Tarüa18
1CHAKRAMANG tek pe Arawn mih, “Taklowp taklangra te kowi kowh lup chang lawnguan kowi atawi ama uowi mih srui dow en, en kowh chapauüa hai enni Levi krungchakuüa kowi ang natang enni aprek kown. Nachenganchepaw uamowuüa kowh lup chang lawnguan kowi kowh atawi ama uowi mih srui dow en hai en kowh chapauüa kowi chowtaih ang natang enni aprek kown.2En matia krungchak Leviuüa kowi uang pawla diah. Amatni dow en hai en kowh chapauüa kowi taklowp taklangra te kowi kowh lup srui pacham tawi khowng enni lah.3Amatni dow en nimkrüa kowi nauowi büah hanow taklowp taklangra te kowi kowh lup srui nachang büah kown. Tawkchedow chimsaima mih uanh hai phuchuara re-e tawi ia tatawn büah kown nadowi. Amatni che naiawngün re-e tawi tatawn khai hanow amatni hailawm enni kowi paw nakowngta enni bowk kown.4Amatni dow natawi khowng en lup chang reng kown; taklowp taklangra te naming nakhet kown mih kurdik dow amatni luk kowi nauowi kown. Tawkche Levi chenchap klen kowi dow miapaw nauang ia tawi khowng en kown nadowi.5Israeluüa luk kowi ang kowh kunmaraura naplan tatüngla dowi bowt kownkow taklowp taklangra te hai phuchuara naming nakhet kown mih kurdik dow enni luk kowi nauowi kown.6Leviuüa kowi dow Israeluüa pungmadawng hownia ang lang ruita enni mih chowbowt. Now amatni kowi dow awmrawm sung iawng hai ang peta enni mih chowbowt. Taklowp taklangra te kowi naia changla lup kownkow amatni kowi dow ang tut-e apta khai bowt.7Nachenganchepaw taklowp taklangra te kowi kowh Lang Chimsai Mih Arah kowi hai phuchuara kowi kowh lup dow en hai en chapauüa chowtaih naia chang kown. Tawngplawng kowchow panow nami dow uamowuüa kowh lup chekhai. Uamow rah dow ang pe enni mih chowbowt. Uamow klen kowi chimsaima mih uanh re-e uang mih maru kowi dow nakowngta kown takla,” pakhai.8Nami kung kowi CHAKRAMANG tek pe Arawn mih, “Ang kowi kowh Israeluüa uang pe ang mih chimsaima mih uanap maten luk kowi achang takla iawng nachang kown mih kurdik ang peta en mih chowbowt. Naiawngün chimsaima mih uanap maten en hai en krungchakuüa kowi chowngchowng saksakma vüi ang peta mih chowbowt.9Kawmdi uanap, angak lawt lük müa uanap, aprek sung uanap vüi kowi kowh Israeluüa uang pawla mih uanh srui dow achimsaima chekhai. Naiawngün uanap hownia maih kowi tikla dowi mih srui dow enni kowh vüi bak naown kown. Naiawngün dow en hai en krungchakuüa vüi chowngchowng saksakma vüi bak chekhai.10Naiawngün uanh dow arah chimsaima mih kowi enni nacham chaah kown. Tawkchedow kachakuüa ngetchow taih naiung cha kown. Naiawngün dow achimsaima pahai enni natuakah kown takla.11“Amülüngma mih uanap kowi kowh Israeluüa uang pawla mih uanh srui paw en vüi chekhai. Naiawngün dow en hai en krungchakuüa vüi chowngchowng saksakma vüi bak ang peta enni mih chowbowt. Naiawngün uanh dow en hai en kimchak kowi kowh masiuüa kachakuüa bowkbowk naiung cha kown. Tawkche naiawngün uanh dow enni pungmadawng kowi kowh asürlawkma nadowi miuüa chowtaih naiung cha kown.12“Israeluüa mih amatni chowlowkkow kheti bakan hownia uih müng pau müng kowi kowh kanrawn sau, grep tui sar hai uih-ak maten ang tut-e nauang pawla kown. Naiawngün kowi kowh lang iung mih srui dow ang nape en kown.13Ang tut-e kowh Israeluüa uang ap-ah mih luprak müng maten dow enni kowh naown kown. En kimchakuüa pungmadawng kowi kowh chimsaima uowi miuüa chowtaih naiawngün uanh naiung cha kown.14Israeluüa pungmadawng hownia CHAKRAMANG kowi apta mih uanh srui dow en kowh naown kown.15“Ang CHAKRAMANG tut-e kowh Israeluüa uang ap-ah mih chapa ta maten hai tawncher kowi kowh rik pen mih ala maten dow en kowh naown kown. Nachenganchepaw chapa ta maten kowi mih amatni kowh u-pa kowi en nape klanah ngengche kown takla. Now sürlawkma mih tawncher hownia kowh rik pen mih ala maten kowi paw tawncher iah kowi en nape klanah kown takla.16Chapa ta kowi dow uang dia kung kowi ala chih khowk hanow khowmta bowkta khowk iawng tai tanga iun hown en nape klanah kown. Tai paiun dik dow taklowp taklangra te kowi kowh akhai müa hown khaiah now hamüt gram chekhai.17Nachenganchepaw tawncher kowi kowh rik pen mih ala chah dow chia chepaw, ruapur chepaw, rua chepaw en nape klanah kown nadowi. Tawngplawng kowchow panow naiawngün dow ang vüi lang krata khowk chekhai. Naiawngün tawncher vi dow phuchuara luk kowi en nathetah kown, now asau dow chakkham uanap en nachangla kown. Nami uanap nam hown dow CHAKRAMANG awmrawm reng chekhai.18Amülüngma mih uanap kowi kowh sakowuh nga hai hawmlawm thung nga iawng naiawngün tawncher nga dow en kowh kakbak naown kown.19Ang CHAKRAMANG vüi kowi kowh Israeluüa uang pawla mih chimsaima mih uanap srui dow en hai en krungchakuüa vüi chowngchowng saksakma vüi bak ang peta enni mih chowbowt. Nami dow en hai en krungchakuüa hown kowh chowngchowng saksakma vüi katpaw taklowi dowi bowt mih ang kowh sangbowk laitawm chekhai,” pakhai.20Nami kung kowi CHAKRAMANG tek pe Arawn mih, “Israeluüa pren kowi en natawi ka powng dawngthawnguan kown nadowi, now krawng bawn paw en natawi ka powng kown nadowi. Israeluüa pungmadawng kowi ang towbowt en kowh kakbak; ang towbowt en kowh dawngthawnguan.21“Lowra chap hamüt bak kowi pabak Israeluüa pe ang mih dow Leviuüa kowi ang peta mih chowbowt. Naiawngün dow taklowp taklangra te kowi chang lup büah mih takcha naka büah kown.22Kawmat hownia bowt now taklowp taklangra te re-e akeng mih Israeluüa uang ia uang kown nadowk. Amatni che uang khai hanow amatni kowh ngak sung dow amatni nakur kown, now nakowng büah kown.23Taklowp taklangra te kowi nachang lup kown mih dow Leviuüa chowtaih, now nami lup kowi atawi ama uowi mih sung paw amatni chowtaih naka ripra kown. Nami dow chowngchowng saksakma vüi ari arow naown kown. Akeng mih Israeluüa pungmadawng kowi Leviuüa dow natawi ka powng dawngthawnguan kown nadowi.24Nami takcha dow Israeluüa pungmadawng hownia kowh hamüt bak kowi pabak uang ap ang mih uanh naka büah kown. Nami dow amatni kowh vüi bak ang peta mih chowbowt. Naiawng rakowi ang CHAKRAMANG tek khowk, Leviuüa dow akeng mih Israeluüa pungmadawng kowi natawi ka powng dawngthawnguan kown nadowi,” pakhai.25Nami kung kowi CHAKRAMANG tek pe Mosi mih, “Mami laiklow Leviuüa kowi kowtek pe diah, ‘Hamüt bak kowi pabak CHAKRAMANG vüi kowi kowh Israeluüa uang ap-ah mih dow CHAKRAMANG peta enni mih chowbowt. Naiawng enni ka kung kowi enni kaah mih hownia changah hamüt bak kowi pabak mih dow CHAKRAMANG vüi enni nauang ap kown takla.27Nami uanap dow enni matia kowh üa hai laih hownia kowh luprak iawng, now enni matia küaah mih grep tui iawng CHAKRAMANG nadowk enni kown.28Akeng mih Israeluüa hownia hamüt bak kowi pabak enni naka kown mih hownia enni paw hamüt bak kowi pabak mih CHAKRAMANG tut-e enni nauang ap-ah kown takla. Nami enni uang ap ang mih dow uamow Arawn rut kowi enni napeah kown.29Lowra chap enni kaah mih hownia lang iung mih dow CHAKRAMANG kowh kakbak kowi enni napeah kown takla.30“‘Lang iung mih uanh enni peta CHAKRAMANG mih dow enni matia üa hai laih hownia kowh uanh iawng hai kowmatia küaah mih grep tui iawng CHAKRAMANG nadowk enni kown. Now peta kung kowi kowh ta lat mih maten dow enni matia vüi towbowt.31Naiawngün dow enni hai enni kowh kimchakuüa lowra re-e naiung cha kown. Tawngplawng kowchow panow nami dow taklowp taklangra te kowi enni chang lup mih sung chekhai.32Naiawngün dow naiawng enni cha chepaw enni kowh aprek nauowi kown nadowi. Tawngplawng kowchow panow lang iung mih hai lang chimsai mih dow CHAKRAMANG kowi enni peta khowk chekhai. Tawkche naiawng enni rik peah mih dow lowra re-e enni cham chata khai hanow Israeluüa uang ap-ah mih uanap chimsaima mih kowi piakta rakowi enni naka aprek kown, now enni nakowng kown,’ pape diah,” pakhai.
The Seed Company