Jawb29
1Nami kung kowi Jawb plan tek mih,2“Owh, Thurai mingkhet ang mih la ün ang plan ka panü,Thurai kruitown ang mih ni ün ang plan ka panü.3Nami khin khe dow aia kowh maibu uang tüng ang tiama reng chekhai,now aia kowh anowi hown iiu dawng kowi ün ang cham mang reng chekhai.4Aiungma ang uowi mih khin khe dow Thurai mih uang tawi uowila ang reng,aia dow ang kowh tangbung kowi uang tawi uowila ang reng chekhai.5Nami khin khe dow lowra nowngia chang mih Thurai ang tut-e tawi uowi reng chekhai,now ang kowh chauüa paw ang riaret kowi tawi uowi reng chekhai.6Nakhowk khe dow ang kowh chiama hawmh mih lainowmma pe iawn tui chekhai,now ang vüi kowi hua kangowh mih krawng hownia paw kanrawn sau ahuma uang phaw reng chekhai.7“Marow tapplawt kowi kowh takua talawmra kowi dow ang kowkowi khai,now nakowi dow ringkawra uowima mih chowm rah kowi ang kowchowm khai.8Nakhowk khe klanguüa hawmh dow khi ang hanow hen ang tiama reng chekhai,now lawngtang aluchowuüa paw iowng se ringkaw ang reng chekhai.9Maru iukuüa dow amatni talawp mih taingta reng chekhai,now ringkaw ang kowh ririmma uowi büah reng chekhai.10Nami klen kowi aluchowuüa paw ririmma uowi reng chekhai,amatni klow rim krang paw krang kowi dai cham tadan khai iawng towbowt.11“Ang laiklow sünta mih maten dow kiow ang reng chekhai,now ang kowh lup chang khi miuüa dow tek ang awmrawm lai reng chekhai.12Ngarai miuüa uang kar khe ang khowngah reng chekhai,now akhowng mih uowi dowi mih saratchowuüa kowi ang lawngah reng chekhai.13Ang khowngah rakowi kowng kown chowbowt mih maru pat pela ang prasi khai;mamaimowuüa sak kowi dow ang peah awmrawmra khai.14Achinawmma mih chownglawng dow tawnguat iawng ang khupah khai,now tara nowm dow napawng iawng ang suiah khai.15Ang dow mik duma miuüa kowh tiama tüng mih chekhai,ang dow klowng khawn tabai miuüa kowh kruitown mih chekhai.16Ang dow ngarai miuüa kowh pa iawng chekhai,ang tuk matah dowi miuüa kowi paw ang khowngah reng chekhai.17Maru ngakuüa kowh kürra dow ang piakta pe reng chekhai,amatni rut hownia dow maru-uüa kowi ang lawngah reng chekhai.18“Ang ka tuak mih, ‘Ang kim kowi ang nakowng kown,ang kowh chownglawng ni dow sema iawng ahuma ang nachangah kown.19Ka tui reng mih singh prün iawng kow iungma ang nauowi kown,now uar prowt nang tui kla reng mih singh mia iawng chimprowngchow ang nauowi reng kown.20Maru kawmuüa tut-e dow ang kowh ringkawra nauowi reng kown,klanguüa khe kowh ang kowh kür dow asar iawng atungma nauowi reng kown,’ pakhai.21“Maru kawmuüa dow ang kowh laiklow nasünta kownkow hawt chawng reng chekhai,amatni dow ang kowh prengia lai nasünta kownkow ririmma uowi reng chekhai.22Ang ki tek laiklow kung kowi amatni dow amiapaw talai dowi bowt chekhai,ang kowh laiklow dow amatni sak kowi klangiungma kup khai bowt.23Amatni dow maru chawng uang iawng ang kowh laiklow nasünta kownkow hawt chawng reng chekhai,amatni dow siadawng kla dowi rawn khe kowh nau uang mih iawng ang kowh laiklow sünta kown nau büah khai.24Amatni saktuak krat mih khin khe ren nawr hown ang tang müah reng,nahanow amatni dow ka sakkhawtra reng chekhai.25Amatni kowi dow ang tüng pe tiama reng chekhai,now aluchow iawng ang kruitownah reng chekhai.Siphaiuüa kowi mang kruitownah iawng amatni kowi dow ang kruitownah khai,now kar hai nguk hown uowi miuüa kowi dow ang depah reng chekhai,” pakhai.
The Seed Company