'laj kaxa xam reje chikiij.9Re' taqe i soldado peet b'eeh taqe reje chikiwach i k'amal kib'eeh aj tiij. Eh wilik wo' taqe i soldado xam taqe reje chi riij i loq'laj kaxa. Re' taqe i k'amal kib'eeh aj tiij xama' inkikanaa' ta chik ruxuljiik i ruk'aa' imas tentzun.10Re' Josué je' wili i xuq'or keh i soldado: Re' taq i hat naa taq ab'eeh reje chi ma' xta taq choqik naa a'nam, konaa taq nuq'orom aweh kora'j taq neenak'er aachii' chi kow re', inki. Re' noq xchoparik naah i tinamit Jericó
11Re' Josué xuq'or keh chi re' loq'laj kaxa naa rojiik rukotem riij i tinamit Jericó, chi riij i re' xi sutinik wo' chik cho chupaam i ki-itz'ihy naah paat, eh ar xkik'saj aq'ab'.12Eh chi junwaar chik kowahq'eq xwuktik i Josué, eh re' taqe i k'amal kib'eeh aj tiij xkik'am wo' chik reje i loq'laj kaxa molik wii' i ruk'uhb'aal i QaJaaw Dios.13Eh re' i wuquub' chi k'amal kib'eeh aj tiij xiooj chi peet b'eeh chuwach i loq'laj kaxa molik wii' i ruk'uhb'aal i QaJaaw, b'ehik, inki a'n reje eh xama' inkikanaa' ta chik i ruxuljiik i ruk'aa' imas tentzun. Re' taqe i soldado peet b'eeh reje chikiwach, eh wilik wo' taqe i xam reje chi riij i loq'laj kaxa. Eh re' taqe i k'amal kib'eeh aj tiij xama' inkimay ta chik ruxuljiik paam i ruk'aa' tentzun.14Eh panrukab' q'iij xooj wo' chik kikotej riij i tinamit Jericó, chi riij i re' xi sutinik wo' chik chaloq chupaam i ki-itz'ihy naah paat. Eh waqiib' q'iij xkian chi ju'junriim xkikotej riij.
15Eh chupaam i ruwuuq q'iij kowahq'eq xi wuktik xooj wo' chik kikotej riij i tinamit Jericó, je' wo' rukab' i kian pampeet, xa re' la' wuqpech chik xkikotej riij chupaam i q'iij re' re'.16Eh noq re' taqe i k'amal kib'eeh aj tiij xkixulej i paruwuuq pech i ruk'aa' imas tentzun, re' Josué, je' wili xuq'or keh i soldado: Chak'er taq aachii' chi kow, ruum re' i QaJaaw Dios xuqasaj taq chik panaq'ab' i tinamit Jericó.17Re' tinamit re' re' naa rusahchiik wach, je' wo' chu'nchel i wilkeeb' chupaam, je' rukab' i ruq'orom i QaJaaw Dios. Xa re' wo' hoq Raab i k'oyoom laj ixoq naa rukohliik riij i ruk'achariik ruch'ihil taqe i kikeb'aam kiib' parupaat, ruum xukeb'aa' taqe i kiib' chi winaq xqataq'aaj taqe reje chi tahool.18Re' taq i hat chawik'raaj taq awiib' ma' jino'q i chib'ih jariik wilik chupaam i tinamit re' re' naa taq achopom. Ruum re' i QaJaaw Dios ruq'orom chik chi naa rusacham wach, je' wo' chu'nchel i wilkeeb' chupaam, ruum wila' chih taq i xachop neenchalik i ti' k'axik taq cha naah chupaam taq aapaat itz'ihy naah.19Eh re' taqe i xa chib'ih jariik korjinaq ruuk' oro, ruuk' plata, ch'ihch' neerub'an chi nee taq inamol, ruum re' re' naa ruq'ahxiik reh i QaJaaw naa rumolariik chupaam i molarik wii' i chib'ih inkamanik reh i QaJaaw, inki.
20Eh noq re' taqe i k'amal kib'eeh aj tiij kow xkixulej taqe i ruk'aa' imas tentzun, chu'nchel i aj Israel xkik'er kichii' chi kow. Eh re' tz'aq kotimaj wii' riij i tinamit Jericó xanoq wo' ch'alojik wach ak'al, eh re' taqe i aj Israel jumehq'iil xi okik i koq chupaam i tinamit re' re', eh xkichop naah.21Eh xkikansaj ruuk' q'aslaj ch'ihch' chu'nchel i tinamit chi winaq chi ixoq chi nimaq chi kok' taq. Eh re' taqe i b'ooyax, taqe i tentzuun, taqe i b'uurux, xkuxik kisacham wach.
22Eh re' Josué je' wili i xuq'or keh i kiib' chi winaq i xi ponik tah woq reh i ye'aab': Re' taq i hat hiy taq parupaat i Raab i k'oyoom laj ixoq chawesaj taq cho ar i reh, je' wo' chu'nchel i awach reh wilkeeb' ruuk', je' rukab' aq'orom taq reh, inki.23Eh re' taqe i kiib' chi winaq xiooj wo' parupaat i Raab xkesaj chee reh ruch'ihil irutuuti rajaaw, ruch'ihil taqe i ras ruchaaq', taqe chu'nchel i awach reh. Eh ar xkik'am reje kochiriij i wilik wii' i ki-itz'ihy naah paat i aj Israel.24Eh re' taqe i aj Israel xkikoj ruq'aq'al i tinamit Jericó xk'ahtik, eh xkuxik ruk'ahtiik chu'nchel i wilkeeb' chupaam. Eh xa re' wo' xkesaj i xa chib'ih jariik korjinaq ruuk' oro, ruuk' plata, ruuk' q'an ch'ihch', ruuk' rax ch'ihch', ar xkimol chupaam i ye'aab' reh i chib'ih inkamanik reh i QaJaaw.25Eh re' Josué xuko'leej riij i ruk'achariik i Raab, ruch'ihil awach reh parupaat, ruum re' reh xukeb'aa' i kiib' chi winaq xutaq'aaj reje chutahariik i tinamit Jericó, eh chupaam taqe q'iij re' re', re' taqe i riih rumaam Raab xi okik cho chi k'achariik chi kixilak i aj Israel.
26Eh chupaam i q'iij re' re', re' Josué xuq'or i xti korik je' wili i xuq'or: Neeta naq inye'arik panti' k'axik ruum i QaJaaw Dios i awach i neraaj ruyejaam ruka'peech i tinamit wili. Eh nee ta naq inkimik i peet rak'uun awach i nee raaj rukojom i tz'aq reh i riij i tinamit wili. Eh nee ta naq inkimik i chaaq'b'ees neraaj ruyejaam taqe i ookb'al, inki.
27Eh re' i Josué xtoob'jik ruum i QaJaaw Dios, eh re' taqe i xuq'or i Josué xelik rib'iral chupaam chu'nchel i ye'aab' re' re'. Re' mahk xub'an i Acán
1Jinaj i winaq aj Judío Acán rub'ihnaal rak'uun i Carmi riih i Zabdi, xikin riih Zera, wili taqe i xa chib'ih jariik xuchop, re' ruuk' i ruq'orom i Dios chi naa rusahchiik kiwach. Ruum chi xuchop taqe re' chi kunchelaal i aj Israel xkahnik wach kinaah i mahk re' re' ruum i QaJaaw Dios, eh ma' k'isiin ta xchalik i rujosq'iil chikinaah.
2Eh koq'uun chik re' Josué noq wilkeeb' ar Jericó wilik taqe i winaq xutaq'aaj reje pan tinamit Hai, re' wilik parelb'aal q'iij reh i Bet-el, ma' najt ta ruuk' i Bet-avén, je' wili i xuq'or reje keh: Hiy taq chatah i tinamit Hai, inki, re' taqe i winaq re' re' xooj wo' kitaah i tinamit.3Eh noq xi sutinik chaloq je' wili i xkiq'or reh i Josué: Ma' koruman taj chi chu'nchel i qatinamiit Israel nee kiooj Hai kiib' oon ixib' miil chi winaq manlik nee kiooj chi peleto ar, eh neen kichop naah i tinamit re' re'. Ruum re' kicha'jinik reh i tinamit re' re' xa, ma' k'ih ta taqe, inki taqe.
4Eh xa ixib' miil chi winaq i xijohtik chub'anariik reh i tinamit Hai. Xa re' la' re' taqe i aj Hai wilik i aj Israel xkian reh, eh wilik i xkajimaj chaloq.5Eh re' taqe i aj Hai waqlaj ru ka'winaq i xkikansaj chi kixilak i aj Israel. Eh re' taqe i ruk'ihaal xkajimaj chaloq pan tinamit, xi k'ulik kanab'joq panqajik inehteesjik wii' ab'aj. Eh ruum i xb'aan keh re' re' chu'nchel i aj Israel xub'an kiib' kik'ux, xchalik kiyo'jiik.
6Re' Josué, ruch'ihil taqe i k'amal kib'eeh i aj Israel xkiweq i kiso' xkipukej i pooq wach kinaah ruum ruti'kiil kik'ux. Eh kipach'aa' qohoq kiib' korehtaal xkireq wach ak'al ruuk' i yejal kiwach chuwach i koq i loq'laj kaxa molik wii' i ruk'uhb'aal i QaJaaw Dios, korehtaal chik xokik i q'iij.7Re' Josué je' wili i xuq'or:
QaJaaw Dios xti ti' wo' chik ¿Chib'ih reet noq xawik'saj taqe chaloq juntar i nim ha' Jordán taqe i aj Israel? ¿Mi xa re' nawaaj re' chi naakooj aq'asam pan kiq'ab' taqe i aj amorreo reh chi naa kisacham qawach? Ma' xta naq reet chi xoj kahnik ta cho chi juntar i nim ha' Jordán.8QaJaaw Dios ¿Chib'ih i ruk'ul chi nee nuq'or yu'naak? ruum re' taqe i aj Israel xkimol cho chi elik chikiwach i aj ixowaal.9Eh re' taqe i aj cananeo, je' wo' taqe i patim chupaam i ye'aab' re' re' noq neenkib'iraj chib'ih i xk'ularik neenchalik kisach qawach pankomonil. Eh ¿Chib'ih i neen q'orarik chi riij i runimaal wach ab'ihnaal? inki.
10Eh re' i QaJaaw Dios je' wili i ruchaq'weesjiik xub'an:
Josué wukteen johtoq, Chib'ih jariik i napachib'ej ar wach ak'al.11Re' taqe i awuch aj Israel ximahkunik chi nuwach ma' xkinimaj taj i k'uhb'aal xnuyejaa' wach kuuk', wilik i chib'ih jariik xkik'am chaloq re' naq ruuk' i naa rusachariik kiwach. Eh xkelq'aaj, xanaah re' keht'al wo' naq chi ma' toob' ta xkikeb'aa' chi xilak i chib'ih keh.12Ruum aj re', re' taqe i aj Israel re' re' ma' nee ta inkikuy ruk'ulb'eejiik taqe i aj ixowaal. Naa la' kimolom chi elik chikiwach, ruum aj re', re' taqe i aj Israel i ruk'ul chi naa rusachariik kiwach yu'naak. Eh wila' ma' xasach taq wach i hat i nuq'orom i hin chi naa rusahchiik kiwach, re' hin ma' naa ta chik nuwihiik taq awuuk'.13Re' hat Josué cha q'or keh i tinamit chi kisaqb'isaj kiib' reh chi nee kichalik chi nuwach iqal. Re' hin i hin taq aaWaJaaw aaDios je' wili nuq'or: Re' taq i hat aj Israel xawelq'aaj taq chaloq i naa naq rusachariik kiwach. Wila' ma' xasach taq wach, wila' ma' xawesaj taq reje chaxilak ma' jaruuj taq chik naa akuyum i peleto kuuk' i ki-ixowanik taq awach, kinki.14Eh re' taq i hat wahq'eq i iqal ti chaloq taq chi nuwach chi ch'uhqaal taq aatinamiit, aha' wilik ch'uq i naa nuq'orom i hin chi naa ruchaliik chi nuwach naa wo' ruchaliik, ruch'ihil taqe awach reh parupaat. Eh aha' wilik junch'uq chi patineel naa nuq'orom i hin chi naakichaliik, naa wo' kichaliik chi nuwach jarub' chi winaq wilkeeb' panupaat.15Eh awach aj uuk' neenkan i naa naq rusahchiik kiwach inchol chi naa ruk'ahtiik i reh, je' wo' chu'nchel i awach reh, chu'nchel i chib'ih reh. Ruum xub'an i yiib' wach na'ojb'al ma' ruk'ul ta chi b'anarik chi kixilak i aj Israel ma' xunimaj taj i nuyejaam wach i hin, inki i Dios.
16Re' Josué kowahq'eq xwuktik chi junwaar, eh xuq'or keh i aj Israel chi naa kichaliik chi kich'uhqaal, xumol kiwach i aj Israel. Eh re' i ruch'uhqaal i riih rumaam Judá xk'uhtjik reh i Josué, ruum i Dios.17Re' Josué xuq'or chi naakichaliik i junch'uq chi riih rumaam Judá, eh chi kixilak i re' xk'uhtjik taqe riih rumaam i Zera, eh chi riij i re' xik'ik taqe awach reh parupaat i Zera. Eh chi kixilak taqe i xk'uhtjik i riih rumaam Zabdi.18Eh noq xiooj k'oloq chi kiju'junaal taqe i winaq i riih rumaam i Zabdi. Eh chi kixilak taqe re' xureq i QaJaaw Dios chi re' Acán wilik ru mahk. Re' Acán re' re' rak'uun i Carmi, riih i Zabdi, xikin riih rumaam Zera. Re' taqe re', re' ruuk' taqe i riih rumaam Judá.
19Eh noq xrib'iraj chi je' re' i Josué je' wili i xuq'or reh i Acán:
Wila' re' hat inawaaj aye'em runimaal wach, inawaaj aye'em ruloq'il i QaJaaw Dios cha q'or weh chib'ih jariik i xa a'n ma' keb'aa' chi nuwach, inki.
20Re' Acán je' wili i chaq'wik xub'an:
Re' hin i nuq'or i korik chi ximahkunik chuwach i qaDios i hoj, hoj aj Israel, re' taqe i wili i xnub'an:21Noq xoj okik Jericó chi kixilak taqe i chib'ih jariik xwilow wach jinaj i holohik itz'ihy inchalik Babilonia, xwilow wach i kiib' siento chi tumiin plata, xwilow wach i junrahp chi oro ik'inaq naa jinaj libra rahliil, eh xnuk'am taqe chi weh. Eh xnuk'ot jinaj i jul panyejaal i nu itz'ihy naah paat, ar taqe xnumuq'aa', eh chi ri'sil taqe re' xnuyeew i tumiin.
22Eh noq xrib'iraj chi je' re' i Josué wilik taqe i winaq xutaq'aaj chupaam i ru-itz'ihy naah paat i Acán. Eh ar wo' xponik kireq chu'nchel i rukeb'aam i Acán, chi ri'sil wo' xkireq i tumiin.23Eh xkik'am reje chuwach i Josué, eh chikiwach chu'nchel i aj Israel. Eh kiq'asaj chuwach i QaJaaw Dios.24Eh re' Josué, eh chu'nchel i aj Israel xkichop i Acán xkik'am reje chuwach k'ixkaab' Acor, ruch'ihil itz'ihy ruch'ihil i tumiin, ruch'ihil i junrahp chi oro, ruch'ihil wo' taqe i rak'uun rixq'uun. Eh xkik'am wo' taqe i rub'oyaax i rutentzuun, ruch'ihil i ru-itz'ihy naah paat, je' wo' chu'nchel i chib'ih reh.
25Eh re' Josué je' wili i xuq'or reh i Acán:
¿Chib'ih reet noq xak'am chee ti' k'axik wili chi qanaah? Yu'naak re' QaJaaw Dios ye'woq jilow aweh, inki.
Noq xukohlaaj ruq'orariik i re' i Josué chu'nchel i aj Israel xkikutib'eej chi ab'aj i Acán, eh xkik'at, je' wo' chu'nchel i rak'uun rixq'uun.26Eh xkiyeew i juntuhb' chi ab'aj chinaah, eh ar xkahnik chi jumpech. Ruuk' i re' xik'saj i rujosq'iil i QaJaaw Dios. Ruum aj re', re' i ye'aab' re' re' Acor i rub'ihnaal xkahnik chi jumpech. Re' taqe i aj Israel xkichop naah i tinamit Hai
1Re' i QaJaaw Dios je' wili i xuq'or reh i Josué: Mat yo'jik, maa rub'an kiib' ak'ux. Chak'am taqe reje chu'nchel i soldado hiy chak'ulb'ilej taqe i tinamit Hai. Re' hin nuq'asam chik panaq'ab' i kireey, kitinamiit, i kiye'aab' eh chu'nchel i chib'ih keh.2Re' taq i hat naa taq a'nam kuuk' i tinamit Hai je' wo' ruuk' i kireey nik' wach taq i xa a'n ruuk' i tinamit Jericó ruuk' i kireey. Xa re' la' yu'naak neerub'an chi nee taq inkahnik cha weh i xa chib'ih jariik wilik ar, je' wo' taqe i kichikoop, eh chi riij i tinamit nee taq ti okik chaloq chi peleto, inki.
3Eh re' Josué i xumol kiwach i ru soldado reh chi xutaq'aaj taqe reje chi q'aq'inik chinaah i tinamit Hai, xusik' kiwach i lajeeb' ru ka'winaq miil chi q'aq'ineel. Eh chaq'ab' xutaq'aaj taqe reje.4Je' wili i xuq'or reje keh: Chab'iraj taq chi korik ar taq netiokik cho chi riij i tinamit nee taq i naakeb'aa' awiib' ma' najt ta ruuk', eh ayejaam-oq taq awiib' reh i rub'anariik reh.5Eh re' ruqox i tinamit wuch'ihil taqe i hin noq neekinokik i koq chuwach i tinamit. Eh noq nee kielik chaloq i aj Hai chub'anariik qeh i hoj, neenqamol chi elik i hoj, je' rukab' xa a'n taq i hat junriim.6Eh noq neenqamol cho chi elik i hoj chupaam i kitinamiit nee qoh kajimaj chaloq neenkikapaaj chi xoj kesaj wo' chik cho ar.7Jumehq'iil taq neti elik chaloq aha' akeb'aam taq awiib', eh nee taq i naachop naah i kitinamiit. Ruum re' i QaJaaw Dios naa ruq'asaniik taq panaq'ab'.8Eh xa re' wach noq nee taq inachop naah chak'at taq, je' rukab' i xuq'or i QaJaaw Dios, re' reh xq'orik inki.
9Chi riij i re', re' Josué xuq'or keh chi xi elik reje i soldado. Eh re' keh xiooj wo' hoq ar xooj kikeb'aa' kiib' panyejaal i ye'aab' Bet-el ruuk' i tinamit Hai pareelb'aal q'iij reje reh i Hai. Eh re' Josué reh ko ar xik'saj i jinaj aq'ab' wilkeeb' wii' i ki-itz'ihy naah paat.10Eh chi junwaar chik kowahq'eq xwuktik i Josué xupech' taqe i ru soldado mi kiyejaam kiib' chi korik. Re' taqe i winaq k'amal b'eeh taqe chi kixilak i aj Israel xiooj chi peet b'eeh chikiwach noq xiooj chi peleto chinaah i tinamit Hai.11Eh chu'nchel i ru soldado xkijil i koq kiib' ruuk' i tinamit Hai chuwach i koq i tinamit xi okik, ar xkiyejaa' i ki-itz'ihy naah paat pantz'eet reje reh i rookb'aal q'iij. Eh jinaj i k'ixkaab' xkahnik pankiyejaal ruuk' i tinamit.12Eh re' Josué hoob' miil chi soldado i xukeb'aa' panyejaal i ye'aab' Bet-el ruuk' i tinamit Hai ar reje chi korkiil i rookb'aal q'iij, reh i tinamit.13Re' taqe i soldado jun ch'uq i xkikeb'aa' kiib' pantz'eet reje reh i rookb'aal q'iij, eh junch'uq i xkahnik chupaam i ki-itz'ihy naah paat panrookb'aal q'iij. Eh re' Josué xujil i koq riib' ruuk' i tinamit re' re' xponik kopanyejaal i k'ixkaab'.
14Eh noq xrilow i kireey i aj Hai chi xiooj chik k'oloq i Josué panyejaal k'ixkaab', jumehq'iil xelik chaloq ruch'ihil chu'nchel i ru soldado chi kik'uhlb'ejiik taqe i ki soldado i aj Israel wach k'ixkaab' Jordán. Xa re' la' ma' reht'al taj chi wilik i ki soldado i aj Israel kikeb'aam kiib' chi riij i rutinamiit.15Eh re' Josué ruch'ihil taqe i ru soldado xkimol ti chik chi elik chupaam i ye'aab' chiq yuuq' xkian kiib' chuwach i ki soldado i aj Hai.16Eh chu'nchel i ki soldado i aj Hai xq'orarik keh chi naa ruchaliik kajimam taqe i ki soldado i aj Israel, ruch'ihil i Josué najt kikanaa' chaloq i kitinamiit.17Eh ma' jino'q chik i soldado xkahnik cho Hai, ma' jino'q wo' chik i xkahnik cho Bet-el, chi kunchelaal xchalik chi kajimjiik i ki soldado i aj Israel, ruum i re' xkikanaa' chaloq i kitinamiit chi ma' xta cha'jen reh.18Eh re' i QaJaaw Dios je' wili i xuq'or reh i Josué: Re' hat chajosaj reje aq'as laj ch'ihch' wilik pan anq'ab' chinaah i tinamit Hai ruum re' hin naa nuq'asam panaq'ab', inki.
Eh re' Josué xujosaj wo' reje chinaah i tinamit i ruq'aslaj ch'ihch'.19Eh chu'nchel i ki soldado i aj Israel kikeb'aam kiib' xi elik cho chi jumehq'iil aha' naq kikeb'aam kiib' xkikutkiib' chinaah i tinamit Hai. Eh xkichop naah i xkikoj ruq'aq'al.
20Eh noq re' taqe i ki soldado i aj Hai xitz'ehtanik reje chikiij xkilow chi xamponik chik pan taxaaj i rusib'eel i kitinamiit, xama' aha' ta chik kielik kuum taqe i aj Israel, i xkimol naq chik chi elik chupaam i ye'aab' chiq yuuq', chupaam i q'iij re' re' xkikut kiib' chinaah i tinamit re' re'.21Eh noq rilow i Josué, ruch'ihil chu'nchel i aj Israel chi re' taqe i ki soldado kikeb'aam naq kiib' xkichop naah i tinamit Hai, eh chi xkikoj ruq'aq'al, xi sutinik chikiij eh xoj kik'ulb'ilej taqe i aj Hai.22Re' taqe i xichopwik naah i tinamit xi elik cho ar xchalik kik'ulb'ilej i ki soldado i aj Hai panyejaal i ka'ch'uq chi ki soldado i aj Israel xi kahnik. Re' keh kian reh i ki soldado i aj Hai korehtaal xkuxik kikansam.23Xa re' wo' chik i kireey i aj Hai xkikanaa' chi k'achlik, xkichop, eh xkik'am reje chuwach i Josué.
24Eh noq re' taqe i aj Israel xkuxik kikansam chu'nchel i ki soldado i aj Hai re' taqe i ajiminik cho keh chupaam i ye'aab' chiq yuuq' xi sutinik wo' chik reje chupaam i tinamit Hai. Eh xkikansaj i xi kahnik naq chi k'achalkeeb'.25Chupaam i q'iij re' re' xkikansaj i kab'laj miil chi tinamit patim taqe chupaam i tinamit re' re' chi winaq chi ixoq.26Re' Josué kore' chik xuq'asaj i ruch'ihch' k'ulq'as rehtalil i taaq'anik reh i q'aq'inik chinaah i tinamit noq xkuxik chik kikantesjiik chi jumpech i aj Hai.27Re' taqe i aj Israel xkahnik chi keh taqe i chikop, chu'nchel i chib'ih jariik i wilkeeb' chupaam i tinamit Hai, je' wo' rukab' i xuq'or i QaJaaw Dios reh i Josué.28Je' re' noq re' Josué kuxik ruk'atam i tinamit Hai, xusach wach chi jumpech, eh je' xkahnik chi jumpech.29Eh re' Josué xut'uyaa' nah q'ab' chee' i kireey i aj Hai korehtaal xokik i q'iij ar xkimik. Eh noq xokik i q'iij xutaq'aaj ruqahteesjiik i ruti'jolal, ar xkikut panookb'al reh i tinamit, eh xkitub'aa' ab'aj chinaah. Eh re' ab'aj re' re' ar xkahnik chi jumpech. Re' Josué xrilow wach i k'uhb'aal chinaah i yuuq' Ebal
30Eh re' Josué xuyejaa' jinaj i artaal chinaah i yuuq' Ebal, re' ye'b'al ruloq'il i kaJaaw i ki Dios i aj Israel.31Je' rukab' i xuq'or i Moisés raj kamanoom i Dios keh i aj Israel, je' rukab' i tz'ihb'amaj pan santo laj huuj, re' k'uhb'aal xye'arik reh i Moisés. Eh re' artaal re' re' xkiyejaa' ruuk' taqe i ab'aj ma' sehkamaj ta wach. Re' taqe i aj Israel xkik'at i mayiij chinaah i artaal chuwach i QaJaaw Dios, eh xkiyeew wo' chinaah i mayiij k'amb'al iib' panotob'il ruuk' i Dios.32Eh re' Josué chikiwach chu'nchel i aj Israel xutz'ihb'aaj chuwach taqe ab'aj i k'uhb'aal ye'ooj reh i Moisés.33Eh chu'nchel i aj Israel, taqe i tokoom tinamit, taqe k'amal b'eeh, taqe i nimaq kiwach, taqe i q'atal q'orik, xkiyeew i koq kiib' pantaq rucheel i loq'laj kaxa molik wii' i ruk'uhb'aal i QaJaaw chikiwach taqe i k'amal kib'eeh aj tiij taqe i aj Levíta re' kik'amwik reh i loq'laj kaxa. Re' taqe i tinamit re' re' yejaal i xkiyeew reje kiib' parucheel i yuuq' Gerizim, eh yejaal i xkiyeew reje kiib' parucheel i yuuq' Ebal. Eh xkian wo' hoq ixq'orarik keh pampeet ruum i Moisés raj kamanoom i QaJaaw Dios, reh chi xkik'ul i rotob'il i Dios.
34Eh chi riij i re', re' Josué xrilow wach chi ju'junaal chib'ih i ruq'or taqe i k'uhb'aal tz'ihb'amaj, chihreet noq ink'ularik i rotob'il i Dios, eh chihreet noq ink'ularik i ti' k'axik.35Re' Josué xrilow wach taqe i k'uhb'aal xye'arik ree Moisés ma' xtaj i xukanaa' chi ma' ta xrilow wach chikiwach i aj Israel, chi winaq, chi ixoq, chi kok' ha'lak'uun, eh chi tokoom tinamit wilkeeb' ar. Re' taqe i tinamit Gabaón xkichuk i q'orik reh i Josué
1Re' taqe i kireey i aj heteo, i aj amorreo, i aj cananeo, i aj ferezeo, i aj heveo, i aj jebuseo, xkib'iraj rib'iral i xkian i aj Israel. Re' taqe reey re' re' ar wilkeeb' parookb'aal q'iij reh i nim ha' Jordán chupaam taqe i raxchee'. Eh wach k'ixkaab', xponik pantz'eet reh i rookb'aal q'iij reh i palaw Mediterráneo, xponik Líbano.2Re' taqe i reey re' re' xkiyejaa' wach chi xooj kik'ulb'ilej i Josué, ruch'ihil taqe i aj Israel.3Eh re' taqe i aj heveo, wilkeeb' Gabaón xkib'iraj rib'iral i xub'an i Josué ruuk' i tinamit Jericó, ruch'ihil i xub'an ruuk' i tinamit Hai.4Xkiyejaa' wach kijot'ariik i aj Israel, aj taqareel tii chik taqe xiooj xkian kiib' xkiyeew reje chi riij i kib'uruux q'aah koxtaal, i q'aah koxtaal tz'uhuum xa kojb'al chik wach ye'aab' vino5Eh q'aah i kiso' xkikoj reje je' wo' noq i kixijab' xkikoj reje chi kooq, xak'ojb'al chik wach. Eh re' kikaxlanwi'k xkik'am reje reh i kib'eeh xakow chik, eh xaq'uux chik wach.6Eh noq xi ponik ruuk' i Josué kiyejaam wii' i ki-itz'ihy naah paat ar Gilgal, je' wili i xkiq'or reh, je' wo' keh chu'nchel i aj Israel:
Re' hoj chi najt yuuq' qohchalik inqaaj chi wilik i neenqayejaa' taq wach awuuk', inki taqe.
7Re' taqe i aj Israel je' wili i kichaq'weesjiik i aj heveo xkian:
Ruq'iij ma' najt ta taq ayu' hat patim ¿nik' wach noq inawaaj taq i hat chi wilik i neenqayejaa' taq awach awuuk'?
8Eh re' taqe i aj Gabaón je' wili xkiq'or reh i Josué:
Re' hoj neerub'an chi nee qoh kahnik taq chi amoso, inki taqe.
Eh re' Josué xupahqaaj keh chi je' wili:
¿Awach taq i hat, aha' taq ti chalik? inki.
9Re' keh je' wili i ruchaq'weesjiik xkian:
Re' hoj chi najt yuuq' qoh chalik xa ruum xqib'iraj rib'iral chi wilik rajaawriik taq aaDios i hat, eh xa ruum chi xqib'iraj rib'iral i nimaq wach ma' ilooj taj rub'anam taq wuuk' ar Egipto.10Xa ruum wo' chi xqib'iraj rib'iral chib'ih i xub'an kuuk' i kiib' chi kireey i aj amorreo chi juntar i nim ha' Jordán. Re' Sehón reey ar Hesbón, re' Og reey ar Basán, re' taqe i xi patinik ar Astarot.11Je' aj re' noq re' taqe i k'amal qab'eeh taqe i qatinamiit je' wili i xkiq'or cho qeh: Re' taq i hat chak'am taq reje awa' ahaa' reh ab'eeh hiy taq aha' wilkeeb' wii' je' wili taq i neenaq'or keh: Re' hoj inqaaj chi nee qoh kahnik chi kimoso, eh chi wilik inqaaj qayejaam wach kuuk', inki taqe qeh.12Re' hoj noq xoj chalik taq chasik'ariik kotz'a' naq i qakaxlanwi'k wili, eh yu'naak kow chik xq'uuxrik chik kiwach.13Eh je' wo' taqe i qakoxtaal tz'uhuum wili ko ak' naq noq xqanujisaj taqe chaloq chi vino, eh yu'naak xi hopib'ik chik. Eh re' taqe qaso' ruch'ihil taqe i qaxijab' xiq'ahik wo' chik, ar ink'utinik chi najtir inqatoq'aa' cho b'ehik, inki taqe.
14Re' taqe aj Israel xa ruum chi xkilow chi q'ahinaq chik i chib'ih keh taqe re' xkinimaj i xkiq'or, xa re' la' ma' xkipahqaaj ta reh i Dios i naa kianam.15Eh re' Josué xkiyejaa' wach chi xkik'am kiib' pansuqkiil k'uxliis kuuk' i aj Gabaón. Eh xuq'or keh chi naa kiko'leem riij i kik'achariik. Re' taqe i k'amal kib'eeh i ju'jun ch'uq chi aj Israel xkiq'or i xti korik chi je' re' i naa kianam i keh.
16Eh noq ixib' chik q'iij kik'amam kiib' pansuqkiil k'uxliis kuuk' i aj Gabaón re' taqe i aj Israel xkinab'eej chi re' taqe re' xama' najt ta wo' kuuk' wilkeeb' reje i xa kika'jaah wo' taqe.17Ruum aj re' paroox q'iij xiooj i aj Israel chi kisik'ariik taqe i aj Gabaón xi ponik chupaam taqe i kitinamiit je' wili kib'ihnaal: Gabaón, Cofira, Beerot, eh re' Quiriat-jearim.18Eh re' taqe i aj Israel ma' xkikansaj ta taqe i tinamit re' re', ruum re' taqe i k'amal kib'eeh i aj Israel kiq'orom chik korik parub'ihnaal i QaJaaw chi naa kiko'leem riij i kik'achariik taqe re'.
Ruum aj re', re' taqe i aj Israel xkitoq'aa' kiwech'um riij i ma' holohik taj xkian i k'amal kib'eeh.19Re' taqe i k'amal kib'eeh je' wili xkiq'or:
Re' hoj qaq'orom i korik parub'ihnaal i qaDios chi ma' naa ta qakansam taqe. Ruum aj re' yu'naak xama' xta chik i naaqa'nam keh.20Re' hoj ma' naa ta qakansam taqe i aj Gabaón ruum wixqakansaj taqe neenqayoj wach i korik qaq'orom ree Dios ruum i re' nee ruyeew chee rujosq'iil chi qanaah, inki taqe.
21Re' taqe i k'amal kib'eeh i aj Israel ma' xkikansaj ta taqe i aj Gabaón. Xa re' la' xkiq'or chi naa kikahniik chi xa kajsi'wiil taqe, eh chi xa b'ehlan kihaa' chu'nchel i tinamit Israel, je' re' noq re' taqe i k'amal b'eeh xkian wo' hoq aha' wilik i xkiq'or.
22Eh re' Josué reh xuyuq'eej taqe i aj Gabaón, xupahqaaj keh chi je' wili:
¿Chib'ih reet noq xachuk taq qeh i q'orik, re' taq i hat xaq'or taq qeh chi najt taq ti chalik, xa nah re' xa ayu' wo' taq hat patim?23Eh ruum chi xachuk taqe i q'orik yu'naak xat kahnik taq chi ri'sil i ti' k'axik xat kahnik taq chi moso chi juneliik. Re' taq i hat naa akahniik chi yok'ol reh i sii' chi b'ehlan reh i ha' naa rukamaniik parupaat i nuDios, inki.
24Re' taqe i aj Gabaón je' wili i chaq'wik xkian:
Re' hoj xqachuk i q'orik ruum ma' k'isiin ta xoj yo'jik taq awuum xqakapaaj i hoj chi naa taq kooj akansam. Eh qib'iraj wo' rib'iral chi re' taq aaWaJaaw aaDios taq i hat ruq'orom cho reh i Moisés i raj kamanoom chi naa ruye'em taq aweh chu'nchel i qaye'aab' wili, eh chi naa taq akansam chu'nchel i patineel wilkeeb' chupaam.25Eh yu'naak panaq'ab' taq chik wilkooj neerub'an chi nee taq i na a'n quuk' nik' wach i ruk'ul inawilow taq i hat, inki taqe.
26Eh re' Josué ma' xuyeew ta q'ab' keh i aj Israel chi xkikansaj taqe i aj Gabaón.27Eh xikanab'jik chi xa kajsi'wiil, xa b'ehlan kihaa' taqe i tinamit, je' wo' hoq i naa rukamaniik chinaah i ru artaal i QaJaaw Dios, eh i naa rukamaniik chupaam i ye'aab' rusik'im wach i QaJaaw Dios. Eh re' taqe i aj Gabaón je' re' i kikamaj xkahnik chi jumpech. Re' noq xb'aan keh i aj amorreo
1Re' Adonisedec i kireey i aj Jerusaleem xrib'iraj rib'iral chi re' Josué xusach kiwach chi jumpech i tinamit Hai, eh chi xukansaj i kireey, je' rukab' noq rusacham wach i tinamit Jericó, haa' i kireey. Eh xrib'iraj wo' rib'iral chi re' taqe i aj Gabaón, chi xkik'am kiib' pansuqkiil k'uxliis kuuk' i aj Israel. Eh chi wilik chik i wilkeeb' chi kixilak.2Re' reey re' re' ma' k'isiin ta xchalik ruyo'jiik noq xrib'iraj taqe re', ruum re' tinamit Gabaón nimlaj tinamit wilik rajaawriik chuwach i tinamit Hai. Eh re' taqe i winaq wilkeeb' ar xti q'e' kow kiib'.3Ruum aj re', re' Adonisedec kireey i aj Jerusaleem wilik i xutaq'aaj reje ruq'orariik reh i Hoham kireey i aj Hebrón, je' wo' reh i Piream kireey i aj Jarmut, je' wo' reh i Jafía kireey i aj Laquis, je' wo' reh i Debir kireey i aj Eglón, je' wili xuq'or reje keh:4Johteen taq cho wuuk' ayu' kinatow taq chi kipletohjiik taqe i aj Gabaón, ruum, re' keh xi okik chik pansuqkiil k'uxliis ruuk' i Josué, je' wo' kuuk' i chu'nchel i aj Israel, inki.5Eh xkimol kiib' i ho'oob' chi kireey i aj amorreo, i kireey i aj Jerusaleem, kireey i aj Hebrón, kireey i aj Jarmut, i kireey i aj Loquis, kireey i aj Eglón. Re' keh kiho'cheel kuch'ihil taqe i ki soldado xijohtik johtoq ar, xiooj wih-oq chuwach i kitinamiit i aj Gabaón reh chi naa kianam reh.
6Eh noq xkib'iraj chi je' re' i wilkeeb' pan tinamit Gabaón xkitaq'aaj ruq'orariik reh i Josué re' kiyejaam wii' i ki-itz'ihy naah paat ar Gilgal, je' wili xkiq'or reh: Qoh k'oloq ako'leej i hoj, hoj amoso johteen cho chi jumehq'iil reh i qakoljiik, ruum chu'nchel i kireey i aj amorreo patim taqe paraxchee' xkimol cho kiib' chi rub'anariik qeh, inki taqe.7Eh noq xrib'iraj chi je' re' Josué xelik reje Gilgal ruch'ihil chu'nchel i ru soldado kow kiib'.8Eh je' wili i xq'orarik reh ruum i QaJaaw Dios: Re' hat mat yo'jik kuum, ruum re' hin naa taqe nuq'asam panaq'ab', ma' jino'q keh i re' naa kikuyum i peleto awuuk', inki.
9Re' Josué xelik reje Gilgal, chaq'ab' xb'ehik reje, eh chi ma' keht'al taqe i aj amorreo xooj k'oloq chikinaah.10Re' QaJaaw Dios xuyeew q'ab' chi ma' k'isiin xiyo'jik taqe i aj amorreo chikiwach i aj Israel, chi je' re', re' Josué ma' k'isiin taqe i aj Gabaón xukansaj. Eh wilik taqe ixrajimaj reje chupaam i ye'aab' Bet-horón, wilik taqe i xukansaj chupaam i ye'aab' Azeca i Maceda.11Eh noq qajik inki a'n chee aj amorreo panqajik Bet-horón, noq elik inki a'n chikiwach i aj Israel, re' QaJaaw Dios xuqasaj cho pan taxaaj i nimaq taq saqb'och chikinaah. Eh yohb'aal wach k'ihaal i aj amorreo xikimik ruum, ma' xata je' k'ihaal i xkikansaj i aj Israel ruuk' i q'aslaj ch'ihch'.
12Eh noq re' QaJaaw Dios xuq'asaj taqe i aj amorreo pan kiq'ab' i aj Israel re' Josué xuq'oreej i QaJaaw Dios chikiwach i tinamit, eh je' wili i xuq'or reh i q'iij, ruch'ihil i poh:
Tipahoq i hat q'iij chinaah i tinamit Gabaón, tipahoq i hat poh chinaah i k'ixkaab' Ajalón, inki.13Eh re' q'iij xpa'lojik wo' hoq, je' wo' hoq i poh korehtaal chik xb'aan keh i aj ixowaal kuum i aj Israel.
Re' i wili tz'ihb'amaj rehtalil chupaam i ruhuuj i Jaser, re' ruq'or chi je' wili: Re' q'iij k'isiin ma' jinaj q'iij xpahik panyejaal i taxaaj, ma' xokik ta chik qohoq chi jumehq'iil, inki.14Re' rupahiik i q'iij re' re' ma' jank'al ta nilarik cho pampeet, eh ma' jank'al ta wo' inilarik koq'uun. Re' noq i xb'irjik chee jinaj i winaq ruum i QaJaaw Dios. Re' QaJaaw Dios xuko'leej taqe i aj Israel chikiwach i aj ixowaal.
15Eh re' Josué ruch'ihil chu'nchel i aj Israel xi sutinik chaloq ar Gilgal re' i kiyejaam wii' i ki-itz'ihy naah paat.16Re' taqe i ho'oob' chi reey xkimol chi elik xooj kikeb'aa' kiib' chupaam i jinaj i jul wilik ar Maceda.17Xa re' la' wilik i jinaj x-ilwik keh chi ar kikeb'aa' kiib' chupaam i paat ab'aj, eh xuq'or reh i Josué.18Eh re' reh je' wili i xuq'or keh i ru soldado: Re' taq i hat cha tolej taq chee nimaq ab'aj nee taq inatz'ap i koq chii' i jul chi korik, eh nee taq inakoj cha'jen reh.19Xa re' la' re' taq i hat maa cham taq awiib' ayu', hiy taq chi kajimjiik taqe i aj ixowaal chikiij taq ti okoq reje. Eh maayeew taq chik q'ab' keh chi neekisutinik cho pan kitinamiit ruum re' taq aaWaJaaw aaDios taq i hat xuq'asaj taq chik panaq'ab' taqe i re', inki.
20Eh noq re' Josué ruch'ihil taqe i aj Israel xkiq'at wach chi jumpech taqe i aj amorreo ma' k'isiin keh i xikimik. Eh re' taqe i aj amorreo xi kahnik chi kok'achalkeeb' xkikeb'aa' kiib' chupaam taqe tinamiit kotimaj kiij chi tz'aq.21Re' i tinamit Israel manlik kiwach suq kik'ux noq xi sutinik cho ruuk' i Josué re' kiyejaam wii' i ki-itz'ihy naah paat ar Maceda. Re' naq i wilik wii' i Josué, ma' jino'q i ma' holohik ta kiq'orik chikiij i aj Israel.
22Eh je' wili i xq'orarik keh ruum i Josué: Cha teh taq chii' i paat ab'aj re' re' chawesaj taq cho ar taqe i ho'oob' chi reey, inki.23Aha' wilik i xq'orarik keh xkian wo' hoq xkesaj wo' chaloq pampaat ab'aj i ho'oob' chi reey. Re' kireey i aj Jerusaleem, re' kireey i aj Hebrón, re' kireey i aj Jarmut, re' kireey i aj Laquis, re' kireey i aj Eglón.24Eh noq xi k'amarik reje chuwach i Josué, re' reh xuyuq'eej taqe chu'nchel i winaq k'amal kib'eeh soldado wilkeeb' chi riij je' wili i xuq'or keh: Yu'naak taq i hat chayeq' taq i kalaq taqe i ho'oob' chi reey re' re', inki, eh re' taqe i winaq re' re' i xkian aha' wilik i xq'orarik keh.25Eh je' wo' chik wili i xq'orarik keh ruum i Josué: Re' taq i hat mat yo'jik taq kuum maayoj taq ak'ux chakowej taq ak'ux, eh korik-oq taq aweh i cha a'n, ruum re' QaJaaw Dios je' re' naa rub'anam keh chu'nchel i ki-ixowanik taq awach, inki.
26Chi riij i re', re' Josué xuq'or chi xit'uyub'jik taqe nah q'ab' chee' i ho'oob' chi reey korehtaal xikimik ar xi kahnik chi t'uyulkeeb' korehtaal xokik i q'iij.27Eh noq ach k'isiin ma' nokik qohoq i q'iij re' Josué xutaq'aaj kiqahteesjiik nah q'ab' chee' taqe i reey re' re'. Eh xuq'or wo' hoq chi naa wo' chik kiminariik i koq chupaam i paat ab'aj, xkikeb'aa' wii' kiib'. Eh xkitz'ap wo' chik i koq chii' i paat ab'aj ruuk' i nimaq ab'aj, eh ar xi kahnik chi jumpech.
28Re' Josué ruch'ihil taqe i ru soldado xa chupaam wo' q'iij re' re' xuchop naah i tinamit Maceda xkisach wach chi jumpech, eh xkuxik kisacham wach ruuk' q'aslaj ch'ihch' chu'nchel i patim chupaam. Eh xub'an ruuk' i wilik chi reyil ar je' rukab' i xub'an ruuk' i kireey i aj Jericó.
29Eh noq re' Josué ruch'ihil taqe i aj Israel kisacham chik wach i tinamit Maceda ar chik xiooj q'aq'ineel pan tinamit Libna, re' chik i re' xkian reh.30Eh re' QaJaaw Dios xuq'asaj wo' tinamit re' re' pan kiq'ab' i aj Israel, ruch'ihil i kireey. Eh xkuxik kikansam chi q'aslaj ch'ihch' chu'nchel i wilkeeb' chupaam i ye'aab' re' re', xkian ruuk' i kireey i aj Libna, je' rukab' xkian ruuk' i kireey i aj Jericó.
31Eh re' Josué ruch'ihil taqe i aj Israel xi elik reje Libna ar chik xiooj chi q'aq'inik chupaam i tinamit Laquis, ar xkiyejaa' i ki-itz'ihy naah paat chuwach i tinamit re' re'.32Re' QaJaaw Dios xuq'asaj wo' pan kiq'ab' i aj Israel i tinamit Laquis, eh chi junwaar xkichop naah xkuxik kikansam chi q'aslaj ch'ihch' chu'nchel i wilik kik'achariik wilkeeb' chupaam. Xkian ruuk' i tinamit re' re' je' rukab' i xkian ruuk' i tinamit Libna.33Eh re' Horam i kireey i aj Gezer ruch'ihil taqe i ru soldado xchalik chi ruko'ljiik i tinamit Laquis, xa re' la' xkuxik kikanteesjiik ruum i Josué ma' jino'q chik i xukanaa' chi k'achalkeeb'.
34Eh re' Josué ruch'ihil i aj Israel xi elik Laquis ar chik xiooj chi q'aq'inik chupaam i tinamit Eglón, ar kiyejaa' i ki-itz'ihy naah paat ma' najt ta ruuk'.35Eh chupaam wo' q'iij re' re' xkichop naah i xkuxik kikansam ruuk' qas laj ch'ihch' chu'nchel i wilik kik'achariik wilkeeb' ar, je' rukab' i xkian reh i tinamit Laquis.
36Chi riij i re', re' Josué ruch'ihil taqe i aj Israel noq xi elik reje Eglón ar chik xiooj chi q'aq'inik chupaam i tinamit Hebrón.37Eh xkichop naah i tinamit re' re' xkikansaj ruuk' q'aslaj ch'ihch' i wilik chi reyil ar, je' wo' hoq i tinamit. Eh je' wo' re' i xkian reh chu'nchel i wilkeeb' chupaam kok' tinamit wilkeeb' ar. Eh ma' jino'q i xkikanaa' chi k'achalkeeb', je' rukab' i xkian reh i tinamit Eglón.
38Eh re' Josué ruch'ihil taqe i aj Israel noq xi elik reje Hebrón ar chik xiooj chi q'aq'inik chupaam i tinamit Debir.39Eh re' i wilik chi reyil ar, chu'nchel i rutinamiit, xkuxik kikansam ruuk' i q'aslaj ch'ihch', je' wo' chu'nchel i tinamit wilik chi kijunsuut, ma' jino'q chik i xkikanaa'. Eh nik' wach i xkian reh taqe i aj Hebrón, i aj Libna, ruch'ihil i wilik chi reyil ar, je' wo' chik re' inki a'n reh taqe i aj Debir ruch'ihil i wilik chi reyil ar.
40Eh re' Josué, re' taqe i aj Israel xkichop naah chu'nchel i tinamit wilkeeb' chupaam taqe i raxchee' wilkeeb' paruyuq'ul i Neguev, taqe i wilkeeb' wach k'ixkaab', taqe i wilkeeb' wataq salik, ruch'ihil taqe i kireey. Eh kuxik kisacham wach, ma' jino'q chik i xkikanaa', xkian wo' hoq je' rukab' i ruq'orom i ki Dios.41Eh re' Josué ruch'ihil taqe i aj Israel kehchaaj chu'nchel i ye'aab' Cades-barnea, koxponik chupaam i ye'aab' Gaza. Eh je' wo' hoq i ye'aab' Gosén koxponik chupaam i ye'aab' Gabaón.42Chupaam i q'aq'inik re' re', re' Josué xukansaj taqe chu'nchel i reey ruum re' QaJaaw Dios xtoob'inik keh i aj Israel.43Eh re' Josué ruch'ihil taqe chu'nchel i aj Israel xi sutinik wo' chik cho Gilgal re' i ye'aab' kiyejaam wii' i ki-itz'ihy naah paat. Re' taqe i aj Israel xkian reh i tinamit xkimol kiib' chi pleto kuuk'
1Noq xrib'iraj rib'iral i xkian i aj Israel i Jabín wilik chi reyil Hazor, xutaq'aaj ruq'orariik reh i Jobab wilik chi reyil Madón, eh reh i wilik chi reyil Simrón, reh i wilik chi reyil Acsaf.2Re' Jabín xutaq'aaj ruq'orariik keh i reey wilkeeb' pantz'eet reh i rookb'aal q'iij chupaam taqe i raxchee' wilik wii' i palaw kineret. Eh je' wo' keh i reey wilkeeb' pansak'aaj reh i rookb'aal q'iij chupaam i ye'aab' Arabá keh taqe reey wilkeeb' wataq k'ixkaab' parookb'aal q'iij paruyuq'ul i Dor.3Eh xutaq'aaj wo' ruq'orariik keh i aj cananeo wilkeeb' reje parelb'aal q'iij, eh wilkeeb' reje parookb'aal q'iij, je' wo' keh i aj amorreo taqe i aj heveo, taqe i aj ferezeo, taqe i aj jebuseo, wilkeeb' chupaam taqe i rax chee' taqe i aj heveo wilkeeb' waraa' i yuuq' Hermón ar Mizpa.4Chi kunchelaal taqe re' xkian jinaj wach kik'ux xkimol cho kiib' kuch'ihil taqe i ki soldado, je' kik'ihaal i saniib' tub'lik chi chii' i palaw. Eh yohb'aal wo' wach k'ihaal i kikareta i kikawayu reh q'aq'inik xkik'am chaloq.5Chu'nchel i reey re' re' xkimol cho kiib' jinaj xkimol wii' kiib', ar kiyejaa' kiperpat chi chii' i runimaal ha' Merom, reh chi naa kokiik chi q'aq'inik kuuk' i aj Israel.
6Eh re' i QaJaaw Dios je' wili i xuq'or reh i Josué: Re' hat mat yo'jik kuum taqe re', ruum je' yu' i ora i iqal kamnaq chik taqe chawach ruum re' hin naa nuq'asaniik taq panaq'ab'. Re' taq i hat naa taq atoqib'eem i rooq i kikawayu, eh naa taq ak'atam i kikareta.
7Eh re' Josué ruch'ihil taqe i ru soldado xiooj k'oloq chi chii' i nim ha' Merom xiooj k'oloq chikinaah chi q'aq'inik chikinaah xa chi ma' keht'al.8Eh re' i QaJaaw Dios xuq'asaj pan kiq'ab' i aj Israel taqe i aj ixowaal reh chi xkian reh xkajimaj chaloq korehtaal xi k'ulik kahnoq pan tinamit Sidón. Eh xi ponik chupaam i ye'aab' Misrefot-maim xi ponik wach k'ixkaab' Mizpa wilik reje parelb'aal q'iij, xkuxik kikansam.9Eh re' Josué xub'an wo' kuuk' i aj ixowaal re' re' je' rukab' i xq'orarik reh ruum i QaJaaw Dios xitoqib'eej rooq' i kikawayu, eh xkuxik ruk'atam i kikareta.
10Eh chi riij i re', re' Josué ruch'ihil taqe i ru soldado xi chalik chi q'aq'inik chupaam i tinamit Hazor re' i xkimol wii' kiib' i aj ixowaal xkikansaj wo' hoq i wilik chi reyil ar.11Eh xkuxik wo' kikansam chu'nchel i patim taqe ar, xkisach wach chi jumpech, xkik'at i tinamit.12Eh xkisach wo' wach i k'ih seht chi tinamit xkian jinaj wach kik'ux chi rixowjiik kiwach i aj Israel xkichop naah. Eh xkikansaj chu'nchel i tinamit, je' wo' taqe i wilkeeb' chi reyil, je' rukab' i xuq'or i Moisés raj kamanoom i QaJaaw Dios.13Eh re' taqe i aj Israel ma' jino'q i tinamit wilkeeb' chinaah taqe i rub'ohl yuuq' xkik'at xa re' wo' hoq i tinamit Hazor xkik'at.14Eh xkuxik kikansam ruuk' q'aslaj ch'ihch' chu'nchel i patim taqe chupaam taqe i tinamit re' re' ma' jino'q chik i xkikanaa' chi k'achalkeeb'. Eh xkichop naah taqe i chikop wilkeeb' ar je' wo' chu'nchel i xa chib'ih jariik wilkeeb' ar. Re' Josué xub'an taqe i xq'orarik reh ruum i Moisés
15Re' QaJaaw Dios xuq'or reh i Moisés re' raj kamanoom chib'ih i naa rub'anam, eh re' Moisés xuq'or wo' kahnoq reh i Josué. Eh re' i Josué xub'an wo' hoq chu'nchel, ma' jino'q i xukanaa' chi ma' xub'an taj.
16Eh re' Josué xkichop naah chu'nchel i ye'aab' wilkeeb' paraxchee' chu'nchel i ye'aab' Neguev. Eh xkichop wo' naah chu'nchel i ye'aab' Gosén, je' wo' hoq i wataq k'ixkaab' Arabá, je' wo' taqe i raxchee' ruch'ihil i wataq k'ixkaab' Israel.17Re' ye'aab' xkichop naah ar tohq'ik chaloq chupaam i wilik wii' i yuuq' Halac, re' wilik wii' i ye'aab' Seir, eh imponik ko Baal-gad wilik wataq k'ixkaab' Líbano ma' naj ta ruuk' i yuuq' Hermón. Eh re' taqe i aj Israel xkichop taqe i reey wilkeeb' ar, eh xkikansaj taqe.18Re' Josué najt xkian i q'aq'inik kuuk' taqe i reey re' re'.19Re' i xkik'am kiib' pansuqkiil k'uxliis kuuk' i aj Israel xa re' wo' taqe i aj heveo, re' i wilkeeb' ar Gabaón. Eh chu'nchel chik taqe i tinamit ruuk' q'aq'inik xkichop naah.20Re' QaJaaw Dios xukowb'isaj i kánima taqe i aj ixowaal wilkeeb' Canaán, xa re' raaj i reh chi xkian i peleto i aj Israel kuuk', korehtaal xsacharik kiwach chi kunchelaal kuum i aj Israel. Re' i QaJaaw Dios xuq'or wo' cho reh i Moisés chi ma' naa ta ruketelaam kiwach chi korehtaal kikanteesjik chi kunchelaal.
21Eh re' Josué ruch'ihil taqe i aj Israel chupaam taqe i q'iij re' re' xkisach wach chi jumpech xkichop naah i kitinamiit i riih rumaam Anac. Re' i wilkeeb' chinaah i yuuq' Hebrón, re' i ye'aab' Debir, eh je' wo' ar Anab, je' wo' hoq i wilkeeb' chinaah taqe i yuuq' wilkeeb' Judá, i wilkeeb' Israel.22Je' re' noq ma' jino'q chik i riih rumaam i nimlaj winaq Anac xkahnik chupaam i ruyuq'ul i Israel xa paruyuq'ul chik Gaza, chupaam i ye'aab' Gat, i ye'aab' Asdod chik xi kahnik.
23Eh re' Josué ruch'ihil taqe i aj Israel xkichop naah chu'nchel i ye'aab', nik' wach rub'aan xuq'or i QaJaaw Dios reh i Moisés je' wo' re' rub'aan xkian. Eh xuch'aq wo' hoq i ye'aab' Canaán keh i kab'laj ch'uq chi aj Israel, eh ma' xwihik ta chik q'aq'inik chupaam i ye'aab' re' re'. Re' i Moisés ruch'ihil taqe i aj Israel i xkian reh taqe reey wilkeeb' chi juntar i nim ha' Jordán
1Re' Moisés ruch'ihil taqe i aj Israel re' taqe i reey wili xkian reh re' taqe i wilkeeb' chupaam taqe i ye'aab' chi juntar chee nim ha' Jordán parelb'aal q'iij reje xtohq'ik reje chi chii' i nim ha' Arnón xponik ko waraa' i yuuq' Hermón, eh chu'nchel i ye'aab' Arabá imponik chucheel reje ireelb'aalq'iij.
2Re' Sehón kireey i aj amorreo patim naq Hesbón, re' ye'aab' ruchopom naah imponik ko Aroer, chi chii' i nim ha' Arnón, imponik kopanyejaal i k'ixkaab' ko chi chii' i nim ha' Jaboc, eh xponik ko aha' rutoq'aa' cho wii' i kiye'aab' taqe i riih rumaam i Amón, imponik panyejaal i ye'aab' Galaad.3Eh i ruchop wo' naah haa' i wach k'ixkaab' wilik parookb'aal q'iij reje reh i nim ha' Jordán. Ar intohq'ik reje chi chii' i palaw Ceneret, eh imponik ko chi chii' i kamnaq palaw, imponik panyejaal i ruyuq'ul i tinamit Bet-jesimot, re' wilik reje pansak'aaj reh i rookb'aal q'iij re' wilik wii' i yuuq' Pisga.
4Eh xkian wo' reh i Og wilik chi reyil ar Basán re' re' kik'ulik i xi chalik chupaam i ye'aab' Refaim. Re' Og xpatinik ar Astarot, eh ar Edrei.5Eh rub'an wo' taaq'anik chinaah i ye'aab' intohq'ik reje ruuk' i yuuq' Hermón, imponik ko chupaam i ye'aab' Salca, eh chu'nchel i ye'aab' Basán. Eh imponik kopan k'ula't reh i ye'aab' Gesur, eh re' Maaca imponik panyejaal i ye'aab' Galaad ruchopom naq naah i Sehón wilik naq chi reyil Hesbón.
6Re' Moisés ruch'ihil taqe i aj Israel xkian reh taqe i re'. Eh re' Moisés xuyeew taqe i ye'aab' re' re' keh i ju'jun ch'uq chi riih rumaam Rubén, ruch'ihil i riih rumaam i Gat, je' wo' hoq i yejaal i ch'uq i riih rumaam i Manasés. Re' Josué ruch'ihil taqe i aj Israel xkian reh i reey wilkeeb' chi juntar reje i nim ha' Jordán
7Re' Josué ruch'ihil taqe i aj Israel re' taqe i reey wili xkian reh re' wilkeeb' chupaam taqe i ye'aab' chi juntar chaloq i nim ha' Jordán parookb'aal reje i q'iij. Ar xtohq'ik reje chupaam i tinamit Baal-gad, wach k'ixkaab' Líbano, eh ruuk' i yuuq' Halac imponik ruuk' i ye'aab' Seir. Eh chu'nchel i ye'aab' xkichop naah i Josué xuch'aq keh i chi kich'uhqaal i aj Israel.8Re' taqe i ye'aab' wilik paraxchee', re' i wach k'ixkaab' Jordán, re' taqe i wach salik reje ruuk' i ye'aab' chiq yuuq'. Eh re' taqe ye'aab' Neguev. Eh re' taqe ye'aab' re' re' keh naq taqe i aj heteo, taqe aj amorreo, taqe aj cananeo, taqe aj ferezeo, taqe i aj heveo, taqe i aj jebuseo.
9Re' taqe i reey xkisach wach re' taqe wili: Re' i reey ar Jericó, re' reey ar Hai wilik ma' najt ta ruuk' i Bet-el;10re' reey ar Jerusaleem, re' reey ar Hebrón,11re' reey ar Jarmut, re' reey ar Laquis,12re' reey ar Eglón, re' reey ar Gezer,13re' reey ar Debir, re' reey ar Geder,14re' reey ar Horma, re' reey ar Arad,15re' reey ar Libna, re' reey ar Adulam,16re' reey ar Maceda, re' reey ar Bet-el,17re' reey ar Tapúa, re' reey ar Hefer,18re' reey ar Afec, re' reey ar Sarón,19re' reey ar Madón, re' reey ar Hazor,20re' reey ar Simron-merón, re' reey ar Acsaf,21re' reey ar Taanac, re' reey ar Maguido,22re' reey ar Cedes, re' reey ar Jacneam, re' wilik paruyuq'ul i Carmelo,23re' reey ar Dor, re' reey ar pan tinamit Goim, re' wilik ar Gilgal.24Eh re' reey ar Tirsa, junlaj ru ka'winaq chi reey chu'nchel i xkisach wach i Josué ruch'ihil taqe i aj Israel. Ko wilik naq i ye'aab' komajaa' inkichop nah i aj Israel
1Noq riji' winaq chik i Josué, je' wili i xq'orarik reh ruum i QaJaaw Dios: Re' hat k'ih chik aha'b'ul xanaah re' kook'ih i ye'aab' majaa' ta inkichop naah i aj Israel.2Kox kahnik i kiye'aab' taqe i aj filisteo, je' wo' hoq i kiye'aab' taqe i aj gesureos.3Ar intohq'ik chi chii' i nim ha' Sihor pareelb'aal q'iij reh i Egipto. Eh imponik kopan k'ula't reh i tinamit Ecrón re' wilik pantz'eet reh i rookb'aal q'iij re' inkiq'or chi keh i aj cananeo. Eh chupaam taqe ye'aab' re' re' wilkeeb' i ho'oob' chi reey re' kitaaq'anik chikinaah i aj filisteo re' taqe i wilkeeb' ar Gaza, eh ar Asdod, Ascalón, Ecrón, aveos.4Eh pansak'aaj reje i rookb'aal q'iij chu'nchel i kiye'aab' i aj cananeo, i ye'aab' Mehara, i kiye'aab' i aj Sidón i nik'ik ponoq Afec, eh imponik kopan kik'ula't i aj amorreo.5Eh i kiye'aab' i aj giblitas, haa' i ye'aab' Líbano i wilik reje pareelb'aal q'iij, eh imponik pan tinamit Baal-gad imponik chinaah i yuuq' Hermón, eh imponik panookb'al reh i tinamit Hamat.6Re' hin naa wesaniik reje keh chu'nchel i patim paraxchee' ar intohq'ik reje Líbano, inik'ik ponoq Misrefot-maim, i wilkeeb' Sidón. Xa re' la' re' taqe i ye'aab' re' re' koruman chi naa asik'im chi riij noq naa ach'aqam keh i aj Israel, naa wo' a'nam je' rukab' i nuq'orom aweh.7Re' taqe i ye'aab' re' re' naa taq ach'aqam keh i b'elejeeb' ch'uq chi aj Israel, eh keh wo' hoq i yejaal ch'uq chi riih rumaam Manasés.
8Re' taqe i junch'uq chi riih rumaam i Rubén ruch'ihil i junch'uq chi riih rumaam i Gad, ruch'ihil i yejaal i ch'uq i riih rumaam i Manasés, xkik'ulum chik i kiye'aab' noq ch'aqarik keh ruum i Moisés parelb'aal reje q'iij reh i nim ha' Jordán.9Eh ar intohq'ik reje paruyuq'ul Aroer imponik ko chi chii' i nim ha' Arnón ree tinamit wilik panyejaal k'ixkaab'. Chu'nchel i k'ixkaab' Medeba imponik chupaam i ye'aab' Dibón.10Eh xuch'aq wo' haa' chu'nchel i tinamit ruchopom naah i Sehón re' kireey taqe i aj amorreo patim ar Hesbón korehtaal xponik ko paruk'ula't i kiye'aab' i aj amonita.11Eh haa' i ye'aab' Galaad, re' kiye'aab' i aj gesureo, je' wo' kiye'aab' i aj Maacateo, haa' i yuuq' Hermón, je' wo' chu'nchel i ye'aab' Basán xponik Salca.12Eh haa' i ye'aab' ruchopom naah i Og reey ar Basán, re' imb'anik i taaq'anik Astarot, eh ar Edrei. Eh re' Og re' re' jinaj keh aj refaita re' xuko'leej riib' noq re' Moisés xub'an reh noq xehteesjik reje chupaam i ye'aab' re' re'.13Xa re' wo' chik taqe i riih rumaam i Gesur ruch'ihil i riih rumaam i Maaca, ma' xi ehteesjik ta pan kiye'aab' kuum i aj Israel. Xi kahnik la' chi k'acharik chi kixilak, ar xi kahnik chi jumpech. Re' taqe i ye'aab' xuch'aq i Moisés
14Eh re' i junch'uq chi riih rumaam Leví i ma' xye'arik ta kiye'aab' ruum i Moisés ruum re' taqe re' jilow taqe mayiij chuwach i kaJaaw ki Dios i aj Israel, je' rukab' i q'orooj cho keh ruum i reh.
15Re' Moisés xuch'aq wo' kiye'aab' i junch'uq chi riih rumaam Rubén re' q'oreel jarub' chi kiib' i awach reh.16Re' kiye'aab' xponik ko chupaam i ye'aab' Aroer, chi chii' i nim ha' Arnón, xponik i wilkeeb' wii' i tinamit panyejaal k'ixkaab', je' wo' wach k'ixkaab' Medeba.17Eh xponik chupaam i ye'aab' Hesbón, je' wo' chu'nchel i tinamit wilik wach k'ixkaab' Dibón, i ar Bamot-baal, i Bet-baal-meón.18Je' wo' taqe i ye'aab' Jahaza, i Cademot, i Mefáat,19eh ch'aqarik wo' keh i ye'aab' Quiriataim, Sibma, i Zaret-sahar, re' i yuuq' wilik reje chi chii' i k'ixkaab'.20Ch'aqarik wo' keh i Bet-peor, i Bet-jesimot, eh re' i haa' i wach salik chupaam i ruyuq'ul i Pisga.21Eh ch'aqarik wo' keh chu'nchel i ye'aab' wach k'ixkaab', je' wo' ye'aab' ruchopom naah i Sehón re' i kireey taqe i aj amorreo, re' xwihik cho chi reyil Hesbón. Re' Moisés xub'an reh i Sehón, re' taqe i k'amal b'eeh re' taqe i raj kamanoom ar Madián re' taqe i wili: Re' Evi, re' Requema, re' Zur, re' Hur, eh re' i Reba.22Re' taqe i aj Israel ma' k'isiin i tinamit xkikansaj chi kixilak taqe re' ha' i Balaam re' aj q'iij i rak'uun i Beor.23Re' i ye'aab' xch'aqarik keh i junch'uq chi riih rumaam Rubén imponik ko chi chii' i nim ha' Jordán. Re' i tinamit re' re' ruch'ihil taqe i kok' ye'aab' pantaq ab'iix xye'arik keh re' q'oreel nik' kik'ihaal chi kiib' chi kich'uhqaal.
24Eh re' Moisés xuch'aq wo' keh i ye'aab' i junch'uq chi riih rumaam Gad re' q'oreel nik' k'ihaal chi kiib'.25Re' ye'aab' xch'aqarik keh taqe i re', re' i Jazer, eh chu'nchel i tinamit wilkeeb' paruyuq'ul i Galaad, eh haa' i yejaal i kiye'aab' i riih rumaam i Amón imponik ko Aroer, re' wilik chi k'ulwaach Rabá.26Eh haa' i ye'aab' intohq'ik reje Hesbón, xponik Ramatmizpa imponik Betonim, eh xtohq'ik reje Mahanaim, eh xponik kopan k'ula't ruuk' i ye'aab' Debir.27Eh haa' i wach k'ixkaab' Bet-arom ruch'ihil i Bet-nimra, i tinamit Sucot, ruch'ihil i Zafón, i ruqox i tinamit ruchopom naah i Sehón reey ar Esbón. Eh imponik chi chii' i palaw kineret wilik pantz'eet reh ireelb'aalq'iij chi juntar i nim ha', eh imponik panreelb'aal q'iij, reh i nim ha' Jordán.28Re' taqe i tinamit re' re', ruch'ihil taqe i ye'aab' panab'iix xye'arik keh i riih rumaam Gad, re' q'oreel nik' k'ihaal chi kiib' chi kich'uhqaal.
29Eh re' Moisés xuch'aq keh i ye'aab' i yejaal i riih rumaam i Manasés, re' q'oreel nik' kik'ihaal chi kiib' chi kitzuhb'aal.30Re' ye'aab' xye'arik keh ar intohq'ik reje chupaam i tinamit Mahanaim, chu'nchel i ye'aab' Basán, eh chu'nchel i ye'aab' ruchopom naah i Og reey ar Basán, chu'nchel i ye'aab' panab'iix wilik paruyuq'ul i Jair. Oxk'ahl seht chi tinamit.31Eh xye'arik wo' keh i yejaal i ye'aab' i Galaad, haa' i tinamit Astarot, i tinamit Edrei, chu'nchel i ye'aab' re' re' xye'arik keh i yejaal i junch'uq i riih rumaam i Maquir, riih rumaam i Manasés, re' q'oreel nik' k'ihaal chi kiib' chi kich'uhqaal.
32Re' Moisés xuch'aq keh i aj Israel chu'nchel i wach k'ixkaab' Moab, re' wilik reje pareelb'aal q'iij chi juntar i nim ha' Jordán, wilik chi k'ulwaach i tinamit Jericó.33Eh re' Moisés ma' xuyeew ta kiye'aab' i riih rumaam Leví, xa je' la' wili i xuq'or keh: Re' i rukamaj i qaDios i hoj, hoj aj Israel naa taq rukamaniik chi akooch, inki. Re' Josué xuch'aq i ye'aab' Canaán
1Re' ye'aab' Canaán xch'aqarik keh i aj Israel ruum i Eliazar, k'amal kib'eeh aj tiij ruch'ihil i Josué rak'uun i Nun, kuch'ihil taqe i k'amal kib'eeh i ju'jun ch'uq chi aj Israel.2Eh re' taqe ye'aab' re' re' koxkisik' chi riij noq ch'aqarik keh i b'elejeeb' ch'uq ruuk' i yejaal ch'uq chi aj Israel, je' rukab' i ruq'orom QaJaaw Dios reh i Moisés, chi naa rub'anam.3Re' Moisés ruch'aqam wo' chik i ye'aab' chi juntar i nim ha' Jordán keh i junch'uq chi riih rumaam Rubén, i junch'uq chi riih rumaam Gad, i yejaal i ch'uq chi riih rumaam Manasés. Eh re' taqe i riih rumaam Leví ma' xkiyeew ta kiye'aab'.4Re' taqe xikin riih rumaam José ka'ch'uq taqe, re' taqe i riih rumaam Manasés, eh re' taqe riih rumaam Efraín. Eh re' taqe i junch'uq chi riih rumaam i Leví ma' xkiyeew ta ruye'aab', xa re' wo' xye'arik keh i xi patinik wii' pan tinamit ruch'ihil i ye'aab' i kichikoop.5Re' taqe i aj Israel xkich'aq wo' hoq i ye'aab' chi je' re' rukab' i ruq'orom chaloq i QaJaaw Dios reh i Moisés. Re' ye'aab' Hebrón xch'aqarik reh i Caleb
6Eh pan jinaj q'iij re' taqe i riih rumaam i Judá xiooj ar Gilgal chuq'orob'jiik i Josué, eh re' Caleb i rak'uun i Jefone, Kenezar i rutinamiit, je' wili i xuq'or reh i Josué: Re' hat aweht'al chib'ih jariik i xuq'or i QaJaaw Dios reh i Moisés re' i raj kamanoom ar Cades-barnea chawiij i hat, je' wo' chi wiij i hin.7Re' hin ka'winaq haab' naq i wilik weh noq wilkooj ar Cades-barnea, re' noq xirutaq'aaj chaloq i Moisés chi rilariik nik' wach noq wilik i ye'aab' Canaán, eh noq ximponik xnuq'or wo' hoq i korik nik' wach noq wilik i ye'aab'.8Re' taqe i xi k'ulik chi wiij chutahariik i ye'aab' re' re' xkiyohb'isaj i tinamit ruuk' i xponik kiq'or chi riij i ye'aab'. Eh re' hin xnuq'or i korik aha' wilik i xraaj i waJaaw i nuDios.9Eh chupaam i q'iij re' re', re' Moisés je' wili i xuq'or weh: Re' ye'aab' xat ik'ik wii' naa rukahniik chi aweh chi juneliik. Eh naa wo' rukahniik chi keh awiih aamaam ruum chi xa a'n aha' wilik i xuq'or aweh i waJaaw i nuDios, inki.10Re' wili hoob' roxk'ahl haab' chik ruq'orom chaloq i QaJaaw Dios reh i Moisés, re' noq k'ahchi' cho kik'ik i aj Israel chupaam i ye'aab' chiq yuuq'. Eh ruum i wilik i ruq'orom rib'iral weh kok'ahchi' ruye'em cho nuk'achariik yu'naak. Re' hin kajwinaq haab' chik ruuk' hoob' haab' i wilik weh.11Eh yu'naak xa ko hin wo' kow inwik'raaj wiib', xa ko je' wo' rukab' noq xirutaq'aaj chee Moisés chi rutahariik i ye'aab' Canaán, xa ko hin wo' kow reh ojik chi q'aq'inik, xa konee wo' kinooj aha' pa' inwaaj ojik panuk'ux i hin.12Eh chayeew tii weh i ye'aab' rax chee' wach re' i ruq'orom rib'iral weh i QaJaaw Dios. Re' hat aweht'al chi xawilkeeb' wo' chi patinik chupaam i ye'aab' re' re' taqe riih rumaam i nimlaj winaq Anac, nimaq i kitinamiit kotimaj kiij chi tz'aq. Re' hin re' Dios neentoob'inik weh chi kehteesjiik reje ar, je' rukab' i ruq'orom weh, inki.
13Eh re' i Josué je' wili i xuq'or reh i Caleb rak'uun i Jefone: Re' ta naq i QaJaaw Dios neentoob'inik aweh, inki. Eh xuyeew wo' reh i ye'aab' Hebrón.14Je' aj re' noq re' i ye'aab' Hebrón xkahnik chi reh i Caleb, je' wo' keh taqe i riih rumaam, eh xkahnik chi keh chi jumpech. Je' re' i xb'aan ruuk' i Caleb ruum xub'an i xq'orarik reh ruum i kaJaaw i ki Dios i aj Israel.15Re' naq i rub'ihnaal cho pampeet i ye'aab' Hebrón Quiriat-arba re' i b'ihnaal Arba re' ruuk' taqe i rumaam rati't i nimlaj winaq Anac.
Chi riij i re' xwihik i suq laj k'acharik chupaam i ye'aab' re' re'. Re' i ye'aab' wili xye'arik keh i riih rumaam Judá
1Re' i ye'aab' wili xye'arik keh i riih rumaam i Judá, noq kisik'im chik chi riij re' q'oreel nik' kik'ihaal chi kiib' chi kich'uhqaal. Ar i tohq'ik reje pank'ula't ruuk' i ye'aab' Edom, imponik pansak'aaj reh i rookb'aal q'iij chupaam i ye'aab' chiq yuuq' reh i ye'aab' Zin.2Eh re' i k'ula't re' re' imponik pansak'aaj reh i rookb'aal i q'iij reh i kamnaq palaw.3Eh pansak'aaj reh i rookb'aal q'iij imponik i wilik wii' i yuuq' Acrabim, inik'ik reje panchiq yuuq' wilik ar Zin. Eh i nik'ik reje pansak'aaj reh i rookb'aal q'iij reh i ye'aab' Cades-barnea, eh i nik'ik ponoq Hezrón, injohtik johtoq Adar, eh imponik sutinoq ar Carca.4Eh inik'ik ponoq Asmón, inooj eloq chi chii' i nim ha' inchalik Egipto, ar inooj kuxoq chi chii' i palaw Mediterráneo inooj kuxoq i k'ula't wilik reje pantz'eet reh i rookb'aal q'iij.5Eh re' i ruk'ula'tiil i chii' parelb'aal reje q'iij re' i chii' i kamnaq palaw imponik inokik wii' i nim ha' Jordán. Eh ar intohq'ik reje i ruk'ula'tiil i chii' i wilik reje pantz'eet reh i rookb'aal q'iij.6Eh injohtik johtoq chupaam i ye'aab' Bet-hogla, inik'ik pantz'eet reh i rookb'aal q'iij reh i ye'aab' Bet-arabá, eh inooj i wilik wii' i paat ab'aj Bohán ruye'aab' i rak'uun i Rubén.7Chi riij i re' inik'ik reje i wilik wii' i ye'aab' Debir ar wach k'ixkaab' Acor, imponik sutinoq chupaam i ye'aab' Gilgal wilik chi k'ul wach i yuuq' Adumín, pantz'eet reh i rookb'aal q'iij reh i nim ha'. Re' k'ula't i nik'ik ponoq i wilik wii' i k'achlik ha' En-semes rub'ihnaal, eh inooj eloq i wilik wii' i nim ha' Rogel.8Eh inik'ik ponoq wach k'ixkaab' Ben-hinom pansak'aaj reh i rookb'aal q'iij reh i ye'aab' jebuseo, re' wo' hoq i Jerusaleem. Chi riij i re' inik'ik ponoq chinaah i yuuq' chi k'ul wach i k'ixkaab' Hinom wilik reje parookb'aal q'iij, eh pantz'eet reje reh i rookb'aal q'iij reh i ye'aab' Refaim.9Re' k'ula't re' re' imponik sutinoq kochinaah i yuuq' imponik i wilik wii' i k'achlik ha' wilik Neftoa. Eh imponik chupaam taqe i tinamit wilkeeb' chinaah i yuuq' Efrón, inik'ik ponoq chupaam i ye'aab' Baala, eh Quiriat-jearim wo' inkiq'or reh.10Eh Baala imponik sutinoq i ruk'ula'tiil i ye'aab' re' re' inooj reje chi korkiil i rookb'aal q'iij chinaah i yuuq' Seir, inik'ik chucheel i yuuq' Jearim. Eh imponik Quesolón wilik reje pansak'aaj reh i rookb'aal q'iij imponik Bet-semes, eh inik'ik pan tinamit Timna.11Eh re' i ye'aab' re' re' pantz'eet reh i rookb'aal q'iij, intohq'ik chaloq chinaah i yuuq' Ecrón, inooj reje Sicrón, xik'ik chinaah i yuuq' Baala, xik'ik wo' ponoq Jabneel. Eh ko ar xooj kuxoq wach chi chii' i palaw Mediterráneo.12Eh re' i ruk'ula'tiil i ye'aab' re' re' pansak'aaj reh i rookb'aal q'iij re' i palaw Mediterráneo. Re' taqe wili i ruk'ula'tiil i ye'aab' xch'aqarik keh i junch'uq chi riih rumaam i Judá re' q'oreel nik' kik'ihaal chi kiib'. Re' Caleb rehchaaj i ye'aab' Hebrón, i ye'aab' Debir
13Re' i Josué xuyeew ruye'aab' i Caleb rak'uun i Jefone chi kixilak i riih rumaam i Judá, je' rukab' xuq'or i QaJaaw Dios reh i Josué. Re' ye'aab' xye'arik reh re' i Quiriat-arba, eh Hebrón wo' inkiq'or reh, re' i kitinamiit i riih rumaam nimlaj winaq Anac rub'ihnaal.14Re' Caleb xresaj taqe chupaam i ye'aab' re' re' ixib' chi rak'uun i Anac, je' wili i kib'ihnaal: Sesai, Ahimán, Talmai.15Eh noq rehchaaj i ye'aab' re' re' xooj wo' chi rehtesjiik taqe i wilkeeb' Debir. Re' tinamit Debir Quiriat-sefer i b'ih inkiq'or cho najtir.16Eh re' Caleb je' wili i xuq'or: Awach i nenooj chi q'aq'inik, eh nee ruchop naah i tinamit Quiriat-sefer, re' hin neenuyeew chi rehk'een i wixq'uun Acsa rub'ihnaal, inki.
17Re' i tinamit re' re', re' Otoniel xchopwik naah rak'uun i Cenaz ruchaaq wo' i Caleb, eh xuyeew wo' chi rehk'een i Otoniel i rixq'uun Acsa i rub'ihnaal.18Eh noq ojik chik inki a'n pankipaat re' Otoniel xuq'or reh i Acsa chi chupahqaaj reh i rajaaw chi ye'aroq ruye'aab' tikb'al chib'ih reh. Re' i Acsa xqajik chi riij i b'uurux. Eh re' i Caleb xupahqaaj reh i rixq'uun chi je' wili:
Chib'ih naq inawaaj inki.
19Re' reh je' wili xuq'or: Re' hin weht'al chi xayeew chik weh i chiq yuuq' Neguev, xa re' la' inwaaj wo' chik nee nayeew weh i ye'aab' wilik wii' i k'achlik ha', inki.
Eh re' Caleb xuyeew wo' keh i ye'aab' wilik wii' i k'achlik ha' taxaaj je' wo' hoq i wilik wii' i k'achlik ha' panyuuq'. Re' taqe i tinamit wili xkehchaaj i junch'uq chi riih rumaam Judá
20Re' taqe i tinamit wili xkehchaaj i junch'uq chi riih rumaam i Judá nik' kik'ihaal chi kiib' chi kich'uhqaal.21Re' taqe i tinamit xkehchaaj pansak'aaj reh i rookb'aal q'iij pank'ula't reje ruuk' i Edom je' wili kib'ihnaal: Cabseel, Edar, Jagur.22Cina, Dimona, Adada,23Cedes, Hazor, Itnán,24Zif, Telem, Bealot,25Hazor-hadata, Queriot, Hezrón Hazor i rukab' b'ih.26Amam, Sema, Molada,27Hazar-gada, Hesmón, Bet-pelet,28Hazar-sual, Beerseba, Bizotia,29Baala, Lim, Esem,30Eltolad, Quesil, Horma,31Siclag, Madmana, Sansana,32Lebaot, Silhim, Aín, Rimón, b'elejeeb' ru ka'winaq chu'nchel i tinamit xkehchaaj, haa' taqe i kok' ye'aab' wilkeeb' wii' patineel.
33Eh re' taqe i tinamit xkehchaaj i wach k'ixkaab' je' wili kib'ihnaal: Estaol, Zora, Asena,34Zanoa, En-ganim, Tapúa, Enam,35Jarmut, Adulam, Soco, Azeca,36Saaraim, Aditaim, Gedera, Gederotaim, kajlaj taqe chi tinamit chu'nchel, haa' taqe kok' ye'aab' wilkeeb' wii' patineel.
37Zenán, Hadasa, Migdal-gad,38Dileán, Mizpa, Jocteel,39Loquis, Boscat, Eglón,40Cabón, Lohmam, Quitlis,41Gederot, Bet-dagón, Naama, Maceda, waqlaj taqe chi tinamit chu'nchel, haa' taqe i kok' ye'aab' wilkeeb' wii' patineel.
42Re' re' taqe i tinamit Libna, Eter, Asán,43Jifta, Asena, Nezib.44Keila, Aczib, Maresá, b'elejeeb' taqe chi tinamit chu'nchel, haa' taqe i kok' ye'aab' wilkeeb' wii' patineel.
45Eh haa' i tinamit Ecrón, haa' taqe i kok' tinamit, haa' taqe i kok' ye'aab' wilkeeb' wii' patineel.46Ar intohq'ik cho Ecrón imponik ko chi chii' i palaw Mediterráneo, eh haa' chu'nchel i tinamit wilik chuka'jaah i tinamit Asdod, haa' i kok' ye'aab' wilkeeb' wii' i patineel.
47Eh haa' tinamit Asdod, i kok' tinamit, haa' i kok' ye'aab' wilkeeb' wii' i patineel, haa' i tinamit Gaza, haa' taqe kok' tinamit i kok' ye'aab' wilkeeb' wii' i patineel. Eh xponik chi chii' i nim ha' inchalik Egipto, xponik chi chii' i nimlaj palaw.
48Eh chupaam i raxchee' re' taqe i aj Judá xkehchaaj taqe i tinamit je' wili kib'ihnaal: Samir, Jatir, Soco.49Dana, Quiriat-sana, Debir wo' chik i rub'ihnaal inkiq'or.50Re' Anab, re' Estemoa, re' Anim.51Gosén, Holón, Gilo, junlaj chi tinamit chu'nchel, haa' taqe i kok' ye'aab' wilkeeb' wii' i patineel.
52Re' taqe haa' i tinamit Arab, Duma, Esán,53Janum, Bet-tapúa, Afeca,54Humta, Quiriat-arba, Hebrón wo' chik i b'ih inkiq'or, Sior, b'elejeeb' chi tinamit, haa' taqe kok' ye'aab' wilkeeb' wii' patineel.
55Eh haa' wo' taqe i tinamit je' wili kib'ihnaal: Maón, Carmel, Zif, Juta,56Jerzeel, Jocdeam, Zanoa,57Caín, Gabaa, Timna, lajeeb' taqe chi tinamit, haa' taqe kok' ye'aab' wilkeeb' wii' i patineel.
58Eh haa' taqe i tinamit je' wili i kib'ihnaal: Halhul, Bet-sur, Gedor,59Maarat, Bet-anot, Eltecón, waqiib' taqe chi tinamit, haa' taqe i kok' ye'aab' wilkeeb' wii' i patineel.
60Re' wo' haa' taqe tinamit je' wili kib'ihnaal: Quiriat-baal, Quiriat-jearim wo' inkiq'or reh, Rabá, re' haa' taqe i kok' ye'aab' wilkeeb' wii' patineel.
61Eh chupaam i ye'aab' chiq yuuq' xkehchaaj taqe i tinamit je' wili kib'ihnaal: Bet-arabá, Midín, Secaca,62Nibsán, re' tinamit i nelik wii' i aatz'aam, En-gadi, waqiib' taqe chi tinamit, haa' taqe i kok' ye'aab' wilkeeb' wii' patineel. Re' i xkehchaaj i riih rumaam i Judá.
63Eh re' keh ma' xkian ta reje kehteesjiik taqe i aj jebuseo wilkeeb' ar Jerusaleem. Je' re' noq re' taqe i aj jebuseo ar Jerusaleem xi kahnik chi jumpech chi kixilak i riih rumaam i Judá. Re' taqe i ye'aab' wili xkehchaaj i riih rumaam Efraín
1Noq sik'ooj chik chi riij re' wili i ye'aab' kehchaaj i riih rumaam José: Ar xtohq'ik parelb'aal q'iij reh i nim ha' Jordán. Eh xponik chi chii' k'achlik ha' Jericó, xooj chupaam i ye'aab' chiq yuuq', xooj johtoq pantaq rax chee' wilik chuk'ulwaach i Jericó, xponik Bet-el.2Eh xelik reje Bet-el, Luz wo' inkiq'or reh i xooj i k'oq ko chupaam i tinamit Atarot chupaam i kiye'aab' i aj arquita ko Astarot.3Eh xooj i k'oq parookb'aal reje q'iij chupaam i kiye'aab' i aj Jafletira. Eh xponik kopan k'ula't reh i tinamit Bet-horón, xponik wo' ko chupaam ar Gezer, xooj k'oloq chi chii' i palaw Mediterráneo.4Re' taqe i ye'aab' wili xkehchaaj i riih rumaam i Manasés, riih rumaam i Efraín, re' i kiib' chi rak'uun José.
5Je' wili noq wilik i ruk'ula'tiil i kiye'aab' xkik'ul i riih rumaam Efraín, re' q'oreel nik' kik'ihaal chi kiib', parookb'aal reje reh i q'iij, ar xtohq'ik chaloq i Atarot-adar, xponik ko Bet-horón re' tinamit wilik nah yuuq'.6Eh re' kik'ula't pantz'eet reh i rookb'aal q'iij, ar xtohq'ik chaloq chi chii' i palaw Mediterráneo. Eh xponik ar Micmetat, eh ar xponik parelb'aal q'iij reje, xponik ar Jaanat. Eh i xik'ik reje ar Janoa.7Eh xooj k'oloq ar Atarot, eh Naarat. Eh xponik ar Jericó. Eh xponik i wilik wii' i nim ha' Jordán.8Eh ar xtohq'ik chaloq Tapúa xponik i wilik wii' i nim ha' Caná, xponik chi chii' i palaw Mediterráneo. Re' i wili xch'aqarik keh chu'nchel i riih rumaam Efraín.9Eh wilik wo' hoq kiib' ixib' i tinamit, haa' taqe i kok' ye'aab' wilkeeb' wii' patineel xkehchaaj i riih rumaam Efraín, re' ruuk' i xkehchaaj i riih rumaam i Manasés.10Eh re' taqe i riih rumaam i Efraín, ma' xkesaj ta taqe i cananeo wilkeeb' ar Gezer, xkikanaa' chi k'acharik chi kixilak xa re' la' xkiq'or reh i aj cananeo chi naa kianam i tooj, eh ar xi kahnik chi jumpech. Wili i ye'aab' xkehchaaj i riih rumaam Manasés
1Noq xsik'ooj chik chi riij, re' ye'aab' wili xkehchaaj i junch'uq chi i riih rumaam Manasés, re' peet rak'uun i José. Eh Maquir i peet rak'uun i Manasés rajaaw i Galaad. Re' taqe riih rumaam i Maquir kow kiib' chi q'aq'inik ruum aj re' xkichop naah i ye'aab' Galaad, i ye'aab' Basán.2Eh re' i ye'aab' wili xkik'ul chu'nchel riih rumaam i Manasés junch'uq. Re' taqe wili i xik'ulwik reh i ye'aab' wilik chi juntar i nim ha' Jordán: Re' taqe i riih rumaam i Abiezer, taqe riih rumaam i Helec, taqe i riih rumaam i Asriel, taqe riih rumaam i Siquem, taqe i riih rumaam i Hefer, taqe riih rumaam i Semida. Eh xikin riih taqe i José.
3Re' Manasés rajaaw i Maquir, eh re' Maquir rajaaw i Galaad, eh re' Galaad rajaaw i Hefer. Eh re' i Hefer rajaaw i Zelofehad. Eh re' Zelofehad ma' xwihik ta jino'q rak'uun, xarixq'uun i xwihik ho'oob' chi kiib' je' wili i kib'ihnaal: Maala, Noa, Hogla, Milcá, Tirsa.4Re' taqe ixoq re' re' xiooj ruuk' i Eliazar k'amal b'eeh aj tiij, ruuk' i Josué rak'uun i Nun, kuuk' taqe i k'amal kib'eeh i aj Israel, je' wili i xkiq'or: Re' QaJaaw Dios ruq'orom reh i Moisés chi naa wo' taq aye'em qaye'aab' i hoj je' rukab' i xkik'ul i ma' tokoom ta quuk', inki taqe. Eh re' Josué xuyeew wo' kiye'aab' je' rukab' i xkik'ul i ma' tokoom ta kuuk', je' rukab' i ruq'orom i QaJaaw Dios.
5Je' aj re' noq re' taqe i riih rumaam Manasés lajeeb' seht chik i naah i kiye'aab' xkik'ul chuwach i xkik'ul Galaad, ruch'ihil i Basán, re' wilik chi juntar i nim ha' Jordán.6Ruum re' taqe i rixq'uun i Zelofehad riih rumaam i Manasés ye'arik wo' kiye'aab' chi kixilak taqe i riih rumaam winaq. Eh re' ye'aab' Galaad xye'arik keh i junch'uq chik chi riih rumaam i Manasés.7Re' kiye'aab' xkik'ul i riih rumaam i Manasés ar xtohq'ik chaloq chupaam i ye'aab' Aser, eh xponik ko chupaam i ye'aab' Micmetat. Re' i ye'aab' wilik chuk'ul wach i ye'aab' Siquem, eh xooj k'oloq chupaam i ye'aab' Tapúa.8Eh re' taqe i ye'aab' ar Tapúa xkahnik chi keh i riih rumaam i Manasés, xa re' la' re' ye'aab' Tapúa wilik pank'ula't i ye'aab' re' re' xkahnik keh i riih rumaam i Efraín.9Eh wilik wo' i ye'aab' xkahnik keh i riih rumaam i Efraín re' ruuk' i kiye'aab' i riih rumaam i Manasés. Re' kiye'aab' i keh, ar xtohq'ik chi chii' i nim ha' Caná. Ar xelik chaloq pansak'aaj reh i rookb'aal q'iij xponik pank'ula't pantz'eet reh i rookb'aal q'iij, xponik inokik wii' i nim ha' chupaam i palaw Mediterráneo.10Eh re' i kiye'aab' i riih rumaam i Efraín, ar wilik pansak'aaj reh i rookb'aal q'iij, eh re' kiye'aab' i riih rumaam i Manasés ar wilik pantz'eet reh i rookb'aal q'iij, eh re' i palaw inq'atwik paam. Eh pantz'eet reh i rookb'aal q'iij i ruk'ula'teej i kiye'aab' i Aser, eh parelb'aal reje q'iij i ruk'ula'teej i kiye'aab' i Isacar.11Eh wilik wo' hoq i tinamit xkik'ul i riih rumaam i Manasés, wilik pankiyuq'ul i Isacar, i Aser je' wili i kib'ihnaal: Bet-seán, Ibleam, Dor, Endor, ruch'ihil taqe i kok' ye'aab' wilkeeb' wii' i patineel kichopom naah. Eh je' wo' hoq i tinamit Maguidor, ruch'ihil ixib' chi tinamit wilkeeb' chinaah i rub'ohl i yuuq'.12Eh re' taqe i riih rumaam i Manasés ma' xkian ta reje rehtesjiik chupaam i tinamit re' re' taqe i aj cananeo, ruum re' taqe i aj cananeo ma' xkaaj ta elik ar, je' re' noq xi kahnik chi wihik chi kixilak.13Eh noq xikowjik i aj Israel i xkiq'or reh taqe i aj cananeo chi naa kianam i tooj, eh xama' xkesaj ta wo' taqe reje ar.
14Eh re' taqe i riih rumaam José je' wili i xkiq'or reh i Josué:
¿Chib'ih reet noq xa re' i qaye'aab' wili xayeew? Re' hoj k'ahchi' wo' cho kooj rukuxisam QaJaaw Dios ruum i re' hoj k'ih chiqiib', inki taqe.
15Re' Josué je' wili i xuq'or:
Ruum chi k'ih taq chawiib' i hat ma' ti ruk'am ta taq chik i naah taqe yuuq' wilkeeb' wii' taqe i riih rumaam i Efraín. Eh neerub'an chi nee taq tiooj chupaam taqe i ye'aab' nimaq ch'ahn wach kore' taq i hat neenaqasaj wach, chupaam i kiye'aab' i aj eferezeo, i kiye'aab' i aj refaita, inki.
16Re' taqe i riih rumaam José je' wili i xkiq'or:
Korik noq ma' nee ta manlojik qeh i yuuq' re' re'. Eh re' taqe i aj cananeo wilkeeb' ar je' wo' taqe i wilkeeb' chupaam i ye'aab' wach k'ixkaab' wilik kich'ihch' kareta. Eh je' wo' taqe i wilkeeb' Bet-seán, eh i kok' ye'aab' wilkeeb' wii' i patineel, je' wo' taqe i wilkeeb' wach k'ixkaab' Jezreel, inki taqe.
17Eh re' Josué je' wili i xuq'or keh i riih rumaam i Efraín, i riih rumaam i Manasés:
Re' chi re' taq i hat xiik' taq naah ak'ihaal, ruum i re' q'e' taq kow awiib': Ruum aj re' i ruk'ul chi naa taq awehchaam i ye'aab' xnuq'or taq aweh.18Re' taqe i yuuq' re' re' chee' wach naa taq awehchaam, eh kore' taq i hat naa aqasanik wach. Eh re' taqe i aj cananeo wilkeeb' ar korehtaal taq inawesaj reje, atoob' ta re' keh q'e' kow kiib', atoob' ta k'ih i kikareta wilik, inki. Re' taqe i ye'aab' xkik'ul i wuquub' ch'uq chi aj Israel
1Chu'nchel i aj Israel xkimol kiib' ar Silo, ar xkiyejaa' i santo laj itz'ihy naah paat molb'al iib'. Eh chupaam taqe q'iij re' re' kichopom chik naah taqe i ye'aab' re' re'.2Xa re' la' ko wuquub' naq chik ch'uq taqe i aj Israel komajaa' inkik'ul i kiye'aab'.
3Eh re' Josué je' wili i xuq'or keh i aj Israel: ¿Chib'ih taq chik i naawuy-eej chi ma' naachop ta taq naah i ye'aab' ruye'em taq aweh i kaJaaw ki Dios qamaam qati't?4Re' taq i hat cha sik' taq wach ox ox-oq i winaq chi kixilak i ju'jun ch'uq chi awuch aj Israel, reh chi re' hin neenutaq'aaj taqe chi rutahariik i ye'aab'. Eh neen k'ulik kiq'or weh nik' wach noq wilik chi je' re' nee nuch'aq taq aweh i hat.5Re' taqe winaq re' re' wuquub' nee nkesaj i ye'aab', re' wilik pansak'aaj reh i rookb'aal q'iij naa rukahniik keh i riih rumaam i Judá. Eh re' wilik pantz'eet reh i rookb'aal q'iij naa rukahniik keh i riih rumaam i José.6Eh noq kich'aqam chik wuquub' chik kesam neenkitz'ihb'aaj cho rehtalil nekik'am cho weh, eh ayu' neenqasik' chi riij chuwach i QaJaaw i qaDios.7Eh re' taqe i riih rumaam Leví ma' naa ta ruye'ariik kiye'aab', re' i naa ruye'ariik kekeh re' chi naa kikahniik chi k'amal kib'eeh aj tiij taqe chuwach i Dios. Eh re' taqe riih rumaam i Gad, taqe i riih rumaam i Rubén, i yejaal i ch'uq reh i riih rumaam i Manasés, xye'arik kiye'aab' i keh chi juntar i nim ha' Jordán parelb'aal reje i q'iij. Re' i xye'arik keh ruum i Moisés raj kamanoom i Dios, inki.
8Eh re' taqe i naa rojiik kitz'ihb'aam nik' wach noq wilik i ye'aab', xkichop kik'ux chi ojik, je' wili xq'orarik reje keh ruum i Josué: Hiy taq chawil chu'nchel i ye'aab' chach'aq taq, noq akohlaam taq chik, cha tz'ihb'aaj taq rehtalil chak'am taq cho weh, reh chi re' hin neenusik' chi riij ayu' Silo chuwach i QaJaaw Dios.
9Eh re' taqe winaq re' re' xooj wo' kib'ehuj paam chu'nchel i ye'aab' xkich'aq wuquub' xkesaj, eh kitz'ihb'aaj cho rehtalil chu'nchel, xkik'am cho reh i Josué ar Silo, re' wilik wii' i ki-itz'ihy naah paat.10Chi riij i re', re' Josué xusik' chi riij chuwach i Dios noq xuch'aq i ye'aab' Silo noq xuyeew keh i aj Israel, re' q'oreel aha' wilik i xkahnik keh.
11Eh noq sik'ooj chik chi riij aha' wilik i ye'aab' naa rukahniik keh, re' taqe riih rumaam Benjamín, ar xkik'ul i kiye'aab' chupaam i ruyuq'ul i kiye'aab' i riih rumaam i Judá i kiye'aab' i riih rumaam i José.12Eh re' ye'aab' xkik'ul imponik k'ula'tinoq pantz'eet reh i rookb'aal q'iij, xponik ko chi chii' i nim ha' Jordán. Eh xooj i k'oq pantz'eet reh i rookb'aal q'iij reh i Jericó, eh xik'ik ponoq pantaq rax chee' wilik parookb'aal i q'iij. Eh ar xooj k'oloq panchiq yuuq' Bet-avén.13Eh xooj k'oloq chupaam i ye'aab' Luz rub'ihnaal, re' wo' hoq i Bet-el. Eh re' i k'ula't pansak'aaj reje reh i rookb'aal q'iij xooj k'oloq ar Atarot-adar, xooj k'oloq chinaah yuuq' wilik pansak'aaj reje reh i rookb'aal i q'iij reh i tinamit Bet-horón wilik panyuuq'.14Eh re' i ruk'ula'tiil i kiye'aab' ar Bet-horón wilik chuk'ulwaach, xponik ko chi chii' i palaw Mediterráneo, xponik kochuwach i Quiriat-baal, eh Quiriat-jearim, wo' inkiq'or reh. Re' ye'aab' re' re' keh taqe i riih rumaam i Judá, re' taqe i re' i ruk'ula'tiil chi korkiil reje i rookb'aal i q'iij.
15Eh re' ruk'ula'tiil pansak'aaj reje reh i rookb'aal q'iij ar intohq'ik chaloq Quiriat-jearim, xponik i wilik wii' i k'achlik ha' Neftoa wilik chi korkiil reje i rookb'aal q'iij.16Eh xooj qohoq chu'nchel i yuuq' wilik chuk'ulwaach i k'ixkaab' Ben-hinom, pantz'eet reje reh i rookb'aal q'iij reh i k'ixkaab' Refaim. Eh xqajik qohoq wach k'ixkaab' Hinom, xik'ik reje pantz'eet reh i rookb'aal q'iij wilkeeb' wii' i aj jebuseo, eh xooj eloq i wilik wii' i k'achlik ha' Rogel.17Chi riij i re' xsutinik reje pantz'eet reh i rookb'aal i q'iij chupaam i ye'aab' En-semes, eh xooj k'oloq Gelilot, re' wilik chuk'ulwaach i yuuq' Adumín. Eh xponik i wilik wii' i paat ab'aj, wilik paruye'aab' i Bohán i rak'uun i Rubén.18Eh xik'ik reje chuwach i yuuq' wilik chuk'ulwaach i ye'aab' Arabá, i wilik pansak'aaj reje reh i rookb'aal q'iij imponik ko Arabá.19Re' k'ula't re' re' xik'ik ponoq Bet-hogla wilik pantz'eet reje reh i rookb'aal q'iij, xooj kuxoq chi chii' i kamnaq palaw, re' i xooj okoq wii' i rooq i nim ha' Jordán. Re' wili i ruk'ula'tiil i ye'aab' pansak'aaj reje reh i rookb'aal q'iij.
20Eh re' ruk'ula'tiil i ye'aab' parelb'aal reje i q'iij re' i nim ha' Jordán. Re' i ye'aab' re' re' xch'aqarik keh i riih rumaam Benjamín re' q'oreel nik' k'ihaal chi kiib' chi kich'uhqaal.
21Re' taqe i tinamit xye'arik keh i riih rumaam i Benjamín je' wili kib'ihnaal: Jericó, Bet-hogla, wach k'ixkaab' Casis,22Bet-arabá, Zemaraim, Bet-el,23Avim, Pará, Ofra,24Quefar-haamoni, Ofni, Geba. Eh kab'laj chi kiib' chu'nchel i tinamit, ruch'ihil taqe i kok' ye'aab' wilkeeb' wii' patineel kichopom naah.25Eh xye'arik keh i tinamit je' wili kib'ihnaal: Gabaón, Ramá, Beerot,26Mizpa, Cafira, Mozah,27Requem, Irpeel, Tarala,28Zela, Elef, Jebús, eh Jerusaleem wo' kiq'or reh, Gabaa, Quiriat. Eh kajlaj chi kiib' i tinamit, ruch'ihil taqe i kok' ye'aab' wilkeeb' wii' patineel kichopom naah re' xye'arik keh i riih rumaam Benjamín, re' q'oreel nik' k'ihaal chi kiib'. Re' i ye'aab' xkik'ul i junch'uq chi riih rumaam i Simeón
1Re' i rukab' ye'aab' xkisik' chi riij awach eh naa rukahniik, re' xkik'ul i junch'uq chi riih rumaam Simeón. Re' ye'aab' re' re' ar xkahnik chupaam i ruyuq'ul i kiye'aab' i junch'uq chi riih rumaam i Judá.2Eh xye'arik keh i tinamit je' wili kib'ihnaal: Beerseba, Seba, Molada,3Hazar-sual, Bala, Ezem,4Eltolad, Betul, Horma,5Siglag, Bet-marcabot, Hazar-susa,6Bet-lebaot, Saruhén, oxlaj taqe chi tinamit haa' taqe i kok' ye'aab' wilkeeb' wii patineel.7Eh xye'arik wo' keh taqe i ye'aab': Aín, Rimón, Eter, Asán kajseht taqe chi tinamit, haa' taqe i kok' ye'aab' wilkeeb' wii' i patineel.8Eh haa' wo' taqe i kok' ye'aab' wilkeeb' wii' patineel, xponik ko Baalat-beer, re' wo' hoq i Ramat, wilik paruyuq'ul Neguev. Re' taqe i ye'aab' re' re' xye'arik keh taqe i junch'uq chi riih rumaam i Simeón, re' q'oreel nik' kik'ihaal chi kiib'.9Eh re' taqe i kiye'aab' xkik'ul i junch'uq chi riih rumaam i Simeón re' wo' ruuk' i kiye'aab' i junch'uq chi riih rumaam i Judá. Ruum re' keh xiik' naah nimaal i ye'aab' xye'arik keh ruum aj re' wilik xye'arik keh taqe i riih rumaam i Simeón.
10Eh re' roox ye'aab' xkisik' chi riij awach eh naa rukahniik, re' xkik'ul i junch'uq chi riih rumaam i Zabulón, re' q'oreel nik' k'ihaal chi kiib'. Re' ye'aab' xkik'ul korehtaal xponik chupaam i tinamit Sarid.11Eh re' i ruk'ula'tiil wilik reje parookb'aal q'iij i xooj k'oloq ko chupaam i ye'aab' Marala. Eh chi riij i re' xooj k'oloq Dabeset, ar xooj kuxoq chi chii' i nim ha' wilik chuk'ulwaach i tinamit Jocneam.12Eh ar xponik sutinoq Sarid i wilik chi korkiil i xelik cho wii' i q'iij, xponik kopan k'ula't, ruuk' i ye'aab' Quislot-tabor, eh ar xooj k'oloq i wilik wii' i ye'aab' Daberat, inooj k'oloq chinaah i yuuq' Jafía.13Chi riij i re' xik'ik ponoq chi korkiil reje ireelb'aalq'iij chupaam i ye'aab' Gat-hefer, eh ar Ita-cazín, xooj k'oloq ko Rimón, i rukotej riij i ye'aab' Nea.14Eh re' i ruk'ula'tiil i ye'aab' pantz'eet reje reh i rookb'aal q'iij xik'ik reje Hanatón, eh xooj eloq wach k'ixkaab' Jefte-el.15Eh xik'ik ponoq chupaam i tinamit Catat, je' wo' Naalal, je' wo' Simrón, je' wo' Idala, eh Belén. Kab'laj taqe chi tinamit, haa' taqe i kok' ye'aab' wilkeeb' wii' patineel.16Re' taqe i ye'aab' wili xkik'ul i junch'uq chi riih rumaam i Zabulón, re' q'oreel nik' kik'ihaal chi kiib', ha' taqe i tinamit wilkeeb' ar, haa' taqe i kok' ye'aab' wilkeeb' wii' patineel.
17Re' rukaaj i ye'aab' xkisik' chi riij awach eh naa rukahniik, re' xkik'ul i junch'uq chi riih rumaam i Isacar, re' q'oreel nik' k'ihaal chi kiib'.18Eh re' ye'aab' xkik'ul re' je' wili kib'ihnaal: Jezreel, Quesulot, Sunem,19Hafaraim, Sihón, Anaharat,20Rabit, Quisión, Ebez,21Remet, En-ganim, En-hada, Bet-pases.22Re' i ruk'ula'tiil i ye'aab' re' re' xponik chupaam i ye'aab' Tabor, Sahazima, Bet-semes, eh ar inooj kuxoq chi chii' i nim ha' Jordán. Waqlaj chi tinamit, haa' taqe i kok' ye'aab' wilkeeb' wii' i patineel.23Re' taqe ye'aab' wili xkik'ul i junch'uq chi riih rumaam i Isacar haa' taqe i tinamit wilkeeb' ar, haa' taqe kok' ye'aab' wilkeeb' wii' patineel.
24Re' roo' ye'aab' xkisik' chi riij awach eh naa rukahniik re' xkik'ul i junch'uq chi riih rumaam i Aser, re' q'oreel nik' k'ihaal chi kiib'.25Re' taqe i tinamit xkik'ul je' wili kib'ihnaal: Helcat, Halí, Betén, Acsaf,26Alamelec, Amad, Misal. Ar xponik kochinaah i yuuq' Carmelo, chi korkiil reje i rookb'aal i q'iij, xponik wo' hoq ko Sihor-libnat.27Chi riij i re' xponik chi korkiil reje i reelb'aal q'iij ar Bet-dagón. Xponik ko ar Zabulón, xponik wach k'ixkaab' reh i Jefte-el pantz'eet reh i rookb'aal i q'iij, xponik Bet-emec ar Neiel, eh xik'ik ponoq Cabul.28Eh xponik wo' chupaam taqe i tinamit je' wili kib'ihnaal: Hebrón, Rehob, Hamón, Caná. Eh xponik i wilik wii' i nimlaj tinamit Sidón.29Eh re' ruk'ula'tiil i kiye'aab' xsutinik chaloq ar Ramá, eh xponik chupaam i ar Tiro i kotimaj riij chi tz'aq, i xooj eloq Hosa, ar xooj eloq chi chii' i palaw Mediterráneo, i xooj k'oloq Mahaleb, eh ar Aczib.30Eh je' wo' ar Uma, Afec, eh ar Rehob. Kiib' ru ka'winaq chi tinamit, haa' taqe i kok' ye'aab' wilkeeb' wii' patineel.31Re' wili i ye'aab' xkichop naah i junch'uq chi riih rumaam i Aser, haa' taqe i tinamit wilkeeb' chupaam, haa' taqe kok' ye'aab' wilkeeb' wii' patineel, re' q'oreel nik' kik'ihaal chi kiib' chi riih rumaam i Neftalí.
32Re' ruwaaq ye'aab' xsik'arik chi riij awach eh naa rukahniik, re' xkik'ul i junch'uq chi riih rumaam i Neftalí re' q'oreel nik' k'ihaal chi kiib'.33Re' ruk'ula'tiil i ye'aab' xkik'ul xponik chupaam i tinamit Helef, Alón-saananim, Adami-neceb, eh xponik ar Janeel, je' wo' chupaam i ye'aab' Lacum, ar inooj k'oloq chi chii' i nim ha' Jordán.34Eh re' ruk'ula'tiil parookb'aal i q'iij, xooj k'oloq ar Aznot-tabor, xooj k'oloq ar Hucoc. Eh xooj pansak'aaj reh i rookb'aal q'iij pan kiye'aab' i riih rumaam Zabulón. Eh xooj wo' panookb'al reh i q'iij pan kiye'aab' i riih rumaam i Aser. Eh inooj parelb'aal q'iij, pan kiye'aab' i riih rumaam i Judá, chi chii' i nim ha' Jordán.35Re' taqe i tinamit kotimaj riij chi tz'aq xye'arik keh i riih rumaam i Neftalí je' wili kib'ihnaal: Sidim, Zer, Hamat, Racat, Cineret,36Adama, Romá, Hazor,37Cedes, Edrei, En-hazor,38Irón, Migdal-el, Horem, Bet-anat, Bet-semes. B'elejlaj chi tinamit, haa' taqe i kok' ye'aab' wilkeeb' wii' patineel.39Re' taqe re' i ye'aab' xkik'ul i riih rumaam i Neftalí, haa' taqe i tinamit wilkeeb' chupaam, haa' taqe i kok' ye'aab' wilkeeb' wii' patineel.
40Re' ruwuuq ye'aab' xkisik' chi riij awach eh naa rukahniik, re' xkik'ul i junch'uq chi riih rumaam i Dan. Re' q'oreel nik' k'ihaal chi kiib'.41Re' taqe i tinamit xkik'ul je' wili kib'ihnaal: Zora, Estaol, Ir-semes.42Saalabín, Ajalón, Jetla,43Elón, Timnat, Ecrón,44Elteque, Gibetón, Baalat,45Jehúd, Bene-berac, Gat-rimón,46Mejarcón, Racón, ruch'ihil i tinamit wilik reje chi k'ulwaach i tinamit Jope.47Re' taqe i riih rumaam i Dan Ma' xmanlojik ta keh i ye'aab' re' re', je' re' noq xiooj chi peleto chupaam i tinamit Lesem, eh noq kikansaj chik chu'nchel i patim taqe ar xkichop naah xi okik chi patinik chupaam i tinamit re' re'. Eh xkijal wach i rub'ihnaal Dan chik i rub'ihnaal xkikoj ruum je' re' i rub'ihnaal chaloq i xikin kimaam.48Re' wili i ye'aab' ruch'ihil taqe i tinamit wilkeeb' chupaam, ruch'ihil wo' taqe i kok' ye'aab' wilkeeb' wii' patineel i jun ch'uq chi riih rumaam i Dan. Re' q'oreel nik' k'ihaal chi kiib'.
49Eh noq re' taqe i aj Israel kikohlaam chik ruch'aqariik chu'nchel i ye'aab'. Eh kik'ulum chik i kiye'aab' chi kich'uhqaal. Re' Josué rak'uun i Nun xye'arik wo' ruye'aab' chi kixilak i aj Israel.50Eh xkian wo' hoq i xuq'or i QaJaaw Dios xkiyeew wo' reh i Josué i ye'aab' Timnat-sera wilik paraxchee', re' ruuk' i kiye'aab' i riih rumaam i Efraín, re' wo' hoq i rupahqaam i Josué. Eh re' reh xuyejaa' wo' chik i tinamit re' re', eh xokik chi patinik ar.
51Re' taqe i ye'aab' wili xuch'aq i Eliazar i k'amal kib'eeh aj tiij keh i ju'jun ch'uq chi aj Israel ruch'ihil i Josué rak'uun i Nun, kuch'ihil taqe i k'amal kib'eeh i aj Israel, noq wilkeeb' ar Silo. Re' i xkisik' chi riij i ye'aab' chuwach i QaJaaw Dios panookb'al reh i santo laj itz'ihy naah paat molb'al iib', aha' wilik i naa rukahniik keh i ju'jun ch'uq chi aj Israel. Eh je' re' noq xkikohlaaj ruch'aqariik chu'nchel i ye'aab'. Re' rusik'ariik kiwach i tinamit ke'emb'al iib'
1Re' i QaJaaw Dios je' wili i xuq'or reh i Josué:2Re' hat cha q'or keh i aj Israel chi kisik' wach taqe i tinamit ke'emb'al iib', je' rukab' i nuq'orom cho reh i Moisés.3Reh chi chupaam i tinamit re' re' nenooj rukeb'aa' riib' i xa chi ma' reht'al nee rukansaj i ras ruchaaq' ma' xata raaj noq neerub'an reh. Eh ar neeruko'leej riib' reh chi ma' nee ta inkanteesjik i reh ruum i awach reh i kamnaq, k'ahchi' rusik'wiik reh.4Eh awach i naa rojiik rukeb'aam riib' chupaam jino'q keh i tinamit re' re', noq naa ruponiik panookb'al koruman chi naa ruch'ob'om rub'ehel chikiwach taqe kitaaq'anik chupaam i tinamit re' re'. Eh re' keh naakiye'em q'ab' reh chi naa rokiik i koq ar, eh naakiye'em ruye'aab', reh chi ar naa rupatiniik.5Eh wila' re' i awach reh i kamnaq xooj k'oloq chi rusik'ariik i xb'anik kaansanik, re' taqe i kitaaq'anik ar ma' nee ta kiq'asaj pan q'ab' i xb'anik ikaansanik ruum ma' xata raaj chi xukansaj i ras ruchaaq' ma' ruum ta chi wilik rupeleto ruuk'.6Eh re' reh ar naa rukeb'aam riib' chupaam i tinamit re' re' korehtaal inq'atarik i q'orik chinaah chikiwach i tinamit. Eh korehtaal inkimik reje i wilik chi kajaaw i k'amal kib'eeh i aj tiij, chupaam i q'iij re' re'. Eh chi riij i re' kora'j nee wo' chik i rub'an re' chi nee wo' chik inooj chupaam re' i rutinamiit xelik cho wii', nee wo' chik inooj parupaat, inki i Dios.
7Eh re' taqe i tinamit wili xkisik' wach i aj Israel: Re' Cedes wilik Galilea, wilik wii' rax chee' nah i yuuq' pan kiye'aab' i riih rumaam i Neftalí, re' i Siquem wilik nah yuuq' pan kiye'aab' i riih rumaam i Efraín. Eh re' i Quiriat-arba, Ehbrón wo' hoq inkiq'or reh, wilik chinaah i yuuq' pan kiye'aab' i riih rumaam i Judá.8Eh chi juntar reje i nim ha' Jordán parookb'aal q'iij reh i Jericó xkisik' wach taqe i tinamit wili: Re' Basán i wilik wach k'ixkaab' chupaam i ye'aab' chiq yuuq' i wilkeeb' wii' i riih rumaam i Rubén, je' wo' hoq i tinamit Ramot, ar Galaad, wilkeeb' wii' riih rumaam i Gad. Re' i tinamit Golán wilkeeb' wii' taqe i riih rumaam i Manasés.9Re' taqe i tinamit wili xkisik' wach i aj Israel chi ke'emb'al kiib' i keh, je' wo' taqe i tokoom tinamit patim chi kixilak. Eh reh chi ar nenooj rukeb'aa' riib' awach i nee rukansaj jino'q i ras ruch'aaq' chi ma' reht'al reh chi ma' nee tankanteesjik ruum i awach reh i kamnaq, noq komajaa' inq'atarik i q'orik chinaah chikiwach i tinamit. Re' taqe tinamit xkik'ul taqe i riih rumaam Leví (1 Cron 6.54-81)
1Re' taqe i k'amal b'eeh chi kixilak i riih rumaam Leví xiooj ruuk' i Eleazar k'amal kib'eeh aj tiij, ruuk' i Josué rak'uun i Nun, kuuk' i k'amal kib'eeh i aj Israel.2Xkian kik'utaaj kuuk' ar Silo wilik ar Canaán, je' wili i xkiq'or ponoq keh: Re' QaJaaw Dios ruq'orom cho reh i Moisés chi naa ruye'ariik qatinamiit naa qawihiik wii', je' wo' hoq i kiye'aab' i qachikoop, inki taqe.3Eh re' taqe i aj Israel xkiyeew wo' i re' ruuk' i kitinamiit, chi kiye'aab' taqe i riih rumaam Leví, eh xye'arik wo' kiye'aab' i kichikoop, je' rukab' i ruq'orom QaJaaw Dios.
4Eh noq xkisik' chi riij aha' wilik naa ruye'ariik keh taqe i riih rumaam Leví, re' ruuk' taqe i riih rumaam Coat rak'uun Aarón, k'amal cho kib'eeh aj tiij. Eh oxlaj chi tinamit i xye'arik keh re' ruuk' i kiye'aab' i riih rumaam i Judá, taqe riih rumaam i Simeón, taqe riih rumaam i Benjamín.5Eh re' taqe i junch'uq chik chi riih rumaam Coat xkik'ul lajeeb' seht chi tinamit re' ruuk' i kiye'aab' i riih rumaam i Efraín, taqe riih rumaam i Dan, re' ruuk' i kiye'aab' taqe yejaal keh i riih rumaam i Manasés.6Eh xkik'ul wo' kitinamiit taqe i riih rumaam Gersón, re' ruuk' i kiye'aab' riih rumaam i Isacar, taqe i riih rumaam i Aser, taqe riih rumaam i Neftalí, re' ruuk' i kiye'aab' i yejaal ch'uq keh i riih rumaam i Manasés. Oxlaj seht chi tinamit i xkik'ul ar Basán.7Re' taqe i aj Levíta re' ruuk' taqe i riih rumaam Merari kab'laj chi tinamit i xye'arik keh re' ruuk' i kiye'aab' taqe i riih rumaam i Rubén, taqe i riih rumaam i Gad, taqe riih rumaam i Zabulón.
8Re' taqe i aj Israel xkisik' chi riij noq xkiyeew taqe i tinamit re' re' keh i aj Levíta, eh kiyeew wo' ye'aab' kichikoop je' rukab' i xuq'or i QaJaaw Dios reh i Moisés.
9Je' wili i kib'ihnaal i tinamit xye'arik keh taqe i riih rumaam Leví kuum taqe i riih rumaam Judá, i riih rumaam Simeón.10Eh noq xkisik' chi riij awach naakiye'em reh chi peet, peet xkiyeew reh taqe i aj Levíta re' ruuk' i riih rumaam Coat, rak'uun i Aarón.11Eh ar xye'arik keh pantaq raxchee' re' ruuk' i kiye'aab' i riih rumaam Judá, xye'arik keh i Quiriat-arba, re' i Hebrón re' rutinamiit i nim rooq winaq Anac rub'ihnaal, xye'arik wo' ye'aab' kichikoop.12Re' taqe i ye'aab' wilkeeb' chi junsuut i tinamit, taqe i kok' ye'aab' wilkeeb' wii' patineel, xye'arik chi ruye'aab' i Caleb rak'uun i Jefone.
13Eh re' i xkiyeew reh taqe i riih ruum Aarón re' i tinamit Hebrón. Re' wo' re' xkisik' wach reh chi ar naa rojiik rukeb'aam riib' awach i naa rukansam i ras ruchaaq' chi ma' reht'al, re' taqe haa' i tinamit je' wili i kib'ihnaal:14Libna, Jatir, Estemoa,15Holón, Debir,16Aín, Juta, Bet-semes. Re' taqe i b'elejeeb' chi tinamit re' re' ye'arik keh chi kiye'aab' ruch'ihil taqe i ye'aab' kichikoop. Re' xye'arik keh kuum taqe i riih rumaam i Judá, i riih rumaam i Simeón.17Eh re' i tinamit xye'arik keh kuum taqe i riih rumaam i Benjamín, re' taqe i wili: Gabaón, Geba,18Anatot, Almón, kajseht chi tinamit, haa' taqe i ye'aab' kichikoop.19Je' re' noq oxlaj chi tinamit haa' taqe i ye'aab' kichikoop, xye'arik keh i riih rumaam Aarón kajaaw k'amal kib'eeh aj tiij.
20Eh re' taqe i junch'uq chik chi riih rumaam Coat rak'uun Leví xkik'ul i kitinamiit kuuk' i riih rumaam Efraín.21Eh xye'arik wo' keh i tinamit Siquem, wilik paraxchee' re' wilkeeb' wii' i riih rumaam i Efraín, re' wo' re' xkisik' wach chi ar naa rojiik rukeb'aam riib' awach i xa chi ma' reht'al i nee rukansaj i ras ruchaaq'. Eh xye'arik wo' keh i tinamit Gezer.22Je' wo' hoq i tinamit Kibsaim, Bet-horón kajseht chi tinamit i xye'arik keh haa' taqe i ye'aab' kichikoop.23Eh re' i tinamit xye'arik keh i aj Levíta re' re' kuum i riih rumaam i Dan, re' je' wili kib'ihnaal: Elteque, Gibetón,24Ajalón, Gat-timón, kajseht chi tinamit haa' taqe i ye'aab' kichikoop.25Eh kuuk' i yejaal ch'uq' chi riih rumaam i Manasés ka'seht i tinamit xkik'ul. Re' i Taanac, re' i Gat-rimón, haa' i ye'aab' kichikoop.26Je' re' noq re' taqe i aj Levíta riih rumaam i Coat lajeeb' seht chi tinamit i xkik'ul, haa' taqe i ye'aab' kichikoop.
27Eh re' taqe i riih rumaam Gersón, rak'uun i Leví ka'seht i tinamit xkiyeew reh i yejaal ch'uq chi riih rumaam i Manasés. Re' i tinamit Beestera, ruch'ihil i Golán, i wilkeeb' ar Basán, haa' taqe i ye'aab' kichikoop. Re' wo' re' xkisik' wach chi ar neenooj rukeb'aa' riib' awach i nee rukansaj i ras ruchaaq' chi ma' reht'al.28Eh xye'arik keh ruum i riih rumaam i Isacar taqe i tinamit je' wili kib'ihnaal: Cisón, Deberat,29Jarmut, En-ganim, kijib' chi tinamit haa' taqe i ye'aab' kichikoop.30Eh kuuk' taqe i riih rumaam i Aser, xkik'ul taqe i tinamit je' wili kib'ihnaal: Misael, Abdón,31Helcat, Rehob. Kijib' chi tinamit, haa' i ye'aab' kichikoop.32Eh ruuk' taqe i riih rumaam i Neftalí xkik'ul taqe i tinamit je' wili kib'ihnaal: Hamot-dor, Cartán, Cedas i wilik ar Galilea. Re' taqe i tinamit re' re' xkisik' wach, reh chi ar nenooj rukeb'aa' riib' awach i nee rukansaj i ras ruchaaq' chi ma' reht'al.33Je' re' noq re' taqe i riih rumaam i Gersón, ox laj seht chi tinamit i ye'arik keh haa' taqe i ye'aab' kichikoop.
34Eh re' taqe i riih rumaam i Merari, rak'uun Leví i majaa' naq inkik'ul kiye'aab', xkik'ul kiye'aab' i kuuk' i junch'uq chi riih rumaam i Zabulón, re' taqe i tinamit je' wili kib'ihnaal: Jocneam, Carta,35Dimna, Naalal, kajseht chi tinamit haa' taqe i ye'aab' kichikoop.36Eh kuuk' junch'uq chi riih rumaam i Rubén xkik'ul wo' taqe i tinamit je' wili kib'ihnaal: Beser, Jahaza,37Cademot, Mefáat, kajseht chi tinamit haa' taqe i ye'aab' kichikoop.38Eh kuuk' i junch'uq chi riih rumaam Gad, xkik'ul taqe i tinamit je' wili kib'ihnaal: Mahanaim, Ramot wilik ar Galaad. Re' wo' taqe re' xkisik' wach reh chi ar neenooj rukeb'aa' riib' awach i nee rukansaj i ras ruchaaq' chi ma' reht'al,39Re' i Hesbón, Jazer, kajseht chi tinamit haa' taqe i ye'aab' kichikoop.40Re' taqe i wili chu'nchel i tinamit xkik'ul i riih rumaam Merari rak'uun i Leví, re' noq komajaa' naq inkik'ul kiye'aab', kab'laj seht chi tinamit chu'nchel i xkik'ul.
41Re' kitinamiit xkik'ul i aj Levíta, xkik'ul chupaam i kiye'aab' i kuch aj Israel waxiqiib' roxk'ahl seht chi tinamit haa' i ye'aab' kichikoop chi junsuut i ju'jun seht chi kitinamiit.42Re' taqe i ju'jun seht chi tinamit wili chi kiju'junaal wilkeeb', eh wilik i ye'aab' kichikoop chi kijunsuut. Je' re' noq xye'arik kiye'aab' taqe i riih rumaam i Leví. Re' QaJaaw Dios i rub'an aha' wilik i ruq'or
43Je' re' noq re' QaJaaw Dios xuyeew keh i aj Israel i ye'aab' ruq'orom chee xti korik keh i kimaam kati't chi naa ruye'em keh. Re' taqe i aj Israel xkichop wo' naah, eh xi okik chi k'acharik ar.44Eh re' QaJaaw Dios xub'an wo' hoq aha' wilik i ruq'orom cho rib'iral, xuyeew wo' keh i suq laj wihik chupaam chu'nchel i kitinamiit. Ma' xta xi uchjik kuum i nixowanik kiwach ruum re' i QaJaaw Dios xtoob'inik keh chi xkiq'at wach taqe i re'.45Eh chu'nchel i q'e' holohik xuq'or cho rib'iral i QaJaaw Dios keh i aj Israel xub'an wo' hoq, ma' jino'q chik i xukanaa' chi ma' ta xub'an. Re' artaal xkiyejaa' chi chii' i nim ha' Jordán
1Eh re' Josué xuyuq'eej i junch'uq chi riih rumaam i Rubén, i junch'uq chi riih rumaam i Gad, ruch'ihil i yejaal i ch'uq chi riih rumaam Manasés,2je' wili i xuq'or keh: Re' taq i hat xa a'n taq chu'nchel i xuq'or taq cha weh i Moisés raj kamanoom chee QaJaaw Dios. Eh xa a'n taq i xnuq'or taq aweh i hin.3Re' taq i hat ma' jank'al ta taq inakanaa' chi kutkeel taq awuch aj Israel, eh xa ko je' wo' re' i k'ahchi' taq kaat yu'naak. Eh xa a'n wo' taq chi korik i ruq'or i ruk'uhb'aal QaJaaw Dios.4Eh yu'naak xub'an chik i QaJaaw Dios i xuq'or cho rib'iral keh taq awuch aj Israel, k'acharik chik inki a'n pansuqkiil k'uxliis chupaam i kiye'aab'. Re' taq i hat ti sutinoq wo' taq chik reje juntar i nim ha' Jordán pana itz'ihy naah paat chupaam i ye'aab' xuyeew taq aweh i Moisés raj kamanoom i QaJaaw Dios5Xa re' i nupahqaaj taq aweh chi cha a'n taq chu'nchel i ruq'or i ruk'uhb'aal, ruch'ihil taq i tirutaq'aaj wii' re' i xuq'or taq cha weh i Moisés raj kamanoom i Dios. Iraaj ruq'orom chi naa taq ak'axam aaWaJaaw aaDios, chak'am taq i rub'eeh chi korik, je' wo' hoq i tirutijej taq wii', maakanaa' taq chik. Cha a'n taq i rukamaj chu'nchel ak'ux, chu'nchel taq awánima, inki.
6Chi riij i re' xikuxeesjik ruum i Josué, eh xi sutinik wo' chik reje chupaam i ki-itz'ihy naah paat.
7Eh re' yejaal i ch'uq reh i riih rumaam Manasés xye'arik kiye'aab' paruyuq'ul i Basán ruum i Moisés. Eh re' chik i yejaal ch'uq i riih rumaam Manasés, re' i Josué xye'wik kiye'aab' chi kixilak i kuch aj Israel chi juntar chaloq i nim ha' Jordán parookb'aal reje i q'iij. Eh re' i Josué xukuxisaj taqe noq xutaq'aaj taqe reje pan kiye'aab'.8Eh je' wili i xuq'or reje keh: Yu'naak taq i hat ti sutinoq wo' chik taq reje chupaam aye'aab' hiy taq cha a'n rusuqkiil ab'ehomal re' taq aachikoop taq aa oro, taq aa plata, taq aa q'an ch'ihch', taq aa rax ch'ihch', taqe i itz'ihy chawunej taq aawas achaaq' i xaq'uch taq keh i ki-ixowanik taq awach.
9Je' aj re' noq xi sutinik wo' chik reje pan kiye'aab' taqe i junch'uq chi riih rumaam i Rubén, i jun ch'uq chi riih rumaam i Gad, ruch'ihil i yejaal i ch'uq i riih rumaam i Manasés. Noq kich'aq kiib' kuuk' i kuch aj Israel ar Silo. Wilik paruyuq'ul i Canaán, reh chi xi sutinik wo' chik reje paruyuq'ul i Galaad, re' kik'ulum wii' i kiye'aab', je' wo' rukab' i xuq'or i QaJaaw Dios reh i Moisés.
10Eh noq xi ponik pank'ula't i wilik wii' i nim ha' Jordán i junch'uq chi riih rumaam i Rubén, eh junch'uq chi riih rumaam i Gad, ruch'ihil i yejaal i ch'uq i riih rumaam i Manasés, xkiyejaa' i jinaj i nimlaj artaal ko chupaam i ye'aab' Canaán chi chii' i nim ha' Jordán.11Eh re' taqe i aj Israel junch'uq xponik rib'iral kuuk' chi re' taqe i junch'uq chi riih rumaam i Rubén, junch'uq chi riih rumaam i Gad, ruch'ihil i yejaal i ch'uq chi riih rumaam i Manasés, chi pank'ula't reh i Canaán chi chii' i nim ha' Jordán xkiyejaa' i artaal. Ko chupaam wo' hoq i kiye'aab' i aj Israel.12Noq xkib'iraj chi je' re' i aj Israel xanoq wo' xkimol kiib' ar Silo reh chi xiooj naq chi peleto kuuk'.13Eh re' keh peet xkitaq'aaj reje chupaam i ye'aab' Galaad, eh Finees rak'uun i Eleazar k'amal kib'eeh i aj tiij, re' i wilkeeb' wii' i junch'uq chi riih rumaam i Rubén, junch'uq chi riih rumaam i Gad, ruch'ihil i yejaal i ch'uq chi riih rumaam i Manasés.14Eh chi riij i winaq re' re' lajeeb' i k'amal b'eeh chi kixilak i juntz'uhb' chi aj Israel xiooj pankib'ihnaal taqe i ju'junch'uq chi aj Israel.15Chu'nchel i re' xiooj ar Galaad re' i wilkeeb' wii' i junch'uq chi riih rumaam i Rubén, i junch'uq chi riih rumaam i Gad, i yejaal i ch'uq chi riih rumaam i Manasés, je' wili xkiq'or ponoq:
16Re' hoj xoj chaal q'oroq pankib'ihnaal qatinamiit Israel ¿Chib'ih reet noq xa a'n taq i mahk wili chuwach i QaJaaw Dios? ¿Chib'ih reet noq xayejaa' taq i artaal wili? ¿Chib'ih reet noq xaq'at taq wach i ruk'uhb'aal i QaJaaw Dios?17¿Mi ma' aweht'al taq re' hat chi xiik' naah i mahk i xqa'an noq xqaloq'ej chee tiyoox chupaam i ye'aab' Peor? Eh re' mahk re' re' xa ko wilik wo' chi qanaah yu'naak. Eh ruum i re' ma' k'isiin i rutinamiit i QaJaaw Dios xikimik.18Eh yu'naak taq i hat ruuk' taq i xa a'n re' re' xaq'eb' wo' taq chi riij ak'ux i QaJaaw Dios, xaq'ehtaaj taq awiib' chuwach i QaJaaw. Eh ruum taq i xa a'n re' re' jumehq'iil naa ruye'em chaloq i rujosq'iil chi qanaah i hoj, hoj aj Israel.19Eh wila' nakapaaj taq chi ch'uwa' taq wach aye'aab' wilkaat taq wii' neerub'an chi nee taq ti q'ahxik chupaam i ruye'aab' i QaJaaw re' i wilik wii' i rusanto laj itz'ihy naah paat. Neerub'an chi nee taq inachop aye'aab' chi qaxilak i hoj ma' ruk'ul taj chi nee taq i ti mahkunik chuwach i Dios, eh chi qawach i hoj ruuk' i ruyejeb'jiik i tokoom chik artaal chuwach i ru artaal i QaJaaw Dios.20Re' Acán i rak'uun Zera xmahkunik noq xuchop chi reh i q'asamaj naq chik chi naa rusachariik wach. Eh ruum i re' xchalik rujosq'iil i QaJaaw Dios chi qanaah chi qunchelaal i hoj, hoj aj Israel. Eh ma' xata wo' re' Acán xkimik ruum i mahk xub'an, inki taqe.
21Eh re' i junch'uq chi riih rumaam i Rubén, i junch'uq chi riih rumaam i Gad, ruch'ihil i yejaal i ch'uq chi riih rumaam i Manasés, je' wili kichaq'weesjiik i k'amal kib'eeh i aj Israel xkian:
22Re' i QaJaaw Dios i wilik rajaawriik chinaah chu'nchel ineht'alinik reh chib'ih reet noq xqayejaa' i artaal wili. Eh re' reh reht'al mi ruum chi xqaq'eb' chi riij qak'ux, oon ma' chih taj re' reh neenye'wik taq aweh chi naab'jik. Eh wila' ruum chi xqaq'eb' chi riij qak'ux i reh neerub'an chi nee qoh rukansaj.23Eh re' i QaJaaw Dios neen ye'wik qeh chutojariik i qamahk wila' xqayejaa' i artaal wili reh chi xqaq'eb' chi riij qak'ux i reh, oon reh ye'b'al qamayiij reh chi neenqak'am qiib' panotob'il, oon ye'b'al reh i k'atoj mayiij.24Re' hoj xqayejaa' i artaal wili reh jinaj ehtalil ruum qohyo'jik nee-oq inkiq'or taq awiih aamaam i hat na' chub'an reh taqe i qiih qamaam i hoj chi je' wili: ¿Chib'ih reet noq ti chalik taq chi looq'jiik i QaJaaw Dios chupaam i ye'aab' ayu'?25Re' QaJaaw Dios re' nim ha' Jordán rukojom chi q'atb'al paam i qaye'aab' taq awuuk' i hat i hat taq riih rumaam i Rubén, i riih rumaam i Gad, i yejaal ch'uq chi riih rumaam i Manasés, ma' nee ta rub'an chi nee taq inchalik aloq'ej i Dios ayu' inko'q-oq taqe. Chi je' re', re' qiih qamaam, neenkikanaa' ruyohljiik wach i QaJaaw Dios.26Ruum i re' xqakapaaj chi xqayejaa' i artaal wili, ma' re' ta reh ye'aab' k'atoj mayiij ma' re' ta wo' hoq ye'b'al chik jino'q mayiij.27Re' artaal wili xqayejaa', rehtalil chi qeh i hoj cha weh taq i hat, eh chi keh naa kiwihiik koq'uun, reh chi neenqaloq'ej i QaJaaw Dios, eh chi neenqayeew i qak'atoj mayiij chuwach, oon re' qamayiij k'amb'al qiib' panotob'il ruuk'. Eh reh chi ma' nee ta nkiq'or na' chub'an awiih aamaam taq i hat keh i qiih qamaam i hoj chi je' wili: Re' taq i hat ma' ruk'ul ta chi nee taq inchalik aloq'ej i QaJaaw Dios ayu', ma' inko'q ta taqe.28Eh xqakapaaj i hoj chi pan jinaj q'iij wilik nee nq'orik qeh i hoj, oon keh taqe i qiih qamaam i q'orik re' re', re' keh je' wili chaq'wik naa kianam: Chawilow taq re' taqe i qamaam qati't xkiyejaa' i artaal wili chuwach i QaJaaw ma' re' ta ye'b'al k'atoj mayiij ma' re' ta wo' ye'b'al mayiij, xa rehtaliil la' chawach taq i hat rehtalil chi qawach i hoj chi xa jinaj qawach, inko'q taqe.29Re' hoj ma' nqakapaaj taj rukanab'jiik i qaDios, eh ni xata neenqaq'eb' chi riij qak'ux ruuk' i ruyejeb'jiik jino'q chik i artaal k'atb'al mayiij, ye'b'al chik jino'q i mayiij, oon k'atb'al chikop reh mayiij. Ruum re' hoj qeht'al chi ma' xta chik jino'q artaal chi riij i artaal wilik reje chuwach i rusanto laj itz'ihy naah paat i Dios, inki taqe.
30Eh noq xrib'iraj i Finees chi je' re' i k'amal kib'eeh aj tiij, ruch'ihil taqe i k'amwik kib'eeh chi kitzuhb'aal, ruch'ihil i k'amwik kib'eeh chi kich'uhqaal i aj Israel, xuk'ul kik'ux i xkiq'or i junch'uq chi riih rumaam i Rubén, i junch'uq chi riih rumaam i Gad, i ye'jaal ch'uq chi riih rumaam i Manasés.31Eh noq xrib'iraj chi je' re' i Finees rak'uun i k'amal b'eeh aj tiij Eleazar, je' wili i xuq'or:
Yu'naak qeht'al chik chi korik chi re' Dios wilik quuk', ruum qanab'eej chik chi ma' re' ta taq rukanab'jiik i Dios taq inawaaj noq xayejaa' taq i artaal wili. Chi je' re' ma' nee ta ruyeew chee ti' k'axik chi qanaah i QaJaaw Dios, inki.
32Chi riij i re', re' Finees, ruch'ihil taqe i xiooj chi riij xi elik wo' chik cho ar i wilkeeb' wii' i junch'uq chi riih rumaam i Rubén, i junch'uq chi riih rumaam i Gad, i yejaal ch'uq chi riih rumaam i Manasés. Xi elik cho ar Galaad xi chalik wo' chik Canaán, eh xk'ulik kik'utjaaj keh chu'nchel i aj Israel i xq'orarik cho keh.33Eh re' i xkiq'or chaloq i xuk'ul kik'ux chi kunchelaal i aj Israel, eh kiloq'ej i Dios ruum i re'. Eh ma' kota chik xkikapaaj ojik chi q'aq'inik kuuk' chi rusachariik wach i kiye'aab' i junch'uq chi riih rumaam i Rubén, i junch'uq chi riih rumaam i Gad, i yejaal i ch'uq chi riih rumaam i Manasés.34Eh re' taqe i junch'uq chi riih rumaam i Rubén, i junch'uq chi riih rumaam Gad, Ed i rub'ihnaal i artaal xkikoj, eh je' wili xkiq'or: Re' artaal wili rehtalil chi qawach chi re' qaDios xa re' wo' reh manlik Dios, inki taqe. Re' Josué xukoj kina'ojb'al i tinamit Israel
1Eh k'ih-oq chik haab' ruye'em taqe pansuqkiil k'uxliis i aj Israel i QaJaaw Dios, ma' xta chik q'aq'inik kuuk' taqe i nixowanik kiwach, noq re' Josué k'ih chik i ruhab'ul riji' winaq chik chi korik.2Re' Josué xutaq'aaj kik'amariik chu'nchel i aj Israel, ruch'ihil i k'amal b'eeh chi kixilak, taqe q'atal q'orik, taqe i kikamanik chi kixilak, je' wili i xuq'or keh: Re' hin k'ih chik i nuhab'ul xin rijb'ik chik chi korik.3Re' taq i hat xawil taq chik i xub'an QaJaaw Dios kuuk' chu'nchel i tinamit ki-ixowanik taq awach, chi k'axb'al taq aweh i hat. Re' QaJaaw Dios xb'anik i peleto taq chawiij.4Re' hin xnusik' chi riij noq xnuch'aq chu'nchel i ye'aab' keh i ju'junch'uq chi wuch aj Israel. Eh ma' xata re' i ye'aab' chopooj nah xnuch'aq, nuch'aq la' wo' hoq i komajaa' naq inchoparik naah ar intohq'ik cho chi chii' i nim ha' Jordán imponik ko chi chii' i palaw Mediterráneo panookb'al reje reh i q'iij.5Re' i QaJaaw Dios naa resam taqe reje chupaam i ye'aab' re' re' i patineel wilkeeb' ar. Eh re' taq chik i hat naa achopwiik naah, je' wo' rukab' i ruq'orom i QaJaaw Dios.
6Eh re' taq i hat cha chop taq ak'ux chunimjiik i ruq'or taqe i k'uhb'aal tz'ihb'amaj, re' i xye'arik reh i Moisés. Eh cha a'n taq chu'nchel i ruq'or, ma' t'ooj taq panasak'aaj, ni xata nee taq tiooj panatz'eet.7Eh maa a'n taq jinaj awach kuuk' i tinamit ko wilkeeb' taq chaxilak ayu'. Eh maa q'or wo' taq i korik pankib'ihnaal i tiyoox inkiloq'ej i keh, ni xata naa taq aloq'em, eh ma' naa ta wo' axuk'aam taq awiib' chikiwach.8Maacanaa' taq runimjiik taq aaWaJaaw aaDios je' rukab' i xat k'uloq taq ayu' chub'anariik.9Re' QaJaaw Dios xresaj taq reje chawach i ki-ixowanik taq awach i nimaq kiwach kow inki a'n kiib'. Eh xat k'ulik taq iloq ayu' yu'naak chi ma' awach ta taq inkuywik i q'aq'inik taq awuuk'.10Xa jinaj chi winaq taq chaxilak i hat neerub'an reje rukaajiik jino'q miil chi aj ixowaal, ruum re' QaJaaw Dios imb'anik i peleto taq chawiij i hat, je' wo' rukab' i ruq'orom chaloq.11Je' re' noq chawik'raaj taq awiib' i hat cha ju'junaal cha k'ax taq i QaJaaw Dios.12Eh wila' xakanaa' taq rulooq'jiik i QaJaaw, eh wi xa a'n taq aweh i hat inki a'n i tinamit koxikahnik taq chaxilak. Eh xa a'n taq kaxáro kuuk', i xa a'n taq jinaj awach kuuk'.13Chanab'eej taq chi re' i QaJaaw Dios ma' nee ta taq chik ti rutoob'eej, chi kehteesjiik reje i tinamit. Naa la' kikahniik chi xirob' taq cha weh, naa kaat taq kiye'em chi tz'uhuum, eh chi k'iix taq panaq'awach. Korehtaal imponik i q'iij chi ma' jino'q taq chik aweh i hat naa rukahniik chupaam i holohik laj ye'aab' wili i ruye'em taq aweh i QaJaaw Dios.
14Re' hin ponik reh i ruq'ijil i nukimiik, xa re' la' peet inwaaj chi nee taq inakoj rehtaal chi nee taq inanimaj chu'nchel ak'ux, chu'nchel taq awánima chi re' i QaJaaw Dios xub'an chaloq chu'nchel i holohik ruq'orom rib'iral taq aweh. Ma' jino'q chik i xukanaa' chi ma' ta xub'an.15Eh nik' wach noq xuyeew taq cha weh i holohik ruq'orom cho rib'iral taq aweh i QaJaaw Dios, je' wo' chik re' noq naa ruye'em taq cho cha naah i runimaal i ti' k'axik. Korehtaal imponik i q'iij chi ma' jino'q taq chik aweh i naa rukahniik chupaam i holohik laj ye'aab' wili ruye'em taq aweh i QaJaaw Dios.16Wila' ma' xa a'n taq i ruyejaam taq cho wach awuuk' i QaJaaw Dios wila' xat'ooj taq chi kilooqjiik taqe i tiyoox, wi xaxuk'aa' taq awiib' chikiwach. Re' i QaJaaw Dios naa ruchaliik rujosq'iil taq cha naah, jumehq'iil naa rusahchiik taq awach chupaam i ye'aab' wili, q'e' holohik ruye'em taq aweh i reh, inki. Re' Josué xuk'uhb'alej taqe i aj Israel noq xakimik chik reh
1Re' Josué xumol kiwach chu'nchel i aj Israel chuwach i QaJaaw Dios chupaam i ye'aab' Siquem, xumol kiwach taqe i k'amal b'eeh chi kixilak, taqe i q'atal q'orik, taqe ajaab'ees, taqe i kikamanik chi kixilak.2Eh re' Josué je' wili i xuq'or keh chu'nchel i tinamit:
Je' wili i xuq'or i QaJaaw Dios i hoj, hoj aj Israel: Najtir cho q'iij re' taq aamaam awati't, re' Taré re' rajaaw Abraham, i Nacor, ar xi k'acharik cho chi juntar i nim ha' Éufrates. Eh ar xkiloq'ej taqe i tiyoox.3Re' hin xineesanik cho reh taqe i xikin aamaam Abraham, chi juntar i nim ha' Éufrates. Hin xi k'amwik cho rub'eeh noq xik'ik cho chupaam chu'nchel i ruyuq'ul i Canaán. Eh xnuyeew i peet rak'uun Isaac, eh xnuk'ihaxb'isaj wo' taqe i riih rumaam.4Eh xnuyeew wo' hoq kiib' i rak'uun, Isaac, i Jacob, eh re' i Esaú. Eh re' i Esaú xnuyeew reh i rax chee Seir. Eh re' taqe i rak'uun i Jacob xiooj ar Egipto.5Eh koq'uun chik xnutaq'aaj i Moisés ruch'ihil i Aarón. Re' hin xnuyeew i ma' k'isa ti' k'axik chikinaah i aj Egipto korehtaal xwesaj taqe cho ar.6Eh noq xi elik cho Egipto taq aamaam awati't xitahqaljik cho kuum i aj Egipto ruuk' kareta reh i kikantesjiik, ruuk' kawayu reh q'aq'inik korehtaal xi k'uloq chi chii' i kaq palaw.7Eh re' taq aamaam awati't xkik'er kichii' chupahqaljiik chi naa nutoob'eem taqe, eh re' hin xnukoj jinaj i q'equm q'atb'al pankiyejaal kuuk' i aj Egipto. Eh re' hin xnutz'ap kinaah i aj Egipto pan palaw. Re' taq i hat xawil taq ruuk' naq'awach taqe i ma' ilooj taj xnub'an cho Egipto. Eh chi riij i re' najt taq xat b'ehik chee hat chupaam i ye'aab' chiq yuuq'.8Chi riij i re' korehtaal xat nuk'am taqe chaloq pan kiye'aab' i aj amorreo wilik reje parelb'aal q'iij ree i nim ha' Jordán. Re' keh xkitoq'aa' taq q'aq'inik awuuk', xa re' la' re' i hin xnuq'asaj taq panaq'ab'. Re' taq i hat xa a'n taq keh, eh xawehchaaj taq i kiye'aab'.9Chi riij i re', re' i kiye'aab' i aj Moab, re' Balac rak'uun i Zipor xchalik chi q'aq'inik taq awuuk' i hat. Eh re' i Balac xutaq'aaj rusik'ariik i Balaam, rak'uun i Beor, reh naq chi naa rupahqaam i ma' holohik taj taq cha naah.10Xa re' la' re' hin ma' xnuyeew ta q'ab' reh i Balaam chi xupahqaaj i ma' holohik taj taq cha naah, re' la' chik i holohik xupahqaaj taq cha naah. Je' aj re' noq xat nuko'leej taq i hat.11Eh re' taq i hat xaq'at taq cho wach i nim ha' Jordán, xat k'ulik taq Jericó. Eh re' i wilkeeb' chi patinik Jericó re' taqe i aj amorreo, taqe aj ferezeo, taqe aj cananeo, taqe i aj heteo, taqe aj gergeseo, taqe i aj heveo, taqe i aj jebuseo, xkitoq'aa' q'aq'inik taq awuuk' i hat, xa re' la' re' hin xinq'asanik taq panaq'ab' chi xa a'n taq keh.12Eh re' taqe i kiib' chi kireey i aj amorreo, ma' re' ta taq i hat xat b'anik keh ruuk' taq aaflecha, ruuk' taq aq'as laj ch'ihch', xnutaq'aaj la' chaloq chi peet chawach taq i hat i xyohb'isanik keh, reh chi kimolom chik chi elik noq xat k'ulik taq iloq i hat.13Re' hin xnuyeew taq aweh i ye'aab' ma' hat ta taq xat qasanik wach, nuyeew taq aweh i tinamit ma' hat ta taq xa yej-aniik reh. Re' taq i hat patim wii' yu'naak, eh inak'ux taq i uuva, inak'ux taq i olivo, ma' hat ta taq xatikwik reh, inki Dios, inki.
14Re' Josué je' wo' chik wili i xuq'or keh i aj Israel: Yu'naak chayohleej taq wach i QaJaaw Dios, eh cha nimaj taq chu'nchel ak'ux, chu'nchel awánima. Eh maaloq'ej taq chik aweh taqe i tiyoox ixkiloq'ej taq aamaam awati't chi juntar i nim ha' Éufrates, noq wilkeeb' cho Egipto xa re' taq i QaJaaw Dios naa taq animam.15Eh wila' ma' nawaaj taq animam i QaJaaw Dios, cha sik' taq wach yu'naak awach taq i naa animam, re' oon wo' taqe i tiyoox xkiloq'ej taq chaloq aamaam awati't chi juntar i nim ha' Éufrates, oon re' i tiyoox inkinimaj i aj amorreo wilkeeb' chupaam i ye'aab' wili. Xa re' la' re' hin wuch'ihil taqe awach weh panupaat re' i QaJaaw Dios naaqanimam inki.
16Eh re' i tinamit Israel je' wili i xkiq'or:
Ma' ta naq nee ruyeew q'ab' i QaJaaw Dios chi neenqakanaa' rulooq'jiik i reh ruum i kiloq'ojiik taqe i tiyoox.17Ruum xa re' wo' hoq i QaJaaw i qaDios, x-esanik cho keh Egipto i qamaam qati't, je' wo' hoq i hoj, re' naq i hoj i minooj wii' pankowlaj kamanik. Eh re' wo' qaDios xb'anik i ma' k'isiin i ma' ilooj taj chi qawach. Re' wo' reh xko'linik qeh noq xoj ik'ik cho chupaam taqe i ye'aab', eh noq xoj ik'ik cho chupaam i ma' k'isa tinamit.18Eh re' wo' i QaJaaw Dios x-esanik panqab'eeh taqe i tinamit aj ixowaal. Eh re' wo' reh x-esanik taqe reje i aj amorreo wilkeeb' naq ayu'. Ruum chu'nchel i xub'an cho quuk' re' re' i QaJaaw Dios xa re' wo' reh naaqanimam, ruum xa re' wo' reh i qaDios, inki taqe.
19Eh re' Josué je' wili i xuq'or keh i tinamit Israel:
Re' taq i hat ma' nee ta taq i na a'n runimjiik i QaJaaw Dios ruum re' reh wilik rusantohiil, eh iraaj chi xa re' wo' reh nee taq inanimaj. Eh ma' nee ta rukuy taq amahk wi ma' xanimaj taq, eh wi xat mahkunik taq chuwach.20Eh wila' xaq'eb' taq chi riij ak'ux i runimjiik, wi xat'ooj taq chi kilooq'jiik i xatz'aqoj tiyoox. Re' QaJaaw naa ruye'em chaloq i ti' k'axik taq cha naah naa taq rusacham awach, atoob' ta ma' k'isa otob'il i rub'anam taq cha weh, inki.
21Eh re' tinamit je' wili ruchaq'weesjiik xkian:
Re' hoj xa re' wo' QaJaaw Dios naaqanimam, inki taqe.
22Eh re' Josué je' wili i xuq'or keh:
Re' taq i hat ruuk' taq aachii' xaq'or chi xa re' wo' reh taq naa animam, inki.
Korik re' hoj xoj q'orik reh, inki taqe.
23Je' wo' chik wili i xq'orarik keh ruum i Josué: Wila' je' re' chawesaj taq chu'nchel i tiyoox wilik taq chaxilak cha nimaj taq chu'nchel ak'ux QaJaaw Dios taq i hat, inki.
24Eh re' tinamit je' wili chaq'wik xkian:
Re' hoj xa re' chik i QaJaaw Dios naaqanimam eh naaqanam chu'nchel aha' wilik i naa ruq'orom qeh, inki taqe.
25Eh xa chupaam wo' q'iij re' re' ar Siquem, re' Josué wilik i xuyejaa' wach kuuk' i tinamit wilik i k'uhb'aal xuq'or keh, eh xuq'or keh i naa kianam.26Eh re' Josué xutz'ihb'aaj rehtalil chupaam i huuj tz'ihb'amaj wii' i ruk'uhb'aal i QaJaaw Dios. Eh chi riij i re' xuchop chaloq jinaj i nimlaj ab'aj xutik chi ri'sil jinaj i chee tz'inuj wilik chucheel i rusantolaj ye'aab' i Dios.27Eh je' wili xuq'or keh chu'nchel i tinamit Israel:
Re' ab'aj wili naa rukamaniik qeh chi rehtalil chi xak'ulaa' taq chi naa a'nam chu'nchel i xuq'or i QaJaaw Dios. Eh noq naa taq awilom wach ab'aj wili naa ruk'uliik taq cho panak'ux i xuq'or i QaJaaw Dios, eh rehtalil chi ma' ruk'ul taj chi nee taq i nachuk i q'orik reh i QaJaaw Dios, inki.
28Eh chi riij i re', re' Josué xutaq'aaj taqe reje i aj Israel chupaam i kitinamiit chi kiju'junaal. Re' i rukimiik i Josué (Jue 2.6-10)
29Eh noq xakomajaa' wo' najtir imb'aan taqe re' xkimik i Josué raj kamanoom i Dios rak'uun i Nun, eh jinaj siento ruuk' lajeeb' haab' i wilik reh noq xkimik.30Eh ar xkimuq'aa' chupaam i rutinamiit Timnat-sera, xye'arik reh, wilik chinaah i yuuq' re' ruuk' i kiye'aab' taqe i riih rumaam Efraín wilik pantz'eet reje reh i rookb'aal q'iij reh i yuuq' Gaas.31Re' taqe i aj Israel xkinimaj i QaJaaw Dios noq kok'achlik i Josué. Eh je' wo' hoq noq kamnaq chik, noq kok'achalkeeb' taqe i mama' winaq xinab'inik reh aha' wilik i holohik chi b'anarik xub'an i Dios kuuk' i aj Israel. Re' taqe aj Israel xkimuq'aa' irub'aqil i José ar Siquem
32Re' taqe i aj Israel xkik'am chaloq irub'aqil i José ar Egipto, eh ar xk'ulik kimuq'aa' chupaam i ye'aab' Siquem, chupaam i ye'aab' xiloq' i rajaaw i José re' i Jacob chi jinaj siento chi tumiin re' ruuk' i plata. Re' i xiloq' kuuk' i riih rumaam i Hamor, re' i rajaaw Siquem. Chi riij i re' xkahnik chi kiye'aab' i riih rumaam i José. Re' rukimiik i Eleazar k'amal kib'eeh aj tiij
33Re' i Eleazar i k'amal kib'eeh aj tiij rak'uun i Aarón xkimik wo' reje, ar xkimuq'aa' chinaah i k'isayuuq', ruye'aab' i Jinees i rak'uun, re' i xye'arik reh chinaah i yuuq' pan kiye'aab' taqe i riih rumaam Efraín.

Bible Society in Guatemala

https://app.library.bible/content/695aa4b9f902778f

expand_more
chevron_left上一章
chevron_right下一章