Jeremia17
1CHAKRAMANG tek mih, “Judauüa kowh angak dow lawngha her müa hai maiak chukchem hown ruiah khai. Amatni kowh angak dow naiawngün uanh hown hua iawng akhawtma mih amatni kowh sak kowi hai phuchuara nang kowi ruiah khai.2Amatni kowh chauüa khowm padow akeng thuraiuüa kowh phuchuara kowi hai Asera limpu chüng kowi cham tawi chupiia khai, now aram chakma mih singh tut kowi hai alowngma mih hungh kowi ün cham tawi chupiia arup khai.3Aw Juda, en dow chang ngak khai. Naiawng rakowi ang narip en kown. En kowh dawngthawnguan hai en kowh dawngthawnguan towk rah kowi kowh uanh maten ransu-uüa napawta en bowk kown. Now paprenma kowi kowh arah kroma mih kowi kowh chupiiara ang napiakta en bowk kown.4Ang pe en mih pren dow en kowh angak rakowi en namata kown. En kowi dow en tukah dowi mih pren kowi en ransu-uüa kowh nar ang nachang en kown. Tawngplawng kowchow panow en dow maih lün pluplup mih iawng en towk ang kunmarau khai; nami kunmaraura dow katpaw naprowng kown nadowi,” pakhai.5CHAKRAMANG plan tek mih, “Maru luk kowi neplawng nesak mih dow naka piati kown,kowmatia kür kowi owmsak mih paw naka piati kown.Nami klen kowi ang luk kowi owm dowi mih maru paw naka piati kown.6Naiawng mih maru dow apiaknama mih laih kowi kowh chuh mung iawng chekhai;aia dow süngrüp süngkangma kowi aden dawng kowi nauowi kown.Aia dow khin iung uang ting khe natawi khi kown nadowi.7Tawkche CHAKRAMANG luk kowi neplawng nesak mih dow prasira uowima chekhai.Tawngplawng kowchow panow aia owmsak mih dow CHAKRAMANG luk kowi chekhai.8Aia dow aw pang kowi chowkah mih singh aprün ka tui reng mih iawng chekhai,satma khin uang ting chepaw aia dow kram dowi.Aia kowh aram dow asingma uowi reng chekhai;sat kang chepaw aia dow tawngpaw taprüa dowi,now aia dow uih chakma mih singh iawng uih reng chekhai.9“Maru kowh saktuak dow kuanlama chekhai,sak hown tawng chow maru tuak mih amiapaw tuk dowi.Sak kowi dow amiapaw nowngia iungah dowi chekhai.10Ang CHAKRAMANG dow maru kowh sak hai saktuak mih chaing reng,ang dow maru kowh chowm krang uowi krang hai amatni kowh lup chang krang iawng peah asung reng chekhai.11Lup ngak hown kram dawngthawnguan mih maru dow akeng mih uakling dui kowi cham krawi awr mih uamuk iawng chekhai;naiawngün dawngthawnguan dow aia chownglawng dawnglang khe natama bowk kown,now chownglawng chur prakowi aia dow abualama pami natatuk kown,” pakhai.12Anging kowh Thurai chup kim dow kri kraingma mih mang chowm rah iawng chekhai.Nami dow achük alai hownia alowngma mih hungh kowi iowng dawnglawng khai.13Aw CHAKRAMANG, Israeluüa kowh sakowmra,en kowi nuata en miuüa dow naka rukrai kown.Amatni dow lusa kowi kowh bawn kowi natadup kown.Tawngplawng kowchow panow amatni dow masing tuikuam CHAKRAMANG kowi nuata büah khai.14Aw CHAKRAMANG, ang kowh arau iungta ang diah, nahanow ang naiung kown,lawng ang diah, nahanow ang naka lawngra kown.En kowi chowtaih ang narowsi en kown.15Juda maru-uüa dow lünta ang mih, “Tawng kowi chow CHAKRAMANG kowh laiklow?Tawngplawng kowchow aia kowh laiklow uang tachi dowi?” pakhai.16Aw CHAKRAMANG, en maru-uüa kowi nakruitown kown mih hownia ang powt dowi,amatni luk kowi phih nauang ting kown mih ang nau dowi chekhai.Ang nawr hownia kowh lawt mih laiklow maten dow en tuk bowk khowk.17Hauang tüng ang kram diah;en chowtaih ang kla phih khe kowh tatung tanimra.18Chang ang anowng apowng miuüa kowi dow peah rukrai diah.Tawkche ang kowi dow rukraira hownia lawng ang diah.Amatni kowi dow piakah diah.Tawkche ang kowi dow hauang piak ang diah.Amatni kowi dow kramra uowima mih ni uang pawla pe diah,now piak chamang piakah diah.19CHAKRAMANG tek ang mih, “Juda manguüa uang mang uang katla reng mih Maru Kawm Tapplawt re-e kowkowi now kowiowng diah, now ang kowh laiklow hawt phuang diah. Jerusalem marow kowi kowh akeng mih tapplawt ün kowi paw naiawng kowkrawi phuang diah,” pakhai.20CHAKRAMANG pe tek ang mih, “Mami marow tapplawt iawng uang kup mih Juda manguüa, maru kawmuüa hai Jerusalem marowchakuüa low, enni mih CHAKRAMANG kowh laiklow sünta büa diah.21CHAKRAMANG tek mih, ‘Kaneuma uowiah büa diah. Tanai Ni khe tawng iawng mih kurdik paw enni nachang kown nadowi, now Jerusalem marow tapplawt iawng paw enni nauang kupla kown nadowi.22Tanai Ni khe dow kim kowi kowh tawng iawng mih uanh paw enni nacham kurla kown nadowi. Nami ni kowi dow lup paw enni nachang kown nadowi. Tanai Ni dow chimsaima enni nasunah kown. Mami ana dow enni pipu-uüa kowi paw ang peah khowk chekhai.23Tawkche enni kowh pipu-uüa dow ang laiklow sünta dowi, ching paw pe büah dowi chekhai. Amatni dow saktuak akhawtma changah khai. Amatni kowi dow ang ripah khowk chowdiah. Tawkche tawngpaw mrawk dowi chekhai. Amatni dow ang kowh tawng iawng mih laiklow paw chün dowi chekhai.24“‘Nachenganchepaw enni che ang laiklow kaneuma sünta khai, Tanai Ni khe che marow tapplawt iawng uang changla kurdik dowi, now cham chang lup dowi kowi Tanai Ni che chimsaima enni sunah khai hanow25enni kowh manguüa dow mang David kowh mang chowm rah kowi chowm se nakruitown pren kown. Now amatni, amatni kowh maru iukuüa, Juda maru-uüa hai Jerusalem marowchakuüa dow kawrnga kari hai kawrnga hown marow tapplawt iawng nauang mang nauang kat kown. Mami marow dow katpaw akhaw aklaima nauowi kown nadowi bowt.26Juda pren kowi kowh marow maten hownia maru kawmuüa dow Jerusalem marow kowi nauang kown. Jerusalem riaret kowi kowh kua hownia, Benjamin süng hownia, hungma mawngma süng hownia, laina süng hownia hai Negeb süng hownia maru kawmuüa mih Jerusalem marow kowi nauang kown. Naiawngün maru-uüa dow CHAKRAMANG kim kowi tikah mih uanap, tawncher phuchua, kawmdi uanap, nam iungma mih maikhük towk müa hai awmrawm lai tek müa uanap nauang pawla kown.27Tawkche enni che ang kowh laiklow chün dowi, Tanai Ni paw ang vüi kowi chimsaima enni sunah dowi, now nami ni khe Jerusalem marow tapplawt lak kowi uang kupla kurdik khai hanow Jerusalem marow kowi kowh tapplawt maten ang natowkta kown. Now nakowi kowh akhawtma mih kangchawngra kim ün ang natowkta bowk kown. Nami maih dow amiapaw naia mit kown nadowi,’ pape diah,” pakhai.
The Seed Company