Zekaria6
1Nami kung kowi ang plan tang mü hanow ang khi kawrnga kari tali klüng. Naiawngün kawrnga kari dow hungh pre buk mih takra hownia kowh uang lawt mih chekhai. Nami hungh pre buk mih dow kri hungh chekhai.2Naiawngün kawrnga kari tali klüng mih dow aringma mih kawrnga kangowh küngah mih lowk, anumma mih kawrnga kangowh küngah mih lowk,3akawma mih kawrnga kangowh küngah mih lowk, now asauthuama mih kawrnga kangowh küngah mih lowk chekhai; kawrnga maten dow akürma kangowh chekhai.4Nahanow auown hownia kowh ang hown taklang mih kramamu kowi ang lüntaah mih, “Aw chakramang, naiawngün auan tawng chow?” pakhai.5Now aia klang ang mih, “Naiawngün dow pren tali tingnui pra kowh cham kowi mih li chowbowt; amatni dow palusama kowh CHAKRAMANG pur hownia uang lawt mih chekhai.6Anumma mih kawrnga kari dow tawngphak pra kowh cham kowi mih, akawma mih kawrnga kari dow satkup pra kowh cham kowi mih, now asauthuama mih kawrnga kari dow mrawkphak pra kowh cham kowi mih chekhai,” pakhai.7Akürma mih kawrnga hawmh dow uang lawt hanow palusama kowi nacham krawi mü kownkow lainowmma sakkrowng khai. Naiawng rakowi kramamu tek pe mih, “Tarü büah bowt, palusama kowi tawng ngai chow own mih cham krawi mü büah bowt,” pakhai. Now amatni dow palusama kowi cham krawi mü kownkow tarü khai.8Nahanow kramamu haw ang now tek ang mih, “Sünta, tawngphak pra kowh cham kowi miuüa dow CHAKRAMANG kowh kunmaraura prowngta pe khai bowt,” pakhai.9Nami kung kowi CHAKRAMANG tek ang mih,10“Babulawn pren kowi kowh cham takhang mih Helem, Tobija hai Jedaia büah uang plan khowk. Kowbüah tut-e kowkowi hanow kuh hown tai mih kowpaw diah. Now nami ni kowi Zefania chapa Josia kim kowi kowkowi diah. Now nami kuh hown tai mih thawpla mang lukruk diah, now nami mang lukruk mih Jehozadak chapa Josua lu kowi kruk pe diah.12Now Josua kowi tek pe dit, ‘Lang kri lang kraing mih CHAKRAMANG tek mih: Mami dow Mia Prek pape mih maru chekhai; nami Mia Prek dow aiamat uowi rah hownia naawr iuksown hanow nathawp CHAKRAMANG chup kim kown.13CHAKRAMANG chup kim dow aia mih nachang ngengche kown. Aia kowi dow mang kiowrira napeah kown; aia dow mang chowm rah kowi nachowm hanow nakruitown pren kown. Aia dow uamow iawng aia mang chowm rah kowi nachowm kown; naiawng rakowi mang rah hai uamow rah, arah pre buk mih dow thaulangma hown aia nachün kown,’ pape diah.14Now Helem, Tobija, Jedaia hai Zefania chapa Josia büah kowi tukla reng kownkow rutmit iawng mang lukruk dow CHAKRAMANG chup kim kowi natowah kown,” pakhai.15Zekaria kutplan tek mih, “Alakma kowi kowh uowi miuüa nauangah hanow nauang khowng CHAKRAMANG kim chang kown. Nami khin khe dow lang kri lang kraing mih CHAKRAMANG enni tut-e uang chin ang mih pami enni natuk kown. Tawkchedow enni kowh CHAKRAMANG Thurai lai süngürma hown enni chün khü chiang naiawngün maten nauang phawh bowk kown,” pakhai.
The Seed Company