Zekaria8
1Now lang kri lang kraing mih CHAKRAMANG laiklow dow Zekaria tut-e uang plan ting khai iawk.2CHAKRAMANG tek pe mih,“Jerusalem marow klangiungma mih kowi lainowmma ang sakrauah khai.Naiawng rakowi amatni kowh ransu-uüa luk kowi nowm nowm ang kunmarau khai.3Zaiawn marow kowi ang uang plan khowk,nakowi kowh hungh kowi ang nauowi reng bowt kown.Jerusalem marow kowi dow ‘anowmma mih marow’ napape bowt kown,lang kri lang kraing mih CHAKRAMANG hungh kowi dow ‘hungh chimsai’ napape bowt kown.4Jerusalem marow kowi lawngtang matanguüa nauowi iawk kown.Amatni dow raitua dowkma kangowh marow lak kowi thaulangma nalen büah kown,now akuangma mih arah kowi nachowm büah iawk kown.5Marow kowi kowh viadawng kowi ngeuüa hawmh nauowi iawk kown,nakowi dow ngeuuüa hawmh akawmma chi nangawk iawk kown.6Tawkche sing uowi reng tak miuüa tuak kowi dow naiawngün nauang phaw kown mih lainowmma krat chepaw naia kown,ang tut-e dow nami tawngpaw krat dowi chekhai.Ang mukuang siphaiuüa kowh CHAKRAMANG tek khowk.7Satlawt pra kowh pren hownia ang maru-uüa kowi ang nauang lawngla kown.Satkup pra kowh pren kowi cham takhang mih ang maru-uüa kowi paw ang nauang plan pawla kown.8Amatni kowi dow Jerusalem marow kowi ang nauang plan pawla iawk kown.Amatni mih ang maru nachowng büah kown,nahanow ang dow amatni kowh Thurai nachowng kown;amatni tut-e kaah sakowmma hai anowmma ang nauowi pe kown.9“Ang lang kri lang kraing mih CHAKRAMANG tek khowk,ang kowh kim nathawp kownkow uown phük kimchüng howniamami laiklow maten risiuüa tekla khowk chekhai.Kawmat paw nami laiklow iawng enni ta khai iawk.Naiawng rakowi sakkhawtma uowi büa diah,ang kowh kim chimsaima mih enni nowng chang kown taih.10Nami lup uown dowi rawn khe dow sukkri kha pek müa khowm ka büah dowi chekhai,lup chang müa tawncher nga kha pek müa paw ka büah dowi chekhai.Nami klen kowi amatni lala kowi ang towkah ran khai.Naiawng rakowi ransu-uüa kowi kram hai thaulangma ia uowi büah dowi.Amiapaw asowrma cham ia mang cham ia kat büah dowi chekhai.11Tawkche kawmat dow alai khe kowh iawng nadowi bowt,kawmat kowh sing uowi reng tak miuüa kowi dow alai khe kowh iawng ang nachangah kown nadowi bowt.12Nami maru-uüa dow thaulangma nasawt liu bowt kown;grep ruih kowi dow uih achakma nauowi bowt kown.Mukuang hownia uang nauang kown,now krawng kowi mih luprak ahuma nauowi kown.Naiawngün prasira maten dow kawmat kowh ta sing uowi miuüa atungma naka bowt kown.13Aw Juda hai Israel maru-uüa, maru cham pe piati towng,‘Juda hai Israeluüa iawng pacham ownah’ padow maru rükla enni khai.Nachenganchepaw kawmat hownia ang nalawng enni kown,now maru cham tape prasi towng,‘Juda hai Israeluüa iawng pacham ownah,’padow maru narükla enni bowt kown.Naiawng rakowi hangkow kram büah,sakkhawtma uowi büah rowt diah.14“Enni pipu-uüa dow towk ang kunmarau khai.Nami khin khe naripah kownkow ang kamrüt khai,now ang kamrütta mih iawng ang ripah khai.Nachenganchepaw kawmat dow hangkow kram büah,ang, lang kri lang kraing mih CHAKRAMANG tek khowk.Jerusalem hai Juda maru-uüa kowi ang napeah iungra kown,amatni kowi ang napeah iungra kownkow ang kamrütta khowk.16Tawkchedow maiawngün ang alow pek enni chün kown takla:Lowkkowlowk tatek lainowm büa diah,tara chetra kowi tara nowm chetah büa diah.Nahanow enni tut-e taking tasangra nauowi kown.17Lowkkowlowk hang talima kuaichai büah,now hang thuak dai lai saksi büah.Ang CHAKRAMANG, naiawngün maten ang sui,” pakhai.18Lang kri lang kraing mih CHAKRAMANG tek ang iawk mih,19“Tali la, tanga la, ranit la hown hamüt la kowi khang hawm büa diah,naiawngün hawm khang dow Juda maru-uüa vüi piawra naown kown.Amatni dow awmrawmma hown iungra pawi nasun büah kown.Tawkchedow anowm hai taking tasangra kowi nauah büa diah.20“Marow ahuma hownia Jerusalem kowi maru akawmma nauang kown mih khin nauang ting kown.Nami khin khe dow chen towng chap towng maru akawmma Jerusalem kowi nauang kown.21Alowk mih marow kowi kowh uowi mih maru dow alowk mih marow kowi kowkowiah hanow kowtek kown mih,‘Chu, lang kri lang kraing mih CHAKRAMANG prasira i kowlü lah.Aia kowi nakowchup kownkow i kowkowi lah,’ napa büah kown.Nami khin khe tawngbak mih dow,‘Ang paw tawi kown,’ napa büah kown.22Nauang chupiia ang kownkow akürma mih chenchapuüa nauang kown.Ang prasira nauang lü kownkow maru akawmma nauang kown.23Nami khin khe dow maiawng nauang own kown:Akeng chenchap hamüt ia chi Juda maru lowk ia tut-e nauang kown,now Juda maru uanmawm kowi krawi tadowk se nakrawi tek kown mih,‘Enni tut-e Thurai uowi pami anging ta.Naiawng rakowi enni tut pawla anging dit,’ napa büah kown.Ang lang kri lang kraing mih CHAKRAMANG,mami laiklow ang tek khowk,” pakhai.
The Seed Company