Jeremia18
1CHAKRAMANG kowh laiklow dow Jeremia tut-e maiawng uang ting khai,2“Awr rü hanow bawn hown kowh uanh thawp mih maru kim kowi kowkowi diah. Nakowi en kowting khe ang naklang en kown,” pakhai.3Naiawng rakowi ang dow bawn hown kowh uanh thawp mih maru kim kowi kowkowi khai. Nakhowk khe nami maru dow lawngkua kowi bawn hown hawt chang lup thüm chekhai.4Tawkche bawn hown kowh aia thawpah mih puh dow aia nau iawng phaw dowi rakowi aia piakta khai. Now nami bawn hown aia nau iawng plan thawpla puh lowk khai.5Nakhowk khe CHAKRAMANG kowh laiklow mih ang tut-e uang ting khai. CHAKRAMANG tek ang mih,6“Ang CHAKRAMANG tek khowk, ‘Aw Israeluüa, nami bawn hown kowh uanh thawp mih maru iawng ang nowng chang enni dowi tham pabow? Aw Israeluüa, bawn hown kowh uanh thawp mih maru rut kowi kowh bawn iawng enni dow ang rut kowi uowi khai.7Maiawng mih khin uang ting chepaw naia kown. Nami khin khe dow chenchapuüa kowi hai prenchakuüa kowi aprün hailawm singh chawi iawng nachawiah kown mih hai napiakah kown mih laiklow ang natek kown. Tawkche nakhowk khe amatni che naiawngün laiklow tata hanow angak hownia uang plan mih prenchak hai chenchapuüa luk kowi ang khowm bowkta mih ripra ang nauang pe tingah kown nadowi bowt.9Now tawngbak mih chenchap hai prenchak kowi naiuk nasownah kownkow hai aiung nachangah kownkow ang phuang chepaw naia kown. Tawkchedow amatni che ang laiklow sünta dowi, now ang pur kowi chang angak khai hanow amatni kowi nachangah iung kownkow ang tekta mih dow ang nachang pe kown nadowi,’ pape diah.11“Naiawng rakowi kawmat mih Judauüa hai Jerusalem marowchakuüa kowi ang CHAKRAMANG kowh laiklow maiawng kowtek pe diah, ‘Sünta büa diah, enni vüi kowi phih hai kingküara ang kamrütta enni hüah khowk. Naiawng rakowi lup ngak chang hownia uang plan büa diah, enni kowh chowm krang uowi krang klowita büa diah, now lup iung chang büa diah,’ pape diah.12Tawkche amatni natek en kown mih, ‘Naiawng en tek anging chepaw anging nasünta kown nadowi. Anging sangkrangta iawng anging nachang kown. Anging chowlowkkow saktuak ngak iawng anging nauowi reng kown,’ napa kown,” pakhai.13Naiawng rakowi CHAKRAMANG tek mih,“Ang kowh chama malauüa Israel dow suiiai kaniaima mih lup ngak chang khai;naiawng mih lup ngak nami dowi rawn khe chang mih ta ne chünchü akeng chenchapuüa tut-e krawi lünta madiah.14Lebanawn süng kowi kowh nangkhe ter tak bow?Hungh hownia kowh uang hawr mih tui kang kakat tak bow?15Tawkche ang maru-uüa dow tamata ang büah khai,now asung uowi dowi mih arup aren kowi nam iungma mih maikhük cham towk büah khai.Amatni dow amatni kowh tiama nowm hownia tatheu hanowtiama prim kowi mang büa dowi bowt chekhai.Amatni dow tiama iung auarma mih kowi towta hanowtiama ngak abiuchow kowi mang büa khai.16Naiawng rakowi amatni kowh pren dow apiaknama mih laih iawng naphaw kown,nami pren dow suiiai kaniaima mih uanh iawng naphaw kown.Nami pren iawng kowmang miuüa dow naawda kown,amatni dow awda rakowi nalekla lu büah kown.17Amatni kowi dow ransu-uüa pur kowisatlawt li uang khe kowh iawng ang nauetah plawt kown.Amatni kla phih mih khin khe ang nadangta pe kung kown,” pakhai.18Nakhowk khe ransu-uüa tek mih, “Chu, Jeremia kowi kingküala kown mih prengia a-i thawp lah. A-i tut-e uamowuüa, chanlai miuüa hai risiuüa akawmma uowi chekhai. Aia kowh tüngsangra lai, prengia lai hai risi laiklow a-i lakke dowi. Chu, aia lawnguan kowi a-i krawi uet nang ngak lah, now aia krawi tek mih maten a-i nuata lah,” pakhai.19Aw CHAKRAMANG, ang kowh laiklow sünta diah,Ang ransu-uüa ang lawnguan kowi tawng chow tek mih pe ching diah.20Ang dow amatni kowi aiung hown ang klangah reng chowdiah.Tawkche amatni dow sai ang kownkow thai ang kuam khai.Tuakah diah, en pur kowi iowngah now amatni vüi ang tek lai khai;nami dow en kowh kunmaraura amatni luk kowi hauang pacham ting lah pakowh chekhai.21Naiawng rakowi amatni kowh chauüa kowi dow khown hown pe kowngah diah;ransu-uüa kowh saidawng hown pe kowngah diah.Amatni kowh masi hawmh dow chah uowi dowi mih mamaimow iawng pacham phaw lah;amatni kowh kachakuüa hawmh dow rawka hown pacham kowng lah,now amatni kowh klanguüa hawmh dow tasenra kowi kowh saidawng hown pacham kowng lah.22Amatni kowi dow uang chin pe ransu-uüa hanow uang senah diah,nahanow amatni kowh kim hownia kar klow nata kown towbowt.Tawngplawng kowchow panow amatni dow khüm ang kownkow thai ang kuam büah khai,now ang natasowkla kownkow chak ang leng büah khai.23Tawkche aw CHAKRAMANG, nakowngta ang kownkownaiawng amatni sangkrang mih dow en tuk chekhai.Amatni kowh angak dow hangkow lawtta pe diah,now amatni kowh angak mih hangkow iawtta pe diah.Amatni kowi dow en pur kowi pe piakah diah,en kowh kunmaraura hown amatni kowi ripah diah.
The Seed Company