Jawb13
1Nami kung kowi Jawb plan tek pe Zofar mih,“Maiawngün maten dow ang matia mik hown ang khi khowk,now ang matia param hown ang ta hanow ang tukta khowk chekhai.2Enni tukah mih ang paw tuk chow,enni lak-e ang lang smu dowi chekhai.3Tawkche lowra nowng chang mih Thurai hown taklang kown ang nau,ang ngare mih lawnguan kowi aia hown talawp kown ang nau.4Enni dow lainowm kowi dai lai hown phumah khai,enni dow asung uowi dowi mih maru rawk mih chekhai.5Uh, enni che ririmma uowi panü dow,prengiama mih lup enni chang mih naown diah.6Kawmat mih ang kowh laiklow sünta büa diah,ang natekah kown mih laiklow kowi pe ching büa diah.7Thurai vüi kowi enni tek lai ngak kown bow?Aia vüi kowi enni tek dai lai kown bow?8Aia prakowi enni tawi tangi mih bow?Thurai vüi kowi enni uang taüa mih bow?9Aia che chaing enni e dow enni naiung kown bow?Maru kowi ia kuan iawng aia kowi paw enni ia kuan kown bow?10Enni che kukpa aia prakowi tawi tangi hanowaia dow nanang enni ngengche kown.11Aia kowh kri kraingra kowi enni kram dowi bow?Aia kowh kramra khi chepaw enni kram dowi tak bow?12Enni kowh prengia lai dow plawi iawng asung uowi dowi chekhai,enni tek ang mih laiklow ün dow suplawk nek iawng kaah tawng dowi chekhai.13“Enni ririmma uowi büa diah,now ang kowi pe tek ang lai büa diah.Nami kung kowi dow ang luk kowi lowra iawng pacham uang phaw lah.14Ow, ang kowh chownglawng kowi ang nape klaah phih kown;ang kowh sak kowi kowh uowi mih maten ang natekta kown.15Thurai kowngta ang khai chepaw aia luk kowi ang naowmsak reng kown,now aia pur kowi dow ang lawnguan kowi ang natek laiklow kown.16Ang kowh sak plaira dow nami chowtaih.Tawngplawng kowchow panow maru ngak dow Thurai pur kowi ia iowng dowi chekhai.17Ang kowh laiklow maten süntaah kaneu büa diah,ang tekah mih laiklow maten enni pacham ta lah.18Ang lawnguan kowi ang natekah kown mih laiklow kawmat ang kamrütta hüah khowk.Naiawng rakowi ang dow achinawmma naown kown towbowt mih ang tuk chekhai.19Ang chang ngak pami mia chow ia tek kown?Nami che ia tek hanow laila dowi kowi ang nakowng kown,” pakhai.20Jawb tek mih, “Aw Thurai, mami pre chap mih lup phai iu chang ang diah:ang luk kowi kowh en kowh ripra alakma kowi henta ang diah,now hauang tüng ang kramra tham bowt diah.Nahanow en pur kowi ang naia iowng kown towbowt.22En haw ang mih khin khe ang naklang en bowt kown,nadowi now pe tek ang laiklow diah, now en klang ang diah.23Tawng angak chow ang chang mih uang tek ang diah,ang kowh aprek hai angak mih uang tüng ang diah.24Tawngplawng kowchow en cham dangta ang lumowr khai?Now tawngplawng kowchow en nüla ang ransu khai?25Li hown kowh rown mih singh ram iawng mih maru kowi en natüng pe kram kown bow?Chapli iawng rown mih maru kowi en nasenah kown bow?26“Tawngplawng kowchow panow ang lawnguan kowi kingküala mih laiklow en ruiah khai,now ang klanguüa khe kowh angak maten en plau ang khai.27Ang kowh khawk kowi dow en krua ang lawngha leng kuar khai;ang cham mang cham katra kowi dow en krawi mü ang khai,now ang cham mangra tiama ün kowi paw en krawi chaing ang khai.28Ang dow asuma mih uanh iawng piak khai bowt,dung kremta nak mih uanh iawng ang phaw khai bowt,” pakhai.
The Seed Company