Jawb28
1Jawb tek mih, “Kuh hai tai paw apawk rah uowi,now naiawngün achangma nachangla kown mih arah paw uowi.2Lawngha dow krawng dawng hownia thaiah reng,now hua chawrah mih hownia dow kri phaw reng chekhai.3Asung khakma mih hua dow krawng dawng abüpma mih rah kowi uowi reng chekhai,naiawngün dow pawla pe atowr müa hanow aiiuma mih dawng kowi maru krawi cham reng.4Naiawngün dow katpaw maru tingah dowi mih arah kowi maru krawi chamah reng;now abüpma pat thaiah hanow leng hown tatar kawlaw se chang lup büah reng chekhai.5A-i ka luprak mih dow krawng luk hownia kowh uang ru mih hownia chekhai.Tawkchedow nami krawng dak abüpma kowi maih hown bawn chawr reng chekhai.6Krawng dak kowi kowh hua lak kowi asung khakma mih hua uowi reng,now bawn dawng kowi dow kuh uowi reng chekhai.7Naiawngün asung khakma mih hua uowi rah dow langta tuk dowi chekhai,now mukaichow paw naiawngün uanh dow katpaw khi dowi chekhai.8Naiawngün uanh uowi rah kowi dow kaurawng uaramchak katpaw chawp dowi chekhai,naiawng mih uanh uowi rah kowi dow krangsi paw katpaw krawi kowi dowi chekhai.9Naiawng akhawtma mih hua kowi maru chowtaih krawi teu reng;naiawngün dow hungh tut kowi abüpma maru krawi thaiah reng chekhai.10Lusa maru dow hungh tut kowi abüpma krawi thai khawng reng,now nakowi kowh uowi mih uanh asung khakma mih krawi khi reng.11Lusa maru dow mrawng kowi kowh tui kla sawmlawm mih krawi owngta reng,now nakowi tapet mih asung khakma mih uanh dow anowi kowi uang pawla büah reng.12“Nachenganchepaw tawng kowi chow chanlaira dow naka kown?Now prengia dow tawng kowi chow cham uowi?13Nami dow sing miuüa uowi rah kowi uowi dowi chekhai;now nami kowh asung paw miapaw tuk dowi chekhai.14Nami chanlaira dow sata kowi paw uowi dowi chekhai,now tui abüpma mih rah kowi paw uowi dowi chekhai.15Nami dow kuh achangma mih hown paw nowng ranah dowi,now tai ahuma hown paw nami sung nowng the dowi chekhai.16Nami dow Ofir hownia kowh kuh hown paw nowng ran dowi,now asung lang khak nowm nowm mih hua hown paw nowng ran dowi chekhai.17Nami dow kuh hai asung khakma mih nimrua hown paw nowng tuah dowi chekhai,now kuh achangma mih bia hown paw nami dow nowng phaah dowi chekhai.18Nami chanlaira tut-e dow asung khakma mih hua kowh paw asung uowi dowi chekhai;asung lang khak nowm nowm mih uanh lak-e paw nami dow asung lang uowi chekhai.19Nami dow Ethiawpia pren kowi kowh asung lang uowi mih hua hown paw ia tuah dowi chekhai;kuh achangma mih hown paw nami dow nowng ranah dowi chekhai.20“Naiawng now tawng kowi chow chanlaira naka kown?Now prengia dow tawng kowi chow cham uowi?21Nami dow asak uowi mih chap maten kowh mik hownia tapet khai,now kuang dawng kowi kowh iow mih uakling hawmh tut-e paw apetma chekhai.22Kowng khowk miuüa hai piak khowk miuüa paw nami lawnguan tala chowdiah.Tawkche nami chanlaira tawng hownia chow ka kown mih nowng tek büah dowi.23“Nami chanlaira uowi rah dow Thurai chowtaih tuk;aia chowtaih tawng kowi chow nami naka kown mih tuk.24Tawngplawng kowchow panow aia dow prenchur nammowt khi bowk chekhai;aia dow mukuang dak kowi kowh uowi mih sia maten khi bowk chekhai.25Li kowi aia peah kür mih khin khe,mün khowt chow sata naiuk kown mih khowm bowkah mih khin khe,26tawng khe chow uangchak nauang kown mih khowm bowk mih khin khe,now pla nowi hai kaikreng nasawr kown mih tiama khowm bowk mih khin khe27chanlaira kowi mih aia khi khai, now nowkah khai;nami dow klangiungma aia müah khai, now pawah satang reng chekhai.28Nami kung kowi dow lusa maru kowi aia tek pe mih,‘CHAKRAMANG kowi ringkawma hown kram mih dow chanlaira chekhai,now angak hownia lang süt mih dow prengia chekhai,’ pape khai,” pakhai.
The Seed Company