Jeremia16
1Nami kung kowi CHAKRAMANG laiklow mih ang tut-e uang plan ting khai. CHAKRAMANG tek ang mih,2“En mih Juda pren kowi hang paw masi diah, now chauüa paw hang paw diah.3Tawngplawng kowchow panow ang CHAKRAMANG tek khowk, nami pren kowi kowh dia mih chauüa hai amatni kowh upa-uüa dow rawka dikma hown nakowng kown. Amatni vüi kowi dow amiapaw nakar kown nadowi, now amatni kowh uak dow amiapaw nadupah kown nadowi. Amatni kowh uak dow chia kih iawng krawng kowi natakuakla pan kown. Amatni dow tasen hai khown hown nakowng kown, now amatni kowh uak dow uaklinguüa hai kaurawng uaramchak hawmh kowh chakkham nachowng kown.5“Uowila uiting uangtak mih maru kim kowi dow hang pün diah. Amatni vüi kowi natawi kar kownkow hai natawi taprüa taiia kownkow nakowi hangkow kowi diah. Tawngplawng kowchow panow naiawngün maru-uüa kowi dow ang kowh thaulangra, ang kowh achur uowi dowi mih sakraura hai saksing sanara ang pawta pe khai bowt.6Nami pren kowi kowh maru iukuüa hai maru sowmuüa dow nakowng bowk kown. Amatni kowi dow amiapaw nadupah kown nadowi, amatni vüi kowi dow amiapaw nauowila uiting uangtak kown nadowi, sak piak kowh kowmatia kowpaw amiapaw natata kown nadowi, now kowmatia sam paw amiapaw nakhai kown nadowi.7Uowila uiting uangtak miuüa kowi dow nadepah kownkow amiapaw nauang pawla pe chakkham kown nadowi, now u-pa vüi kowi kowh uowila uiting uangtak miuüa kowi paw nadepah kownkow amiapaw nauang pawla pe tui kown nadowi.8“Chang pawi mih kim kowi hang cham cha hang cham kham büa diah.9Tawngplawng kowchow panow ang mukuang siphaiuüa kowh CHAKRAMANG Israeluüa kowh Thurai tek khowk, nami pren kowi dow maru-uüa piaw sawmlawm mih klow ang narimta bowk kown. Tapün talo mih masi huaiu sar kowh piaw klow nata kown nadowi bowt. Naiawngün dow en sing uowi reng tak khe nauang phaw kown.10“Naiawngün laiklow amatni kowi en tek pe mih khin khe maiawng amatni nalünta en kown, ‘Anging luk kowi phih nauang ting kown mih laiklow tawngplawng kowchow CHAKRAMANG tuk tek anging khai? CHAKRAMANG anging kowh Thurai kowi kingküala mih angak tawng chow anging changta khai?’ napa kown.11Nakhowk khe ang CHAKRAMANG kowh laiklow maiawng amatni kowi en natek pe kown, ‘Enni pipu-uüa dow nuata ang khai. Amatni dow akeng thuraiuüa kowi cham tawi chupiia khai. Amatni dow nuata ang khai, now ang kowh ari aiang chün büah dowi chekhai.12Tawkche enni dow enni pipu-uüa lak-e enni lang chang angak khai. Enni dow ang laiklow chün dowi kowi enni kowh angakma mih sak nau iawng enni uowi khai.13Naiawng rakowi ang dow enni tukah dowi mih pren kowi ang nakuakta enni kown. Nami pren dow enni pipu-uüa khowm tuk dowi chekhai. Nami pren kowi dow ni towng iak towng akeng thurai kowi enni nachupiia kown. Tawngplawng kowchow panow ang dow nasaksing enni kown nadowi bowt,’ pape diah,” pakhai.14CHAKRAMANG tek mih, “Maiawng mih akhin nauang ting kown. Nami khin dow maru kawmuüa mih, ‘Aigupta pren hownia Israeluüa kowi uang lawtla mih masing CHAKRAMANG ming lüklau se ang takham khowk,’ pami natek kown nadowi bowt.15Nami takcha amatni natek kown mih, ‘Israeluüa kowi tawngphak pra kowh pren kowi hai akeng pren kowi prütah mih hownia uang lawngla mih masing CHAKRAMANG ming lüklau se ang takham khowk,’ napa kown. Naiawng amatni natek kown mih dow amatni pipu-uüa kowi kowh ang peah mih pren kowi amatni kowi ang nauang pawla kownkow chekhai.16“Tawkche kawmat dow amatni kowi nakhümah kownkow ransu-uüa kowi ang nakowchin pe kown. Nahanow ransu-uüa dow amatni kowi dam khüm iawng nakhümah kown. Nami kung kowi dow chakmit miuüa kowi ang nauang chin pe kown. Naiawngün chakmit miuüa dow aiukma mih hungh hownia, asowmchow mih hungh hownia hai hua pheng krüa hownia amatni kowi nakhümah kown.17Tawngplawng kowchow panow amatni kowi dow ang krawi tang müah reng chekhai. Amatni kowh angak dow ang khi reng. Amatni kowh angak dow ang tut-e ia tapet dowi chekhai.18Amatni chang angak rakowi amatni kowi dow pre dungna mowr ang naripah kown. Tawngplawng kowchow panow amatni dow ang kowh pren mih sürlawkta ang khai. Amatni dow ang kowh pren kowi suiiai kaniaima mih arup kangowh changah khai,” pakhai.19Aw CHAKRAMANG, en dow ang ko kür hai ang kowh akhawtma mih kangchawngra kim chekhai,en dow kawmkratma ang uowi khe kowh tatung tanimra chekhai.En tut-e dow prenchur nammowt hownia akeng chenchapuüa nauang kown,now amatni natek kown mih, “Anging pipu-uüa dow asung uowi dowi mih arup aren kowi chupiia khai.Tawkche naiawngün arup aren dow amatni kowi tawngpaw nowng khowngah dowi chekhai.20Kowmatia vüi kowi maru nowng thawp Thurai khai bow?Thawp khai chepaw naiawngün dow Thurai ching nadowi chekhai,” napa kown.21CHAKRAMANG tek mih, “Naiawng rakowi khaleng dow chenchapuüa kowi ang kowh nowng changra hai ang kowh kür ang natüng pe kown. Nakhowk khe dow amatni mih ang chowtaih CHAKRAMANG pami natuk büah kown,” pakhai.
The Seed Company