Jawb12
1Nakhowk khe Zofar kowi Jawb tek pe mih,2“Enni towbowt lusa kowi lang chanlai pahai enni tanü khai;enni kowng now chanlai mih maru uowi dowi bowt pahai enni ka tuak khai.3Tawkche ang paw enni khowt dow chanlai chekhai;enni lak-e dow ang lang smu dowi chekhai.Enni tek ang mih laiklow dow miapaw tuk dowi mih uowi dowi chekhai.4Thurai kowi ang hawah hanow aia dow uang klang ang reng chowdiah;nachenganchepaw ang auiuauüa mih changla ang rensi kau khai.Angak uowi dowi hai achinawmma chepaw ang chowng rensi kau khai bowt.5Asowrma uowi miuüa dow krat miuüa kowi changla rensi reng,amatni dow tim kown chowbowt miuüa kowi nawtah reng chekhai.6Tawkche damrauüa kowh tangbung kowi dow takhüm taran klow uowi dowi,Thurai kowi towkah sak-hiah miuüa dow thaulangma uowi reng.Amatni dow amatni kowh kür kowi chowtaih nüla thurai khai.7“Kaurawng uaramchak hawmh kowi krawi lünta büah madiah;amatni mih natüngsang enni kown taih.Uakling uaber hawmh kowi paw krawi lünta büah madiah;amatni paw natek enni kown taih.8Krawng luk kowi kowh uowi mih chap kowi krawi lünta büah madiah;amatni mih natüngsang enni kown taih.Sata kowi kowh uowi mih sawng dam kowi paw krawi lünta büah madiah;amatni paw natek enni kown taih.9Tawngplawng kowchow panow amatni dow tuk bowk chekhai,Thurai rut hownia mami phih uang ting mih pami amatni dow tuk bowk chekhai.10Tawngplawng kowchow panow asak uowi mih chap maten kowi mingkhet mih dow Thurai chowtaih;lusa maru maten kowh singra dow aia rut kowi chowtaih.11Chakkham sowr dow dai tuk chekhai,nami iawng dow laiklow sowr paw param tuk chekhai.12Lawngtanguüa tut-e ka chanlaira reng pahai enni tek khai,now chowngdawng hanow prengia lang chak pahai enni tek reng chekhai.13“Tawkche chanlaira hai kürra dow Thurai tut-e chowtaih,now prengia hai nowng changra paw aia tut-e chowtaih uowi.14Aia che piakta hanow nowng rawah dowi bowt chekhai,now aia towah thawng mih kowi dow miapaw nowng lawt dowi chekhai.15Uangchak kowi che aia pe uangah dowi hanow süng rüp reng,now uangchak kowi che ahuma aia pe uangah hanow lusa lim reng chekhai.16Kürra hai chanlaira dow Thurai kowh chowtaih;maru iung hai maru ngak pre ia trui Thurai krüa kowi uowi mih chowtaih.17Aia dow pren kruitown miuüa kowh chanlaira pawta pe reng,now tara chet miuüa kowi abualama aia changah reng chekhai.18Aia dow manguüa kowi rupta pe tawnguat reng,now amatni kowi dow thawng kowi aia towah reng chekhai.19Aia dow uamowuüa kowi klüpta pe tawnguat reng,now akrama chang low miuüa kowi paw aia klata reng chekhai.20Kaah sakowm miuüa kowi aia dow kowpta pe nawr reng,now lawngtanguüa kowh chanlaira paw aia pawta pe reng chekhai.21Aia dow maru iukuüa luk kowi uang pawla pe rukraira reng,now akürma mih maru-uüa kowi dow aia piakta pe kür reng chekhai.22Aia dow iiu dawng kowi kowh tapet mih kowi tüngah reng,now lang iiu nowm nowm mih arah kowi dow anowima aia changah reng chekhai.23Aia dow chenchapuüa kowi pe prungah hanow kri kraingma changah reng,now amatni kowi mih setta plawt hanow piak paw aia plan piakah reng chekhai.24Aia dow lusa kowi kowh aluchowuüa kowi bualama changah reng,now amatni kowi mih süngrüp süngkangma kowi pe krawi lenah panglang reng.25Amatni dow iiu dawng kowi krawi mang kown kamrüt mih maru iawng chekhai;amatni kowi dow apuama mih maru iawng aia changah khai,” pakhai.
The Seed Company