Kar Meng2
Risi tek lai mih
1Uh! Jerusalem marow dow matawng iawng chowbowt chow!Aia kowi dow CHAKRAMANG kunmaraura hown mumah khai.CHAKRAMANG dow Israel kowh kraingra kuakta pe khai,aia dow mukuang hownia krawng kowi iu kuakta pe khai.Aia kunmarau mih ni khe dow tawngpaw aia tuakla dowi,aia kowi kowh chupla mih kim khowm padow aia tuakla dowi.2CHAKRAMANG dow aia maru-uüa kowh kim maten piakta pe khai,Jakawb krungchakuüa kowi mapaw sanaah dowi chekhai.Israel pren kowi kowh marow tap paw piakta pe khai,aia kowh kunmaraura hown nami dow khueta pe khai;naiawngün dow krawng kowi kuakah now piakta pe khai.Aia kowh pren hai aluchowuüa kowi dow pe rukraiah khai.3Aia kunmarau lün pluplup mih hown siphaiuüa kowi chumta pe khai,Israeluüa kowh kür maten dow aia piakta pe khai.Ransu-uüa uang khe aia kowh rut akürma mih dow aia kunta khai,aia dow nau khowngah dowi bowt.CHAKRAMANG dow Jerusalem marow klangiungma mih piakta khai,aia dow Jerusalem marow kowi maih hown towkah khai.4Ransu dow uüi leba khai,nami iawng dow aia kowh rut mih raw anging khai.Pe anging awmrawmra miuüa maten kowi aia dow saita anging khai.Aia kowh kunmaraura dow maih iawng lün pluplup khai.Nami dow Jerusalem marow luk kowi kowklai pe khai.5CHAKRAMANG dow ransu iawng chekhai,aia dow Israeluüa kowh pren kowi piakta khai.Aia dow Israel kowi kowh kim aiukma mih ün piakta khai,now akhawtma mih kangchawngra kim maten paw piakta khai.Aia dow Jerusalem marow kowi karra uang pe huah khai,marow klangiungma mih kowi ngukra aia uang pe huah khai.6Te dow aiachow maru ia piak reng chekhai,nami iawng CHAKRAMANG dow aia kowi kowh chupla mih kim piakah khai.Jerusalem marow kowi kowh pawi maten pe tamata khai,Tanai Ni lawnguan kowi paw aia dow pe tamata khai.Kramra uowima mih kunmaraura hown manguüa kowi nuata khai,uamowuüa kowi paw aia dow nuata khai.7CHAKRAMANG dow aia kowh phuchuara nuata khai,aia kowi kowh chupla mih kim hownia aia dow powt khai.Aia kowi kowh chupla mih kim tap maten dow ransu-uüa rut kowi apta khai,ransu-uüa dow awng khai bowt.Naiawng rakowi pawi ni khe kowh kiow Thurai mih klow iawngaia kowi kowh chupla mih kim kowi ransu-uüa how khai.8Jerusalem marow klangiungma mih dow napiakta kownkowCHAKRAMANG kamrütah mih chekhai.Aia dow napiakah kownkow kaneuma kamrüt khai,now napiakah kownkow aia rut kowi pe tanaiah dowi.Jerusalem kowi kowh tap hai khah dow takhue now chan bunlun khai,naiawngün dow tapiak bowk khowk chekhai.9Aia kowh tapplawt ün dow bawn hai tathia khai bowt,aklia müa ün paw klowkta pe khai bowt.Aia kowh manguüa dow akeng pren kowi cham takhang khai,aia kowh aluchowuüa paw cham takhang khai.CHAKRAMANG rirow pami tawngpaw tuk büah dowi bowt.Aia kowh risiuüa paw CHAKRAMANG hownia ka mukmang dowi bowt.10Kowng miuüa kowi uowila uiting uangtak mih natüngla büah kownkowJerusalem kowi kowh lawngtang aluchowuüa mih khup sala uan khai.Amatni dow lu kowi prui dinchow büah khai,now rarimma bawn kowi chowm büah khai.Kowng miuüa kowi uowila uiting uangtak mih natüngla büah kownkowJerusalem malauüa hawmh paw krawng kowi tabawk büah khai.11Ang kar lai bowt kowh ang kowh mik ri khai bowt,now ang saktuak paw pusa khai.Ang maru-uüa dow chum khai bowt;naiawng rakowi ang kowh kow mih lainowmma uak khai bowt.Jerusalem kowi kowh ngeuüa hawmh dow maw kliplip khai,marow akuangma rah kowi maw kowh takuakla klip khai.12Ngeuüa hawmh dow amatni u-uüa kowi tek pe mih,“Chakkham tawng kowi chow?” pakhai.Amatni dow marow akuangma mih rah kowi takuakla klip khai;amatni dow ka arau mih iawng maw kowh takuakla klip khai.Amatni kowh chownglawng dow chur khai bowt,amatni u-uüa tut-e tapai se amatni dow kowng khai.13Aw Jerusalem, aw Jerusalem marow klangiungma mih,tawng iawng chow ang natek en bowt kown,nape en sakkhawtra kownkow tawng chow ang nachang en kown,matawng hown chow ang natuh en kown chow?En kowh arau dow sata iawng aiukma chekhai,amiapaw nowng rawh en dowi bowt.14En kowh risiuüa dow ka mukmang khai;tawkchedow naiawngün mih daila hai alowlowma chekhai.Amatni dow en kowh aprek tüng en dowi chekhai;naiawng rakowi takhangra hownia en khalat dowi tham.Pur pra kowh nauang ting kown mih lai tek en mih dow adai chowtaih;nami dow tiama tawi kowi pakla en mih chekhai.15En ria iawng mang miuüa dow khare en khai,amatni dow khi en hanow chit en iangdak büah khai.Jerusalem piak mih dow ransu-uüa khi khai,amatni dow khi hanow prawng renah khai,now, “Mami chowbowt nadowi bow marow lang klangiung mih;palusama maru awmrawmah mih?” padow prawngah büah khai.16Ransu-uüa maten dow kingküa en khai,amatni dow tek en naklak khai;prawngren en hai krit iüng se tek mih,“Paimi kowi anging piakta khai bowt.Mami ni nakhi kownkow anging chawngah khai.Nami dow anging khi khai bowt,” pabüah khai.17CHAKRAMANG dow aia kamrüt mih powm iawng chang lup khai;aia dow alai kowh aia tekta iawng changah khai,aia tekta khowk mih lai dow uang pe tachiah khai bowt.Aia dow sana en dowi kowi kuakta en khai;ransu kowi dow en luk kowi pe awmrawmah khai.En ransu-uüa kowi dow aia pe kürah ngamlam khai.18Aw Jerusalem marow klangiungma mih kowi kowh maru-uüa low,CHAKRAMANG tut-e kar büa diah.Enni kowh mik tui ni chut uar prowt pacham hawr lah,enni kowh mik tui mih tap hownia pacham ue lah.Enni matia kowi hangkow peah sakklamra diah,mik kowi paw hangkow pe tanaiah diah.19Rü hanow uar prowt chi CHAKRAMANG tut-e kar büa diah,enni sakdawng kowi kowh laiklow maten tek pe büa diah.Enni kowh chauüa dow lainowmma hawm sakkrai khai.Naiawng rakowi tiama prek towng maw now tim khai;amatni kowh asak naplaila kownkow chup Thurai büa diah,chawk rut se CHAKRAMANG kowi kowphuang pe büa diah.Jerusalem marow tek lai mih
20Aw CHAKRAMANG, mü diah, sam tuak madiah,maiawng hown amia kowi chow en changah mih uowi?Masiuüa hawmh dow amatni kumah mih nau kowi nachaah kown bow,amatni thumah mawmah mih chauüa kowi nachata kown chekhai bow?En kowh kim chimsaima kowi uamowuüa kowi saita kown chekhai bow,risiuüa kowi paw napawta pe asak kown chekhai bow?21Ngeuüa uak dow dinchow dawng kowi takuakla klip khai,lawngtanguüa uak dow tiama towng kowi takuakla kan khai.Ang kowh malauüa klanguüa hawmh paw kowng khai,amatni dow saidawng hown kowng büah khai.En kunmaraura ni khe amatni kowi dow en satah khai,amatni kowi dow en sanaah dowi kowi en kowngta khai.22Pawi ni khe dow en kua maru kawm reng chekhai;nami powm iawng ang riaret kowi maiow maiow kramra en kua ang khai.CHAKRAMANG kunmaraura ni khe dow miapaw ia powt dowi,ia plawplai mih amiapaw uowi dowi chekhai.Ang thum mawmah mih chauüa kowi ransu-uüa uang piakta khai,ang sakrauah mih chauüa kowi ransu-uüa kowngta ang khai.The Seed Company