Jawb36
1Elihu plan tek iawk mih,2“Thurai takcha kowi ang natek kown mih uowi ne tak.Naiawng rakowi sakrauma hown sünta büah nawngchow diah.3Ang chownglawng kowi chanlaira ahuma khowk ang ka,nami hownia thawp ang miia achinawmma pami ang natüng enni kown.4Ang natek enni kown mih laiklow dow anowmma kangowh chekhai;chanlaira atekma mih maru enni pur kowi tawi uowi lowk ia chekhai.5“Thurai dow kri kraingma chepaw lusa maru kowi mia kowi paw suiah dowi;aia dow aia nau changah kown mih tuakta iawng chang reng chekhai.6Aia dow maru ngakuüa kowi towah sing dowi chekhai.Tawkchedow nowng changra kowi uowi miuüa kowi chet pe tara nowm reng.7Aia dow maru iunguüa hownia cham lang dang dowi chekhai;aia dow naiawng mih maru-uüa kowi manguüa hown pe taiua chowmah reng,now amatni kowi dow achowngma vüi peah ringkawra reng chekhai.8Nachenganchepaw lusa maru che angak hown tatawm khai,now amatni che kham ngare khai hanow,9tawng angak chow amatni changta mih Thurai tüng pe reng;bawrima hown amatni chang lup ngak mih dow Thurai tüng pe reng chekhai.10Aia dow natowta lup ngak chang kownkow amatni kowi peah prengia iung reng,now angak hownia nauang plan kownkow amatni kowi aia peah ana reng chekhai.11Nakhowk khe amatni che aia laiklow chün hai aia tek iawng chang khai hanow,lup chawn reng hai chownglawng kowi asowrma ka uowi büah reng chekhai.12Nachenganchepaw amatni che aia laiklow sünta dowi hanow,chanlaira uowi dowi rakowi saidawng rut kowi nakowng büah kown.13“Thurai kowi ringkaw dowi miuüa dow atungma hing kunmarauta hüah chekhai;amatni dow amatni kowi Thurai ripah khe nalü khowng kownkow kar dowi chekhai.14Amatni dow klanguüa reng tak khe kowng reng,amatni dow sürlawkma mih chownglawng sun thüm khe chowng chur reng.15Nachenganchepaw Thurai dow amatni kowi pe khamah ngare mih hownia lawngah reng,aia dow amatni kowh angak pacham tuk lah pakowh akawm akrat hown maru kowi tüngsangah reng.16“Jawb, Thurai mih akrat pusara hownia nalawtla en kown nau chekhai;aia dow thaulangma mih arah kowi natow en kown nau chekhai.Nakowi dow en kowh pawitang mih chakkham iung atekma nauowi kown.17Nachenganchepaw kawmat dow maru ngakuüa iawng en ka ripra khai;Thurai mih en kak taing iawng rip en mih chekhai.18Kaneu diah, en kunmarau rakowi Thurai kowi hangkow changla rensi kau diah;en kowh dawngthawnguan ahuma mih angak prakowi hangkow pacham pawla en lah.19En kowh dow dawngthawnguan hai nowng changra kür ahuma chekhai;naiawngün mih akrat pusara hownia nowng lawng en dowi.20Uar nauang tamum klum kown mih kowi hangkow prüa diah.Tawngplawng kowchow panow maru piak reng mih dow uar-e khe chekhai.21Kaneu diah, angak prakowi hangkow plan diah;angak hownia nahen en kownkow Thurai pe ngare en mih chekhai.22“Thurai dow lowra nowng chang miia chekhai;aia iawng mih tüngsang mih dow miapaw uowi dowi bowt chekhai.23Aia kowi dow tawng chow achang takla mih miapaw nowng tek pe dowi;‘En changah mih lup tawi khai,’ pami miapaw nowng tek pe dowi chekhai.24Aia changah mih lup rakowi aia kowi kiowah kown mih hangkow tamata diah;aia kowi dow aia kowh lup rakowi meng hown maru kiowah reng chekhai.25Maru maten dow aia kowh lup khi bowk chekhai.Tawkchedow naiawngün mih alakma hownia khi mih chowtaih.26“Thurai dow mün khowt chow kri kraing mih a-i nowng tuk dowi,now aia dow mün ning khowk chow mih paw a-i nowng tuk dowi chekhai.27Aia dow lusa kowi kowh tui pawah hanow uangnim kowi towah reng,now naiawngün tui kowi dow aia mih pe chowngah uangchak reng chekhai.28Nami uangchak dow uangnim hownia lusa kowi uang iu dowh reng,now nami uang tui dow lusa kowi kowh chenchap maten maratla reng chekhai.29Uangnim kowi tawng iawng chow aia dauta hüah mih miapaw tuk dowi,now aia uowi rah hownia tawng iawng chow muk tün mih paw miapaw tuk dowi chekhai.30Aia dow aia tavir lut pla kowi pe nowiah reng.Nachenganchepaw sata kowi dow aiiuma aia towah reng chekhai.31Aia dow naiawng hown pe a-i uang tui reng,now naiawngün uang tui hownia luprak ahuma pe ka a-i reng chekhai.32Aia dow pla nowi kowi aia rut hown dowkah reng,now aia nauah mih re-e pla kowi aia krawi pe nowiah reng chekhai.33Aia kowh muk tün dow uang nauang kown mih satang rik phowng mih chekhai.Naiawng rakowi asaduauüa paw uang nauang kown mih satang tawi tuk reng chekhai,” pakhai.
The Seed Company