Tarüa17
1Nami kung kowi CHAKRAMANG tek pe Mosi mih,2“Israeluüa kowi mami laiklow kowtek pe diah, ‘Laipre chen hownia chowlowkkow krungchak aluchowuüa pauang pawla raitua lowk chi lah. Naiawngün aluchowuüa dow chowlowkkow raitua kowi amatni chowlowkkow kowh ming pacham ruiah lah.3Levi krungchak kowh raitua kowi dow Arawn kowh ming pacham ruiah lah. Tawngplawng kowchow panow chowlowkkow krungchak aluchowuüa vüi dow lowk ia e lowk chi raitua nauowi kown.4Naiawngün raitua dow taklowp taklangra te lak kowi kowh sangbowk laitawm tawkpla pur kowi enni natowah kown. Nami re-e dow enni hown CHAKRAMANG uang takrum reng chekhai.5Now uamow pahai CHAKRAMANG lang kraah mih maru kowh raitua kowi dow aram naawm kown,’ pape diah. Nahanow Israeluüa kamche en mih dow ang nataingta kown towbowt,” pakhai.6Naiawngün laiklow maten dow Mosi mih Israeluüa kowi kowtek pe khai. Now laipre chen kowi kowh chowlowkkow krungchak aluchowuüa dow Mosi kowi uang peah raitua lowk chi khai. Naiawngün raitua pungmadawng kowi dow Arawn kowh raitua paw tawi uowi lowk chekhai.7Mosi dow naiawngün raitua pawla now taklowp taklangra te lak kowi CHAKRAMANG pur kowi kowtowah khai.8Now auai ni Mosi dow taklowp taklangra te lak kowi kowkup khai. Now Levi krungchak hownia Arawn kowh raitua kowi madam ram awr awm mih dow kowkhi khai. Aia dow Arawn kowh raitua kowi aram awr awm mih krowngchow nadowi kowi awr mum, awr pau hai awr uih mih paw khi khai.9Naiawngün raitua dow CHAKRAMANG hownia uang lawtla hanow Israeluüa pur kowi Mosi uang tüng pe khai. Now Israel aluchowuüa dow amatni chowlowkkow raitua pawta khai bowt.10Nami kung kowi CHAKRAMANG tek pe Mosi mih, “Arawn kowh raitua dow sangbowk laitawm tawkpla ria kowi kowplan towah iawk diah. Nami raitua dow kamche ang miuüa vüi tarip müa amatra naown kown. Nahanow amatni dow nakamche ang kown nadowi bowt, now kowng paw nakowng büah kown nadowi bowt,” pakhai.11Mosi dow CHAKRAMANG kowh ana pek iawng chang khai bowt.12Naiawngün khi hanow Israeluüa tek pe Mosi mih, “Anging kowng kown towbowt! Anging piak bowk kown towbowt!13CHAKRAMANG kowh taklowp taklangra te re-e kowkowi mih maru maten kowng now anging paw nakowng bowk kown towbowt!” pabüah khai.
The Seed Company