Zekaria7
1Mang Darius chowm mang mih tali ning nga taku la (Hebraiuüa tek pe Chislev la mih) tali ni khe CHAKRAMANG laiklow dow Zekaria tut-e uang ting khai.2Nami khin khe lang kri lang kraing mih CHAKRAMANG kim kowi kowh uowi mih uamowuüa hai risiuüa tut-e nakowlü prasira kownkow Bethel kowi kowh maru-uüa mih kowchin maru khai. Amatni kowchinah mih maru-uüa dow Sharezer hown Regem-Melek hown amatni kowh maru-uüa kowi chekhai. Now nami maru-uüa dow uamowuüa hai risiuüa kowi kowlüntaah mih, “Ning kawmma anging awr sunla reng khowk iawng dow tanga la mih kowi hawm khang hown kar hown nguk hown anging nasun iawk kown bow?” pakhai.4Nami khin khe lang kri lang kraing mih CHAKRAMANG laiklow dow ang tut-e uang towm khai. CHAKRAMANG tek mih,5“Juda pren kowi kowh maru maten hown uamowuüa kowi kowtek pe dit: Ranitkawm ning mowr tanga la hai ranit la kowi kowh hawm khang hown kar hown nguk hown enni sun mih dow ang vüi kowi kowh enni sun mih nadowi chekhai.6Now enni cha enni kham khe paw enni matia mu duh müa enni cha enni kham mih chowtaih.7Jerusalem hown ariaret kowi kowh marow kowi maru akawmma uowi khai. Naiawngün marow mih lainowmma awr iuksown khai. Nami klen kowi Negeb hown satkup prakowi kowh awkaw kowi paw maru atekma uowi khai. Nami khin khe paw maiawngün ang kowh laiklow alai kowh risiuüa tek khowk nadowi bow?” pakhai.8Now CHAKRAMANG kutplan tek ang iawk mih,9“Alai khe paw ang maru-uüa kowi maiawng ang tek pe khowk, ang tek pe mih, ‘Tara anowmma chetah büah; lowkkowlowk kaah sakowm iawng uowiah büah, tasaksing sanara atekma hown uowiah büah. Mamaimow, saratchow, prenlang maru hown ngarai miuüa kowi hang chang nowng büah; lowkkowlowk hang talima kuaichai büah,’ pakhai.11Nachenganchepaw ang maru-uüa mih naiawngün lai nau sünta ang büah dowi; amatni dow laimiama chekhai. Amatni dow dangta ang kung hanow hang pacham ta lah pakowh param paw pitta büah khai.12Ari-arow paw chün büah kown nau dowi kowh amatni kowh sak mih huaklu iawng akhawtma changah büah khai. Ang, lang kri lang kraing mih CHAKRAMANG, ang lümla hown kowh alai kowh risiuüa kowi ang pe tekah mih laiklow paw sünta büah dowi. Naiawng rakowi amatni luk kowi lainowmma ang kunmarauah khai.13Amatni kowi ang hawah khe paw sünta ang büah dowi. Naiawng kowh amatni haw ang khe paw ang sünta pe dowi chekhai.14Amatni kowi mih akeng chenchapuüa tut-e ang cham pe tasetah khai. Nami kung kowi amatni kowh pren dow akhaw aklaima chekhai. Nakowi dow amiapaw iu mang awr mang mih khowm hing uowi dowi chekhai. Naiawng hai amatni kowh pren klangiungma mih dow akhaw aklaima changah büah khai,” pakhai.
The Seed Company