Tarüa19
1Mosi hai Arawn iüah kowi CHAKRAMANG tek pe mih,2“Mami dow ang kowh rirow hownia kowh ana pek chekhai: Aser auowk uowi dowi mih arikchow mih chia iia nauang pawla enchi papum kownkow Israeluüa kowi kowtek pe iüa diah. Nami chia iia dow katpaw tang pe laithawn tim dowi tak mih naown kown takla.3Nami chia iia dow uamow Eleazar kowi enchi napeah kown. Now tangbung khup rah uat kowi cham pawla hanow aia pur kowi nami chia iia dow nangenah kown takla.4Now nami chia vi kowi aia kowh rutchawk nachimah hanow taklowp taklangra te pur prakowi nathetah ranit kat kown.5Nami chia kowh apik, anga, avi hai akih dow aia pur kowi natikah kown takla.6Naiawngün kam thüm khe mih sidar singh klowk lowk, lawngthow singh kre pakre hai aringma mih lasin sangrum mih maih kowi uamow nawmah kown.7Nami kung kowi dow uamow mih aia kowh khupdip tawngklai nachuta hanow nalu kown takla. Nami kung kowi chiang aia mih tangbung khup rah kowi naia kup kown. Nachenganchepaw aia mih sat kup dowi mowr asür alawkma hai nauowi tak kown.8Apik, anga, avi hai akih tik mih maru paw ki tikla now aia kowh khupdip tawngklai mih nachuta hanow nalu kown takla, now sat kup dowi mowr aia paw asür alawkma hai nauowi tak kown.9Nami kung kowi dow tasür talawk dowi mih maru lowk ia tikla chia pik, anga, avi hai akih mih plawi nakowpaw kown, now nami plawi mih tangbung khup rah uat kowi kowh asaichow mih rah kowi nacham towah kown. Nami plawi dow Israeluüa tachim tasai müa tui nathawpla kownkow natowah kown. Tasür talawk khowk mih kowi nachimsaila kownkow nami tui mih enni natawngah kown.10Tikla chia nga mih plawi kowpaw mih maru paw cham ki towla plawi kung kowi aia kowh khupdip tawngklai mih nachuta kown takla, now sat kup dowi mowr aia paw asür alawkma hai nauowi kown. Nami dow Israeluüa hai Israeluüa tut-e kowh tawi uowi mih akeng chenchapuüa vüi chowngchowng saksakma vüi ari arow chekhai.11“Cham kakta maru uak mih maru dow ranit ni mowr asür alawkma nauowi kown.12Tasür talawk khowk mih maru dow aia tasür talawk mih hownia sum ni mih ni hai ranit ni mih ni khe tachim tasai müa tui hown natachim tasai kown takla, nahanow aia dow nachimsai kown towbowt. Tawkchedow tasür talawk mih hownia sum ni khe hai ranit ni khe aia che tachim tasai dowi hanow aia mih asür alawkma hai nauowi tak kown.13Cham kakta uak kung kowi kowmatia kowi chimsaiah dowi mih maru dow CHAKRAMANG kowh taklowp taklangra te kowi sürlawkah mih chekhai. Naiawng rakowi naiawng mih maru kowi dow Israel chenchap hownia enni nabatta kown takla. Aia dow tachim tasai müa tui hown tachim tasai dowi rakowi asür alawkma nauowi tak kown.14“Tangbung lak kowi maru kowng khe nakowi kowh uowi miuüa hai kowkup miuüa dow asür alawkma hai ranit ni mowr nauowi kown. Mami rirow dow enni nachünah kown takla.15Nami tangbung lak kowi kowh puh bia aikam srui paw kümah dowi mih maten dow natasür talawk kown.16“Maru saiah mih maru uak chepaw, iawngpa kowng mih uak chepaw krawng kowi takuak hüah mih uak kowi kak mih maru dow ranit ni mowr asür alawkma hai nauowi kown. Now tadupra hai maru hut cham kakta chepaw kak mih maru dow ranit ni mowr asür alawkma hai nauowi kown.17“Tasür talawk miuüa kowi nachimsaila kownkow tikla chia nga mih plawi puh kowi natowah hanow tuilowng tui mih nathe pe kown.18Nami kung kowi dow chimsaima mih maru nacham paw pe lawngthow singh kre sangrum hanow nami tui kowi nachimah kown, now nami tui dow maru kowng mih tangbung kowi, tangbung lak kowi kowh uowi mih uanh maten hai maru maten luk kowi nakrawi thetah kown. Tadupra, maru hut, maru saiah mih maru uak hai iawngpa kowng mih uak cham kakta mih maru kowi paw nami tui mih enni nathet pe kown takla.19Tasür talawk mih maru kowi dow sum ni mih ni hai ranit ni mih ni khe tasür talawk dowi mih maru nami tui nathet pe kown. Now ranit ni mih ni khe tasür talawk mih maru dow aia kowh khupdip tawngklai nachuta hanow nalu kown takla. Nahanow nami ni sat kup hownia dow aia mih nachimsai kown towbowt.20Tasür talawk kung naiawng tachim tasai dowi mih maru kowi dow Israel chenchap hownia enni nabatta kown takla. Tawngplawng kowchow panow kowmatia kowi chimsaiah dowi mih dow CHAKRAMANG kowh taklowp taklangra te kowi sürlawkah mih chekhai. Aia luk kowi dow tachim tasai müa tui thet pe dowi rakowi aia dow asür alawkma chekhai.21Nami dow chowngchowng saksakma pat Israeluüa vüi ari arow naown kown.
“Nami tachim tasai müa tui krawi thet mih maru paw ki thet kung kowi aia kowh khupdip tawngklai mih nachuta kown takla. Nami tachim tasai müa tui kowi kak mih maru paw sat kup dowi mowr asür alawkma hai nauowi kown.22Asür alawkma mih maru krawi kakah mih uanh srui paw natasür talawk kown. Now nami maru kakah mih uanh kowi kak mih maru paw sat kup dowi mowr asür alawkma hai nauowi kown,” pakhai.
“Nami tachim tasai müa tui krawi thet mih maru paw ki thet kung kowi aia kowh khupdip tawngklai mih nachuta kown takla. Nami tachim tasai müa tui kowi kak mih maru paw sat kup dowi mowr asür alawkma hai nauowi kown.22Asür alawkma mih maru krawi kakah mih uanh srui paw natasür talawk kown. Now nami maru kakah mih uanh kowi kak mih maru paw sat kup dowi mowr asür alawkma hai nauowi kown,” pakhai.
The Seed Company