Jeremia30
1CHAKRAMANG kowh laiklow dow Jeremia tut-e maiawng uang ting khai:2“Ang CHAKRAMANG Israeluüa kowh Thurai tek khowk, ang tek en mih laiklow maten chabowih lowkchow kowi ruiah diah.3Tawngplawng kowchow panow maiawng mih khin dow nauang ting kown. Nami khin khe dow ang maru Israeluüa hai Judauüa kowi amatni cham takhangra hownia ang nauang pawla kown, now amatni kowi dow amatni pipu-uüa kowi kowh ang peah mih pren kowi ang nape uowiah kown. Nami pren dow amatni nimkrüa kowi nauowi kown,” pakhai.4Israel hai Judauüa lawnguan kowi CHAKRAMANG tek mih,5“Ang CHAKRAMANG tek khowk, kram kowh maru hek klow ang ta khai,amatni dow thaulangra uowi dowi chekhai.6Krawi lünta büa madiah,kachakuüa nowng pen chah tak bow?Naiawng now tawngplawng kowchow akürma mih kachakuüa hawmh penchow kimuowi mu rau khe kowh masiuüa iawng tuk bet mu khai?Tawngplawng kowchow kowng miuüa lumowr iawng aboma amatni kowi ang tuk khi khai?7Naiawng nauang ting kown mih ni dow kramra uowi lai kowbow!Naiawng mih ni dow katpaw uowi dowi tak chekhai.Nami dow Jakawb kowh krat pusara ni naown kown.Tawkche achur khe dow aia kowi ang nalawngah kown.8“Ang mukuang siphaiuüa kowh CHAKRAMANG tek khowk. Nami khin khe dow amatni pangkawt kowi kowh laithawn ting mih ang naklowkta pe kown, now amatni takhuowkla mih leng paw ang nalatta pe kown. Nahanow amatni kowi dow prenlang maru-uüa mih naia changla nar kown nadowi bowt.9Amatni dow CHAKRAMANG amatni kowh Thurai lup nachang bowt kown, now David krungchak hownia kowh ang towah kown mih mang kowh lup nachang büah kown.10“Naiawng rakowi aw ang kowh nar Jakawb, hangkow kram büa diah,aw Israel, hangkow sak nen diah.En hai en krungchakuüa dow akeng pren kowi cham takhang khai.Nachenganchepaw nami hownia ang nauang lawng enni ngengche kown;Jakawb dow uang plan hanow thaulangma nauowi iawk kown,now aia dow mia kowi paw nakram kown nadowi bowt.11Tawngplawng kowchow panow ang dow en tut-e tawi uowi reng chekhai,now en kowi dow ang nalawng en kown.Ang cham uet en mih chenchapuüa kowi dow asaima ang napiakah kown.Tawkche enni kowi dow asaima ang napiak enni kown nadowi.Rip enni dowi matchang ang nalawt enni kown nadowi.Tawkche tara nowm hown ang nahawi enni kown,” pakhai.12CHAKRAMANG tek mih, “Enni kowh ma dow nowng iung dowi bowt chekhai,now raw paw nowng rawah dowi bowt chekhai.13Enni kowi natawi tangila enni kown mih miapaw uowi dowi;enni kowh ma vüi chakhang uowi dowi chekhai,now enni vüi iungra uowi dowi bowt.14Sakrau enni miuüa tamata enni tüng khowk;amatni dow enni lawnguan kowi tuak dowi bowt chekhai.Enni kowi dow ransu-uüa pe enni ngarau iawng ang pe enni ngarau khai,now rip chamang ang rip enni khai.Tawngplawng kowchow panow enni kowh angak dow hu mih nowm khowk,now enni kowh aprek paw hu mih nowm khowk chekhai.15Tawngplawng kowchow enni kowh ma rakowi enni lang kar rereng?Enni kowh arau dow ia iung dowi bowt chekhai.Naiawng ang chang enni mih dow enni kowh ngak hu lai rakowi chekhai.16“Tawkche enni kowi kowh piak enni miuüa maten kowi dow ang napiakah kown,now enni ransu-uüa dow nacham takhang kown.Rupta enni dawngthawnguan miuüa kowi dow amatni kowh dawngthawnguan ang narupta pe kown,rupta enni uanh miuüa kowi dow amatni kowh uanh ang narupta pe kown.17Tawkche enni kowi dow kow iungma ang nachang enni kown,now enni kowh ma dow ang naiungta enni kown.Tawngplawng kowchow panow maru natek enni kown mih,‘Nami dow alakma kowi kowh maru prütta mih Zaiawn marow iawng taih,aia kowi dow amiapaw krawi chamah dowi bowt,’ napa kown,” pakhai.18CHAKRAMANG tek mih, “Jakawb krungchakuüa kowi ang nauang pawla pe iungra iawk kown,now amatni kowi dow ang nasaksing sanaah iawk kown.Marow dow piak mih arah kowi naplan thawpah iawk kown,now mang kim paw auown khe kowh arah kowi naplan thawpah iawk kown.19Maru-uüa mih natek awmrawm meng hai napiaw kown.Amatni kowh maru iun dow akawmma ang nachangah kown,now amatni dow maru iun na-e kown nadowi.Amatni kowi dow ringkawma mih maru ang nachangah kown,amatni kowi dow amiapaw nasuiah kown nadowi.20Amatni kowh chauüa dow alai khe kowh iawng naphaw kown,now amatni kowi dow ang pur kowi akürma mih chenchap ang nachangah kown.Amatni kowi kowh changah nowng miuüa kowi dow ang naripah kown.21Amatni pungmadawng hownia aluchow nauang uowi lowk ia kown,amatni pungmadawng hownia kruitown mih nauang uowi lowk ia kown.Aia kowi dow ang nahawah hanow aia mih ang tut-e nauang kown.Ang hawah dowi hanow mia chow ang tut-e uang uam uang kown?22Enni dow ang maru nachowng kown,now ang dow enni kowh Thurai nachowng kown,” pakhai.23Sünta büa diah, CHAKRAMANG kowh kunmaraura dow liku uangchak iawng nauang kla kown,nami kunmaraura dow maru ngakuüa luk kowi nauang kla kown.24CHAKRAMANG kowh kunmaraura dow sak ta-ih iawng changta dowi mowr naprowng kown nadowi.Nami dow pur prakowi achima enni natuk kown.
The Seed Company