阅读JUECES 1

JUECES1

¹Noq kamnaq chik i Josué, re' taqe i aj Israel xkian kitiij chuwach i QaJaaw Dios, je' wili xkiq'or: QaJaaw Dios cha k'uhtaaj qeh aha' wilik ch'uq i naa rojiik chi peet chi q'aq'inik kuuk' i aj Canaán, inki taqe.

²Eh re' i QaJaaw Dios je' wili xuq'or:
Re' i junch'uq chi riih rumaam Judá naa rojiik chi peet, ruum re' hin naa nuq'asam pan kiq'ab' i ye'aab' re' re', inki.

³Eh re' taqe i junch'uq chi riih rumaam Judá, je' wili i xkiq'or reh i junch'uq chi riih rumaam Simeón:
Taq taq qoh atoob'eej chi q'aq'inik chi riij i qa ye'aab' kuuk' i aj Canaán, eh nee wo' taq tiqatob'eej i hat noq nee taq tiooj chi ko'ljiik riij taq aweh i hat, inki taqe.
Eh re' taqe i riih rumaam Simeón xiooj wo' chikiij.

⁴Re' i junch'uq chi riih rumaam Judá xiooj wo' chi q'aq'inik. Eh re' i QaJaaw Dios xq'asanik reh pan kiq'ab' taqe, i aj Canaán, i aj ferezeo xkian reh i lajeeb' miil chi winaq chupaam i ye'aab' Bezec.⁵Eh ar Bezec xkireq i Adoni-bezec, re' i wilik chi reyil ar xkian i q'aq'inik ruuk'. Eh xkian reh taqe i aj Canaán, i aj ferezeo.⁶Re' Adoni-bezec, reh xumol chi elik noq xtohq'ik i q'aq'inik ruuk', xkajimaj reje korehtaal xkichop. Eh xkiyok' kab'chel i rumaam i ju' q'ab', je' wo' kab'chel i rumaam i ju' rooq.⁷Eh re' Adoni-bezec, je' wili i xuq'or:
Re' hin noq xub'an chaloq xnutaq'aaj ruyok'ariik i rumaam i ju' kiq'ab' i rumaam i ju' kooq i lajeeb' ru kajwinaq chi reey. Eh xkimol i ruxeer nuwa' chi ri'sil i numexa. Eh re' i QaJaaw Dios xuyeew q'ab' chi je' wo' chik re' i xnuk'ul i hin, inki. Eh xkik'am reje Jerusaleem i winaq re' re', eh ar xkimik. Re' taqe i riih rumaam Judá xkichop naah i ye'aab' Hebrón, eh Jerusaleem

⁸Re' taqe i junch'uq chi riih rumaam Judá xiooj chi q'aq'inik kuuk' i aj Jerusaleem, eh xkikansaj ruuk' q'aslaj ch'ihch' i tinamit ar, eh i xkik'at i tinamit.⁹Eh chi riij i re', re' taqe i junch'uq chi riih rumaam Judá xiooj chi q'aq'inik kuuk' i aj Canaán patim taqe paraxchee', je' wo' kuuk' i wilkeeb' wataq k'ixkaab', je' wo' kuuk' i wilkeeb' Neguev.¹⁰Eh xiooj wo' chi q'aq'inik kuuk' i aj Canaán chupaam i tinamit Hebrón, re' i Quiriat-arba i b'ih pampeet. Eh xkian reh taqe i aj Sesai, je' wo' taqe i aj Ahimán, je' wo' taqe i aj Talmai. Re' Otoniel xuchop naah i tinamit Debir eh xik'ul chi rehk'een i Acsa (Jos 15.15-19)

¹¹Eh chi riij i re' xiooj chi q'aq'inik chupaam i tinamit Debir re' i Quiriat-sefer i b'ih pampeet.¹²Re' Caleb je' wili xuq'or:
Awach neerub'an ruchopariik naah i tinamit Debir re' hin neenuyeew reh chi rehk'een i wixq'uun Acsa rub'ihnaal, inki.

¹³Eh re' i xchopwik naah i tinamit Debir re' Otoniel rak'uun i Cenaz, i ruchaaq' i Caleb. Eh re' Caleb xuyeew wo' chi rehk'een i Otoniel i rixq'uun.¹⁴Eh noq ojik inki a'n re' Otoniel, xuch'ub'isaj ruk'ux i Acsa chi chupahqaaj reh i rajaaw junseht-oq i ye'aab'. Eh re' Acsa xupahqaaj wo' i reh i rajaaw, noq xqajik chi riij i rub'uuruux i Acsa, xpahqaljik reh ruum i Caleb chi je' wili:
¿Chib'ih naq inawaaj? inki.

¹⁵Eh re' Acsa je' wili xuq'or:
Re' hat xayeew chik weh i ye'aab' Neguev, i nupahqaaj wo' chik otob'il aweh chi chayeew weh i ye'aab' wilik wii' i k'achlik ha', inki.
Eh re' i Caleb xuyeew wo' reh i rixq'uun taqe i ye'aab' wilkeeb' wii' i k'achlik haa' taxaaj, i wilkeeb' wii' i k'achlik ha' panyuuq'. Re' taqe kiih kimaam i Judá i Benjamín wilik i tinamit xkichop naah

¹⁶Re' taqe i riih rumaam Ceneo i rajaaw i rehk'een i Moisés xi elik reje chupaam i ye'aab' wilik wii' i chee' xaq ipak' kuch'ihil i junch'uq chi riih rumaam Judá, xiooj panchiq yuuq' wilik reje pansak'aaj reh i rookb'aal i q'iij, reh i ye'aab' Arad, xi kahnik chi patinik kuuk' i wilkeeb' ar.

¹⁷Eh re' junch'uq chi riih rumaam Judá, i junch'uq chi riih rumaam Simeón xiooj chi q'aq'inik, eh xkisach wach taqe i aj Canaán i wilkeeb' ar Sefat. Eh xkikanaa' chi ma' xta chik i wilik chupaam, eh Horma i rub'ihnaal i xkikoj.¹⁸Re' taqe i riih rumaam Judá xkichop naah i tinamit Gaza, i Ascalón, i Ecrón, ruch'ihil taqe i ye'aab' wilik chi kijunsuut.¹⁹Eh re' i QaJaaw Dios xutoob'eej taqe i aj Judá, ruum i re' xkian reh taqe i wilkeeb' chupaam i rax chee'. Xa re' la' ma' xkian ta reje kehteesjiik i wilkeeb' wataq k'ixkaab' ruum re' keh wilik kikareta reh q'aq'inik, re' ruuk' i ch'ihch'.²⁰Eh re' tinamit Hebrón xkiyeew reh i Caleb, je' wo' rukab' i ruq'orom chaloq i Moisés. Re' i Caleb xresaj taqe reje ar oxch'uq chi riih rumaam Anac.²¹Eh re' i junch'uq chi riih rumaam i Benjamín ma' xkian ta reje kehteesjiik i aj jebuseo chupaam i tinamit Jerusaleem. Eh re' taqe i aj jebuseo ar xi kahnik chi jumpech chi kixilak i riih rumaam Benjamín. Re' taqe i riih rumaam José xkichop naah i tinamit Bet-el

²²Eh re' i junch'uq chi riih rumaam José xiooj chi q'aq'inik chupaam i tinamit Bet-el, eh re' Dios xwihik kuuk' chi kitoob'jiik.²³Re' taqe i riih rumaam i José xkitaq'aaj rutahariik i tinamit Bet-el, eh Luz i rub'ihnaal noq xub'an.²⁴Re' taqe i xitaq'ab'jik chi rutahariik i tinamit Bet-el, exkik'ul jinaj i winaq elik i rub'an cho ar, je' wili xkiq'or reh:
Re' hoj inqaaj chi neenak'uhtaaj qeh nik' wach okik neen qa'an chupaam i tinamit. Re' hoj neenqaketelaaj awach, inki taqe reh.

²⁵Re' winaq re' re' xuk'uhtaaj keh nik' wach okik naa kianam. Eh noq xi okik i koq xkuxik kikansam chi q'aslaj ch'ihch' i wilkeeb' ar. Eh re' winaq re' re' xkitaq'aaj reje chi ma' xta xkuchej, ruch'ihil taqe awach reh parupaat.²⁶Re' winaq re' re' xooj chupaam i kiye'aab' i aj heteo, ar xuyejaa' jinaj i tinamit, Luz i rub'ihnaal xukoj, eh je' re' i b'ih xkahnik chi jumpech. Re' i ruchopariik naah taqe i riih rumaam Manasés, taqe i riih rumaam Efraín

²⁷Re' i junch'uq chi riih rumaam Manasés ma' xkian ta reje kehteesjiik i wilkeeb' chupaam taqe tinamit je' wili i kib'ihnaal: Bet-seán, i Taanac, Dor, Ibleam, Meguido. Eh ma' xkian ta reje kehteesjiik wilkeeb' chupaam i kok' tinamit, kichopom naah taqe i tinamit re' re'. Eh je' wo' taqe i aj Canaán xi kahnik wo' chi patinik chupaam taqe i ye'aab' re' re'.²⁸Eh noq kow chik kiib' i aj Israel xkimin pankowlaj kamanik taqe i aj Canaán tojb'al riij i kiye'aab'. Xa re' la' xama' xkian ta wo' reje kehteesjiik.

²⁹Eh re' i junch'uq chi riih rumaam Efraín ma' kian ta wo' reje rehtesjiik i aj Canaán wilkeeb' chupaam i ye'aab' Gezer. Je' re' noq re' taqe aj Canaán xa xi kahnik wo' chi patinik chi kixilak. Re' ye'aab' xkichop naah ju'jun ch'uq komajaa' naq inkichop naah kiye'aab'

³⁰Eh re' i junch'uq chi riih rumaam i Zabulón, ma' xkian ta reje kehteesjiik i aj Canaán wilkeeb' ar Quitrón i wilkeeb' Naalal, xi kahnik la' wo' chi k'acharik chupaam taqe ye'aab' re' re', eh xkimin pankowlaj kamanik.

³¹Re' riih rumaam Aser ma' xkian ta wo' reje kehteesjiik i wilkeeb' chupaam taqe i tinamit je' wili kib'ihnaal: Aco, Sidón, Ahlab, Aczib, Helba, Afec, Rehob.³²Eh re' i junch'uq chi riih rumaam Aser ar xi kahnik chi kixilak i aj Canaán i wilkeeb' chupaam taqe i ye'aab' re' re' ruum ma' xkian ta reje kehteesjiik ar.

³³Eh re' i junch'uq chi riih rumaam i Neftalí ma' xkian ta wo' reje kehteesjiik i wilkeeb' chupaam taqe i tinamit Bet-semes, Bet-anat, xi patinik la' chi kixilak. Eh xkimin pankowlaj kamanik i aj Canaán tojb'al riij i kiye'aab'.

³⁴Re' taqe i aj amorreo ma' xkik'ul ta chaloq wach k'ixkaab' taqe i junch'uq chi riih rumaam i Dan, ruum i re' xi kahnik cho paraxchee'.³⁵Eh re' taqe i aj amorreo xa xi kahnik wo' chi k'achariik chinaah i yuuq' Heres, eh chupaam i tinamit Ajalón, i Saalbim. Eh noq xikowjik taqe i junch'uq chi riih rumaam José xkimin pankowlaj kamanik taqe i aj amorreo tojb'al riih i kiye'aab'.

³⁶Eh re' i kiye'aab' taqe i aj amorreo, ar intohq'ik i wilik wii' i yuuq' Acrabim, eh imponik ko chupaam i tinamit Sela i wilik reje pantz'eet reh i rookb'aal q'iij. Re' ruánjel i Dios xooj ko ar Boquim

¹Re' ruánjel i QaJaaw Dios xelik reje i Gilgal, xooj ar Boquim, je' wili i xuq'or: Re' Dios je' wili i xuq'or:
Re' hin xineesanik taq cha weh ar Egipto xat nuk'am taq cho chupaam i ye'aab' wili re' nuq'orom cho rib'iral keh aamaam awati't. Re' noq xnuq'or keh chi ma' jaruuj naa nuyojom wach i nuyejaam cho wach kuuk'.²Re' naq inwaaj i hin chi ma' xta naq i xayejaa' taq wach kuuk' i wilkeeb' chupaam i ye'aab' re' re', re' naq xwaaj i hin chi xa yojib'eej taqe i kiartaal, xa re' la' re' taq i hat xama' xinanimaj ta wo' taq, xinaq'etwachej la' taq.³Ruum aj re', yu'naak re' hin i nuq'or taq aweh chi ma' naa ta chik wesam taqe reje chawach i ki-ixowanik taq awach wilkeeb' ar. Eh ruum taqe i tiyoox inkinimaj i keh naa taq aq'ehb'iik pamahk i hat, inki Dios, inki.

⁴Eh noq xukohlaaj q'orik i ángel chu'nchel i tinamit Israel xkik'er kichii' chi oq'ik.⁵Ruum aj re', re' ye'aab' re' re' Boquim i rub'ihnaal xkikoj. Eh ar xkiyeew i kimayiij taqe i aj Israel chuwach i QaJaaw Dios. Re' i rukimiik i Josué (Jos 24.29-31)

⁶Noq re' Josué xuch'aq taqe reje i aj Israel. Re' keh xiooj pan kiye'aab' chi kiju'junaal re' i kiye'aab' xkehchaaj.⁷Re' taqe i aj Israel xkian rulooq'jiik i QaJaaw Dios noq kok'ahchlik i Josué, je' wo' hoq noq kok'achalkeeb' taqe i mama' winaq xi k'amwik cho b'eeh i xi ilwik cho reh i nimaq wach ma' ilooj taj xub'an QaJaaw Dios ko'lb'al keh i aj Israel.

⁸Eh re' rak'uun i Nun Josué rub'ihnaal i raj kamanoom i QaJaaw Dios jinaj siento ruuk' lajeeb' haab' i wilik reh noq xkikimik.⁹Eh ar xkimuq'aa' chupaam i ruye'aab' Timnat-sera, re' wilik reje pantz'eet reh i rookb'aal q'iij reh i yuuq' Gaas, wilik chupaam i kiye'aab' taqe i riih rumaam Efraín.¹⁰Eh xikimik wo' reje i chu'nchel i aj Israel wilkeeb' noq kok'achlik i Josué. Eh re' taqe i kak'uun kixq'uun xi aasjik koq'uun ma' xkinimaj ta chik i QaJaaw Dios, eh ma' keht'al ta naq chik i ma' ilooj taj xub'an i Dios ko'lemb'al keh i aj Israel. Re' taqe i aj Israel xkiq'eb' chi riij kik'ux i QaJaaw Dios

¹¹Re' taqe i aj Israel xkitoq'aa' rub'aan taqe i ma' imponik ta chuwach i QaJaaw Dios. Eh tohq'ik kiloq'em taqe i tiyoox Baal.¹²Eh xkiq'eb' i QaJaaw Dios, re' i xkinimaj chee kimaam kati't, re' i x-esanik cho keh ar Egipto. Eh re' chik taqe i tiyoox xkiloq'ej, re' taqe inkinimaj i tinamit wilik chi kijunsuut. Ruuk' i xkian re' re' xkijosaj cho wach i rujosq'iil i QaJaaw Dios.¹³Eh xkiq'eb' i QaJaaw Dios ruum re' chik taqe i Baal taqe i Astarot, xkiloq'ej.¹⁴Ruum taqe i xkian re' re' i aj Israel xjohtik wach i rujosq'iil i QaJaaw Dios. Eh xuyeew q'ab' i QaJaaw Dios chi xi okik i aj i leq' chi relq'jiik chu'nchel i chib'ih keh i aj Israel. Eh chi re' taqe i nixowanik kiwach wilik chi kijunsuut xi chalik chi q'aq'inik kuuk', eh ma' xkikuy ta ruk'ulb'eejiik.¹⁵Eh noq re' taqe i aj Israel kiooj chi q'aq'inik, ma' xitoob'jik ta ruum i QaJaaw Dios, eh ma' kielik ta korik, je' rukab' i ruq'orom chaloq. Atoob' ta re' Dios xub'an cho ti' k'axik keh i aj Israel.

¹⁶Re' reh xupab'aa' taqe i q'atal q'orik reh chi naa kiko'ljiik pan kiq'ab' i nelq'anik chib'ih keh.¹⁷Xa re' la' re' taqe i aj Israel xama' xinimanik ta wo' chikiwach i q'atal q'orik xkikanaa' i rub'eeh i Dios, eh re' chik i taqe i tiyoox xkiloq'ej. Eh xkiq'eb' i QaJaaw Dios i xkinimaj chee kimaam kati't, eh xkinimaj chu'nchel i ruq'or i ruk'uhb'aal, eh re' keh ma' je' ta chik re' i xkian.¹⁸Eh noq i rupab'aa' i q'atal q'orik i rutoob'eej nik' najtiil ink'acharik, re' QaJaaw Dios i ruko'leej i aj Israel, pan kiq'ab' i nixowanik kiwach. Re' q'oreel nik' najtiil i naa ruwihiik chi q'ataj q'orik i winaq re' re'. Ruum re' i QaJaaw Dios xketelinik cho kiwach, ruum chi k'ahchi' naq kik'ik chi ti' k'axik, eh intib'ik kik'ux.¹⁹Xa re' la' noq inkimik reje i q'atal q'orik kiokik wo' chik chub'anariik i yiib' wach na'ojb'al i aj Israel, ma' xata chik je' rukab' xkian i kimaam kati't. Re' chik taqe i tiyoox i xkinimaj, eh inkixuk'aa' kiib' chu looq'jiik. Eh ni xata naq inkikanaa' rub'aan i yiib' wach, xiik' naah kowiil i kinaah.²⁰Ruum i re' xjohtik wach i rujosq'iil i QaJaaw Dios chikinaah i aj Israel, eh je' wili i xuq'or: Re' taqe tinamit wili ma' xkian taj i nuyejaam wach kuuk' i kimaam kati't, ma' xkinimaj taj i nuq'oral,²¹je' wo' re' i hin ma' nee ta wo' wesam reje i tinamit pan kiye'aab', re' wo' hoq i ma' xresaj ta taqe reje i Josué noq kok'achlik, inki.²²Re' QaJaaw Dios je' re' xub'an kuuk' i aj Israel i lb'al keh mi ma' xkikanaa' runimjiik i reh je' rukab' i runimjiik xkian chaloq i kimaam kati't, oon ma' naa ta chik kaajwaam nimanik.²³Ruum aj re', re' i QaJaaw Dios ma' xresaj ta taqe reje i tinamit i komajaa' i ruq'asaj pan q'ab' i Josué noq xkimik reje. Re' taqe i tinamit xi kahnik Canaán i lb'al reh chib'ih i naa kianam i aj Israel

¹Re' taqe k'ih seht chi tinamit wili xi kahnik Canaán i lb'al reh chib'ih i naa kianam i aj Israel, re' taqe i aj Israel ma' keht'al ta wach q'aq'inik.²Re' i QaJaaw Dios xukanaa' taqe ar i tinamit re' re', reh chi re' keh xitijinik keh chi q'aq'inik taqe i aj Israel ma' jank'al ta kiwihik panq'aq'inik.³Re' taqe i wilik i tinamit xi kahnik Canaán, re' taqe i ho'oob' chi kireey taqe i aj filisteo, taqe i aj Canaán, taqe i aj Sidónio, taqe aj heveos, re' taqe i wilkeeb' chinaah i yuuq' Líbano, eh imponik i wilik wii' yuuq' Baal-hermón, imponik ko chupaam i ye'aab' Hamat.⁴Re' taqe re' xi kahnik ar, re' raaj i QaJaaw Dios chi xikoj rehtaal chib'ih i naa kianam i aj Israel mi naakinimam i k'uhb'aal ruq'orom chaloq i keh i kimaam kati't ruuk' chii' i Moisés.⁵Je' re' noq re' taqe aj Israel xi k'acharik chi kixilak taqe i aj Canaán, taqe i aj heteo, taqe i aj amorreo, taqe i aj ferezeo, taqe i aj heveo, taqe i aj jebuseo.⁶Eh re' taqe i kak'uun kixq'uun i aj Israel xkian kaxáro kuuk' i kak'uun kixq'uun i tokoom tinamit re' re', eh xkiloq'ej wo' keh i tiyoox xkiloq'ej i keh. Re' Otoniel xuko'leej taqe i aj Israel pan q'ab' i Cusan-risataim

⁷Re' taqe i aj Israel xkian i yiib' wach na'ojb'al chuwach i QaJaaw Dios, xsahchik pankik'ux i k'achlik Dios, re' chik taqe i tiyoox Baal i Asera kib'ihnaal xkiloq'ej.⁸Eh ruum i xkian re' re' i aj Israel ma' k'isiin ta noq xchalik i rujosq'iil i QaJaaw Dios chikinaah. Xukanaa' taqe pan q'ab' i Cusan-risataim kireey i aj Mesopotamia, eh waxiqiib' haab' xi wihik chi ri'sil i rajaawriik i reey re' re'.⁹Ruum i re', re' taqe i aj Israel xkipahqaaj kitoob'jiik ree QaJaaw Dios. Eh re' reh xusik' wach jinaj i winaq re' i xko'linik keh i aj Israel. Re' i xusik' wach re' i Otoniel rak'uun i Cenaz, re' ruchaaq' i Caleb.¹⁰Eh re' Otoniel qajik chee Ruxlab'al i Dios chinaah xkahnik chi k'amal kib'eeh i aj Israel. Re' i Otoniel xooj chi q'aq'inik ruuk' i Cusan-risataim. Re' QaJaaw Dios xtoob'inik reh i chi xub'an reh i reey re' re'.¹¹Eh noq kok'achlik i Otoniel rak'uun i Cenaz ma' xwihik ta chik q'aq'inik chuwach i ka'winaq haab'. Re' Aod xuko'leej taqe i aj Israel pan q'ab' i kireey i aj Moab

¹²Eh re' taqe i aj Israel xkian wo' chik i yiib' wach na'ojb'al chuwach i QaJaaw Dios. Eh re' reh xuyeew rukowiil i Eglón kireey i aj Moab chi xkian reh taqe i aj Israel, ruum re' keh xkian i yiib' wach na'ojb'al chuwach i QaJaaw Dios.¹³Re' i Eglón xkian jinaj wach kik'ux ruuk' i riih rumaam Amón, je' wo' kuuk' i riih rumaam Amalec. Eh xumol cho kiwach xchalik rub'an keh i aj Israel xuchop naah i tinamit Jericó i wilkeeb' wii' xaq ipak'.¹⁴Eh re' taqe i aj Israel waxaqlaj haab' xi wihik chi ri'sil i rajaawriik i Eglón kireey i aj Moab.

¹⁵Eh re' taqe i aj Israel xkipahqaaj kitoob'jiik reh i QaJaaw Dios, eh re' reh xuksaj jinaj i winaq xko'linik keh i aj Israel. Eh re' i xusik' wach re' i Aod pantz'eet intz'ainik rak'uun i Gera re' ruuk' taqe i riih rumaam Benjamín. Re' taqe i aj Israel xkitaq'aaj reje i Aod reh chi wilik i xooj rusiij reh i Eglón kireey i aj Moab.¹⁶Eh re' i Aod xuyejaa' jinaj ch'ihch' k'ul q'as ka'k'itub' rooq xuxit' reje nah rutuuq parusak'aaj chi ri'sil i ruso'.¹⁷Re' i Aod xuq'asaj i xponik rusiij reh i Eglón kireey taqe i aj Moab. Re' Eglón q'ina' laj winaq.¹⁸Eh noq ruq'asam chik i kooch i Aod reh i Eglón xutaq'aaj taqe pankipaat awach taqe i xuk'am reje chi riij.¹⁹Eh noq xponik i Aod i wilkeeb' wii' taqe i tiyoox wilkeeb' ma' najta Gilgal xsutinik wo' chik reje wilik wii' i Eglón, je' wili i xuq'or reh:
QaJaaw reey re' hin wilik inwaaj nuq'orom aweh, xa re' la' awutkeel inwaaj nuq'orom aweh, inki.
Re' reey xuq'or keh i kikamanik ruuk' chi maa inki a'n i choqik, eh chi xi elik cho ruuk'.

²⁰Eh noq tzunlik Eglón chi rutkeel chupaam i ye'aab' inhi'lik wii' pan siq'jil, re' Aod je' wili i xuq'or reh:
Re' i naa nuq'orom aweh re' i Dios xq'orik cho weh, inki.
Eh noq xrib'iraj chi je' re' i Eglón xpa'lojik johtoq parutzunaab'.

²¹Eh re' i Aod xresaj chaloq i ruq'aslaj ch'ihch' paruso' ruuk' i rutz'eet q'ab' pansak'aaj reh i nah rituuq, xulahmaaj i koq chupaam i Eglón.²²Kow xulahmaaj i koq ma' xata re' i ch'ihch' xokik i koq xokik la' i koq haa' i rooq, eh xb'uhrik riij i ch'ihch' ruum i ruq'ina'iil i Eglón, xb'ulinik chaloq i rusaa' chi riij i ch'ihch', re' Aod ma' xresajta chik iloq.²³Eh re' i Aod xulutz' pan laweh taqe i puerta chinaah i Eglón, pan ventana xelik i reh.

²⁴Eh noq elinaq chik chaloq i Aod xiooj k'oloq i kikamanik ruuk' i reey, eh noq inkilow chi pan laweh wilkeeb' i puerta xkikapaaj chi re' reey lutz'wik reh, xkikapaaj chi ab'rik i rub'an ar, chupaam i ye'aab' inhi'lik wii' pan siq'jil.

²⁵Eh noq matunaak chik inkitoq'aa' uy-inik inkilow chi ma' nelik ta chaloq xkiteh taqe i puerta ruuk' i laweh, eh noq xi okik i koq inkilow kutlik ar i kireey chi kamnaq chik.

²⁶Eh noq re' keh k'ahchi' kichamam kiib' chi rilariik, re' i Aod xumol chi elik ar ik'inaq chik reje wilkeeb' wii' i tiyoox ar Gilgal, xukeb'aa' riib' Seirat.²⁷Eh noq xponik chinaah i yuuq' re' i kiye'aab' taqe i riih rumaam Efraín ar pan rax chee' kow xixulej i rutuun yuq'umb'al keh i aj Israel. Eh chi kunchelaal taqe i aj Israel xiqajik cho naah yuuq' peet cho chikiwach i Aod.²⁸Re' Aod je' wili i xuq'or keh i aj Israel:
Kinatahqeej taq ruum re' i QaJaaw Dios xuq'asaj chik panqaq'ab' taqe i aj Moab i ki-ixowanik qawach, inki.
Eh re' taqe i aj Israel xkitahqeej wo' reje i Aod, eh xkehchaaj i kiye'aab' i aj Moab ki-ik'ik wii' chi juntar i nim ha' Jordán, eh ma' jino'q chik i ki-ik'ik ar.²⁹Chupaam i q'iij re' re', re' taqe i aj Israel xkikansaj i lajeeb' miil i ki soldado i aj Moab. Re' taqe i xti kow kiib', ma' awach ta jino'q i xukuy i q'aq'inik kuuk' i aj Israel.³⁰Je' aj re' noq re' taqe i aj Israel xkian reh taqe i aj Moab chupaam i q'iij re' re'. Eh chi riij i re' kajwinaq haab' ma' xb'aan ta chik i q'aq'inik chupaam i tinamit re' re'.

³¹Chi riij i Aod re' chik i Samgar rak'uun i Anat xk'amwik kib'eeh i aj Israel. Re' Samgar xukansaj taqe i waqiib' siento chi aj filisteo ruuk' i ruchee' b'ehtesb'al b'oyax, ruuk' i re' xuko'leej taqe i aj Israel. Re' Débora ruch'ihil i Barac xkian reh i Sísara

¹Noq kamnaq chik i Aod re' taqe i aj Israel xkitoq'aa' wo' chik rub'aan i yiib' wach na'ojb'al chuwach i QaJaaw Dios.²Eh re' i QaJaaw Dios xuq'asaj taqe i aj Israel pan q'ab' i Jabín kireey i aj Canaán reey ar Hozor. Eh re' k'amal kib'eeh i ru soldado Sísara i b'ih, ar patim Haroset-goim.³Re' Jabín, b'elejeeb' siento i rukareta reh q'aq'inik re' ruuk' i ch'ihch'. Eh juninaq haab' rik'sam taqe chi ti' k'axik i aj Israel, korehtaal xkipahqaaj kitoob'jiik reh i QaJaaw Dios i aj Israel.

⁴Chupaam taqe q'iij re' re', jinaj ixoq wilik chi taaq'anik chikinaah i aj Israel Débora rub'ihnaal jalal ruq'oral i Dios, rehk'een i Lapidot.⁵Eh re' i Débora okrinaq chimponik rutzunaa' riib' chi q'ataj q'orik chi ri'sil i ruxaq ipak' i Débora inkiq'or reh. Wilik chinaah i yuuq' wilkeeb' wii' taqe i riih rumaam Efraín, wilik panyejaal i Ramá ruuk' i Bet-el. Eh re' taqe i aj Israel kiooj ruuk' ixoq re' re' chuyejeb'jiik i kipeleto chikiwach.

⁶Eh pan jinaj q'iij i Débora xutaq'aaj ruk'amariik jinaj i winaq Barac rak'uun i Abinoam, xpatinik Cedes, jinaj i tinamit wilik chupaam i kiye'aab' taqe i riih rumaam Neftalí, je' wili xuq'or reh:
Re' QaJaaw i ki Dios i aj Israel je' wili i xuq'or cho chawiij: Chaloq chupaam i ruyuq'ul Tabor chumol kiwach lajeeb'-oq miil i winaq ar re' ruuk' taqe i riih rumaam Neftalí, re' ruuk' taqe i riih rumaam Zabulón.⁷Re' hin naa nuye'em q'ab' chi re' Sísara k'amal rub'eeh ru soldado i Jabín, chaloq chupaam i rooq ha' Cisón reh chi naa kaat ruk'ulb'ilem ruuk' i rukareta, eh ruuk' taqe i ru soldado, xa re' la' re' hin naa nuq'asam taqe panaq'ab', inki i Dios.

⁸Eh re' i Barac je' wili i chaq'wik xub'an:
Wila' xat'ooj chi wiij i hat nee kinooj, eh wila' ma' xat'ooj chi wiij ma' nee ta kinooj chi wutkeel, inki.

⁹Re' Débora je' wili ruchaq'weesjiik i Barac xub'an:
Re' hin nee kinooj chawiij, xa re' la' ma' re' tee hat naa ruye'ariik awajaawriik noq naa aweliik korik ruuk' i q'aq'inik ruum re' i QaJaaw Dios naa ruq'asaniik i Sísara pan q'ab' jinaj ixoq, inki.
Eh re' Débora xooj wo' chi riij i Barac chupaam i tinamit Cedes.¹⁰Re' i Barac xumol wo' kiwach i riih rumaam Neftalí, i riih rumaam Zabulón, ar Cedes, lajeeb' miil chi winaq i xuk'am taqe reje chi riij i Barac, eh xooj wo' hoq i Débora chi riij.

¹¹Eh jinaj i winaq Heber rub'ihnaal, re' ruuk' taqe i riih rumaam i Hobab rajaaw i rehk'een i Moisés, xukanaa' taqe i ruk'uliil xelik chupaam i tinamit Ceneo. Ar xuyejaa' i ru-itz'ihy naah paat chi ri'sil i juniwal i tz'inuj wach k'ixkaab' Zaanaim ma' najta ruuk' i ye'aab' Cedes.¹²Eh noq xrib'iraj rib'iral i Sísara chi re' Barac rak'uun i Abinoam chi xjohtik chinaah i yuuq Tabor rub'ihnaal.¹³Xumol kiwach i b'elejeeb' siento i rukareta reh q'aq'inik, eh xumol wach chu'nchel i ru soldado xi elik reje chupaam i ye'aab' Haroset-goim, eh xiooj i wilik wii' i nim ha' Cisón.

¹⁴Eh re' Débora je' wili xuq'or reh i Barac:
Hiy chi q'aq'inik ruum yu'naak xponik chik i ruq'ijil chi re' QaJaaw Dios naa ruq'asam panaq'ab' i Sísara, re' QaJaaw Dios peet reje chawach reh atoob'jiik, inki.
Re' i Barac xqajik cho nah yuuq' Tabor ruch'ihil taqe i lajeeb' miil chi ru soldado.¹⁵Eh noq xokik chi q'aq'inik i Barac re' QaJaaw Dios xusach i runa'ojb'al i Sísara i kib'esanik reh i rukareta, taqe i ru soldado. Noq xrilow i Sísara chi re' Barac, ruch'ihil taqe i ru soldado kiyohq'eem i kiq'aslaj ch'ihch' xqajik cho parukareta xumol chi elik chi rooq.¹⁶Eh re' Barac xutaq'aaj taqe reje i ru soldado, i rukareta i Sísara korehtaal xi ponik chupaam i ye'aab' Haroset-goim. Eh chu'nchel i ru soldado i Sísara xikanteesjik ruuk' i q'aslaj ch'ihch' ma' jino'q chik i xi kahnik chi k'achalkeeb'.

¹⁷Eh re' i Sísara xumol chi elik chi rooq xooj rukeb'aa' riib' chupaam i ru-itz'ihy naah paat i Jael rehk'een i Heber aj Ceneo. Ar xooj rukeb'aa' riib' ruum re' Jabín i kireey i aj Hazor inkik'am kiib' panotob'il kuuk' i rak'uun i Heber.¹⁸Eh noq xponik i Sísara jumehq'iil xelik chaloq i Jael, je' wili i xuq'or reh:
Okeen choo panupaat Jaaw, maayohb'isaj awiib', inki.
Eh re' i Sísara xokik i koq ruuk' i ixoq re' re', eh xukeb'aa' xub'ur naah chi jinaj saq itz'ihy.

¹⁹Eh re' Sísara je' wili xuq'or reh i Jael:
Chakuy chasiij k'isinoq nuhaa' ruum re' hin ma' k'isiin ta chiqkaal nuchii', inki.
Xchalik i Jael xuchop chaloq i koxtaal tz'uhuum xuyeew ruhaa' i Sísara re' ruuk' i lecha, eh xub'ur wo' chik naah chi saq itz'ihy.

²⁰Eh re' Sísara je' wo' chik wili i xuq'or reh i Jael:
¿Re' hat neerub'an chi nee ti kahnik chi chii' i ookb'al reh aa itz'ihy naah paat, eh wila' awach i xk'ulik pahqanoq, awach i wilik awuuk', inko'q? cha q'or reh chi ma' awach taj i wilik awuuk' inki.

²¹Eh re' Sísara yohb'aal wach i ruq'uhtiik suq suq ruwiriik. Eh re' Jael i rehk'een i Heber xuchop jinaj i q'as ju' chee' re' ruuk' inkib'ak' wii' i itz'ihy naah paat xuchop wo' jinaj i tuyb'al. Eh xokik i koq chi q'uunq'uun aha' suq ruwiriik i Sísara xulahmaaj i q'as ju' chee' pan naah korehtaal xik'ik chi juntar ch'aplojik panak'al, je' re' noq xkimik.

²²Eh noq xponik i Barac chu sik'ariik i Sísara xelik chaloq Jael chi k'ulariik je' wili i xuq'or reh:
Kimlom chi jumehq'iil neenuk'uhtaaj aweh aha' naq wilik i k'ahchi' asik'im, inki.
Eh re' Barac xokik i koq parupaat i Jael, xponik rureq i Sísara chi kutlik wach ak'al chi kamnaq chik lamlik i q'as ju' chee' panaah.

²³Je' aj re' noq re' QaJaaw Dios xresaj i rajaawriik i Jabín kireey i aj Canaán chikiwach i aj Israel.²⁴Chupaam i q'iij re' re' xkitoq'aa' chaloq i kowlaj q'aq'inik i aj Israel ruuk' i Jabín kireey i aj Canaán korehtaal xkisach wach chi jumpech. Re' tz'uuy xub'an i Débora, ruch'ihil i Barac

¹Chupaam i q'iij re' re', re' Débora, ruch'ihil i Barac rak'uun Abinoam, je' wili i xkiq'or pankitz'uuy:

²Chayeew taq ruloq'il i QaJaaw Dios, cha a'n taq atz'uuy chawunchelaal ruum ko wilik taqe i winaq chi kixilak i aj Israel kow kiib' chi q'aq'inik. Eh chi ko wilik taqe i winaq konkaaj ojik chi q'aq'inik.³Chab'iraj taq i hat i wilkaat taq chi reyil, i wilkaat taq chi ajaab'esil. Re' hin naa nub'anam nutz'uuy ye'b'al ruloq'il, ye'b'al runimaal wach i QaJaaw Dios i hoj, hoj aj Israel.

⁴QaJaaw Dios noq xat elik cho Seir, noq xat'ooj chupaam i ye'aab' Edom, re' i wach ak'al xk'uyu'jik, eh re' taqe i suutz' xkiyeew chaloq i jab' pan taxaaj.⁵QaJaaw Dios ruum chi nim awajaawriik kik'uyu'jik pan kiye'aab' i yuuq' chawach. Eh re' yuuq' Sinaí ink'uyu'jik wo' paruye'aab' chawach i hat QaJaaw i qaDios i hoj aj Israel.⁶Chupaam taqe i q'iij noq ko wilik chee Samgar, rak'uun Anat noq ko wilik chee Jael, re' taqe i aj b'iyajo ma' ki-ik'ik ta naq chik pan nim b'eeh, re' naq chik i kok' kootb'al riij b'eeh inkik'am.⁷Eh re' taqe i kok' ye'aab' wilkeeb' wii' patineel ar Israel xiqeb'arik naq chik ma' awach ta naq chik imponik ar. Eh xwilow chi je' re' hin, hin Débora xin wuktik chi kitoob'jiik i aj Israel xin kahnik chi hin kituut.

⁸Eh noq kiokik chi kilooq'jiik taqe i tiyoox intohq'ik wo' chik i q'aq'inik, xa re' la' ma' jino'q chi kixilak ka'winaq miil chi aj Israel kiwuktik ruuk' kipulato ch'ihch', ruuk' i kiq'aslaj ch'ihch'.

⁹Re' hin Débora juneliik i nuyeew nuk'ux chi kitoob'jiik taqe i k'amal kib'eeh i aj Israel. Reh wo' kitoob'jiik i nutinamiit, re' i xkik'ulaa' ojik chi q'aq'inik. Neeta naq inkiyeew ruloq'il i QaJaaw Dios.

¹⁰Chaq'or taq rib'iral i hat i tiooj taq chikiij i saqkiij b'uurux, je' wo' taq i hat i ti q'atwik taq q'orik, je' wo' taq i hat cha wooq taq tib'ehik.¹¹Neeta naq imponik atz'uuy chupaam i ye'aab' wilik wii' i ha' najt kuuk' i kib'anik reh q'aq'inik. Chatz'uyej taq wach ruum xesaj taqe korik i wilkeeb' pankok' ye'aab'. Eh ruum i qako'ljiik xub'an i QaJaaw Dios i hoj, hoj aj Israel. Re' taqe i rutinamiit i QaJaaw Dios xiooj panookb'al reh i tinamit.

¹²Chawik'raaj awiib' Débora, xtichawik'raaj awiib', cha tz'uyej wach i Dios ye'b'al ruloq'il, eh re' hat Barac rak'uun i Abinoam wukteen, chak'am taqe reje i tinamit xichoparik cho panq'aq'inik.

¹³Re' taqe i aj Israel xiooj chi q'aq'inik. Re' taqe i rutinamiit i Dios xiooj chi q'aq'inik kuuk' i wilik kajaawriik.¹⁴Eh re' taqe i riih rumaam i Neftalí wilkeeb' ar Amalec xiooj wach k'ixkaab'. Eh xooj chikiij taqe i riih rumaam i Benjamín, je' wo' taqe i k'amal kib'eeh i aj Maquir. Xiooj wo' haa' taqe i wilik kajaawriik chi kixilak i riih rumaam i Zabulón.¹⁵Eh re' taqe i k'amal kib'eeh i riih rumaam i Isacar xiooj wo' hoq ruch'ihil i Débora, re' taqe i riih rumaam i Isacar xiooj wach k'ixkaab' chiruto'ariik i Barac. Eh re' taqe i riih rumaam i Rubén xub'an kiib' kik'ux.¹⁶¿Chib'ih reet noq ma' xiooj ta haa' i riih rumaam i Rubén xi kahnik chi rib'irjiik i cha'jen tentzun? Chi kixilak i riih rumaam i Rubén wilik i q'e' wo' naq kow kiib', xa re' la' q'e' kiyo'jik.

¹⁷Re' taqe i riih rumaam i Galaad xi kahnik chi juntar i nim ha' Jordán. Eh re' taqe i riih rumaam i Dan xi kahnik ruuk' taqe i barco. Eh re' taqe i riih rumaam i Aser xi kahnik pan tz'a'laj yuuq' kik'uloq wii' i barco.¹⁸Eh re' taqe i riih rumaam i Zabulón, taqe i riih rumaam i Neftalí xkiyeew kiib' pankimik chi q'aq'inik chikinaah taqe yuuq.

¹⁹Re' taqe i kireey i aj Canaán xi chalik chi q'aq'inik chupaam i tinamit Taanac, re' wilik ma' naj ta ruuk' i nim ha' wilik ar Meguido. Re' taqe reey re' re' xi chalik chi q'aq'inik, xa re' la' xama' xta wo' hoq i xkehchaaj.²⁰Eh noq xkimik i Sísara xi okik haa' i ch'umiil wilkeeb' pan taxaaj chi rub'anariik reh.²¹Re' taxaaj xuyeew chee jab', re' rooq ha' Cisón xsachwik kiwach chu'nchel i re'. Eh re' hat naa aye'q'em chi kalaq taqe i q'e' kow inki a'n kiib'.

²²Re' taqe i kawáyu xan choqik chik i kixijab' chi elik xan teleninik chik, xa kiq'ajb'anik chik chi elik kuuk' i wilik kikowiil imb'esanik keh.²³Re' ruánjel i QaJaaw Dios je' wili i xuq'or: I ruk'ul chi neenchalik i runimaal ti' k'axik chinaah i tinamit Meroz, je' wo' chikinaah chu'nchel i patim chupaam, inki. Je' re' xuq'or ruum ma' xiooj ta chi kiko'ljiik taqe i soldado xutaq'aaj reje i QaJaaw Dios.

²⁴Q'e' atoob' reh chi kixilak ixoq i Jael re' i rehk'een i Heber aj Ceneo. Xa re' wo' reh q'e' atoob' reh chi kixilak ixoq, wilkeeb' chupaam i ye'aab' kimolom wii' kiib'.²⁵Eh noq xupahqaaj ruhaa' i Sísara lecha i xye'arik reh chi uuk'jik ruum i Jael. Eh sas laj lecha i xye'arik reh chupaam i nimlaj kulk q'e' holohik.²⁶Re' Jael xuchop i q'as ju' chee', ruuk' i rutz'eet q'ab', eh ruuk' i rusak'aaj q'ab' xuchop i tuhyb'al. Eh xutuhyaaj qohoq i q'as ju' chee' panaah i Sísara, xuhop paam i naah xik'ik chi juntar ch'aplojik panak'al.²⁷Eh re' i Sísara xkahnik chi xa rutolem chik riib' wach'ehk i Jael. Eh ar xkahnik chi kutlik i ruti'jolal chi kamnaq chik.

²⁸Eh re' rutuut i Sísara tz'eht i rub'an cho pan ventana, eh xtib'ik ruk'ux je' wili xuq'or: ¿Chib'ih reet noq xucham cho riib' i wak'uun Chib'ih reet noq xucham cho riib' i rukawayu? ¿Chib'ih reet noq xkicham cho kiib' i rukareta? inki.²⁹Eh wilik taqe ixoq q'e' wilik kina'ojb'al je' wili ruchaq'weesjiik i rutuut i Sísara xkian, eh xuq'or wo' chik reh ha' i reh je' wili xkiq'or:³⁰Re' taqe re' kok'ahchi' cho kich'aqam i xa chib'ih jariik xkiq'uch cho panq'aq'inik, ju'jun, oon ka'kab' chi ixoq i k'ahchi' kik'ulum i ju'jun chi soldado Eh re' Sísara naa naq kiye'em reh i holohaq itz'ihy re' ruuk' taqe i k'ih wach inka'yik naa rukamaniik reh i ralaq i ruso' i k'amal kib'eeh i soldado panq'aq'inik.³¹QaJaaw Dios je' ta naq re' noq neensahchik kiwach i ki-ixowanik awach. Eh re' i kik'axwik aweh nee ta naq kisihq'inik chi je' rukab' i rusaqumaal i q'iij, inki taqe pankitz'uuy.
Eh chi riij re' ma' xb'aan ta chik i q'aq'inik Israel chuwach i ka'winaq haab'. Re' Dios xusik' wach i Gedeón

¹Re' taqe i aj Israel xkian wo' chik i yiib' wach na'ojb'al chuwach i QaJaaw Dios. Je' re' noq re' i QaJaaw Dios xuq'asaj taqe pan q'ab' i aj Madián chuwach i wuquub' haab'.²Re' taqe i aj Madián xtohqik k'iksam chi ti' k'axik taqe i aj Israel. Eh ruum kiyo'jiik xooj kikeb'aa' kiib' pantaq paat ab'aj, pantaq jul i aj Israel, aha' ma' kikan ta wii'.³Eh jarpech naq inooj kitik chib'ih keh i aj Israel, jumehq'iil kichalik i aj Madián, ruch'ihil taqe i aj Amalec ruch'ihil taqe i kichalik parelb'aal reje q'iij chub'anariik keh.⁴Re' taqe i aj ixowaal re' re' inkiyejaa' i ki-itz'ihy naah paat chupaam i kiye'aab' i aj Israel inkisachib'eej wach i kitik i aj Israel imponik ko chupaam i ye'aab' Gaza korehtaal inkikanaa' chi ma' xta kiwa' kihaa'. Eh inkik'am i kitentzuun i kib'uruux, je' wo' hoq i kib'ooyax.⁵Eh noq kiooj taqe i aj Madián chuchopariik naah i ye'aab', inkik'am reje i ki-itz'ihy naah paat, ruch'ihil taqe i kiwakax, i kicameyo xiik' naah kik'ihaal xa je' chik taqe ruk'ihaal nimaq chili'l.⁶Eh kuum taqe i aj Madián re' re' ma' xta naq chik wilik keh i aj Israel. Ruum aj re' noq xooj kuxoq xkipahqaaj kitoob'jiik ree QaJaaw Dios.

⁷Eh noq xkipahqaaj kitoob'jiik reh i QaJaaw Dios chi naa kiko'ljiik pan kiq'ab' i aj Madián.⁸Re' QaJaaw Dios xutaq'aaj chaloq jinaj i jalal ruq'oral chi kixilak i aj Israel je' wili i xuq'or keh:
Re' taq aaDios je' wili i xuq'or: Re' hin xineesanik cho keh paruyuq'ul i Egipto, re' i minooj naq taqe wii' pankowlaj kamanik.⁹Re' hin ma' xata re' i kiko'ljiik xnub'an pan kiq'ab' i aj Egipto xnuko'leej wo' taqe pan kiq'ab' imb'anik naq ti' k'axik keh. Re' taqe xwesaj reje chikiwach, eh keh chik i keh xnuyeew i kiye'aab'.¹⁰Eh xnuq'or wo' keh chi re' hin i kaJaaw i ki Dios, eh chi ma' naa ta kiyohleem wach i tiyoox i aj amorreo wilkeeb' chupaam i ye'aab' wilkeeb' wii'. Xa re' la' re' keh xama' xkinimaj ta wo' hoq i xnuq'or keh, inki Dios, inki.

¹¹Eh jinaj ruánjel i QaJaaw Dios xk'uloq xutzunaa' riib' chi ri'sil i juniwal i chee' tz'inuj wilik ar Ofra. Re' i ye'aab' re' re', reh i Joás i riih rumaam i Abiazer. Eh re' Gedeón i rak'uun i Joás k'ahchi' rumesem paam i trigo chi ma' eht'alimaj chupaam i ye'aab' inyitz'arik wii' i uuva inkorjik chi ha'. Reh chi ma' naa ta rilariik kuum i aj Madián.¹²Eh re' ruánjel i QaJaaw Dios xuk'uhtaaj riib' chuwach i Gedeón, eh je' wili i xuq'or reh:
Re' i QaJaaw Dios wilik awuuk' cha toob'jiik i hat winaq kow awiib' ma' tiyo'jik taj, inki.

¹³Eh re' i Gedeón je' wili i xuq'or reh i jalal ruq'oral i Dios:
Kinakuy jaaw wila' re' Dios wilik quuk' ¿Chib'ih reet noq xchalik chi qanaah i ti' k'axik wili? ¿Aha' wilik taqe i ma' ilooj taj xub'an i Dios inkiq'or qeh i qamaam qati't, noq inkiq'or qeh chi re' i QaJaaw Dios x-esanik cho qeh ar Egipto? Eh yu'naak xoj ruq'eb' chi qutkeel, eh xoj ruyeew pan kiq'ab' i aj Madián, inki.

¹⁴Eh re' i QaJaaw Dios je' wili i xuq'or reh i Gedión:
Re' hat chakoj chu'nchel awansil hiy chako'leej taqe awuch aj Israel pan kiq'ab' i aj Madián. Eh re' hin i k'ahchi' nutaaq'aniik aweh, inki.

¹⁵Eh re' i Gedeón, je' wili i xuq'or:
Jaaw ¿Nik' wach noq naa rojiik nuko'leem taqe i wuch aj Israel? Re' taqe i numaam wati't i hin q'e' taqe neb'aa', chi kixilak i riih rumaam i Manasés. Eh xa re' wo' hin q'e' hin meem chikiwach i wilkeeb' parupaat i wajaaw, inki.

¹⁶Eh re' i QaJaaw Dios je' wili ruchaq'weesjiik xub'an:
Xti korik chi re' hin naa nu wihik awuuk' chatoob'jiik. Re' hat naa a'nam keh i aj Madián, xa je' rukab' noq imb'aan reh i jinaj chi winaq, inki.

¹⁷Re' Gedeón je' wili i chaq'wik xub'an:
Wila' korik chi wilkaat wuuk' chi nutoob'jiik inwaaj chi neenak'uhtaaj rehtalil chi re' hat i Dios k'ahchi' aq'oriniik weh.¹⁸Chakuy mat elik pe reje ayu' korehtaal kinsutinik chee i hin ank'am pee chaloq i mayiij naa nuq'asam aweh, inki.
Eh re' i QaJaaw Dios xuq'or i korik je' wili i xuq'or:
Ayu' naa nuwihiik korehtaal ti sutinik chaloq, inki.

¹⁹Eh re' i Gedeón xokik i koq parupaat xukansaj jinaj i k'isa kaprax xuchaq'saj. Eh ruuk' i juninaq litro chi arina, xuyejaa' i kaxlanwi'k ma' kojooj ta ch'amb'esb'al reh. Eh xuyeew reje i tiwik pan chakach, re' i riis xuyeew reje pan xun. Xuk'am reje chi ri'sil i juniwal chi tz'inuj.

²⁰Eh xq'orarik reh ruum i ruánjel i Dios chi naa ruye'em i tiwik chinaah ab'aj je' wo' taqe i kaxlanwi'k ma' kojooj ta ch'amb'esb'al reh, eh chi naa ruchihkaam i riis i tiwik chinaah taqe re'.
Re' i Gedeón xub'an wo' hoq i xq'orarik reh.

²¹Re' i ánjel xutz'a'j ruuk' i ju' rukarote wilik pan q'ab' i tiwik ruch'ihil taqe i kaxlanwi'k. Eh xqop ruq'aq'al i ab'aj xk'ahtik i tiwik ruch'ihil taqe i kaxlanwi'k. Re' Gedeón i nsachiwanik i ánjel chuwach.

²²Eh noq xukoj rehtaal i Gedeón chi re' i ruánjel i QaJaaw Dios inq'orinik reh xyo'jik je' wili xuq'or:
Hat waJaaw, nuDios xti xwilow wach ruuk' naq'nuwach aa ánjel, inki.

²³Eh je' wili ruchaq'weesjiik xb'aan ruum i QaJaaw Dios:
Mat yo'jik ma' naa ta kimiik naa la' nuye'em aweh chi manlik i suq kiil k'uxliis, i nuchjik.

²⁴Re' Gedeón xuyejaa' jinaj i artaal reh i QaJaaw Dios, je' wili i rub'ihnaal xukoj. Re' i QaJaaw Dios inye'wik i suq kiil k'uxliis, inki. Re' artaal re' re' ar Ofra xkahnik chi jumpech, re' wilik pan kiye'aab' i riih rumaam Abiazer.

²⁵Eh chupaam aq'ab' re' re' je' wili i xuq'or i QaJaaw Dios reh i Gedeón:
Chak'am chaloq jino'q imas wakax re' ruuk' i ruwakax awajaaw. Re' rukab' imas wakax wuquub' haab' i wilik reh. Eh chach'ahaaj wach ak'al i artaal i ruloq'ej wii' i tiyoox Baal awajaaw. Eh nee wo' nayok' i chee' inkiloq'ej wii' i tiyoox Asera, re' wilik chucheel i artaal inkiloq'ej wii' i tiyoox Baal.²⁶Re' hat cha yejaa' chi korik jino'q chik i artaal chinaah i rub'ohl i yuuq' reh chi ar nee nayeew nuloq'il i hin aaWaJaaw aaDios. Eh nee nak'am chaloq i rukab' imas wakax neenak'at chi mayiij. Re' i chee neenayok' re' inkiloq'ej wii' i tiyoox Asera re' re' neen kamanik aweh chi aasii', inki.

²⁷Eh re' i Gedeón ruch'ihil taqe i lajeeb' rumoso xub'an wo' chu'nchel i xq'orarik reh ruum i QaJaaw Dios. Xa re' la' ma' re' ta pan q'iij xub'an chaq'ab' xub'an, ruum inyo'jik chikiwach taqe i awach reh i rajaaw, eh inyo'jik wo' chikiwach taqe i patim chupaam i tinamit re' re'.²⁸Eh noq xsaq'ik chi junwaar noq xi wuktik taqe i patim ar inkilow ch'alik chik wach ak'al i artaal inkiloq'ej wii' i tiyoox Baal. Eh yok'ooj wo' chik i chee' inkiloq'ej wii' i Asera re' wilik chucheel i artaal re' re', eh chi q'asamaj chik chi mayiij imas wakax chinaah i ak' artaal.²⁹Eh k'ul xtohq'ik kipahqaam chikiwach chi je' wili:
¿Awach xb'anik taqe wili?
Eh noq kipahqaam chik kisik'im chik chi riij chi korik xq'orarik keh chi re' Gedeón i rak'uun i Joás xb'anik.
Eh re' taqe i patim chupaam i tinamit je' wili i xkiq'or reh i Joás:

³⁰Re' hat chawesaj cho qeh awak'uun reh chi naa qakansam, ruum xuch'ahaaj wach ak'al i artaal inq'aloq'ej wii' i qadios Baal, xiyok' chee inqaloq'ej wii' i qadios Asera re' wilik chucheel i artaal re' re', inki taqe.

³¹Eh re' Joás je' wili kichaq'weesjiik xub'an taqe i kisutinik i koq riij:
¿Mi xat chalik taq chi ko'ljiik re' i Baal? ¿Mi xat chalik taq aj peleto chi riij re'? Awach i xchalik chi ruko'ljiik riij kamnaq chik noq neensaq'ik. Wila' xti korik chi dios i Baal chi ko'leej riib' chi rib'il riib' chuwach ixyojwik reh i ru artaal, inki.

³²Chupaam i q'iij re' re' Jerobaal chik i xtohq'ik kiq'orom reh i Gedeón: Iraaj ruq'orom chi chuko'leej riib' i Baal. Je' re' i xkiq'or reh ruum re' Gedeón xyojwik reh i ru artaal i Baal.

³³Eh xkian jinaj wach kik'ux taqe i aj Madián kuuk' i aj Amalec, kuch'ihil taqe i kichalik parelb'aal q'iij, xi q'ahxik reje chi juntar i nim ha' Jordán, xooj kiyejaa' i ki-itz'ihy naah paat chupaam i ye'aab' Jezreel.³⁴Re' Gedeón xokik ruuk' i chi manlik i Santolaj Ruxlab'al i Dios, ruum i re' xuhupej reje paam i ruk'aa' imas tentzun, yuq'umb'al reje keh taqe i riih rumaam Abiazer.³⁵Eh xutaq'aaj wo' taqareel yuq'en keh junch'uq chi riih rumaam i Manasés, ruch'ihil taqe i junch'uq chi riih rumaam i Aser, je' wo' i junch'uq chi riih rumaam i Zabulón, je' wo' i junch'uq chi riih rumaam Neftalí chi naa kimolom kiib' ruuk' i reh.

³⁶Eh re' Gedeón je' wili i xuq'or reh i QaJaaw Dios:
Wila' xti korik chi naa kiin akojom chi kiko'ljiik i aj Israel chuwach i ti' k'axik, je' rukab' i xaq'or weh i hat.³⁷Re' hin naa nuye'em i tz'uhuum riij tentzun chupaam i ye'aab' inkich'ey wii' i riij i trigo. Wila' xa re' i rismaal i tz'uhuum tz'aqik noq neensaq'ik ruum i musjab', eh chiqiij ak'al chi junsuut. Ar neenureq chi riij chi korik chi naa kin akojom chi kiko'ljiik i aj Israel, je' rukab' i xaq'or weh i hat, inki.

³⁸Nik' wach i xupahqaaj i Gedeón, je' wo' re' xub'an i Dios. Noq xwuktik chi junwaar i Gedeón xtohq'ik ruyitz'im i rismaal i tz'uhuum xtz'aqik wo' ruum i musjab' jinaj kulk i ha' xureq.³⁹Eh re' i Gedeón je' wili i xuq'or reh i Dios:
Jaaw ma' ta naq neenchalik aajosq'iil chi nunaah ruum junriim chik i nupahqaaj aweh chi nee nak'uhtaaj chi nuwach rehtaliil. Yu'naak inwaaj chi re' i rismaal i tz'uhuum neenkahnik chi chiqiij xa re' ak'al chi junsuut neerut'aqsaj i musjab', inki.

⁴⁰Eh chupaam aq'ab' re' re' xub'an wo' hoq i Dios i xupahqaaj i Gedeón noq xsaq'ik chi junwaar i rilow chiqiij wo' hoq i tz'uhuum, eh xa re' ak'al chi junsuut tz'aqik ruum i musjab'. Re' Gedeón xub'an keh i aj Madián

¹Re' Gedeón i Jerobaal chik inkiq'or reh ruch'ihil chu'nchel i wilkeeb' ruuk' xi wuktik reje wahq'eq xooj kimol kiib' chi chii' i k'achlik ha' Harod. Eh re' i wilik wii' i ki-itz'ihy naah paat i aj Madián pantz'eet reh i rookb'aal q'iij inkahnik reje, ar wilkeeb' chi juntar i yuuq' Moré, wataq k'ixkaab'.

²Re' i QaJaaw Dios, je' wili i xuq'or reh i Gedeón:
Re' taqe awuch'ihil xiik' naah k'ihaal, wila' xiooj i re' ma' nee ta inkinimaj i aj Israel chi hin neekiq'asanik panaq'ab' taqe i aj Madián. Nee la' inkiq'or chi ruuk' kikowiil neenkian reh taqe re', neenkinimb'isaj kiwach.³Ruum aj re' cha q'or keh i tinamit chi awach i kiyo'jik neerub'an chi nee kisutinik reje pankipaat. Eh wila' wilik taqe i aj Galaad kiyo'jik nee wo' rub'an chi neekisutinik reje, inki.
Eh xi sutinik wo' reje i kiib' ru ka'winaq miil, xalajeeb' miil chik i xi kahnik ruuk' i Gedeón.

⁴Re' QaJaaw Dios je' wo' chik wili i xuq'or reh i Gedeón:
Xa kook'ih wo' hoq awuch'ihil chak'am taqe qohoq parooq ha', reh chi neenkian kihaa', ar neenwilow, eh neenuq'or aweh awach taqe i ruk'ul chi nee kiooj chawiij, eh awach taqe i ma' ruk'ul ta chi nee kiooj chawiij, inki.

⁵Eh re' Gedeón xuk'am wo' taqe qohoq parooq ha' i ruch'ihil, je' wo' chik wili i xq'orarik reh ruum i QaJaaw Dios:
Neenayeew taqe pareh awach ineenkimohq'eej pan kiq'ab' i ha' noq neenkian kihaa', xa neenkireq' je' rukab' noq i rureq' i ruhaa' i tz'i', eh re' taqe i nee nkixuk'a' kiib' noq neenkian kihaa' pareh wo' taqe nee nayeew, inki.

⁶Eh re' taqe i xa xkimohq'eej pan kiq'ab' i ha' noq xkireq' kihaa' ixib' siento taqe chi winaq. Eh chu'nchel i kik'uliil xkixuk'aa' kiib' noq xkian kihaa'.

⁷Re' QaJaaw Dios je' wili i xuq'or reh i Gedeón:
Ruuk' taqe ixib' siento chi winaq xakimohq'eej pan kiq'ab' i kihaa' noq xkireq' kihaa' naa taq kaat kiko'leem i hat, hat taq aj Israel pan kiq'ab' i aj Madián. Re' taqe i kik'uliil neerub'an chi neekisutinik reje, i nuchjik.

⁸Eh re' i Gedeón xuq'or keh chi kisutinoq reje pan ki-itz'ihy naah paat. Ach wo' re' ixib' siento xkahnik chi ruch'ihil, eh xuk'am keh i k'amb'al kihaa' je' wo' hoq i ruk'aa' i ki imas tentzuun. Re' ki-itz'ihy naah paat i aj Israel ar xkiyejaa' wach salik chinaah qohoq i ki-itz'ihy naah paat i aj Madián wilkeeb' wach k'ixkaab'.

⁹Eh chupaam aq'ab' re' re', re' QaJaaw Dios je' wili i xuq'or reh i Gedeón:
Wukteen chawuksaj taqe reje a soldado hiy qohoq i wilik wii' i ki-itz'ihy naah paat i aj Madián ruum yu'naak naa nuq'asam taqe panaq'ab'.¹⁰Wila' tiyo'jik chi q'aq'inik kuuk' qajeen pee qohoq i hat awuch'ihil i Fura re' amoso, i wilik wii' i ki-itz'ihy naah paat.¹¹Neenab'iraj chib'ih i neenkiq'or i aj Madián chi je' re' neenkowjik ak'ux chi neenooj a'an keh, i nuchjik.
Eh re' Gedeón ruch'ihil i Fura i rumoso xqajik wo' qohoq ko aha' wilik wii' i ki-itz'ihy naah paat i aj ixowaal re' re'.¹²Eh re' taqe i aj Madián, ruch'ihil taqe i aj Amalec, kuch'ihil taqe i kichalik parelb'aal reje i q'iij xkitukej chik kiib' wach k'ixkaab', xa je' chik taqe ruk'ihaal nimaq chili'l, eh xiik' naah k'ihaal i kicameyo, xa je' chik kik'ihaal i saniib' tub'ulkeeb' chi chii' i palaw.

¹³Eh noq xujil i koq riib' i Gedeón ruuk' i ki-itz'ihy naah paat i aj ixowaal jinaj i ki soldado k'ahchi' ruq'orom reh i ruch soldado chib'ih i xrilow paruwiriik, je' wili i xuq'or:
Re' hin xwilow panuwiriik chi xtolinik chaloq jinaj i kaxlanwi'k re' ruuk' i sebada xk'ulik ruq'oj riib' chuwach i itz'ihy naah paat, eh ch'alojik b'ila' wach ak'al i paat.

¹⁴Re' ruch'ihil je' wili ruchaq'weesjiik xub'an:
Re' xawil re' re' ma' xta chik jino'q tokoom i ruq'or, re' ruq'or, re' chi re' Gedeón rak'uun i Joás aj Israel naa ruchaliik chi q'aq'inik chi qanaah. Eh chi re' i hoj aj Madián re' Dios naakooj ruq'asam pan q'ab' i Gedeón haa' chu'nchel i qa itz'ihy naah paat, inki.

¹⁵Eh noq xrib'iraj i Gedeón chib'ih iraaj ruq'orom i xrilow paruwiriik i winaq xuloq'ej i Dios. Eh xsutinik wo' chik chaloq i wilik wii' i ki-itz'ihy naah paat i aj Israel, je' wili i xuq'or:
Chab'iraj taq wukteen taq reje ruum re' QaJaaw Dios naakooj rutob'eem chub'anariik keh i aj Madián, inki.

¹⁶Eh re' Gedeón oxtzuhb' xresaj taqe ixib' siento chi winaq ruch'ihil, xuyeew keh chi kiju'junaal i ruk'aa' imas tentzun reh chi naa kihuupem paam, xuyeew wo' ju'jun kikoom wilik q'aaq' chupaam.¹⁷Eh je' wili i xuq'or keh xti chakoj taq rehtaal i neenub'an i hin.
Noq nee qoh ponik i wilik wii' i ki-itz'ihy naah paat i aj Madián, aha' wilik i neenub'an taq neenawilow, je' wo' chik re' i neena a'n taq i hat.¹⁸Eh noq nee nuhupej paam i ruk'aa' imas tentzun i hin, haa' taqe wuch'ihil. Re' taq i hat nee wo' taq i nahupej paam, chi junsuut taqe i ki-itz'ihy naah paat i aj Madián, kow taq neenaq'or chi je' wili: Parub'ihnaal i QaJaaw Dios, parub'ihnaal i Gedeón xchalik taq qa'an aweh, tiko'q taq, inki.

¹⁹Eh re' Gedeón haa' taqe i jinaj siento chi winaq xi ponik chi juntar i wilik wii' taqe i ki-itz'ihy naah paat i aj Madián. Eh noq kore' xkijal kiib' taqe i kicha'jinik keh i aj Madián manlik yejalaq'ab' re' Gedeón xuhupej paam i ruk'aa' imas tentzun ha' taqe i ruch'ihil, eh xkijor wach ak'al i ikom kiyohq'eem.²⁰Eh re' taqe i oxtzuhb' chi kiib' junhuupjiik paam i ruk'aa' i imas tentzun xkian, eh xkijor wach ak'al i ikom. Eh ruuk' i rusak'aaj kiq'ab' kichopom i ruk'aa' imas tentzun, eh parutz'eet kiq'ab' kiyohq'eem i kiq'aaq', eh kow xkiq'or chi je' wili:
Parub'ihnaal i Dios, parub'ihnaal i Gedeón xchalik taq qa'an aweh, inki taqe.

²¹Eh chu'nchel i ruk'uliil i Gedeón xi kahnik chi pa'alkeeb' chi junsuut taqe i ki-itz'ihy naah paat taqe i Madián. Eh re' taqe i ki soldado i aj Madián xak'erik chik kichii' ruum kiyo'jiik, noq xkimol chi elik.²²Noq re' ixib' siento chi aj Israel xkihuupeej paam i ruk'aa' imas tentzun. Re' i QaJaaw Dios xusach kik'ux i ki soldado i aj Madián re' chik i keh k'ul xkikansaj kiib' chikiwach. Eh xkimol chi elik ar Bet-sita chi korkiil reje i ye'aab' Zerera, xi ponik kopan k'ula't reh i ye'aab' Abel-mehola wilik Tabat.

²³Re' Gedeón xutaq'aaj kik'amariik i junch'uq chi riih rumaam i Neftalí, i junch'uq chi riih rumaam Aser, i junch'uq chi riih rumaam Manasés, reh chi xkajimaj taqe reje i aj Madián.

²⁴Eh re' Gedeón xutaq'aaj taqe reje i taqareel chinaah i yuuq' wilkeeb' wii' i junch'uq chi riih rumaam Efraín, xutaq'aaj ruq'orariik keh chi kiqajoq cho chi kik'ulb'ejiik taqe i aj Madián.
Eh chi xkichop naah i ye'aab' chi' ha', aha' naq naakiq'ahxiik reje, re' wilik ar Bet-bara, xkichop wo' naah i kihaa' re' i nim ha' Jordán, noq komajaa' kiponik ar i aj Madián.
Eh re' i junch'uq chi riih rumaam Efraín xkian wo' hoq i xq'orarik keh.²⁵Eh xkichop i ki'ib' chi k'amal kib'eeh i aj Madián Oreb, eh Zeeb i b'ih i jinaj. Re' Oreb ar xkikansaj chinaah ab'aj Oreb, eh re' i Zeeb ar xkikansaj chupaam i ye'aab' Zeeb re' inyitz'arik wii' i uuva. Eh noq kikohlaam chik rajimjiik taqe i aj Madián xkik'am reje i naah i Oreb, i naah i Zeeb reh i Gedeón wilik chi juntar i nim ha' Jordá. Re' Gedeón xuchop taqe i kiib' chi kireey i aj Madián

¹Re' i junch'uq chi riih rumaam i Efraín xikaqrik, eh xtohq'ik kiwech'um i Gedeón, je' wili i xkiq'or reh:
¿Chib'ih reet noq ma' xataq'aaj qak'amariik noq xat'ooj chi q'aq'inik kuuk' i aj Madián? inki taqe.

²Eh re' Gedeón, je' wili i xuq'or:
¿Chib'ih taq i nawech'uj? ¿Mi ma' nakoj taq rehtaal re' chi re' taq i xa a'n i hat nim wach, ma' xata je' rukab' i xqa'an i hoj? Re' taq i xa a'n i hat ma' xata je' rukab' i xqa'an i hoj.³Re' taq i hat xuq'asaj taq panaq'ab' i QaJaaw Dios i Oreb ruch'ihil i Zeeb, re' taqe i k'amal kib'eeh i aj Madián. Eh ¿chib'ih i xqa'an i hoj chi nee nupaj ruuk' taq i xa a'n i hat re' re'? inki.
Eh noq re' taqe i riih rumaam Efraín xkib'iraj taqe i xuq'or i Gedeón xik'ik i kik'aah.

⁴Eh re' i Gedeón haa' taqe ixib' siento chi winaq ruch'ihil xi ponik chi chii' i nim ha' Jordán, eh xi q'ahxik reje chi juntar. Atoob' ta xiik' wo' naq naah i kiq'uhtiik ruum i kajimjiik reje i aj ixowaal.

⁵Eh noq xi ponik Sucot je' wili i xuq'or keh i patim ar:
Chakuy chayeew tii taq kiwa' weh i winaq wuch'ihil ruum xiik' naah i kiq'uhtiik. Re' hoj k'ahchi' qajimam i Zeba, ruch'ihil Zalmuna, re' taqe i kireey i aj Madián.

⁶Xa re' la' re' taqe i k'amal kib'eeh i aj Sucot je' wili ruchaq'weesjiik xkian:
¿A chopom taj chik inchel i Zeba, ruch'ihil i Zalmuna, chi neenqaket taqe i winaq awuch'ihil? inki taqe.

⁷Eh re' i Gedeón je' wili i xuq'or:
Noq re' i QaJaaw Dios ruq'asam chik panuq'ab' i Zeba, ruch'ihil i Zalmuna naa wo' chik wik'iik ayu'. Eh naa taq kaat wik'sam chi ti' je' na naa nulakam taq wach ati'jolal ruuk' i kaq k'iix wilik chupaam i ye'aab' chiq yuuq'.

⁸Eh chi riij i re' xiooj Peniel. Re' Gedeón xupahqaaj chik otob'il keh i patim ar, je' rukab' otob'il xupahqaaj keh i aj Sucot. Eh re' taqe i aj Peniel elik wach i chaq'wik xkian kuuk' i aj Sucot.⁹Eh re' i Gedeón je' wili i xuq'or keh:
Noq qa'nam chik cho keh i ki-ixowanik qawach naa wo' chik qasutinik cha yu', naa qach'ahaam wach ak'al inajt naah tz'aq wili, inki.

¹⁰Eh re' i Zeba, ruch'ihil i Zalmuna ar wilkeeb' chupaam i ye'aab' Karkor, kuch'ihil i ho'lajuuj miil chi soldado, ach wo' re' re' xi kahnik chi k'achalkeeb', eh re' taqe i jinaj siento miil ruuk' juninaq miil kik'u'liil kichalik panreelb'aal q'iij xkikansaj panq'aq'inik.¹¹Re' i Gedeón ruch'ihil taqe i ru soldado xiooj chikiwach pank'ula't reh chiq yuuq' re' i wilik panyejaal ireelb'aalq'iij ruuk' i tinamit Noba, eh i Jogbeha. Eh noq ma' wilkeeb' ta chi cha'jinik i ki soldado taqe i aj Madián re' Gedeón xokik chi q'aq'inik chikinaah.¹²Eh re' i Zeba ruch'ihil i Zalmuna re' kiib' chi kireey i aj Madián xkimol chi elik, eh re' Gedeón xuchop taqe, eh re' i ki soldado i ki'ib' chi reey re' re' sahchik kik'ux ruum i kiyo'jiik.

¹³Eh re' i Gedeón rak'uun i Joás noq xi sutinik cho chi q'aq'inik ki-ik'ik cho chupaam i b'eeh inooj chupaam i ye'aab' Heres.¹⁴Eh jinaj i k'ijool xkichop ar Sucot kow xkipahqaaj reh chib'ih i kib'ihnaal i wilkeeb' chi taaq'anik ar Sucot. Eh re' i k'ijool xutz'ihb'aaj keh i kib'ihnaal ixib' chik ma' kajwinaq chi winaq i wilkeeb' chi taaq'anik, chi k'amaj b'eeh ar Sucot.

¹⁵Noq xi okik i koq Sucot je' wili i xuq'or Gedeón keh taqe i patim ar:
¿Mi nk'ulik taq panak'ux noq ma' xayeew ta taq kiwa' i nu soldado noq xiik' naah i kiq'uhtiik? Noq je' taq wili xaq'or weh: ¿A chopom ta'j chik inchel i Zeba ruch'ihil i Zalmuna noq neenqayeew kiwa' taqe awuch'ihil? tiki taq. Yu'naak wili taqe i kiib' chi reey xqachop chik chaloq, inki.

¹⁶Eh xub'an ti k'axik keh taqe i wilkeeb' chi taaq'anik Sucot, je' naa xuyeew taqe chi tz'uhuum ruuk' kaq k'ix ruuk' k'iix mooq'ool wilik chupaam i ye'aab' chiq yuuq'.¹⁷Eh re' Gedeón xkikut wo' wach ak'al inajt naah tz'aq ar Peniel, eh xkikansaj taqe i wilkeeb' chupaam i tinamit re' re'.

¹⁸Re' i Gedeón xupahqaaj reh i Zeba, ruch'ihil i Zalmuna chi je' wili:
¿Nik' wach kiwii' taqe winaq xakansaj ar Tabor? inki.
Re' keh je' wili i chaq'wik xkian:
Je' taqe awii' i hat, je' taqe kiwii' i rak'uun i reey, inki taqe.

¹⁹Eh re' i Gedeón kow xuq'or keh chi je' wili:
Re' taqe re' was taqe jinaj qatuut kuuk', eh re' taq i hat xakansaj taq. Parub'ihnaal i Dios i nuq'or taq aweh wi ta ma' xakansaj taqe i re' taq i hat, ma' nee ta wo' naq taq tinukansaj i hat yu'naak, inki.

²⁰Re' Gedeón je' wili i xuq'or reh i Jeter re' i peet rak'uun:
Chawesaj cha ch'ihch' cha kansaj taqe, inki.
Eh re' Jeter ma' xresaj ta wo' chee ruch'ihch' parupaat, xchalik ruyo'jiik kuum ruum ko k'isa k'ijool.

²¹Eh re' i Zeba, ruch'ihil i Zalmuna je' wili xkiq'or reh i Gedeón:
Neerub'an chi nee qoh akansaj i hat, re' hoj xqakoj rehtaal chi hat kowlaj winaq, inki taqe.
Eh re' Gedeón xukansaj wo' taqe i kiib' chi reey re' re', xuk'am i ruk'onalil kalaq q'e' holohaq leklik chi kalaq i kicameyo.

²²Eh re' taqe i aj Israel je' wili i xkiq'or reh i Gedeón:
Ruum chi re' hat xoj ako'leej pan kiq'ab' i aj Madián. Yu'naak re' chik i hat naa akahniik chi taaq'anik chi qanaah, je' wo' taqe awak'uun, inki taqe.

²³Re' Gedeón je' wili xuq'or:
Ni xata re' hin, ni xata re' wak'uun naa rukahniik chi taaq'anik taq cha naah, re' i QaJaaw Dios naa rukahniik chi taaq'anik taq cha naah, inki.

²⁴Xa re' la' i nupahqaaj taq aweh chi chayeew taq weh cha ju'junaal i ka'xikin xaq'uch taq keh i aj ixowaal.
Re' keh inkik'am naq cho kika'xikin re' ruuk' i oro ruum re' taqe ruuk' i wilkeeb' panchiq yuuq'.

²⁵Re' taqe i aj Israel xasuq chik kik'ux noq xkiq'or reh i Gedeón chi je' wili:
Neenqayeew aweh chu'nchel, inki taqe.
Eh xkihe' jinaj i nimlaj itz'ihy wach ak'al, ar xkiyeew taqe i ka'xikin.

²⁶Re' taqe i ka'xikin re' ruuk' i oro xye'arik reh ik'inaq ka'winaq libra rahlil, ma' xokik ta haa' taqe i karena taqe i holohaq ab'aj taqe i holohaq itz'ihy kaq muq'ik inka'yik inkikoj i kireey i aj Madián, eh ma' xokik ta wo' haa' i kikarena i kicameyo.²⁷Eh ruuk' taqe ka'xikin i oro re' Gedeón xuyejaa' jinaj i tiyoox ar xuyeew Ofra parutinamiit. Re' taqe i aj Israel xkikanaa' rulooq'jiik i kaJaaw i ki Dios ruum i re', re' chik i tiyoox re' re' xkiyeew ruloq'il. Eh ruum i xub'an re' re' i Gedeón xuq'eb' riib' i reh je' wo' taqe i awach reh parupaat.

²⁸Re' taqe i aj Madián xi kahnik chi ri'sil i kajaawriik i aj Israel. Re' taqe i aj Madián ma' xkian ta chik i q'aq'inik kuuk' i aj Israel, eh chuwach i ka'winaq haab' xi wihik pansuqkiil k'uxliis i aj Israel noq kok'achlik i Gedeón.

²⁹Chi riij i re', re' Gedeón, Jerobaal wo' inkiq'or reh rak'uun i Joás xooj chi k'achariik parupaat.³⁰Eh re' i Gedeón lajeeb' ru kajwinaq i rak'uun xi wihik, ruum k'ih iruxoqil xwihik.³¹Re' i rukab' rixooq xwihik ar Siquem xwihik wo' jinaj rak'uun ruuk' Abimelec i rub'ihnaal i rak'uun xukoj.

³²Re' Gedeón riji' winaq chik noq xkimik ar xkimuq'aa' ixkimuq'aa' wii' i rajaaw Joás rub'ihnaal. Re' ye'aab' re' re' ar wilik Ofra re' i kitinamiit taqe i riih rumaam i Abiazer.

³³Eh noq xkimik reje i Gedeón re' taqe i aj Israel xkitoq'aa' wo' chik rub'aan i yiib' wach na'ojb'al. Xi okik wo' chik chirulooq'jiik taqe i tiyoox Baal kib'ihnaal, Xkisik' wach chi ki dios i tiyoox Baal-berit rub'ihnaal.³⁴Re' taqe i aj Israel ma' xk'ulik ta chik pankik'ux i k'achlik Dios xko'linik cho keh pan kiq'ab' i aj ixowaal wilkeeb' chi kijunsuut.³⁵Re' taqe i aj Israel ma' xkit'iosej ta keh i rak'uun rixq'uun i Gedeón otob'il xb'aan cho keh ruum i Gedeón. Re' Abimelec, re' i Jotam

¹Re' i Abimelec rak'uun i Jerobaal xponik ar Siquem chi kiq'orob'jiik taqe i ma' tokoom ta ruuk', re' taqe i ras i rutuut, je' wo' kuuk' chu'nchel i wilkeeb' parupaat taqe i rutuut rajaaw, je' wili xuq'or keh:

²Re' hin i nupahqaaj taq otob'il aweh chi chapahqaaj taq keh chu'nchel i aj Siquem chi je' wili: ¿Mi ma' xta reet chi re' taqe i lajeeb' ru kajwinaq chi rak'uun i Jerobaal nee kikahnik chi taaq'anik chi qanaah? ¿oon ma' xta reet chi xa jinaj chi winaq i neemb'anik i taaq'anik chi qanaah? K'oloq taq panak'ux, re' hin ma' hin ta taq tokoom awuuk', inki.

³Eh re' taqe i ras winaq i rutuut i Abimelec xkiq'or chi kixikin chu'nchel i aj Siquem aha' wilik i xuq'or. Xuk'ul kik'ux chi re' i Abimelec xkahnik chi taaq'anik chikinaah re' reh ma' xta reet ruum ma' tokoom ta wo' quuk', inki taqe.

⁴Eh xkisaj chaloq parupaat i tiyoox Baal-berit, lajeeb' ru kajwinaq chi tumiin re' ruuk' i plata xkiq'asaj reh i Abimelec. Eh ruuk' i tumiin re' re', re' i Abimelec xukemelej taqe i winaq re' ruuk' taqe i aj kaansoom chi xiooj chi riij.⁵Ko ar xuk'am taqe reje Ofra re' ye'aab' xi k'acharik cho wii' i rajaaw Jerobaal, eh ar xa chuwach i jinaj chi ab'aj xkiq'oj noq xkikansaj taqe i lajeeb' ru kajwinaq chi ruchaaq' i Abimelec. Eh ach wo' re' i Jotam tz'apaab' wach rak'uun i Jerobaal xiko'leej riib' ruum xukeb'aa' riib'.⁶Eh re' taqe i patim ar Siquem xkian jinaj wach kik'ux kuuk' i aj Milo xiooj i wilik wii' juniwal chi chee' tz'inuj ruuk' i ab'aj wilik ar Siquem. Eh ar xkipab'aa' chi kireey i Abimelec.

⁷Noq xunab'eej chi je' re' i Jotam johtik chinaah i yuuq' Gerizim. Eh ar kow xuk'er cho chii' je' wili i xuq'or:
Kinab'iraj taq i hat chawunchelaal i wilkaat taq ar Siquem, chi je' re' nee wo' taq i tirib'iraj i Dios i hat.⁸Pan jinaj q'iij re' taqe chee' xkaaj kipab'aa' jinaj kireey je' wili i xkiq'or reh i ruche'el i olivo: Re' hat neerub'an chi nee ti kahnik chi qareey, inki taqe reh.⁹Re' ruche'el i olivo je' wili i xuq'or: Ma' chih taj ruum wi xin kahnik taq chi aareey ma' nee ta chik i nuyeew i aseite inkamanik chi loq'oomb'al reh i Dios, eh inkamanik keh i tinamit, inki.

¹⁰Re' taqe i chee' je' wili i xkiq'or reh i ruche'el higo: Re' hat neerub'an chi nee ti kahnik chi qareey, inki taqe reh.¹¹Eh re' higo je' wili i xuq'or: Ma' chi taj ruum wi xin kahnik taq chi aareey neenukanaa' ruye'ariik i nuwach q'e' ki', eh q'e' holohik, inki.

¹²Eh re' taqe i chee' je' wili i xkiq'or reh i juniwal chi uuva: Re' hat neerub'an chi nee ti kahnik chi qareey, inki taqe.¹³Eh re' juniwal chi uuva je' wili i xuq'or: Ma' chih taj, ruum ma' nwaaj ta chi neenukanaa' ruye'ariik i nuriis inkorjik chi suq laj haa' inkamanik chi loq'oomb'al reh i Dios, je' wo' keh i tinamit, inki.

¹⁴Eh pantz'apaab' wach re' chee' je' wili xkiq'or reh i k'iix: Re' hat neerub'an chi neetikahnik chi hat qareey, inki taqe reh.¹⁵Re' i k'iix je' wili i xuq'or: ¿Mi xti korik taq aweh chi naa taq kiin akojom chi aareey? kim taq okeen taq chi ri'sil i numuuj. Eh wila' ma' nawaaj taq, re' hin nee nelik reje i xaq q'aaq' wuuk', eh neenkuxik ruk'atam chu'nchel i chee' chakaltee' wilkeeb' Líbano, inki.

¹⁶Eh raj taq i hat ¿Mi chu'nchel taq ak'ux, mi korik taq aweh i xa a'n chi xapab'aa' taq chi reey i Abimelec? ¿Mi xa a'n taq otob'il reh i Jerobaal i hat? ¿mi xa a'n taq otob'il keh i rak'uun je' rukab' noq xub'an cho otob'il taq aweh i hat?¹⁷Ruum re' i wajaaw xuyeew riib' pankimik noq xooj chi q'aq'inik noq xat ponik taq ruko'leej pan kiq'ab' taqe i aj Madián.¹⁸Eh yu'naak taq i hat xa a'n taq i yiib' wach na'ojb'al xaq'oj taq chuwach i jinaj ab'aj noq xakansaj taq chu'nchel i was lajeeb' ru kajwinaq chi kiib'. Eh ma' xata re' taqe re' xa a'n xapab'aa' wo' taq chi reey i Abimelec xa ruum chi ma' tokoom ta taq awuuk'.¹⁹Re' hin i nuqor taq aweh yu'naak wila' korik, wila' chu'nchel taq ak'ux xa a'n taq otob'il reh Jerobaal ruch'ihil taqe i rak'uun holohik taq naa aweliik ruuk' i Abimelec, je' wo' reh holohik wo' nee nelik taq awuuk'.²⁰Eh wila' ma' chih, i ruk'ul chi nee nelik chaloq i xaq q'aaq' ruuk' i Abimelec k'atb'al keh chu'nchel i aj Siquem, taqe i aj Milo. Eh i ruk'ul chi Siquem chi Milo nee nelik chaloq i xaq q'aaq' k'atb'al reh Abimelec, inki i Jotam.

²¹Eh noq ruq'orom chik taqe re' i Joatam, xumol chi elik xooj patineel chupaam i tinamit Beer, ruum inyo'jik chuwach i Abimelec re' ras.

²²Re' taqe i aj Israel ixib' haab' xi wihik chi ri'sil i rajaawriik i Abimelec.²³Eh re' i QaJaaw Dios xuyeew q'ab' chi xub'an i yiib' wach na'ojb'al i Abimelec, eh chi xkian i yiib' wach na'ojb'al i aj Siquem, reh chi xtohq'ik kixowaam wach i Abimelec.²⁴Re' i Abimelec ruch'ihil taqe i aj Siquem xitowik reh chukanteesjiik taqe lajeeb' ru kajwinaq chi rak'uun i Jerobaal ti xkik'ul i tojb'al kimahk je' rukab' i ruk'ul chi keh chi riij ikaansanik xkian re' re'.²⁵Re' taqe i aj Siquem xkipab'aa' taqe i winaq chi xiooj q'atal b'eeh naah taq yuuq', eh jarub' i ki-ik'ik ar inkelq'aaj i chib'ih keh. Eh re' inki a'n re' re' xponik q'oraroq reh i Abimelec.

²⁶Re' Gaal rak'uun i Ebed, ruch'ihil taqe i ras i ruchaaq' xi chalik chi patinik Siquem. Eh re' taqe i aj Siquem xkiyeew i kik'ux ruuk' taqe i re'.²⁷Eh xiooj chupaam i ye'aab' wilik wii' i uuva xkiyitz' i riis, xkiyejaa' i vino xkitoq'aa' jinaj i runimaal ninq'iij, xkian kiwa', kihaa' parupaat taqe i kitz'aqoj tiyoox. Eh xkitoq'aa' i ma' holohik ta laj q'orik chi riij i Abimelec.

²⁸Eh re' i Gaal rak'uun i Ebed je' wili xuq'or:
¿Mi wilik rajaawriik re' i Abimelec, rak'uun i Jerobaal re' intowik reh re' i Zebul? Eh re' hoj, i hoj aj Siquem, ¿Mi ruk'ul chi nee qoh kahnik pankowlaj kamanik chi ri'sil i rajaawriik i Abimelec? Re' hoj i ruk'ul chi nee qoh kahnik pankowlaj kamanik chi ri'sil i kajaawriik taqe i riih rumaam Hamor re' i xyej-anik reh i qatinamiit wili.²⁹Wita re' hin i wilkiin chi taaq'anik taq cha naah xnusach naq chik wach i Abimelec. Eh nee naq i nuq'or reh chi chumol cho kiwach i ru soldado, eh chi nee kichalik chi q'aq'inik wuuk', inki i Jotam.

³⁰Eh noq re' i Zebul wilik chi taaq'anik chinaah i tinamit, eh xrib'iraj rib'iral aha' wilik i xuq'or i Gaal ma' k'isiin ta xchalik ruk'aah.³¹Eh chi ma' eht'alimaj je' wili i xutaq'aaj ruq'orariik reh i Abimelec: Re' Gaal rak'uun i Ebed ruch'ihil taqe i ras, i ruchaq' xi chalik ayu' Siquem k'ahchi' rutaqchi'im i tinamit chi naa kixowaam awach i hat.³²Je' re' noq re' hat kim chupaam aq'ab' ne'eel awuch'ihil taqe i soldado chakotej taq riij i tinamit.³³Eh noq neenchalik rusaq'iik nee ti okik chi q'aq'inik chinaah i tinamit Siquem. Noq neenchalik chak'ulb'eejiik i Gaal ruch'ihil taqe i ru soldado neena a'n ruuk' nik' wach i nee ruk'ul nee nawil, inki.

³⁴Eh re' Abimelec ruch'ihil taqe i ru soldado xi chalik wo' chaq'ab' xkikotej riij i tinamit Siquem ruuk' i kajch'uq chi soldado³⁵Noq xelik chaloq i Gaal rak'uun i Ebed panookb'al reh i tinamit re' i Abimelec ruch'ihil taqe i ru soldado xi elik chaloq aha' kikeb'aa' kiib'.

³⁶Noq xrilow chi je' re' i Gaal je' wili i xuq'or reh i Zebul:
Titz'ehtanoq johtoq chinaah taqe i yuuq' wilik i soldado qajik inki a'n cho ar, inki:
Eh re' Zebul, je' wili xuq'or:
Re' taqe re' ma' re' ta taqe soldado xa runaach taqe yuuq' k'ahchi' awilom kiwach, inki.

³⁷Re' Gaal je' wo' chik wili xuq'or reh i Zebul:
Xti korik i nuq'or aweh chi soldado taqe i qajik inki a'n chaloq wataq yuuq'. Eh wilik wo' taqe i chalik inki a'n chupaam i b'eeh wilik wii' i chee' tz'inuj kiwihik wii' taqe i aj q'iij, inki.

³⁸Eh re' Zebul je' wili xuq'or:
¿Mi ma' kow awiib' re' hat? ¿Mi ma' k'ahchi' naq ab'ajaam re' i Abimelec? Re' noq xaq'or chi je' wili: Ma' ruk'ul taj chi nee qohruyeew pankowlaj kamanik i Abimelec, tiki, yu'naak xi k'uloq chik i ru soldado hiy chi k'ulb'ejiik, inki.

³⁹Re' Gaal peet taqe chuwach i aj Siquem noq xooj chi k'ulb'ejiik i Abimelec.⁴⁰Eh re' i Abimelec xrajimaj reje Gaal kopanookb'al reh i tinamit, eh ma' k'isiin i xikimik ar.⁴¹Eh re' i Abimelec xkahnik pan tinamit Aruma. Re' i Zebul xresaj reje i Gaal pan tinamit Siquem ruch'ihil taqe i ras, i ruchaaq' reh chi ma' naa ta chik kiwihiik ar.

⁴²Eh chi junwaar chik re' Abimelec xrib'iraj rib'iral chi re' taqe i aj Siquem xiooj panab'iix.⁴³Je' re' noq re' i Abimelec oxtzuhb' xresaj i ru soldado xuq'or keh chi xooj kikeb'aa' kiib' panab'iix. Eh noq xkilow chi elik inki a'n reje pan tinamit aj Siquem xi elik chaloq aha' kikeb'aam kiib', chi kik'ulb'ejiik.⁴⁴Re' Abimelec ruch'ihil taqe i ru soldado junch'uq xi okik chi q'aq'inik pan tinamit. Eh re' taqe i ka'ch'uq chik chi ru soldado xkitoq'aa' rukanteesjiik i wilkeeb' panab'iix.⁴⁵Eh xik'ik q'iij i Abimelec chi q'aq'inik kuuk' i aj Siquem korehtaal xichop naah. Eh xkuxik rusachib'eem wach i tinamit, eh xukansaj chu'nchel i patineel chupaam. Eh korehtaal xkichihkaaj aatz'aam chupaam i tinamit re' re'.

⁴⁶Eh noq xkib'iraj chi je' re' k'ahchi' ruk'ulariik i wilkeeb' chupaam inajt naah paat jumehq'iil xooj kikeb'aa' kiib' chupaam i rupaat i kitz'aqoj tiyoox Berit rub'ihnaal.⁴⁷Eh re' i Abimelec xrib'iraj rib'iral chi re' taqe re' ar xkikeb'aa' kiib'.⁴⁸Re' reh jumehq'iil xooj chinaah i yuuq' Salomón i b'ih xuk'am reje rikeej xuyok' jinaj i q'ab' i chee' xuk'am cho nah tileb'.
Eh xuq'or keh i ru soldado chi kik'am cho chi jumehq'iil ju'jun i kiq'ab' chee' i nah kitileb'.

⁴⁹Eh re' keh xkiyok' wo' kiq'ab' chee' chi kiju'junaal xkitehlaaj reje xiooj chi riij i Abimelec. Xiooj ko ruuk' i rupaat i kitiyoox kikeb'aam wii' kiib' i aj Siquem ar xkitub'aa' i q'ab' chee' chi junsuut i rupaat i kitiyoox. Eh xkiqop ruq'aq'al. Ruuk' i re' xkikansaj i aj Siquem ik'inaq taqe jinaj miil chi winaq chi ixoq.

⁵⁰Chi riij i re', re' Abimelec xooj chi q'aq'inik chinaah i tinamit Tebes korehtaal xuchop naah.⁵¹Eh panyejaal i tinamit re' re' wilik i jinaj najt naah paat, ar xkikeb'aa' kiib' chu'nchel i patim taqe ar chi winaq chi ixoq, je' wo' taqe i k'amal b'eeh wilkeeb' ar. Re' keh xkitz'ap chi korik taqe i puerta, eh xijohtik paruka'ch'iht i paat.⁵²Eh re' Abimelec xooj k'oloq chuwach i puerta, eh noq naa naq ruqopom ruq'aq'al i paat,⁵³jinaj ixoq xukut cho taxaaj jinaj i rutooq ab'aj reh keeb'al, manlik xk'ulik qajoq wach naah i Abimelec, xpaxik i naah.⁵⁴Eh re' i Abimelec xuyuq'eej ink'amwik reh i ruch'ihch' i reh, je' wili i xuq'or reh:
Re' hat chawesaj chaaq'aslaj ch'ihch' kinakansaj ruum re' hin ma' waaj taj chi neen q'orarik chi ixoq xkansanik weh, inki.
Eh re' i to'ool reh xresaj wo' chaloq i ruq'as laj ch'ihch' xijuhtaaj i koq chupaam, ruuk' i re' xkimik.⁵⁵Eh noq xkilow i aj Israel chi xkimik i Abimelec xi sutinik pankipaat.

⁵⁶Je' re' i tojb'al ru mahk i Abimelec xye'arik ruum i Dios chi riij i mahk xub'an chuwach i rutuut rajaaw re' noq xukansaj taqe i lajeeb' ru kajwinaq chi ras, eh ruchaaq'.⁵⁷Eh re' Dios xuyeew wo' taqe chutojariik i kimahk i aj Siquem chi riij chu'nchel i mahk xkian xkik'ul wo' hoq aha' wilik i xpahqaljik chikinaah ruum i Jotam rak'uun i Jerobaal. Re' noq xwihik chi taaq'anik i Tola, je' wo' hoq i Jair

¹Noq kamnaq chik i Abimelec jinaj i winaq riih rumaam Isacar Tola rub'ihnaal rak'uun i Fúa riih i Dodo, xwuktik chi kiko'ljiik i aj Israel. Re' i Tola re' re' ar patim pan tinamit Semir, chinaah i yuuq' wilkeeb' wii' i riih rumaam Efraín.²Eh ixib' ru ka'winaq haab' xub'an i taaq'anik chinaah i tinamit Israel korehtaal xkimik reje, eh ar kimuq'aa' Samir.

³Eh noq kamnaq chik reje i Tola, re' chik i Jair aj Galaad xokik chi taaq'anik chikinaah i aj Israel, eh kiib' ru ka'winaq haab' xub'an i taaq'anik.⁴Re' winaq re' re' lajeeb' ru ka'winaq i rak'uun xwihik, eh eliik chi riij i b'uurux kib'ehik, eh chi kiju'junaal xi wihik chi taaq'anik chupaam i ju'jun seht chi tinamit, wilik paruyuq'ul i Galaad. Eh re' taqe i tinamit re' re', Jair i b'ih xkikoj, eh je' re' i bíh xkahnik chi jumpech.⁵Eh noq xkimik reje i Jair, ar xkimuq'aa' Camón. Re' taqe i aj Amón xkik'saj chi ti' k'axik i aj Israel

⁶Re' taqe i aj Israel xkitoq'aa' wo' chik rub'aan i yiib' wach na'ojb'al chuwach i QaJaaw Dios, xkiloq'ej taqe i kijalwaach i Baal, je' wo' rujalwaach i tiyoox Astarot. Eh xkiloq'ej wo' taqe i kitiyoox i aj Siria, i aj Sidón, i aj Moab, i aj Amón, i aj filisteo. Re' aj Israel xkiq'eb' chi riij kik'ux i Dios ma' xkiyeew ta chik ruloq'il.⁷Ruum aj re', re' QaJaaw Dios ma' k'isiin ta noq xchalik rujosq'iil chikinaah, xuq'asaj taqe pan kiq'ab' i aj filisteo, je' wo' pan kiq'ab' i aj Amón.⁸Eh re' taqe i aj filisteo, i aj Amón, waxaqlaj haab' xkian ti' k'axik keh chu'nchel i aj Israel patim ar Galaad chi juntar i nim ha' Jordán wilik chupaam i kiye'aab' i aj amorreo.⁹Eh re' taqe i aj Amón xi q'ahxik chi juntar i nim ha' Jordán noq xiooj chi q'aq'inik kuuk' i junch'uq chi riih rumaam i Judá, je' wo' kuuk' i junch'uq chi riih rumaam i Benjamín, i Efraín. Xiik' naah ti'kiil xkik'ul i aj Israel.

¹⁰Eh xkilow chi je' re' xkipahqaaj kitoob'jiik reh i QaJaaw Dios, je' wili i xkiq'or:
QaJaaw Dios xti korik chi ma' k'isiin ta xooj mahkunik chawach xqakanaa' alooq'jiik i hat, re' chik taqe i tiyoox xqaloq'ej, inki taqe.

¹¹Re' QaJaaw Dios je' wili xuq'or keh:
Re' taq i hat xat kik'saj taq cho panti' k'axik i aj Egipto i aj amorreo, i aj Amón, i aj filisteo.¹²Eh xat kik'saj wo' taq panti' k'axik taqe i aj Sidón, taqe i aj Amalec, taqe i aj Madián, eh noq xapahqaaj taq atoob'jiik weh xat nuko'leej wo' taq pan kiq'ab'.¹³Atoob' ta xat nuko'leej taq pan kiq'ab', re' taq i hat xinaq'eb' taq chi riij ak'ux. Re' chik taq i tiyoox xat'ooj chi looq'jiik, je' re' noq ma' naa ta chik taq kaat nuko'leem.¹⁴Yu'naak neerub'an chi nee taq inapahqaaj atoob'jiik keh taqe i tiyoox xasik' taq wach. Nik' ti' taq wilkaat re' chik i keh neekiko'linik taq aweh, ki uchjik.

¹⁵Eh re' taqe i aj Israel je' wili i xkiq'or:
QaJaaw Dios xti korik wo' hoq chi xoj mahkunik chawach, nee wo' rub'an chi nee na a'n quuk' aha' wilik inawaaj a'nam i hat. Xa re' la' cha kuy qoh ako'leej tii yu'naak, inki taqe.

¹⁶Re' taqe i aj Israel xkesaj taqe reje i tiyoox inkiloq'ej i tokoom tinamit xkitoq'aa' wo' chikrulooq'jiik i k'achlik Dios. Eh re' i QaJaaw Dios xuketelaaj wo' kiwach i aj Israel chi k'ahchi' kik'iik panti' k'axik.

¹⁷Eh chi riij i re', re' taqe i aj Amón ar xkimol kiib' xooj kiyejaa' i ki-itz'ihy naah paat Galaad. Eh re' taqe i aj Israel keh xkimol kiib' xooj kiyeew i ki-itz'ihy naah paat Mizpa.¹⁸Re' taqe i aj Israel wilkeeb' Galaad, kuch'ihil taqe i k'amal kib'eeh je' wili xkiq'or chikiwach:
¿Awach naa ruk'amwiik' qab'eeh noq naaqojiik chi q'aq'inik chikinaah i aj Amón? Re' naa ruk'amwiik ab'eeh chi q'aq'inik, re' k'amal kib'eeh chu'nchel i wilkeeb' Galaad, inki taqe. Re' Jefté jinaj winaq kow riib' chi q'aq'inik

¹Re' Jefté aj Galaad jinaj winaq kow riib' chi q'aq'inik, rak'uun jinaj i k'oyoom laj ixoq, eh re' rajaaw Galaad rub'ihnaal.²Eh re' Galaad k'ih wo' taqe i rak'uun xwihik ruuk' i xti rehk'een.
Eh noq xik'ihik i rak'uun re' re', xkesaj reje pampaat i Jefté xkiq'or reh chi ma' naa ta kunem taqe i chib'ih reh i kajaaw ruum tokoom i rutuut.

³Xrilow chi je' re' i Jefté xelik reje kuuk' i ras i ruchaaq'. Ar xooj chupaam i ruyuq'ul i Tob, ar xumol kiwach i juntuhb' chi aj kaansoom, i kiooj chi riij chi rub'anariik i yiib' wach na'ojb'al.

⁴Eh koq'uun chik re' taqe i aj Amón xiooj chi q'aq'inik kuuk' i aj Israel.⁵Eh noq q'aq'inik chik inki a'n i aj Amón kuuk' i aj Israel, re' taqe i k'amal kib'eeh aj Galaad xkitaq'aaj ruk'amariik i Jefté chupaam i ruyuq'ul i Tob.⁶Eh je' wili i xkiq'or ponoq reh:
Tichaloq quuk' inqaaj chi re' hat nee ti k'amwik qab'eeh chi q'aq'inik kuuk' i aj Amón, inki taqe.

⁷Re' Jefté je' wili i xuq'or keh i k'amal kib'eeh i aj Galaad:
¿Mi ma' ink'ulik taq panak'ux re' noq xawixowaaj ta cho nuwach? ¿Eh xinawesaj taq cho parupaat i wajaaw? ¿Chib'ih chik reet noq kink'ulik taq asik' yu'naak noq ti' taq chik wilkaat? inki.

⁸Eh re' taqe i k'amal kib'eeh i aj Galaad je' wili i xkiq'or reh i Jefté:
Ruum la' chi ti' wilkooj xat chalik qasik' reh chi nee nak'am qab'eeh chi q'aq'inik kuuk' taqe i aj Amón. Eh re' chik i hat nee tii k'amwik qab'eeh chi qunchelaal i hoj i wilkooj Galaad, inki taqe.

⁹Re' Jefté je' wili i kichaq'weesjiik xub'an:
Wila' re' taq i hat inawaaj chi naa nusutiniik reje chi q'aq'inik kuuk' i aj Amón, eh wila' re' Dios xirutoob'eej chi neenub'an keh, re' taq chik i hin nanukahniik chi k'amal ab'eeh, inki.

¹⁰Re' taqe k'amal kib'eeh i aj Galaad je' wili i xkiq'or reh i Jepfte:
Re' i QaJaaw Dios ineht'alinik reh chi neen qa'an awuuk' i xaq'or, inki taqe reh.

¹¹Eh re' Jefté xooj wo' chikiij i k'amal kib'eeh i aj Galaad, eh re' wo' taqe i tinamit xpaab'anik reh chi xkahnik chi taaq'anik chikinaah, eh chi k'amal kib'eeh soldado. Re' Jefté xuq'or wo' chik taqe i q'orik wili chuwach i QaJaaw Dios ar Mizpa.¹²Eh re' Jefté xutaq'aaj taqe reje i taqareel ruuk' i kireey i aj Amón chi q'orariik reh chi je' wili:
¿Chib'ih reet noq inawixowaaj qawach? ¿Chib'ih reet noq inawaaj chalik chi q'aq'inik chinaah i qatinamiit? inki.

¹³Re' i kireey i aj Amón je' wili i xuq'or keh i raj taqareel i Jefté:
Noq xat elik taq cho Egipto taq i hat aj Israel xawelq'aaj taq i qa ye'aab', ar xtohq'ik reje chi chii' i nim ha' Arnón, xponik ko chi chii' i nim ha' Jaboc, eh chi chii' i nim ha' Jordán. Eh yu'naak inqaaj chi nee natoj taq qeh parukorkiil, inki.

¹⁴Eh re' Jefté wilik wo' chik taqe i taqareel xutaq'aaj reje ruuk' i kireey i aj Amón.¹⁵Reh chi xponik kiq'or chi je' wili:
Re' Jefté je' wili i xuq'or chaloq, re' hoj, hoj aj Israel, ma' awach taj i qelq'aam ruye'aab', ni xata re' taqe aj Moab, ni xata re' taq i hat aj Amón.¹⁶Noq xi elik cho Egipto taqe i aj Israel chupaam i ye'aab' chiq yuuq' xkik'am chaloq xi-ik'ik chupaam i kaq palaw, eh xi ponik ar Cades.¹⁷Eh wilik taqe i taqareel xkitaq'aaj reje ruuk' i kireey i aj Edom chupahqaljiik reh chi chuyeew q'ab' chi naa kik'ik chupaam i ruye'aab'. Xa re' la' re' reh ma' xuyeew ta wo' q'ab' chi xi-ik'ik ar. Eh xkipahqaaj wo' reh i kireey i aj Moab chi naa kik'iik chupaam i ruye'aab', xa re' la' re' reh xama' xuyeew ta wo' q'ab', eh ruum i re' xi kahnik ar Cades.¹⁸Chi riij i re' xkiq'at cho wach i ye'aab' chiq yuuq', eh kikotej riij i kiye'aab' i aj Edom xi k'uloq chi korkiil reje ireelb'aalq'iij reh i kiye'aab' i aj Moab. Eh ar kiyejaa' i ki-itz'ihy naah paat chi chii' i nim ha' Arnón, xa re' la' ma' xi ik'ik ta chi juntar i nim ha' re' re' ruum pank'ula't ruuk' i kiye'aab' i aj Moab wilik. Eh ma' nik' ta xi okik chupaam i ye'aab' re' re'.¹⁹Eh re' taqe i aj Israel wilik wo' taqe i aj taqareel xkitaq'aaj reje Hesbón reh i xkipahqaaj otob'il reh i Sehón kireey i aj amorreo chi chuyeew q'ab' chi naa kik'iik chupaam i ruye'aab', re' noq xchalik inki a'n pan kiye'aab' i aj Israel.²⁰Xa re' la' re' i Sehón ma' xuch'ikaa' ta ruk'ux kuuk' i aj Israel, je' re' noq ma' xuyeew ta q'ab' chi xi-ik'ik chupaam i ruye'aab'. Xumol la' wach chu'nchel i ru soldado xooj kiyejaa' i ki-itz'ihy naah paat chupaam i ye'aab' Johaza, eh xkitoq'aa' q'aq'inik kuuk' i aj Israel.²¹Xa re' la' re' i QaJaaw i qaDios i hoj, hoj aj Israel xutoob'eej taqe i quch aj Israel chi xkian reh i Sehón, je' wo' taqe i ru soldado. Eh korehtaal xkichop naah i kiye'aab' i aj amorreo wilkeeb' chupaam i ye'aab' re' re'.²²Eh xkichop wo' naah chu'nchel i kiye'aab' i aj amorreo. Ar xtohq'ik reje chi chii' i nim ha' Arnón, xponik ar Jaboc, ar xutoq'aa' cho chupaam i ye'aab' chiq yuuq' xponik ko chi chii' i nim ha' Jordán.²³Eh re' QaJaaw Dios xq'asanik reh panqaq'ab' i kiye'aab' i aj amorreo, ¿Mi re' chik i hat i naa aq'uch wiik qeh re'?²⁴Eh aha' wilik i rusiij aweh aadios i hat Quemos i rub'ihnaal ¿Mi ma' hat wo' ti ehchanik reh re'? Re' hoj aha' wilik i rusiij qeh i qaDios i ruk'ul wo' chi re' hoj naaqehchaniik reh.²⁵¿Mi xiik' chik naah re' awajaawriik i hat chuwach i Balac rak'uun i Zipor, re' Balac i kireey i aj Moab? ¿Mi xukowej riib' re' i Balac chi xchalik chi q'aq'inik quuk' i hoj, i hoj aj Israel?²⁶Re' taqe i quch aj Israel ixib' siento haab' chik kokiik chi patinik ayu' Hesbón, Aroer je' wo' chupaam i kok' ye'aab' wilkeeb' wii' patineel, je' wo' chupaam chu'nchel i tinamit wilkeeb' chi chii' i nim ha' Arnón, eh ¿Chib'ih reet noq kore' chik inawaaj aq'uchum i ye'aab'? ¿Chihreet noq ma' najtir i na a'n chaloq?²⁷Re' hin ma' xta numahk chawach, re' hat k'ahchi' ab'aniik qeh i yiib' wach na'ojb'al ruum re' hat inawaaj chalik chi q'aq'inik quuk'. Xa re' la' re' hin weht'al chi re' i Dios manlik q'atal q'orik re' reh naa ruq'oriik awach i wilik ru mahk mi re' hoj aj Israel, oon re' taq i hat aj Amón, inki reje i Jefté.

²⁸Atoob' ta je' re' i xq'orarik reh, i kireey i aj Amón xama' xunimaj ta wo' hoq i xutaq'aaj ruq'orariik i Jefté.

²⁹Re' Jefté xokik ruuk' i Santolaj Uxlab'al reh chi xk'amarik rub'eeh, ruch'ihil taqe i aj Israel noq xikik' reje chupaam i ye'aab' Galaad, xik'ik wo' reje, chupaam i ye'aab' Manasés, xikik' wo' reje Mizpa, re' wilik paruyuq'ul i Galaad, korehtaal xichop naah i kiye'aab' i aj Amón.³⁰Eh re' Jefté je' wili i xuq'or reh i QaJaaw Dios:
Wila' xaq'asaj panuq'ab' taqe i aj Amón.³¹Re' hin nee nuq'asaj aweh chi k'atoj mayiij awach i peet nee nelik chaloq chi nuk'ulariik noq neekinsutinik cho panupaat reh i q'aq'inik, inki.

³²Chi riij i re', re' Jefté ruch'ihil taqe i aj Israel xiooj chi q'aq'inik, eh re' i QaJaaw Dios xq'asanik pan kiq'ab' i aj Amón.³³Eh xiik' naah k'ihaal i aj ixowaal xkikansaj, xkichop naah i juninaq seht chi tinamit wilkeeb' chupaam i ye'aab' Aroer, Minit, eh re' Abel-keramim. Je' re' noq re' taqe i aj Israel xkian reh i aj Amón.

³⁴Eh noq xsutinik reje i Jefté Mizpa parupaat reh i q'aq'inik re' i rixq'uun xelik chaloq chi ruk'ulariik, soon i rub'an k'ahchi' ruq'ojem i rukotokik laj q'ooj. Xanaah re', xa re' wo' re' rixq'uun ma' jino'q chik rak'uun rixq'uun chi riij.³⁵Eh noq xrilow i Jefté chi re' i rixq'uun xelik chaloq xuweq i ruso' je' wili xuq'or reh:
Hat wixq'uun ma' k'isiin ta ntib'ik nuk'ux chawiij ruum re' hat xat elik cho chi peet, xanaah re', re' hin xnuq'or reh i QaJaaw Dios chi naa nuk'atam chi numayiij chuwach awach i nareliik cho chi peet chi nuk'ulariik, eh ma' nee ta chik i rub'an chi nee nuyoj wach inki.

³⁶Eh re' rixq'uun je' wili i chaq'wik xub'an:
Wajaaw re' hat cha a'n wuuk' nik' wach i xaq'or reh i QaJaaw Dios, ruum re' reh xatrutob'eej chik ruuk' i rub'anariik keh i aj Amón xat resaj chik korik.

³⁷Xa re' la' i nupahqaaj otob'il aweh chi chayeew q'ab' weh chi konee chik kink'acharik kiib'-oq poh reh chi nee kinooj chi b'ehik, chi oq'ik i nub'an pantaq ch'ahn kuuk' taqe i wuch q'ahxoq q'e' inqaaj qawach kuuk' ruum nanukimiik chi ma' xnub'an ta kaxáro, inki.

³⁸Eh re' Jefté xuyeew wo' q'ab' reh i rixq'uun chi kox k'acharik chik kiib' poh.
Eh xooj wo' pantaq ch'ahn chikiij taqe i xq'un q'e' inkaaj kiwach ruuk' xasuq chik inoq'ik ruum naa rukimiik chi ma' rub'anam ta kaxáro.³⁹Chi riij i re' xsutinik wo' chik chaloq ruuk' i rajaaw. Eh re' Jefté xuyeew wo' chi rumayiij i rixq'uun xub'an wo' hoq i xuq'or reh i QaJaaw xkimik reje i rixq'uun chi ma' xwirik ta ruuk' jino'q winaq.⁴⁰Ruum aj re' xiokrik i kok' q'ahxoq aj Israel chi kijib' q'iij chuwach i ju'jun chi haab' imponik koq'ej pantaq ch'ahn i rukimiik i rixq'uun i Jefté aj Galaad. Re' q'aq'inik xub'an i Jefté ruuk' i riih rumaam i Efraín

¹Re' taqe i riih rumaam i Efraín xkimol kiib' xkiq'at reje wach i nim ha' Jordán xiooj chupaam i tinamit Zafá, xiooj k'oloq ruuk' i Jefté je' wili xkiq'or reh:
¿Chib'ih reet noq xat'ooj chi q'aq'inik cha wutkeel kuuk' i aj Amón? eh ma' xaq'or ta qeh, ruum i re' yu'naak naa qak'atam aapaat, hat junk'ahtiik ruuk' naaqanam, inki taqe.

²Eh re' Jefté je' wili kichaq'weesjiik xb'aan:
Re' noq xnub'an i kowlaj q'aq'inik wuch'ihil taqe i nutinamiit kuuk' i aj Amón re' hin xnutaq'aaj taq ak'amariik, eh re' taq i hat xama' xat chalik ta wo' taq chi qako'ljiik.³Eh xwilow i hin chi ma' xat chalik ta taq chi qako'ljiik re' hin xnuyeew wiib' pankimik wuch'ihil taqe i nutinamiit xinooj chi q'aq'inik kuuk' taqe i aj Amón. Eh re' i QaJaaw Dios xtoob'inik qeh chi xqa'an cho keh. ¿Chib'ih chik reet noq ti chalik taq chi q'aq'inik wuuk' i hin yu'naak?

⁴Eh re' Jefté xumol kiwach chu'nchel i winaq wilkeeb' Galaad, xi okik chi q'aq'inik kuuk' i riih rumaam i Efraín, eh xkian reh. Je' re' i xb'aan keh ruum re' taqe i riih rumaam i Efraín inkiq'or chi re' taqe i aj Galaad wilkeeb' chi kixilak i riih rumaam i Efraín, chi kixilak taqe i riih rumaam i Manasés, chi kixilak i riih rumaam i Efraín elenaq taqe chaloq.

⁵Re' taqe i aj Galaad inkiq'at i ye'aab' aha' ma' chaam ta wii' i ha' re' imb'aan wii' ik'ik chupaam i nim ha' Jordán.
Eh noq imponik ar jino'q i riih rumaam i Efraín elik i rub'an ma' nik' teesjiik ta kuum i aj Galaad, eh inkipahqaaj reh mi re' ruuk' taqe i riih rumaam Efraín.
Eh wila' xuq'or chi ma' re' ta ruuk',⁶inkipahqaaj reh chi chuq'or i q'orik Shibolet, eh wila' Sibolet i xkiq'or, ar inkireq chi riij i aj Galaad chi re' ruuk' i riih rumaam Efraín ruum re' keh ma' kichol taj i q'orik re' re'.
Eh inki chop ar inkikansaj chupaam i ye'aab' imb'aanwii' ik'ik chupaam nim ha' Jordán. Je' re' noq xkikansaj i kiib' roxk'ahl miil chi re' ruuk' i riih rumaam i Efraín.

⁷Eh re' Jefté waqiib' haab' xwihik chi taaq'anik chikinaah i aj Israel. Chi riij i re' xkimik reje ar xkiwuq'aa' Galaad, re' wo' x-aasjik wii'. Re' taqe ixib' xib'anik i taaq'anik chikinaah i aj Israel

⁸Chi riij i Jefté re' chik i Ibzán aj Belén xokik chi taaq'anik chikinaah i aj Israel.⁹Re' winaq re' re' lajeeb' ru ka'winaq i rak'uun xwihik, eh lajeeb' ru ka'winaq wo' hoq i rixq'uun xwihik. Eh chu'nchel xuyeew taqe pan kaxáro kuuk' i tokoom kitinamitaal. Re' i Ibzán re' re' wuquub' haab' xwihik chi taaq'anik chikinaah i aj Israel,¹⁰eh noq xkimik ar xkimuq'aa' Belén.

¹¹Chi riij i re', re' chik i Elón re' ruuk' taqe i riih rumaam Zabulón, lajeeb' haab' xwihik chi taaq'anik chikinaah.¹²Eh noq xkimik reje ar xkimuq'aa' chupaam i tinamit Ajalón wilik chupaam i ruyuq'ul i Zabulón.

¹³Chi riij i reh re' chik i Abdón rak'uun i Hilel Piratón i b'ih rutinamiit xokik chi taaq'anik chikinaah i aj Israel chuwach i waxiqiib' haab'.¹⁴Eh re' Abdón ka'winaq i rak'uun, lajeeb' ru ka'winaq i riih xwihik. Re' taqe re' chi riij i b'uurux kib'ehik. Eh waxiqiib' haab' xi wihik chi taaq'anik chikinaah i aj Israel.¹⁵Eh noq xkimik reje i Abdón rak'uun i Hilel ar xkimuq'aa' chupaam i tinamit Piratón wilik paruyuq'ul kiye'aab' i riih rumaam i Efraín, chinaah i ruyuq'ul i Amalec. Re' raasjiik i Sansón

¹Re' taqe i aj Israel xkitoq'aa' wo' chik rub'aan i yiib' wach na'ojb'al chuwach i QaJaaw Dios, je' re' noq re' i QaJaaw xuq'asaj taqe pan kiq'ab' i aj filisteo chuwach i ka'winaq haab'.

²Eh ar Zora xwihik jinaj i winaq Manoa i rub'ihnaal re' ruuk' taqe i riih rumaam i Dan. Eh re' rehk'een ma' wihinaq ta ruha'lak'uun chi jumpech ruum xa reh chi ma' ak'unoom ixoq taj.³Xa re' la' jinaj i ruánjel i QaJaaw xuk'uhtaaj riib' chuwach, je' wili i xq'orarik reh: Re' hat ma' jank'al ta nwihik jino'q aha'lak'uun xa re' la' yu'naak naa akahniik wach k'acharik, eh naa raasjiik jinaj k'isa awak'uun.⁴Re' hat ma' naa ta awuk'em aweh i vino, je' wo' hoq i xa chib'ih chik jariik chi k'ahlaj ha'. Ma' naa ta wo' ak'uxum aweh taqe i ch'uwa' wach.⁵Re' awak'uun naa rasjiik ma' naa ta ruyok'ariik i rismaal i naah ruum naa ruq'ahteesjiik ree Dios, eh aj Nazareo cho chi raasb'al. Eh re' reh naa rutoq'aam ruko'leem taqe i aj Israel pan kiq'ab' i aj filisteo, i nuchjik.

⁶Eh xrib'iraj chi je' re' ixoq xooj ruq'or reh i rub'ahiil je' wili xuq'or:
Re' hin jinaj i winaq rumoso i Dios xuk'uhtaaj riib' chi nuwach aha' naq wilkiin wii' xsahchik nuk'ux xub'an je' ruwii' ruánjel i Dios. Eh re' hin ma' xnupahqaaj ta reh awach i reh, eh aha' inchalik, eh ni xata re' reh xuq'or weh i rub'ihnaal.⁷Xa re' i xti xuq'or weh chi naa rasjiik jinaj k'isa wak'uun. Eh xuq'or wo' weh chi ma' naa ta wuk'em weh i vino, je' wo' hoq i xa chib'ih chik jariik chi k'ah laj ha', eh chi ma' naa ta nuk'uxum jino'q i ch'uwa' wach. Eh xuq'or weh chi re' wak'uun naa rasjiik xa paraasb'al chi aj Nazareo korehtaal inkimik reje, eh chi naa ruq'ahteesjiik reh Dios, inki ixoq.

⁸Eh xrib'iraj chi je' re' i Manoa je' wili i xuq'or ree Dios parutiij: QaJaaw Dios i nupahqaaj aweh chi cha taq'aaj wo' chik cho qeh ruka'peech i winaq re' re', reh chi neeruq'or qeh chib'ih i naaqanam ruuk' i k'isa k'un naa rasjiik, inki.

⁹Re' i QaJaaw Dios xrib'iraj wo' i rutiij i Manoa, re' ruánjel xuk'uhtaaj wo' chik riib' chuwach i rehk'een noq wilik poo panab'iix. Eh re' i Manoa ma' xta naq ar.¹⁰Eh re' rehk'een rajimam riib' xooj ruq'oreej i rub'ahiil, je' wili i xuq'or reh:
Chab'iraj i naa nuq'orom aweh taq, chawil i winaq xq'orinik weh junriim xwilow wo' chik wach yu'naak, inki.

¹¹Eh re' i Manoa xooj lom rajimam riib' chi riij i rehk'een aha' wilik wii' i winaq, eh xupahqaaj reh chi je' wili:
Re' nee hat xa a'n ak'utaaj ruuk' i wehk'een junriim, inki.
Re' winaq je' wili chaq'wik xub'an:
Re' hin, inki.

¹²Eh re' i Manoa je' wili i xuq'or reh i winaq:
Noq naa ruponiik i ruq'ijil i raasjiik i k'isa k'un aq'orom, ¿Nik' wach ruk'ihteesjiik naaqanam? ¿Chib'ih jariik i naa qa'nam ruuk'? inki.

¹³Re' i ruánjel i QaJaaw je' wili i chaq'wik xub'an:
Re' ajwaal wach re' chi naa rub'anam awehk'een chu'nchel i nuq'orom reh.¹⁴Re' chi ma' naa ta ruk'em reh i vino je' wo' i xa chib'ih chik jariik chi k'ahlaj ha' re' ruuk' i riis uuva. Eh re' chi ma' naa ta ruk'uxum reh jino'q i xa chib'ih jariik i ch'uwa' wach. Re' chi naa rub'anam chu'nchel i xnuq'or reh, inki.

¹⁵Eh re' i Manoa je' wili i xuq'or reh i winaq:
Tikaan pee k'isinoq quuk' chawuy-eej peet chi neenqachaq'saj i rutib'kal i kaprax, eh neenqayeew chi k'uxb'al awa', inki.

¹⁶Re' i ruánjel i QaJaaw Dios je' wili i chaq'wik xub'an:
Atoob' ta nee kikahnik taq awuuk' xama' nee ta wo' naq i nuk'ux weh taq awa'. Wila' wilik taq amayiij inawaaj aye'em chayeew taq chuwach i QaJaaw Dios, inki.
Re' i Manoa ma' reht'al ta naq chi re' i winaq re' re' ruánjel i QaJaaw Dios.

¹⁷Re' i Manoa je' wili i xuq'or reh i ruánjel i QaJaaw Dios:
Re' hoj inqaaj chi nee naq'or qeh chib'ih ab'ihnaal reh chi nee tiqaloq'ej noq nenooj eloq wach i xaq'or qeh, inki.

¹⁸Eh re' i ánjel je' wili chaq'wik xub'an:
¿Chib'ih reet noq inawaaj anab'eem i nub'ihnaal? Re' rub'ihnaal i hin q'e' looq' ma' eht'alimaj taj, inki.

¹⁹Eh re' i Manoa xuchop jinaj i kaprax xuk'am chaloq i wach i rutik chi naq'wach, eh chinaah i nimlaj ab'aj xuk'at taqe chi rumayiij i chuwach i QaJaaw Dios. Ruuk' i re', re' QaJaaw Dios xub'an i sahchb'al k'uxliis chuwach i Manoa, je' wo' chuwach i rehk'een.²⁰Eh noq k'ahchi' ruk'ahtiik i mayiij chinaah i artaal, re' Manoa ruch'ihil i rehk'een xkilow chi pan xaq i q'aaq' xjotik pan taxaaj i ruánjel i QaJaaw Dios. Eh noq xkilow chi je' re' xkik'utzaa' qohoq kiib' korehtaal xkireq' wach ak'al ruuk' i yejal kiwach.²¹Koraj ar xukoj rehtaal re' i Manoa chi re' winaq xq'orinik keh ruánjel i Dios. Eh ma' xuk'uhtaaj ta chik riib' chuwach i reh, je' wo' chuwach i rehk'een.²²Re' Manoa je' wili xuq'or reh i rehk'een:
Xti ma' naa ta rik'iik wach chi naa qakimiik ruum xqilow wach i Dios, inki.

²³Eh re' i rehk'een je' wili i chaq'wik xub'an:
Wita xoj raaj rukansam i QaJaaw Dios ma' xuk'ul ta naq cho qeh i qak'atoj mayiij je' wo' i qamayiij chi naq'wach. Eh ma' xuk'uhtaaj ta wo' naq qeh taqe re', ma' xuq'or ta wo' naq taqe kahnoq rib'iral qeh chu'nchel i re', inki.

²⁴Eh noq xponik i ruq'ijil re' i rehk'een i Manoa x-aasjik wo' hoq jinaj i k'isa rak'uun Sansón i rub'ihnaal xukoj. Eh re' k'isa k'un noq k'ihik i rub'an inkuxeesjik cho ruum i QaJaaw Dios.²⁵Eh re' i ruxlab'al i QaJaaw Dios xtohq'ik ruye'wiik rukowiil ruk'ux i Sansón noq wilik chupaam i ye'aab' wilik wii' i ki-itz'ihy naah paat taqe i riih rumaam i Dan, re' i wilik pankiyejaal i kiib' chi tinamit re' Zora, eh re' i Estaol. Re' noq xub'an kaxáro i Sansón

¹Re' Sansón pan xqajik qohoq pan tinamit Timnat, ar xrilow wach jinaj i k'isa q'ahxoq re' ruuk' taqe i aj filisteo.²Eh noq xsutinik reje parupaat xtohq'ik ruk'utjaam keh i rutuut rajaaw, je' wili i xuq'or:
Chakuy i nupahqaaj taq otob'il aweh chi chayejaa' taq chu'nchel reh chi nee nub'an kaxáro ruuk' jinaj ixoq xwilow cho wach pan tinamit Timnat.

³Re' irutuutrajaaw je' wili i xkiq'or:
¿Chib'ih reet noq naa rojiik asik'im awehk'een chi kixilak i aj filisteo ma' kinimanik ta reeh i Dios? ¿Mi ma' chih chik jino'q ixoq chi kixilak re' taqe i ma' tokoom ta quuk' oon chi kixilak taqe i aj Israel? inki taqe.
Eh re' Sansón je' wili xuq'or:
Re' i xq'un xnuk'ax wach i hin inwaaj chi nee taq inapahqaaj weh chi wehk'een, inki.

⁴Eh re' taqe i rutuut rajaaw i Sansón ma' keht'al ta naq chi re' i QaJaaw Dios xyej-anik cho wach i re'. Ruuk' i re' k'ahchi' naq rusik'im chi riij nik' wach noq naa kianam reh i aj filisteo ruum chupaam taqe q'iij re' re', re' naq i aj filisteo kow kitaaq'anik chikinaah i aj Israel.

⁵Eh re' Sansón ruch'ihil i rutuut rajaaw xiqajik qohoq pan tinamit Timnat. Eh noq xi ponik aha' tikooj wii' i uuva, re' Sansón xrilow chi xchalik chinaah jinaj i k'ijool kaq b'ahlam yohb'aal wach i rujosq'iil xak'erik chik chii'.⁶Eh re' Sansón re' i Ruxlab'al i QaJaaw Dios xye'wik rukowiil, xa ruuk' q'ab' xuxereb'eej i kaq b'ahlam, xa je' inxerarik k'isa kaprax xub'an. Xa re' la' ma' xuk'utjaaj ta keh i rutuut rajaaw chib'ih i xub'an.⁷Chi riij i re' xooj k'oloq chi ruq'orob'jiik i xq'un q'e' xuk'ax wach.

⁸Eh kiib' ixib' q'iij-oq chik chi riij i re' xik'ik wo' chik ar noq xooj rub'an kaxáro ruuk' i xq'un. Eh xujil i koq riib' chii' b'eeh ar xrilow wach i kamnaq laj kaq b'ahlam. Wilik i winaq kaab' kimolom kiib' pareq'saa' wilik ar i junsahl i wilik wii' riis.⁹Re' Sansón xresaj cho ruuk' q'ab' i wilik wii' i riis kaab' reh xresaj i riis xuk'ux reje wach b'eeh. Eh noq xponik taqe rureq i rutuut rajaaw xuyeew kiriis kaab', re' keh xkik'ux wo' hoq xa re' la' ma' xuq'or ta keh chi pareq'saa' i kamnaq kaq b'ahlam xresaj chaloq.

¹⁰Re' i rajaaw i Sansón xooj rilow i ril iib'. Re' Sansón xub'an jinaj i ninq'iij je' rukab' i okrinaq taqe chub'aan i k'ijolaq.¹¹Re' taqe i aj filisteo noq xkilow i ninq'iij xkitaq'aaj taqe i lajeeb' ru ka'winaq chi k'ijool reh chi naa ruwihiik ruuk' i Sansón pan ninq'iij.

¹²Re' Sansón je' wili i xuq'or keh i k'ijool re' re':
Re' hin wilik i naa nuq'orom taq aweh k'axik chi reqarik chi riij, wila' xaq'or taq weh chib'ih iraaj ruq'orom chuwach i wuquub' q'iij noq k'ahchi' i ninq'ijinik re' hin neenuyeew ju'jun-oq taq aso' re' ruuk' i holohaq itz'ihy lino. Eh nee wo' nuyeew ju'jun-oq taq aso' re' ruuk' i reh i ninq'ijinik.¹³Eh wila' ma' xaq'or taq weh chib'ih iraaj ruq'orom re' taq i hat neetiq'asanik weh cha ju'junaal i holohaq laj so' re' ruuk' i lino, nee wo' taq inaq'asaj weh ju'jun taq aso' i hat reh ninq'ijinik, inki.
Re' taqe i lajeeb' ruk'a' winaq chi k'ijool je' wili xkiq'or:
Chaq'or qeh i q'orik inaq'or inqaaj q'ib'iram, inki taqe.

¹⁴Re' Sansón re' taqe q'orik wili xuq'or keh:
Ruuk' inwi'k xelik chaloq i wi'k, eh ruuk' i q'e' kow riib' xelik chaloq i ki', inki.
Eh re' taqe i k'ijool noq xik'ik ixib' q'iij xama' xkiq'or ta wo' reh chib'ih iraaj ruq'orom taqe i re'.¹⁵Eh parukaaj q'iij je' wili i xkiq'or reh i rehk'een i Sansón:
Chapahqaaj reh i ab'ahiil chib'ih iraaj ruq'orom i q'orik xuq'or qeh nee wo' chik inaq'or qeh i hoj. Eh wila' ma' xapahqaaj reh naa kaat qak'atam i hat, je' wo' chu'nchel i rak'uun rixq'uun awajaaw. Re' taq i hat xoj ayuq'eej taq awuuk' xa reh chi naa taq aq'uchum i chib'ih qeh.

¹⁶Re' i xq'un xooj ruuk' i Sansón xasuq chik inoq'ik je' wili i xuq'or reh:
Re' hat ma' kinawaaj taj i nawixow nuwach ruum ma' naq'or ta weh chib'ih iraaj ruq'orom i q'orik xaq'or keh i k'ijool re' ruuk' taqe nutinamiit, inki.
Eh re' Sansón je' wili xuq'or:
Ni xata keh nutuut wajaaw nuq'orom chib'ih iraaj ruq'orom, ra'j naa chik aweh re' hat neenuq'or, inki.

¹⁷Eh re' i xq'un xasuq chik inoq'ik chuwach i rub'ahiil chuwach i wuquub' q'iij noq k'ahchi' i ninq'ijinik. Eh re' Sansón xuq'or wo' reh i rehk'een chib'ih iraaj ruq'orom taqe i q'orik xuq'or. Xchalik i rehk'een xuq'or wo' keh i k'ijool re' ruuk' taqe rutinamiit chib'ih iraaj ruq'orom i q'orik xuq'or.¹⁸Eh paruwuuq q'iij noq komajaa' inokik i q'iij re' taqe i k'ijool aj filisteo je' wili i xkiq'or reh i Sansón:
¿Mi wilik chik jino'q i xiik' naah ki'iil chuwach i riis kaab'? ¿Mi wilik chik jino'q i q'e' kow riib' chuwach i kaq b'ahlam? inki taqe.
Re' Sansón je' wili xuq'or keh:
Wi ta ma' xapahqaaj taq reh chiq'uun i wehk'een ma' xareq ta naq taq chi riij chib'ih iraaj ruq'orom taqe i q'orik re' re', inki.

¹⁹Eh re' i Sansón xye'arik rukowiil ruum i Santolaj Ruxlab'al i QaJaaw Dios xooj chupaam i tinamit Ascalón ar xukansaj taqe i lajeeb' ru ka'winaq chi winaq. Eh xuq'uch keh i kiholohaq so' kikojom chikiij. Re' taqe itz'ihy re' re' xuyeew keh i xiq'orik reh chib'ih iraaj ruq'orom i q'orik, chi riij i re' yohb'aal wach i rujosq'iil i Sansón noq xsutinik reje parupaat i rajaaw.

²⁰Eh re' i rehk'een i Sansón xq'ahteesjik reh jinaj i xti naah ramigo i Sansón.

¹Wilik-oq chik q'iij rub'aan i re', paruq'ijil chik i rusik'ariik i trigo, re' Sansón xooj chi rilariik i rehk'een xuk'am reje i jinaj i kaprax, noq xponik je' wili i xuq'or:
Re' hin naawokiik chi rilariik i wehk'een, inki, xa re' la' re' i rajaaw i rehk'een ma' xukoj ta chik i koq pampaat.²Je' la' wili i xuq'or reh:
Noq xnukapaaj i hin chi ma' nawaaj ta chik wach awehk'een, ruum aj re' xnuyeew chik reh i jinaj winaq xti naah awamigo. Xa re' la' re' re' wo' hoq i jinaj i ruchaaq' awehk'een q'e' holohik chuwach i reh neerub'an chi re' chik i reh neenachop naah chi jilow i ras, inki.

³Eh re' Sansón je' wili i xuq'or:
Re' hin ma' re' ta numahk wila' chib'ih xwuchej taqe i aj filisteo, inki.

⁴Eh re' Sansón xooj chi ruchopariik ixib' siento chi pahar xub'ak' chi kijeeh chi kik'uhlaal, eh chi xilak i kijeeh i ju'jun k'uhl xub'ak' ju'jun i b'ohr chi chiq sohk'.⁵Chi riij i re' xuqop reje ruq'aq'al i jumb'ohr chi sohk' xroq'taaj reje i pahar ruuk' i q'aaq' re' re' xkikoj ruq'aq'al i kitik i aj filisteo xk'ahtik i trigo molooj chik wach je' wo' hoq i ko wilik naah raa' xkuxik wo' ruk'ahtiik i ki uuva, je' wo' taqe i chee' olivo.

⁶Eh re' taqe i aj filisteo xkisik' chi riij awach xb'anik.
Noq xkireq chi riij chi re' Sansón xb'anik rujii' i winaq aj Timnat ruum i ruk'aah chi riij i rehk'een ruum re' i rajaaw i rehk'een xuq'asaj i rixq'uun reh i naah ramigo i Sansón.
Re' taqe i aj filisteo xooj kik'at ixoq, je' wo' hoq i rajaaw.

⁷Re' Sansón je' wili i xuq'or keh:
Ruum chi je' re' taq i xa a'n re' hin xti korik i nuq'or chi ma' naa ta nuq'uhtiik chub'anariik taq aweh i ti' k'axik korehtaal i nuq'aj wach taq aweh taq i xa a'n inki.

⁸Re' Sansón xokik chi q'aq'inik kuuk' i aj filisteo ma' k'isiin taqe i xukansaj. Eh chi riij i re' xooj rukeb'aa' riib' chupaam i paat ab'aj wilik ar Elam. Re' Sansón xub'an keh i aj filisteo

⁹Re' taqe i aj filisteo xiooj ar Judá ar xtohq'ik reje kiyejaam i ki-itz'ihy naah paat korehtaal xi ponik chupaam i ye'aab' Lehi.¹⁰Eh re' i jun ch'uq chi riih rumaam i Judá xkipahqaaj reh i aj filisteo chi je' wili:
¿Chib'ih reet noq xat chalik taq chi q'aq'inik quuk'? inki taqe.
Re' keh je' wili i chaq'wik xkian:
Re' hoj xoj chalik chi ruchopariik i Sansón reh chi neerutoj wach qeh i xub'an qeh, inki taqe.

¹¹Eh ruum i re' ixib' miil i riih rumaam i Judá xiooj pampaat ab'aj wilik ar Etam chi q'orob'jiik i Sansón, je' wili i xkiq'or reh:
¿Mi ma' aweht'al re' hat chi re' taqe i aj filisteo kib'anik i taaq'anik chi qanaah?
¿Chib'ih reet i xa a'n qeh chi je' re'? inki taqe.
Re' Sansón je' wili xuq'or keh:
Re' hin xnuq'aj wach keh i xkian weh i hin, inki.

¹²Re' taqe i riih rumaam i Judá je' wili i xkiq'or reh:
Re' hoj xoj chalik chi achopariik reh chi naa kaat qaq'asam pan kiq'ab' i aj filisteo, inki taqe.
Eh re' Sansón je' wili i xuq'or keh:
Ma' xta reet xa re' la' cha q'or taq weh i xti korik mi ma' nukanteesjiik taq inawaaj, inki.

¹³Re' keh je' wili chaq'wik xkian:
Re' hoj korik noq ma' re' ta akanteesjiik inqaaj, xa achopariik la' inqaaj reh chi naa kaat qaq'asam pan kiq'ab' i aj filisteo, inki taqe.
Chi riij i re' xkib'ak' wach ruuk' i kiib' chi ak' laso, eh xkesaj cho chupaam i paat ab'aj rukeb'aam naq wii' riib'.

¹⁴Eh noq xooj k'oloq kuum i Sansón ar Lehi re' taqe i aj filisteo xchalik kik'ul xak'erik chik kichii' ruum i rusuqkiil kik'ux. Eh re' Sansón xye'arik rukowiil ruum i Ruxlab'al i QaJaaw Dios, xuyeew jinaj i ransil xuk'upib'eej i kiib' chi laso b'ak'lik naq wii' taqe i q'ab', xa je' ink'uparik ma' kow ta laj nooq' xub'an.¹⁵Eh xichop chaloq jinaj i rub'aqil i rukahkachi' i b'uurux kox kimik ruuk' i re' xukansaj taqe i jinaj miil chi winaq re' ruuk' taqe i aj filisteo.¹⁶Eh re' i Sansón je' wili i xuq'or parutz'uuy:
Re' hin xa ruuk' i jinaj i rub'aqil i rukahkachi' i b'uurux xnukansaj taqe i jinaj miil chi winaq, xa ruuk' i jinaj chi rub'aqil i rukahkachi' i b'uurux xnukansaj i jun tuhb' chi winaq, inki.

¹⁷Eh noq xukohlaaj q'orik xukut reje wulu' i rub'aqil i rukahkachi' i b'uurux. Eh re' ye'aab' re' re' Ramat-lehi i rub'ihnaal xkahnik.

¹⁸Re' Sansón yohb'aal wach chiqkaal chii' ruum i re' xuq'oreej i QaJaaw Dios je' wili xuq'or:
Re' hat xinatob'eej chub'anariik keh i aj filisteo ¿Chib'ih reet noq naa kiin akansam ruum chiqchi'iil nuchii' yu'naak reh chi neenkian weh taqe i ma' kinimanik taa weh?

¹⁹Eh re' QaJaaw Dios xuteh jinaj i jul wilik ar Lehi, eh xelik chaloq i ma' k'isa ha'. Re' Sansón xuk'ej reh i haa' xelik cho panjul, eh xk'ulik ruk'ux. Eh re' i raasb'al ha' wilik ar Lehi, En-hacore i rub'ihnaal xkikoj, je' re' i rub'ihnaal xkahnik chi jumpech.

²⁰Re' Sansón juninaq haab' xwihik chi taaq'anik chikinaah i aj Israel chupaam i q'iij noq re' taqe i aj filisteo wilkeeb' chi taaq'anik chikinaah. Re' noq xponik i Sansón pan tinamit Gaza

¹Pan jinaj q'iij re' Sansón xooj pan tinamit Gaza, ar xuk'ax wach jinaj i k'oyoom laj ixoq xwirik ruuk'.²Eh noq xkib'iraj taqe i aj Gaza chi wilik chupaam i tinamit re' re' i Sansón xtohq'ik kicha'jeem i tinamit ki-ik'ik q'iij chi rucha'jaljiik taqe i ookb'al. Eh chupaam i raq'ab'iil re' re' xi kahnik chi hi'lik xkikapaaj i keh chi koparusaq'iik naa kikansam.

³Xa re' la' re' Sansón xa juntoq wo' aq'ab' xwirik, xwuktik reje xik'ik ponoq rub'oq i ru puertahiil i tinamit ruch'ihil taqe i rooq ch'ilik wii' ruch'ihil taqe i ch'ihch' tz'aplik wii' riij, chu'nchel i re' xuyeew reje nah tileb'. Eh ar xuk'am reje chinaah i yuuq' wilik chi k'ulwaach i tinamit Hebrón. Re' Sanón, re' Dalila

⁴Eh chi riij i re', re' Sansón xuk'ax wach jinaj ixoq Dalila rub'ihnaal, ar patim wach k'ixkaab' Sorec.

⁵Re' i k'amal kib'eeh i aj filisteo xiooj ruuk' i Dalila je' wili i xkiq'or reh:
Chajot' i Sansón cha pahqaaj reh aha' inchalik i ransil xti yohb'aal wach, eh nik' naq wach noq neenqaq'at wach i ransil, reh naq chi neenqab'ak wach. Eh wila' xaq'or qeh neenqayeew aweh chi qaju'junaal i jinaj miil ruuk' jinaj siento chi tumiin re' ruuk' i plata.

⁶Eh re' Dalila xupahqaaj wo' reh i Sansón chi je' wili:
Re' hin inwaaj chi neenaq'or weh aha' inchalik awansil xti yohb'aal wach. ¿Nik' naq wach noq nee nelik awansil reh naq chi neenkib'ak' awach, reh chi ma' nee ta chik i na woq'taaj awiib'? inki.

⁷Re' Sansón je' wili i xuq'or:
Neeta inkib'ak' nuwach ruuk' i wuquub' chi k'ahaam komajaa' inchiqik re' ruuk' i ruk'ahamil flecha re' hin nee naq kinkahnik chi ma' xta chik wansil, xa je' naq chik nukab' taqe chu'nchel i winaq, inki.

⁸Eh re' taqe i k'amal kib'eeh i aj filisteo xkik'am reje reh i Dalila i wuquub' chi k'ahaam komajaa' inchiqik re' ruuk' i ruk'ahamil i flecha. Re' Dalila ruuk' taqe i k'ahaam re' re' xub'ak' wach i Sansón.⁹Re' Dalila wilik taqe i winaq rukeb'aam parupaat kow xuk'er chii' chuq'orariik chi je' wili:
Sansón xi k'uloq i aj filisteo cha naah, inki.
Eh re' i Sansón xik'upib'eej taqe i k'ahaam xb'ak'arik wii' wach, je' ink'uparik ma' kow ta laj nooq' xub'an, xama' xkan ta wo' chi riij aha' inchalik i ransil.

¹⁰Re' Dalila je' wili i xuq'or reh i Sansón:
Re' hat k'ahchi' kiin ajot'om, xachuk weh i q'orik, yu'naak cha kuy cha q'or weh nik' wach noq neenb'aan rub'ak'ariik awach, inki.

¹¹Re' Sansón je' wili ruchaq'weesjiik xub'an:
Wila' xinkib'ak' ruuk' ak'laj laso ko ma' jaa' inkojarik, re' hin nee kinkahnik chi ma' xta chik wansil xa je' chik nukab' chu'nchel i winaq, inki.

¹²Eh re' i Dalila xuk'am chaloq taqe i ak' laso xub'ak' wach i Sansón paruwiriik wilik naq chik taqe i aj filisteo rukeb'aam parupaat, eh kow xuk'er chii' chuq'orariik chi je' wili:
Sansón xi k'uloq i aj filisteo cha naah, inki.
Eh re' Sansón xuk'upib'eej i ak' laso, xa je' ink'uparik ma' kow ta laj nooq' xub'an.

¹³Re' Dalila je' wili i xuq'or reh i Sansón:
Re' hat xa nujot'ariik i naa a'n, xakok'ahchi' achukum weh i q'orik cha q'or weh chib'ih i naa rub'aan chi neenb'ak'arik awach, inki.
Re' Sansón je' wili xuq'or:
Wila' xa kem i wuquub'-oq b'ohr i rismaal nunaah, ruuk' jino'q i itz'ihy, eh neenach'apaa' panak'al ruuk' i ruchee'el, nee kinkahnik chi ma' xta chik wansil, xa je' chik nukab' chu'nchel i winaq, inki.
Eh noq xwirik i Sansón xub'an wo' hoq i Dalila i xq'orarik reh.

¹⁴Eh xuch'apaa' wo' chi korik panak'al i ruche'el, eh kow xuk'er chii' chuq'orariik chi je' wili:
Xi k'uloq i aj filisteo cha naah, inki.
Eh re' Sansón xub'oq johtoq i chee' ruch'ihil kemooj itz'ihy.

¹⁵Eh re' i Dalila je' wili i xuq'or reh i Sansón:
Xti hat chuk'ul q'orik, ¿Nik' wach noq inaq'or weh chi kinawaaj? Eh yu'naak oxpech chik xinajot' xakomajaa' ta wo' inaq'or weh aha' inchalik awansil, inki.

¹⁶Eh ruum chi re' i Dalila xa kok' xilak chik i rupahqaaj, re' Sansón xq'uhtik chik chi rib'irjiik xaraaj naq chik kimik.¹⁷Eh xuq'or wo' reh i Dalila aha' inchalik i ransil, je' wili i xuq'or:
Re' hin ma' jank'al ta inyok'arik i rismaal nunaah ruum xa hin wo' q'asamaj ree Dios, noq komajaa' kin-aasjik, eh hin Nazareo. Neeta inyok'arik i rismaal nunaah nee naq kin kahnik chi ma' xta chik wansil xa je' naq chik nukab' chu'nchel i winaq.

¹⁸Eh noq re' Dalila xukoj rehtaal chi xq'orarik reh i korik ruum i Sansón aha' inchalik i ransil xutaq'aaj kik'amariik taqe i k'amal kib'eeh i aj filisteo, je' wili i xuq'or reje keh:
Tichaloq taq ruum re' Sansón xuq'or chik weh aha' inchalik i ransil, inki.
Eh re' taqe i k'amal kib'eeh i aj filisteo xi chalik ruuk' Dalila xkik'am chee tumiin i xkiq'or b'ih reh.

¹⁹Eh re' i Dalila xuq'or reh i Sansón chi xwirik, eh warutuuq xuyeew i naah, eh xuq'or reh i jinaj chi naa ruyok'om i wuquub' b'ohr chi rismaal naah, ruuk' i re' xkahnik chi ma' xta chik k'isinoq ransil, eh xrilow chi je' re' i Dalila xtohq'ik i koq rub'ajam.

²⁰Eh kow xuk'er chii' chuq'orariik chi je' wili:
Sansón, xi k'uloq i aj filisteo cha naah, inki.
Re' Sansón xwuktik paruwiriik xukapaaj naq i reh chi naa ruko'leem riib' je' rukab' noq xuko'leej riib' pampeet, ma' xukoj ta rehtaal chi xkanab'jik chik ruum i QaJaaw Dios.²¹Xkilow chi je' re' i aj filisteo xkichop i Sansón xkesaj iloq kab'chel inaq'wach. Eh xkik'am reje pan tinamit Gaza ar xkib'ak' wach chi karena re' ruuk' i q'an ch'ihch', eh xkikoj chi kamanik ruuk' i nimlaj keeb'al wilik pantz'ilom.²²Eh re' i rismaal i naah xtohq'ik wo' chik cho ruk'ihiik ruka'peech. Re' rukimiik i Sansón

²³Re' taqe i k'amal kib'eeh i aj filisteo xkimol kiib' chi ninq'ijinik ruum xkian reh i Sansón, xkiyeew i kimayiij chuwach i kitiyoox Dagón rub'ihnaal je' wili i xkiq'or pan kitz'uuy:
Re' qadios xuq'asaj panqaq'ab' i Sansón i nixowanik qawach, inki taqe.

²⁴Eh noq xkilow i kitinamiit chi je' re' xkiloq'ej i ki dios je' wili i xkiq'or pankitz'uuy:
Re' qadios xq'asanik reh panqaq'ab' i Sansón i nixowanik qawach, re' insachwik naq kiwach i qatik pan qaye'aab'. Eh ma' k'isiin naq i qatinamiit k'ahchi' rukansam, inki taqe.

²⁵Re' i tinamit ma' k'isiin ta suq kiil kik'ux, je' wili xkiq'or:
Chawesaj taq cho qeh i Sansón reh chi nee ruyeew qase'eel, inki taqe.
Eh x-ehtesjik wo' cho keh pantz'ilom i Sansón reh chi xye'arik kise'eel.
Eh ar xooj kipab'aa' panyejaal kiib' chi rooq i paat.

²⁶Re' Sansón je' wili i xuq'or reh i k'ijool inchopwik reje chi q'ab':
Kinayeew panyejaal i kiib' chi tz'aq, re' taqe i rooq i paat reh chi k'ul nee nuchop wiib' chuwach, inki.

²⁷Eh chupaam i jumehq' re' re' chu'nchel i k'amal kib'eeh aj filisteo wilkeeb' chupaam i paat nujinaq chi tinamit chi winaq chi ixoq. Eh je' naa ixib' miil taqe i wilkeeb' paruka'ch'iht i paat, eh k'ahchi' cho kilom nik' wach noq k'ahchi' ruye'ariik kise'eel ruum i Sansón.

²⁸Eh re' i Sansón xub'an rutiij chuwach i QaJaaw Dios je' wili i xuq'or:
QaJaaw Dios, re' hin i nupahqaaj otob'il aweh chi kinatoob'eej chik junriim-oq ach-oq re' i yu'naak chayeew cho wansil reh chi nee nuq'aj wach keh i aj filisteo i rehtesjiik kab'chel i naq'nuwach xkian, inki.

²⁹Chi riij i re' ju'jun i q'ab' ruye'em reje chikiwach i tz'aq rooq i paat re' xti ch'iklik wii'. Eh ar xuchop i koq riib' chikiwach.³⁰Eh kow xuk'er chii' chuq'orariik chi je' wili:
Junkimiik-oq taqe wuuk' i aj filisteo, inki.
Eh xesaj chu'nchel i ransil k'ul xumihnaaj reje i tz'aq rooq i paat, eh xanoq wo' xtub'lujik wach ak'al chikinaah i k'amal kib'eeh i aj filisteo je' wo' chikinaah chu'nchel i wilkeeb' ar. Eh chupaam i q'iij re' re', re' Sansón xiik' naah k'ihaal i xukansaj ma' xata je' kihaal i xukansaj chupaam i ruk'achariik.

³¹Eh re' taqe i ras i ruchaaq' i chu'nchel i awach reh i Sansón xk'ulik kimol i ruti'jolal ar xkimuq'aa' chupaam i muq'umb'al muhqinaq wii' i Manoa re' rajaaw. Re' i muq'umb'al re' re' ar wilik panyejaal i kiib' chi tinamit Zora i Estaol. Re' Sansón juninaq haab' xwihik chi taaq'anik chikinaah i aj Israel. Re' Micaía xuyejaa' jinaj i tiyoox, eh xupab'aa' jinaj i aj kamanoom chuwach

¹Xwihik chaloq jinaj i winaq Micaía rub'ihnaal ar xpatinik chinaah i yuuq' xi patinik wii' i riih rumaam i Efraín.²Re' reh je' wili xuq'or reh i rutuut:
Re' i jinaj siento chi tumiin re' ruuk' i plata, eh xapahqaaj i ma' holohik taj chinaah i awach i x-elq'anik reh.
Re' tumiin re' re' wuuk' wilik, hin xinelq'anik reh wili atumiin nee nuq'asaj aweh, inki.
Re' rutuut je' wili i xuq'or reh i rak'uun:
Re' ta naq i QaJaaw Dios neentoob'inik cha weh, inki.

³Re' i Micaía xuq'asaj wo' hoq i tumiin reh i rutuut. Re' rutuut je' wili xuq'or:
Xti korik noq re' i tumiin wili xnuq'asaj reh i QaJaaw Dios parub'ihnaal i wak'uun, reh chi naa nutaq'aam chi yejeb'jik jino'q i tiyoox re' ruuk' i chee', eh neenkojarik plata chuwach, inki.

⁴Re' Micaía xuq'asaj i tumiin reh i rutuut. Eh re' i rutuut kiib' siento chi tumiin re' ruuk' i plata xuyeew reh i jinaj i aj ch'eyool reh chi xuyejaa' i tiyoox chee' xukoj i koq i plata chuwach. Eh xye'arik parupaat i Micaía.

⁵Parupaat i Micaía xwihik jinaj i paat inlooq'jik wii' i tiyoox, eh xuyejaa' wo' hoq jinaj i jalwaach, xuyejaa' wo' hoq i ki dios re' ruuk' i chee'. Eh xupab'aa' jinaj keh i rak'uun chi xkamanik chi k'amal b'eeh aj tiij chikiwach i tiyoox.⁶Chupaam taqe i q'iij re' re' komajaa' chih i reey wilik chi taaq'anik chikinaah i aj Israel, ruum aj re', re' ju'jun i rub'an aha' wilik iraaj i reh.

⁷Chupaam i q'iij re' re' jinaj i k'ijool xoj k'oloq chupaam i ye'aab' re' re' aj Belén, re' ruuk' i wilik paruyuq'ul i Judá aj Levíta.⁸Re' i k'ijool wili xelik cho Belén xooj chusik'ariik ruye'aab'. Eh noq xooj chi rusik'ariik i ruye'aab' xponik parupaat i Micaía patim chinaah i yuuq' patim taqe wii' i riih rumaam Efraín.

⁹Eh re' Micaía xupahqaaj reh i k'ijool chi je' wili:
¿Aha' ti chalik i hat? inki.
Re' i k'ijool je' wili i xuq'or:
Re' hin Belén kinchalik paruyuq'ul i Judá hin aj Levíta xin chalik chi rusik'ariik nuye'aab', inki.

¹⁰Eh re' i Micaía je' wili i xuq'or reh i k'ijool neerub'an chi neetikahnik panupaat neetinukoj chi hat k'amal kib'eeh aj tiij, neetikahnik chi je' hat wajaaw.
Re' hin neetinutoj lajeeb' chi tumiin re' ruuk' i plata chuwach i jinaj haab', eh neenuyeew aso', nee wo' nuyeew awa', inki.

¹¹Eh re' i k'ijool aj Levíta xuk'ulaa' chi naa rukahniik chi k'achariik ruuk' i Micaía, eh xponik i q'iij chi xkahnik chi je' jinaj rak'uun.¹²Eh re' i Micaía xupab'aa' chi k'amal rub'eeh aj tiij i k'ijool xkahnik chi patinik ar.¹³Re' i Micaía xukapaaj chi kuxesjik cho ruum i Dios ruum xkahnik ruuk' chi k'amal kib'eeh aj tiij jinaj i aj Levíta. Re' i Micaía, eh re' taqe i riih rumaam i Dan

¹Chupaam taqe i q'iij re' re' komajaa' naq inokik i reey chi taaq'anik chikinaah i aj Israel. Eh re' taqe i riih rumaam Dan i komajaa' wo' naq i kireq kiye'aab' ruum aj re' kok'ahchi' kisik'im kiye'aab' aha' naakipatiniik.²Ruum aj re', re' taqe i riih rumaam i Dan xkitaq'aaj reje i ho'oob' chi winaq kow kiib' wilkeeb' ar, Zora, eh Estaol reh chi xiooj chi rutahariik i ye'aab', je' wili xkiq'or reje keh:
Hiy taq chatah i ye'aab' inki.
Re' taqe i ho'oob' chi winaq wili xiooj k'oloq chinaah i yuuq' wilkeeb' wii' i riih rumaam i Efraín xi ponik parupaat i Micaía ar xkik'saj i jinaj aq'ab'.³Noq wilkeeb' ma' naj ta ruuk' i rupaat i Micaía xkib'iraj i ruq'oral jinaj i k'ijool aj Levíta, eh xkijil i koq kiib' ruuk' xkipahqaaj reh chi je' wili: ¿awach xk'amwik cha weh ayu'?
¿Chib'ih reet noq wilkaat chupaam i ye'aab' wili?
¿Chib'ih inasik' cha yu'? inki taqe reh.

⁴Eh re' k'ijool aj Levíta je' wili i chaq'wik xub'an:
Re' Micaía je' wili i xuyejaa' wach wuuk', re' reh xirukanaa' ayu' parupaat, eh xirupab'aa' chi hin k'amal kib'eeh aj tiij, inki.

⁵Eh re' taqe i aj tahool re' re', je' wili xkiq'or:
Re' hat cha pahqaaj reh i QaJaaw Dios mi nee qoh elik korik ruuk' i qab'iyajo wili, inki taqe.

⁶Re' k'amal kib'eeh aj tiij aj Levíta je' wili xuq'or keh:
Hiy taq chi suq ak'ux. Eh re' i QaJaaw Dios neentoob'inik taq aweh panab'eeh, inki.

⁷Chi riij i re' xiooj wo' taqe i ho'oob' chi winaq chupaam i tinamit Lais. Eh noq xi ponik ar xkilow chi re' taqe i patim ar pansuqkiil k'uxliis k'acharik inki a'n je' rukab' i okrinaq taqe wii' i aj Sindón, pansuqkiil wilkeeb' ma' awach ta intaaq'anik keh, ma' awach ta injot'wik keh, eh wilik chu'nchel i ajwaal wach chi keh. Eh najt kixilak i aj Sidón, ma' inki a'n taj jinaj wach kik'ux kuuk' i tokoom tinamit.

⁸Eh re' taqe i ho'oob' chi winaq kojol rehtaal i ye'aab' xi sutinik wo' chik reje Zora, eh Estaol. Re' i wilkeeb' wii' taqe i kuch'ihil, eh xpahqaljik keh chi je' wili:
¿Chib'ih taq i xponik awilow? ki uchjik.
Eh re' keh je' wili i xkiq'or:

⁹Re' hoj xqab'ehuj cho paam chu'nchel i ye'aab' re' re', eh q'e' holohik i ye'aab' xponik qilow wach ar Lais, je' re' noq taq taq, reh chi nee qohooj chi q'aq'inik kuuk' reh chi nenooj qachop naah i ye'aab' re' re'. Eh wila' ma' xooj ooj ma' nee ta qehchaaj.¹⁰Eh noq nee qoh ponik ar neenqareq taqe i kiristianu' suq wilkeeb' wilik chu'nchel i ajwaal wach chi keh. Eh ma' k'isa ye'aab' i kuuk', re' QaJaaw Dios neentoob'inik qeh chi neen kiyeew qa ye'aab', inki taqe.

¹¹Eh waqiib' siento chi winaq re' ruuk' taqe i riih rumaam i Dan xkik'am reje kitz'a'amb'aal xi elik reje Zora, eh Estaol.¹²Eh xiooj ar Judá ar xkiyejaa' i ki-itz'ihy naah paat chupaam i ye'aab' Quiriat-jearim wilik reje chi korkiil i rookb'aal q'iij. Re' i ye'aab' re' re' kiye'aab' i riih rumaam, je' i rub'ihnaal xkahnik chi jumpech.¹³Chi riij i re' xiooj chinaah i yuuq' wilkeeb' wii' i riih rumaam i Efraín, eh xi ponik parupaat i Micaía.

¹⁴Eh re' taqe i ho'oob' chi winaq xiooj chi kojariik rehtalil nik' wach noq wilik i ye'aab' i Lais je' wili xkiq'or reh i kuch'ihil:
¿Mi nawaaj taq inanab'eej chi chupaam i paat wilik jinaj i jalwaach? Eh wilkeeb' wo' taqe i xatz'aqoj tiyoox. Eh jinaj i tz'aqoj tiyoox re' ruuk' i chee', eh kojooj i koq i plata chuwach. ¿Chib'ih taq inakapaaj chi riij? inki taqe.

¹⁵Re' taqe i ho'oob' chi winaq xikojwik rehtaal i ye'aab' xkikanaa' kuch'ihil xiooj parupaat i Levíta, ar wo' hoq parupaat i Micaía, eh xkiyeew rusuqkiil ruk'ux.¹⁶Eh re' taqe i waqiib' siento chi soldado wilik i kitz'a'mb'aal reh i q'aq'inik kow kiib' re' taqe ruuk' i riih rumaam i Dan xiooj kiyeew kiib' chi chii' i puerta.¹⁷Eh re' taqe i ho'oob' chi winaq xikojwik rehtaal i ye'aab' peet xi okik i koq parupaat i Micaía xkik'am i jalwaach xkik'am wo' hoq i tiyoox chee' korjinaq wii' je' wo' hoq i tiyoox plata korjinaq wii', xkuxik kik'amam chu'nchel i xatz'aqoj tiyoox. Eh re' i k'amal kib'eeh aj tiij pa'lik i koq chi' puerta ruch'ihil taqe i waqiib' siento chi soldado.

¹⁸Noq xrilow i k'amal kib'eeh aj tiij chi xi okik i koq i ho'oob' chi winaq parupaat i Micaía noq xkik'am i jalwaach ruch'ihil chu'nchel i tiyoox re' re', je' wili i xuq'or keh:
¿Chib'ih taq i k'ahchi' kaat? inki.

¹⁹Re' keh je' wili i xkiq'or:
Matchoqik cho quuk', taq chiqiij inqaaj chi neetikahnik chi hat k'amal b'eeh aj tiij chi qaxilak. Eh neetikahnik chi hat jilow qajaaw. ¿Mi ma' nakoj rehtaal re' chi q'e' chihooj cha weh chi neetikahnik chi hat k'amal b'eeh aj tiij i junch'uq chi aj Israel chuwach chi xa parupaat i jinaj chi winaq wilkaat chi k'amal rub'eeh aj tiij? inki taqe reh.

²⁰Eh re' i xkiq'or taqe re' xponik chuwach i k'amal b'eeh aj tiij xuk'am reje i jalwaach, ruch'ihil i tiyoox chee', je' wo' hoq plata korjinaq wii'. Eh xooj chikiij taqe i riih rumaam i Dan.²¹Je' re' noq xkiyeew chi peet b'eeh i ha'la'k'un ruch'ihil taqe i kichikoop je' wo' chu'nchel i chib'ih keh noq xiooj.²²Re' taqe i riih rumaam i Dan noq najt chik xkib'ehuj reje, re' i Micaía xkimol kiib' ruch'ihil taqe i ruka'jaah xiooj chi kisik'ariik taqe i re'.

²³Eh noq xkireq reje xkik'er reje kichii' chi kiq'orob'jiik. Noq xkib'iraj riih rumaam i Dan chi je' re' xkisutej chee kiwach, eh xkipahqaaj reh i Micaía chi je' wili:
¿Chib'ih jariik taq inak'ul? ¿Chib'ih reet noq inak'er taq aachii' chi qaq'orob'jiik? inki taqe.

²⁴Re' Micaía je' wili i xuq'or keh:
Re' taq i hat xak'am taq chaloq i nutiyoox xnuyejaa', eh xak'am wo' taq cho chawiij i k'amal b'eeh aj tiij kamanik naq i rub'an wuuk' xi nakanaa' taq chaloq chi ma' xta wilik weh. ¿Chib'ih reet noq inaq'or taq weh chib'ih i xnuk'ul? inki.

²⁵Eh re' taqe i riih rumaam i Dan je' wili i xkiq'or:
Cha a'n otob'il ma' josaj aq'oral chi qanaah ruum wilik taqe i winaq q'e' taqe josq' chi qaxilak mankitik'aa' peleto mat kikansaj i hat, eh mankikansaj taqe i awach aweh panapaat, inki taqe.

²⁶Eh noq xrilow i Micaía chi xiik' naah kik'ihaal xyo'jik xsutinik cho parupaat. Re' taqe i riih rumaam i Dan xiooj chikiwach ruuk' i kib'eeh.²⁷Eh kik'amam reje taqe i chib'ih reh i Micaía ruch'ihil i k'amal b'eeh aj tiij inkamanik naq ruuk'. Noq xi ponik chupaam i tinamit Lais xi okik i koq ar. Re' taqe i tinamit re' re' pansuqkiil k'uxliis k'acharik inki a'n xkuxik kikansam taqe i patineel wilkeeb' ar. Eh xkik'atib'eej i tinamit re' re'.²⁸Ma' awach ta xko'linik keh i tinamit Lais ruum najt wilik ruuk' i tinamit Sidón, eh ma' awach ta aj uuk' inkik'am kiib' panotob'il. Re' tinamit Lais ar wilik wataq k'ixkaab' chu'nchel i tinamit Bet-rehob. Eh re' taqe i riih rumaam i Dan xkiyejaa' wo' chik ruka'peech, ar xi okik chi patinik.²⁹Re' tinamit Lais xkijal i rub'ihnaal Dan chik i rub'ihnaal xkikoj, re' re' i rub'ihnaal xkikoj ruum Dan rub'ihnaal i xikin kimaam, re' i rak'uun chee Jacob.³⁰Re' taqe i riih rumaam i Dan xkiyeew ar i tiyoox reh chi xkiloq'ej. Eh re' i k'amal kib'eeh aj tiij chi kixilak, re' i Jonatán rak'uun i Gersón riih Moisés. Eh re' taqe i riih rumaam i Jonatán xi wihik chi k'amal kib'eeh aj tiij chi kixilak i riih rumaam i Dan korehtaal chik xi k'amarik reje pan tokoom tinamit.³¹Eh re' taqe i tiyoox xuyejaa' i Micaía ar xkahnik pan kixilak taqe i riih rumaam i Dan, Nik' najtiil xwihik i rupaat i QaJaaw Dios ar Silo. Re' i aj Levíta, eh re' i rukab' ixoq xureq

¹Chupaam q'iij noq komajaa' naq chih i kireey i aj Israel, jinaj i winaq re' ruuk' riih rumaam i Leví ar wilik chi patal xti kochinaah i yuuq' wilkeeb' wii' i riih rumaam i Efraín jinaj ixoq xuchop naah chi rukab'ruxoqil ar inchalik Belén wilik paruyuq'ul i Judá.²Eh re' ixoq re' re' ma' holohik ta runa'ojb'al xukanaa' kahnoq i winaq xooj wo' chik parupaat i rajaaw ar Belén wilik paruyuq'ul i Judá, noq kijib' chik poh rojiik ruuk' i rajaaw.³Re' i winaq xooj chusik'ariik, reh chi xooj ruq'unej wach reh chi naa wo' naq chik ruchaliik ruuk'. Eh xuk'am reje chi riij jinaj i rumoso, xuk'am reje kiib' i b'uurux, re' ixoq xuk'ul parupaat i rajaaw.⁴Eh re' i rajaaw ixoq xuk'ul parupaat i winaq re' re' xasuq chik ruk'ux, xuq'or reh chi neenkahnik kuuk'. Eh re' i winaq re' ruuk' riih rumaam i Leví, ruch'ihil i rumoso ixib' q'iij wo' xi kahnik parupaat i rajaaw ixoq, ar xkian kiwa' kihaa'.

⁵Eh noq xsaq'ik parukaaj q'iij xi wuktik, eh xwuktik wo' hoq i winaq aj Levíta ruyejaam naq chik riib' chi naa rojiik parutinamiit. Eh re' rajaaw i rukab'ruxoqil je' wili xuq'or reh i rujii':
Chak'ux pee reje junch'uy-oq aakaxlanwi'k reh chi wilik awansil noq nee tiooj, inki.

⁶Eh jinaj xooj kitzunaa' wii' kiib' ruuk' i rumoso xkian kiwa' kihaa'.
Eh re' i rajaaw ixoq je' wili i xuq'or:
Neerub'an chi nee chik ti kahnik jino'q aq'ab' ayu' reh chi neensuuqb'ik ak'ux inki.

⁷Re' i winaq aj Levíta xwuktik wo' naq chik chi junwaar reh chi naa naq rojiik, xa re' la' re' i rajaaw i rukab' rixoqil k'ih pech xuq'or reh chi naa rukahniik.

⁸Eh paroo' q'iij chik xwuktik wo' chik i winaq reh naq chi narojiik, eh re' i rajaaw i rukab' rixoqil xuq'or wo' chik reh chi chuk'ux pee reje k'isinoq rukaxlanwi'k noq nenooj.
Re' winaq kikab'cheel xi okik chi wi'k korehtaal chik xponik kab'lajora i q'iij.
Eh xkian wo' kiwa' kihaa' kikab'cheel ruuk' i rumoso.

⁹Eh noq k'ahchi' chik ruqajiik i q'iij xuyejaa' wo' naq chik riib' chi ojik i winaq ruch'ihil i rukab' rixoqil ruch'ihil i rumoso. Eh noq xrilow i rajaaw i rukab' rixoqil, je' wili i xuq'or:
Yu'naak k'ahchi' chikrokiiki q'iij ti woroq taq ayu' reh chi nee taq inawik'saj chi suq ak'ux aq'ab' wili ko'qal wahq'eq taq nee tiooj, inki.

¹⁰Xa re' la' re' winaq re' re', re' aj Levíta ma' xraaj ta chik kahnik ar chupaam aq'ab' re' re', xooj reje ruch'ihil i rukab' rixoqil, ruch'ihil i rumoso, ruch'ihil taqe i kiib' chi rub'uuruux wilik kihqb'aal chikiij. Eh noq achk'isiin ma' kiponik ruuk' i tinamit Jebús, Jerusaleem wo' inkiq'or reh.

¹¹Je' wili xq'orarik reh i aj Levíta ruum i rumoso:
¿Chib'ih naq i neerub'an chi neenooj qik'saj aq'ab' chupaam i tinamit re' re' i wilkeeb' wii' i aj jebuseo? inki.

¹²Eh re' i aj Levíta je' wili i chaq'wik xub'an:
Re' hoj ma' nee ta rub'an chi nee qohooj chupaam i tinamit ma' re' ta ruuk' i hoj, hoj aj Israel, taq reje korehtaal qohponik Gabaa.

¹³Taq reje chupaam taqe i ye'aab' re' re' reh chi ar nee qoh wirik ponoq Gabaa, oon ar Ramá, inki.

¹⁴Je' re' noq xiooj chikiwach ruuk' i kib'eeh. Eh noq xokik i q'iij manlik xi ponik Gabaa, re' ye'aab' wilik paruyuq'ul i kiye'aab' i riih rumaam i Benjamín.¹⁵Eh xkikanaa' kahnoq i nim b'eeh xi okik i koq Gabaa ar xiooj woroq chupaam aq'ab' re' re'. Noq xi ponik chupaam i tinamit xooj kitzunaa' kiib' pank'ayb'al ruum ma' jino'q naq inye'wik kipatal.

¹⁶Eh noq okik chik i rub'an aq'ab' jinaj i mama' winaq chalik i rub'an chi kamanik parab'iix xikik chikiwach. Re' mama' winaq re' re' ar Gabaa patim, xa re' la' chinaah i yuuq' wilkeeb' wii' i riih rumaam i Efraín elenaq chaloq. Eh re' taqe i patim Gabaa re' ruuk' taqe i riih rumaam i Benjamín.

¹⁷Eh noq re' mama' winaq re' re' xrilow chi re' taqe aj b'iyajo re' re' rilow chi wilik pank'ayb'al je' wili i xuq'or reh i aj Levíta:
¿Aha' ti chalik, aha' tiooj? inki reh.

¹⁸Re' i aj Levíta je' wili i xuq'or:
Re' hoj xa ik'ik qeh, ar qoh chalik pan tinamit Belén wilik ar Judá. Ojik inqa'an panqapaat wilik chaloq konajt ayu' ar chinaah i yuuq' wilkeeb' cho wii' i riih rumaam i Efraín. Ar xoj ponik chaloq Belén yu'naak sutinik chik inqa'an panqapaat, xa re' la' ayu' ma' awach ta inye'wik qapatal chupaam aq'ab' wili, inki.¹⁹Re' hin wilik nukaxlanwi'k, wilik nuhaa' wihqaam, reh chi neenuk'ux ruuk' i wixoqil, eh ruuk' i numoso. Eh wilik wo' kik'iim i nub'uurux, wilik chu'nchel chib'ih i ajwaal wach chi qeh, inki.

²⁰Eh re' mama' winaq je' wili xuq'or reh:
Re' hin suq nuk'ux chi nee taq tiooj woroq panupaat, ma' nee ta nukanaa' chi nee taq inawik'saj aq'ab' ayu' pank'ayb'al, eh nee taq i nuyeew aweh chu'nchel i ajwaal taq wach cha weh, inki.

²¹Eh re' mama' winaq xuk'am taqe reje parupaat xutz'aj i kooq xuyeew kiwa' kihaa', xuyeew wo' ch'ahn i rub'uuruux.²²Eh noq suq naq chik i kik'ux wilik taqe i winaq wilkeeb' chupaam i tinamit re' re' q'e' yiib' wach i kina'ojb'al xiooj k'oloq. Eh xkikotej riij i paat xtohq'ik kipaxem i koq i puerta je' wili i xkiq'or reh i mama' winaq ehchan reh i paat:
Chawesaj cho qeh i winaq xak'ul panapaat inqaaj chi nee qoh yohkik ruuk' junk'aam-oq, inki taqe.

²³Re' mama' winaq ehchan paat xelik cho chi kiq'orob'jiik je' wili i xuq'or keh:
Hat taq was nuchaaq' cha kuy maa a'n taq i mahk re' re'. Re' winaq wili xa wulaa' tii maa a'n taq reh i yiib' wach na'ojb'al re' re', inki.²⁴Re' reh wilik jinaj rixoqil ruch'ihil wixq'uun wo' hoq, eh jinaj wo' chik wixq'uun ma' q'orimaj ta ruum winaq. Re' taqe re' neenwesaj taq cha weh nee taq tiyokik kuuk' nee taq i na a'n kuuk' chib'ih jariik taq inawaaj. Xa re' la' maa a'n taq ruuk' i winaq wili taqe i yiib' wach na'ojb'al re' re', inki.

²⁵Eh re' taqe i winaq re' re' ma' kinimaj taj i xq'orarik keh ruum i mama' winaq. Je' re' noq re' i aj Levíta xresaj cho rij paat i rukab' rixoqil. Re' taqe i winaq re' re' xkichop ixoq jinaj aq'ab' xkixoqb'eej kore' chik koq'taaj chaloq noq xchalik rusaq'iik.²⁶Eh noq xchalik rusaq'iik re' ixoq chalik wo' chik ruuk' i rupaat i mama' winaq wilik wii' i rub'ahiil xk'ulik q'ehb'oq wach puerta ar xkahnik korehtaal xsaq'ik chi korik.²⁷Noq xwuktik chaloq i aj Levíta re' i ruwinaqiil xuteh i puerta noq ojik chik i rub'an i xrilow iruxoqil ar kutlik i koq wach puerta k'ahchi' naq runik'eem rutehariik i puerta.

²⁸Eh re' i winaq je' wili i xuq'or reh i rixoqil:
Wukteen taq reje, inki.
Eh re' ixoq ma' xchaq'wik taj ruum kamnaq chik, eh xuyeew reje i ruti'jolal i rixoqil chi riij i rub'uuruux, eh xooj reje parupaat.²⁹Noq xponik parupaat xuchop chaloq jinaj i q'aslaj ch'ihch' ruuk' i re' xuyok'ib'eej i ruti'jolal i rukamnaaq kab'laj xresaj. Eh xutaq'aaj reje ju'jun sahl i rutib'kaal i rixoqil chupaam i kitinamiit i ju'jun ch'uq chi aj Israel.³⁰Eh chu'nchel i xi ilwik reh i re', je' wili inkiq'or:
Xti korik noq ma' jank'al tamb'aan, ma' jank'al ta nqilow je' rukab' i wili i qelik cho Egipto. ¿Chib'ih i k'ahchi' ruk'ulariik? Re' wili ajwaal wach chi naa qakapaam riij chib'ih i naaqa'nam chi riij i wili, inki taqe. Re' q'aq'inik xb'aan kuuk' i riih rumaam i Benjamín

¹Chi riij i re' xkian jinaj wach kik'ux xkimol kiib' chu'nchel i winaq aj Israel chuwach i QaJaaw chupaam i ye'aab' Mizpa. Wilik xi chalik Dan, wilik i xi chalik, Beerseba, wilik i xi chalik Galaad.²Eh xkimol wo' kiib' haa' taqe i k'amal kib'eeh i ju'jun ch'uq chi aj Israel. Eh xkimol wo' kiib' chi kixilak i rutinamiit i Dios taqe i kijib' siento miil chi soldado xa chi kooq b'ehik inki a'n³Re' taqe i riih rumaam i Benjamín xkib'iraj rib'iral chi re' taqe i kuch aj Israel xkimol kiib' ar Mizpa.
Eh re' taqe i aj Israel xkipahqaaj reh i aj Levíta chi je' wili:
Chaq'or qeh nik' wach noq xb'aan ikaansanik re' re', inki taqe.

⁴Eh re' i aj Levíta i ruwinaqiil ixoq xkimik, je' wili i xuq'or:
Re' hin ximponik wuch'ihil i rukab' wixoqil chupaam i tinamit Gabaa re' wilkeeb' wii' i riih rumaam i Benjamín, reh chi xnupahqaaj jinaj aq'ab' nupatal ar.⁵Xa re' la' chupaam aq'ab' re' re', re' taqe i winaq wilkeeb' chupaam i tinamit xkikotej riij i paat wilkooj wii' chi patal xinkaaj naq kinkikansam. Eh kixoqb'eej i rukab' wixoqil, ruum i re' xkimik.⁶Ruum aj re', re' hin xnuyok'ib'eej paam i ruti'jolal, eh chi sahlal xnutaq'aaj reje chupaam i tinamit Israel reh chi neenkinab'eej i yiib' wach na'ojb'al re' re' xkian i aj Gabaa.⁷Re' taq i hat yu'naak i hat taq aj Israel inchol taq akapaam riij, inchol taq aq'orom chib'ih i ruk'ul chi naa rub'aan keh i chi riij i xkian re' re', inki.

⁸Noq xkib'iraj chi je' re', xkian jinaj wach kik'ux chi kunchelaal xipa'lojik johtoq je' wili xkiq'or:
Ma' jino'q qeh i hoj i naa rusutiniik reje parupaat, je' wo' hoq paru-itz'ihy naah paat.⁹Re' i naa qa'nam yu'naak re' chi naaqasik'im chi riij awach i narojiik chi q'aq'inik kuuk' i aj Gabaa.¹⁰Re' hoj laj taq chi winaq naaqesam ruuk' i ju'jun siento, jinaj siento naaqesam ruuk' i jinaj miil, jinaj miil i naaqesam ruuk' i lajeeb' miil, wilkeeb' chupaam i ju'jun ch'uq chi tinamit, reh chi neenkik'am kiwa' taqe i soldado. Eh re' taqe i kik'uliil nee kiooj chi q'aq'inik kuuk' i aj Gabaa korehtaal inkitoj wach i xiik' naah yib'kiil wach na'ojb'al xkian, inki taqe.

¹¹Je' re' noq xkian jinaj wach kik'ux, xkimol kiib' chu'nchel i winaq aj Israel reh chi xiooj chi q'aq'inik kuuk' i aj Gabaa.¹²Eh wilik taqe i aj taqareel xkitaq'aaj reje chupaam i tinamit wilkeeb' wii' i riih rumaam i Benjamín, eh xkipahqaaj chi je' wili:
¿Chib'ih reet noq xb'aan i xiik' naah yib'kiil wach na'ojb'al taq chaxilak?¹³Yu'naak chaq'asaj taq panq'aq'ab' i winaq wilkeeb' ayu' Gabaa i xikansanik reh ixoq, reh chi nee wo' taqe inqakansaj i keh, reh chi ma' nee ta chik imb'aan i yiib' wach na'ojb'al chi qaxilak i hoj, hoj aj Israel, inki taqe.
Eh re' taqe i riih rumaam i Benjamín ma' xkaaj ta kib'iram i xq'orarik keh kuum i kuch aj Israel.¹⁴Re' taqe i riih rumaam i Benjamín xkimol kiib' chi kunchelaal ar Gabaa reh chi xkitoq'aa' q'aq'inik kuuk' i kuch aj Israel.¹⁵Eh re' taqe i soldado xkimol kiib' chi q'aq'inik chi kixilak taqe i riih rumaam Benjamín waqiib' siento miil chi kiib'. Eh ma' xi ajaljik ta haa' i wuquub' siento i xsik'arik kiwach chi kixilak taqe i aj Gabaa.¹⁶Eh chi kixilak chu'nchel i winaq re' re' wuquub' siento taqe i sik'oj kiwach pantz'eet kikutwik xti tz'eht ikiq'ab' noq inkikut ab'aj ruuk' tolo'x atoob' ta k'isa rismaal nahis i neenkikut tz'eht inki a'n reh chi ab'aj.¹⁷Eh re' taqe i aj Israel xiooj chi q'aq'inik kuuk' i kuch aj Israel riih rumaam taqe i Benjamín kijib' siento miil taqe wilik kiq'aslaj ch'ihch' kuuk', chu'nchel i re' xti kichol q'aq'inik chi korik.

¹⁸Re' taqe i aj Israel xiooj ar Bet-el parupaat i QaJaaw Dios je' wili xkiq'or pan kitiij: Hat QaJaaw i qaDios cha k'uhtaaj qeh aha' wilik i junch'uq i naa rojiik chi q'aq'inik chi peet kuuk' taqe i riih rumaam i Benjamín, inki taqe.
Eh re' i QaJaaw Dios je' wili i xuq'or keh:
Re' i naa kojiik chi q'aq'inik chi peet re' taqe i riih rumaam Judá, inki.

¹⁹Je' re' noq re' taqe i aj Israel xi wuktik reje chi junwaar ar xooj kiyejaa' i ki-itz'ihy naah paat chuk'ulwaach i Gabaa.²⁰Eh xiooj chikiwach chub'anariik keh taqe i riih rumaam i Benjamín, eh xkiyejaa' kiib' reh i q'aq'inik.²¹Eh re' taqe i riih rumaam i Benjamín xi elik cho chi riij i tinamit Gabaa chi q'aq'inik, eh xkikansaj i kiib' ru ka'winaq miil chi kuch aj Israel.²²Chi riij i re', re' i aj Israel xkichop wo' chik kik'ux reh chi xiooj wo' chik chi q'aq'inik chupaam i ye'aab' xi ponik wii' chi q'aq'inik pampeet.²³Eh re' taqe i aj Israel xooj wo' chik kian kitiij chuwach i QaJaaw Dios wahq'eq xkitoq'aa' oq'ik, eh korehtaal xi okik q'iij xkipahqaaj reh i QaJaaw Dios chi je' wili: ¿Mi konaa wo' chik qojiik chi q'aq'inik kuuk' taqe i riih rumaam Benjamín re' taqe i quch aj Israel? inki taqe.
Eh re' QaJaaw Dios je' wili xuq'or keh:
Neerub'an chi nee taq tiooj q'aq'ineel kuuk', inki.

²⁴Je' re' noq re' taqe i aj Israel parukab' q'iij xiooj wo' chik chi q'aq'inik kuuk' i riih rumaam i Benjamín.²⁵Eh chupaam i rukab' q'iij re' re', re' taqe i riih rumaam i Benjamín xi elik wo' chik cho chi riij i tinamit Gabaa, xkikansaj i waxaqlaj miil chi soldado re' ruuk' taqe i aj Israel xti kichol q'aq'inik chi korik.²⁶Eh re' taqe soldado k'uch'ihil i tinamit Israel xiooj Bet-el chupaam i ru-itz'ihy naah paat i Dios, ar xkitoq'aa' oq'ik chuwach i Dios. Eh xkian kitiij chi ma' kianam ta kiwa' kihaa', chuwach i q'iij re' re' korehtaal xokik i q'iij, eh xkiq'asaj wo' k'atoj chikop chi kimayiij, je' wo' hoq i kimayiij k'amal kiib' panotob'il ruuk' i Dios.²⁷Eh chu'nchel i aj Israel xkian kitiij chuwach i Dios xkipahqaaj reh chib'ih i ruk'ul chi naa kianam. Eh chupaam taqe i q'iij re' re' ar wilik Bet-el i loq'laj kaxa molik wii' lajeeb' k'uhb'aal.²⁸Eh chupaam i q'iij re' re', re' i Finees rak'uun i Eleazar re' rak'uun Aarón wilik chi k'amal kib'eeh aj tiij. Re' taqe aj Israel je' wili xkiq'or:
¿Mi koruk'ul chi naaqojiik i iqal chi q'aq'inik kuuk' i riih rumaam i Benjamín re' taqe i quch aj Israel, oon ma' naa ta chik qojiik? inki taqe.
Re' QaJaaw Dios je' wili xuq'or:
Hiy taq chi q'aq'inik ruum re' hin i iqal i nuq'asaj taq panaq'ab' i tinamit re' re', inki.

²⁹Je' re' noq re' taqe ki soldado i aj Israel xkikotej riij i tinamit Gabaa.

³⁰Re' taqe i kik'uliil xkitus kiib' noq xiooj chi q'aq'inik kuuk' taqe i riih rumaam i Benjamín, nik' wach i xkian pampeet je' wo' chik re' i xkian paruka'peech.³¹Eh re' taqe i riih rumaam i Benjamín xi elik chi riij i tinamit Gabaa chi kik'ulb'ejiik i kuch aj Israel noq najt chik wilkeeb' ruuk' i tinamit xtohq'ik kikansam i kuch aj Israel chupaam i b'eeh inooj ar Bet-el, je' wo' chupaam i b'eeh inooj Gabaa. Ar kikansaj i lajeeb' ru ka'winaq chi soldado re' ruuk' taqe i aj Israel.³²Re' taqe i riih rumaam i Benjamín je' wili xkiq'or: Re' hoj k'ahchi' qa'nam keh, je' rukab', xqa'an keh pampeet, je' rukab' xqa'an keh paruka'peech, inki taqe.
Eh re' taqe i kuch aj Israel k'ahchi' reje kojiik chi najt ruuk' i tinamit xa re' nkaaj chi re' taqe i riih rumaam i Benjamín xi elik reje chupaam i tinamit Gabaa.

³³Eh re' taqe i riih rumaam i Benjamín xa chi ma' keht'al noq xkitus kiib' taqe kuch aj Israel reh chi naakokiik chi q'aq'inik kuuk' ar Baal-tamar. Eh re' taqe i soldado kikeb'aam kiib' chi junsuut i tinamit Gabaa xi elik cho pan kiye'aab' kikeb'aam wii' kiib'.³⁴Eh lajeeb' miil chi soldado i sik'ooj kiwach chi kixilak i aj Israel xti kow kiib' chi q'aq'inik xkitoq'aa' q'aq'inik chupaam i tinamit Gabaa. Eh ma' k'ahchi' ta naq kikapaam k'isinoq taqe i riih rumaam i Benjamín chi naa rusachariik kiwach.³⁵Re' QaJaaw Dios xutoob'eej taqe i aj Israel reh chi xkian reh taqe i riih rumaam i Benjamín. Eh chupaam i q'iij re' re' hoob' ru ka'winaq miil ruuk' jinaj siento chi soldado i xkikansaj re' ruuk' taqe i riih rumaam i Benjamín.³⁶Eh noq xkilow taqe i riih rumaam i Benjamín chi k'ahchi' chik rub'aan keh. Re' taqe i aj Israel xkimol ti chik chi elik xkian kiib' ruum ch'iklik kik'ux chi naa kiko'ljiik kuum taqe i soldado kikeb'aam kiib' chi junsuut i tinamit Gabaa.³⁷Re' taqe i kikeb'aam kiib' re' re' chi ma' keht'al taqe i aj Gabaa xi okik chi q'aq'inik ar. Eh xkuxik kikansam ruuk' q'aslaj ch'ihch' chu'nchel i wilkeeb' chupaam i tinamit Gabaa.³⁸Re' taqe i xkikeb'aa' kiib' xkian jinaj wach kik'ux kuuk' i aj Israel re' taqe i kik'uliil chi re' i rehtalil chi kichopom chik naah i tinamit Gabaa re' chi naakilom i ma' k'isa sib' naa rujohtiik johtoq chupaam i tinamit re' re'.

³⁹Eh re' taqe aj Israel i xkimol chi elik xkian kiib' chikiwach taqe i riih rumaam i Benjamín. Eh chupaam i q'iij re' re', re' taqe i riih rumaam i Benjamín xkikansaj i lajeeb' ru ka'winaq chi kuch aj Israel. Je' re' noq xkiq'or chi je' wili: Yu'naak naa wo' chik qa'nam keh je' rukab' i xqa'an keh pampeet, inki taqe.⁴⁰Eh noq xitz'ehtanik cho chikiij xkilow chi ma' k'isa sib' i k'ahchi' reliik johtoq chupaam i tinamit Gabaa. Eh re' taqe i riih rumaam i Benjamín ma' k'isiin ta xsahchik kik'ux.⁴¹Eh re' taqe i aj Israel xi sutinik cho chikiij xkitoq'aa' wo' chik q'aq'inik kuuk' i riih rumaam i Benjamín noq xkikoj rehtaal i riih rumaam i Benjamín chi naa rusahchiik kiwach ma' k'isiin ta noq xchalik kiyo'jiik.⁴²Re' chik taqe i riih rumaam i Benjamín xkimol chi elik chikiwach i kuch aj Israel, ar xkimol reje chupaam i b'eeh inooj panchiq yuuq', eh ma' nkikuy ta chik i q'aq'inik. Eh re' taqe i aj Israel k'achi' chokeliikpan tinamit Gabaa tiklik kikansam taqe i riih rumaam i Benjamín.

⁴³Eh re' taqe riih rumaam i Benjamín sutjik kiij kuum i kuch aj Israel. Eh xi ajimjik reje korehtaal xi ponik reqaroq intohq'ik reje wii' i tinamit Menúha, korehtaal xi ponik reqaroq parelb'aal q'iij reje reh i tinamit Gabaa.⁴⁴Eh waxaqlaj miil chi soldado i xkikansaj re' ruuk' taqe i riih rumaam i Benjamín. Eh re' taqe i aj Israel xib'anik, re' ruuk' i xti kichol q'aq'inik chi korik.⁴⁵Eh re' chik taqe i riih rumaam i Benjamín junch'uq xkimol chi elik xooj kikeb'aa' kiib' chupaam i paat ab'aj wilik ar Rimón. Xa re' la' ho'oob' miil chi winaq i xi kanteesjik kuum i kuch aj Israel. Eh re' taqe i aj Israel xkajimaj wo' chik reje ko kiib' miil wo' chik chi winaq i xkikansaj.⁴⁶Re' taqe i aj Israel chupaam i q'iij re' re' ho'oob' ru ka'winaq miil chi soldado re' ruuk' taqe i xti kichol q'aq'inik re' ruuk' taqe i riih rumaam i Benjamín.⁴⁷Eh waqiib' siento taqe i re' ruuk' i riih rumaam i Benjamín xkimol chi elik xooj kikeb'aa' kiib' waq'iib' poh xi kahnik pampaat ab'aj wilik ar Rimón.

⁴⁸Eh re' taqe i aj Israel xiooj chupaam chu'nchel i tinamit wilkeeb' wii' i riih rumaam i Benjamín, eh xkuxik kik'atam. Eh xik'ik kikansaj chi q'aslaj ch'ihch' taqe i winaq chupaam i ju'jun chi tinamit. Eh xik'ik kikansaj taqe i chikop xkuxik wo' kikansam chu'nchel taqe i xik'ik kireq pan kib'eeh. Re' noq xik'ihaaxb'ik taqe i riih rumaam i Benjamín

¹Re' taqe i aj Israel xkiq'or i xti korik ar Mizpa chi ma' jino'q keh i naa ruye'em q'ab' chi naa rub'anam kaxáro i kixq'uun kuuk' i kak'uun i riih rumaam i Benjamín.

²Chi riij i re' chu'nchel i aj Israel xkimol kiib' Bet-el ar xi wihik chuwach i QaJaaw Dios chuwach i jinaj i q'iij korehtaal xokik i q'iij, oq'ik inki a'n k'erik kichii' je' wili xkiq'or:

³QaJaaw Dios, re' hat i QaJaaw i hoj aj Israel ¿Chib'ih reet i xqak'ul chi je' wili? ¿Chib'ih reet noq naa rusahchiik wach i junch'uq chi aj Israel chi qaxilak? inki taqe.

⁴Eh chi junwaar chik kowahq'eq xi wuktik, xkiyejaa' jinaj i artaal. Eh chinaah i re' xkiq'asaj i k'atoj mayiij, je' wo' hoq i kimayiij k'amb'al kiib' panotob'il ruuk' i QaJaaw Dios.

⁵Re' taqe i aj Israel k'ul xkipahqaaj chikiwach chi je' wili:
¿Mi wilkeeb' i qakomoon ma' xi ponik ta haa' noq xqamol q'iib' ar Mizpa chi loq'oonjiik i QaJaaw Dios? Re' hoj xqaq'or i xti korik ar chi ruk'ul chi naa kikahtesjik awach i ma' xi ponik ta haa' Mizpa, inki taqe.

⁶Eh re' taqe i aj Israel ma' k'isiin ta xtib'ik kik'ux ruum i xkik'ul taqe i riih rumaam i Benjamín kuch aj Israel, je' wili i xkiq'or: Yu'naak aj re' xsahchik wach i junch'uq chi aj Israel chi qaxilak i hoj aj Israel, inki taqe.⁷Eh ¿Chib'ih i naa qa'nam reh chi neenwihik kehk'een taqe i riih rumaam i Benjamín i koxikahnik chi k'achalkeeb'? Re' hoj qaq'orom chik i xti korik chi ma' naa ta qaye'em q'ab' chi naa kianam kaxáro i qixq'uun kuuk', inki taqe.

⁸Eh je' wo' chik wili i xkiq'or chikiwach: ¿Mi wilik jino'q chi qaxilak i hoj, hoj aj Israel i ma' xponik ta haa' noq xqamol qiib' chuwach i QaJaaw ar Mizpa? inki taqe.
Eh xkireq chi riij chi re' taqe i wilkeeb' ar Jebes-galaad, ma' xi ponik ta haa' noq xkimolkiib' ar.⁹Noq xik'ik i kib'ihnaal i ju'jun ch'uq chi tinamit xi ponik ma' jino'q keh i aj Jabes-galaad wilik ar.¹⁰Eh noq xkilow chi je' re' taqe i kimolom kiib' ar xkisik' wach i kab'laj miil chi soldado, re' ruuk' i xti kichol q'aq'inik, je' wili i xkiq'or reje keh:
Yu'naak naa taq awojiik ar Jabes-galaad nee taq inkuxik akansam chi q'aslaj ch'ihch' chu'nchel i patim ar chi ixoq, chi ha'lak'uun.¹¹Eh nee wo' taq i naakansaj taqe i winaq, je' wo' taqe ixoq wirinaq chik taqe ruuk' winaq, inki taqe.

¹²Eh chi kixilak taqe i patim ar Jabes-galaad xkireq i kijib' siento taqe i kok' q'ahxoq ma' keht'al ta wach q'orinik winaq. Eh xkik'am chaloq i wilkeeb' wii' i itz'ihy naah paat ar Silo wilik ar Canaán.¹³Chi riij i re' chi kunchelaal i aj Israel xkitaq'aaj kisik'ariik taqe i riih rumaam i Benjamín kikeb'aam kiib' chupaam i paat ab'aj wilik Rimón. Eh xkiyuq'eej kuuk' chi naa kik'amam kiib' panotob'il.¹⁴Eh re' taqe i riih rumaam i Benjamín xi sutinik wo' chik chaloq. Re' taqe i kok' q'ahxoq ma' xkikansaj ta ar Jabes-galaad xkiqasaj chi kehk'een taqe i riih rumaam i Benjamín, xa re' la' ma' xmanlojik ta keh i kok' q'ahxoq.

¹⁵Re' taqe i aj Israel q'e' ti' xkik'raaj taqe i riih rumaam i Benjamín re' kuch aj Israel ruum sahchik naq chik wach chi kixilak.¹⁶Re' taqe i aj Israel k'ul xkipahqaaj chikiwach chi je' wili:
¿Aha' chik neenqareq kehk'een taqe i riih rumaam i Benjamín ruum kuxik kikimiik chu'nchel ixoq chi kixilak?

¹⁷Re' taqe junch'uq chi riih rumaam Benjamín inchol kichopom naah i ye'aab' ye'ooj keh reh chi ma' nee ta xsahchik kiwach chi qaxilak, inki taqe.¹⁸Xa re' la' re' hoj ma' nee ta rub'an chi neenqayeew keh i qixq'uun chi neenkian kaxáro kuuk', ruum chi qunchelaal i hoj aj Israel qaq'orom xti korik chi awach i xuyeew i rixq'uun chi kehk'een taqe i riih rumaam i Benjamín naa ruye'ariik panti' k'axik.¹⁹Re' hoj qeht'al noq rajlaal haab' imb'aan i nimlaj ninq'iij loq'oomb'al reh i QaJaaw Dios pan tinamit Silo, wilik pantz'eet reh i Bet-el, parelb'aal reje i q'iij reh i b'eeh inik'ik reje Bet-el inooj Siquem pansak'aaj reh i tinamit Lebona, inki taqe.

²⁰Eh re' taqe i k'amal kib'eeh i aj Israel wilik i xkitaq'aaj ruq'orariik keh i riih rumaam i Benjamín je' wili i xkiq'or:
Yu'naak hiy taq chakeb'aa' awiib' chi kixilak i uuva tikooj ma' najta ruuk' i Silo.²¹Eh xti chakoj taq rehtaal noq neekiokik chi soon taqe i kok' q'ahxoq chi kitzuhb'aal, nee taq ti elik reje i hat aha' taq akeb'aam awiib'. Eh nee taq i nawelq'aaj reje ju'jun-oq aweh taqe i kok' q'ahxoq re' re', eh nee taq tiooj chi jumehq'iil panatinamiit.²²Eh wila' xiooj k'oloq quuk' taqe i kituut kajaaw, oon re' taqe i kas i xq'un re' re' chi rujalariik, re' hoj je' wili i neenqaq'or keh: Re' hoj inqapahqaaj taq otob'il aweh cha kanaa' taq awixq'uun chi kehk'een ruum re' hoj xoj ponik q'aq'ineel Jabes-galaad eh ma' xqareq ta cho kehk'een chi kunchelaal. Eh ma' re' ta taq i hat xat ye'wik keh awixq'uun ruuk' i re' ma' xaq'at ta taq wach i k'uhb'aal qoh ko'q keh, inki taqe.

²³Eh re' taqe i riih rumaam i Benjamín xukul kik'ux i xq'orarik keh. Eh xiooj wo' hoq xkelq'aaj wo' cho ju'jun keh i q'ahxoq xi elik cho chi soon. Chi riij i re' xi sutinik reje pan kitinamiit, eh xkiyejaa' wo' chik ruka'peech i kitinamiit xi okik wo' chik chi patinik ar.

²⁴Eh chu'nchel i aj Israel xi sutinik wo' chik reje chupaam i ju'jun ch'uq chi kitinamiit chi kiju'junaal, re' wo' xi elik cho wii', re' wilkeeb' wii' i awach keh.²⁵Eh chupaam taqe i q'iij re' re' komajaa' chih reey ar Israel. Re' naq inki a'n chi kiju'junaal inkaaj i keh.

Bible Society in Guatemala

https://app.library.bible/content/695aa4b9f902778f