Jawb30
1Jawb tek mih, “Nachenganchepaw kawmat dow ang lak-e kowh ning dia miuüa prawngren ang khai bowt;amatni kowh pa kowi dow tawi chawng ang ruapur hawmh mih kui hown khowm towla kown ang sui chowdiah.2Amatni kowh kür dow ang vüi tawngpaw mrawkra uowi dowi chowdiah;amatni kowh dow tawngpaw kür uowi dowi chowdiah.3Akhawr hai sakkrai hown uowi rakowi amatni kowh powm khowm keureuchow chowdiah;amatni dow uar-e khe ririm raramma mih dawng kowi cham ku cha singh prün kau prün reng mih taih diah.4Amatni dow ruih mung krüa kowi kowh asowr uowi dowi mih pramna taih chowdiah cham cha reng,amatni kowh chakkham dow singh prün ün taih chowdiah.5Amatni kowi dow khi-ah hanow kua hai marow hownia maru prütah reng mih taih chowdiah;amatni kowi dow kuk mih kowi iawng maru krawiah reng mih taih chowdiah.6Amatni dow aw pang kowi kowh hua krüa kowi cham uowi mih maru taih chowdiah;amatni dow puk lak kowi hai hungh cheng mih takra kowi cham uowi mih maru taih chowdiah.7Pram mung hownia amatni dow kawrngaramchük iawng pla reng mih chowdiah,now pram dawng kowi tachek taetma hown uowi mih maru taih chowdiah.8Amatni dow asung uowi dowi mih hai ming ngak nang ngakma mih maru taih chowdiah;amatni dow pren hownia maru prütta mih maru-uüa taih chowdiah.9“Kawmat dow amatni kowh chauüa mih tek meng se prawngren ang khai;amatni tut-e dow ang chowng prawngren müa khai bowt.10Amatni dow sui ang kowh ang hownia alakma lang uowi khai;ang lumowr kowi thawk ang kria kown khowm kram büah dowi chekhai.11Tawngplawng kowchow panow Thurai mih kür khawma chang ang hanow towk ang kawm khai;naiawng rakowi amatni dow kowmatia kowi nowng townah dowi prang kingküa ang khai.12Kunma denma mih klanguüa hawmh dow purdowng hownia uang sen ang khai,now ang apowt takla pat uang chang ang naklak büah khai.Amatni dow nauang senla ang kownkow tap pün müa thawp chut büah khai.13Amatni dow ang naia powtla dowi kownkow pitta ang tiama khai;amatni dow miapaw akhowng takla dowi kowi piak ang khai.14Amatni dow tap takra auarma mih hownia siphai hawmh iawng uang sen ang khai,now ang luk kowi uang tachun nawilawi uang thua ang büah khai.15Kramra chap maiow ang luk kowi uang tamum klum khai;ang kowh ringkawra mih li iawng cham rownla ang khai,now ang kowh iungra maten dow uangnim iawng tama khai bowt.16“Kawmat dow ang nalüa kowng kown chowbowt;akrat pusara dow ang kowh chownglawng kowi hing uowi hüah chekhai.17Uar-e khe ang kowh hut kowi lainowmma rau khai;uar prowt chi nami arau dow hing uowi hüah chekhai.18“Aia kowh rut akürma mih hown Thurai mih dowk ang kowrmow khai.Aia dow dowk ang kowrmow ngawngbam hanow küng ang khai.19Nami kung kowi dow aia mih suplawk dawng kowi kuakta hüah khai,now ang dow dinchow hai plawi iawng ang own khai bowt.20“Aw Thurai, en tut-e ang uang kar khai.Tawkchedow en uang klang ang dowi chekhai.En pur kowi ang uang iowng dawnglawng khai.Tawkchedow mü khowm en mü ang dowi chekhai.21Ang kowi mih angak rawnma en chang ang khai;en kowh akürma mih bawng hown en chang ang nowng khai.22En krowngla ang hanow li kowi en lawtta ang hüah khai;liku uangchak kowi en kuak ang hanow en pe plai ang khai.23Kowngra prakowi en pawla ang mih pami ang tuk khowk;maru maten kowh chur rah kowi en pawla ang mih chekhai.24 “Tatheu mih hai kar se lü khowng miuüa kowi maru khowngah reng nadowi bow?Naiawng mih maru kowi maru peah arau kakat tak bow?25Akawm akrat hown uowi miuüa vüi ang kar dowi pabow?Now ngarawng ngarai miuüa rakowi ang sak kowi rau dowi pabow?26Nachenganchepaw aiung nauang ting kown mih ang sakowm khe angak uang ting khai,now anowi nauang sawt kown mih ang sakowm khe aiiu uang kla khai.27Ang kowh sak lak kowi akrat pusara mih katpaw rim dowi chekhai;ni towng ang sak kowi arau uang ting rakowi ang arau uowi reng chekhai.28Ang dow uangnim aiiuma mih ni iawng lumowr klimma ang uowi reng chekhai;naiawng rakowi takua talawmra kowi ang iowng hanow ang tawi lü khowng khai.29Ang dow brenkhui hai ut uakling auiua cham chowng khai bowt.30Ang kowh pik dow anumma phaw khai bowt;krau hown ang kowh pik den krang kam kown iawng towbowt.31Kawmat dow taprüa taiia khe kowh taraw tün towbowt ang tep reng,now ang kowh prui hownia dow uowila uiting uangtak khe kowh meng owi towbowt lawt reng,” pakhai.
The Seed Company