Kar Meng3
Risi tek lai mih
1Ang dow CHAKRAMANG ripah mih maru chekhai,aia kunmarau rakowi kowh ripah mih maru ang na khai.2Aia dow anowi hownia prütta ang khai;nahanow iiu dawng kowi pe mang ang khai.3Ni chut chi aia rut hown bawp ang khai,aplan aplan aia dow bawp ang khai.4Ang kowh pik hai nga paw sekta ang nak khai;ang kowh hut paw klowkta ang nak khai.5Saktuak kawmkratma hai ngarera thawngrum kowi tow ang khai,aia dow klungta ang hüah khai.6Kowng khowk miuüa iawng aia dow tow ang khai,aiiuma mih dawng kowi aia dow pe uowi ang khai.7Ang ia powtla dowi kownkow tavir lut aia dow kawm ang khah khai;now kri leng adikma mih hown tawm ang khai.8Khowng ang kownkow kar se ang hawah khai.Nami khin khe paw aia dow nau sünta ang dowi chekhai.9Ang kowh lawtra tia dow huaklu aiukma mih hown pitta ang khai;ang kowh tiama dow kuita ang khai.10Aia dow tawm iawng pawm ang khai,krangsi iawng dow chawm ang kown nau khai.11Tiama hownia iuala ang now dita ang nak khai,now aia dow towla ang hüah khai.12Aia kowh leba dow vüiah khai,now aia kowh leba sek manra changla ang khai.13Aia kowh leba sek rowng hownia leba sek mih aia pawah khai,now ang kowh sak-uih mih aia pruata ang khai.14Ang maru-uüa maten dow prawngren ang khai;ang lawnguan kowi ni chut chi küala rensi büah khai.15Nowng khamah dowi mowr pe ngare ang khai;ngare krang churma pe kham ang khai.16Huaklu kowi letta ang iüng bowk mih iawng towk ang ngare khai.Dinchow dawng kowi rowt ang lumowr mih iawng pe rukrai ang khai.17Asowr pami ang tut-e uowi dowi bowt;awmrawmra pami khowm ang tamata tüng khowk.18Naiawng rakowi ang tatek mih, “Ang kowh kür uowi dowi bowt;CHAKRAMANG tut-e ang kowh sakowmra uowi mih paw khowk khai bowt,” pakhai.19Ang ngare mih hai ang cham mang panglang mih krang ang ka tuak khai;ang kowh chownglawng angakma mih dow ang tuakah hanow lainowmma ang kawm khai.20Nami dow atungma ang ka tuak khai.Naiawng rakowi ang sak lak kowi lainowmma rau khai.21Nachenganchepaw CHAKRAMANG sakraura ang ka tuak khai,naiawngün ang ka tuak hanow ang kowh sakowmra uowi reng.22CHAKRAMANG kowh achur uowi dowi mih sakraura rakowi anging tapiak dowi.Tawngplawng kowchow panow aia kowh sanara dow katpaw achur uowi dowi chekhai.23Aia kowh sanara dow rau towng asar hown uang tatüng reng,aia kowh kaah sakowm mih rah dow akraingma chekhai.24Sakdawng kowi ang tek mih, “CHAKRAMANG klen kowi ang kowh miapaw lang uowi dowi bowt;naiawng rakowi aia luk kowi taih ang naowmsak kown,” pakhai.25CHAKRAMANG luk kowi neplawng nesak hai owmsak miuüa dow aiungma uowi reng,amatni kowi dow CHAKRAMANG peah iungra reng chekhai.26CHAKRAMANG kowi kunma thawngma hawt chawng mih lang iung chekhai.Tawngplawng kowchow panow aia dow amatni kowi nalawngah kown.27Asowmchow hownia tapring tahawi büa diah;nami dow maru vüi nowm nowm iung chekhai.28CHAKRAMANG pringhawi mih khin nauowi kown;nami khin khe aia malowkchow rarimma pacham chowm phülü lah.29Aia dow khamsum khamdawma hai pacham uowi lah,sakowmra uowi chepaw naia.30Phekah miia tut-e dow pacham towng pe ngeupa lah;rukraira dow atekma pacham kham lah.31CHAKRAMANG kowh dow sanara atekma chekhai,aia dow achowngma vüi lusa maru kowi powtta dowi.32Aia kowh achur uowi dowi mih sakraura hai sanara dow akraingma chekhai.Naiawng rakowi pe ripra chepaw aia dow pe lawtra reng.33Tawngplawng kowchow panow maru ngare mih aia dow nau dowi chekhai,maru kawmkrat mih paw aia dow awmrawm dowi chekhai.34Pren kowi kowh kla thawng miuüa kowi krawi chang nowng mih,CHAKRAMANG mapaw naukhi dowi chekhai.35Thurai lang kraing mih kowi kram dowi hai maru kowh alow peah dowi mih,CHAKRAMANG mapaw nowng mü dowi chekhai.36Maru kowi tara nowm chet pe dowi mih ün,CHAKRAMANG lainowmma sui khai.37CHAKRAMANG che peah alow dowi hanowamatia tekta iawng mia chow nowng chang mih uowi?38Thurai lang kraing mih low hown nadowi pabowaiung angak a-i chownglawng kowi uang ting mih?39Sing uowi reng tak khe changta angak rakowi ka ripra hanowtawngplawng kowchow maru mih cham chawk lai khai?40Chu madiah! A-i kowh chowm krang uowi krang sam tuakah madiah sik,now CHAKRAMANG tut-e i plan bowt lah.41Chu madiah! I chawk rut madiah sik,saktuak prawngma hown mukuang Thurai tut-e i tek lah:42“Anging chang ngak khai, anging kingküa en khai;en lawt anging dowi bowt.43En kunmaraura hown en krawi anging khai;sana dowi kowi en sai anging khai.44Anging kowh prasi lük dow en tut-e uang ia tingla dowi kownkowuangnim hown en tatung khai.45En dow chenchapuüa tut-e sürlawi iawng changla anging khai,now mawngchawng iawng chenchapuüa tut-e en changla anging khai.46Anging kowh ransu-uüa maten dow kingküa anging khai,amatni dow prawngren anging khai.47Kramra hai takrow takraira kowi anging uowi khai,piakra kowi anging uowi khai,” padow i tek diah sik.48Ang maru-uüa dow piak bowk khowk.Naiawng rakowi ang mik hownia dow tui uang hawr khai.49CHAKRAMANG mih uang iu mü dowi mowr,mukuang pren hownia uang iu khi dowi mowr,ang mik hownia mik tui nauang hawr reng kown,mapaw mowt kown nadowi.51Ang kowh marow kowi masiuüa maten kham ngare mih ang khi khai,nami ang khi hanow lainowmma ang sak kowi rau khai.52Uakling kowi ap-ah mih iawng dow,aiawnglowma ransu-uüa ap ang khai.53Amatni dow napawta ang asak kownkow kuam lak kowi kuak ang khai,amatni dow huaklu hown nümla ang hüah khai.54Tui dow limta ang khai bowt,ang ka tuak mih, “Ang kowng chowbowt,” pakhai.55Aw CHAKRAMANG, nami kuam abüpma mih hownia ang haw en khai;nami khin khe ang hawk klow mih en sünta ang khai.56Ang tek en mih, “Khowng ang kownkow en tut-e ang nauang lü kown;nami khin khe hangkow pitta param diah,” pakhai.57Ang haw en mih khin khe en uang tatawnah hanow,“Hangkow kram diah” padow en tek ang khai.58Aw CHAKRAMANG en tangila ang khai,ang kowh sak en uang lawng ang khai.59Aw CHAKRAMANG, ang luk kowi kowh chang anowng mih dow en khi chekhai,tara anowmma mih chet ang diah.60Tawng iawng chow amatni sat klai mih en khi chekhai,kingküa ang kownkow amatni tatowngpang mih ün paw en khi chekhai.61Aw CHAKRAMANG, amatni prawngren ang mih laiklow en ta chekhai,kingküa kownkow amatni tatowngpang mih laiklow maten paw en ta chekhai.62Ni chut chi tatek laisin büah khai,kingküa ang kown mih laiklow kangowh tatek büah khai.63Sam mü madiah, satlawt hownia satkup mowramatni dow küala ang rensi büah khai.64Aw CHAKRAMANG, amatni kowh angak sung peah diah,amatni kowh lup sung dow peah diah.65Amatni kowh sakowmra uowi dowi pat chang pe diah,amatni luk kowi en kowh piati pacham kla lah.66Aw CHAKRAMANG en kunmaraura hown amatni kowi krawiah diah,amatni kowi dow mukuang dak hownia mata diah.The Seed Company