Kar Meng1
Risi tek lai mih
1Uh! Akat khe dow Jerusalem marow kowi maru kawm atekma chowdiah,kawmat dow rim lai bowt kowbow!Akat khe dow paprenma maru ringkawah chowdiah,kawmat dow mamaimow iawng uang chowng khai bowt.Akat khe dow marow maten kowi mang iawng dow lang iuk chowdiah,kawmat dow uang chowng nar khai bowt.2Jerusalem marow dow masiuüa iawng uar prowt chi kar khai,aia kowh mik tui dow awm kowi uang hawr dawilawi khai.Aia kowi kowh tangila reng mih pren uowi dowi bowt,aia kowi napeah sakklamra kown mih miapaw uowi dowi bowt.Aia kowh auiua maten mih aia kowi kuanah khai,amatni dow aia kowh ransu uang chowng khai bowt.3Juda maru-uüa dow khawlawt dowi kowi amatni pren towla khai,amatni dow akeng pren kowi cham uowi nar büah khai.Amatni dow chenchap alangma miuüa tut-e cham uowi khai bowt;nalupah kown mih arah paw ka büah dowi bowt chekhai.Krawiah miuüa dow Juda maru-uüa kowi umta lut khai,powtla kown mih tiama mapaw ka büah dowi chekhai.4Nauang sun pawi kownkow Thurai chup kim kowi miapaw uang dowi bowt.Naiawng rakowi Thurai chup kim pra kowh mangla mih tiama dow kar khai.Aia tapplawt kowi nakupla kown mih tiama dow akhawma chekhai,aia kowh uamowuüa dow nguk runrun khai.Thurai chup kim kowi kowh tek meng reng mih malauüa hawmh kar khai bowt.Naiawng rakowi Jerusalem dow lainowmma kawm khai.5Jerusalem maru-uüa kowh ransu dow amatni luk kowi chang alow khai,amatni kowh ransu-uüa dow amatni luk kowi asowrma uowi khai.Amatni kowh dow aprek ahuma chekhai.Naiawng rakowi CHAKRAMANG towkah ngare mih chekhai.Amatni kowh ngeuüa hawmh kowi dow ransu-uüa khümla khai,ransu-uüa dow nami ngeuüa hawmh kowi pakla khai.6Jerusalem marow kowh dow klangiungra uowi dowi bowt,aia kowh kiowrira dow ransu-uüa rupta pe khai bowt.Aia marow kowi kowh aluchowuüa dow naki iawng chekhai,amatni dow ka taw rah dowi bowt chekhai.Naiawng rakowi amatni kowh dow kür uowi dowi bowt,amatni dow chakmit miuüa pur kowi powt khai bowt.7Jerusalem maru-uüa dow alai kowh amatni iung mih ni ün tuakah khai,kawmat dow angarema hown cham mang panglang büah khai.Ransu-uüa rut kowi amatni taap mih khin khe amatni kowi nakhowngah kown mih miapaw uowi dowi chekhai.Amatni kowh ransu-uüa dow tang müah khai,amatni piak mih dow khi hanow ransu-uüa mih khareah khai.8Jerusalem dow masiuüa ngakma mih iawng chekhai.Naiawng rakowi tasür talawk khai bowt.Aia kowh tengiow tengklaima mih dow maru khi pe khai,naiawng kowh ringkawah miuüa maten suiah khai bowt.Aia dow rukrai khai bowt.Naiawng rakowi petta lumowr now kar khai.9Lup ngak chang hown aiamat dow tasür talawk khai bowt,aia kowh angak sung dow tawng chow naown kown mih hing tuak dowi.Naiawng rakowi aia piak krang dow lainowmma ngah khai,peah sakklamra kown mih miapaw uowi dowi.Aia tek mih, “Aw CHAKRAMANG, ransu-uüa dow awng khai.Naiawng rakowi ang ngare krang uang iu mü diah,” pakhai.10Ransu-uüa dow aia kowh uanh maten pawta pe khai,aia kowh uanh asung khakma mih maten dow ransu-uüa rupta pe khai.Akeng chenchapuüa dow Jerusalem marow kowi uang kup khai,naiawngün dow Jerusalem maru-uüa hawt khi khai;hangah mih chenchapuüa dow CHAKRAMANG kim chimsaima mih kowi kup khai,naiawngün paw Jerusalem maru-uüa hawt khi khai.11Jerusalem maru maten dow krawi cham chakkham khai,amatni dow nguk runrun se krawi cham chak büah khai.Sing kown nau rakowi amatni dow pha chakkham büah khai,amatni kowh asung khakma mih uanh hown chakkham dow phaah büah khai.Jerusalem marow tek lai mihAw CHAKRAMANG, mü diah!Maru nü ang dowi mih sam tuak madiah.12Ang ria kowi kowh uowi miuüa low,tawngpaw enni ka tuak dowi bow?Sam mü ang büah madiah.Ang kowi kowh towk ang mih ngare iawng maru kowi paw towkah tak bow?CHAKRAMANG kunmarau lün pluplup mih khin khe mami ngare dow towk ang mih chekhai.13CHAKRAMANG dow aluk hownia uang iu chin ang maih khai,nami maih hown ang kowh hut dow kam khai.Ang khawk sanra tia kowi aia dow chak ang leng khai.Naiawng rakowi tawng iawng paw ang ia powt dowi chekhai.Aia dow maru akhawma tow ang khai,ni chut chi auakma hown towta ang hüah khai.14Ang kowh aprek maten aia dow kurdik iawng bat ang khai;aiamat rut hown naiawngün maten dow tapah khai.Naiawngün dow ang pangkawt kowi tang ang khai,ang kowh kür dow iawta ang khai.Ang nowngah dowi miuüa tut-e aia dow apta ang khai,ang ransu-uüa rut kowi aia dow ap ang khai.15CHAKRAMANG dow ang kowh tasen kiakma miuüa kowi netta ang khai,ang kowh siphai hawmh kowi aia dow nuata ang khai.Ang kowh klanguüa hawmh kowi aia dow kingküaah khai,nachumta ang kownkow aia dow thawp pe akhin khai.Ang maru-uüa kowi dow dita ang khai,sum kowi kowh tung kawm iawng dow tungah khai.16Naiawng rakowi ang kar khai,ang kowh mik tui dow awchawng tui iawng uang hawr khai.Nape ang sakklamra kown mih miapaw uowi dowi,nape ang sakkhawtra kown mih paw miapaw uowi dowi.Ransu-uüa dow awng khai.Naiawng rakowi ang kowh chauüa dow chowng saratchow chah khai bowt.17Ang dow naka khowng kownkow iaw rut khai.Tawkche nape ang sakklamra kown mih miapaw uowi dowi.CHAKRAMANG dow ransu-uüa kowi peah ana khai.Jerusalem marow kowi naumta lut kownkow peah ana khai.Ransu-uüa pungmadawng kowi ang uowi khai bowt,asür alawkma mih uanh powm iawng ang chowng khai bowt.18CHAKRAMANG kowh alow pek ang chün dowi chekhai.Naiawng rakowi aia rip ang mih dow mapaw tawi dowi.Chenchapuüa low, sünta diah.Ang ngare mih mü büa diah;ang kowh malauüa hawmh dow cham takhang khai,ang kowh klanguüa hawmh paw alakma kowi cham takhang khai.19Tangila ang mih prenchakuüa kowi ang hawah chowdiah.Nachenganchepaw amatni dow kuan ang büah khai.Ang kowh uamowuüa dow krawi cham chakkham khai,lawngtang aluchowuüa paw nasingla kownkow krawi cham chakkham khai;tawngpaw ka cha dowi rakowi amatni kowh sak dow chur khai,amatni dow marow lak kowi kowng büah khai.20Aw CHAKRAMANG, sam mü ang madiah.Lainowmma ang ngare khai;ang kingküa en rakowi ang kowh sak piak khai bowt.Kim uat kowi dow saidawng hown sak sumra chekhai,kim lak kowi paw kowngra chekhai.21Ang kowh nguk klow dow maru maten ta khai.Nachenganchepaw nape ang sakklamra kown mih miapaw uowi dowi.En towk ang ngare mih ang ransu-uüa tuk chekhai.Naiawng rakowi ransu-uüa dow lainowmma awmrawm khai.Nauang ting kown pahai en phuangah mih ni dow uang pe tingah diah,amatni paw ang iawng dow pacham tawi own büah bowt lah.22Aw CHAKRAMANG, sam mü madiah,amatni kowh lup ngak maten sam mü pe madiah.Ang kowh angak rakowi en chang ang mih iawngamatni kowi paw chang pe diah.Lainowmma ang nguk ang kar khai bowt,ang kowh sak mih lainowmma rau khai bowt.The Seed Company