Jawb38
1Nakhowk khe CHAKRAMANG dow liku uangchak dawng hownia Jawb kowi uang klangah khai. CHAKRAMANG tek pe mih,2“Prengia uowi dowi mih laiklow tek mih mia chow en?ang kowh chanlaira owm dowi mih mia chow en?3Jawb, tasen kiakma mih maru iawng kamrütma hown uowi diah;tawngplawng kowchow panow ang nalünta en kown chekhai,now ang lünta en mih iawng en naklang ngengche kown.4“Ang thawp lusa chüng mih khin khe tawng kowi chow en uowi?En kowh che prengia uowi hanow sam tek ang madiah.5Lusa mün khowt chow iuk kown mih mia chow khowm bowk?Now akhai müa leng hown nami lusa mia chow krawi khai?6Lusa chüng maten tawng luk kowi chow ang phükah?Now nami achüng phükra kowi mia chow rik phük hua?7Nami khin khe dow rauleng krek ün ahawmsang tek meng chowdiah,now mukuang kramamu-uüa paw piaw se how büah chowdiah.8“Krawng dawng hownia sata tui uang lawt mih khin khe,sata navela dowi kownkow amia chow thawp sata pang?9Nami khin khe sata kowi dow ang khup pe uangnim khai,now aia kowi dow aiiuma hown ang tungah khai.10Sata rihi dow ang khowm bowkah khai,now sata tui kowi mih rihi uat kowi ang pe ueah dowi chekhai.11Sata kowi ang tek pe mih, ‘Mami mowr taih en naia hawr kown,nami klen kowi dow en naia hawr kown nadowi bowt.En kowh bawrira tuilowng mih mami re-e en taingta kown takla,’ pakhai.12“En chownglawng kowi ni nauown kown mih en peah ana kakat tak bow?Now uar nathowi kown mih en peah ana kakat tak bow?13Palusama kowi anowi nasawt hanowmaru ngakuüa napowtla kownkow ni nowi kowi en peah ana kakat tak bow?14Ni nowi hown dow hungh hai lawngrawi ün achimma khi-ah khai;nami dow dawnguan klep ia iawng hai suplawk kowi tuk mur mih iawng achimma chekhai.15Maru ngakuüa dow naukhi ni nowi dowi chekhai,amatni dow ni nowi kowi chang lup ngak dowi chekhai.16“Sata uang uown phawla mih arah kowi en kowkowi khowk bow?Now sata thing kowi kowh re phai kowi en kowtawi mang khowk bow?17Makowng pren kowh tapplawt en khi khowk bow?Makowng pren tapplawt tawng kowi chow en tuk bow?18Mün khowt chow lusa iuk mih en tuk tak bow?Naiawngün che en tuk now sam tek ang madiah.19“Tawng hownia chow anowi uang ting?Tawng prakowi chow aiiu cham mang?20Amatni uowi rah kowi amatni kowi en naia pawla iawk kown bow?Amatni uowi rah kowi kowkowila kown mih tiama en tuk bow?21Naiawngün ang thawp mih dow en aiawng tuk towbowt manow!Tawngplawng kowchow panow naiawngün thawpta bowk dowi rawn en uang dia khowk,now en uanla hu lai bowt rakowi en tukah mih hu krang chur khai bowt.22“Nangkhe tanungra kowi en tawi kup khowk bow?ria klu tanungra en khi khowk bow?23Naiawngün dow krat mih khin khe kowh vüi ang nungah mih chekhai,tasen hai tatu tasawt mih khin khe natawngah kown mih vüi ang krümah mih chekhai.24Tawng hownia chow anowi uang ting mih en tuk bow?Tawng hownia chow lusa kowi satlawt li uang mih en tuk bow?25“Uangchak mang nauangla kown mih tiama mia chow thawp?liku hai muk tün kaikreng nauangla kown mih tiama thawp mih mia chow?26Akhaw aklaima mih süng kowi pe uangah uang mih mia chow?Maru uowiah dowi mih süngrüp süngkangma kowi pe uangah uang mih mia chow?27Kangkhawngma mih krawng kowi pe kaah tui mih mia chow?Now krawng hownia pram kowi pe ruah mih mia chow?28“Uang kowh pa uowi khai bow?Amia chow thawp nang tui?29Mia chow nangkhe kowi nowng thawp mih uowi?Mukuang hownia kowh nang kowi uang pe klaah mih mia chow?30Tui dow chowng nangkhe hanow hua iawng akhawtma phaw reng,now nami nangkhe dow sata luk kowi tapowng hüah reng.31“Rauleng krek ün kowi arasang en ia town kown bow?Tatu lawmlawm mih krek ün en ia prai kown bow?32Mukuang kowi kowh krek kowi amatni lawt khin khe en ia pe lawtah kown bow?Tawm pami krek hai achauüa kowi en ia kruitown kown bow?33Mukuang kowi kowh ari aiang en tuk bow?Nakruitownla lusa kownkow naiawngün en naia tawng kown bow?34“Uangnim kowi en hek pe hanow uang kowi en nowng pe uangah bow?35En nauah mih arah kowi pla kowi en ia pe nowiah kown bow?Now en chinah mih arah kowi amatni kownowi kown bow?36Amia chow maru kowi peah prengia?Amatni kowh sak kowi amia chow peah chanlaira?37Nowng rüala uangnim pat mih prengia mia kowh chow uowi?khük tuikawng tui iawng mukuang hownia nowng pe uang mih mia chow?38Naiawng nowng chang mih hownia dow dinchow chowng suplawk reng,now bawn klu ün paw chowng suplawk nek reng chekhai.39“Krangsila hawmh dow puk kowi tapet reng chekhai,now amatni dow pram mung kowi kram chak kownkow hawt tapet reng chekhai.Nakhowk khe amatni vüi en kram pe chak tak bow?Now amatni chak sakkrai khe en peah chakkham tak bow?41Thurai tut-e uaak chauüa uang kar mih khin khe,chakkham khawr hown mapra paipra krawi mangla pang mih khin khe,amatni kowi mia chow kram pe chakkham reng?” pakhai.
The Seed Company