Jeremia29
1Jeremia dow Babulawn pren kowi cham takhang miuüa tut-e Jerusalem marow hownia krawi sak cha lowk khai. Nami chasak dow takhang miuüa pungmadawng kowi kowh ta sing mih lawngtang aluchowuüa, uamowuüa, risiuüa hai akeng mih maru-uüa tut-e kowh aia sak pe mih chekhai. Naiawngün maru-uüa kowi dow mang Nebuknezar mih Jerusalem marow hownia khümla hanow Babulawn pren kowi pawla khai.2Nami chasak Jeremia ruiah mih dow Juda pren mang Jehoiakhin, a-u, akletia maru iukuüa, Juda hai Jerusalem kowi kowh aluchowuüa, singh hown kowh uanh thawp sara hai kri hown kowh uanh thawp sarauüa kowi Jerusalem marow hownia khümla hanow Babulawn pren kowi pawla kung kowi chekhai.3Safan kowh chapa Elasa hai Hilkia kowh chapa Gemaria iüah kowi dow Juda pren mang Zedekia mih mang Nebuknezar tut-e kowchinah khai. Amatchi kung kowi Jeremia dow nami chasak krawi ap pe khai. Nami chasak kowi dow maiawng arui uowi:4Mukuang siphaiuüa kowh CHAKRAMANG Israeluüa kowh Thurai mih Jerusalem hownia khümla hanow Babulawn pren kowi cham pe takhangah miuüa kowi tek pe mih,5“Nakowi khin krama enni nauowi kown. Naiawng rakowi thawp kim büa diah, now chang bakan büah hanow uih-ak mih cha büa diah.6Paw masi hanow prek chu prek chah büa diah. Enni kowh chauüa kowi paw pe masi diah, now amatni kowi pe kaah chah diah. Nakowi mih prung büah diah, maru iun a-echow hang uowi büa diah.7Nami klen kowi ang cham pe takhang enni mih marow kowi taking tasangra hai iuksownra nauowila kownkow chang lup büa diah. Nami marow vüi kowi ang tut-e uang lü uang leng büa diah. Tawngplawng kowchow panow nami marow che iung now enni paw naiung kown.8Enni pungmadawng kowi kowh risiuüa hai hawra sarauüa nowng kuan enni dowi iawng uowiah kaneu diah. Amatni khi-ah mih mukmang prakowi hang tawi pe ching büa diah.9Amatni dow ang ming hown krawi dai maru reng chekhai. Amatni kowi dow ang CHAKRAMANG uang chinah mih nadowi chekhai.10“Babulawn pren mang nar kowi 70 ning enni uowi kung kowi dow enni prakowi ang naplan pe ching iawk kown. Nakhowk khe dow ang takhamta mih iawng ang nachang enni aiung kown. Now enni kowh uowi rah Jerusalem marow kowi ang nauang plan pawla enni iawk kown.11Enni vüi kowi kowh ang kowh sangkrangra dow ang tuk. Nami ang kowh sangkrangra dow enni iung müa chekhai, enni piak müa nadowi. Nami sangkrangra dow pur pra kowh enni kowh sakowmra nauang tachila kown mih müa chekhai.12Nami khin khe dow enni mih nauang haw ang kown, now ang tut-e nauang lü nauang leng kown. Nahanow ang dow enni kowh laiklow nahawt sünta kown.13Enni che sak maiow hown cham ang hanow enni naka ang kown.14Ang kowi dow enni natuk ang kown, now cham takhangra hownia ang nauang pawla enni hanow alai kowh iawng ang natow enni iawk kown. Ang cham krawi uet enni mih chenchap hai arah hownia arasang ang nakua enni kown. Ang CHAKRAMANG mami laiklow ang tek khowk chekhai,” pakhai.15Enni natek kown mih, “CHAKRAMANG dow Babulawn pren kowi anging vüi uang chin anging risiuüa khai,” napa kown.16Tawkche David mang chowm rah kowi kowh chowm mang mih mang lawnguan kowi hai cham tawi takhang dowi kowh marow kowi ta uowi miuüa lawnguan kowi CHAKRAMANG tek mih,17“Ang mukuang siphaiuüa kowh CHAKRAMANG tek khowk. Amatni kowi dow tasenra, khown hai makowng hawi ang nauang chin pe kown, now kaah chak dowi mih uidut uih su iawng amatni kowi ang nachangah kown.18Amatni kowi dow tasenra, khown hai makowng hawi hown ang naprütah kown, now amatni kowi dow klang nga lai bowt rakowi lusa kowi kowh maru maten nakramah kown. Nami khin khe amatni dow naiawngün maru-uüa tut-e nachowng rensi kau kown, now maru nasuiah kown. Naiawng amatni own mih khi hanow maru kawmuüa dow amawlawma naphaw kown, now amatni ming hown maru mih natape piati kown.19Tawngplawng kowchow panow amatni dow ang nar risiuüa kowi kowh plan plan amatni tut-e ang pe tekah mih laiklow sünta büah dowi, now enni cham takhang miuüa paw sünta dowi chekhai.20“Naiawng rakowi Jerusalem hownia Babulawn pren kowi ang cham pe takhangah miuüa low, ang laiklow enni bowkbowk sünta büa diah.21Kawlai kowh chapa Ahab hai Maseia kowh chapa Zedekia iüah dow ang ming hown enni tut-e krawi tek dai lai khai. Naiawng rakowi ang mukuang siphaiuüa kowh CHAKRAMANG tek khowk, amatchi kowi dow mang Nebuknezar rut kowi ang naap-ah kown. Mang Nebuknezar dow enni pur kowi amatchi kowi nasaiah kown.22Babulawn pren kowi kowh cham takhang mih Judauüa maten dow amatchi ming hown maiawng natape piati kown, ‘Zedekia hai Ahab iüah kowi dow maih hown Babulawn pren mang towkah khai. Nami powm iawng en kowi dow CHAKRAMANG pacham chang en lah,’ pakhai.23Tawngplawng kowchow panow amatchi dow Israeluüa pungmadawng kowi suiiai kaniaima mih lup ngak chang khai. Amatchi dow kimping namkhetuüa kowh masi hown chang iang khai, now amatchi dow ang ming hown krawi dai maru khai. Naiawng amatchi chang mih dow ang tuk chekhai, now nami saksi dow ang chekhai. Ang CHAKRAMANG mami laiklow ang tek khowk,” pakhai.24Mami laiklow dow Nehelam krungchak Semaia kowi pe tekah diah:25Mukuang siphaiuüa kowh CHAKRAMANG tek mih, “En ming hown Jerusalem kowi kowh uowi mih maru-uüa tut-e, Maseia chapa uamow Zefania tut-e hai akeng mih uamowuüa tut-e en krawi sak cha khai.26Zefania kowi en rui pe mih, ‘Jehoiada takcha kowi CHAKRAMANG mih pe en uamow rah khai. Nami dow CHAKRAMANG chup kim kowi kowh lup chang miuüa kowi en pacham ia kruitown lah pakowh chekhai. Naiawng rakowi athukma mih maru che risi iawng chang lup khai hanow aia kowi dow lawngha leng hown ngawng kowi en nakhuowkah kown takla.27Nachenganchepaw enni tut-e uang chang risi iow now uang tek lai chepaw Anathawt marowchak Jeremia kowi dow tawngplawng kowchow enni ripah dowi?28Aia dow Babulawn pren kowi anging tut-e maiawng uang krawi sak cha khai. Nami chasak kowi arui uowi mih dow Babulawn pren kowi khin krama anging nauowi kown mih, nakowi nachang kim üa kown mih hai kowmatia chak müa nachang bakan kown mih lawnguan kowi chekhai,’ pakhai,” pape khai.29Nami chasak dow Zafania mih risi Jeremia pur kowi phat pe khai.30Nami khin khe CHAKRAMANG kowh laiklow dow Jeremia tut-e maiawng uang ting khai:31“Mami satang dow cham takhang miuüa maten tut-e kowphowng pe diah. Nehelam krungchak Semaia lawnguan kowi CHAKRAMANG tek mih, ‘Semaia kowi ang uang chinah mih nadowi. Nachenganchepaw aia dow enni tut-e risi iawng uang tek dai lai khai. Dai lai kowi aia dow pe owm enni khai.32Nehelam marowchak Semaia kowi ang naripah ngengche kown, now aia krungchakuüa kowi paw ang naripah kown. Aia chenchap pungmadawng kowi amiapaw nauowi kown nadowi, now ang maru-uüa kowi ang changah aiung mih paw amatni mih nakhi kown nadowi. Tawngplawng kowchow panow aia dow kingküala ang mih laiklow krawi phuang khai. Ang CHAKRAMANG mami laiklow ang tek khowk,’ pape khai,” pakhai.
The Seed Company