Jawb37
1Elihu plan tek mih, “Naiawngün ang tuak hanow kram kowh ang chür reng,now ang kowh sak mih takrow lai kowh thü dukluk reng chekhai.2Muk tün iawng mih Thurai kowh klow dow sünta büa diah,aia nawr hownia kowh uang lawt mih klow sünta büa diah.3Aia dow mukuang dak kowi pla nowi uang pe nowiah khai,now nami pla nowi dow palusama kowi aia krawi pe nowiah khai.4Pla nowi kung kowi dow muk tün klow taah reng,nami klow dow lang kri lang kraing mih Thurai hownia kowh klow chekhai.Naiawng aia tüng klow mih khin khe pla nowi mih aia taingta dowi chekhai.5Thurai dow awdara uowima hown tüng klow reng,aia changah mih kri kraingma mih lup dow a-i tuk bowk dowi.6Aia dow nangkhe kowi mih lusa kowi aia pe klaah reng,now uang kowi paw lusa kowi aia pe uangah reng chekhai.7Naiawng hai Thurai dow maru kowh lup chang taingta pe reng,naiawng hai aia kowh nowng changra lawnguan lusa maru kowi aia pe tukah khai.8Nami khin khe tawncher hawmh dow amatni kowh khawng lak kowi kup reng,now amatni kowh khawng lak kowi tanai büah reng chekhai.9Liku uangchak dow mrawkphak hownia uang reng chekhai,now tawngphak hownia dow li uang pawla arua reng chekhai.10Thurai kowh kawli hown dow nangkhe uang chowng reng,aia kowh kawli hown dow tui uang takhe reng chekhai.11Thurai dow uangnim kowi tui atekma changah reng;aia dow uangnim dawng kowi pla krawi pe nowiah reng chekhai.12Aia kowh ana hown uangnim dow krawi iow reng chekhai,now naiawngün dow aia kowh ana pek nachün kownkow palusama kowi krawi iow reng chekhai.13Uang kowi aia uang chin mih dow lusa kowi tui nauowila kownkow chekhai;nami dow aia narip maru kownkow nadowi now natüng pe achur uowi dowi mih sakraura kownkow chekhai.14“Jawb, mami laiklow sünta diah,Thurai changah mih awdara lup lawnguan kaneuma tuakah diah.15Tawng iawng chow uangnim kowi Thurai kruitownah mih en tuk bow?Tawng iawng chow pla kowi Thurai pe nowiah mih en tuk bow?16Tawng iawng chow mukuang kowi uangnim tapowng mih en tuk bow?Tawng iawng chow Thurai kowh awdara uowima mih lup en tuk bow?17Mrawkphak hownia kowh li den hown dow lusa rüp reng chekhai.Nakhowk khe dow en khupah mih tawnguat kowi uang den mih en tuk chekhai.18Mukuang dow kri hown kowh thawpah mih nimrua iawng akhawtma,nami mukuang Thurai thawp mih khin khe en tawi khowngah tak bow?19“Tawng iawng chow Thurai kowi anging naklangah kown mih tek anging diah;anging kowh prengia uowi dowi rakowi tawng iawng chow aia kowi natek pe kown mih anging tuk dowi.20Thurai hown taklang kown mih ang lü dowi chekhai.Tawngplawng kowchow aia napiak ang kown mih khin ang napeah kown?21“Li hutta uangnim hanow mukuang dow achimma uang phaw reng,now nami hownia dow sat nowi tawk pluplup uang sawt reng chekhai.Nakhowk khe nami sat nowi kowi dow amiapaw nowng mü dowi chekhai.22Tawngphak hownia Thurai kowh kraingra dow kuh iawng uang sawt reng,now aia riaret kowi dow aia kowh kramra uowima mih kraingra khi reng chekhai.23Lowra nowngia chang mih Thurai kowh kürra dow a-i nowng tuakah dowi;aia dow anowmma hai achinawmma chepaw piak a-i dowi chekhai.24Naiawng rakowi maru kawmuüa dow aia kowi ringkawma hown kramah reng,kowmatia kowi tanü chanlai miuüa prakowi dow aia pe ching dowi chekhai,” pakhai.
The Seed Company